السلام عليكم و رحمة الله و بركاته
وه صار لي زمان ما كتبت في المدونة
للأسف كانت نهاية السنة جنونية و ما كان عندي وقت أبدا
أساسا حتى النوم ما كنت أنام أكثر من 4 ساعات
+ لا تذكروني بحالة النت كنا كل يومين نتصل بالشركة
على أساس يرسلون لنا شخص يشوف حالة الكابلات
بس ما ودي أتحلطم هنا فخلي أتكلم عن سنة 2020
و لو انو كان لازم اكتب عنها من بداية السنة
هالسنة كانت كارثية بالنسبة لي > على أساس ما أبي أتحلطم
كل سنة تعلمك شي جديد و الدنيا ما تتوقف بس لأن سنتك كانت سيئة
كانت 2020 سيئة بنظري لأني شخصيا ما كنت إنتاجية و لا استغليت وقتي صح
بقيت أركض هنا و هناك بدون ما أسوي شي مهم أو يحسب
نتائجي الجامعية جدا انخفضت و أرسلوني تخصص ما أبيه حتى لو ممكن يكون فيه خير
بس اخترت اني أعيد سنتي حتى ما أحس إني جالسة أقامر بمستقبلي
مع كل هالمشاكل ، كان فيه إيجابيات للسنة و إنجازات و لو انها قليلة :
- تعلمت شوي عن مونتاج الفيديوهات و سوت كم عمل أقدر أقول اني فخورة بشكلهم النهائي و فعلا ودي أتعلم أكثر و أطور نفسي بهالجانب
- كتبت 9 مواضيع حتى انشرهم في انمي تون ، للأمانة بعدهم ما وصلو مرحلة التنسيق حتى و لا انرفعو للورشة لكن كملت الهيكلة و أحس اني سويت شي كبير دام لقيت أساسا مواضيع أقدر أحطها
- دخلت دورة تحليل بيانات عأساس أعرف وش ممكن يجذبني بمجالي و أكمل فيه و فعلا تعلمت هواي أشياء و استفدت و استمتعت و بإذن الله أكمل الدورة قريبا و أشوف نتائجي
- خرجت شوي من منطقة الراحة حقي و دخلت نادي بنهاية السنة و حاليا جالسة أشتغل معهم على مشروع متحمسة له و إن شاء الله بشارك معكم التفاصيل لما ينتهي التخطيط
- رجعت للرسم أخيرا ، مستواي جدا انخفض للأسف و حتى الآن ما عندي وقت أثبت عليه لكن على الأقل صرت أرسم كلما لقيت وقت فراغ
- هالسنة كانت أول مرة بالنسبة لي أتابع فيها و أنتبه للأشياء اللي أصرف عليها ، و اكتشفت اني اصرف 3 أضعاف منحتي السنوية ، و هالشي رح يساعدني إني انتبه أكثر بهالسنة إن شاء الله .
- سويت حمية و التزمت بيها و بالرياضة لمدة شهرين و ذي أطول مدة ألتزم فيها بشي في حياتي هي ما كانت فعلا حمية بس كنت أراقب أكلي باليوم و متابعة برنامج رياضي ملتزمة فيه و لاحظت بهالمدة تغيير حتى في طاقتي و نشاطي و إن شاء الله ودي أرجع لذا النظام و ألتزم فيه مدة أطول .
طبعا حاولت أتذكر كل صغيرة و كبيرة بهالسنة لأن أصلا ماكو إنجازات أكتبها
وقتي كله ضاع بأشياء ما لها فائدة و منها المسلسلات اللي ناوية إن شاء الله أحد منهم هالسنة .
وقتي كله ضاع بأشياء ما لها فائدة و منها المسلسلات اللي ناوية إن شاء الله أحد منهم هالسنة .
التعديل الأخير بواسطة المشرف: