- أنَا الغَريقُ فمَا خَوْفِي مِنَ البَلَلِ؟ | SACHI ♡ (1 زائر)

[S a c ʜ ɪ 彡]

30/9/2020 م !
افتتاح أول مدونة لي في انمي تون!


_

السلام عليكم ورحمة الله وبركاته.. ق8
كيف حالكم أيها التونيين؟ إن شاء الله تمام

سو؛ وبعد نقاش مطوّل مع نفسي، وبموافقة من نفسي كذلك
قررت افتح مدونة لايك


ماسويت هيدر وتنسيق وهيك والسبب كسلي الشديد
بالإضافة اني متأكدة، تمامًا xD إذا بسوي هيدر ف مارح أثبت على واحد..
على الأغلب كل تدوينة رح تكون بهيدر جديد كرمال أرضي عرق الجوزاء اللي فيني

المدونة بتكون بسيطة 1
بحكي فيها سوالف، ثرثرة، إذا صورت شي أو كتبت شي بنشره، يومياتي، يمكن احكي عن دراستي،
مسلسلاتي وانمياتي والكتب اللي بقرأها، وأشياء تانية مو ببالي حاليًا

سو؛ تعريف سريع عني
اسمي: سحر - ساتشي
> مو ساشي والله
@M Y T H I C @آكلة لحوم البشر @JELLO مقصودة ترا

عمري: ١٩ - مواليد ٢٠٠١
برجي: الجوزاء > جوزاء بريئة شوي
نمط شخصيتي: INFJ-T المحامي

بلدي: سورية - دمشق، ومقيمة فيها لحد الآن بفضل الله تعالى
دراستي: قصة طويلة شوي
ترفعت على السنة الثانية الحمدلله، السنة الأولى كانت سنة تحضيرية طبية
وهلأ المفروض انفرز لواحد من الفروع الطبية (طب بشري، أسنان، صيدلة).
حققت معدل طب الأسنان حسب السنين الماضية، وهو رغبتي كمان بفضل الله عز وجل
بس لسا مانزلت نتائج قبولنا بأي جامعة..
سو يب 1 ؛
دعواتكم لي تنزل نتائجنا بسرعة والله يكرمني بالفرع اللي فيه الخير إلي إن شاء الله ♡

_

وبس والله! > كنت ناوية خلي افتتاح المدونة سطرين تلاتة بس واضح اني حكيت كتير

بشوفكم بأولى تدويناتي قريبًا إن شاء الله

مع السلامة، دمتم كما تحبّون ق8ق8ق8 ~

_​

 

[S a c ʜ ɪ 彡]

#فعالية الشَهر

هَل أنت شخص كثيرُ التفكير ؟
إذا كنت كذلك؛ فهل ترى أن ذلك يُؤثر سلبًا عليك ؟ ​

_

مع الأسف؛ يب. أعتبر نفسي إنسانة كثيرة التفكير وبشكل مُقيت يعني
الموضوع مو بس تفكير.. الموضوع بيلحقه ندم بدون داعٍ، عذاب نفسي ماله حدود، وإضاعة وقت بشكل مابيقدر يتخيله الواحد.. ومشان شو؟ ولاشي حرفيًا
أد مافكر الواحد بالمواقف اللي بتصير معه مابيقدر يغيّر شي، منطقيًا..
بس بيقدر هالشخص يوقف تفكير؟ لاء.

ومو هون المصيبة، المصيبة إني مابعتبر حالي شخص كثير التفكير جدًا
أكيد في ناس عندهم مشكلة الOverthinking أكتر مني بمراحل وليكني عم أتعذب كتير بسبب هالموضوع.. طيب الناس التانيين شو ممكن يكونوا عم يحسّوا بالضبط؟

يعني ك مثال بسيط جدًا؛ أنا مابقدر أبعت رسالة لحدا بدون ما اتأكد منها 3 أو 4 مرات..
وبعد ما أبعتها ويتأخر بالرد لسبب ما، بيخطرلي مليون سبب ليش هالشخص ماعم يرد..
طبعًا كلنا منعرف انو الناس مشغولين وهيك بس التفكير هاد مابقدر وقفه بمخي..
شي كتير مرتبط فيني ومأثر عليّ وعلى علاقاتي باللي حواليي بشكل جدًا سلبي
حتى مواضيع المنتدى وردودي وأي شي ببعته، مستحيل أبعته قبل ما اتأكد فوق ال 3 مرات.. وأرجع صيغ كلمات ممكن تنفهم بطريقة غلط أو غيّر شغلات بلا طعمة

برأيي الأوفرثينكينغ هو أحد أهم أسباب الاكتئاب إذا مكان السبب رقم واحد إله
وهاد شي خطير كتير لأنو ماحدا حاسس بهالعذاب وبدوامة التفكير هي إلا الشخص نفسه..

بتمنى من كل قلبي الراحة النفسية والعقلية لكل شخص عنده هالمشكلة أو غيرها

_

 

[S a c ʜ ɪ 彡]

سُؤال فعالية الأسبوع ~
ما أكبر مَخاوفك ؟

#فعالية الأسبوع
​

-

بأغلب الأحيان بحس حالي من النوع اللي مافي شي بيخليهم ينجزوا شي إلا وجود ال deadline
وفعالية هالأسبوع لطيفة مافيني روّحها على حالي

سو، يمكن السؤال عن المخاوف عام شوي؟
برأيي عنا مخاوف مادية ومخاوف معنوية، وأكيد كل شخص عنده من الاثنين وبنسب متفاوتة..

بالنسبة للمخاوف المادية..
الحشرات تتربّع على رأس القائمة بدون منازع
أنا عندي خوف رهيب من الحشرات، مع الأسف
يعني بحب الحشرات كمخلوقات وبحس بعظمة خلق الله عز وجل فيها، لما شوفها من بعيد بس xD
أما إذا صار بيني وبينها أقل من مترين فااا RUN
بس هاد شي بيزعجني بصراحة.. يعني بحس خوفي منها شي بايخ، الناس بيحسسوني بهاد الشي بس انو أنا بتدايق من حالي أكتر


#سالفة_ساتشية_بس_مالها_طعمة > قصف ذاتي
بذكر من فترة كنت قاعدة بملحق العيادة تبع بابا مشان أدرس فيه بما اني وصلت لمرحلة صعبة مع دراستي ومل قلبي كتير
وعيادة بابا صايرة بالطابق الأرضي، يعني وجود الحشرات شي جدًا طبيعي فيها
صح والملحق تبع العيادة (اللي أنا قاعدة فيه) منعزل تمامًا عن العالم الخارجي عدا باب مقفول طول الوقت وباب تاني بيودّي على العيادة، ف طريقك مسدود مسدود مسدود
المهم كنت حاطة الطاولة ومدموجة بالدراسة.. ولا بلاقي صرصور عم يمشي بالممر اللي برا!
هون صرت أرجف من جوا وسكّر مخي خلص بس قلت انو ماحدا رح يجي ينقذني هلأ ف تشجعي شوي واقتليه.. قرّبت عليه ومسكت "عفوًا منكم" حذائي و بدي أرميه عليه ولا بلش يتحرك!
أنا هون راحت كل الشجاعة اللي كانت فيني للحظة وركضت ع الغرفة وسكرت الباب
شو يعني سكرت الباب؟ يعني بقيت بالغرفة لا عم أعرف أدرس ولا عم أعرف ساوي شي ساعتين لبين ما بابا خلص دوام وفتح عليّ وقتله مشان نرجع ع البيت يخلص هالكابوس

يمكن هلأ عم أحكي السيرة وأضحك على حالي بس بساعة الساعة كنت كتير مرعوبة ومتدايقة من حالي اني مو حسنانة اتغلب على هاد الشي.. حسيت بضعف..
مابعرف إذا لازم حاسب حالي على هاد الشي ولوم حالي، يعني بحس ممكن نعتبر الخوف من الحشرات ممكن يعتبر رُهاب ببعض الأحيان.. بس برضو الوضع مو عاجبني

~
هي من ناحية المخاوف المادية..
أما من ناحية المخاوف المعنوية واللي أكيد منتشرة أكتر وصعب أكتر أنها تتعالج.
ليش؟ لأنها عبارة عن قناعات. والقناعات بدها وقت وتجربة وخبرة وقناعات جديدة تحلّ مكانها لحتى تتغير
^ الخرابيط كلها مجرد وجهة نظري

المهم؛
بخاف أني ما أتطور.. بمعنى أني شوف ساتشي بعد 5 أو 10 سنين ولاقيها بنفس التفكير وبنفس المهارات ومالها مشتغلة على حالها والوقت بالنسبة لإلها كان عم يمضي بدون أي استغلال حقيقي إلو..

بخاف كمان إني كون متكبرة على غيري بدون ما أشعر..
لما كنت أصغر.. أكتر من حدا كان يقلي إني "متكبرة" و "شايفة حالي" أغلب هي الآراء ما كانت تهمني لأني من النوع الإنطوائي اللي بسرعة ممكن يُساء فهمه، بس الصدمة كانت لما سمعتها من وحدة من رفقاتي ")
لهلأ هالشي بيدايقني وبيحسسني انو معقول كان في شي غلط عنجد؟ معقول أوصل لمرحلة اتكبر على غيري وما حسّ؟

بخاف كون عاطية حالي أكبر من ما لازم أستحق..
بخاف كون شايفة قدراتي أكبر مما هي عليه..
بخاف أخسر بابا وماما.. بعرف انها سنة الحياة أكيد.. بس التفكير بالموضوع بيخليني أخسر قدرتي اني ساوي أي شي.. لأني مابقدر اتخيل حياتي بدونهم أبدًا

~

حسيت التدوينة قلبت مسلسل مكسيكي

ننهي التدوينة بشكل طبيعي
حدا لاحظ؟ اني حكيت شي بيضحك وشي بيزعل بنفس التدوينة وأنا عم أحكي عن نفس الموضوع؟
#جوزاء_ستايل

حاجة حكي لليوم

إن شاء الله تكونوا دائمًا وأبدًا بخير وبصحة وحياتكم وأيامكم مليانة سعادة وأشياء لطيفة ق8 ~

-

 

[S a c ʜ ɪ 彡]

WARNING!!
التدوينة التالية ستحتوي على كمية من الحقد والبأس قد تكون قادرة على اختراق فوتونات شاشتك عزيزي القارئ !!
​

~

يو

سو بدخل بالموضوع على طول xD
حكيت بأول تدوينة ~

​

بس لسا مانزلت نتائج قبولنا بأي جامعة..

هاد الحكي يعني اني حاطة ببالي إن شاء الله طب أسنان وأغلب الظن أن معدلي بيحقق المعدل المطلوب بإذن الله..
بحيث أنهم كل سنة كانوا يطلبوا من معدل السنة الأولى والبكالوريا (سوا) تقريبًا 80% أو 81% وفواصل
معدلي بفضل الله عز وجل 82.9%
شبه ضمنانة الفرع الحمدلله

بس مع هيك الواحد مابيعرف شو بيصير معه..
يعني إذا ارتفعت المعدلات كتير "مو وارد هالاحتمال" ممكن يروح عليّ الفرع بسبب علامة أو أقل!

لهون ما عندي أي مشكلة.. الله عز وجل هو أدرى شو الطريق المناسب لكل واحد منا وهو أعلم وين الخير رح يكون وشو رح يكون

وين المشكلة؟
الهيئة الإدارية نزلت برنامج دوامنا والمفروض نبلش هالأسبوع
وأعيد وأكرر، لسا مو مبين نحنا شو أصلًا !!
أنا مابدي أدخل طب بشري وبنفس الوقت مابعتقد معدلي بيحقق المعدل المطلوب..
بس إذا ما انقبلت بالأسنان بدي انقبل صيدلة، فتخيلوا وقتها إني داوم أسبوعين بالأسنان وبعدها يطلع فرعي صيدلة!! شو هالغباء!!
ولسا أنا مصيبتي ولا شي لأني ناوية أبقى بدمشق بإذن الله شو ماكان الفرع اللي رح يطلعلي.. بس في قسم كبير من رفقاتي ناويين إذا ماطلعلهم الفرع اللي بدهم ياه يسافروا على حلب أو حمص أو أي محافظة تانية.. فهدول بالذات وضعهم كتير كتير مأساوي لأن مو عرفانين إذا رح يبقوا هون ولا رح يسافروا!
طيب ليش قلة التنظيم هي؟ T^T

على كل حال، قررت أعتمد ع الاحتمال الغالب وداوم بكلية الأسنان وشوف شو الوضع، طبعًا مافي دوام عملي أو سريري قبل الفرز بس في نظري
أول يوم بدوام النظري يوم الثلاثاء هاد = يوم عرس خالتي
ماما اللي عم تساعد بتجهيز خالتي وهيك بما أن جدتي تعبانة هالفترة وما بتقدر تساعد كتير
ف بيتنا صاير هو غرف القياس وصالون الكوافيرات ونص العيلة عم تتجهز عندنا
ولسا بقيان علينا كتير أشياء بدنا نجهزها وماعاد في كتير وقت 3/>

وأنا كنت تاركة ورايي كل مسؤولياتي لهالكم يوم، بس العرس تحدد فجأة وبووم
معد لحقت ساوي شي بحياتي أبدًا xD
أبسط مثال اللي هو المنتدى، عندي موضوعين بالورشة واحد نصصت الشغل فيه والتاني بس صممت الطقم ولهلأ ما عم أفضى أشتغل فيهم أبدًا
يعني يوم الثلاثاء رح أضطر غيب عن الدوام (اللي هو أول يوم دوام أصلًا )
وكل هاد ومالي ملحقة شي لسا

منقول الحمدلله على كل حال
شعوري حاليًا هو هاد الشعور اللي بيحس فيه الواحد لما تجيه فترة كتير مضغوطة وعليه كتير مسؤوليات؛ ويكون تفكيره انو يارب بس تمرقلي هالكم يوم على خير وبيكون كلشي تمام



إتس جست؛ بدي عبر بس عاجزة عن التعبير
^ كل هالجرايد اللي فوق وعاجز عن التعبير كيف لو فيني عبّر؟ انقلعي بس

أني واي أتمنالكم يوم لطيف متلكم > بعد مانزعتلكم ياه ص0
جمعة مباركة
لا تنسوا قراءة سورة الكهف وتدعولي بعدها > كف

باي باي

-

 

[S a c ʜ ɪ 彡]

#سوريا_تحترق
دعواتكم لأهلنا بالساحل السوري لأنهمّ بأمس الحاجة للدعاء حاليًا.
اللهم لا نسألك رد القضاء ولكن نسألك اللطف فيه.

 

[S a c ʜ ɪ 彡]

توتوروو ~
ساتشي دييس

الأسبوع الماضي كان أول أسبوع دوام بالجامعة وكلنا منعرف كيف بيكون شكل أول أسبوع
يمكن داومت كل يوم ماعدا الخميس بس الخميس كان عندي التزام برا الجامعة
ف حرفيًا كل يوم كنت برا البيت > مأساة لشخص بيتوتي مثلي
وكنت أرجع فاقدة كل طاقتي برا البيت ونام من بكير كتير
يعني استنى العشاء ليأذن ونام بعدها فورًا
^العشاء بيأذن عنا 6

بس هالأسبوع حاولت اني زبط أوقات دوامي بين النظري والعملي بحيث ما انزل كتير عالجامعة
وبقي توقيع أخير على طلبي اليوم بدي ساويه إن شاء الله
هيك بيصير دوامي 3 أيام بالأسبوع بس !
وباقي الأيام بالبيت
سو برجع للتون بإذن الله مع الوقت

بما أني انقبلت بكلية الصيدلة الحمدلله، ولأني كنت متوقعة كلية تانية ف تدايقت شوي بالبداية > 10 دقايق بس
بس، قلت بنفسي (من رضي فله الرضا ومن سخط فله السخط)
وحاولت اقنع حالي كتير بأن هاد الشي هو اختيار رب العالمين لإلي وأكيد فيه كل الخير بإذن الله
وكنظرة أولية عالدوام والمواد وجو الجامعة فيني قول اني كتير مبسوطة 3>
^لحد هلأ بتعرفوا لسا مالحّق يبين خيرها من شرها
جد كل العالم متوقعين اني كون متدايقة وعم يصبروني ومدري شو xD
بس أنا كتير مبسوطة بالصيدلة
الحمدلله، خصوصًا انها كانت رغبتي من بداية السنة بس تغيرت خلال السنة بسبب كلام الناس

أني واي، اليوم أول يوم عملي عندي وجد متحمسة للموضوع
عندي عملي كيميا فيزيائية وعملي كيميا عضوية وهالمادتين من أجمل مواد هالفصل كأول انطباع
إن شاء الله يطلع شي جميل وممتع متل مالي متخيلته
وبس والله، طولنا عليكم هالمرة

في أمان الله

~

 

[S a c ʜ ɪ 彡]

قود مورنينق

بما اني رجعت للتون فهالفترة حابة احكي عن كتير أشياء > هوايتها المفضلة
مبارح كان أول عملي بالكلية متل ما قلت بالتدوينة السابقة
ووقتها قلت انو عندي عضوية وفيزيائية..
آم طلع عندي صيدلانيات وحاسوب
^ هاد دليل أديشني مهتمة ببرنامجي وبموادي

أني واي xD
عملي الصيدلانيات كان ممتع جدًا جدًا!
الدكتورة اللي عم تعطينا رائعة وشكلها متمكنة كتير من اللي عم تعطيه
يعني كلشي اسئلة انسألت جاوبت عليها واستفاضت بالشرح كتير
والتجربة اللي سويناها كانت لزيزة
صنعنا المسحوق تبع الفوّار > الفوّار هو القرص اللي منحطه بالمي وبيفور
صح اني بلاقي مشاكل بإني ساوي علاقات جديدة وبسرعة
بس مبارح استغربت من حالي كيف فورًا لقيت بنتين يكونوا معي بنفس المجموعة وأخدنا أرقام بعض وحكينا وهيك
شعور جميل بالنسبة لشخص متلي
بس بفضل ارجع لحياتي الانطوائية مرة تانية

بعدها كان عنا عملي الحاسوب وما إجى الدكتور
ف رجعت عالبيت أبكر بساعتين الحمدلله
وأهم شي اني رجعت رايقة وقعدت صوّر بالطريق ومدري شو
^ مع انو ما بتذكر كان في شي يتصوّر أصلًا

10/11/2020 - 03:17
By: إنسانة مهووسة بتصوير السماء اسمها ساتشي.​

اللي بيشوف الطقس طول الأسبوع الماضي مابيتوقع انو الطقس ممكن يصحى هيك نسبيًا

اليوم عندي محاضرة عضوية عال8
اللي مصبرني عليها ان الدكتور بيشرح منيح وبيجاوب عالأسئلة وهيك
وبعدها 4 ساعات عملي.. ساعتين عضوية وساعتين فيزيائية

وبس والله! بشوفكم بتدوينات تانية إن شاء الله
دمتم في أمان الله ~

 

[S a c ʜ ɪ 彡]

يوهووو ~
ساتشي ديس

هالأسبوع كان أسبوع تاني مُتعب، الحمدلله
من تاني أسبوع دوام سحبت على حضور 4 مواد ومافي رجعة بهالقرار إن شاء الله xD
بس يعني المواد مو كتير صعبة أو هيك، ثقافة ولغة وعربي وحاسوب > يارب ما اندم بعدين @-@

أني واي، أسبوع مُتعب بس ممتع خلينا نقول ؟
الأحد والاثنين راحوا وأنا عم زبط أوراقي للجامعة للتسجيل وهيك ~
تلاتا وأربعا وخميس بين الدوام بالجامعة وبين التزاماتي التانية.. وطلعت فرااطة الحمدلله
ستيل، الدوام كان طويل بس حلو
دكتور العضوية بيجنن حرفيًا بيشرح بشكل كتير منيح وبيشدّ للمحاضرة كتير.. وأنا بحب العضوية ف جد مستمتعة بهالمادة
دكتور الصيدلانيات تحسّن الحمدلله وصار يقدر يرفع صوته ويسمّعنا ياه بالمحاضرة بقي نفهم عليه هي بدها لسا أسبوعين تانيات > كف
الكيميا الفيزيائية دكتورتها رهيبة كمان، بس هالأسبوع المحاضرة كانت مملة شوي كلها قوانين وحسابات وأشياء ماحسنت ركز فيها

عملي الصيدلانيات كان أحلى شي هالأسبوع
صنعنا فيه هالشي الجميل *^*

- الثلاثاء 17/11/2020

هاد شراب باراسيتامول- Paracetamol
يستعمل ك مُسكن وخافض للحرارة > فاتت بالجو حدا يطلعها بسرعة xD
فااااا التجربة كانت ممتعة وشغلها لزيز، وانبسطت كتير لما طلعت النتيجة صح الحمدلله
وباقي محاضرات العملي كانت حلوة بس عادية يعني، خصوصًا عملي الحاسوب اللي قضيته وأنا نايمة

الشي الوحيد اللي مزعجني اني مابلشت دراسة لسا ):
هلأ لحسيت حالي فتت بجو الجامعة الجديدة وتركنت تمام
كنت ناوية بلش بكرة بس بكرة طلع لازم أتبرع بالدم مشان سجل بالجامعة يوم الاثنين، مقيّدة بالوقت
وبصراحة خايفة من الفكرة لأنها رح تكون أول مرة بحياتي بساويها
متحمسة (؟) لأني بعرف فوائد التبرع وإنسانيته وهيك بس خايفة من فكرة الدم بحد ذاتها
فطلبت من بابا يروح معي هالمرة لأني خايفة يصرلي شي وأنا لحالي مشان إذا دخت أو صرلي شي لا سمح الله يكون في حدا معي > إذا دخت قدام رفيقتي بيجوز تدوخ معي فما بظن انو ممكن يُعتمد عليها بهالموضوع
لساتني متحمسة للموضوع على كل حال

وبس والله
إن شاء الله يكون هالأسبوع أسبوع ألطف من اللي مرّ؛ عليّ وعليكم ق8

​

سآتشي ~​

 

[S a c ʜ ɪ 彡]

#فعالية_الأسبوع

حدثونا عن الدول التي ترغبون في زيارتها وعن الأسباب التي دفعتكم لاختيار هذه الدول بالضبط.

_

كيف السحبة بس؟
كالعادة فعالية لطيفة وتجبرني أطلع من قوقعتي وأرغي شوي

ماسافرت من قبل لبرا البلد بس عندي حماس كبير لسافر وشوف بلدان وأجواء مختلفة
أكتر بلد كنت بتمنى سافر إله بطفولتي ولحد الآن هو اليابان
السبب بشكل رئيسي وأكيد هو كوني ربيت على الأنمي حرفيًا xD
فكان في دومًا صورة تخيلية لطيفة جدًا لليابان بتصوري ولحد الآن ~
بحب التطور الرهيب اللي وصلوا إله اليابانيين وتشبيههم بأنهم عايشين على كوكب تاني
بحب الأكلات اليابانية > رغم إني ماجربت إلا السوشي لحد الآن بس منجرب شو ورانا
وأهم شي بحب أخلاق الشعب الياباني العظيمة

بفترة من الفترات صرت فان للكيبوب وهاد الشي خلاني أتمنى سافر على كوريا الجنوبية > اهتماماتها الفنية مسيطرة على قراراتها
بحب الأجواء الكورية اللي بشوفها بالكيدراما لحد هلأ..
بس حاسة انو الانبهار بكوريا راح من فترة.. ورجع مكانه الانبهار باليابان مرة تانية
^ مفيش فايدة

بحس إيطاليا بلد مُلفتة للأنظار
رغم إني مابعرف عنها كتير بس حابة أعرف عنها وهيك ~

عندي أقرباء بالسعودية وبدبي ف ناوية إني أطلع بسببهم شي مرة للبلدين وغير جو

بس مالي حابة سفري بالمستقبل يكون دائم
يعني في فكرة سفر من هلأ بعد ماخلص دراسة كرمال كمل اختصاص برا..
بس مبدئيًا أنا حابة كمل دراستي جنب أهلي..
ومو بس دراستي، حابة فعليًا تكون كل مراحل حياتي بقربهم

وننهي تدوينتنا ب تحنيطة سريعة للون عضوية التون العظيم اللي كل بنات التون طار عقلهن فيه

^ كشخة والله

وبسس هاد اللي كان عندي لليوم
بشوفكم بتدوينات ثانية إن شاء الله > إذا ما سحبت كالعادة
​

سآتشي
​