الأكشن في الأفلام | To Make An Action Scene (1 زائر)

[7sN]

حسسن نورت

مبدع بالتحليل كعادتك

توسكا رين 28/05/2017​

اولا و قبل كل شي حبيت اشكر الأخت كارين على تصميمها
للطقم الجميل , لا تنسون تشكرونها بالردود ق4


كيف حالكم جميعاً؟ يارب تكونون بخير و مبارك عليكم الشهر

كلنا نحاول نستغل اوقات فراغنا بأشياء تمتعنا او تفيدنا و عادة نتجه
إلى اننا نسوي الأشياء الي نحبها , مع اختلاف ميولنا كل شخص عنده
شي محبب لقلبه و يسويه بـ وقت فراغه , و انا كوْني انسان احب الأفلام
استغل وقت فراغي - غالباً - بإني اشوف احسن اللقطات من الأفلام الي
احبها , و هاللقطات - غالباً - تكون لقطات اكشن لأنها ممتعة

فـ امس و انا اشوفهم فكرت :
ليش كل مرة ارجع اشوف هذي المقاطع و استمتع فيهم؟
شنو الشي المميز الموجود بهذي اللقطات و تخليني ارجع لها دايماً؟

بهالموضوع ان شاء الله راح اعرض لكم الإجابة بشكل مفصّل مع
ذكر 3 انواع مختلفة بالأكشن و استخدامهم بمختلف الأفلام

 

[7sN]

رد: الأكشن في الأفلام | To Make An Action Scene

قال الكثير من الناس ان فيلم The Raid هو افضل فيلم
اكشن بالتاريخ , ما اقدر اقول اني ضد هذا الرأي لأن فيلم
The Raid هو فيلم فقط يعتمد على الأكشن لا غير , و
تطبيقه للأكشن هو التطبيق الي احنا نعرفه و نشوفه بأغلب
الأفلام و هو : أكشن القتل

فـ من الحين اقول :

تحذير : عنف و دماء

كثير من الأفلام يطبقون أكشن الحركات القتالية لكن ليش فيلم The Raid
ناجح فيه اكثر من غيره؟ راح اعرض لقطة من الفيلم و بتشوفون ليش :

^
لما طيارتكم بعد ساعة و انت طولت بالحمام

الي شفناه باللقطة طبّق معنى الأكشن بالحركات القتالية بالشكل الصحيح

بالأفلام عادةً لما نشوف لقطات قتالية نشوف الكسل , نفس هذي اللقطة :

الفرق بين اللقطة الأولى و الثانية :

لقطة فيلم The Raid ناجحة لعدة اسباب

اول سبب هو الوضوح

لقطات الأكشن لازم تكون واضحة بالنسبة لنا , لازم نعرف فلان وين واقف
و قاعد يضرب منو و شلون .. لقطة The Raid اعطتنا كل هذا بوضوح تام
مع اماكن الممثلين و كيفية قتالهم مع بعض .. +1

ثاني سبب هو عدم تواجد الموسيقا

بالأفلام الناجحة عادةً ما يستخدمون الموسيقا باللقطات الجديّة عشان ما يطلعون
الشخص من جو الفيلم نفسه و عشان يوصلون هدفهم من خلال هالشي .. ولو
حطوا موسيقا بتكون موسيقا لايقة بس بهالحالة شفناهم بدون موسيقا .. +1

ثالث سبب هو عدم تعديل زوايا الكاميرا بشكل مزعج

لو تشوفون الفيديو الأول و الثاني بتلاحظون ان بالثاني صار في تقطيع كثييير
و مع التقطيع تعديل زوايا الكاميرا وقت الضربة , يعني يحطون الكاميرا ورا
البطل لما يضرب واحد عشان نحس انه ضرب الشخص .. و هذا خطأ

الصح انك تحسسني بالضربة نفسها , نفس ما سوا الفيديو الأول ما حط الكاميرا
ورا فلان عشان بس نعتقد انه ضربه لا اهو عرض لنا الضربة بتفاصيلها و
حسينا فيها كـ مشاهدين .. +1

الفيديو الثاني سوا كل شي مو موجود بالأول

تقطيع و تعديل بالكاميرا .. -1
موسيقا مو لايقة ولا راكبة على اللقطة .. -1
مافي وضوح بمكان البطل او الي يقاتلهم .. -1

و بجذي نحصّل فيلم طبّق معاني الأكشن الصحيحة و فيلم سوا نفسه
فيلم اكشن و فشل باللي يسويه لأنه ما يبي يتعّب نفسه بإعادة التصوير

و لهذا السبب ارجع للقطات فيلم The Raid لأنه يشدني و يشد
الجميع كـ متابعين افلام الأكشن و محبينه


​

 

[7sN]

رد: الأكشن في الأفلام | To Make An Action Scene

ننتقل من الأكشن الواقعي الى الفنّي

فيلم Kingsman هو من الأفلام الي فجأة فجأة طلعوا بسنة 2014 و نجاحه
محد ما قدر يلاحظه , كوميدية الفيلم رائعة جداً خصوصاً انهم طول الوقت يذكرونك
بإنك قاعد تشوف فيلم مو شي واقعي , و هنا الحالة هذي تنفع

بالرد السابق قلت ان الموسيقا لما بتحطها بلقطة اكشن لازم تكون لايقة على الحدث نفسه
و هذا شي نشوفه يتطبق الحين بالفيديو الي بتشوفونه بالشكل الصحيح و المناسب , و
ما اعتقد في موسيقا تلوق على الحدث اكثر من الي بتسمعونها الحين

خصوصاً و ان الموسيقا ساعدت بإن اللقطة تكون من افضل لقطات الأكشن بتاريخ
السينما .. تفضلوا :

تحذير : عنف و دماء و حرق

كلمة روعة شي صغير بحقها ق4

قدم لنا المخرج matthew vaughn هذي اللقطة بأسلوب فنّي يعتمد على
الموسيقا + حفظ الممثلين ادوارهم + وضوح الأكشن و الحركات و معرفتنا
لأماكن الممثلين + المحافظة على جو المتعة و البعد عن الملل بشكل كبير

الفيلم تقدّم لنا على انه فيلم كوميدي و اكشن و ممتع , و هنا المخرج ترك لنفسه
فراغ و فرصة انه يسوي الي يبيه و ما حط لإبداعه حدود الجديّة ابداً , و النتيجة
مثل ما شفتوا .. رائعة ق4

هذي وحدة من انواع الأكشن الي اتكلم عنها و
هي تعتمد مثل ما ذكرت على الأسلوب الفني
بالاخراج بشكل اساسي


​

 

[7sN]

رد: الأكشن في الأفلام | To Make An Action Scene

وصلنا للإبداع

راح اذكر و اشرح الآن كيفية استخدام جاكي تشان للأكشن + اوضّح
ليش جاكي تشان افضل ممثل أكشن بالتاريخ

جاكي تشان غني عن التعريف ما اعتقد ان في احد ما يعرفه و هذا يرجع
لنجاحاته بأفلامه و لـ ذكائه بإدراج لقطات الأكشن بأفلامه

على عكس غيره جاكي تشان عنده قدرة بإنه يسوي لقطات اكشن من ولا
شي ! و هذا نقدر نشوفه باللقطة هذي :

ابداع ق4

مثل ما لاحظتوا اللقطة عبارة عن قتال بالغنفة ( الكنب ) و اي واحد ينتهي
بعيد عن اي جزء من الغنفة يخسر , هذا قتال ما نشوفه بالافلام بالعادة الي
نشوفه يكون قتال معتمد على حياة او موت , ابداع جاكي تشان يكون بحالة
انه يفكر "خارج الصندوق" و عنده مميزات مو موجودة بأحد غيره

هم :

1- يستغل ابداعاته و قدراته من ناحية ان كل قتالاته بالأفلام حقيقية مو كمبيوتر
ولا يستخدم تقطيع الكاميرا بكثرة عشانه كسول , كل شي واقعي

2- جاكي تشان تقريبا الممثل الوحيد الي نشوف تعابيره بـ لقطات الأكشن
و نعرف احساسه خلال هذي اللقطات بسبب ردود افعاله و تعامله معاهم

3- جاكي تشان من الممثلين القليلين الي يستغل الي حوالينه لإفادة لقطات الأكشن
مثل ما شفنا فوق لما استعمل الغنفة و مثل ما راح نشوف بعد شوي


شوفوا هذي اللقطة و طبقوا عليها الي قريتوه توه :

[YOUTUBE]d6B78XS84n8[/YOUTUBE]

و آخر فيديو و اشهرهم و افضلهم هو :

تعبت و انا امدح فيه

طبعا هالأشياء هذي الي ذكرتها ما تنطبق على افلامه الأمريكية
لأنها مو من اخراجه على عكس افلامه الصينية الي يقدر انه يعيد
تصوير لقطاته لمرات عادي توصل لـ 100 مرة , المخرجين الأمريكيين
ما يحبون يتعبون نفسهم بإعادة التصوير مثل ما ذكرت للأسف فـ هناك ما يقدر
ياخذ راحته معاهم

لكن افلامه الي من اخراجه لما نشوفها نعرف معنى الأفلام الأكشن و نعرف ان صناعة
الفيلم يحتاج معاه تعب و مجهود لأن بدون هالأثنين ما راح نحصل نتيجة
حلوة نفس الي شفناهم بالفيديوهات ق4


​

 

[7sN]

رد: الأكشن في الأفلام | To Make An Action Scene

لآخر مثال بالموضوع فكرت بشي قوي

لما كان الموضوع مجرد فكرة كنت افكر شنو لقطة الأكشن الي جمعت هالـ 3 :

1- اخراج رائع
2- تعابير ممثل بالقتال
3- حركات خطيرة بالقتال

و تذكرت اللقطة الجميلة من الفيلم الأجمل و الي انصح فيه
Ip Man , تفضلوا :

- من الناحية الاخراجية نسمع الموسيقا الي تعكس جو اللقطة
و تعديل الزوايا على حسب تركيز البطل
- من ناحية التعابير شفتوا الممثل المبدع Donnie Yen بأدائه
- من ناحية الحركات الخطيرة فـ ماله داعي اشرح شلون حسينا فيهم


​

 

[7sN]

رد: الأكشن في الأفلام | To Make An Action Scene

في الختام اشكر كل من دخل موضوعي و قرأ المحتوى
و شكر خاص للي قرر يرد على موضوعي

و شكر أخص لـ كارين على الطقم و الفواصل , لا تنسون تشكرونها
ما قصرت والله

اتمنى عجبكم الموضوع و استفدتوا منه من ناحية الأكشن و اساليبه
و اختلافه ايضاً بمختلف الأفلام و المخرجين و الممثلين

لاحظتوا ان بالأفلام الي ذكرتهم اول واحد اندونيسي و الثاني بريطاني
و الثالث و الرابع صيني؟ ما ذكرت شي امريكي

لأن يصعب وجود فيلم امريكي بهالابداع و هالدقة للأسف تركيزهم
عالفلوس اكثر من النتيجة

عالعموم مرة ثانية اشكر جميع من دخل و قرأ الموضوع

و اتمنى اشوف الردود الي تفتح النفس

اشوفكم بموضوع آخر بإذن الله

مع السلامة

​

 

[Donicchi]

رد: الأكشن في الأفلام | To Make An Action Scene

بسم الله الرحمن الرحيم,
السلام عليكُم ورحمة الله وبركاتُـه .
كيف حالك حسن ؟ إن شاء الله بخير وصحة وسلامة يارب .
ماشاء الله كالعاده نظام مواضيعك غير عن المواضيع المُعتاده .
حبيت إبداعك و شغلك وكل شي بالموضوع .
إندمجت وانا أقرأ كالعاده, أسلوبك يجذب .
وقبل ما أعلق عن أي شي بالموضوع , أشكر كارين على إبداعها بالطقم !
نجي للموضوع , الأكشن من التصنيفات اللي تعجبني بالأفلام والمُسلسلات .
عشان كذا موضوعك جدًا مهم بالنسبه لي , بما اني ما ألاحظ على هالأشياء .
يعني أعرف اني متحمسه ومندمجة بس ما أركز ان هذي اللقطه أحسن من الثانيه .
أول لقطتين حطيتهُم فعلًا , القتال كان مُميز ب أول فلم , تحس من جد بالحماس وأنت تشوف ,
الفلم الثاني تحس فيه شوي إنتظار , يعني تحس انك تبي حماس أكثر ,
الفلم الأول كان حماس بشكل ممتابع كونه قتال .
الفلم الثالث اختيارك له مُمتاز , ما أعرفه وولا شي , بس اندمجت بكل لحظة
حبيت العنف اللي فيه ما أقتصروا على نوع واحد من القتال
والموسيقى تدخلك جو , و ان البطل بهالمهاره ومثل ما قلت كل واحد حافظ دوره
وفلم جاكي شان , كالعاده جاكي شان من اول ما عرفته وهو مبدع بأفلام القتال
كنت أحب أفلامه واتحمس بس يجي لأن قتالاته دايمًا رهيبه
وآخر لقطة من الفيديو ضحكني
الفيديو الاخير يحمس وخاصة صوت الضربات , والكفوف ضحكتني بعد
يعطيك العافيه حسن ما قصرت , موضوعك قمة في الروعه ..
وإختيارك للموضوع حلو بعد , أتمنى أشوف لك مواضيع كثيره هنا ,
لك كل شي يحبه قلبك أكيد , وتسلم مره ثانيه .

 

[kid]

رد: الأكشن في الأفلام | To Make An Action Scene

​

السلام عليكم ورحمة الله وبركاته
علينا وعليك يارب .. رمضان كريم إب8​

موضوع جميل وممتع .. حقيقي محتوى رائع جدا
من وجهة نظري تحليل لقطات الاكشن بالطريقة الي قدمتها شي مو بسيط .. الحالة يبغالها دقة وتركيز
فاهنيك على الي سويته .. ما شاء الله عليك
طبقت كل الكلام الي قلته على اللقطات الي استخدمتهم كامثلة .. وطلع كلامك صحيح .. بمعنى ان تحليلك مقنع جدا ..واهنيك مرة ثانية على دا الشي​

من وجهة نظري والي اعتبر موضوعك دا شي يدعمها :
الاكشن مو اي احد يقدرر يتكلم عنه ويقيمه.. ومو اي لقطة تجذب انتباهنا وتشد تركيزنا تكون لقطة اكشن صحيحة ومبدعة
كثير افلام يكونو الناصحين بيها معتمدين على احساسهم وقت الفلم ايش كان وبايش اتأثرو .. اعتقد الحالة دي مو كافية .. لازم للعقل دور في التماس الابداع في العمل المقدم
لهادا قليل من الافلام الي تكون فعلا جميلة .. وقليل الناس الي ينأخذ بوجهة نظرهم ورايهم في قياس مدى جمال الفلم الاكشن وابداعه
كلامي دا عن واقع تجربة .. انا كثير ناس تنصحني بافلام اكشن .. كلها تلفت اكيد .. اما بحركة بصوت بلقطة .. ولكن مو كلها مبدعة .. ودا يخليني معذورة على نسيانها بسرعة

الاكشن مو بس لفت انتباه .. الاكشن ابداع دقيق .. ودا شي تدل عليه الامثلة الي قدمتها
Kingsman و Ip Man من اروع واجمل واعظم الاعمال الي شفتها في حياتي .. ما تتنسى حقيقي
لان كل شي فيها حسيته واستوعبته وما مليت منه ابدا .. عندي استعداد اعيدهم بحماس كاني اشوفهم لاول مرة​

كان هادا رايي في الموضوع .. اشكرك مرة اخرى على ابداعك في الطرح
استمتعت بالموضوع شكرا ليك ذ1​

 

[WiSHES]

رد: الأكشن في الأفلام | To Make An Action Scene

وعليكم السلام ورحمة الله وبركاته
انا بخير حمدلله ,مبارك عليك الشهر و ان شاء الله تكون بخير وبصحة
اولا يعطيها الف عافية الاخت كارين على الطقم رهيب ماشاء الله
نرجع للموضوع

The Raid
يا ساتر اول فيلم جاية بقرا عنو الا يطلع دم و قتل ف8
انا انسانة ماحب الدم و الدنيا دي آ3 بس كلامك حمسني افتح الفيديو
ولما فتحت ماكملت نص دقيقة وقفلته بس الحركات رهيبة وقاتلة
انا ماتفرج هالنوعية من الاكشن لاني اقرف بسرعة
اساسين كريد بالنسبة لي اكشنه حلو والقصة اللي عجبتني اكتر شي بس بالنسبة لشخص محلل و له خبرة بافلام الاكشن فاكيد النظرة مختلفة

Kingsman
يالطيف دا الفيلم فعليا مافهمت ايش مشكلته , وماتذكر منو غير المقطع دموي دا آ3
هم ضبطو اللقطة لدرجة مانسيتها لليوم والله آ3 , و معاك حق المخرج انتج شي يعلق في الاذهان زي ماصار لي

جاكي شان
هنا استوب دا ملك الاكشن بصراحه احب كيف يخلي الاكشن و الكوميديا بنفس اللحظة شي جبار , افلامه متنوعة بين الاثنين و احيانا يطلع بفيلم دراما اكشن يعني احلى شي انه ينوع بادواره

يعطيك الف الف عافية عالموضوع , ابدعت وجذبت نظري لاشياء ماكنت انتبه لها في الافلام بصراحه ج9تقبل مروري و شهر مبارك عليك حسن

ياي2
​

 

[SKY NET]

رد: الأكشن في الأفلام | To Make An Action Scene

مرحبا
شلونك اخوي ؟ يا رب تمام
ما شاء الله عليك ع هالابداع بالطرح والتنسيق الجميل
عاد حلو ذوقك بالافلام دوم تطرح عجايب
بس فلم اساسن مدري ليش ما حسيت انه له طعم
يعني باللعبه ابداع بس فلمه حيل ما فيه هدف
اكر افلام رهيبه وتعجبني هي افلام جاكشان
فهو مزيج بين الاكشن والكوميديا واحيانا التاريخ له فلم تاريخي رهيب
تم تقييمك ولك خمس نجوم ومتشوق لجديدك
لك كل الود وباقات من الورد ئ
سلام ْ
--