Since 2015 ~ منذُ 2015 . (1 زائر)

[اللـافنـدر]

رد: Since 2015 ~ منذُ 2015 .

: Since 2015 ~ منذُ 2015 .


طبعاً حاليا هالكم يوم انا في بيت يدوه ،،
مع خالاتي و بنات خالاتيه و اولادهم ،، و خوالي
متعودين على هالجدول مع بداية كل اجازة لان هم ساكنين في منطقة بعيده عن منطقتنا
،، المهم اليلسة معاهم حلوه ما تنمل ،، فعلشان جي ،، وجودي مسحوب عليه في المنتدى كم
يوم
،، هي احس بالوناسة يوم اجوف اضافات يديد عندي في تويتر ،،

 

[اللـافنـدر]

رد: Since 2015 ~ منذُ 2015 .

.. ــــ ..

Since 2015 ~ منذُ 2015 .

من الجميل ان لا نصدق كلمات المدح ..


( قابل للتكملــة)​

 

[اللـافنـدر]

رد: Since 2015 ~ منذُ 2015 .

Since 2015 ~ منذُ 2015 .



وااااااه

رجعنا البيت اخيراً ..
احس اني ما ابى ادون تدوينات ،، لان ما عندي موضوع معين ..
بس احب اذكر موقف خلاني اكره ولد عمي لين اليوم على هالتصرف<<
كنت تقريبا في عمر البراعم يمكن كنت في صف ثالث و هو صف رابع
كنت اسير مع ابوييه و اخوانيه في فترة العصر مسبح الريايل اتعلم السباحه
و طبعا عمي و عياله الاثنين كانوا يسيرون يتعلمون السباحة ..
في يوم من الايام طلعت من مسبح الصغار و سرت يلست في المسبح الكبير
الكل كان فيه .. يلست على طرف الحوض العميق اللعب بريلي في الماي
فجأة يا ولد عمي و دزنيه في الحوض و انا من الصدمة ما عرفت اتسبح يعني
حسيت بخوف و شربت ماااي الحوض .. ييييع كنت اجوف الدري مال الحوض
بس مب قادره اوصله
كيف كان شعوري .. حسيت اني بموت خلااااص خلاص ما شي امل في الحياة
كنت اتنفس الماي من خشمي و اشربه من حلجي المهم يا ابويه و طلعني
و يلست اصييييح ييي و ابويه يلس يرمسني و يزيد الطين بله يخبرني
شربتي ماي الحوض اخيييييج و انا اصيييح
المهم الحمدلله
اني ما مت بس دوم يوم اجوف ولد عمي اتذكر هالموقف اللي عيشني فيه ..
بس سامحته لكن مستحيل انسى هالموقف البايخ ...آ7

​

 

[اللـافنـدر]

رد: Since 2015 ~ منذُ 2015 .

Since 2015 ~ منذُ 2015


صباح الخير ،،، نظراً للوقت ..

سهرانة اليوم غريبه من عوايدج .. طبعا ،، اصلا انا ما اسهر الا في الحالات التالية:
اتابع فلم .. اتابع برنامج .. سهره مع الصبايا ،، او اتابع مسلسل او سهره
امزح يا جماعة الخير .. المهم

من شوي خلصت متابعت فلم صف الاغتيال (Assassination class room ) حبيييت > باللبناني حبيييييت الفلم
هو فلم ياباني قصته بأختصار يجب على طلاب صف 3 -e القضاء او إغتيال مخلوق فضائي يهدد الارض ..
و فرحت انا هالفلم في جزء ثاني .. المهم جي يعني ..
و الحين يالسة اكتب هالتدوينة و انا يالسة اسمع سنابات الناس...


حقيقة حلو عني ..
الكل يقدر يستفيد مني في عالم الواقع و الافتراضي ،،،
اطلبوني و أنا كلي لبييه لآجل عيونكم ..

اعجبني3اعجبني3اعجبني3
​

 

[اللـافنـدر]

رد: Since 2015 ~ منذُ 2015 .

Since 2015 ~ منذُ 2015

صباح الخيرر ،، لان المساء ..

سافرت خالتي ا باكوك مع خواتها
بناتها بينامون عندنا لانهم صغار اكبر وحدة
فيهم عمرها 12 سنة و لان بعد ابوهم مسافر
يعني محد عندهم في البيت موليه غير البشاكير ..
الله يوصلهم بالسلامة .. ان شاء الله

(( كلمة لازم أعكسها << جافة المشاعر نسبياً ))
بحاول بكل ما فيني اغير هذه الصفة المشكلة حتى آ8
الغريب ملاحظة هذه الصفة .. .. الله كريم​

<<<

​

 

[اللـافنـدر]

رد: Since 2015 ~ منذُ 2015 .

Since 2015 ~ منذُ 2015


طبعا حاليا موقفين دراسة .. الحمدلله
اهم شيء عندي نشت الصبح .. بس بعد اقوم من وقت يعني الساعة 7 و مرات 8 ..
اليوم طبعا ما طلعت من البيت اصلا عادي في شيء اسمه باجر ييييس ...
على كثر طلعاتي مع ناسي و ربيعاتي الا ان اقل مكان زرته السنيما ليش .. لان ناسي
اللي اطلع معاهم وايد يملون من السنيما ... انا شو ذنبي جد جد يعني آخر فلم جفته في
السنيما كان الاميرة النامية اوووه قصدي النايمة مال منيفسنت ببطولة انجلينا ... يعني غبار
اليوم راحوا اليهال يجوفون رسوم لكن انا ما كان عندي خاطر اروح معاهم ..
......

اغير الموضوع .. القهقهة ..
احب اضحك عندي الضحك من الهوايات اللي احب اسويها و اعتبره شيء روتين
و اساسي في حياتي و ما اقدر استغني عنه يعني الله لا يحرمني منه و لله الحمد..
و بالحمد تدوم النعم .. يعني حتى لو ما في شيء يضحك لازم اطلع سبب للضحك و احيد
يعني اذكر ليلة ثاني من ديسمبر في هاي السنة انا و اختي كنا سهرانين نسوي كوكيز للتجمع الاهل .. و تخيلوا قاعدين من وقت و الساعة 1 في ليل و نحن نطبخ و نضحك على بعض لان مب ملزومين نسوي الشيء الصراحة ضحكة من الخاطر لدرجة ان دموعي نزلت و حسيت بشد في معدتي و خدودي خلااااااص بدت تشد في ويييه يعني وصلت للنهاية
بس بعد ما اقدر اوقف عمري من الضحك حتى بعد حدوث المواقف الجادة و الصريحة الصراحة احب اضحك و خاصة ً معاها لانها تزيدني ضحك فدييتها الله لا يحرمني من طيبتها ..
..


​

 

[اللـافنـدر]

رد: Since 2015 ~ منذُ 2015 .



Since 2015 ~ منذُ 2015

حياتي ك خريجة ثانوية عامة قلبي5قلبي5قلبي5

طبعا كنت في المدرسة من الطلاب الشطار و اللي نسبتهم دايما في التسعينات يعني شاطره المهم دخلت مرحلتي الثانوية كنت جاده في الدراسة لكن يوم وصلت الثانوية العامة قلت لنفسي ليش ما اعيش حياتي بس من الدراسة اصنع ذكريات مع البنات اخالف القوانين يعني اسوي كل شيء ما كنت اسوييه طبعا استانست كنت انام في الحصص اشخبط على الكتب و الطاولات حتى علي اليدران يعني الجدار كنت اييب معاي كام و اصور و حجتي لوجودها كانت ناجحة.. طبعا فصلت مريول مخالف و حتى نعال مخالف و اطول اظافري و كنت اشتري اكثر من شنطة و حتى كان عندي اكثر من جوتي يعني بأختصار اتسليت لكن في بعض الاشياء ماسويتها و الحين ودي اسويها ..المهم نتكلم عن شهادة الثانوية عامة لازم نسبة محترمة لان الناس كلها تسأل كم يابت بنت فلان و شو نسبة بنت علان .. ختمت شهادتي الثانوية بنسبة ((89٪)) وااااااااو انجاز بأصوله إذا سألتوني ندمانة ..؟ هيه لاني طلعت من لستة بنات العايلة اللي يابوا في الثانوية العامة في التسعين الاجابة الثانية لا لاني صنعت ذكريات حلوو عشت فيها حياتي و تحرر من قيود كانت حاكمة تصرفاتي..و بعدين اصلا انا جريبة من التسعيين و بعد اكتشفت نفسي اكثر و عرفت من اكون .. لو يقولون لي تكررين الثانوية العامةبقول هيه لكن بشرط ان اكون مع شلتي في نفس الصف و الباقي على الله .
لك الحمد يا ربي

 

[اللـافنـدر]

رد: Since 2015 ~ منذُ 2015 .



Since 2015 ~ منذُ 2015

سالخيير ..

لاني زجمانة ف ما افكر الا اني اعلق على تقيمات الاعضاء
اول شيء اسعد في وجود مشاهدات بعد كل كتابة لتدويناتي..
ثاني شيء حتى لو ما قيمتوني شكركم للتدوينات شيء جميل و طيب ..
ثالث شيء تقيماتكم يعطيكم الف شكرا عليها تونسون ..ر8 ي ح2

フラワー مدونة رائعة! /(^.^)\

على فكرة كانت اول معلقة لمدونتي.. يعطيج العافية عزيزتي >> اذا حد يعرف وين سارت يخبرني ..

T A I G A مدونة جميله مثل صاحبتها ^.^

فديت قلبج على رايج .. و انتي بعد جميلة ..

♠ نآنسي درِو . هههه، هالفيس اللي يحرك راسه ياما كنت استخدمه من قبل، ذكرتيني فيه ، مدونة جميله .. استمري

هلا بعزيزتي نانسي .. تصدقين ما عرفت اي فيس تقصدين هههههه بس عادي حركت ذكرياتج .. انتي الاجمل ^^ في رأيج

Ń i r Ǿ هههههههههههههههههههههه يا حظه الأخ v.v

اكيييده اكيييد هو الحب الحب ..

Ń i r Ǿ اي اي الضحك اهم شيء في الحياة

هلا هلا بنارو .. اللي كل تعليقاته ضحك .. شخصيتك غير في تقيمات و في التدوين .. كنت اتوقع شخصية اكثر رزانه و برستيج لكن للاسف .. ..الله يسعدك هههههههه مسكين

رغد خالد . اصلا خقيت عليكي أول ماقلتي تحبي المباريات .. اكيد تشجعي الاتحاد صح ؟ اكيد اكيد اكيد مافيها كلام < كف .

يا هلا برغد هههههههه الصراحة احب اجوف لعبهم بشكل عام الاتحاد الصراحة ما اعرف وايد عن الفرق السعودية .. شكلج من المتعصبين .. ث6

دمشقيــة احكي لي عن يوم شتوي جميــل ..

هلا فيج .. طلبج صعب نوعا ما .. هههههههههه لا استهبل لكن يوم بيخلص فصل الشتاء
ان شاء الله بذكر عن يوم شتوي جميل اكثر من باقي الايام ..




نورتوني حبايبي .. الله يسعدكم وين ما كنتوا ..
انا مقصره في حقكم لكن اعذروني بكرمكم

 

[اللـافنـدر]

رد: Since 2015 ~ منذُ 2015 .

Since 2015 ~ منذُ 2015


٣٠ - ١٢- ٢٠١٥


اردتني ان اكون قريبة لنبضات قلبك .. لكن قلبي قريب من نبضات غيرك

هكذا كنت في العالم الماضي


سيكون قلبي قربيا من نبضات قلبك
قلبي هو العشيق الاول لقلبك
سأفرح لفرحك و سأنسيك حزنك
لكن لا تجعل بيننا كبرياء و ودع الغرور

هكذا سأكون لك في العام الجديد

١-١- ٢٠١٦

 

[اللـافنـدر]

رد: Since 2015 ~ منذُ 2015 .

Since 2015 ~ منذُ 2015


2016-1-1

رحلنا .. بمع السلامة .. و أبديتنا الحمدلله ..

لي عودة
ح1
​