A Bright Chapter || الحياة بدأت للتو (3 زائر)

[Lightless]

مرحبًا
أهلاً بك في A Bright Chapter حيث تم رسمياً إغلاق ملفات الغموض والألوان السوداء والعناوين الحزينة إللي كانت تصرح بالحزن والنكد والكآبة وإني عايشة بالزاوية
نظرت لنفسي القديمة واكتشفت إني عايشة هالأجواء بصريَا وسمعيًا بس كتابيًا شوية روحي كانت مرحة
لذلك قررت إنه أقضي على هالتناقضات الفنية وأنظف الغبار عن حسابي وابدأ بطابع جديد يشبه روحي الحقيقية تمامًا
شغلنا المكيف وفكينا الستاير والمكان صار مُشرق ومليان تفاؤل وأوكسجين
دايمًا يقولوا إن الحياة تبدأ بعد عمر العشرين (ومرات بعد القهوة ) لكن في مدونتي: الحياة بدأت للتو.
سؤال جاء ببالي هل سبق وشفتوا حساباتكم القديمة وجاتكم رغبة لتغيير الهوية فجأة ولا بس أنا اللي سويت إعادة ضبط مصنع؟

 

[Lightless]

،،
أنا كنسلت برامج السوشال ميديا .. حسيت اني في مكان مو مكاني نهائياً.
صارت الدنيا كلها خوارزميات و ترندات واعلانات واشياء ماتعنيني ونهائياً مو اهتماماتي.
وأكثر جزء قواني على التخلي عنهم إنه حتى مااقدر اتحكم بالمحتوى اللي اشوفه وكإنها هي اللي تتحكم فيني
غصب تطلعلي أخبار - مواضيع - إشاعات - تخبييص .. وفوقها يجبروني أشوف إعلانات

ابحث عن عالم انا المسؤولة عن انشائه

واللي صار إني من أكثر من سنتين فكيت نفسي من تعلق السوشال ميديا وقررت أستشعر وأعيش الواقع.
وهالشيء فرق جدًا في جودة حياتي ونفسيتي وذكرياتي كذلك وفرق في مهاراتي الإجتماعية ولقيت إني تدريجيًا أستعدت نفسي.
من الأشياء اللي دائمًا بسببها كان عقلي ملياان بعلامات إستفهام.
إني أجي متحمسة لأشياء كثير أحبها وابدأ فيها وأتحمس وتوصل إني أحط لنفسي نِظام إنه لازم أسويها بشكل يومي.
ومجرد ماتعدي فترة بسيطة أوقف أحس إني مُو قادرة أسويها.
المشكلة برضو ما أرحم نفسي وأتوحش على نفسي وألوم نفسي إنه لييه!! المفروض تستمري .. وأصير أضغط على نفسي لين أعتزل الدنيا ومافيها وأُحبط
وهالشيء ينطبق على أغلب الأشياء إللي بحياتي إلى ماجاء الوقت إللي أُعتبر صرت واعية بنفسي أكثر وصرت أكره الإنتكاسات
أتعلمت حاجة بحياتي : إني ما أضغط على شعُوري وأسمع لعقلي وقلبي وجسمي لما ينبهوني..
صرت لو حسيت: مااقدر أرد = ما أرد ، ما ابغى أروح = ما اروح ، لو حسيت إني ما ابغى = أرفض.
^ معاكُم وحدة كانت تضغط على نفسها بكل شيء وماكانت تعرف تقول لاء نهائيًا وأتعلمت تقولها بالطريقة الصعبة
^ وترا نفس هالصفة هي إللي خلتني ما أستمر بأي شيء بالدنيا سواءً سوشال ميديا، تعلم لغات، لعبة، أتفرج أنمي ، .... أي شيء.
ونفس الشيء كنت جالسة أسويه بأنمي تون أجي مندفعة وأختفي في يوم وليلة.
لكن هالمرة مختلفة لإني ما جبرت نفسي أسوي مسح ضوئي لكل شيء جآلسة أخذ كل شيء حبة حبة وأتصفح المواضيع وأتفرج وأشوف لدرجة حسيت كإني مستجدة بعالم المنتديات .. سابقًا كُنت أسوي إحتلال وأجلس طول اليوم أرد وأزعج خلق الله بالرسايل وما أسيب أحد وكلها كم يوم وأختفي للأبد تخلص طاقتي كلها
ولاحظت لما عدت السنين إني من يوم ماصرت أرسم حدود لنفسي وما أوصل نفسي لمرحلة الإحتراق بعدها ماعمره جاتني إنتكاسة وعايشة بخير ليومكم هذا .. > ترا لحظة الادراك جاتني قريب
رُغم إني ما أقدر أجلس طول اليوم على الجوال والشاشات > ممنوعة عشان بنتي لسا عمرها سنة وما أبغاها تتعود ولعله هالقرار حماني قبلها وخلاني أشوف العالم بحقيقته لكن رغم كل هذا : قدمت على الجامعة ، طورت من لغاتي البشرية ومازلت أطور وأتعلم بشكل يومي ، بأتعلم لغة بايثون ، اقرأ بشكل يومي،.....
معنى كلامي إني أكتسبت مهارة إدارة الطاقة والأشياء اللي كنت أحاول أجبر نفسي عليها وأفشل بكل مره صرت أسويها دحين بسلاسة وراحة وبدون ما أحس بإرهاق.

،،
المغزى من كل هذا إنه الحياة مو سباق أو إنك تحتاج تثبت شيء للآخرين و السعي الحقيقي والدايم هو اللي تسويه وأنت متزن و هادي.
من تجربتي صرت أؤمن إنه الاندفاع العالي والركض المفرط غالبًا يخفوا وراهم احتراق مستخبي .. الإستمرارية الحقيقية تنولد من الرفق بالنفس.
يعني لما تتعلم كيف تدير طاقتك وترسم حدودك بوعي وتلبي احتياجك للراحة قبل تصيبك نوبة إحباط؟ حتكتشف إنك تقدر توصل لكل أهدافك بس بقلب مطمئن وبدون ما تخسر نفسك بالطريق .. يعني بالمُختصر توصل بكبرك كااامل قطعة وحدة مو تلقى نفسك تارك نفسيتك ولا عقلك ولا بالك بالطريق.






يارب أشوفكم كلكم واصلين للي تتمنوه ببال هادي وقلب مرتاح و من غير تعب ولا ركض يُنهك أرواحكم