Pain Of Silence (1 زائر)

[~ M A N A R]

طيب خلوني اغير مواضيعي اللي قبل وابدأ أتكلم عن نفسي من فترة انقطاعي للحين ..
أتذكر اخر مرة تكلمت عن حياتي قبل لا انقطع عشان اختبارات 3 ثانوي اللي هي كانت من 10 اشهر تقريبا او اكثر
المهم من بعدها طلعت من الاختبارات وطبعا سافرنا ..

فيه حاجة مهمة صارت فنفس فترة السفر اللي هي ان النتائج طلعت ونحن هناك وفترة التسجيل بعد كانت هناك
ف اليوم اللي قبله كنت حاسة بضغط كبير ومن غير ان المنطقة كانت باردة ومن غير ازعاج فعالياتهم
ف فتحت النت وقمت اسمع اغنية كيونغسو _ اشتاق له _( طبعا أصدرها قبل لا يطلع للتجنيد )
معاني كلماتها كانت قوية فلا شعوريا انهرت وبكيت من بعد الضغط ..

اليوم الثاني وقت صدور النتايج كنا فمكان عام النتيجة كانت مفرحة لدرجة اني بكيت من الفرحة
والناس تشوف علينا مستغربة ومن شدة فرحتي قمت اسمع ( EXO _ TEMPO)
ورحت اشتريت لي سويت

فترة التسجيل انتهت وصار فترة نعرف وين قبلونا .. طبعا كنا ف البيت ونوعا ماكنت متوترة
وشفت البنات يقولون وين قبلوهم بس انا ما وصلني شي قالوا لي ادخلي موقع القبول ..
كنت مترددة وخايفة افتحه وامي تقول لي لا تفتحي ننتظر رسالة من المؤهل العلمي او من القبول
بس من خوفي قمت وشفت من الموقع وانهرت لأن المكان اللي قبلوني فيه ما كنت حاطتنه طموحي ابدا
رغم ان شهايدهم شهايد عالمية بس انا ما احب المكان بس تقبلت الموضوع ورحت للتسجيل
اللي زاد الطين بلة حطوني فنزوى وانا أصلا تابعة لمسقط بغينا نغير بس ما رضوا
ف اضطريت اخذ سكن وبديت الفصل الأول
_ فيه طلاب يبدوا فصل اول وفيه طلاب فصل ثاني ع حسب اختيار الكلية _
وبديت الفصل الأول وكان جميل جدا وحلو .... واكتشفت اني كلاون مرررة
لأن فعايلي وجنوني كان قوي

حاليا الفصل الثاني ومفروض اخلصه هذا الأسبوع بس عطونا إجازة عشان الفيروس
والحين بننتظر شهر .. ذا الفصل كان سئ واحسن ما أتكلم عنه بس تعيس حرفيا
هذا الفصل يكون اخر فصل بالفاونديشن والفصل الجاي ببدأ ما قبل التخصص _ سرتفكيت _




المهم هذا جزء بسيط من حياتي اللي مرت هذي السنتين وان شاء الله كل الأمور تتعدل
ورايحة احكي لكم ان شاء الله بعض من مواقفي التدوينات الجاية

وشكرا

​

 

[~ M A N A R]

هل أنت متعب ؟ لقد علمت بذلك حينما رأيتك للوهلة الأولى ..
شعرت بأنك عالق في مكان ما .. واعتقد انها ذكرياتك ..
لا بد انها هي !! لا يكون شخص بحالك الا انه يتألم بسبب ذكرياته ..ولقد تأذيت ..
انت تأذيت حتى اكتفيت .. اكتفيت من كونك على هامش حياة احدهم ..
انت تمتلك غريزة ما تجعلك تكره ذلك ..تجعل منك تتحرك للدفاع عن نفسك ..
احب غريزتك هذه ..هي تُعلمك اكثر وتجعل منك شخصا افضل ..
وهي ستذكرك دائما بأن لا تقع في نفس الخطأ مجددا ..
غريزتك تفهمك جيدا .. لكن لا تثق بها دائما ..

​

الثلاثاء
سلطنة عمان, نزوى , حي التراث
28/1/2020
10:46 PM ​

 

[~ M A N A R]

مثل ما وعدت أمس اني بحط تدوينه لصور صورتهم اشارككم إياها ..
ملاحظة :اضغطوا على الصور عشان تطلع لكم بحجم اكبر



هذي الصورة كانت ف سيرلانكا ف منطقة نسيت اسمها .. المهم كنت فحالة ملل


الصورة هذي كانت ف سيرلانكا بعد المكان هذا فوق جبل كبير والسيارات ما تطلع له فأخذنا TUK-TUK
تجربة حلوة بس انا محطوطة كنت فوضعية خطأ لان المكان ما واسعني وانتقلت بعدها بين امي وابوي


ألذ حليب فراولة شربته فحياتي .. مباشرة كان من المزرعة .. احس بطعمه حاليا


اوكي هذا بعد من رجعنا من سيرلانكا ما اذكر بالضبط متى بس قبل القبول اكيد لأني كنت سعيدة فيه

طبعا بعد القبول ورجعة ابوي من العمرة ..كانوا اهلي فرحانين فيه وانا ما راضية..القبول ابدا ما عاجبني
قاموا ضللوني لأني كنت ادور سكن ..تفاجأت اختي جاية بيتنا بدون زوجها و ما مسوين عشاء
طلعوا يضللوني لأنهم عاملين لي حفلة :


كنت جدا ممتنة وسعيدة بطريقة غريبة لدرجة ما عرفت أقول شكرا .. كان ذاك الأسبوع انتقل للسكن ..
طبعا استغربت من نفسي ما بكيت
كنت هادية تماما وفرحت بهداياهم الجميلة وقررت اشتغل عشانهم وغيرت افكاري حول المكان اللي قبلوني فيه
بس عشانهم هم ..


هذا الشي قبل انتقالي للسكن ..كانت ربيعتي اللي انا وهي صديقات من 8 سنوات عازمتني عشان حفل تخرجهم
طبعا انا كنت منتقلة لمدرسة ثانية بس هي ما نستني ابدا ..وكنا دايما مع بعض ونزور بعض
الشي اللي قاهرني هي جايبة لايتستيك اكسو عشان نحط بصمة اكسوال بس ما صورنا مع بعض
لأن هي انشغلت لأنها هي اللي كانت مشتغلة على كل شي وانا كنت اساعدها رغم انه ما الي دخل بالموضوع ابدا



ما اذكر متى بس انا انسانة ما تحب القوارض الا الارانب وهذا ارنب لأختي اللي مو عايشة معنا بالبيت
اقصد متزوجة طبعا لأن الحيوانات أساسا ما تدخل بيتنا
عشان امي ما تحبهم



اول صباح لي بالسكن كنت سعيدة رغم كل شي عشان التجربة الجديدة



اسحبوا عليها كان المقصد جلسة تصوير كتب الكلية بس قلبت جلسة تصوير للشوكليت



فيوم من الأيام من الفصل الماضي كنت حاسة بملل ورحت لربيعتي لغرفتها واصريت عليها اننا نطلع
طلعنا المول ولعبت بفلوسي واشتريت لي ماسكات واكل احتفالا عشان عيدميلادي فهذيك الفترة
::

مسكت عليها نصور كل شي مع بعض وصرت مخبولة


عشان اوريكم الفواتير اللي دفعتها ذاك اليوم


اهم شي الاكل





اخوالي وخالاتي بعد ما قصروا وسووا لي حفلة ثانية عشان القبول بعد :





ما اذكر سالفتها




انا وحدة تحب تصور السماء والسحب وهذي صورة بفوني القديم مالها أي جودة
مثل ما يقول اخوي تصوير 1970


كان يوم ماطر وجميل تجمعنا كل بنات الشقة مع بعض نشرب قهوة ونسولف
وسمعنا أغاني كريس الجميلة _ تشتاق كريس وتصيح ف الزاوية _



بصمة اكسوال فمبنى البزنس .. كانت فترة البوم اكسو ووصلت حدي
وقررت اضحي بيدي لربيعتي _ انا وحدة أي شخص يرسم فيدها يتأذى اذا ما كان نقش _
وكررتها على فكرة مثل هذي :




هذا الدفتر مهم عندي طلعت عشانه بس وما سويت شي ثاني بعده
ولا سويت شي فيه أصلا _ عندكم كلاون تجمع أشياء فرقتها للزينة _



الصورة عجبتني


احب هذي بعد .. قديمة بفوني القديم


هذي قبل تفشي الفيروس كان الجو جميل وراجعة من السكن للبيت
وقررنا نطلع وطلعت انا وتعبي


صور سحب :


1.



2.




فيه ثانيات بس تصويري زفت .. المهم قولوا لي احلى وحدة فيهم ..




الصورة صورتها من كم اسبوع قبل الحجر عشان توديع عزوبية لربيعتنا
المقصد من الصورة اني انا الوحيدة الغير صحية




وشكرا لكم على وقتكم الثمين .. اشوفكم على خير
وما عليكم من تصويري الغريب

 

[~ M A N A R]

.........

يصبح كل الناس ضدك فجأة ..بدون أي مقدمات ..
لا تعلم السبب حتى ..تشعر بأنه من المؤلم ان تغادر غرفتك حينها ..
يصبح كل شئ رمادي بعدها ...الى ان يتغطى بالكامل ..
و الاغاني الحزينة تتسلل إليك ..
حقا من الصعب الشعور بهذا ..ومن الصعب ان تقاومه ..
حينما قلت كل الناس انا لم اعني نفسك !! ..
انت لا زلت تمتلك نفسك ..حاجتك في كل يوم لنفسك هو كل شي ..نفسك لن تخذلك
لأنها تعلم ما بك .. انت غالِ الثمن بالنسبة لنفسك و نفسك غالية بالنسبة لك

.........

​

24 / 1 / 2020
9:55 PM
الجمعة
سلطنة عمان / الداخلية / بدبد ​

 

[~ M A N A R]

انا من نوع الأشخاص اللي يكرهون يشوفون شخص يستهزأ بشخص ثاني عشان اهتماماته
طبعا ذا الشي نشوفه دايما وبكل مكان أيا كانت اهتماماتك لازم تلقى حد نشبة يأذيك عليهم

واكيد كل حد فيكم مر بهذا الشي ..اقرب مثال كونك متابع انمي
بغض النظر عن كل اللي انت تشوفه ونوعك المفضل من الانمي الناس تنظر لك نظرة مختلفة
وتبدأ تقول لك كلام عجيب وتثرثر على انك انت ما قاعد تسوي شي
وان الانمي اللي انت تشوفه للأطفال .. ذا الشي نفسه يواجهوه كل الناس
وبأي اهتمام كان

كلمتني من فترة بنت عرفتها الكترونيا .. قالت لي معلمة التربية الإسلامية معهم
بدت تنظر لها نظرة سيئة لما عرفت انها تحب الكيبوب .. وانها عندها اهتمامات
بالكي دراما والكوريين بشكل عام رغم ان البنت هذي طالبة شاطرة أولا
ثانيا ما انها تسوي نفس الكوريين وماخذة ثقافتهم اتجاه مو حب
يعني حبها للكوريين عادي نفسي ونفس أي كيبوبي ماخذة الموضوع بس اهتمام لا غير
و انها تنظر لها بنظرة مختلفة شي حرفيا يغيض ..

اوكي ليش ذا الشي يغيض ؟...
هذا لأن بكلمتك اللي قاعد تقولها تحسس الشخص مختل
رح تحسسه انك انت سخيف وان الأشياء اللي تهتم فيها ما رح تفيدك
او أشياء مالها داعي .. بس قبل لا تلقي الكلمة ....
هل انت تعرف السبب لحب هذا الشخص لهذا الشي ؟
او ليش هذا اهتمامه بالذات ؟
وليش ما اهتم بشي ثاني غير هذا ؟؟
اكيد ما تعرف السبب .. الأسباب تتعدد وكل واحد له سببه
احب الانمي لأنه يسليني ومن ناحية ثانية انا شخص يستفيد من الاحداث ( ككاتبة اقصد )

الكيبوب ...الناس عندهم فكرة سيئة عن الكوريين مدري من وين جات
هالنظرة نفسها اللي بعض الناس تنظر فيها للآسيويين بشكل عام
ومن غير التعليق على اشكالهم ..اذكر قلت شي واحد للأشخاص اللي واجهوني كذا..
( هم خلوني سعيدة ) وبس !!
قلت هالشي أي وقلت لهم بكل هدوء ..
لأن حرفيا الكيبوب او ( EXO ) خلوني سعيدة بطريقة مو شرط اني اشرحها ...



المهم بالاخر عندي سؤال ..ليش برايكم الناس تستحقر اهتمامات الاخرين ؟
هل هي خطأ ؟ .. او ان الناس تحب تتنمر وتدخل فأشياء مالها دخل فيها ؟



وشكرا

​

 

[~ M A N A R]

من حوالي 5 أسابيع مضت
لما بدأ الفيروس ينتشر ف السلطنة وقبل الحجر الالزامي للدولة ب أسبوع
صار شي غريب جدا ...
بداية الاسبوع كانت عادية جدا رحت للسكن وكل شي كان عادي
بس يوم الاحد بدا عندي اعراض وآلام بحلقي ..
ما كنت خايفة او اي شي لأن تصير لي حالات احس بآلام وفجأة تتلاشى
على نهاية اليوم بدت الحمة فيني بس كانت تقريبا عادية
يوم الاثنين مشيت اليوم بعد عادي وكنت اخذ لي ادول بس ما كان ابدا ينفعني
وكلمت امي انه فيني حمة بسيطة
طبعا امي كانت خايفة وتقول لي انتي مناعتك ضعيفة والكلية زحمة ومدري ويش ..
وكانت ف اليوم الواحد تتصل فيني 3 مرات ..
طبعا رحت عيادة الكلية بس حضرتهم مقفلينها


ليلة الثلاثاء طبعا ما قدرت انام
وعلى الساعة 3 فجر كنت اكلم وحدة من البنات اللي معي بالغرفة
على أساس انها تروح معي المركز الصحي ..كانت الخطة اني اسحب على محاضرة الساعة 12
فهذيك اللحظة حرفيا كنت اعاني بشدة كانت حمة باردة وف لحظة حسيت حياتي بتنتهي
..ورسلت لأمي انها تجي لعندي السكن
من البيت لعندنا ساعة وزيادة تقريبا ..
أرسلت لها حوالي الساعة 4:49 فجر
وبعدها قمت وصليت ودخلت اسبح وهنا صار كل شي
طبعا حضرتي رحت اسبح بماي دافي
لما خلصت حسيت بدوار واغمى علي كان الوضع صعب جدا
ما اذكر وش صار بالضبط بس اذكر انه اغمى علي
البنات صحن على صوت استغاثتي رغم اني ما اذكر اني استغثت ..
بعدين صحيت وطلعت من الحمام و وحدة من البنات لفت علي البرنوص
بس رغم ذا رجعت كل شي فمعدتي وكنت ارتجف بشكل ما طبيعي

ربيعتي قامت وخذت فوني ورسلت للمس اني ما رح اجي
واضطريت اروح المستشفى بهذيك اللحظة
طبعا لما رحت ما حسيت فيه اهتمام كبير تقول لي ليش لابسة كمامة بكل استهزاء
بعدين قامت وقالت درجة حرارتك عادية بس 36

ما اهتميت دخلت الفحص سألتني اذا راجعة من سفر او لا
او خالطت شخص مسافر ومن بعدها عطتني اجازة
وطبعا صرفوا لي دواء ورجعت للسكن الساعة 10
اكلت دواء ونمت نومة طويلة وصحيت الساعة 3 ظهر كانت المشرفة جايبة لي قهوة
تقول لي اعرفك تحبي القهوة
تلقيت اهتمام كبير والبنات ابدا ما قصروا معي ..
صح عانيت بس صرت بخير وقلت لأمي خلاص لا تجي انا بخير
وطبعا ما خبرتها انه اغمى علي ولا كانت بتجن وتجيني للسكن


والحمدلله على كل حال هذا شي ومضى
حبيت احطه عشان اتذكر ان كل حياتي فيها ضروف ومواقف قوية
وممكن صعبة وتأذينا بس ف النهاية ربنا بيهونها
ورح نقدر نتخطاها ..


وشكرا

​

 

[~ M A N A R]

لم أكن انسى بأن الحزن سيطر عليَّ يوماً..
وددت لو أسقط ..أو ان أتراجع ..
وددّت لو اعطي نفسي وقتاً للاستسلام ..ولكن!!
بمجرد التفكير بما مررتُ به سابقاً وحتى الآن ..
(الجهد الّذي بذلتُه ..معاناتي .. ومشاعري) ..
لذلك ولأجلها أنا لا أود فعل ذلك الآن ..
سأبذُل الأفضل لأستمر ..
سأضحي بكل شيء للوقوف .. حتى النهاية .
​

PM 10:10
الثلاثاء
26 / 5 / 2020​

​

 

[~ M A N A R]

هناك دوما شيء لطيف لتقوله ..

أمس قرأت في كتاب عن معلومة جميلة للغاية وفكرت اشارككم اياها
كان الموضوع من المقولة ( قل خيرا أو اصمت )
ما متأكدة المقولة راجعة لمن ولما بحثت شفت حد يقول هي من اقوال الرسول صلى الله عليه وسلم
وحد قال انها من اقوال حد من الصحابة ..فلو تعرفوا الحقيقة خبروني
لأن الكتاب اللي عندي مترجم وكاتب المقال هذا اجنبي ..

المهم عبارة قل خيرا او اصمت نعرف معناها انه لو ما عندك شي طيب تقوله فالتزم الصمت
بس فهذا الموضوع لو فكرنا اكثر لو طبق الكل هذي المقولة
رح يكون العالم هادئ جدا عشان كذا
هناك دائما شيء لطيف لتقوله ابحث فقاموسك اكثر
واعطي كلمات لطيفة او مدح
او شكر او دعاء ,اي شئ ,اي شئ في قاموسك لكن لطيف
وهذا الشئ اللطيف هو الخير اللي لازم تقوله

واذا ما كان عندك شي لطيف تقوله
انت ما حاولت بما فيه الكفاية عشان تحصل على واحد !

و فنهاية المقال الكاتب كتب جملتين معبرات بالكامل وهن :
(( من اللطيف أن تكون مهما , ولكن الأهم ان تكون لطيفا ))

وعشان كذا افتتحت تدوينتي ب ( هناك دوما شيء لطيف لتقوله )

اشوفكم فتدوينتي الجاية
وشكرا

​

 

[Athe]

هلو ايفريبوري ..
جيت اليوم بتكلم عن نونا الخاصة بتسنيم .
اول مرة تكلمت معها وعرفت اسمها لما شفتها تتكلم مع تسنيم
وتسنيم كانت تناديها نونا ، هي بالنسبة لي مب نونا لاني بنت
ف ناديتها النونا الخاصة بتسنيم وهي وقتها جاتها صدمة
شوضعها ذي تناديني النونا الخاصة بتسنيم؟ وعلمتني اسمها
بعدها بدأت استلطفها وحسيت انها لطيفة .
مع الايام صرنا نتقابل بالشات ونسولف وتكلمنا برمضان وصرنا نتراسل خاص
واختفيت فتره ورجعت وكلمتني .. ف عرفت انها من الناس الي مهما تمر فتره
طويلة ما تتكلمي معها تبقى مثل ماهي وماتعتب عليك او تلومك
ان لازم تتكلمي معها يوميًا .. اعتقد انها شخص رائع .
والسلام الداخلي عندها قوي جدًا .. وش كمان ابي اقول؟ -فقيرة كلام-
ما احب امدح كثير لان بيوصل الموضوع للمبالغة بس فعلَا انتِ شخص طيب ولطيف.
اي صح . شكرًا لك نونا وانا سعيدة جدًا اني تعرفت عليك.
كوني بخير دايمًا وسعيدة .

 

[~ M A N A R]

اعلم أن هذا قد يجول في خاطرك .. انت تُفكر بأن على حياتك التوقف هنا ..
لكنك في الواقع تستحق العيش ..وتستحق أن تُكمل حياتك بسعادة
فهنالك ربٌ يعرفُ ما يؤذيك ..ومهما تركك العالم هو لن يترُكك..
هو سيبقى معك حتى وإن تحطمت وغصت للأعماق ..
هو بجانبك .. هو يسمعك ..هو خلقك لعبادته
ولتعود إليه عندما تتألم .. وهو بجوارك دائما ..ليُقويك ..~


​

23/1/2020
الخميس
8:53PM​

​