الختم الذهبي Gundam Extreme Vs Full Boost (1 زائر)

[The-superior]

شخباركم؟ عساكم مرتاحين ومستانسين
حبيت اليوم أكسر الروتين وأنزل لكم تقرير عن لعبتي المفضلة (كلمة إدمان شوية عليها خخخ)
على فكرة من زمان ما نزلت موضوع في قسم الألعاب xd ..بس ان شاء الله اتكون عودة موفقة
المهم موضوعي اليوم تقرير عن الجزء الثاني من سلسلة لعبة Gundam Extreme عالـ PS3
لعبة لا تنوصف الصراحة وأشك اني بعطيها حقها في هالشرح
بس ان شاء الله البعض يتحمس لها لأني تعبت وأنا ألعب مع الأجانب xD

^
مثل ما هو موضح في الصورة اللعبة لها نسختين
الفرق بين النسخة العادية وبين نسخة G Premium Edition
انه النسخة الثانية فيها أغاني أكثر فقط لا غير
<< مادري شو الفايدة مع العلم انه اللعبة تدعم Custom Soundtrack

المهم انيي للعبة






ماهي لعبة Gundam Extreme Vs Full Boost؟

اللعبة باختصار لعبة قتالية ونالت لقب أفضل لعبة أركيد في اليابان لسنتين متتاليتين
لحد الآن هذي أكبر وأشهر لعبة جاندام من ناحية الشخصيات والأونلاين والجيم بلاي وكل شي

فيديو توضيحي

[YOUTUBE]rPKsPztCOHo[/YOUTUBE]

- تحتوي اللعبة على أكثر من 90 شخصية
- اعادة موازنة الشخصيات ونظام اللعب بشكل كامل
- امكانية لعب Arcade Mode و المهمات اونلاين بمشاركة لاعبين آخرين
- قاعات اونلاين كبيرة بحيث يمكن للقاعة الواحدة استيعاب 12 لاعب كحد أقصى
- قابلية استخدام Custom Soundtrack والاستماع لها حتى وانت تلعب اونلاين
- امكانية تخصيص شاشة اللعب الـ HUD .. مثال:-

بالإضافة الى مميزات أخرى ماقدر أتذكرها الحين xP





لماذا علي شراء هذه اللعبة؟

السبب الرئيسي اذا كنت اتفكر تشتري اللعبة يرجع لسيستم اللعبة نفسه
سيستم اللعبة محايد يعني مب شرط تتقن اللعب وتحترفه عسب تعرف تلعبها
والأهم من هذا مب لازم اتكون من معجبين جاندام عشان تستمتع فيها
+ اللعبة فيها تنافس كبير وبسيطة للمبتدئين وكل ما اتعمقت فيها بتكتشف عمق نظام الكومبو
ببساطة سبب اشتهار اللعبة انها ترضي جميع الأذواق والأطراف
من ناحية الشخصيات تنوع واختلاف كل شخصية عن الثانية (تحتوي اللعبة على أكثر من 90 شخصية)
من ناحية النظام سهولة احتراف المبتدئين وعدم صعوبة التعلم في حال أرادو التعمق

&

مع ان اللعبة تعتبر لعبة قتالية لكنها ترتكز على 2vs2
طبيعة اللعبة تعتمد على روح التعاون والعمل الجماعي وهذا أحلى شي فيها
ومثل ما ذكرت مب شرط تتعلم الكومبو عشان تقدر تلعب لأن نظام اللعبة يميل لمزاونة جميع المستويات
بالنسبة لي يوم ألعب مع ربعي انغطي على بعض xD

مثال

هذا ربيعي أول مرة يلعب اونلاين بعد ما علمته الأساسيات

[YOUTUBE]dGUh_Li_oug[/YOUTUBE]


وهذا ربيعي الثاني يلعب بس بدون عن أعلمه شي :D

[YOUTUBE]azCOXCEuJAQ[/YOUTUBE]

^
أهم شي أربكهم وفزنا الجيم خخخ



هذا نفس الجيم اللي فوق بس الكاميرا مركزة علي

[YOUTUBE]SlcnUoY-dp0[/YOUTUBE]

^
مع انه ربيعي يخبص بس الصراحه لو اتلاحظون أنقذني في أوقات حرجة xD

مثل ماهو موضح بالصورة اللي تحت عند بداية اللعب ينقسمون 4 لاعبين لفريقين
كل فريق يحتوي على 6000 نقطة .. و أول فريق يفقد كل نقاطه يخسر
للعلم النقاط اللي يخسرها الفريق تعتمد على الشخصية اللي يختارها اللاعب
الشخصيات تنقسم من الأقوى للأضعف 3000, 2500, 2000, 1000
معناته مب شرط اختيارك للشخصيات القوية تضمنلك الفوز
لأنه لو دمروك مرة بيخسر فريقك 3000 نقطة

هل علي معرفة اللغة اليابانية حتى اتمكن من اللعب؟

لا طبعا اللعبة قابلة للعب حتى وانت ما تفهمها
الصفحة الرئيسية بالإنجليزي + شي ترجمات في النت للي يحتاجها
& الإنتقال بين القوائم سهل حتى بدون معرفتك للغة اليابانية

شخصيات قيمتها 3000 نقطة

شخصيات قيمتها 2500 نقطة

شخصيات قيمتها 2000 نقطة

شخصيات قيمتها 1000 نقطة

أين يمكنني شراء اللعبة؟


عن طريق هالمواقع

Play-Asia
Ami-Ami
NCSX


الطريقة اللي أنا اتبعتها:-

1- سويت حساب PSN ياباني
هالفيديو ساعدني

[YOUTUBE]rEC8D0fWToI[/YOUTUBE]


2- سجلت في موقع Play-Asia

3- اشتريت بطاقة PSN يابانية (رقمية)
* ملاحظة عند شراء البطاقة اتأكد انها النسخة الرقمية "Digital"
لأنهم بيطرشولك رمز البطاقة على الإيميل بدال ما يشحنونها لك

4- الموقع طرشولي رمز البطاقة > دخلتها في الحساب الياباني > نزلت اللعبة
* ملاحظة2 قيمة البطاقة 10000YEN حوالي 400 درهم..
قيمة اللعبة عالـ PSN حوالي 200 درهم..بتبقالك خردة حق الـ DLC
في حالتي أنا وربيعي اتقاسمنا المبلغ وبعدين اتشاركنا اللعبة
هو حملها مرة وبعدين أنا دخلت حسابه وحملتها على جهازي

اللي عنده أي استفسار يراسلني
وان شاء الله الموضوع ما يكون ثقيل عليكم
فمان الله

​

 

[Nαncy ☀]

​

بسم الله الرحمن الرحيم،
السلام عليكم ورحمة الله وبركاته،
كيف الحال يً سوبر؟ إن شاء الله بخير..
الله ، وناسه موضوعك دسم ،
وآخيراً شفنا ناس متحمسين للقسم ذ7 ،
ماشاء الله تبارك الله ، موضوعك حيل قوي ع4
وشرحك للعبه حيل حلو، آنا لعبت كاندم الجزء
الثاني عً ps2 وكانت رهيبه صراحه ،
بس اعتقد ذي بتكون أكشخ، خصوصاً أنها عً الـ ps3 ح2
يخي حمستني للعبه ، ودي اقوم اشتريها الحين الحين
ولعبكم والله شكله حماسي بشوفه، بس مو الحين لآن المتصفح
متروس صفحات حالياً بشوفه في وقت لاحق بإذن الله ^^
وآهم شي ان اللعبه ترضي الطرفين عشان محد يزعل <طرآق!
لا صج لاحظت أن كاندم شي سهل ومافيها صعوبه ، ويمكن ذي اسهل بعد
الصور حماس والله، تحمس ان الواحد يلعب اللعبه ، ع4
شسمه، افهم من الطريقه المعقده ذي والمشواريه، أن اللعبه هذي
ماراح تنزل في السعوديه ؟ @_@ خبلان اصلاً بالعكس يربحون لو ينزلونها >: (
اصلاً عادي، يعطيك العافيه عً الجهد الضخم والمجهود الرائع، وبعد
انك رفعت لنا لعبكم شي قوي ومبهر صراحه، يعطيك العافيه
حيل تعبت عً الموضوع ، تم ختم الموضوع بمميز ، نورتنا
ولاتحرمنا هالمواضيع الكآشخه، بجد استانست يوم شفت موضوعك وقوته،
جاري التقييم، وتقبل مروري، في أمان الله..~
​

 

[أنين الذكرى]

​

السلام عليكم ورحمة الله وبركاته

أهلاً أخي .. كيف الحآل؟
ان شاء الله بخير وصحة يارب
ماشاء الله تبآركك الرحممن فجرت القسسم بقووة
حمستتني للعبة بجد تقريرك عنها حيل حلو ووافي ومشووق
اعجبتني اللعبة من زمان عن البلاستيشن بس شككلي برجعع لهه
مميزات اللعبة ممتازة بالذات انها توازن بين المبتدئ والمحترف
وأي واحد يقدر يلعبها ولو مو عارف الياباني او الانجلش
وفي ترجمات بالنت بعد حلو حييل ,, غير ان الشخصيات تشبهه انمي الكاندام

معناته مب شرط اختيارك للشخصيات القوية تضمنلك الفوز
لأنه لو دمروك مرة بيخسر فريقك 3000 نقطة

^ أححلى شي هالنظامم لان كثير يهتمون بس بالنقاط
العاليةة وما يختارون غير الشخصيات ذات النقاط العالية
ووصفك لطريقةة شرااء اللعبة واضحح ويساعد
والله وبكل صراحة حممستني للرجعة لهالألعاب
يعطييك العافية عالمجهوود الجبآر
سلمت ولا حرمنا جديدك وننتظر المزيد
شكراً لكك + تستاهل التقييم , الشكر , والخمس نجووم

تقبل ممروري


​

 

[The-superior]

BaToOL


وعليكم السلام ورحمة الله وبركاته

هلا اختي بتول أنا الحمدلله بخير عساج بخير
خخخخ عن نفسي أي شي متعلق بـ Gundam لازم يحمسني
<< ان شاء الله يدوم هالحماس xD


دامج لاعبتنها عالسوني2 أبشرج اللعبة اتطورت وايد
أنا لعبت كل الأجزاء اللي نزلت عالسوني2 والبي اس بي
وأحلى شي في هالجزء انهم دمجو الأجزاء القبلية كلها مع بعض
خخخخ اللعبة بتكلفج 400 درهم لو تبين رايي شوفي حد يتشاركها معاج
أنا ماقول انها ما تستاهل بس اللي ما جربها يمكن يشوف السعر مبالغ فيه
للتوضيح أكثر البطاقة الالكترونية اللي تنباع في موقع Play-Asia سعرها 10000Yen
10000Yen تعادل حوالي 400 درهم اماراتي بس سعر اللعبة على ال PSN حوالي 8000YEN
يعني ما يقارب 300 درهم اماراتي..وبالنهاية بتبقالج خردة حق ال DLC أو حق لعبة ثانية

يب اللعبة سهلة وممتعة والصراحة ما ينمل منها..يكفي انها ماخذة المركز الأول في اليابان :P
لوول للأسف ما بتنزل في السعودية..خليها تنزل في الغرب بالأول xD
اليابان ماخذين كل الألعاب الحلوة وحارمينا منها ):

“شوفوا هاللعبه
شفتوها؟
ترا مب نازله عندكم”
^
نامكو كل أسبوعين ونص


عادي خذي راحتج,,لعبنا عبيط أصلا xD
عموما مشكورة عالختم ومرورج الطيب
أسعدتينا بطلتج



أنين الذكرى


وعليكم السلام ورحمة الله وبركاته
الحمدلله يسرج الحال اختي, عساج مرتاحة

يب لو عيبتج الأجزاء اللي قبل هالجزء بيعيبج أكثر
ذكرتيني ان شي مسجات قصيرة بالاونلاين..
انتي تكتبينها حتى لو كانت بالإنجليزي تطلع داخل اللعبة والتيم يقدرون يقرونها
خخخخ شخصيات اللعبة من الأساس مزيج من أجزاء جاندام كلها من أول جزء لين Gundam Unicorn


يب نصيحة ارجعيلها,,ما بتندمين :P
الله يسلمج اختي ومشكورة على مرورج الطيب
نورتي الموضوع
​

 

[āЯaH$]

​

بسم الــله الرحمن الرحيم

السلام عليكم ورحمه الله تعالى وبركاته
كيف الحــال اخووووي ؟؟
ان شاء الله تكون بالف صحه وعافيه ؟؟ يا رب

ما شاء الله تبارك الله اش هالموضووع الرهيب

الموضووع في قمه الاناقه والتنسيق

ووواي اللعبه مبين عليها مشووقه ومحمسه كثير
واكثر فقره عجبتني في كل الموضووع لماذا علي شراء اللعبه
^ اسباب مقنعه لدرجه انها خلتني دشتري اللعبه ~> بيكفي كذب
اللعبه احسن شيئ فيها ان عدد لاعبيها 4 اجتماع
الله يعطيك العوافي ع المجهوود المذهل هذا
لا تحرمنا من ابداعاتك الخطيره والجهنميه
تم الشكر والتقييم وال 5 ستارز

مع السلامه في امان الله
ودي وتحياتي ،،

​

 

[The-superior]

بسم الــله الرحمن الرحيم

السلام عليكم ورحمه الله تعالى وبركاته
كيف الحــال اخووووي ؟؟
ان شاء الله تكون بالف صحه وعافيه ؟؟ يا رب

ما شاء الله تبارك الله اش هالموضووع الرهيب

الموضووع في قمه الاناقه والتنسيق

ووواي اللعبه مبين عليها مشووقه ومحمسه كثير
واكثر فقره عجبتني في كل الموضووع لماذا علي شراء اللعبه
^ اسباب مقنعه لدرجه انها خلتني دشتري اللعبه ~> بيكفي كذب
اللعبه احسن شيئ فيها ان عدد لاعبيها 4 اجتماع
الله يعطيك العوافي ع المجهوود المذهل هذا
لا تحرمنا من ابداعاتك الخطيره والجهنميه
تم الشكر والتقييم وال 5 ستارز

مع السلامه في امان الله
ودي وتحياتي ،،

​

وعليكم السلام ورحمة الله وبركاته

هلا اختي سارا
أنا طيب عساج طيبة يارب

تسلمين اختي عالإطراء
هههه لو مب نازلة في اليابان بس كنت صدقتج xD
يب أحلى شي اللعب الجماعي
الله يعافيج اختي ومشكورة على طلتج المنورة
فمان الله​