مدونة راقية أنثى نادره من عبّق الورد خُلقت ♡ (1 زائر)

[R E E M]

.
.

اليوم بتكلم عن أكثر شغلتين تأثرت فيهم بدرجه كبيره هالاسبوعين
للامانه انا كنت متوقعه اني راح اتأثر بخصوص هالشغلتين لكن
كمية التأثر فاقت توقعاتي خصوصاً اني بالفتره الاخيره صايره حيل حساسه > نصابه من زمان ام دميعه


الشغله الأولى :
الفتره هذي قاعده اجهز حق عرسي اللي بقى له شهرين بإذن الله
وانتوا تدرون ان تجهيز العروس ما يخلص ولازم تشتري كل شي كأنها مهاجره
أهم جزء من تجهيزي اهوا
" اختيار فستان العرس "
يا جماعه والله ما أبالغ اني اول ما شفت الفستان عيوني جذي لايك
بالضبط مثل اللي كنت اتمناه و على قولتهم " فستان الاحلام "
المهم لما جيت أجربه و شفت نفسي بالمرايه كان كذا شكلي بالضبط

كمية التأثر مو طبيعية خصوصاً ان بهالفتره وبأوضاع الكورونا حايشني احباط من كل شي
وكنت احاتي الزواج وكيف راح يكون وهل ممكن اني اسوي زفاف ملكي واعزم كل اللي احبهم
وهل ممكن اني القى لي فستان يرضيني ولو شوي ؟
بس الحمدلله أقدر اقول ان من شفت الفستان رد فيني الامل من جديد


الشغله الثانية :
اتوقع اغلب اللي يعرفني يدري من محبين و معجبين الفنان راشد الماجد
وللامانه العايله كلها فانز له فـ اتوقع هالشي وراثي عندنا
المهم تفاجأت من يومين ان ابوي و خواتي اشتروا زفة ( اغنية دخولي للعرس ) لـ راشد الماجد
وبإسم ريم بعد ):
يالله ما تتصورون كيف تأثرت لما شغلوها لي عشان اسمعها مع ان المفروض تكون مفاجأه لي بيوم عرسي
لكن حبوا انهم يفرحوني بهالفتره



الحين اقدر اقول اني 80% متفائله بأن حفل زفافي راح يكون مثل اللي ابيه
وراح اكون راضيه تمام الرضى فيه وكل شي راح يتيسر بإذن الله


.
.
​

 

[R E E M]

.
.
,

السلام عليكم و رحمة الله وبركاته
أما بعد ..



يا كثثثثثر الشوق للتون وللمدونتي اللي مسحوب على جدها
صارلي 3 سنين تقريباً ما طبيت ولا فكرت اني اطل على مدونتي
بس شنسوي .. على قولتهم ( الدنيا تلاهي )

المهم ..

فيه كثير أمور صارتلي بهالثلاث سنين من تغييرات و تطورات و غيرها
والحمدلله سنة 2024م ومثل ما توقعت أنها راح تكون سنة ( العوض ) بالنسبه لي
ومن بعد زواج ثلاث سنين و صبر و الاستعانه بالله و اليقين بأن ربي حبيبي راح يجبر خاطري
ويرزقني بأكثر نعمه و اكثر امنيه كنت ناطرتها
( أني اصير ام )


فـ دعواتكم لي بأن الله يتمم علي هذا الموضوع و يرزقني لذة هالشعور يارب العالمين


.
.
.
​

 

[R E E M]

.
.
،

خير الدعاء .. ( دعاء يوم عرفه )
.
.

( تاج الذكر )
لا إله الا الله وحده لا شريك له
له الملك و له الحمد وهو على كل شي قدير


( تاج التسبيح )
سبحان الله و بحمده عدد خلقه و رضا نفسه
و زنة عرشه ومداد كلماته


( تاج الاستغفار )

‏اللهم أنت ربي ﻻ إله إﻻ أنت خلقتني وأنا عبدك وأنا على عهدك
ووعدك ما استطعت أعوذ بك من شر ما صنعت أبوء لك بنعمتك علي
وأبوء بذنبي فاغفر لي فإنه ﻻ يغفر الذنوب إﻻ أنت

‏( تاج التحصين )
‏بسم الله الذي لا يضر مع اسمه شئ في الارض ولا في السماء
وهو السميع العليم


( تاج تفريج الكرب )
لا اله الا انت سبحانك اني كنت من الظالمين


( تاج راحة البال )
لا حول ولا قوة الا بالله العلي العظيم

.
.
​

 

[R E E M]

^

شرايكم بالنيولوك ؟


للامانه حبيت استغل قعدتي بهالعطله اللي حرفياً لا شغل و لا مشغله
بأني ارد للتون و ارد لعالم التصميم اللي اشتقت له حيييل

كان عندي مشاكل باللاب والحمدلله تقريباً 80% حليت المشكله وحاليا عندي مشكله بشحن اللاب اللي فجأه قام يقطع و ما يشحن عدل
ف اتوقع ضروري ابحث على شحن جديد له قبل لا الشحن الخربان يجيب فيني العيد

المهم رديت حملت الفوتو الجديد
وقاعده اسوي اقوى Refresh لمهاراتي بالتصميم من خلال دروس التصميم في التون
وحسيت اني شبه مبتدئة بس شي طبيعي بما اني تقريباً 3 سنين ساحبه على ام التصميم
فـ قررت استغل هالفراغ الكبير اللي عندي باني استرجع الشي اللي كنت احبه و استمتع فيه


.
.

#فعالية_الأسبوع ​

• وما هو الشيء الذي يؤمن به أغلب الناس وتراه انت جنونا؟​

حالياً انا قاعده اعاني من ( خزعبلات و خرافات الحمل )
من الحريم اللي حواليني وانا منسدحه و اضحك عليهم


كل يوم طالعين لي بخرافه جديده اللي حتى الطب ما تطرق لها ولا جاب طاريها
واللي يضحك أكثر ان شكثر حريم يسوون لي ( سونار ) بعيونهم
او يخمنون نوع الجنين من وجه الام او من شكل بطنها او شنو تشتهي تاكل


انا وحده مستحيل اصدق شي ماله دلاله علميه او طبيه
عشان جذي اعتبر اكثر وحده تطنش كلام الحريم و خزعبلاتهم و ما تعتمد الا على كلام الاطباء و الخبراء بهذا المجال
وطبعاً اكثر مصدر للخرافات ( العجايز )
اللي مستحيل حتى انج تقدرين تعارضينهم لان راح يكرهونج عيشتج و يفصلون عليج او تجي كفخه من عصايتهم


بالأخير الواحد يشتري راحة باله ويصدق اللي يبي يصدقه
ولا يصدق اللي مايبي يصدقه



وسلامتكم جميعاً

.
.
​

 

[R E E M]

.
.

" IT'S A BOY "
I CAN'T TO SEE YOU MY LITTLE PRINCE

^
ما تتخيلون شكثر تأثر فيني هالاغنيه خصوصاً لما عرفت اني حامل بولد

الله يرزقني شوفته وهوا بأتم الصحه و العافيه يارب العالمين


.
.



​

 

[R E E M]

.
.

هاي عليكم جميعاً

يا جماعه الواحد ماهو قادر يعيش اجازته الصيفيه بهالحر والله
ملينا مولات و مطاعم واماكن مصكره بالكويت
والفعاليات صففففر !!
والله صايره مالي خلق اطلع مكان و بنفس الوقت قاعد احس بملل قاتل يخليني اكره القعده بالبيت
من الآخر ابي اسافر يا نااس
بس للاسف وضعي حالياً ما يسمح لي بالسفر
بس يلا لعيون النونو نتحمل شسوي بعد
- تمسح دموعها -


شهر 4 كانت آخر سفره لي وللامانه حسيت اني ما راح اسافر بالصيف
لان حسيت وقتها راح أكون > احساس الام
والحمدلله على هالنعمه الحلوه

المهم سافرت هولندا وللأمانه هالديره تعتبر تغذية بصرية و نفسيه و جسدية وكل شي فعلياً
والأحلى ان وقتها كان برد فاستمتعت بأجوائها جداً وايضا كان موسم الورد
اللي يكون بفترة شهر مارس و ابريل و مايو
وانصح اي احد اذا حاب يروح هولندا لا يطوف هالثلاث الشهور !!

وهذي بعض اللقطات من مشتل الورود المعروف بهولندا

​

​

 

[R E E M]

.
.

13 أغسطس

في مثل هذا اليوم انجبتني أم عظيمة و استقبلني أب حنون
واتممت عاماً من عمري وبدأت عاماً جديد من حياتي
فـ اللهم اني استودعتك عامأ مضى من عمري فاغفر لي ماكان فيه وبارك لي
في عمري الجديد وجمل حياتي بما تراه خيراً لي


.
.



​

 

[R E E M]

#فعالية_الأسبوع
​

غير الطُلاب ما نسيناكم، لو عادت بك السِنين وبدأت دِراسة السنة الثَانوية من جديد ؛ هل بتغيّر مسارك وتخصصك؟ أيش الأشياء الي تبغى تغيّرها عن السَابق؟
-​

للأمانه غلطة حياتي اني تخصصت بالمجال العلمي لما وصلت صف 11
كنت منجرفه ورا شلة صديقاتي ومو عارفة شي عن ميولي الدراسية و ما يفرق عندي اي تخصص
لان المستقبل كان عندي مو واضح وكنت افكر بوناستي و حياتي الحالية فقط > تفكير المراهقات

فـ تخصصت بالمجال العلمي بما انه اغلب صديقاتي تخصصوا فيه ووقعت بالفخ
لان انا انسانه مو مال رياضيات و فيزياء و كيمياء وهالسوالف
للاسف ادركت هالشي متأخر ولما نزلت درجاتي في نهاية السنة و سقطت بمادة الرياضيات
وقتها اكتشفت اني فالحه بالمجال الأدبي أكثر خصوصا بمواد التاريخ و الجغرافيا و الانجليزي
لأن من قبل لا اتخصص بالمجال العلمي كانت درجاتي مرتفعه بهالمواد فـ ما استوعبت هالشي الا متأخر

لكن ما قدرت اغير تخصصي وكملت بالعلمي وحاولت اني على الاقل اخذ نسبة زينه انها تدخلني
بأي تخصص أدبي بالجامعه بما ان اللي يتخصص علمي بالثانوية يقدر يختار اي تخصص سواء علمي أو أدبي بالجامعه

فـ الحمدلله تخرجت بنسبة زينه وقدرت اني ادخل الجامعه بالتخصص الأدبي اللي ابيه
( الدراسات الأجتماعية )

وحاليأ صارلي 8 سنين مدرسة مادة الاجتماعيات للمرحلة المتوسطة

.
.
.
​

 

[R E E M]

.
.
​

فعالية شهر أغسطس


تبقى شهر على الصَيف ؛ كيف كَان صيفك ؟ سواء عن فَصل الصيف بحد ذاته أو الإجازة الصيفية، هل كانت عندك مخططات؟ إيش حققت من مخططاتك وإيش كنت ناوي تسوي أكثر من الي قدرت عليه؟
خذوا راحتكم لتدوينة صيفية ​

^
هالصوره تختصر وضعي بهالاجازة الصيفية
صكيت الرقم القياسي بالتسدح والله
بس شنسوي دام ماكو سفر بهالصيف بحكم وضعي
فـ استغليته بروحة المجمعات و المقاهي و المطاعم اللي عندنا كـ تغيير جو
لكن للامانه تعودت اني استغل الاجازه الصيفية بالسفر او الانشطة البحرية مع عائلتي



لكن الحمدلله قدرت اني استغلها بأمور كثيرة
منها اني رجعت للتون و رجعت للتصميم و رجعت انضممت لفريق التصميم اللي واحشني موت
وهم قعدت ارتب افكاري و أموري للبيبي اللي الله يجيبه بالسلامه يارب
و قعدت اخطط بتجهيزاته وشنو التغييرات اللي راح اسويه فـ بيتي



بالنهاية وأهم شي الحمدلله ان انقضت اجازة الصيف واحنا بنعمة الصحة و العافيه و الأمان
وعلى نعمة وجود احبابنا حوالينا



.
.
.

​