الختم الذهبي My trip to Orlando | USA (2 زائر)

[Detective JoulZ]

نورتينا بموضوعك
#M A R L E N E
#JULY

-

السلام عليكم ورحمة الله وبركاته
كيفكم ايها التونيون ان شاء الله تمام ؟
موضوعي اليوم عن رحلتي لمدينة اورلاندو في امريكا الصيف اللي راح ٢٠٢٣
وكون اني صرت من اكبر المقاطعين لديزني خصوصا بعد دعمها للكيان الصهيوني
فغالبية الموضوع وما سترونه كان قبل طوفان الاقصى
وهدفي من الموضوع عرض رحلتي لا للترويج ابدا
وحتى اكون معكم صريحة كنت متردده اطرح الموضوع ولا لا
بس للامانه كون ان الرحلة قديمة نوعا ما فليش ما اطرحها

خصوصا انها اخر سفرة واخر شيء فيه ٥٠ صورة واكثر من تصويري
صح تذكرت قبل لنبدأ الجوله عندي ملاحظه
بتلاحظون صور عرضية وصور طولية وسببها اختلاف الاجهزه بين جوالي وجوال زوجي وكيمرا كانون الاحترافية
بس اغلب الصور من جوالاتنا فالمعذرة من عدم تناسق الاحجام
اي صح راح اعلق على الصور اللي صارت لي فيها مواقف


لنبدا الرحلة

​

 

[Detective JoulZ]

بداية الرحلة كانت تقريبا في شهر يوليو من سنة ٢٠٢٣
وتحديدا ١٥/ ٧/ ٢٠٢٣
والرجعة كانت ٢٧/ ٧/ ٢٠٢٣
يعني تقريبا اسبوعين بس انا صورت الاشياء اللي شدتني
لان للامانة ٥ ايام كلها ديزني
ويوم يونيفرسال
ويوم ليقو لاند (بس ما صورت لان اغلب الوقت كنت الحق العيال كون كل الالعاب تصلح لهم فيها مقارنة بالبقية)
ويوم ديزني سبرينق بس ما صورت المحلات بشرحه بعدين
ويومين ما رحنا مكان مميز لان كنا صايمين تاسوعاء وعاشوراء
فخلاصة الكلام صورت اهم الاشياء اللي صارت بالسفرة
بداية برحلتنا كانت صباح الساعة ٧ الاقلاع
وقومت العيال ولبستهم الساعة ٥ الفجر وكانوا ميتين يبون يرقدون
المهم كان فيه نظام بس للطيارات اللي رايحة لامريكا
اللي تذكرته عليها SSS هذا لازم يكون عليه تفتيش زياده
ومن حسن حظي طلعت تذكرتي فيها
عموما فتشوني زيادة من مسحات وغيره
واول ما ركبنا الطيارة صورت مسافة الرحلة

شيوخ بنتي تقول لي بعد ما رقدت وقامت ورقدت وقامت
ماما المكان بعيد متى بنوصل
قلت لها قريب قريب
(كان باقي ساعة على هالكلام من اصل ١٦ ساعة)

صح يوم كنا في الباص كون ان الخرطوم خربان تبع الطياره
مدري اذا تعرفونها بس كنت العب بوكيمون قو وطلع لي سكويرتال

وصلنا الساعة ٣ ونص تقريبا العصر بتوقيت امريكا ونزل علينا مطر
طبعا خذينا ساعتين على ما خلصنا جوازات واجراءات امريكا معقده تخيلوا يسألونك مليون سؤال
وين ساكن ؟ وليش جاي؟ وكم عندك كاش ؟ ومن وين؟
وطولنا بعد على ما خلص زوجي اجراءات السيارة
وكراسي عيالي اللي تتركب في السيارة والشنط وغيره

^ عجبني الفلتر
نزلتها ابي اقولكم ان ما في دايركت لاورلاندو
فنزلنا مطار ميامي ومنها بنروح اولاندو
والمسافة بينهم ٤ ساعات سيارة
وازيدكم من الشعر بيت بين المطار وفندقنا اللي بنبيت فيه ليلة في ميامي قبل لنروح وجهتنا الاساسية تقريبا ساعتين
يعني نص المسافة فاول ما وصلنا كلنا رحنا في النوم

وكون انها ليلة ما نزلنا الشنط ونزلت بس شنطة اليد تبع عيالي

بعد نومة اهل الكهف من التعب قمنا ورحنا نتريق
حبيت الانشطة اللي عطوها عيالي ههههه

وحركنا شوفوا منظر الغيوم

نسيت ارويكم ريوقنا ههههه
عصير البرتقال ما حبيته مو حامض تحسون مر اكثر


طبعا وصلنا الفيلا تبعنا وشفناها ونزلنا شنطنا
وكان الوقت للحين بدري فقررنا نروح اول حدائق ديزني

مملكة الحيوانات وكون انها للامانة فيها انشطة كثير وعروض
العروض بحطها في قسم الفيديوهات احسن تشوفونها
بدل الصور

اغلب الحديقة كانت الشخصيات الحيوانية < احلفي
اقصد الحيوانات اللي من انتاج ديزني امثال بامبي سيمبا وغيرهم
كل تمثال من هالتماثيل وراه سماعة وتقدر تسمع صوته الاصلي الانجليزي
تدرون لا شعوريا الاغاني القديمة اللي تطلع صرت اغنيها بالمصري
حبايبي اهل مصر

حبيت هالشجرة للي شاف عهد الملك سيمبا بيعرف ان هذه
الشجرة هي نفسها شجرة القرد رفيكي ههههه
هي اللي كانت معلم هالحديقة وللمعلومة كان فيه عرض ليلي
بس على حظنا ما يكون الا بالمناسبات امثال الهالوين والكريسماس وغيره
يقول لي زوجي كون ان قد جاها قبل ان يسوون مثل الشفق
اللي يطلع بالقطبين فوق والعاب نارية وغيرها من العروض

طبعا ما تبين بالصوره بس لعلمكم ترا فيه قرود بابون بين الشجر حاولت واجد القط واحد ما نفع
قرد البابون نفس رفيكي يعني هههههههه

هنا صار لي موقف ما عجبني وحبيت اقوله سبق وقلته
بس بقوله
ديزني للاسف اكبر داعم للشواذ وهالشي شفته بعيني
تخيلوا في الجدران حاطين علاماتهم وتحتها انشطة
للاطفال ليش ما اعرف
بتقولون ليه تروحين ؟ بغض النظر عن هالتوجه انا ضده وضد اي شي يمس اطفالي بمعتقدات الدين
وخلونا واقعيين حنا نشوف ديزني من ايام الغبار
ونعرف الصح من الغلط ونقدر نغيره اذا نقدر في تثقيف الجيل الحالي
وترا لعلمكم الشعب الامريكي مو كله مع الشذوذ
والله اشوف عوائل يتفلون على هالزوايا اللي حاطينها
وارجع اقول ان الموضوع هذا قبل سنة فلو ربي كتب لي سفرة ثانية ما راح ارجع ديزني ولا راح ارجع لامريكا
عشان بس ما يجيني حد يقول انتي تدفعين لهم وهم داعمين
!
نرجع للمحور الاساسي اللي ما عجبني
عموما رحت محل نبي ناخذ العاب توي ستوري لان شيوخ تحححب حكاية لعبة فترتها المحلات كلها سيلفر وفضي
لانهم يحتفلون بديزني ١٠٠ عام على التأسيس الوضع كذا حلو !
بعده على طول الالوان الستة ! ليه طيب في الواجهة !
بنتي تبي تاخذ نظارة من هالالوان وش عرفها كان عمرها ٤ سنين علمتها انها الوان الشيطان وان ما يصير ناخذها وخذيناها عند العاب حكاية لعبة وخذت لعبة ويوم كنا بنطلع
الرجال اللي يشتغل يعرف عربي وجا قال لي ليش ما تخلونها تاخذ اللي تبيه (عربي مكسر)
جاب النظارة وعطاها اياها (وانا وابوها منبهين على بنتنا ما تاخذ الشيء من غريب)
حنا ما قلنا شيء نبي نشوف ردة فعلها قالت له ما ابيها ودفتها
ضحك زوجي وطلعنا وحلفت ما اجي اي محل من المحلات مع عيالي

الحديقة الثانية هي الحديقة الاساسية لديزني وهي Magical Kingdom



وللامانه خصصنا لها يومين لانها كبيره حيل غير كذا اليوم الاول اللي جيناه فاتتنا الالعاب النارية بسبب غزاره المطر كنسلوها
فرجعنا لها عشان شيوخ بنتي تشوفها
فالصور اللي تشوفونها كانت على يومين + بحط العروض والفعاليات في خانة الفيديوهات احلى تشوفون اللي شفته واقعياً صح

اولاً بعد التذاكر (على طاري التذاكر حنا شرينا تذاكر ٤ حدائق مع بعض بسعر ارخص من لما تكون كل حديقه لحالها بس تدفعون على المواقف اذا كانت غير مجانية)
وكون اني كنت حامل وقتها (فمضطرين نكون قريب عشان المسافة جداً بعيده وتحتاج مشي وانا كنت وحم وجداً الوضع ما اقدر اشرحه لكم )
بس لو وضعي الحالي كان عادي بمشي ولا عندي مشاكل
ومعلوم اختكم الفاضلة ما لعبت ولا لعبة انا كنت مرافق بس < المحزن المبكي بس صورت يبلفيت اني ركبت
المهم عشان تروحون القصر لازم تختارون يا قطار او سفينة وكون ان القطار كذا كذا بنركبه في الرجعة فاخترنا السفينة

^ فخورة اني صورت هالصوره جداً كانت وقت الغروب

قبل عرض الشخصيات كان جداً رهيب

^
ما صورت داخل بس هي لعبة باز يطير وماتت عليها شيوخ
طبعاً ابوها المستمتع معها انا مع رشود برا

هذي ركبتها انا ومعي راشد كون انها مش عنيفه قطار ويدور
< فكر انا ما يركب

كنت واقفة معهم وانصدمنا ان انتظارها ١٠٠ دقيقة بسبب المطر
مع ذلك لعبها زوجي وشيوخ
وانا كالعادة متفرج

هي لعبة الاقزام السبعة والمنجم بفلم سنووايت < كنت اكره الفلم واكره صوتها بالعربي

طلع الانجليزي اخس وينرفز اكثر

بيت الاشباح كان مثل ما تقولون لعبة مو خطرة بس ما تصلح لراشد
فراحت شيخة مع ابوها وانا في الخارج بس ما يمنع اصور اللي حوالي اللعبة
وكون ان اختكم ما لعبت اغلب الالعاب
فكان همي العروض اكثر من الالعاب نفسها لان ممنوعة علي ولو اني في بداية حملي < برا
وكما قلت ما شفناه في اليوم الاول شفناه في الزياة الثانية
العروض بالفيديو احلى

اليوم اللي بعده رحنا الحديقة الثالثة وهي حديقة المستقبل او epcot
الكورة اللي تشوفونها عبارة عن لعبة استكشافية وحبيت انهم حاطين استكشافات العرب العلماء امثال الخوارزمي وغيره < في حسنة زينة

نبدأ الجولة

لعبة السيارات عبارة عن عرض وكان ممنوع اصور السيارة برق بنزين كان بالنص
بس مب بكيفهم لقطت صورة ولما لقطت صكروا الغطا وحسبت انهم صادوني طلع انه جز من العرض

من الالعاب اللي لعبتها لعبة بيتر بان كانت من العاب الاطفال < يعني هادية
بالمختصر الالعاب اللي تصلح لرشود ولدي لعبتها لانها مو عنيفة بعكس العاب الكبار

^
معرض ازياء وممكن تشترون الازياء بجوده عالية يعني همممم نفس الخياط
للكبار هالمحل مو للاطفال وحبيت كيف ان كل الفستان يرمز لكل شخصية
حتى فساتين الاعراس موجوده بس السعرر اووووووووفرر للفستان الواحد
خمنوا كم السعر

صح نسيت اقولكم نظام الحديقة ححححيل رهيب بالنسبة لي احلى حدائق ديزني
كون انهم موزعينها على شكل بلدان وصورت اهم البلدان اللي شدتني

^ الهند
شريت بهارات من هالمحل

^ المغرب
الجممممال كله هنا احلى شيء كليته الحلوى المغربية نسيت اسمها اظن الشبيكة شيء كذا
وتحسون بالانتماء لما شفت المغربة هناك

^ كافيه مغربي تقهوينا فيه

^ غنية عن التعريف حبيبة قلبي ولن تغيرها اي دولة ثانية
اليابان

طبعاً فيه دول كثيره ووقفنا عند النرويج وجلسنا ننتظر العرض الليلي جداً رائع

^ اثناء الجلسة

^
جزء من الالعاب النارية
بقولكم موقف صار لي هنا بالذات ترا حنا نبعد من الالعاب النارية بعيد حيل
مع ذلك الموقف صار لي انا < ليش حظي حلو ما اعرف
تخيلوا اثناء الالعاب النارية نزلت شظية من الالعاب على ملابسي واحرقتني والله
اللي جمبي من قو الصدمة قاموا يبون يجيبون ماي
وبس احترقت شوي من ملابسي وحجابي مع ذلك ما تبت ورحت العاب نارية مره ثانية <

يقولكم لو ارفع قضية على ديزني اكسبها ويعطوني تعويض مادي كبير بس يبي لها محاكم وروحة لها اكثر من مره
وش لي بوجع الراس تنازلت عن القضية ويحمدون ربهم ان وقتنا قصير ولا كان خذيت فلوسهم

اليوم اللي بعده رحنا لمحلات ديزني في ديزني سبرينق
مو محلات تخص ديزني لا بس المكان لها ومأجرته لبعض المحلات
وكون انها محلات عادية ومطاعم ما صورت الشيء الوحيد اللي شدني هاللافتة
وفي محل لككوكا كولا حبيته بس ما صورت هو طوابق تقريبا ٧ طوابق والطابق الاخير تجربون جميع انواع الكولا ببلاش
امثال سفن اب وميريندا وغيرها < طبعاً حنا الحين مقاطعة لا تتفلسفون الموضوع ذا من سنة

في بعد منطاد تقدرون تركبونه بس ما ركبناه بسبب الزحمة وغير كذا راشد صغير خفت عليه ليطيح لذا ما صورت
بس حبيت اقولكم وش موجود

اليوم التالي رحنا لاخر حديقة من حدائق ديزني كانت هوليوود استوديوز
احلى شيء حبيته كان عرضها الليلي جداً حلوو ومختلف

^
كبينة التصوير كانت تجربة حلوه اول مرة اجربها شفتها بالافلام بس

ما يحتاج اتكلم واقول مين لعب

هاللعبة حلفت العبها حامل ولا غيره لانها من الالعاب اللي مستحيل افوتها
وتعتبر احلى لعبة في الحديقة كلها
لعبة تروح فوق وتنزل بسرعة لعبتها وللامانة تحسفت بعدين < ما صار شيء بس اكلني تأنيب الضمير

معرض اسماك وجابوا حورية بحر تسبح فيه
ما صورتها لاسبااب اخلاقية <
بس حبيت الاكويروم الصغير اللي مسوينه

^
المشهور رشود ههههههه

^
تغدينا في هالمطعم
للامانة اي احد يسألني كيف الاكل هناك الاكل في امريكا سيء جداً
يمكن انا اشوفه كذا لاني كنت حامل ووحم بس فعلاً خصوصا الدجاج
وكون اني كرهت الدجاج بسببهم (مو في ديزني بس اتكلم بشكل عام)
اكلهم مو مستوي عدل او انا احسه كذا وحاسة الشم عندي تعرفون كيف بس فعلاً
اسألوا اي احد راح امريكا اكلهم ماش مو ذاك الزود

احلى شيء بلا منازع الكولا < كانت ادمان عندي هناك خصوصاً اذا كانت مضببة
ترا للعلم غير عن الموجوده عندنا من الطعم
< الحمد الله بعد المقاطعة قطعت الغازات بكبرها

^ ننطر احلى عرض عرض فانتازيا ٢٠٠٠ من نفس الفلم

^
بضيف العرض في قسم الفيديوهات اللييبي يشوفه يحط لي فديت

اليوم اللي بعده رحنا يونيفرسال ستوديوز الغنية عن التعريف بالنسبة لي احلى من ديزني بمليون مرة
اولا ما شفت ولا لون من الالوان الستة < حاطين لهم محل بروحهم مو للعلن نفس ديزني

غير كذا العابهم شوي للكبار مو للاطفال والكبار اقصد من ٦ سنين وفوق ولغير الحوامل <

والطول هنا اسعف بنتي تلعب كم لعبة انا ورشود ما لعبنا الا لعبة العروض وكم لعبة تصلح لعمر سنتين

^
لعبناها كلها لانها عرض متحرك

^
لعبها زوجي وانا متفرج فقط مع اطفالي
تخيلوا كمية القهر

لعبة عرض شريك

لعبة عرض المتحولون + لاحظوا اني صورت الالعاب اللي دخلتها واغلبها عروض وثري دي

بعدين دخلنا عالم هاري بوتر

^
لعبة البنك ما لعبتها بس صورت التنين

^

^
اللي شاف سلسلة الافلام بيفهم وش هذه الرموز
ترا دخلنا قلعة هاقورتس ولعبنا اللعبة < ادري خاطرت للمره الثانية بس وش اسوي

^
BUTTER BEER

هههههههه اسمها كذا بس هي ما فيها خمر مجرد كراميل وسفن اب
وحتى محد يجي يتفلسف ترا الاطفال اللي بعمر شيوخ يشربونها <
بنتي ذاقت وما عجبها ههههههههه

^
الشيء الوحيد اللي تمنيته يكون موجود الالعاب النارية
ادري ما تبت من الموقف <
لان يونيفرسال سنغفورة كان فيها بس امريكا ليش ما فيها < منطق صح

^
بعد اسبوعين جميلين ودعنا بيتنا هناك بعد ما تريقوا عيالي
< سويت لهمم ريوق قبل لنطلع
وكون ان حنا ما افطرنا فمرينا انا وزوجي ناكل

^
محل لبناني في المطار

وبس والله ورجعنا للدوحة ومعي ذكريات حلوه من سفرتي صح ان توجهي لهالدولة تغير تماماً
مع ذلك لا يمنع اني ما استمتعت بسفرتي فيها

حنا اللي نصنع الذكريات وحبيت العبارة اللي شفتها بطيارة
شرايكم فيها ؟

​

 

[Detective JoulZ]

الفيديوهات بسبب ان اليوتيوب حاط لي لمت لعدد الفيديوهات في اليوم
فكل يوم بحط المزيد حالياً حطيت الموجود عندي
اخذوا لفة على الموضوع وبتنزل جميع الفيديوات كاملة بأذن الله

- نظام اشتركي ولا بنقلل اللمت -

قابل للزيادة اكيدددد ما حطيت بقية العروض بسبب اليوتيوب
مروا على الموضوع لو حابين تشوفون العروض اكيد بنزلها

​

 

[Detective JoulZ]

اتمنى انكم استمتعتوا معي بالرحلة
الموضوع يحتوي على ٧٤ صورة من تصويري وتصوير زوجي

وكأغلب مواضيعي احب احط فعالية فيها
كتبت اسم كونان بالعربي على وحدة من الصور اللي يجيبها له مني ٥٠ تونات

- تم الموضوع بحمد الله وقوته -
شكراً جزيلاً @Sano على تصميم الطقم الرهيب حبيته

جميع الحقوق محفوظة لأنمي تون ولجولز

​