الختم الاداري MY TRAVEL TO JAPAN | 日本国 ، (6 زائر)

[J o u l Z]

.
.
،

​

 

[J o u l Z]

.
.
،

السلام عليكمَ ورحمة الله وبركاته
كيف حالكمَ حبايبي الحلوين ؟ اتمنى انكمَ بخير
طبعاً من زمان ما طرحت موضوع بقسم التصوير < كف
اخر مره طرحته اظن ٢٠١٤ ههههههههههه وكان عن جولتي باوروبا ،
عموما الموضوع هذا كان مشروع طرحه في السنة اللي سافرت فيها ٢٠١٧
عشان يطلع فرش وجديد بس انشغلت باشياء كثيرة ولا قدرت اطرحهه ،
ها انا عود لآطرحه لكم لنصول ونجول في ارجاء اليابان عبر عدستي المتواضعة
استخدمت في تصوير الصور كيمرا جوال الايفون تبعي وتبع زوجي وكيمرتنا كانون فقد ترون الصور متنوعة الجودة
ما راح اطول الحكي بخلي الصور هي اللي تتكلم بس قبل كل شيء خلونا نعرف شوي عن اليابان
ادري انها غنية عن التعريفح بس احب اعرض الدولة اللي اروح لها قبل لاعرض صورها < احلفي
اليابان بالنسبة لي هي كانت حلم من احلام طفولتي اني اروح لها والحمد الله تحقق وعقبال ما تروحون لها عقب كورونا
وتكون وجهتكم ومن خياراتكم للسفر بعد موضوعي هذا < روحي بس
لنبدأ

الدولة : اليابان | باليابانيه 日本 وتنطق: نِيپُّونْ
العاصمة : طوكيو ،
اللقب : يطلقَ على اليابان مصدر الشمس أو مَشرق الشمس ش
الموقع: شرق آسيا وتتكون من ٣ آلاآف جزيرة
المحافظات: تتألف اليابان من ٤٧ محافظة وتحتل المناطق الجبلية نسبة ٧٠٪ من المساحة الإجمالية
اهم المدن: طبعاً طوكيو وآوساكا (اللي جيتهم بس ) من غير كيوتو و كوبي وهيوشيما وغيرها
اعلى قمة : جبل فوجي ( كان حلمي اجيه بس ما اسعفنا الوقت )
اللغة الرسمية: اليابانية ،
التعداد السكاني : حوالي 126,860,000 نسمة
نظام الحكم: امبراطورية دستورية ،
العملة: الين الياباني ¥ ،
افضل موسم: اكيد موسم الساكورا بين اخر شهر مارس الى شهر مايو
(للأسف انا جيتها في الصيف تقيداً لإجازتي )

​

​

 

[J o u l Z]

,

في يوم ١٢ من شهر اغسطس عام ٢٠١٧ رحنا المطار وكنت ما رقدت ليلتها لاني ادري اني بروح لليابان
< حطوا نفسكم مكانها كنت حيل متحمسه

^ علامتنا المميزة في مطارنا الدبدوب الأصفر عاد من زمان ما شفته والله
ان شاء الله نشوفه قريب يا رب

^ ورا الدبدوب على طول عطورات ديور خذيت لي جولة لأن حنا رحنا بدري للمطار
فاستغلينا الوضع

^ صعدنا الطيارة كان الصباح طبعاً بس نسيت متى كان بالضبط !
عموماً قدموا لنا عصير انا اخترت عصير برتقال ( كنت درجة رجال اعمال < )

^ ولان الرحله طوووووويلة تقريباً من ٨ الى ٩ ساعات

شغلت لي فلم اشوفه ووقع الاختيار على حياة حشرة

^ بعد حياه حشرة نمت ونومة تقريباً ٤ ساعات الى خمس وقمت وافطرت
اخترت اشوف فلم سبيرت (Spirit) قصته حلوه للي ما شافه

^ صورت هذي قبل ساعتين من الهبوط حسيت الساعات وقتها تمشي بططططيء من الحماس اللي فيني ع3ع3

^ كانت هالصورة ٢٠١٧ ما شاء الله الحين حنا ٢٠٢٠ شفتوا الوقت يمر بسرعة
طوكيو كانت بتستضيف اظن الالعاب الاولمبية وللاسف أجلوها بسبب جائحة كورونا

^ استااااانست لما وصلتَ مطار هانيدا واول شيء شفته فلاتر السناب هناك حيل حماس ص6ج1
طبعاً في موقف صار بالمطار زوجي راح يدور باور باند تبع الانترنت عشان نقدر نتواصل مع اهلنا وكذا
انا لما كنت انطر احتجت اروح البي نداء الطبيعة الله يكرمكم
عاد الله لا يرويكم ضعت هههههههههه وتذكرت كم كلمة من الانمي اللي كنت اشوفه ( تويلي وآ دوكو ديسكآ ؟ ) < قلتها كذا عاد مدري صح ولا غلط
الزبده مشيت اموري ورحت وخلصت ورجعت
شفتوا ان الانمي له فايدة + انا خذيت كورس لغة يابانية بالجامعة بس المعلومات تبخرت لما جا وقت الجد
تعرفون لما تكونون عارفين الشيء بس بقدرة قادر يتبخر من المخيخ < هو دا

^ أخذنا سيارة اجرة ورحنا للفندق واول ما جينا صورت الاستقبال كان استقبالهم جداً محترم
فندقنا كان في منطقة اسمها روبونجي ،

^ هدية عطونا اياها اول ما جينا
لما عرفوا ان جينا من مكان بعيد < جداً محترمين

^ مت مت هالمسجل قصته قصه
المسجل هذا يا سادة له جهاز نفس التلفزيون تماماً
اخذته انا احسب انه جهاز التلفزيون واشغل فيه واشغل احاول في التلفزيون ما اشتغل
فجأه صاح علي المسجل بالياباني ( واكاريماسين = لم افهم = ما فهمت = I don't understand)

وينفض عقلي حسبت ان في شخص يكلمني من التلفون لان جنبه على طول هههههههه
متنا من الضحك عموما حلو المسجل تقدرون تشغلون فيه كاريوكي وهالسوالف

وابشركم شغلنا التلفزيون واول ما شغلته وكنت اقلب القنوات اغلبها كلها قنوات انمي
حسيت بالانتماء هنا ياخي حسيت الكل نفسي الكبير والصغير حتى الشوارع
شعور جميل مو مثل هنا يخزونك فوق لتحت اذا لبست شيء كرتوني
هناك عادي الدنيا سهالات حتى شيبان والعجايز يشوفون ويقرون انمي < انا اذا صرت عجوز باذن الله

^ طبعاً حنا وصلنا العصر قرابة المغرب
وكنا تعبانين ومهدود حيلنا فطلبنا العشاء من الفندق
وطلبنا شيء نعرفه لان اغلب الاشياء ما نعرفها فما نبي نخاطر لان جد ميتين جوع

اليوم الاول : يوم استكشافي ( شيبويا + جزيرة اوديبا الصناعية)

^ ما تطل عليه غرفتنا الجميلة

^ عبقور من منا لا يعرف عبقور (دورايمون) هذا الازرق له مول كامل باسمه وفيه كل شيء وقريب من فندقنا
جيته بس ما صورت من داخل لان كأي مول عادي بس اسم انه عبقور + صورت مجسماته اللي برا وفوق سقف المول فيه مجسم ككبيييير له

^ عاد تدرون ولا لقيت ولا حيوان ضال او تايه في شوارع اليابان !
اغلبها بالمحلات ومدلعة وخصوصا القطط لها محلات وصالونات وسبا وغيرها
انصدمت لما شفت حيوانات المحل قبل ليشترونها يسبحونها ويستشورون شعرها ويلبسونها ويكشخونها < كنها رايحه عرس هههههههه
واكيد بتسألوني اذا مرينا الكوفي اللي فيه القطط اي مرينا ولكن للاسف منعوا التصوير ولكن سمحوا بصورة شخصية مدفوعه الثمن
فاسمحوا لي والله كان ودي اصور

^ ولان كنا تعبانين فنمنا نومة اهل الكهف ما قمنا الا متأخر فافطرنا متآخر
عينكم على عصيري مباشر من البرتقالة للفم وكان باااااااارد ويسرسح للحين طعمه بلساني احلى عصير برتقال ذقته
بدون مجامله جد احلى فطور ههههههه < ابد مب عشانه اول واحد باليابان

لما خلصنا فطور قلنا بنروح شيبويا اللي فيها اكبر تقاطع سير
اسرع وارخص شيء في اليابان القطارات فنزلنا في محطة القطار وطبعاً الخطوط كثيره
واذا غلطتوا في اختيار المحطة المطلوبة تقدرون تنزلون في المحطة وتقولون لهم مغلطين وتدفعون ٥٠ ين ويصلحون لكم الغلط
يعني ما فيه اي مشاكل + طبعاً اول مره غلطنا وما فهمنا عدل سالفة الخطوط والمحطات ودفعنا كأول مره لان زوجي اختار اختيار خطأ
بس بعدين صار الوضع عادي واعتدنا عليه

سالفة الركوب والنزول والنظام في اليابان شفته بعيني جدا منظمين
ولا تشوف تدافع والناس ماشية على سستم وشيء لاحظته اغلب الناس من كبير لصغير يقرأ
سواء ككتاب او الكتروني حتى الاطفال بتقولون في ثقافتهم هالعادة طيب حنا ترا امة تقرأ
الحمد الله للحين في ناس تقرا واللي اثبته منتدى انمي تون في قسم القصص والبوح
+ امر اخر ممنوع منعا باتاً التحدث بالموبايل في القطار ولا انه يرن بعد ! هم ما راح يقولون شيء بس بينظرون لك نظرة الناقدين
فيستحسن تخليه صامت لين تنزل + زوجي نسى جواله مره وجلس يرن والله قعدوا يطالعونا بنظره استنكار
وقالنا لهم قومممميناساااااي < ههههههههه بس ما كررناها

^ وصلنا شيبويا وجذبني محل كابات ذكرني بكاب هيجي الجميل ش2

^ فلم الانمي هذا كان توه نازل نسيت اسم الفلم بس كان ززززحمه عليه والله شوفوا الزحمه على التذاكر

^ صورت لكم التقاطع من فوق ما قدرت اصوره وانا فيه كان زحمه والناس تمشي بسرعة
تجربة جميلة جداً جداً يعتبر اكبر تقاطع سير في العالم اتوقع

^ هالمحل من برا شدني ودخلنا فيه حسبت انه محل العاب فيديو
تخيلوا طلع محل قمار !!
انصدمت ان قمارهم كيوت هههههههههه اعوذ بالله
مرينا محلات كثيييره بس عادية ما صورت الا اللي حسيت انه مميز
قلنا بنطلع منها وبنروح الجزيرة الصناعية اوديبا

^ اعلانات انمي ههههههه عاد لو عندنا اعلانات محلات ولا مطاعم ههههههههه

وصلنا اوديبا واول شيء ابي اشوفه كان هذا ^ مبنى تلفزيون طوكيو
اللي شافوا ابطال الديجيتال الجزء الاول بيعرفون سالفة هذا والوطواط هههههههه
وناااسه اشوف شيء كان مرسوم في ارض الواقع حسيت اني دخلت عالم الديجيتال

امانة كان احباط ان حنا ما شفنا مجسم واحد من اليات اجنحة كاندام كانوا شالينه من الموقع ومسوين له صيانة وتجديد
ولكن التقطت هالصورة جدا احبها تهبل وكانت قبل الغروب بشوي وبسبب الغيوم فما بينت الشمس
عاد تدرون لما رجعت الدوحه عقبها بشهر تقريبا رجعوا مجسم كاندام وكانت رفيقتي هناك وصورته لي < ما انقهرت والله ج

عموماً كان فيه مجمع مليان محلات اكثر واحد شدني كان محل جمب JUMP متخصص لمحبين ون بيس
مما اعجبني في المحل وبتشوفون اشياء كثيره لون بيس لان زوجي من اشد الفان له < انا مش فان عادي فما فرقت معي

^ شرينا الفوطة اللي تحت لا تسألون لي له ههههههههه

^ قسم ناروتو بس صورته ما خذينا شيء

^ سلسلة مانجا ون بيس و ناروتو < ما حصلت كونان احزنت والله

^ كرة دارجون بول + شدني ابو شعر ازرق ناسيه في اي انمي عموما شدوني فصورتهم !

^ رحنا محل العاب وعجبني تحدي بين سونيك وماريو فلعبت انا وزوجي وللاسف فاز علي <

^ بعد الجولة كنا ميتين جوووع فبالصدفه حصلنا مطعم هندي < من اسمه واضح
اكلنا فيه وكان لذيذ والله

-

اليوم الثاني : طوكيو دزني سي + طوكيو ديزني لاند

^ قمنا حتى يمدي نروح ديزني ونلعب العابها الجميلة

^ اول شيء قلنا بنروح ديزني سي لانها شوي اصغر مساحة من الحديقة الثانية فقلنا بنعكس لان الناس دايم تروح للرئيسية اول شيء 1
وقلنا الطلعة منها لان بنقضي فيها يوم كامل !

^ خمنوا اي وحده تذكرتي ههههههههههه
شوفوا من كثر الحماس نسيت الزحمه جد كان زحمه مب طبيعية لان كان موسم اجازتهم الصيفية
فكل الدول الاسيوية المجاورة من الصين وتايلاند وهونج كونج وسنغفوره وغيرهم جايين لليابان وصدف انهم جاو ديزني
نتج عنه ان ما لعبنا كل الالعاب ففعلاً شيء ضايقني ولكني صورتهم < وقلبي مكسور

^ من الالعاب اللي كان ودي العبها بس الانتظار فيها ٤ ساعات من الزحمة ولا عندهم نظام الفاست باس (fast pass)
عندهم نظام القدوم بالموعد فحجزناها ولكن للاسف طافنا الموعد بسبب ان كنا بعيد عن موقع اللعبة
يلا نلعب الرول كوستر هذا في الزيارة القادمة

^ الشخصيات كانت في كل مكان من الشخصيات اللي سلمت علينا

^ منطقة علاء الدين جذبتني المباني القديمة كانها مباني عربية وقبل لندخل اغربة استوقفني شيء !

اللي هو هذا ^ كان على طرف الا وهو الملك شيبان ابو اريل
دخلنا عالم اريل وكان فيه عرض غنائي لها
كالعادة ممنوع التصوير < ببكي بس جد كان مميز جد والفقاقيع وجو كأنكم في وسط المحيط
من غير الاغاني اللي كانت بفلم الحورية الصغيرة < للي شافه بيعرف وش اقصد
Under the sea
Part of your world

^ دخلنا اغربه وجذبنا مسرح المصباح السحري
فدخلنا وشفنا المسرحية كان اختصار لقصة علاء الدين مع بعض الاضافات
امانة كانت حلوه كمره اولى بس ما ظن بدخله ثاني مره < تحبيط ههههههه
قصدي العرض ينشاف مره وحده

^ شعور جميل نزل علينا مطر

لعبة انديانا جونز كانت حلوه كان عالم انديانا بعد عالم اغربه وكان اسطور بمعنى خيالي
اللعبة لعبناها مره وحده بس لو علي العبها مرتين من جمالها

^ طبعاً ضاع الوقت كله في ساعات انتظار الالعاب وما حبينا يضيع اكثر ورانا ديزني لاند اللي اكبر من سي فركبنا القطار
حتى نروح لها ولا نضيع وقت زيادة نبي نلعب الالعاب الجميلة اللي هناك < ويا فرحة ما تمت زحمة بعد

^ من الصور اللي احبها جداً
وتخلد في ذاكرتي

^ من الالعاب اللي لعبتها بعد انتظار طوووووويل بغيت اموت من الانتظار ><"
اتوقع انها اخر لعبة لعبتها امانة يمكن لعبت بس ٤ العاب متخيلين من اصل اكثر من ١٥ لعبة
زحححمه مب طبيعية وبعضها سوينا لها سكب يمكن بعض الالعاب ساعات الانتظار توصل ٦ ساعات الى ٧ ساعات
فإن شاء الله خيرها بغيرها

^ كان معرض بس واستمتعنا بمشاهدته وكالعادة ممنوع التصوير < الود ودي اصور لكم كل شيء
هههههههههههه

^ كان فيه عرض ضوئي دايم في ديزني يكون في اول الليل
فكنا جالسين ننتظره بعد ما يأسنا من الالعاب عموما اتركم مع الصور

^ طبعاً في صور كثيره للمسير بس من اعجابي ما صورت كثير > احلفي

^ العرض الفلاشي على قلعة ديزني كان احلى عرض لانهم دمجوا كل قصص ديزني في حبكة وحده ج1
ناسية شو هي القصة كانت مدموجه بين اللغتين الانجليزية واليابانية بس فهمنا الحبكه
والحين اخليكم مع الصور

^ بنهاية العرض شغلوا الالعاب النارية صورتها فيديو < اذا فضيت رجعت حطيته

^ ادري ما عندي سالفة اصور المرحاض بس جد شدتني الازرار < كف
عموماً اخذت وقت لين عرفت مكان الفلاش < برا هههههههههه
اتحداكم وين مكانه مع الكتابات اليابانية

^ عجبني انه موجود في كل مرحاض للاطفال الصغار حبيييت والله

^ هالعبارة كانت عند مغسلة الاطفال شوفوا كيف يشجعون الاطفال على غسل اليدين !
نحتاج مثل هالاشياء خصووصاً في وقتنا وازمتنا الحالية
هذا وهم معتمدين هالشيء من عام ٢٠١٧ ويحثون الناس وبالذات الاطفال على غسل الايدي
لله دركِ يا يابان اتمنى ناخذ منها اشياء والله انا استفدت كثير اشياء وطبقتها مع تلاميذي لما رجعت الدوحة
بذكرها عقب في الصور القادمة

^ مرينا هالجدار للتصوير ههههههه شوفوا زوجي صور هنا
كانوا يطالبون فيه حي او ميت هههههههههههه
مدخلين ون بيس حتى في ديزني متخيلين هههههههههه

بقولكم سالفة قبل لاعرض الصوره هههههههه اللي تفطس ضحك
بعد ما خلصنا من ديزني كنا كثييير جوعانين وانا كنت مشتهية اكل ايطالي < روحي يا شيخة ايطالي وباليابان
عموما جلسنا ندور لين لقينا واحد وكان جدا راقي ويجنن من برا ههههههه < ذبحني زوجي عليه
عموماً في هالمطاعم عادة يقدمون الخمور من الرقي بس قلنا لهم مسلمين عطونا شيء يؤكل
وجابوا المنيو وانا اخترت كبداية للاكل كرات الجبن
في العادة عندنا كرات الجبن تجي ٥ في الصحن او ٦ ما تقل عنها ويكون الموضوع مشاركة الصحن مع اللي بياكل معك
شوفوا شنو جابوا لنا هههههههه

^ صحن وشكبررررره على حبه وحده بس ههههههههههههه
قامنا قسمناها وكليناها ههههههههههه < بعد نبي نذوق
وطلبنا باستا طبعا باستتنا تكفي حي لحاله ههههههه شوفوا

^ لا يغركم ترا جداً جداً قليل والله خلصتها في لقمتين
للاسف طلعنا وحنا لسى جوعانين بالنهاية طلبنا من ماكدونالدز < المنقذ
​

​

 

[J o u l Z]

اليوم الثالث : ساحة الدوم

^ شدتني الضفادع وحنا رايحين للدوم بس جد طلع هذا معبد < استغفر الله

^ الرسم عن الكوفيهات في الممرات كان خيال يشد الواحد يدخل
جذبني هذا بس ما دخلنا

^ وصلنا ساحة الدوم بعد ما ركبنا القطار اكيد وكان احلى منظر هذا اخخخيرا بلعب وبعوض الرول كوستر تبع ديزني لايك
لكن للاسف يا فرحة ما تمت نزل المطر وصكروها وقالوا تغلق لحين انتهاء المطر ولم ينتهي المطر ولم تلعب جولز تلك اللعبة
> نبذه عن حظي

^ ساحة طوكيو دوم فيها احد اكبر ملاعب البيسبول في اليابان
وفيها مدينة ترفيهية حوالي الملعب تعد كبيرة واجد والله

^ فيه سينما وكان الفلم المشهور وقتها متصدر ناسيه اسمه والله بس هذا هو البوستر

^ دخلنا المول اللي قريب من الملعب وجلسنا نلعب بولينق
طبعا ما يحتاج انا فزت على زوجي هههههههههههه

^ مريت كم محل وعجبتني تبعت وادي الامان وشريتها 1

^ والرسم عندهم منتشر بشكل مو طبيعي خصوصاً الكاريكاتيري

^ محل لحاجات عبقور وانمي الرغيف الساخن وسنوبي ج1

^ حبيييت والله كان لها ذكرى هالوردة تدرون ان راعية المحل عطتني اياها لما سألتني اذا عندي
دهن عود < تعرفونه صح ؟ حح
عموما بس عشاني حطيت في يدها وقلت لها تاخذه لان عندي منه ٢ شوي قامت عطتني هالفازة مع الورد اللي فيها
جد شعب محترم والله

^ مرينا جمب شوب في كل مكان لازم نجيه اكيد غرام ون بيس شسوي بعد
شرينا منه اغراض بس ناسية شنو هي ولكن صورت بعض الاشياء

^ في البداية حسبتهم غسالات هههههههههه
طلعوا مكينات العاب تحط نص وتاخذ كوره فيها دمية صغننه هههههههه
اقول لهم كأنها الغسالات صغيره < احلفي ج1

اليوم الرابع : مدينة اكيهيبارا ( منبع الاوتاكو والانمي )

^ كان حلم اللهم لكَ الحمد وجيتها اخيراً فعلاً لقالوا انها منبع الانمي

^ وصلنا اكيهيبارا اخخخخيراً وكانت تعج بالناس حتى الاوتاكو والناس تشوفونهم لابسين قوسبلاي
وناسه الموضوع كان ههههههه حسيت اني في مكاني

^ بعض المحلات اللي شدتني ودخلتها صورتها برا واغلبها فيقرز شوفوا الشخصيات اللي تشدكم

^ هذولا الفيقرز من الالعاب اللي فيها رافعه وجهاز تحددون اللعبة
وتنزل لها الرافعة مثل هذي هنا ح
وعموماً اغلب الالعاب اللي بتشوفونها نفس هالنمط وكلها فيقرز ودمى 1

^ حصلت لعبة الموسيقى وكانت ممتعة جداً لعبتها مع بنت يابانية نسيت اسمها < كف خ22ج1

^ اغراض العناية بالوجه جداً كيوووت ولطيفة

^ اخذت هالماسكات اللطيفة تبع الوجه جداً جميلة

^ كوكيز للفلم المشهور < خلاص سميته كذا

^ شدتني ركن بطاقات بوكيمون ويوقي يو
اذكر كنت اجمعهم قبل وكانت عندي مجموعة نادرة
اختفت والله من عندي للاسف مدري وينها

^ ما ستشاهدونه محل يبيع كل انواع الفيقرز من الانميات اللي نحبها 1
تعرفنا على راعي المحل وجعلنا نشوف معرض المجسمات اللي عنده حح
مش كلها عارضها للبيع عموماً انا صورت اللي عجبني وشدني من المعرض
وللعلم المجسمات جداً غالية تقريبا يمكن تكلف الواحد ٥٠٠ ريال وزيادة
< اللي مهووس واجد عادي جدا يشتريها ههههههه

^ حصلتَ حبايب الالب تبعي

^ شخصيات استديو جبيلي اشهرها الدب الكبير توتورو

^ عينكم على سعر كورابيكا حوالي ٥٠٠ ريال ههههههههه < برا =)

^ سيديات اغاني الانمي اللي نشوفها فيه كل الانميات ما شفت انمي مو موجود صراحة
طارت عيني في كونان < اي شيء يخصه اطير من الوناسه وش تتوقعون من فان قوي مثلي ههههههه

​

 

[J o u l Z]

^ ركني المفضل خذيت منه اشياء واجد بوسترات واستكرات ونوتات وكروت ووكثير اشياء

^ اكاي شويتشي احد الفيقرات اللي لها هيبة والله حتى في الوقفه واخر حبة فيقر كانت موجودة

^ اكررره ماريك ما ادااانيه ولا ادري من بيشتري هالفيقر التعيس

^ جوي كان من الشخصيات المضحكة بس كان عادي بالنسبة لي كنت احب كايبا ويامي يوقي خ22

^ حبييييت الاغراض الكيوت هذي خذيت لي وحده اركبها بيت مع اكسسواراته
وركبته واهديته وحده من ربعي تموت في هالاشياء

^ شريت صبارة اللي تحت ومولي اخذه زوجي

^ كنا مترددين يا ناخذ مولي او تود فقررنا ان ناخذ مولي

^ بعدين رجعت انا صباره واخذ فيكي احد الشخصيات اللي احبها في العاب فاينال فانتزي وكينجدوم هارت لانه غامض واجد

^ هذا ابو شعر كان عندي مثله وانا صغيرة كنت اسميه علوي هههههههههه
وصدف اني شفتها فقلت اصورها والله ومنزلين منها الوان ادري ان ديزني اتوقع عندها شخصيات كذا بس ذكرتني بدمية طفولتي

^ بعض الحصالات الكيوته على شكل قطط خذيت القطة اللي في النص
وكل ما حطيتوا فلوس يحسب لكم كم داخلها
من غير انكم تقدرون تغيرون العملة وما شاء الله حصلت كل العملات فيها

^ اخذنا فولبيكس الابيض لبنت عمتي + كم ستيكر لبوكيمون لها بعد

^ شخصيات سايلور مون اموووت فيهم كنت انا وبنات عمتي لكل وحده فينا شخصية
انا شخصيتي كانت Sailor Mercury البنت اللي شعرها ازرق ما حصلت شخصيتي للاسف

^ فيقرات للمغنية اليابانية الافتراضية هاتسون ميكو وشلتها

^ اخذت شوي من كفرات بوكيمون للجوال + دمية رايتشو بعد اخذناها ح < قولوا في دمية ما خذيتيها ههههههه

^ دخلنا محل في اكاهيبارا للالعاب القديمة والاجهزة المغبرة حصلت فيه اجهزة منذو مبطي
منها اول بلايستيشن نزلت واتاري ونتيندو وغيرها واجد

^ اشرطة اتاري ولعبة فاملي القديمة ههههههههههههه

^ تذكرونها ههههههههه زمن الجيل الجميل تراها جديده على ان الاصدار قديم
شوفوها بقراطيسها ههههههههههههه

^ شريط رانما تبع سوني ون جذبني فقلت اصوره لعبته شوي بالمحل قبل لنطلع
لقييييت اشياء كثيره بس ما اسعفني الوقت اصور > مشغولة تلعب

^ من ضمن الالعاب الجميلة اللي لعبتها ح

^ اغلب الاشياء اللي في هالبوست موجودة عندهم ههههههههه ومعها اشرطتها وجديده بعد
من النادر ما نحصلها عندنا خلاص غبرت

^ شفتو مين ورا حبيب الحب ؟
اجل انه سورا يا جماعة بطل لعبة كنجدوم هارت احد افضل الالعاب اللي لعبتها في حياتي 1
ولازلت ليومكم العبها الى الاآن حح

^ اكيد اكيد اخذت دمية اكاي معي
واخذت نوتات بعد منه

^ مانجا الانمي اللي وحشني اتاك اون تايتن صراحة ما قريت المانجا
يمكن قريت كم جابتر وتحسفت ووقفت قراءة احس بحرق على نفسي تفاصيل اللي بالانمي

^ من احلى المانجا والانمي على الاطلاق < تتفقون معي صح

^ اخذت بازل ١٠٠٠ بعد لكونان وخلصتها يمكن ٥ مرات

^ بعض من المجلات الرسمية اللي تنباع عندهم مو مثلنا الغلاف عليه ممثلين ونسوان < برا

^ لما كنت انطر زوجي كانوا عارضين حلقة لانمي sword art online فجلست اشوفها
لين طلعنا من المحل

^ نظره توديعية لاكيهيبارا والدمى والمحل ههههههههه

اليوم الخامس : طوكيو تاور ( داخل مفجأة لشعب ون بيس هههه ون بيس تاور )

^ قمنا الصباح افطرنا ونزلنا متجهين لاشهر معالم طوكيو الا وهو طوكيو تاور

^ من احلى الصور اللي صورتها والله لازلت اتذكر هذا اليوم كأنه امس

^ المعرض الفني لأصحاب هالشخصيات عبارة عن ملتقى رسامين بس
للاسف لما جينا بنجيهطلع للعضويات او للاشخاص اللي لهم اشتراك بهالنادي شيء من هذا القبيل

^ لوحات لطوكيو تاور تم التقاطها من هواة تصوير
+ التاريخ العظيم للبرج

^ شوفوا حجمنا بالنسبة للبرج كيف هههههههه

^ داخل البرج وقبل لنصعد للقمة في محل لون بيس اخذنا لفة فيه قبل لنصعد

^ كنا مشتهين ناكل من اكل سانجي فدخلنا المطعم نشوف وش عندهم اكل

^ لما استلمت المنيو كنت متتتتتحمسسسة اصور وللاسف كان ممنوع التصوير

^ اخذت بس صورة للمنيو والعصاير فقط ><"

^ جزء من ارجاء المكان عجبتني اللوحة للعلم تراها للبيع بعد < ههههههه

^ ايس كرك اقدر اسميه يخي طعمه طعم كرك بااررررررد < مدري اذا احد فيكم شرب كرك قبل
بس جد تخيلو الكرك بارد هذا طعمه عموم هذا طلب زوجي لشخصية في ون بيس اظن اسمه يوسبو < صححوا لي ههههههه

^ هذا عصيري لشخصية يامي او نامي < اظنها نامي
ههههههه هانترز لا تذبحيني ترا جد هالاسم معقدني
عموما الطعم كانه برتقال بس مو برتقال غرررريب الطعم
بس حلووو جداً ولذيذ ويسرسح على القلب والفؤاد < شرايكم بالتعبير

^ اسمها بيتزا القراصنة طبعاً انا ما اكلت منها طلبت سويتات بس 1 ممنوع تصويرها ولو انها تهبل
طلبت تبع روبين البنت السودا موجود بالمنيو فوق ^

^ وانا رايحه الحمام الله يكرمكم مريت على باسكن روبينز جداً جداً كيوووووت

^

^ على فكرة خذي خزنات تقدرون تحطون فيها محتوياتكم الشخصية اذا ما تبون تدخلونها معكم !

^ عرض لقتال اول ما دخلنا وممنوع التصوير لكن لقطت هاللقطات من تحت لتحت ههههههههههه

^ اول ما دخلنا هالمكان وهالجزيرة تصادفنا مع قراصنة المكان ( العاملين مسوين نفسهم قراصنة)
عموماً تعرفوا علينا واحتراماً لنالان حنا جينا من مكان بعيد
وخصوصاً بعد ما عرفوا ان زوجي بيق فان لون بيس اعطونا هالبوستر كهدية لنا خ22

^ حفلتهم فينا لما دخلنا وعزمونا على الاكل معهم هههههههه

^ زورو كان يقول لسانجي اكلك شنيع وذاك يقول لا تاكل اذا لم يعجبك وجلسوا يتخانقون
وجيتهم وقلت استهدوا بالله لا تتخانقون انتوا صدقاء وبطلوا خناق < احلفي

^ هالعظمة قال لي ( كيرينا = Kireina = جميلة ) تعالي صوري معي < استحيت والله خ0

^ لعبنا لعبة شوبر وكانت ان نجاوب على اسئلة تتعلق بون بيس ونربح فلوس تودينا للمرحلة التالية 1
زين اني كنت تيم مع زوجي ولا كان خسرت من اول سؤال < انا ما اتابع ون بيس كلش

^ يهنينا على فوزنا بالمركز الثاني
ورحنا لمطبخ سانجي وساعدناه في اصطياد سمك القرش حح

^ غرفة نوم نامي وحاولنا نساعدها بمهمة رسمية حتى تفتح لنا مرحلة جديدة

^ تشوبر بعد ما رجعنا الكهرباء للسفينة قبع المسكين ههههههه شوفوا وجهه
وانهينا كل المهمات وخلصت اللعبة

^ بروك كنا لازم نجيب روحه الضائعة في الكهف المجهول ما قدرت اصور داخل لانه كان ظلام
بس لقيناه في فم جمجمة ورجعنا الروح لجسده العظمي لعبة حلوه كنا مجموعة A طبعا فزنا على المجموعات الثانية
حصلنا الروح قبلهم هههههههه

^ لعبة القنابل كان فيها معرض سيوف فصورت كم صوره له


​

​

 

[J o u l Z]

^ قص الصور ورتبها لعبة جميلة جداً بس ما صورت كان فيه ناس واجد خ22

^ جزء من معرض مانجا ون بيس

^ رسمات من محبين ون بيس 1

^ الصورة جات بالصدفة كنت اعدل جوالي وصورتها وضبطت معي ح

^ طبعاً ما كنت اعرف ليه البنات ميتين عليه الين قالت لي هانترز عن اسمه يخي اظن لو او ليو عموما
من الشخصيات اللي عليها زحمه زين صورته لحاله <

^ ما اعرف قصة هالكراسي ولا ليش حاطينها جنب بعض يا فان ون بيس اجيبوني لماذا؟ ههههههه

^ حبيت القلعة والماي اللي حوله كانه حقيقي والله

^ من المشاهد المؤثرة والله

^ بكذا انتهت جولتنا في ون بيس تاور وكملنا لقمة طوكيو تاور واستوقفني محل كعادتي
< محلاتهم تجنن وش اسوي

^ خذيت تيشرت كونان + كوبه + اقلام اتاك اون تايتن وميداليات

^ مدخل محل بساكيت وحلويات وكوكيز خ22

^ احلى بسكوت صراحه اذكر اخذنا منه كمية للدوحة من غير بسكوت اوساكا اللذيذ

^ اكلنا هنا ايس كريم وطلبنا كيك

^ وصلنا لقمة البرج وكان فيه مثل زجاج تحتنا نقدر نصور المنظر من تحت
كانت تجربة جميلة والله

^ تقدرون تشترون قفل وتكتبون عليه كذكرى

^ انصدمت ان في معبد فوق السماء
وانتهت كذا جولتنا في طوكيو تاور وعالم ون بيس الجميل

اليوم السادسَ : منطقة اساكوسا ( اسواق شعبية ومعبد كبير ) + برج سكاي تريي ( اطول برج في اليابان)

^ قمنا الصباح مرووقين حيل

^ اثبات الروقان مع الصباح
وكالعادة وحنا رايحين لمنطقة اساكوسا استوقفتني المحلات الخوقاقية

^ سو سو سو كيووووت
اخذت واحد طبعاً

^ شدنيّ محل الجوكليت والله وكان لذيذ حيييل
من الذ الشوكولاتات اللي تذوقها لساني ج1

^ محل هدايا وشدتني حركة تغليف الورد خ0ج1

^ احب اجمع عملات الدول اللي اجيها صورت هالصوره عشان تشوفون الين الياباني
عموماً هم اكثر شيء يتعاملون بالنصوص بس مو معناته ان ما عندهم عملات ورقية
عندهم وتبدأ من ١٠٠٠ ين وفوق اما تحت فهي عبارة عن قروش < والله يا ان شنطتي صارت ثقيلة بسبب هالقروش
لازلت احتفظ فيها هي وباقي عملات الدول اللي جيتها ( ماليزيا ، سنغفوره، المانيا، ايطاليا، امريكا، سويسرا، النمسا، اندونيسا) < اذكروا الله

^ عند مدخل منطقة اسوكاسا عبارة عن لوحة فنية لتاريخ هذي المنطقة

( ما سأذكره هنا لا يعد ترويج لديانة معينة انما يعتبر هذا معلم من المعالم في تلك المنطقة وحبيت اوصل رسالة
ان حنا اللهم لك الحمد في نعمة عظيمة بالاسلام وذهابنا هناك كان بهدف الفضول ومعرفة تراث ذاك المكان + اتوقع جاء بحلقة من حلقات كونان
اذا ما خاب ظني =ــ=" )

^ مدخل معبد في اساكوسا يعد من اكبر المعابد بس والله ناسية اسمه
يقولكم ان في صنمين على اليمين واليسار واحد يمثل اله الماي والثاني اله النار < استغفر الله
عموما هذولا يصيرون حراس الاله الكبير اللي داخل بتكلم عنه بعدين
والجرس الاحمر الكبير اللي في النص هذا اذا قرعتوه ٣ مرات يحقق لكم الاماني ولازم تطلبون امنية في كل قرعة جرس

^ يقولكم هالمبنى فيه روح الاله اللي يعبدونه وممنوع حد يدخل هالمبنى الا الراهب الكبير تبعهم
واما الصنم اللي يسجدون له وهو داخل المعبد فهو مجرد وسيط لذلك الروح
< اعوذ بالله هذا اللي فهمته من الترجمة اللي قريتها يعني يسجدون لولا شيء ! اللهم لك الحمد على النعمة اللي حنا فيها

^ اشتري حظك هنا وقيمته تقريباً ١٠٠ ين يعني ما يقارب ٣ ريال
اذا كان حظكَ زين وحلو ويفرح اخذه معك وان شاء الله بيتحقق
اما اذا كان شين وسيء فيستحسن تعلقه هنا عشان ما يتحقق وتروح عليك

^ هذا بخور المعبد هههههههه
يتبخرون فيه قبل ليدخلون علشان تروح عنهم الارواح الشريرة هههههههه

امانة ريحته ما اعرف اوصفها بس ما عجبتني كلش بغيت اطلع من بخورنا واحطه بس قلت اخاف يقولون اني استدعي الارواح الشريره

^ قبل ليدخلون المعبد لازم يشربون من هالماي اللي مدري من وين يجي
حتى بعضهم يتسبح فيه هههههههه
+
اكتشفت ان الموضوع كله فلوس x فلوس وراح تشوفون هالشيء
يعني مثلاً هذا يحطون فيه قروش عشان تحميهم من القدر والمستقبل وممكن يكتبون فيه رسائل حتى يوصلها الوسيط للالهم بشرط يحطون فلوس معه

^ هذا كله لسى للحين حنا برا المعبد !

^ هذا البوكس الكبير عند درج المعبد لازم تحط فيه فلوس عشان تتحقق لك ٣ اماني

^ الذهبي هذا هو الوسيط
مرصعة الغرفة بذهب بس ترا الغرفة فاضية ما فيها شيء
يعني يعبدون شيء من ولا شيء < ما اعرف اوصل المعلومه
ولا تفكرون قضية الفلوس خلصت لا لان لازم تشتري شموع وغير الشموع لازم تحط قروش في البوكس الكبير
اللي قريب من الغرفة

^ تشتري شمعة تسرع من وصول الامنية المطلوبة هههههه
جد لازم تدفع علشان تتحقق

^ هذا البوكس الكبير اللي لازم تحط فيه قروش من غير البوكسات اللي برا المعبد ح

^ تاريخ المعبد وطلع اسمه معبد كانون اساكوسا ( سينسو- جي)
فيها شرح كيف انشأ هالمعبد وغيره بصراحة قريته عام ٢٠١٧ وناسية وش فيه بالضبط بس اذكر قضية الروح والوسيط
شيء من هذا القبيل
وترا الناس يجون من بقاع اليابان كافه علشان هالمعبد لانه حسب معلوماتي من اقدم المعابد في اليابان
لا تحسبون خلصنا من دفع الفلوس لا للحين
لازم تاخذ ميدليات للحظ والحماية - استغفر الله - وطبعاً كل وحده وسعرها

الاوراق البيضا اللي فوق ( تحقق الاماني ، تخليك تنجح في الامتحانات ، تمنع الارواح الشريرة ح، تحقق توقعات الابراج الصينية )
الميداليات ( تجلب الحظ السعيد + تحقق الاماني)

ما لاحظتوا ان كل شيء عندهم يحقق الاماني

اللي فوق ( الاصفر = يحقق الاماني ، الاحمر = طارد الارواح الشريرة ، البيج = سلامة المرورية من الحوادث)

اللي تحت ( الوردي والاخضر = الحظ الزين عند الزواج والعلاقات ، الاحمر = ينجحك في الامتحانات )

^ اغلبهم ياخذ الاحمر هههههه شكل يبون ينجحون بالطريقة السهلة

اللي فوق من يمين عبارة عن تعليقات للسيارات عشان تحفظها من الحوادث <
واللي تحت من يمين لتنعم بصحة جيدة اما الذهبي فهو عبارة عن نشر السعادة في اسرتك

^ الذهبي اللي على يمين هذا جد اللي ما دخل مخي هههههههههه
يخليك تعيش فترة طويلة ههههههه بس ياخي اذا الواحد مات وهو عنده هالشيء وش يصير وقتها يقول كذبوا علي ولا وش
عموماً يأمنك لك يبلفيت عيشة طويلة وانت بخير وبصحة استغفر الله

^ لما طلعنا برا فيه اصنام اشكال والوان صغير وكبير وكلها ابناء الاله تبعهم
اللي تشوفونه احد الابناء ومعروف باسم بوذا

^ اضرحة الراهبين اللي خدموا اكثر من ٥٠ سنة في هالمعبد يقدسونهم بعد ج1

^ شفتوا هالبيوت الصغيرة داخلها اصنام صغيرة كل يوم يفتحون واحد يعبدونه
نظام شفتات يا اخوتي يعني مثلاً اليوم مصكرين هذولا وبكره او اللي بعده يفتحونه وهكذا

^ هذا الاخ مفتوح ليأدي عمله اليوم
ومكشخينه بعد عشان يستقبل الزوار والمطر بعد < لان الطقس كان يوحي ان بيجي مطر

^ من المناظر اللي عجبتني 1

^ هذي تعتبر اطول رسالة كتبت من قبل هذا الشخص + امانة ناسية بالضبط هي شنو ح

^ الروح اللي يعبدونها ساعات تيجي هنا علشان تتطمن على احوال ابنائها وقت الاجتماعات
ترا جد اللهم لكَ الحمد لما نحن فيه والله حنا في نعمة لازم نشكر ربي عليها

^ من المعابد الصغيرة اللي داخل طبعاً ما دخلنا حسيت ماله داعي ادخل خصوصاً
ان لهم معتقدات تقول اللي يدخل هالمعابد الصغيرة لازم يحيي الصنم تبعهم بالسجود < ما بقى الا اسجد لصنم استغفر الله
عموماً شيء واحد ملتزمين فيه لازم تفصخ نعالك - اكرمكم الله - برا مستحيل تدخل فيه داخل
اي صح كل صنم له تحية مختلفة عن الثاني لا تسألوني شنو هي لأني بجد ما اعرف ههههههه

^ مستعد لاستقبال الزوار والمطر عدل هههههه

^ مطعم داخله اكل مقدس
ما دخلناه اكيد اخاف يجبرونا نأكل

وبكذا طلعنا من المعبد ورحنا للاسواق الشعبية الجميلة جدا
اغلبها بصنع اليابانيين وشغل بيتهم ويدهم
اترككم مع الصور واترك التعليق لكم

^ مناديل من القماش

^ المراوح مصنوعة من الاوريغامي

^ هالبنت تروج حق المحل تبعها بس لاحظوا شنو في مخباها !
ديتول + مطهر توني الاحظ هالشيء على فكرة
عموماً اللوحة اللي في يدها هذي هي مسويتها حتى تساعد جدها وجدتها وقتها هي في السنة الاولى في الجامعة
اتوقع ان البنت تخرجت الحين

^ يقولكم هذا كان اول ياباني في المنطقة يستخدم الجرارة لبيع الاغراض
سووا له مجسم تخليداً لذلك وكان قد عينوه عمدة المنطقة وقتها
وانا للاسف ما صورت كثير في الاسواق الشعبية لانها كانت شخصية واغلب اليابانيين قالوا نو فوتو
ولو انها جد تههههبل والله حتى مبين التعب فيها خ22

​

​

 

[J o u l Z]

المهم طلعنا من منطقة اساكوسا متوجهين الى سكاي تريي Sky Tree

^ احد اطول الابراج في العالم واطول برج موجود في اليابان 1

^ ما قتلني الا طاسات الشوربة مسويين فيها برج

^ ركبنا المصعد وصراح جذبتني تقنية ثري دي في شاشة المصعد

رحنا تقريبا لطابق ١٤٢ اذا ما خاب ظني وهناك كان فيه معرض قالاري للانمي الجديد اللي كان وقتها توه نازل بالسنيما
لانه راسمين فيه برج سكاي تري ومذكور بالفلم فصورت كم صورة للمعرض

بعدين رحنا فوق شوي كان فيها معرض قطارات نسيت اسم الشخصية بس اتذكرها يعني حح
+ مطعم ومنظر جداً جميل

^ كان المنظظظر خياااااال
وطبعاً بعد ما طلعنا بعد فوق فيه محلات استوقفتني بعد

^ اخذت كلاود الصغنون

^ ون بيس في كل مكان يا عمي ههههههه

^ احلى والطف واجمل وارق والذ بسكوت شافته عيناي الثنتين
طبعاً فلم كونان قناص من بعد اخر البرج هو نفسه برج سكاي تري ح

^ كنت متردد بين امورو او كونان بس اكيد اخذت كونان فكونان دوما يفوز بقلبي

^ مستمتعة وانا احط بالسلة

^ اخذته اخذته اخذته و ٢ منه بعد واحد لي وواحد لبنت عمتي

شعور لا يمكن اوصفه اشوف اغراض كونان كأنكم حطيتوا طفل عند محل العاب ومو عارف شو يختار هههههه

^ بسكوت ماروكو اخذته لعمتي خ22

^ وحشوني من قلب الفيلق والتايتنز ج

في محل لعالم بوكيمون داخل البرج كان جميل جداً
شوفوا المدخل 1

^ من داخل جد كأنه مستشفى البوكيمون اللي باللعبة
للاسف منعوني اصور

^ هالشيء اللي كان خاطري اذوقه بس ما اكلنا منه لان فيه لحم خنزير
وبجانبه محل شدتني منه اشياء ابيكم تشوفونها معي

^ ارجل اخطبوط

^ كونبيييييتووووو
نفس الحلويات اللي تجمعها كوباتو
طبعاً شريت منها بعد ما تأكدت ان ما فيها لا منتجات خنزير ولا خمور ج1

^ الشيبه هذا منقذنا ذاك اليوم بعد الجولة هذي تعبنا اكيد
فطلبنا من كنتاكي

ولما كنا ننتظر الطلب شفت هذا اللي بوادي امان تذكرونه كان مسبب لي رعب وانا صغيره

​

​

​

 

[J o u l Z]

اليوم السابع : حديقة حيوان طوكيو

^ الطبيعة اخااااذه

^ عرفتوه تبع الهنود الحمر هههههههه مضيع مدري وش جابه هنا

^ مدخل الحديقة ( صورت الحيوانات ولكن بعلق فقط للي يحتاج لهم تعليق )

معلومات عن اول حيوان بنشوفه اللي هو الباندا ي

^ اعرفكم على ري-ري سآن

^ حبسوا حمامتنا

^ هالقرد هذا يحاول من جينا يرمي علينا العصا ويرجع ياخذها ويرميها وهكذا صراحة متنا من الضحك عليه

^ مختلف انواع النسور والصقور تجدونها هنا

^ هذا اظن نوع من انواع الطاووس بس انثى مو ذكر استغربت من الوانها

^ فيه نوعين من الافيال الفيل المشهور الافريقي اللي نعرفه وفيه الفيل الاسيوي
اللي تشوفونه هنا هو الفيل الاسيوي طبعاً 1

وضعية هالقرد موتتني ضحك كأنه شايل هم الدنيا فوق راس
سويت منه ستيكر للواتس اب

^ ترا هذا نمر بس مستحي لأصوره

^ هذا أكل النمل

^ تدافع عن بيضها يختي حنان الأمْ

^ شوفوا هالطير من رحنا ورجعنا وهو رافع رجله
معاقبينه مسكين

^ التصوير ظلمه والله الطائر هذا جمممميل جداً
وجهه وجه حمامة بس هو كبير

^ شوفوا الدب بالو اللي في فلم ديزني ماوكلي ههههه
طبعاً اللي في الصورة صغير ترا

^ حبيت المنظر 1

^ امانة اول مره اشوف بطاريق برا الاجواء الباردة ح
خصوصاً ان طقس ذلك اليوم كان حااار

^ ذكرني بتطور سايدك اللي ببوكيمون اظن اسمه قولدك حح

^ هذا وحيد قرن تعبان قالوا لنا انه مريض

^ مو معه في نفس المكان احزنت لان هذاك لحاله

^ لاحظوا ان الحيوانات دخلوها داخل لان حان موعد اكلهم والنوم

^ هالكائن اللي شدنا اساساً لحديقة الحيوان هو غريب ومهجن
رقبته طويلة وراسه راس غزال ورجله رجل حمار وحشي

^ اول مره اشوف الافعى اللي تعيش في الماي حح

^ هالضفدع صحيح انه صغير وشكله كيوووت
بس يعتبر من اخطر انواع الضفادع سماً ح

^ يمه بسم الله شوفوا عيونهم تروع والله
يعتبرون من اضخم الضفادع

^ يتشمس الشيخ تمساح

^ عجبتني الوان السمكة جد كأنها جلد افعى

^ اخونا الشيخ تمساح غطس في الماي ههههههه
لانه مات من الحر

^ تيمون يسلم عليكم 1

^ اول مره اشوف قطو بريّ

^ انه المدرعّ يا سادة ح

^ اخذت هذا من المحل قبل لنطلع < اي شيء فيه كونان يستهويني

اليوم الثامن والأخير بطوكيو
( مرينا محلات تشيبويا لان في مكان ما جيناه بس ما طولنا فيها لا ورانا سفر لمدينة اوساكا )
تبعد اوساكا عن طوكيو بقطار الطلقة احد اسرع القطارات في العالم من ساعتين الى ٣ ساعات
< انا ناسية والله

^ هذا الدبدوب اللي ستكراته مليانه الفيسات عندنا

^ احلى محل محل استوديو قيبلي

^ غرامي دفاتر ومذكرات وأجندة انمي وادي الأمان

^ اخذنا سلطة وبعض من القريدس المقلي ههههههه
صراحة انا اكلت سلطة بس

^ حبيييييييت الأواني جداً اخذت اول كوب من يسار

^ شوفوا الرقي اللي داخل سيارات الاجرة كلها دانتيل ونظظظيفة حيل

^ اول ما وصلنا المحطة كأنه مطار من ضخامته خ22

^ تذكرتنا عاد عينكم على التاريخ

^ طبعاً حجزنا العربة الخضراء وهي للاشخاص اللي ما يدخنون
بمعنى اصح محد مسموح له يدخن هنا اما باقي القطار عادي 1

^ كانكم جالسين بطيارة والله

^ العربة جاتنا بس اغراضها بفلوس
وبعد ساعتين وزيادة وصلنا اوساكا بالسلامة
وسكنا كان في فندق الريتز كارتون 1

^ ركن الاطفال في الفندق
طبعاً ارتحنا واللهم لك الحمد من تعب السفر ج1
وقررنا نزور محطة اوساكا ( جداً كبيييييرة المحطة مجمع تجاري وسكني وكل شيء )

​

​

​

 

[J o u l Z]

^ مدخل المحطة

واول محل جيناه بوكيمون بس صورت هالصورة للـ pokeball

^ محل سايلور مون كان عجيب ج1

^ حبيييت الاغراض الكيوت اللي داخل المحل

^ قالوا في البوستر هذا ان شخصيات كونان بتزور هالمعلم ناسية شنو اسمه بس اظن انها حديقة

^ محل جمب اللي منتشر في انحاء اليابان ( اللي يبيع اغراض ون بيس وغيرها) ج1

^ تقسيمات الزبالة منتشرة باليابان بشكل مو طبيعي ومستحيل تلقى اي احد يرمي زبالة خ22ت1
اساسا ما في زبالة في الشوارع مرمية على الارض لانها تعتبر مخالفة يعاقب عليها القانون ج1

اليوم التاسع : المخطط كان العاب يونيفرسال بس كان زحمة جداً فغيرنا الوجهه الى اوساكا اكويريوم
< عشان نقدر نلعب ونعوض اللي ما لعبانه بديزني

قبل الاكويريم عند باب مدخله كان فيه هالـ wheel فركبناها

^ تذاكر الاكويريوم سعر الشخص البالغ الواحد ٢٣٠٠ ين يعني تقريباً ٧٦ ريال

^ في شيء حبيته في هالركن وكل ارجاء اليابان بشكل عام
وطبعاً طبقته بشكل مبسط مع تلاميذي
عند اي مدخل تعليمي سواء حديقة حيوان او مكان يستفيدون منه الاطفال يعطونهم كتيب
هالكتيب عبارة عن مكان يختمون فيه + الطفل يعبر فيه عن الحيوان اللي شافه ويصفه وش ياكل ؟ وين يعيش ؟ وغيرها
والكتيب يكون تبعاً للسن يعني مثلا طفل عمره ٤ سنوات يعبر بالرسم ويضع دوائر مثلا بعكس اللي في المدرسة
وفي نهاية اليوم اذا خلص هالكتيب يعطى قسيمة اشتراك في الحديقة او بامكانه شراء عدد معين من الحاجات اللي بمحلات المكان بالمجان
اتمنى تطبق هالفكرة عندنا صراحة اشوفها تثقف الاطفال اكثر ج1

^ نوع من انواع اسماك القرش ج1

^ هالصورة جننتني
قعدت احاول اطلع فيها الكائن الحي بس للاسف ما عرفته
شكيت انه قندس داخل داخل بس لا تسألوني ليه مصوره الصوره لاني لحالي ما اعرف
كنت بسوي لها سكب هالصورة بس دار بيني وبين هانترز نقاش ومت من الضحك هههههههه
رويتها الصوره وقلت لها وش تشوفين ؟ قالت حجارة وخشب هههههه
قلت لها لا في كائن هههههههه تغيرت نظرتها للصورة وصارت تخوف وتخيل لها وجه واشكال
مت من الضحك صراحة لما كنت اسولف معها هههههه

^ طلع قندس حح

^ يلا وش تشوفون في هالصوره ههههههههههه
ضفادع سامة ولونها برتقالي

^ انظروا للحوت فوق 1

^ اول مره اشوف قواقع داخل الصدف

^ سبات صيفي اقدر اسميه هذا الحيوان اللي مع ماوكي دايم نسيت اسمه بس اتذكر شكله ح
انظروا هنا

^ هههههه على السمكة وجه
والثانية الصفرا هي اللي تنفخ نفسها وتصير بالونة

^ شدني اللون الذهبي جد تبرق في الماي

^ حسيته صرصور مائي
ذكرني بالبوكيمون الآثري كابوتو

^ استااانست لما شفت الحوت القاتل 1
ذكرتني بـ لؤلؤة في اسرار المحيط ح

^ سمكَ قرش ابو مطرقة ههههههههه

^ هالحوت يسمى حوت القرش Whale shark
يعد من الحيتان اللي موجودة عندنا بالخليج على فكرة اكثر من شخص عربي شافه ببحرنا ح

^ سبحان الله هالسمكَ شفاف بحيث ان يبين عموده الفقري
لله في خلقه شؤون

^ الافعى الصاعقه ح
اصحاب ارسوله (Ursula) اللي في حورية البحر

^ كأنه مبتسم سبحان الله

^ صغغغغغغير حيل حيل انا كبرت وسويت زوم حتى تشوفونه

^ هالسمكة زعانفها بالشكل الافقي هههههههه
سبحان الله

^ هالفقمة كان في واحد معه دبدوب وجلس يحركه وهي تستجيب معه
كان منظر حلو والله 1

^ ما صدتها وهي نافخه نفسها للأسف

^ عينكم على العيون الناطة برا

^ احب هالكائن البحري جداً

^ هالاستكوزا لونها غريب ونادر اول مره اشوف وحده زرقاء 1ق9ق9

^ شخصيات نيمو

^ والله تدرون هالصورة تنفع تكون خامة فوتوشوب هههههه
ترا هذا قنديل البحر حاطين له اضاءات عشان تغير لونه لأنه شفاف
وانا لقطت اللون الوردي بالصدفة ح

^ ما اتذكر شنو هذا بس اتذكر انه يدخل ويطلع من الرمل

^ احد اكبر السلطعونات في العالم

^ الوانها اسرتني والله 1
ظلمتها الصوره السريعة جداً

^ ضحكني والله
ما اعرف شنو هذا

مرحباً بكم في عالم قناديل البحر

^ هالنوع صغغغغير اصغر من اظفر يدنا صراحه لازم مجهر لحتى نشوفه ح

+ ما اتوقع بقى قنديل في البحر ما حطوه ههههههه

ما سترونه تعتبر فقرة غريبة الا وهي فقرة الاسماك المايكرو ( اي الصغيرة جدا) و غريبة الشكل
ما نقدر نشوفها الا بالمجهر اللي هم حاطينه فلا يغركم انها كبيرة بسبب الصور ج1

^ عليه وجه ههههههههه

^ سبحان الله وجه الاسماك ترا يخوف
ولو انها صغيره وهذي الصوره بعد زوم

^ لون السمكة كأنه لمبه في الماي سبحان الله

^ شقائق النعمان ج1

^ لله في خلقه شؤون والله ح

^ هذا مو نبات هذا نوع من انواع حصان البحر 1

^ ترا في كائن مستخبي في الرمل

^ قسسم بالله اول ما شفته حسبته صخرة
بس لا طلع كائن حي يتنفس تحت الماء

^ بسم الله الرحمن الرحيم شكله جد يروع

^ اسمها سمكة الشيتا ( سمكة الفهد )

^ اسمها بلوسم حيل اليييفه مسكتها ملمسها يجنن

^ تقدرون تصورون مع البطاريق + تمسكونها بس عليها زحمه اغلبهم اطفال ح

اسم المنطقه اللي جيناها الاستكشاف ( Exploring Area) 1
يخلون الاطفال يتحسسون ويلمسون الكائنات البحرية باشرافهم طبعاً
حتى يكملون كتيبهم اللي شرحته فوق ^
مو بس الصغار حتى الكبار بعد

لنكمل جولة اسماك المايكرو ( الصغننه )

^ كلها احتجت مجهر لحتى اشوفها هم5

قبل لنطلع شريت من بسكوت بلوسم الفقمة اللي صورتها فوق 1

وبس خلصنا من جولة البحار ورحنا تعشينا ورجعنا الفندق
وقتها كنت اتابع شخص ياباني عايش بالامارات وما شاء الله يعرف يتكلم عربي خ22
استفدت منه كثييير

اول استفادة هالعبارة فادتني كثير باليابان معناها ان نحن مسلمين ما نشرب خمور او اي شيء يخصها
+ ما نأكل اي شيء فيه خنزير ح
فاي مطعم نجيه نوريه هالصوره ويفهم ويأشر على الاشياء اللي نقدر ناكلها من المنيو
حبيت اشاركم هالشيء والله يمكن تستفيدون اذا جيتوا بتروحون اليابان
​

​

 

[J o u l Z]

اليوم العاشر : يونيفرسال ستوديوز
بس قبل لنروح له قمنا وافطرنا ومرينا كم محل ح

^ اكثر محل كيوووتي يا اخي
كمية كياته مو طبيعية هنا

كل اغراض اليس في بلاد العجائب تجدونها هنا 1

^ المانجا ومجلات الانمي في كل مكان ح
دخلنا محل يبيع كتب ابي اشوف سلسة مانجا كونان

^ حصلتها
ما تتصورون كم كان قلبي يتراقص فرحاً

^ عندهم ركن يسوون لكم استيكرات خاصة فيكم 1
بمعنى يرسمونكم كأنمي ويعملون لكم فيقرز وشخصيات واستيكرات بشخصياتكم
طبعاً بالطلب ح
انا اخترت من الستيكرات الجاهزه عندهم

^ اول مره العبها
كنت اشوفها بس ما اجي جمبها قلنا بنجربها وطلعت رهيبة ح

^ احلى فقرة التشيزكيك الياباني
يا انه لذذذذذيذذذذ حيل حيل لذييذ والله كل يوم نطلب منه على فكره

وعلى فكرة مش موجود هالنوع الا باوساكا ما ادري اذا جابوه طوكيو

وصلنا العاب يونيفرسال هي زحمة بس اخف من ذاك اليوم
طبعاً لسبب ما ما صورت كثير فيها < مشغولة العب هههههه
فضينا طاقتنا في العاب تعويضاً لالعاب ديزني اللي ما لعبناها
اللي ساعدنا ان فيها نظام الـ fast pass اذا شريته مع التذاكر ما تنتظر على طول تدخل اللعبة < حلو هالنظام صح
اول منطقة منطقة هاري بوتر

^ كان فيه عرض سحري والبنت اختاروها تشارك معهم

^ لعبة الفكّ كانت حلوه عبارة عن لعبة مائية ح

^ عروض كانت في الشوارع

^ لعبنا العاب المنيونز كانت رهيبة والله

مثل ما قلت لكم ما صورت كثير العاب لاني انشغلت باللعب
نعوضكم بالجايات
عموماً تعشينا في مطعم يبيع سوشي وقلنا فرصة نجربه

^ اول مره اكل سوشي نيء في حياتي
تجربة جميلة ما تتكرر هههههه

^ طلبنا القريدس المقلي كان لذيذ والله

اليوم الحادي عشر : قلعة اوساكا الآثرية

^ تعد من أقدم القلاع في اليابان 1

^ من ضمن الآثريات اللي في القلعة مصنوع من الذهب الخالص

كل طابق في القلعة له تراث وقصص وحروب خاضتها هالقلعة باسيادها انا نسيت اغلبها للامانه تتكلمون عن ٢٠١٧ يا سادة
بس اتوقع ان منعونا للتصوير بعد بس صورت كم صوره من تحت لتحت

^ قمة القلعة وشفتوا الذهبي هذا تراه ذهب خالص

نزلنا من القلعة ومرينا عربة الايسكريم واخذت لي واحد

^ لزوم في هالطقس الحار جداً حح

وجلسنا في الحديقة وحنا جالسين فيه عرض فجأه صار باختصار بشرح العرض لاني اذكره بالتفصيل
العرض يقولكم ان في شخص كان يعيش بظلام وحوله اشباح وغيره ومقيد بسلاسل
فجأه ظهر شخص ابيض وحوله نور ويحاول يطلع هالشخص من الظلام الدامس
عموما الفقرة هذي تعتبر فقرة التبشير بالديانة المسيحية
ليش ؟ لأن اغلب اليابانيين بوذيين فيحاولون ينشرون الدين المسيحي عبر عروض في الحدائق والمتنزهات
بعد ما خلصوا عرض جلسوا يوزعون كتيبات تبشيرية ولأني انا وزوجي ناكل ايسكريم في حالنا
جاتنا بنت قالت سلام عليكم ( مع انها يابانية ) واضح انها متعلمة تتعامل مع المسلمين
انا واضح اني مسلمة بحجابي < احلفي
جات بتعطينا كتيب مغلف بطريقة حلوه وواضح انه ايتكلم عن الدين المسيحي ح
شكرناها وقلنا لها حنا مسلمين
وبس وراحت اللي ابي اقوله ان حنا نقدر ننشر الدين باخلاقنا اللهم لك الحمد
مجرد موقف عابر صار لي في الحديقة قلت اقوله

اليوم الثاني عشر : اليوم الآخير لنا في اليابان ( الوداعية )
رحنا اول شيء لبعض المحلات القريبة منا بعدين مرينا برج حسينا الاطلالة منه بتكون حلوة

^ فيه اقفال تشترونها اعلى القمة البرج ج1

المنظر عند الغروب خيالي

اتى موعد العودة للديار ولأن اوساكا ما فيها طيران دايركت اضطرينا نأخذ قطار لمطار هانيدا طوكيوح
ومن طوكيو للدوحة

^ من الاشياء اللي كنت ابي اجيها بس ما اسعفنا الوقت للأسف

جلسنا نتجول بالمطار لين يجي وقت اقلاع الطائرة

^ من ما عجبني احترام الديانات عندهم تخيلوا هذا مصلى للمسلمين في المطار

وبس والله ركبنا الطيارة وهبطنا بسلام

انتهت جولتنا في اليابان بالوصول الى ارض الوطن

​

​