مدونة متألقة - Winter Flower || زهرهه الشتآء ♥ ، (5 زائر)

[Angel Haru]

.,

السلام عليكم ورحمة الله وبركاته
صفحة جديدة بالمدونة ونوعًا ما عندي شوية افكار
من اول اليوم ودي احطهم بس ما فضيت غير الحين


الفكرة الأولى بعنوان "الاستغلال":

هو الموقف ما صار قدامي بس صديقتي اليوم كانت تحكيلي عنه اليوم بعد ما صار قدامها وكان كالتالي:
هي تشتغل بعيادة بيطرية وبالصدفة وهي جالسة سمعت السالفة وهي دايرة بين زبونين "رجال" واضح جايين مع بعض
من اللي فهمته منهم واحد منهم يستعمل ابلكيشن من ابلكيشنز المحادثة الخاصة باللغات
على كلامه انه يستعمله عشان يقوي اللغة عنده، بس ايوا مش كل اللي يدخلوا على هالنوع من الابلكيشنز هدفهم التعلم
احيانًا لهم اهداف اخرى ، المهم يقول لصديقه ان فيه بنت بدأت تكلمه من كم يوم وواضح تحاول تقرب منه
الحين المفروض اي شاب طبيعي ومحترم ايش بيسوي؟ بلوك! انا مو هنا عشان هذي السوالف،
بس اخونا ايش سوى؟ جلس يستغل المحادثة لصالحه انه يأخذ منها كلام ومشاعر وغيره
انا مو جاية ادافع عن البنت طبعًا اللي سوته البنت مو صح، بس هو كان بيده من البداية يوقف هالشيء عند حده
دامك لقيت المحادثة رايحة بهذا الاتجاه ليش كملت؟ استهتار البشر بالمشاعر صار يخوف
شخصيًا اكرهه هالنوع من البشر واستحقرهم


الفكرة الثانية بعنوان "السلام النفسي؟":
^احترت بالعنوان الصراحة بس نوعًا ما هذا ما اهدف له دائمًا

هالموقف يخصني انا واخوي ، من كم اسبوع كان دار حديث بيني وبينه ورمى بوجهي مثال:
" ماذا لو مُدير المدرسة أخطأ؟ هل ستواجهينه بخطؤه؟"
انا بكل شجاعة وحماس: ايوا بواجهه بأخطاؤه مش عشان مدير المدرسة يسوي كل شيء على كيفه
وبعد انتهاء اليوم والمحادثة تذكرت اللي دار وجلست افكر فيه هل بجد انا بسوي هالشيء؟
بعد صمتٌ طويل وتفكرٌ كثييير توصلت للتالي:
انا لست من الشخصيات التي تخوض في محادثات ونقاشات مالها نهاية محددة
يعني لو فلان سوى شيء وزعلني بيكون عندي خيارين اروح اعاتب فلان او بسحب عليه وعلى اللي صار
سو لو فلان شخص عاقل واعي النقاش معه بيوصلنا لنتيجة ترضي جميع الاطراف اكيد بروح اتكلم
اما لو كان عكس كدا بكنسل اكيد عشان كذا اخترت عنوان هالفقرة "السلام النفسي"
صح اني اخترت الصمت في الحالة الثانية بس حتى لو كنت تكلمت ايش الفايدة مع شخص ما بيوصلنا لنتيجة؟
بيكون تضييع للوقت والطاقة لذلك ما احب اخوض بنقاشات مالها نهاية مُحددة زي ما قلت بالبداية
وهذا يرجعنا على سؤال اخوي ، لو مدير المدرسة نفر كويس يب بصارحه بغلطه
اما لو كان نفر سيء اصلًا ما بكون كملت بالمكان وبكون تركته من زمان

bye bye~~







​