الختم الاداري كان يوماً مختلفاً (1 زائر)

YAFA - 29/6

26 - 6 - 2025
سوريا - مضايا
هناك كانت رحلتي

مضايا هي بلدة ريفية تقريباً في سوريا، تتبع منطقة الزبداني في محافظة ريف دمشق، وبهالمنطقة في نبع اسمه " نبع بقين "
مياهه عذبة تجنن ومنها يتم تعبئة وتصدير لكل محافظات سوريا بقارورات مشهورة بإسم هذا النبع، وكلما نروح لهناك لازم ناخذ منه
تقع بلدة مضايا شمال غرب دمشق، على السفح الشرقي لسلسلة جبال لبنان الشرقية، تبعد عن مركز العاصمة حوالي 45 كيلومتر
وهي من أهم المصايف في سوريا مع مدينتي الزبداني وبلودان

حصلت على زهرة هدية، فجاءت في اللحظة المناسبة كلمسة ناعمة
بالنسبة للمظهر اللي بالخلفية حيتم شرحه فيما بعد، تحسه خيالي صح؟
توك ما شفت شي، الجاي أعظم..

شجر الخوخ، ما كان مستوي كثير بحيث المفروض يكون لونه بالكامل أحمر قاتم ويكون مذاقه حلو
لكن الشجر هنا ما زالت ثمارها خضراء وطعمها حامض جداً من النوع اللي احبه لهيك كنت اقطف وأكل
كان في كمان شجر مشمش، وتفاح أخضر! لكن مثلما قلت كلهم حامض.. وهالشي من حظي
نحنا بكل صيفية تقريباً نعمل رحلة لمضايا، نستأجر مزرعة ليومين، وصاحبها يعطينا الإذن بالقطف والتذوق

يا مسافر وحدك... وفايتني، ليه تبعد عني.. ليه تبعد عني وتشغلني
ودعني.. من غير ما تسلم! وكفاية قلبى انا مسلم
دي عنييا دموعها ... دموعها بتتكلم
الأغنية اللي كنت اسمعها بالمكان بهي اللحظة، حتى الصور الصامتة تذكرك بالجو
بالرائحة، بالشعور، باللحظة، جذبني خلط المساحة بالنبات الاخضر بهالصورتين
بالنسبة للصورة اللي عاليسار، فهي أول مرة كنت اشوف هذا النوع من النبات حقيقي ومش صناعي

من أحلى الاشياء اللي كانت موجودة بالمزرعة هنيك هو الفن! هذا مش باب حقيقي
عبارة عن خشب وحجر ورسم نافر، كان تفصيل رهيب جداً، يعني طابع انك بمكان باب الحارة او شي زي هيك

تستقبلكم في المدخل هذه الأزهار الجميلة، واول مرة اشوف هالنوع فمادري عن اسمها
أثار استغرابي اللب تبعها، منفوش ونافر، كأنه كرة مليئة بالخيوط، مش باينة بهالصورة
سبحان الله متناسقة ألوان وراقها مع اللب، قضيت اغلب الوقت اجي لعندها كل شوي اتأملها
- الصورة الأولى عادي والثانية بورتريه -

على الجانب الاخر لفت نظري هالتناسق الغريب والتداخل العفوي ببعض، عندي منها هالنبتة
لكن بشكل مختلف يعني مو متفرعة بشكل ناعم، ريحتها تجنن، اغصانها لونها فاتح جداً متل لون الألماس
ورحيقها ذهبي فمنظرها يجنن سبحان الله، فما بالك اشوفها داخلة من تحت ذراع الكرسي اللي متناسق مع لونها؟

جمعت هنا الصباح والمساء، حتى الحمامة جت تاخذ صورة من الشباك
والمنظر الثاني كان من الأرض الزراعية، التوقيت بعد غروب الشمس
السماء تصير كأنها بنفسجية اللون، والشجر الأخضر يميل للرؤية السوداء
فيعطي جو خيييالي

هنا نزلنا أنا و @Julie بشكل سري عالأرض اللي لها باب سرية كأنها الحديقة السرية وعلقنا هناك لان الباب انقفل
لقيت أغرب أنواع النبات! منها الناعم والجميل مثل الصورة اللي عاليمين
ومنها الوحشي والمخيف مثل اللي باليسار، انا لمستها حادة وصلبة!
يعني إذا ضربتها في وجه شخص ما، حيفقد كل ملامحه
- تفكير إجرامي -

هنا حاولت @Julie انها ترصد القمر، وطبعاً انا اللي لفتت نظرها له بالأول
في السماء االأرجوانية مع لمسة سومو فاتح، والقمر باين كأنه ظفر، رفيع جداً
فحاولنا نرصده لما عتمت السما اكثر، احس في احد رح يسأل جولي معك!
تابع لتعرف

صورة الوردة اللي حتظهر معنا بشكل مختلف لاحقاً كلمسة سحرية، سبحان الله كل وحدة لافة وجهها بإتجاه
للأسف مارح اقدر اشوفها لما تفتح بشكل كامل كل ثمارها، عجيب ان في منهم متيبس قبل ما يفتح
الصورة الثانية هو مكاني المفضل على الصخرة بحديقة صغيرة تحت شجر الخوخ

تحس كأنك داخل ع غابة، شعور عظيم

​

هنا @Julie جت بفكرة اننا نقلد ترند شافته عالانترنت، بحيث كل واحد يختار لون، ويروح يشتري منتجات منه
هي اختارت الازرق، وطبعاً كل هالشراء هذا استخدمناه للتصوير بس وما لحقنا ناكل منه حرفياً
تم توزيعه كضيافة للحاضرين

هنا انا اخذت اخي الصغير عالمول وحققتله أحد أحلامه اننا نجيب عربة وناخذ كل حريتنا في الشراء
بدون لا حد ينتظرنا ولا يستعجلنا ولا اننا نهتم كم سعر هذا وذاك، يعني حتبقى ذكرى حلوة له
انا اخترت الاخضر وهو الأصفر ودخلنا ندور عالمنتجات، بعدها عملنا فيديوهات وافكار حلوة

هكذا كان الصباح، مشرق ومختلف عن أي يوم أخر
حتى الشمس التي كانت حارقة ومزعجة، بدت ساحرة هنا

صورة أخرى للنبات اللي كلمتكم عنه، لكن هنا من زاوية اخرى مع السيارة
التصوير بالبورتريه حكاية أخرى ...

هي الزهرة اللي حكيت عنها ببداية الموضوع، شفتو اللب كيف تحسه اسفنجي!
سبحان الله في حولها لسا مو مفتح يكون راسها عبارة عن كرة اسفنجية
بس حبيت ومنجد تحس كأنها تعبر عن المكان في حلاوته بألوان الغروب تبع الشمس
وألوان الخضار بالنباتات والاشجار اللي فيها

انا حبيت هالصورة بشكل خاص، الأوراق الخضراء اللي معبيتها
وفي بالمنتصف زهرتين صغار ناعمين بلون أبيض، بتخيلهم يحضنوا بعض عشان ما يحسوا بالوحدة

هذا المدخل مع بداية الممر ونهايته، حبيت التنسيق الزراعي اللي فيها
رغم ان المزرعة صغير بالحجم! لكن المناظر اللي فيها تعبي العين
بالإضافة للمسبح الكبير وعمقه مترين

هي الوردة ما قدرت استوعب شدة جمالها ما شاءلله، تحسها ملكية! ما كان في غيرها، شامخة لحالها بالحوض
ومتفردة بكل شيء من وقوفها للونها لشكل اللب تبعها
وكأن في عالم جواها، سبحان الله
تذكرت فلم تبع ذرة الغبرة وفي ناس ساكنين جواها، ماذا لو تحدثو بخيال عن هذه الزهرة؟

هالحلوة كانت اكبر اخواتها، ما اعرف اسمها
بس حلو التركيز عليها، احب الورد اللي تجي اوراقه مسننة في نهايتها

الصورة الاخيرة هي هو شكل الورد للعين الطبيعية، يعني لما توقف امامها او تمر من جنبها تشوفها هيك
لكن انا غصت بالكاميرا لحتى طلعت معي مناظر خلابة
واكثر وحدة اغرمت فيها الزاوية اللي طالع من بينهم وحدة مغلقة، ترا هي متل عباد الشمس
يعني تفتح الصبح ولما تروح الشمس تغلق ع بعضها
فكان في وحدة منهم مبكرة جداً

الصورة الأخيرة هي شكل النبتة على طرف الحوض بالنسبة للعين الطبيعية أثناء مرورنا أو وقوفنا عندها
لكن دخلت بالكاميرا بينها حتى أجعل العدسة تلتقط منظاهر مذهلة، شكل هذه الزهرة عجيبة وفريدة
سبحان الله مثل في الصورة الأولى، لكل وردة لها غصن يشبه اليقطين!
رغم اني دخلت مشاتل لأشتري لحديقتي، لكن لم أرى مثل هذه النبتة!

ما بيحلا المكان إلا بوجود المي، وكل رحلتنا لأجلها

هي احد اللوحات الثلاثة المعلقة عند المسبح، مرسومة بشكل ثري دي رهيب!
يعني حركتهم داهية وتظليلهم على انها خشب منحوت شي ثاني! انا بالنسبة لي تبقى عيني على هاللوحة طول اليومين
لأن هالمنطقة غميقة بالمسبح! يعني لما اوصل لهنا عند السباحة أفهم اني ما اقدر المس الأرض ^^"

ربما هذه أكثر صورة تظهر فيها الجبال أو التلال اللبنانية بوضوح

​

صباح اليوم التالي، نختبئ من أشعة الشمس

هنا زرعنا ضحكات العمر

أول ظهور للغيوم في هذا اليوم، وأشعة الشمس تتسرب من بينهم

يا غيوم السماء... قولي للسنا... إن طائر المساء سيكون أنا !
غيمٌ هو حلمي... غيمٌ حلمي... أحلم دوماً في أن أطير
في الصحو والنوم.. صحوي ونومي... أرى نفسي طائراً صغير

ها قد ذهبت بنورها تختبئ خلف التلال لتترك وهجاً صاعداً للسماء
لطالما كنا صغاراً نعتقد بأن الشمس تذهب للنوم في آخر البحر

بهالصورة احس اني دخلت في أغنية " دايرة الحياة " من فيلم الأسد الملك
من أول يوم في الأرض عشناه.. ضوء الشمس سر الحـــياه
هنيالي يتشاف أكـتر م اللي شفناه ... خـــــير يفوق كل شيء خدناه
أسرار أخطر م اللي عــَـرفناه ... والزمن نتمنى لو يوم نحياه

والشمس في العالي جوّى سما تلالي.. دايره في فلك كلنا جواااه
دي دايرة الحياااه ... دي دايره أبديه
تحضنــّـا جواه.. وجودنا في حماه
في دايرة الحياة

لم استخدم أي نوع من التأثيرات، كان هذا من حضور الشمس وحده بشكل مواجه للعدسة

الدخان كان توقيته عند المغرب إضافة خيالية سحرية جداً
بهذا الوقت بالتحديد اللي كنت بصور فيه، نزلت الشمس
وكان في احد هناك من بعيد مولع نار، يمكن يعمل مشاوي
فكان الوضع كأنه احد التصاميم اللي بفضلها بالفوتوشب
الخامة الدخانية على التصاميم والصور، التقطت صور لأخواتي
بهيك خلفية رهيبة بدون اي تعديلات فوتوشوبية، عبارة عن صنع بحت من الطبيعة

خطفت قلبي هالصورة العفوية، لما ركزت الكاميرا بوضع البورتريه على الحافة
لو اني بس حطيت ساعة او علبة عطر كان عملت إعلانات من هالستاند الرهيب

سبحان الله هالإنفصال اللي ظهر بهاللحظة، كأن الصورة مقسمة لطبقات
الغيوم، السماء، الشمس التلال، لا أحد منهم يلامس الأخر ثم الدخان كأنه خراب

أفمر اسعمل هالصورة خلفية لجوالي من شدة جمالها

عندما أغرق في تفاصيل هذه اللحظة، لا اشعر بأني على الأرض حقاً!
أدركت عندها بأني أُغرمت بجمال الشمس، لا سيما عندما يميل وهجها ويتخلى عن الإضاءة
فتصبح الجبال داكنة ومظلمة

بالتركيز على تصوير السماء واعلى التلال
بدا وكأن الشمس تهبط للصحراء

كان وداعها الاخير، كأنه مشهد من انمي

نفس الزاوية والوضعية وذات التركيز من العدسة
ومع ذلك الصورتان بإختلاف بعضهما، لا تشابه

ينفع تصير بوستر لشي فيلم او رواية « طاير عقلها بتصويرها
منجد مو مصدقة نفسي، ي جماعة صدق من القال العدة ثلثين المعلم
يعني الإبداع اغلبه من الادوات، وهنا من روعة كاميرا ايفون 12 برو ماكس

ما عم اقدر اتخطى المشهد اذكر مرة استخدمت خامة نفس المنظر
غابة وطالع من بين اشجارها دخان، وحطيت وقتها رندر جيمين مدري شسمه تبع بتس
وطبعته غلاف دفتر كـ طلب لشخص ما، فكلما نظرت امامي حسيت التصميم حي أمامي
سبحان الله

أنا من المغرمين بالعلب الموسيقية، لكن ليست هذه الحديثة رغم ان لها اشكال فنية مختلفة ومجسمات
أحب النوع الخشبي ذات المفتاح، أن ادير المفتاح وتكون هناك راقصة باليه تدور مع الموسيقى
لقد وعدت نفسي ذات مرة ان اشتري واحدة منها هدية لنفسي، لكن نسيت الأمر بعدها ^^"

​

السلام عليكم ورحمة الله وبركاته
كيف الحال ايها الشعب التوني العظيم؟
من حظي اني طلعت رحلة بسيطة ليومين قبل الاختبارات وبنهاية المسابقة عشان يكون في محتوى انزله
هذا اول موضوع تصوير لي بالتون، رأيككم في تصويري ؟ وفقت بدخول الإعلام صح؟
من صغري بحب التصوير لكن ما اطلع كثير لأشوف اشياء تستحق التصوير
ولما اطلع اكون مركزة ع المتعة أكثر من التصوير، لكن هالمرة المسابقة أجبرتني طلع الإبداع
وصراحة مبسوطة كثير فيه، عدد الصور كانوا 150 صورة عالجوال وجلست امسح منهم واختار الافضل
وبالأخير نزل بالموضوع 67 صورة لا تنسوا التسبيح سبحان الله وبحمده سبحان الله العظيم
تجليلاً لإبداع الخالق عز وجل، خلونا نكسب أجر ذكر الله وانتوا بتستمتعوا بالصور
كان ودي نزل الموضوع مشترك مع جولي بس ما بتستاهل لأنها ما اشتركت معي بالمسابقة
كنسلوا عن التصميم التسليكي، عملت الموضوع بسرعة 10 ساعات
اشوفكم بموضوع ثاني ان شاء الله لا تنسوني من التقييمات الحلوة متلكم

​

YAFA

مرحبًا
الهيدر يفتح النفس على الآخر ويجدد حب الطبيعة
دمج بسيط ورائع بنفس الوقت
تنقلت بين الصور
الصور جودتها نقية وواضحة
أعجبني إلتقاطها الفنان
الزوايا مأخوذة بدقة
اعتبره تصوير احترافي
اعجبتني صور الزهور
وشروق الشمس والوادي
الباب الخشبي يذكرني بالبيوت الشعبية القديمة
وفعلا يشبه الباب اللي بمسلسل باب الحارة
كل صورة فيها تفاصيل هادئة ومنعشة
وتدعو لحب الطبيعة وتأملها
الشيبس والحلويات والبسكويت والصودا -احلى شي -
اعجبتني التشكيلة بالعافية على قلب اللي اكل او اللي شارك ذي الحلويات
غذيت بصري بصور الطبيعة الفاتنة
موضوع تم إخراجه بشكل مذهل
استمعت كثيرًا بالموضوع
يعطيك الف عافية على جهدك ووقتك المبذول
دمتِ بِخير​

YAFA​

S A L W A
-

السلام عليكم
كيف الحال سلوشات ؟ إن شاء الله تمام و بأحسن حال ؟
لفتني الموضوع لأنه مكان اقدر اهبد فيه براحتي
صرت استصعب كتابة الردود أكثر من المواضيع
كنت افكر اكتب ردود ولا اسوي موضوع جديد من كل عقلي
-
المهم , بدي أمشي بالتدريج و ما استبق الأحداث و امدح تصويرك من هسا
حبيت كيف استغللتي الفرصة لتعرضيلنا المشاهد الجميلة و الأحداث البسيطة اللي صارت معكم
أحب ما الى قلبي هي الطلعات العائلية الحلوة
بتغير الجو و بتنعنش القلب , خصيصا اذا كانت مع ناس بتحبيهم
ضحك و سوالف و سهر على ضو القمر
و نفتح مجوز و نقعد ندبك
كلها اجواء فرايحية بتسر الخاطر
-
عاد شهيتينا نزور هيك اماكن , بتمنى تصحلنا الفرصة و نروح مزرعة بأقرب وقت
مع انه صار عندي تروما لأنه مرة خالة امي راحت لا تتزحلق بالمسبح و انا مسكتها
و ربي سترني انا ما بعرف اسبح بس كنت واقفة عالدرجات عندها
خصيصًا إذا كان في أطفال أوييلللييي دوخان
فلما قلتي هالجملة ​

بصراحة انصرعت مترين بغرق فيهم بالراحة ​

هاي الجملة ذكرتني لما قبل الامتحانات طلعنا
و رحنا على طلعة قريبة من منطقتنا , و كانت مطلة على شارع رئيسي
بيودي بين منطقتين , وحدة اسمها ايدون اللي انا ساكنة فيها
و الثانية جحفية و معها المزار و طريق بيودي لغرب المحافظة
المزار مرينا عليها الاسبوع الماضي , و كان فيها مراوح كبيرة تبع توليد الكهربا
ما كانوا موجودين آخر مرة شفتهم يمكن قبل سبع ثمن سنين هيك اشي
المهم
كنا قاعدين هناك و شفت جبال واضحة من بعيد , سألت الوالد و قاللي هديك الجهة جهة لبنان
و الجولان و حبيت الشغلة لأنه مبينين كثير قراب , خصيصا اننا بمحافظة اربد الل جاية لجهتهم
​

بصراحة اتفق اتفاقًا شديدًا !
لأنه الصور هون حرفيًا كانت تحفة فنية
من التأثير و الإضاءة و كلشي كانت بتجنن عنجدددد !!! ​

كنت بستنى اللحظة اللي بتصرحي فيها عن نوع الجهاز ​

بصراحة تصويرك فخامة و مليان مشاعر
حسيت انهم مليانين ذكريات حلوة حتضلها عالقة بالذاكرة
انا بالعادة بحب اصور اكثر من اني استمتع بالرحلة و هالشي خسرني فرصة اني عيش اللحظة
لذا حديثا صرت اخذ صور قليلة و استمتع بالمكان و الأحاديث بدل ما اني قضي الوقت بالتصوير
مدري شدخل بس نرجع نمدح تصويرك لأنك فنانة و لايق عليكي إعلام بجد
الكلمات و الحكي المنظم المليان دفا عند كل صورة !
عيشتينا جزء من التجربة اللي عشتيها و بتشكرك عليها !
إن شاء الله تدوم أفراحك , و تطلعوا هيك طلعات ممتعة أكثر و أكثر !
كل الود ~ ​

S A L W A
-
السلام عليكم ورحمة الله
كيف الحال عساكِ بخير سلوش الحلوة
تدري لي شهرين ما كتبت اي ردود وهذا الأول من بعد انقطاع
تخيلي افوّت هيك موضوع عن صور من سوريا الجميلة؟
مبارح كانت سهرتي ع فيديو ل باسل الحاج وهو يجرب بالأكلات
السورية في قلب دمشق وكان في بيت عربي قديم رهيب جدًا
يخي كمية الجمال ما شاء الله ما احلاها هالبلاد وما احلى شعبها
تدري كمان شركات السياحة نزلت سفرة ل دمشق وطرطوس بفندق
خمس نجوم خمس ايام ب 180 دولار، صح كثير رخيص
بس كثير ناس لسا مترددة وتحس انه بكير ع هيك طلعات ومنهم
اهلي ف مضطرين نستنى كمان سنة، بس الموضوع يضحك
انه ناس يشوفوا اليهود كل يوم خايفين من طلعة لهناك
هو الجزء اللي يطمن الواحد انه لو مات هنا فهو شهيد احسن
من موتة بمكان ثاني xd
عمومًا نرجع للموضوع الحلو شطحت كثير
لما شفتك بالاول كاتبة انه مزرعة فكرت انكم مثل الاردن بيحكوا
مزرعة عن الشاليه اللي بكون بس بيت ومسبح بس لا طلع هذا
مزرعة فعلاً ومناظر تفتح النفس

هاي احلى صورة لتبدأي فيها، تخيلتك واقفة ع جسر
باين انك على علو وتحتك فراغ وطالعة لقطة رهييبة



هون انت بتحكي عن الخوخ وانا بتخيل التين xdd
الشكل والالوان متشابهين جدًا، حتى الظل يلي بالصورة مخليها
افخم بكثير


كالعادة الصورة من مكان وتخيلاتي شاطحة بمكان ثاني
تعرفي هذا بشو ذكرني؟ ابواب الاسطبل تبع الاحصنة
مع انه ولا مرة رحت نادي فروسية ولا اعرف الشكل الفعلي لهم
بس هيك بتخيله، الجدران المحيطة فيه كمان شكلها ملفت وجمييلة

فترة الغروب تفوز بأنها اكثر فترة ممكن الواحد ياخذ
فيها التقاطات فخمة، ما شاء الله شو جميلة وفعلا مثل ما قلتي
لون السما البنفسجية محليها اكثر


هاي الصورة ذكرتني ف جملة :
“A rose among thorns”



هاي الالتقاطة كمان مميزة كثير، حبيت كيف جمعت بين
الجبال والقمر والشجر ولون السما منور هيك يعطي
شعور جميل



الغروب جمال، والشروق جمال من نوع مستوى آخر
أشعة الشمس كأنها ستار انسدل ع اطراف اللوحة الربانية هاي



هاللقطة كمان جمييلة ، لو حصلتي كمان وحدة كلها اخضر
بالكامل بدون اي لون ثاني بتكون بيرفكت
^ لو مكانك كنت قطعت الوردتين لاصور صورة ثانية بدونهم xd



ما شاء الله جمال هالزهور كمان، حسيته مكان مثالي لعمل
جلسات تصوير للمناسبات، هالوردة رغم انها شي معتادته عيوننا
ونشوفه بكل مكان مع هيك محتفظة بجمالها الخاص وبكل مرة تكون
ملفتة



لو ما قلتي عنها انها لوحة ما كنت رح أميّز بصراحة!
فخمة وواقعية لابعد درجة يا عيني عالفن الجميل هذا


هاي الصورة اشوفها تفوز بكل الموضوع
حبيتها جدًا ما شاء الله عليك مُبدعة بالالتقاطات
لوحة فنية متكاملة مناسبة تنطبع لوحة فعلية وتتعلق عالحيط
هاي افخم من مستوى انه تكون خلفية جوال حتى

تصفح هالموضوع كان جميل فعلاً وشفته اول ما نزلتيه
واليوم لما جيت ارد كمان كنت بوقف عند كل صورة واتأملها
وبالمرتين كان يعطي نفس الشعور الجميل واضافة الى
الصوت الداخلي اللي يقول "خذووني لسورياا" xd
شجعتيني كمان افكر بانه انزل موضوع من تصويري
بس ما اظن حسويها بجد :$
عمومًا اتمنى ما يكون هذا موضوعك الاخير هنا
ضلك اطلعي وصوريلنا ووين ما كنتي حيكون فيه مناظر
حلوة اكيد ما هي كل البلد حلوة
دامت سوريا حرة عربية أبيّة، ودامت دمشق لنا ​