Contrary To What They Believe (1 زائر)

[Mahdicchi]

02-02-2020

​

 

[Mahdicchi]

الاسم: مهدي
تاريخ الميلاد: 22-06-94
مكان الميلاد: الظهران - السعودية
مكان الإقامة: ما بين المنطقة الشرقية - السعودية /
دبلن - إيرلندا
التخصص الدراسي: طب

أحب:
- الهدوء / الليل / المطر
- الألوان الهادئة والغامقة / اللون الأزرق بدرجاته
- أغاني إليسّا / الموسيقا والأغاني الهادئة والحزينة / آلة الكمان والتشيلو
- مشاهدة المسلسلات والأنمي
- شرب الشاي والقهوة

 

[Mahdicchi]

[ تحدي العجز ]


|| مهام الأسبوع ||

- تعديل المدونة
- طرح موضوع ذهبي
- تكملة رفع أنمي بدأت برفعه مسبقًا
- إيجاد 10 مصادر مفيدة لبحث الجامعة
- تسليم الأوراق المطلوبة للجامعة


|| مهام الشهر ||

- طرح موضوعين إداريين
- الدخول بتكريم الدرجة الأولى لفريق الإبداع
- دراسة شابتر كامل أسبوعيًا لاختبار الـ OSCE


القائمة قابلة للتعديل والزيادة ​

 

[Mahdicchi]

اليوم وصل لنا إيميل من جامعتنا يقولون لنا أن اليوم هو آخر يوم دراسي لهالسنة الدراسية!!
والسبب معروف للكل طبعًا، فيروس كورونا... بعد ما تم الإعلان أمس عن أول حالة وفاة بإيرلندا..
وأنا من البداية ما كنت أتمنى تعليق الدراسة.. مو حبًا في الدراسة أكيد xD
بس لأن الفصل الدراسي اللي أنا فيه أغلبه clinical، يعني دوامي بالمستشفيات، واختباراتي كلها تطبيق
ما عندي لا محاضرات ولا اختبارات كتابية..
وهالشي يخلي وضعنا احنا والسنة اللي أعلى منا مجهول...
يعني كيف ومتى بنعوّض الفترة اللي بتضيع علينا من هالفصل ؟!
لأن ما نقدر ناخذ المحتوى أونلاين بطبيعة الحال لأن الدوام بالمستشفى زي ما قلت..
طبعًا طلاب السنوات الأولى أتوقع هم المستفيدين من القرار لأنهم بيفتكون من المحاضرات وبيدرسون أونلاين xD
أما طلاب آخر سنة فـ قرار تعليق الدراسة ما يشملهم لأن الجامعة تبيهم يتخرجون ع الموعد المحدد

طيب هذي مو مشكلتي الوحيدة... فيه مشكلة ثانية..
وهي أن جامعتنا هي الوحيدة بإيرلندا اللي قررت إنهاء السنة الدراسية بكبرها! أما بقية المدارس والجامعات علّقوا الدراسة لنهاية شهر مارس..
+ الجامعة نصحونا بأننا نرجع لبلادنا بالفترة الحالية لأنهم خايفين تتوقف الرحلات بالفترة الجاية ونعلق هنا
بس المشكلة أن السفارة السعودية ما كان عندها علم بهالقرار.. وللحين ما وصل لنا تأكيد منهم إذا كنا نقدر نسافر ولا لا..
خاصةً وأن السعودية مانعين الرحلات حاليًا تقريبًا... وعازلين بعض المناطق بحيث محد يطلع منها أو يدخل لها
ف أنا حاليًا مدري ش وضعي صراحة... ولا أدري وش أسوي غير أني أنتظر تأكيد من السفارة بعدين يصير خير

أحس الحسنة الوحيدة بالموضوع أني ما بداوم برمضان]..
لأن كان من المفترض دوامي برمضان بمستشفى بمنطقة ثانية غير دبلن، وبضطر أسبوعيًا أسافر وأظل هناك بفندق
كنت شايل هم الصيام والأكل وكذا خاصةً مع طول النهار هنا برمضان..
يعني لعلّه خير
الله يعين ويارب تعدّي أزمة كورونا على خير... والله يحمي الجميع من كل شر ومكروه يارب

وهذا حالنا مع كورونا:

​

 

[Mahdicchi]

وما زلت لحد هاللحظة معلَّق ومو عارف ش وضعي
آخر خبر وصل لنا، أننا لما نوصل السعودية بيحطوننا بحجر صحي لمدة أسبوعين.
وأن السفارة حاليًا تنتظر وزارة الصحة يجهزون لنا مكان للحجر وبعدها بيردون علينا للسفر.
وطبعًا من يوم تعليق الدراسة وأنا ما سويت أي شي مفيد xD ما غير أكل ونوم ومسلسلات
من ناحية الأكل، صاير أكلي صحي بزيادة هاليومين xD كوني طول الوقت أطبخ بنفسي وما أكلت ولا شي من برا طول الأسبوع
يعني هذي وحدة من فوائد كورونا قاعدة تطلع مواهبنا بالطبخ
@A S T E R ~ انتظري علينا من الحين لين ينتهي كورونا بنصير نطبخ بدون ما نذوق بعد

قبل يومين بديت بأنمي Akame ga Kill، وخلصته أمس
حطيت تقييمي له هنا "تقييّمك له صوت هُنا !"، بس حبيت أتكلم عنه أكثر هنا بالمدونة
هالأنمي مع إني كان ودي أتابعه من أول ما انعرض، إلا أن طار حماسي له لأن عندي صديق الله يهديه حرق علي النهاية كاملة
بس مع الملل، وبعد ما لقيتهم حاطينه بنتفلكس.. قلت يلا أتابعه
طبعًا انصدمت من كمية العنف الموجودة فيه، وحبييييييت ما فيه أحلى من العنف بالأنمي صراحةً <

محتوى مخفي: حرق - Spoiler

^ من أكثر اللقطات اللي برّدت حرتي بالأنمي شوفوا وجهه وهو مفعوص بالأرض
الأنمي صدمني بعدة شغلات صراحةً، كنت أتابع بتوتّر وخوف، وحزنت ع موت بعض الشخصيات..
وبالحلقة الأخيرة دمّعت من بعد كمية النكد اللي شفته بالأنمي
بس بشكل عام حبيت الأنمي وأفكّر أقرأ المانغا عشان أشوف الاختلاف بالأحداث ما بينهم بعد

اليوم أفكر أسوي شغلات مفيدة وأقلل من المسلسلات.. ادعوا لي ما أتكاسل ​

 

[Mahdicchi]

عودة بعد غياب عن التدوين وعن التون بكبره xD
مبدئيًا أدري التدوينة بتكون طويلة..
بس حاب أعبّر فيها عن مشاعري بالفترة الماضية،
ومنها أبيّن لكم أن غيابي كان بسبب الظروف وما كنت ساحب عليكم بإرادتي

أول ما صارت أزمة الكورونا.. كنت معجب جدًا بتنظيم السعودية وضبطها للأوضاع..
سواءً من ناحية إغلاق المطارات، إيقاف الدراسة، أو منع التنقّل بين المدن..
خاصةً مقارنةً بالأوضاع اللي كنت أشوفها بإيرلندا أو حتى ببقية الدول الأوروبية،
حسيت فعلًا أن السعودية مسوين شغل محترم ومنظم بهالخصوص
ويمكن لأول مرة حسيت أني أقدر أتفاخر بشي تسويه بلادي مقارنةً بالدول الثانية المتطورة
بس شوي شوي تغيرت نظرتي للموضوع.. وحسيت اللي قاعد يصير عبارة عن سلق بيض
طبعًا رايي تغير لعدة أسباب.. بس بتكلم عن المواقف اللي حصلت لي شخصيًا =)

يعني تخيلوا من يوم ما طرحت تدوينتي #4 بتاريخ 12 مارس اللي ذكرت فيها أن توقفت الدراسة..
ما قدرت أرجع للسعودية إلا بتاريخ 10 مايو.. يعني بعد شهرين من توقّف الدراسة =\
وتقريبًا وقتها كل الطلاب اللي معاي بالجامعة رجعوا لبلادهم بسرعة.. باستثناءنا احنا والكويتيين ولاد الغسالة آخر من يسافر
المهم..
بعدين على أساس أن مطارات السعودية ترجع تفتح بتاريخ 1 أغسطس -بعد عيد الأضحى-
بس فجأة غيروا رايهم ومددوا الإغلاق -وآخر شي توصلوا له أنهم بيفتحونها ع بداية 2021-
ف توهقت -وأكيد هذا وضع أغلب الطلاب اللي يدرسون برا-..
عشان أسافر لازم أحصل على تصريح سفر من وزارة الداخلية..
مع إرسال عدة أوراق تثبت لهم أني طالب وأن دراستي تتطلب حضور شخصي مو اونلاين..
ومن ضمن الأوراق اللي طالبينها ورقة تثبت أني طالب مبتعث من وزارة التعليم
وأكتشف أن هالورقة هذي منتهي تاريخها عندي.. ولازم أجددها.. ويلا خذ لك
ظليت من تاريخ 8 أغسطس وأنا أتواصل مع وزارة الداخلية، وزارة التعليم، الملحقية بإيرلندا، والجامعة..
مكالمات، إيميلات، وأكثر من مرة رحت الرياض -وأنا ساكن بالشرقية يعني مشوار 4 ساعات-
علمًا أن تاريخ 11 أغسطس كان عندي اختبار أونلاين.. يعني أذكر حتى الاختبار دخلت له وأنا نفسيتي تعبانة
وتخيلوا متى خلصت أموري كلها وحصلت على تصريح سفر؟ تاريخ 12 سبتمبر
وسريع سريع اليوم اللي بعده على طول حجزت تذكرة طيران..
وبنفس اليوم بالليل سافرت -يعني حتى سفري ما كنت متجهز له بأي شكل من الأشكال-

طبعًا أنا كان مفروض تبدأ دراستي بتاريخ 7 سبتمبر..
وقتها كان عندي أسبوعين دوام يعتبرون مكمّلين للسنة الدراسية الماضية..
لأن دراستي تتطلب حضور وتطبيق عملي.. ف مو كل شي قدروا يدرسونا إياه أونلاين..
وبتاريخ 23 سبتمبر مفروض عندي اختبار عملي..
وطبعًا لأني ما وصلت إيرلندا إلا بتاريخ 14 سبتمبر.. ولأني لازم أعزل نفسي لمدة أسبوعين كاملين بمجرد وصولي لإيرلندا..
فما قدرت أداوم ولا أختبر
بس الحمدلله الجامعة كانوا متفهمين الأوضاع.. وقالوا بيختبروني بوقت ثاني خلال السنة الدراسية هذي

ما أوصف لكم كيف كان شهر ونص متعب من كل النواحي.. جسديًا ونفسيًا وكل شي
عانيت من قلة النوم لدرجة أقول حتى أيام الاختبارات النهائية ما يكون نومي قليل بهالشكل
وظليت من نص أغسطس لين وصلت لإيرلندا تقريبًا وأنا كله أتابع أعمال كوميدية، ما بين مسلسلات وأفلام وأنميات..
وأنا نادرًا أتابع أعمال كوميدية بالإجازات xD لأني بالعادة أخليها لأوقات الدراسة أتابعها كلما كان عندي أوقات فراغ..
بس من كثر ما كانت نفسيتي تعبانة ما كان لي مزاج لأي شي حتى بأوقات فراغي،
ف كنت بس أسلّي نفسي بشغلات كوميدية

حاولت أختصر كلامي قد ما أقدر بس بعد طلعت التدوينة طويلة
اليوم بديت بالسنة الدراسية الجديدة
وإن شاء الله لي عودة بتدوينة ثانية أتكلم فيها عن أوضاع السنة الدراسية الجديدة ​

 

[Mahdicchi]

اليوم بقول لكم عن وضعي ومعاناتي بآخر 10 أيام تقريبًا

الأسبوع هذا اللي انتهى كان أول أسبوع دراسة بالسنة الدراسية الجديدة
وأنا حاليًا دوامي كله clinical -بالمستشفى-
ونظام جامعتنا أن يوزعونا ع مستشفيات مختلفة على طول السنة، ممكن بنفس المدينة اللي احنا موجودين فيها -دبلن- أو بمناطق ثانية
طبعًا الجامعة توفّر لنا السكن إذا كان دوامنا برا دبلن.. بس المواصلات علينا
أنا حاليًا ولمدة 5 أسابيع دوامي بيكون بمنطقة اسمها كاڤن..
أول ما شفت حاطين اسمي بهالمنطقة جاني إحباط
لأنها مدينة صغيرة.. وبالمدن الصغيرة عادةً نتوهق بالمواصلات والأكل xD

وفعلًا لما شفت المسافة بين المستشفى والسكن اللي عاطينا إياه.. لقيتها ٤٥ دقيقة مشي
ومن شفته شلت هَم أني كل يوم لازم أصحى بدري عشان ألحق أمشي كل هذا

وقبل لا نداوم بكم يوم نزلوا لنا جدولنا وكيف بيكون الدوام بالمستشفى...
إلا أشوف أن كل خميس بتكون محاضرات أونلاين، و كل جمعة محاضرات ب دبلن..
يعني بداوم بالمنطقة هذي بس 3 أيام بالأسبوع من الاثنين للأربعاء
انزاح شوية هم مني لأني ما بضطر أكون موجود بهالمنطقة الميتة طول الأسبوع

المهم لما وصلت كاڤن ووصلت السكن...
قعدت هذي راعية السكن تعطيني معلومات عن الغرف ووقت الفطور وكذا
بعدين إلا تقول لي:
"وإذا تبي تروح المستشفى كلّم تاكسي بعد شوي بعطيك البطاقة مالته.. هذا متفقة وياه الجامعة ومواصلاتكم وياه مدفوعة عن طريق الجامعة"
وأنا شكلي أماااا
من الصدمة رحت كلمت صاحبي.. وهو مع أنه بدفعة ثانية بس انصدم وياي مو متعودين الجامعة يسوون لنا شغلة حلوة زي كذا

المهم أني بعد ما دخلت غرفتي وارتحت شوي رجعت دخلت موقع الجامعة وأشوف معلومات المستشفى وكذا..
واستوعبت أن فيه مكانين مختلفين بالمنطقة هذي مفروض نداوم فيهم "مستشفى عام + مركز صحي"
المستشفى هو اللي يبعد ٤٥ دقيقة، أما المركز أقل من 10 دقايق مشي من السكن!
وهنا أفرح زيادة يعني فيه مبنى قريب مني وأقدر أروح له بسهولة

طبعًا أول ما وصلت كاڤن كنت أقول لصاحبي -نفس صاحبي اللي فوق- أنها منطقة حلوة وكذا بس شكله كثرة المشي بتكرهني بالمنطقة
ف بعد ما عرفت كل هالمعلومات ورحت قلتله عنها.. إلا يقول لي شكلك خلاص من جد بتحب كاڤن بس باقي الأكل

عاد البارحة راسل لي الدكتور المسؤول عنا بذي المنطقة أن بكره دوامي بيكون بمنطقة ثانية
ولازم باص عشان أروح هناك
بس خلاص كلمت التاكسي يوديني.. خل أحلل قيمته اللي دافعينها له الجامعة

وهذي شويّة صور من كاڤن قلت خل أوريكم بما أن التدوينة كلها عنها

​

 

[Mahdicchi]

بقول لكم عن سالفة صارت لي قبل كم يوم..

بس بالأول برجع وياكم بالزمن لـ قبل سنة xD

بيوم من الأيام قبل سنة تقريبًا..
وأنا طالع من الجامعة، لقيت واحد وياي بالجامعة كان يمشي..
وأنا أشوفه مدري ليش حسيته حزين وكأنه شايل هموم الدنيا فوق كتافه
مع أني ما أعرفه شخصيًا وما بيني وبينه أي شي..
بس كذا وصلني إحساس قوي جدًا بأنه حزين ومتضايق.. خاصةً من مشيته وتعابير وجهه
ولا إراديًا كذا تأثرت بحالته ودمّعت عيوني من دون ما أحس بنفسي =\
استغربت شوي من نفسي.. لدرجة قعدت أقول يمكن لأني كنت أسمع إليسّا وقتها اختلطت علي المشاعر

المهم..
قبل كم يوم، كنت أكلم صاحبي..
وكان قاعد يفضفض لي ويشكي لي الحال، وكيف أنه متضايق ومو مرتاح وكذا..
وكنت طول الوقت أواسيه وأنا متأثر وزعلان ع وضعه..
وبمجرد ما خلصت محادثتي وياه، ما لقيت نفسي إلا وأنا أصيح =\
أصيح literally يعني مو بس دمّعت شوي زي الموقف اللي فوق..

ف الموقف هذا اللي صار لي قبل كم يوم ذكّرني بالموقف اللي صار لي قبل سنة
وتذكرت أني بمرة قريت أن فيه أشخاص عندهم القدرة على الإحساس بأحاسيس الناس اللي حولهم..
ورحت بحثت أتأكد من الموضوع، وفعلًا لقيت هالشي موجود بعلم النفس..
والحالة هذي.. أو الشخصية.. يسمونها Empath
وهو الشخص الحساس بزيادة، وعنده القدرة على الإحساس بمشاعر الناس اللي حوله،
وممكن تكون عنده القدرة حتى على الإحساس بالألم الجسدي للناس اللي حوله.
وفيه عدّة صفات ممكن تدل ع أنك Empath..
مثل كثرة التعاطف، حدس قوي، العُزلة، كُره التجمعات والازدحام والضجيج والإضاءة العالية،
حب الرعاية والاهتمام بالآخرين، ارتياح الأشخاص لإخبار مشاكلهم الخاصة لهذا الشخص، وغيرها...
وأغلب هذي الصفات تنطبق عليّ

ولما قعدت أفكر بالموضوع..
تذكرت عدة مواقف مرت علي من قبل تثبت أني كنت حاس بأشخاص حولي -بس ما كنت مستوعب هالشي وقتها- xD

وبصراحة لقيت الموضوع شيّق xD
وجاني فضول أني أقرأ وأستكشف أكثر عن هالشي

فيه حد منكم يحس نفسه Empath بعد ؟! ​

 

[Mahdicchi]

من زمان عن المدونة
والتنسيق مخترب والفيسات مختربة.. خوش
نعدّلهم إن شاء الله بعد التدوينة


اليوم بدينا دوام للفصل الدراسي الثاني..
وطبعًا الجامعة ما تترك أي فرصة عشان تكرفنا حتى لو من أول يوم استقبال على كيف كيفك
حاليًا عندي روتيشن نساء وولادة..
واحنا كل روتيشن عندنا مدته 5 أسابيع.. والأسبوع السادس يكون مراجعة + اختبار
الجانب المشرق من الموضوع أنهم حاطيني بمستشفى قريب من شقتي..
رُبع ساعة مشي، وأقل من 10 دقايق بالباص
بس فيه أسبوع من هالـ 5 أسابيع يكون الدوام فيه بمدينة ثانية اسمها وترفورد -انت وحظك متى يكون-..
وأنا عندي إياه هالأسبوع
والمشكلة أن اليوم الدوام بـ دبلن.. وبقية أيام الأسبوع يكون بـ وترفورد

اليوم الصبح دوامي من الساعة 8 للساعة 10:30 بالمستشفى هذا اللي قريب من عندي..
كان تعريف بالمستشفى وعطونا بطاقاتنا وكذا..
بعدها رجعت البيت شوي ريّحت.. وبدّلت ثيابي وطلعت لأن عندي موعد مسحة للكوڤيد ع الساعة 12:30
وبعدها مفروض يكون عندي كلاس بالجامعة الساعة 2
وصلت الجامعة وظلينا ننتظر أكثر من ساعة.. وما دخلنا إلا الساعة 3:15
كعادة جامعتنا الموقرة يعني بمواعيدها المضروبة
طبعًا الكلاس كان كله على بعضه حوالي نص ساعة يعني انتظارنا كان أطول من الكلاس
المهم بعد ما خلصت رجعت البيت ع الساعة 4:45.. صلّيت وكملت تجهيز شنطتي..
و الساعة 5:50 قعدت باكل وبشوف مواعيد القطارات اللي بالليل..
وأنصدم أن حاطين آخر قطار ع الساعة 6:35 بالعادة فيه قطارات لحد الساعة 9 تقريبًا
وبسرررعة آكل كل الأكل اللي قدامي تقولون كأني واحد من عمالقة أتاك أون تايتن
وأطلب تاكسي عشان يمدي ألحق ع القطار
وأوصل المحطة 6:28 وأررركض للجهاز أشتري لي تذكرة.. وأرررركض للقطار..
وركبت القطار الساعة 6:33 -يعني قبل دقيقتين من وقت الرحلة-
وقتها مفروض يطلعون لي ناس يصفقون لي ع الإنجاز هذا


+ التطبيق اللي طلبت منه التاكسي حمّلته قبل كم يوم -بعد ما طلعلي إعلانه مدري وين بالغلط-
والتطبيق اللي كنت أستخدمه قبل حق التكاسي صار غبي وبطّلت أستخدمه..
سبحان الله شايفين كيف القدَر
يعني لو ما طلعلي وحمّلته فـ ع الأغلب كنت بروح المحطة بباص.. وما أظن كان بيمديني أوصل ع الوقت

بصراحة ودي أتحلطم زيادة ع دوام وجدول وضغط هالروتيشن..
بس نخليها لوقت ثاني ما أبي أطوّل عليكم أكثر
ومتشكر قراءتكم لثرثرتي ​

 

[Mahdicchi]

7:38 صباحًا


حاليًا وضعي الدراسي ومشاعري ونومي وكل شي فيني ملخبط
هالأسبوع أداوم بقسم التوليد..
واحنا قروبنا عددنا 4 طلاب.. ف موزعينا 2 يداومون صبح و 2 يداومون ليل
وأنا حاطين دوامي ليل.. من 8 الليل لـ 8 الصبح

ف وضعي كان خايس هاليومين وأنا أحاول أقلب نظام نومي استعدادًا للدوام الليلي..
خاصةً أن نومي خفيف وأصحى على أقل صوت.. ف أعاني جدًا لما أنام النهار

المهم أني البارحة بديت بأول يوم دوام ليلي لي..
والساعة 00:13 نص الليل انولدت أول طفلة أشارك بعملية توليدها
شعور غريب جدًا صراحة وأنا أسحب البيبي بنفسي..
لدرجة حسيت بالانتماء وكأني أنا أبو البيبي < احلف
وما أخفي عليكم قد ايش كانت البيبي كيوت ما شاء الله عليها

وجو الدوام بشكل عام كان كله على بعضه مختلف عن المعتاد..
المستشفى هادئ جدًا.. والغرف والممرات مظلمة..
يعني بالرغم من تعب الدوام وتخريب نظام النوم.. إلا أني حظيت بتجارب حلوة لحد الحين

طبعًا توني قبل شوي راجع البيت.. وبنام الحين
ونقول يا رب تعدي بقية أيام الأسبوع على خير
تصبحون على خير xD​