Beyond the tale | میسیزو (2 زائر)

[T W I N K L E]

*
،

2021 / 4 / 9​

 

[T W I N K L E]

*
،

هلو مرة ثانية !

بدايةً حابة أفوشر بهيدري البسيط والجميلل جدًااا ، وايددد حابتههه
احسههه وايددد معبر عن العالم اللي اسرح فيه بمخي !!
عمومًا ، هذي المونة الما ادري جم منذ بدايتي التونية لكن الحلو ان كل مدونة
كانت تعبر عن جابتر مختلف في حياتي ، بمعنى ان الانسانة اللي تكتب بكل مدونة مختلفة
نسبيًا عن اللي تكتب بالمدونة اللي بعدها ، اي فيه فروقات نضجية واضحة بين كل فترة وفترة ..

ف.. اني فتحت مدونة ثانية ، معناها اني اجوف المدونات السابقة ما ترقى للتغيير
الحاصل في تفكيري وشخصيتي وحتى طبيعة حياتي ! فيب .. اعتقد ان المدونات السابقة ما عادت
تعبر عني ووجب غلقها وتبديلها ، باختصار بداية جديدة ..

وكإجراء روتيني بكل مدوناتي كل بداية لازم تكون بتعريف بسيط
عن الآدمية اللي جدامكم !


ميسيزو ، توينكل ، سعدونه أو تقوى .. اللي تحبون
مواليد 2002 ، من البحرين ، طالبة من المفترض جامعية سنة أولى ولكن آلت الظروف اني
أدرس دبلوم لغة حاليًا حتى أقدر التحق بالجامعة في الخارج السنة الياية ! مخطوبة
وعلى وشك اني انتقل للعيش في الخارج ويمكن هاي أكبر تغيير ممكن أواجهه في حياتي وأكبر وأصعب
منعطف وعلى إثره مادري بالايام الياية بكون بمقدوري أدخل المنتدى ولا لا !


نمطي ENFP-A المناضل وفي روايةٍ أخرى البطل ، مُنفتحة أكثر من إنطوائية ، حدسية أكثر من واقعية ، مُتزنة نوعًا ما
بخصوص المبادئ والمنطق لكن قد أكون مرتكزة على المبادئ أكثر بقليل ، باحثة أكثر من محققة ،
وحازمة أكثر من حذرة !
​

شخصية المناضل هي بحق روح حرة. وهي غالباً ما تكون روح أي حفلة تشارك فيها، ولكنها أقل اهتماماً بالإثارة والمتعة اللحظية المحضة بل تهتم بالتمتع بالصلات الاجتماعية والعاطفية التي يقومون بها مع الآخرين. وهي شخصية ساحرة مستقلة حيوية ورحيمة، والمتمتعين بها يشكلون 7٪ من البشر، ولذا ستلاحظهم بالتأكيد في أي تجمع بشري.​

البطل شخصية تتميز بالقدرة على الإستقراء، مدفوعة من القيم، ملهمة، إجتماعية وفصيحة للغاية. بشكل مستمر يقوم البطل بإطلاق أفكاره للعالم كطريقة لجذب الإنتباه لما يعتقد بأنه مهم، والذي في العادة ما يكون على علاقة بالأخلاق أو الأحداث الجارية.

البطل شخصية دعائية بالطبيعية، لديه قدرة فائقة على جذب انتباه الناس له أو للقضايا التي يؤمن بها، مستخدماً بذلك مهاراته في الإجتماعية، صدقه، طاقته وإيجابيته. يمكن وصف البطل بأنه شخص مبدع، ذو حيلة، عفوي، محب للحياة، صاحب كاريزما، وعاطفي. ميوله الشخصية: منفتح، حدسي، عاطفي، ومتساهل. وهو أحد المثاليين حسب نظرية كريسي للأمزجة. نسبة الأبطال حسب دراسة أجريت على عينة من الشعب الأمريكي تتراوح بين 6-8%.​

أما برجي فهو القوس ، يا جماله من برج < أقوى طيري
طبعًا عشان اكون صريحة لا أؤمن بالابراج ، وما اصدق الكلام المكتوب وما اجوفه واقعي بدرجة كبيرة
ولكن اتابع بين فترة والثانية في تويتر اكاونت مخصص لبرج القوس وأحيانًا أجوف بعض الأمور ومو كلها تمثلني ..
-

بطبيعتي انسانة احب التغيير وأكره الروتين ، احب العزلة رغم ان الناس يجوفوني اجتماعية وجدًا ..
قدراتي في التحدث أقرب لئن تكون مبهرة وقدرتي على التواصل كبيرة .. لكن نهاية الأمر القاني أفضل وقتي الخاص
مع نفسي ، أقدس الوقت ومساحتي الشخصية بشكل كبير ، ما احب اقضي فترات طويلة مع الناس وعندي اذا طاف اليوم
وآنه ما قعدت مع نفسي فهي مصيبة !
مع ان حتى لو كنت قاعدة مع الناس استمتع ، ولكن مو بالقدر نفسه لما اكون مع نفسي حكموه5 !

آنه إنسانة طمووحةة وحالمة جدًا ، كل يوم والثاني تلقون عندي طموح مختلف واحلام مختلفة ،
مشاريع ومخططات مختلفة إلا اني ما اسويها بالمختصر مخي يتعب واهوا يحلم وجسمي
كسلان ما يشتغل على نفسه ولا على احلامه يوصفني البعض بطولة اللسان ويمكن قلة الأدب
أحيانًا ! لكني اختلف معاهم وايد في هالشي ، للاسف مجتمعنا ينظر للانسان القوي الشخصية والي ما يرضا على
نفسه ويقدرها وايد والأهم انه مو غبي وما يخلي أحد يستغله - قليل أدب وطويل لسان - !

يبونك تقول لهم -اي حاضر- فقط لكونهم أكبر منك ، وكونك قادر على انك تقول لهم - لا - ولو كانت بأساليب
محترمة ، تكون انسان متمرد وما تستحي على ويهك .. عمومًا اجوف نفسي فيما يخص هالنقطة على حق لاني جدًا
اهتم لاسلوبي في الحديث وما احب اجرح لكن بنفس الوقت حازمة واحط حدود حمراء للناس وما اخليهم يستغلوني!
ممكن اسلوبي يكون حاد ولكن مو لحد الوقاحة ، لكن هذي الحدة ما تعجب الآخرين وآنه مب موجودة عشان اعجب أحد
أو أرضي أحد !

-

بالنسبة لهواياتي وايددد ، كل فترة اهب في شي يعني رسامة ، مصممة ، مصورة ، كاتبة ، ميكب آرتست ، سابقًا كنت
أحب الدوبلاج ، احب أغني مع نفسي طبعًا وواثقة ان كل شي احط يدي فيه ابدع فيه < قولي والله
أهتم وايد بالقضايا السياسية والمجتمعية وأيضًا الدينية ، ممكن تجوفون اكاونتاتي بالسوشال ميديا كلهااا
آرائي ومعتقداتي الخاصة ، احب ادافع عن معتقداتي ووجهات نظري وايد وأطلب من الناس انها تحترمها مثل ما آنه
احترم وجهات النظر الاخرى ، وطبعًا اجوفه شي الزامي ومو اختياري انك تتقبل غيرك المختلف وتتسامح معاه !

أيضًا احدى هواياتي العملوقة مشاهدة المسلسلات والافلام ، غالبًا كنت أقتصر
المسلسلات على الكورية لكن هذي السنة احسها ناشفففةة ! فانتقلت للتركي ، وما كنت اتوقع بيوم
من الأيام باجوف تركي ، لا زلت اتابع كوري على خفيف أما الافلام فالأجنبية تفووزز طبعًا ، والأنمي اصبح
مهمش من أيام سبيستون أكثر ما يجذبني فيه الرسم وفقط أما كقصص ما عادت تستهويني يمكن الشي
الوحيد الحلو ون بيس وهجوم العمالقة وساحبة عليهم منذ زمن !


عمومًا احس اني هذرت وايد ، واكتفي بهذا القدر في هذي التدوينة ..
على أمل اللقاء في تدوينة أخرى ، مع السلامة



​

 

[T W I N K L E]

*
،

أعزائي عزيزاتي أهل مملكة التون العظيمة الي آنه ملكتها ..
مُباركك عليكم الشهر الفضييللل ، عسى ربي يعيده علينا وعليكم بصحةة
وعافية وفي حال أفضل من هالحال ، وكل عام وانتو بخييير ..

طبعًا شهر رمضان يبدي عندنا اليوم بما ان صارت الساعة 12 وانتوا بديتوا قبلنا..
لذلك توني أرد على المعايدات اللي ياتني من أمس وحقيقةً أشكر كل الناسات
اللطيفةة الي تذكرتني مع حلول الشهر الكريم، انتوا قدعان اوي

-

عاد شرايكمم في رسمتيي بمناسبة الشهر والله معبرة ، هذي آنه أول ما يأذن
اسوي هجوم على القيمات - لقيمات - ، عن يا زعم بس باجرب الاكل ، غمضوا عين وفتحوا
عين القيمات بححححح ، في وين ؟؟
في بطن تقوى عليها بألف مليون عافية قبل لا ينحط الفطور

والي ما يعرف شنو القيمات فاته نص عمره ، حلاته جييي صاخنننننن
ومقرمش جذي تقروشونه باسنانكم تقروش يطلع صوت وداخل هشششش جنه
غيمةةة مودي حاليًا انهيارااتتت ، بس عاد الي ما يعرف يسويه بهالمواصفات
انصحه يسمي اكلته كل شي الا قيمات !

المهم نعود للرسمات ، لازم نسوي ريبوست لرسمة رمضان 2018 ..

من أجمل رسماتي الي مخليتها ف كل مكان
مثل ما تجوفون رمزيتي هالرسمة وتعبر عن حبي الكبير للوترميلون
لانه يكون سيّددد المائدة بشهر الله اذا ما فيه يح ، مافيه انه على السفرة

وخل اقولكم عن العشق الثانيي ..
صالونة اللحم هذي سيدة المائدة ، يعني زوجة سيد المائدة اللي اهوا
اليح ، طبعًا لازم تكون بمواصفات معيننةة .. لازم تكون حارة ، ماهية - كلها ماي - بمعنى
مب غليظة ، ولحم وايد ، وفيها علوب فلفل واسبحححححح ف الصالونةة
وضرورييي تنأكل مع عيش - أرز - ، ساعات اكلها مع خبز تسليمًا لرغبة الوالدة .. ولكن
هيهات يومين ورا بعض آكلها مع خبز .. لازم عيش ، ولازم آكلها طول شهر رمضان وما اقبل
بالتغييررر أبدًاااا ! تبون تسوون وجبات ثانية ، خلوها جانبية بس الرئيسية صالونة اللحم وكفى بها
وجبةً لذيذة تشبع بطني اليوعان

-

باموت عاد صج ماعندي سالفة واضحح كان الهدف
اني ابارك لكم بقدوم الشهر بس مادري ليش انجرف الموضوع ل.. شنو احب
اكل ؟ يلا سامحوني على نفخة راسكم والهذرة الي مالها داعي
نجوفكم في تدوينة اخرى !


​

 

[T W I N K L E]

*
،

كوفيد 19 ؟ كان حديث مدونتي السابقة مليوون تدوينةة كنت اتكلم
فيها عن الفايروس وعن الأحداث المتعلقة بالجائحة بالعالم بشكل عام وبوطني على وجه الخصوص!
وطبعًا مدونتي اليديدة بما انها معاصرة للكورونا لازم تنذكر بتدوينة اخيرة
إن شاء الله ما ارد افتح موضوع هالفايروس الي صدع روسنا كلنا وتشبعنا من سوالفه ..

للأسف لي اليوم فيه ناس تجوف ان الكورونا مؤامرة !!
وتجوفه جذبة وقاعدة تحلل ويقصون علينا ومافيه مرض ويوهمونا ووو .. بغض النظر
عن من شنو هالفايروس انتشر ، بغض النظر عن كونه مصنع أو لا ، بغض النظر عن أي تحليل
أو حقيقة ممكن مو واضحة لنا ، لو كان ناشرينه بشكل متعمد أو كان لان الصينيين ياكلون خفافيش
ات دوزنت ماتر قايزز ! حرفيًا مو ومهم .. شباب ركزوا شوي الله يخليكم
المهم ان فيه مرض ، فيه مرض سواءً مسماه كورونا ولا مورونا ، كان مصنع ولا من الله ..
يعني فيه ناس مادري من وين تفكر ، مافيه كورونا ويجذبون علينا وهاي انفلونزا عادية مو كورونا !!!
استهبال ، ماعندي اي كلمة ثانية توصف الوضع غير استهبال ، مشكلتنا مو المسميات ابدًا !!! سموه
انفلونزا عادية لا تسمونها كورونا ، لكن الحقيقة انها معدية وتنتشر .. الحقيقة ان الناس ممكن تموت منها
فحضرة جنابك لانها مو كورونا - إذا سلمنا جدلًا - تفصخ لنا الماسك وتعدي لك خمسين ستين نفر؟
تتجمع مع اهلك كل خميس ويمعة وتتباوسون وتتحاضنون ، وما تخلي مكان ما تروحه ، مافيه أي
حس بالمسؤولية !

وتعالوا اخذوا لكم أنواع الغباء والشائعات الي ينشرونها ، للاسف ضدنا كمجتمع ..
ضد ان نكون مجتمع واعي ، ضد ان نتخلص من هالجائحة ! للأسف حتى وصل الأمر انهم
يروجون لفكرة ان اللقاح عشان يقتلونا !

محقق كونان حبيبي استريح مكانك ، شنو يقتلونا ؟ وين قاعدين ؟؟
يعني مافيه حكومة تبي تقتل كل شعبها ، بتحكم من عقب ؟ الكراسي والطاولات ؟ يعني
فيه ناس مادري من وين تفكر ، او الي يقول لك بحطون لنا شريحة وبيتعقبونا !
يقولون لكم شر البلية ما يضحك ، فعلًا يضحك وايد .. شنو شريحة ؟ ماعندي اي تعليق
على هالغباء ! اما الي شوي مخهم متطور ويفكرون يقولون لك ، والله جسمي يكون اجسام مضادة
بشكل طبيعي ، ليش اخذ شي صناعي !

اهنيك بابا حبيبي على انك انسان تستبصر وتفكر بعقل شوي أكثر من الي يقولك شريحة..
ولكن إذا كنت مكتفي بالمناعة الذاتية ، ليش ماخذ تطعيمات الاطفال ؟ اي بتقول لي كنت صغير
ومادري ! وايد أمراض اختفت بسبب اللقاحات ، اللقاح قد ما يمنع بشكل كلي ولكن يخفض
نسبة الإصابة بشكل كبير ، يخفض من أعراض الإصابة .. إضافةً إلى ذلك نحتاج فهم أكبر لمفهوم اللقاح!

اللقاح ترا مب مناعة اصطناعية ! اللقاح مجرد محفز للمناعة الطبيعية الي الله اعطانا اياها !
يعني بدل لا يدخل جسمك فايروس بكامل قواه ، يدخل فايروس ميت أو شبه ميت أو ما يشابه
تركيبته حتى يتعرف عليه الجسم ويقضي عليه بسهولة ويكون اجسام مضادة الي ممكن تحميك
مستقبلًا من الفايروس بشكل كامل أو تقلل حدة الأعراض لانه مو تركيب جديد كليًا على الجسم !

تذكروا ان اخذكم للقاح ، معناته مب مناعة على المستوى الشخصي بس وانما مناعة
مجتمعية ، لما تاخذ اللقاح مب بس تحد من اعراض المرض على نفسك ، انت تنقذ ناس اخرين
ممكن لو ما اخذت اللقاح بتنشر لهم المرض اللي اهما لا سمح الله ما يقدرون يواجهونه ويؤدي
الى موتهم ، بأخذكم اللقاح نتخلص من الفايروس بإذن الله ، نخليه نسيًا منسيا مثل باقي الفايروسات
الي اندثرت ، نحد من انتشار المرض وبالتالي نطلع من هالجائحة .. !

طيب شخص ثاني يقول ، اللقاحات ما اخذت كفايتها من التجارب السريرية وبين
كل فترة تطلع دراسات جديدة مب مثل اللقاحات الي اخذناها واحنا صغار صارلها سنين
من الدراسات ! تيسا3 اقولك تفكيرك منطقي وآنه معاك ، لكن بعض لقاحات الكورونا تجربت
على ملايين الأشخاص وما جفنا منهم أي أعراض خطيرة أو حالات وفاة صُنِفت بسبب اللقاح ،
بل بالعكس جفنا منهم نتائج ايجابية ، والي يقولك حالات وفاة وجلطات وخرابيط يجذب عليك ويبي
يوهمك بأشياء مب موجودة .. ما انكر ان واحد او اثنين أخذوا اللقاح بالجرعتين وتوفوا ولكن هذا
ما يعني ان السبب اللقاح !

يعني الله عطانا عقل نفكر ، منطقيًا يعني .. ما يصير ان الشخص الي ياخذ اللقاح الله ياخذه
موتة طبيعية ؟ ما يصير تصيده سكتة قلبية ؟ أو من أمراض ثانية اهوا عنده ! يعني جاء أجله !
ترا إذا الشخص أخذ اللقاح مب معناته ان اخذ صك الخلود وما يصير يموت بحادث أو بقدرة قادر،
أو بسبب أمراض ثانية ما كان يدري عنها مثل السرطانات اسم الله علينا وعليكم ! يعني بني آدم
الله ميزه بالعقل ، لازم نفكر بالطرق العقلية أكثر ، الشخص العاقل ياخذ الحقائق مب التكهنات .. والله
يمكن ؟ ناخذ بالارقام، مادري جم مليون شخص متطعم الي ماتو اثنين ثلاثه ، ليشش ؟
يمكن الله خذ روحهم بموتة طبيعية ، ليش الباقي جم مليون ما ماتوا ؟ العقل والمنطق يقول ما يصيير
نسند موتهم للقاح !
بعد ما اقدر احجي شباب ، اتعبت آني .. !
انزين خل أقولكم عن تجربتي مع اللقاح !

آنه يا محفوظين السلامة اخذت لقاح سبوتنيك ، اللقاح الروسي..
السبب ؟ لاني انسانة علمية وايد وبحثت عن اللقاح نفسه ، وجفت لقاءات
عنه مع المصنعين ، واقنعتني تركيبة اللقاح ، إضافةً إلى نسبة فعاليته العالية
الي وصلت 97.6% ! غير جذي آنه بصراحة جدًا اثق بروسيا من الناحية الأدوية والطب،
جدًا متطورة وعلى الصعيد العام روسيا قوية ومن الدول المتطورة جدًا مب بس في المجال الطبي!

الحمدلله مملكتنا الحبيبة وفرت لنا أنواع مختلفة من اللقاحات من خمس إلى ست ، ما ادري
جم بالضبط والمواطن يختار شنو بياخذ ، فسمعت الناس شنو خذت اللي خذ فايزر والي خذ سينوفارم
وطبعًا آنه كنت أول شخص بعائلتي الاولى - الصجية - وعائلتي الثانية - عائلة خطيبي -
الي خذ سبوتنيك ، الباقي كلهم الصيني الي هو سينوفارم ! لكن بصراحة ما اقنعني وايد .. والي
خذوه من المقربين لي ما حسوا بأي شي ولا جنهم ماخذينه اساسًا ، حتى طلعت شائعات ان
ما منه اي فايدة

وطبعًا مب قاعدة أروج للقاح على حساب الثاني ، يعني دكاترتنا اللي في الصفوف
الامامية والي اوثق فيهم جدًا ، قالوا ان جميع اللقاحات فعالة ويابت نتائج ، لكن آنه اتكلم عن
تجربتي وتجربة محيطي ، إضافةً إلى اني ما احكم أبدًا على اي لقاح لان كل جسم يتفاعل بطريقة
مختلفة مع اللقاح ..

طبعًا أكاد أجزم ان لقاح سبوتنيك هو الأقوى من بينهم كامل ، بدليل انه اللقاح
الوحيد الي يحطونك بعد الجرعة الثانية في الملاحظة ! وهذا معناه انه فعلًا قوي وقد يؤدي
إلى اعراض قوية ، وهاي الشي خلى البعض يبتعد عنه ، لكن آنه بالنسبة لي اجوفها ميزة وبالعكس
شي ايجابي ، هاي دليل ان اللقاح قاعد يسوي شي في الجسم مب مجرد محلول !

آنه طبعًا أخذت الجرعة الأولى بس وباجر بإذن الله باخذ الجرعة الثانية ..
ولو حسيت بأي أعراض بقول لكم ، لكن حاليًا الي اقدر اقوله ، اني يوم خذيت الجرعة الاولى
صادتني صخونة شوي قوية وبنفس اليوم وفقط بمرور ساعات معدودة على اخذي الجرعة ،
والصخونة استمرت لي يوم الثاني يعني راحت بالنوم مع البندول ، اعتقد لو ما شربت بندول او نمت
كانت ممكن تزيد بشكل كبير وسيء جدًا لان من زمان ما صادتني صخونة تكسر جذي!
بعد حسيت بألم مو طبيعي مكان الأبر ، ما اقدر انام على يدي بتاتًا ! واستمر الم مكان الابر
يومين أو ثلاثة مادري جم بالضبط .. وبس والله !

الحمدلله اجوف ان الصخونة عرض جيد وهذا يعني ان الجسم قاعد يحارب
وقاعد يكتسب المناعة المرجوة ، بمعنى اللقاح قاعد يشتغل وهاي شي ايجابي ..
وطبعًا مثل ما قلت قبل كل جسم يتجاوب مع اللقاح بطريقة ثانية ، يعني حصل ان البعض
ما حسوا باي اعراض ، او بعضهم اعراض اقوى من اللي صادتني ! لكن بشكل عام ، اجوفه
قوي ..

وايد هذرت لاه ؟ السموحة اشتطيت.. اوكي باي !
​

 

[T W I N K L E]

*
،

احلى صداع ممكن يصيد الانسان اهوا صداع ما بعد الصيحة
على انه صداع وتحس راسك بينبط إلا ان الراحة النفسية اللي تيي بعد الصياح مو طبيعية ..
حرفيًا صار لي ايام اكبت اكبت اكبت في داخلي وكل انواع الضيقة والنفسية الخايسة صادتني، مهما
نمت ، مهما قعدت مع الناس ، مهما شغلت نفسي بأشياء .. تضل نفسيتي خايسة .. تعبانة ومهلكة من
الداخل وبدون لا احد يحس !

كان ببالي ان كتمان المشاعر جزء خاص فيني بس ، لكن اكتشفت فيما بعد ان كل المناضلين أو
الأبطال - نمط شخصيتهم مثلي - هذا جزء من شخصيتهم ، يعني مادري ما نحب نترجم مشاعرنا في
كلمات للناس ، نحتفظ بمشاعرنا بداخلنا سواءً سلبية أو ايجابية ، طبعًا آنه مب من النوع الي يجوف
البكاء ضعف ، آنه ام دميعة .. بس ماحب اشارك الناس شنو فيني ، اصيح بيني وبين نفسي ! واكتم وايد..
وأتصرف مع الآخرين وكأن شيئًا لم يكن ، احب هالشيء بشخصيتي لكن احيانا يكون متعب وايد ..

كان اكثر شي يدور ببالي طول هالفترة ، اتمنى احصل احد يسمعني بدون لا يحكم علي
وبدون لا يقاطعني او يعلق ، يسمع يسمع يسمع ويمشي .. يخليني اطلع الي بجبدي وينسى ، شخص
ما باجوفه المرة الياية ، شخص غريب عني بكل ما تعنيه الكلمة من معنى !

كنت ادري اني بحاجة لتفريغ المشاعر السلبية الي عندي ، ودي اكتب في مذكراتي بس كسلانة
تخيلوا شخص متضايق وكسلان بنفس الوقت ماله خلق اييب الدفتر ! حرفيًا وضعي يضحك


عمومًا ، الى كل شخص عنده هذا الجزء في شخصيته ..
خذلك استراحة محارب ، اتس اوكيه .. تكلم مع احد جريب لك ، آنه ما ارتحت الا يوم
كلمت امي وتميت اصيح صياحح ع الفطور وآنه اكل اهم شي الاكل مع الصياح عشان
يصير عندك طاقة وانت تصيح ! بامووتت صج ان صدعت بس والله نفسيتي تغيرتت..
احس طاقتي تجددت والله !

ترا ماعندي سالفة ، بس مستانسة اني احس روحي خفيفة ..
ما فيه شي يضايقني او يحرحش بمخي غير الامتحانات الله ياخذهم ، باقوم ادرس
احسن لي ، سي يو قايزز ..​

 

[T W I N K L E]

*
،

التوتر الي آنه فيه هاليومينن مب طبيعييي ! يعني أول مرة احس
اني مب عارفة أرتب اموري وشنو المهم والأهم واحسني بربكة ما يعلم فيها إلا رب العباد ..
تخيلوا بأمان الله أدرس ، فجأة يصير لازم احين احين اجهز حق عرسي !!!!

يعني آنه كنت متوقعة اني بكمل شقتي على راحتي وبأثثها على راحتي ، وبعدين بسوي العرس
وبنتقل للحياة الجديدة ، يعني كان ببالي ان الجامعات هناك مثل بالبحرين للحين ما بطلت التسجيل !
لكن فجأة طرى على بالي أجيك التسجيل للجامعات ، والحمدلله اني جيكت وإلا بتروح علي هالسنة بعد !!

طلع ان التسجيل للجامعات من زمااانننن مبدي ، والديد لاين ما بقى عليه شي ، شهر 7 !
ولازم أكون حاضرة هناك ، ما يصير أسجل اونلاين ، فالوضع حده مسخرة .. لازم اسوي عرسي اسرع
سريع ، بأسرع وقت ممكن وأجرب طيارة .. لان الوضع في خطر خلااص !!!

فتخيلوا وضعي هاليومين مع زحمة الحجوزات ، اتصل لهالميكب ارتست .. واكلم هالهير ستايلست !
اسولف مع الحناية ولا المصورة ، ولا احجز القاعة ولا اشتري الفساتين ، ولا كورونا الي الله ياخذها مادري شلون بسوي حفلتي ومن بعزم ومن مب عازمة ! وايد يضايق ان أحلى ليلة ممكن تكون بعمرك مب مثل ما تتخيل ولا تتصور بسبب الأوضاع المجتمعية وفوقها لانك كنت نايم بالعسل تفوتك سالفة الجامعة الي
بسببها ممكن تسوي كل شي أي كلام !

قاعدة كثر ما أقدر اني اضبط الوضع ويكون كل شي حلو ومثل ما متصورة ، واهدي نفسي
ان باقي وقت ، بس العرس مب كل شي بالدنيا .. وراي تضبيط متطلبات ما بعد العرس وتهيئة
نفسي للحياة الجديدة والمنعطف الي بصير، وراي دراسة لغة ، اخلص اوراقي مع الوزارات في بلدي
وفي كذا بلد ثاني ، وعلى ما نضبط وضعنا بعد السفر والسكن وغيره .. قاعدة احس ان المدة ما تكفي
ان اتفرغ للتسجيل ومقابلات الجامعة وغيره .. مليوونن شييي

مادري هالتوتر لو شنو الي مخليني احس اني بنسى اشياء مهمة ، وبغفل عن أشياء
مادري مادرييي ، أصلًا مادري شقاعدة اخربط ، بس المهم دعواتكم لي بالتيسير وان كل
شي يصير حلو ومثل ما ابي


​

 

[T W I N K L E]

مشاهدة المرفق 7877​

*
،

آنه قايلة ما بييب طاري الكورونا مرة ثانية بالمدونة بس ياخي هالحلطومةة ما اقدر ايودهاا !!
الوضع عندنا وايددد خطيرر ، البحرين بالنسبة لعدد السكان موبوووءةة !!! ياخي مب معقول أكثر من
3000 حالة باليوم و الحين وصلنا لي 28 وفاة خلال اليوم وعلى ما تصير الساعة 12
ممكن احصائية اليوم تزيد !!

المشكلة ان البحرين مب صاكة ولا شي وكل شي مبطل والحدود مبطلة !
ومسوين حملة ولهنا عليكم للسعوديين خيييرر ؟؟ ترا ما ولهنا عليكم قعدوا ببيوتكم ، والله
احنا نحب الشعب السعودي وجيرانا واهل بس مب وقتكمم صدقونييي !!!! البحرين في حالة هلع،
الممرضين نوبات بكاء وهلع وبدون نوم وما يجوفون بيتهم ويشتغلون لاكثر من 20 ساعة ! كل جمن
دقيقة نسمع حالة وفاة جديدة ! يعني 21 وفاة في 4 ساعات شي مب طبيعي !!!

فوق ذي صرتت احاتييي عرسي وايد تاجل .. وايددد وماعندي وقت وخاطري اسوي حفلة
بس كل شي ضدي حاليًا ! صح ان الوضع مبطل واقدر اسوي حفلتي بس ستل اخاف على ارواح اهلي ..
اخاف قبل الحفلة بيوم يصكون الصالات مثلا ، مب عارفة احجز الصالة ولا لا .. واذا ما حجزت يمكن
يروح علي الحجزم في هاليوم ، المشكلة ما ادري من الحين لي تاريخ العرس شبصير .. وايد قاع احاتي
ونفسيتي صايرة زفت ..

دعواتكم ان الوضع يتحسن لان حرفيًا الوضع في خطر .. حتى العراق اغلقت
منافذها بويه البحرينيين ، والقادم أدمر.. اتوقع على هالوتيرة جميع الدول بتصك حدودها
مع ديرتنا ، ياخوفي يصير العرس اوكي بس عقب ما اقدر اسافر وينصك عني تسجيل الجامعة..
سيناريوهات سيئةةة وايدد براسي والوضع كلش ما يخلي الواحد يتفائل !
الله يعدي هالايام على خير ..​

 

[T W I N K L E]

*
،

اقرأ تدويناتي السابقة وأقول ياربي شلون كل شي يمر ..
شلون كنت وايد زعلانة واحس الدنيا تسكرت بويهي وفجأة چك پوم كل شي
صار اوكي ، الحياة ما توقفت وهذاحنا - هذا نحن - عايشين والاشياء الي كنا نحاتيها صارت ماضي !

كنت أحاتي العرس وأحاتي الكورونا ووايد اشياء في مخي .. مرت فترة من عرست
وسويت الحفلة الي ببالي وعزمت ربعي وكل الي يعزون علي وصرت ملكة جمال العالم ^ برا
واحسسس ميسو ليش كنتي شايلة هم الدنيا فوق راسج ، اكا كل شي صار حلو ومثل ما تحبين

والكورونا اتوقع ان احنا اول بلدة عربية خليجية فصخت الكمام بشكل رسمي في الأماكن المفتوحة
والخارجية - مو ان شخص مخالف القوانين - ، الحالات عندنا الحمدلله والشكر لك يا ربي أولا ولفريق
البحرين ثانيًا صفرنا الوفيات والحالات اقل من 100 حالة باليوم ويج از انجاااز كبير !!!

الحين آنه على اعتاب السفر .. يعني يوم اليمعة بسافر وكنت شايلة هم الجامعة لان التسجيل
فيها لووويههه ، يعني آنه قدمت اوراقي لتخصص التخدير وتواصلت معاي الجامعة بس
لكوني اجنبية فيه اجراءات وايد اسويها وروحة ويية وسفر الى عدة بلدان فالوضع ما يطمن !

احين بس جدامي ايام من تكثيف دراسة اللغة قبل لا اييب العيد بالمقابلة
قاع اتخيل وضعي وهم يسألوني وأشير لان مب فاهمة ولا كلمة
بس عقب ما بطلت مدونتي وجفت شلون كنت متوترة حسيت الشي ما يسوى
وكل شي بمر بإذن الله ، بس دعواتكم الخالصةة لي وأول ما تكون الاخبار حلوة ايي
اكتب لكم اهني وآنه مستانسههه ، قولوا آميننن بس


- أدري إن مدونتي صارت وكالة أنباء ميسيزو بس شنسوي الحياااةة تتطلب -



​

 

[T W I N K L E]

*
،

هلوو ، وحشتني المدونة !
وايد احيان يخطر ببالي ادش واسولف ، وعادي اكتب قصة حياتي
وبعدين امسح كل شي واطلع مادري احس سوالفي سخيفة
حرفيًا صايرة وكالة انباء حياتي الخاصة، اهوا محد مهتم انه شنو مسوية ولا شنو انجزت .. عموما
المنتدى ولو انه نايم ما اعتقد ان فيه احد تم يعرفني ويتابعني للحين

المهم اني ياية كالعادة احط اخر الاخبار وامشي .. مب على شي !
لكن الفترة الاخيرة مستانسة وياية انشر طاقة ايجابية ، ما يهمني الناس شنو راح تستفيد
لما تعرف آنه شنو سويت ، المهم اني استانس وآنه افوشر بالاشياء البسيطة والتغيرات في مجرى
حياتي !

-

قبل فترة ومن اول ما تخرجت من الثنوي ، يعني من قبل سنة وانه خلاص حطيت ببالي
ان حلمي ادش تخصص التخدير وادرسه ويكون الطب جزء من حياتي ، وايدد عندي ميول
لهاي النوع من الاعمال والدراسة ! كنت انام واقعد على هذا الشغف ، حتى كان شرط من شروط
الزواج ، اكمل دراستي وادرس بمجال طبي وان سمح التخدير ! كنت حاطة الدراسة من اولى اولوياتي
ودراسة المجال الي احبه ، ومحد يمنعني عنه ! وفعلًا شاءت الأقدار .. وسافرت للخارج وتوفقت اني
اسجل بجامعة طبية تخصص التخدير .. كان قبوليي وشييككك جدًا ، يعني حصلت موافقة مبدئية لاني
الهمت لجنة القبول بالجامعة ، لمسوا فيني حب التخصص ولو ان لغتي ما كانت المطلوبة ! بحكم ان
الدراسة مب باللغة الانجليزية وانما بلغة البلد الي انه فيه، جافوا اني استحق فرصة ثانية وعطوني موعد
بعييدد للمقابلة الثانية ، يبوني اتطور في اللغة بهذي الفترة ، وبنفس الوقت كانوا متأكدين اني بتطور ..
لانهم انبهروا بمستواي في اللغة ، قالوا مستحيل انتي ياية من اسبوع بس وهذي لغتج ، حسبناج على الاقل
عايشة سنة سنتين اهني ! صح مستواي حلو لكن اللغة الطبية اصعب وتتطلب مستوى اعلى !

عمومًا ، كان بامكاني ادخل المقابلة الثانية ولكن سبحان الله ..
بديت افكر بعقلانية بخصوص اني ادرس التخصصات الطبية ، للاسف الجامعات اهني معتمدة
بكل العالم الا البحرين ! لما ادرس تخصص طبي صعب اعادل الشهادة لما ارد الديرة ، واشتغل في
هالمجال ، صرت مترددة ، نفسيتي تعبت .. فقررت اخيرًا اني اصرف النظر عن حلمي في دراسة
مجال طبي ، بدأت ابحث عن خيارات اكثر عقلانية ، حتى لو ما تعادلت الشهادة ستل اقدر اشتغل ..

بديت رحلة البحث عن التخصصات مثل طالب الثنوي الي توه بيتخرج، بديت من الصفر
احاول ابحث عن شي قريب من ميولي ، واخيرًا استقريت على الهندسة المعمارية ، كوني رسامة
وعندي جانب الكرييتف مرتفع واي قاعدة امدح نفسي آنه وايد كرييتف وعندي افكار مجنونة
وعندي قدرة عالية على ابهار الناس ، حسيت الهندسة المعمارية تناسبني جدًا خصوصا اني متخرجة
من الفرع العلمي بمعدل 95.6% وهو معدل تراكمي ل 3 سنوات دراسية ، اغلب الدول مصيرهم يتحدد
بمعدل واحد للسنة الاخيرة ، لكن هذا معدلي لثلاث سنوات ! من اول ما بدأت الدراسة بالمدرسة الثانوية
الى ان تخرجت ، فخورة جدًا بنفسي !

الحين مجرد انتظر القبول والي اقدر اقول انه شبه تام عشان ايي افوشر اهني
اني رسميا اركيتكجرال انجنيرنق ستيودنت ، جدًا مستانسة اني بدخل الجامعة ، مجرد تأخرت
سنة وحسيتني في ضياع تام مع اني كنت ادرس لغة في هذي الفترة وفي جامعة بعد ! بس
هاي الشعور النفسي الي انه للحين ما دخلت الجامعة ، الي اكون على وجل لان انه انسانة اهتم
بالتعليم جدًا ، رغم اني ادري اني بواصل دراسة ومع ذلك مجرد كوني خارج اطار الدراسة الطبيعية
الي كل دفعتي فيها ، خلاني احس بشعور بشع جدًا ، مرات كنت اصيح ليش اني قررت اتزوج بهاي
العمر او بهاي الفترة، ليش ما دشيت الجامعة وخلصت وعقب لاحقين !

خصوصًا اني بالبحرين كنت مقبولة في دراسة الاشعة وعندي بعثة بعد ! كنت بدش
مجال حلمي - شي طبي - لكن سبحان الله ، كل واحد ما ياخذ الا رزقه وكل شي بالنهاية صلاح
للعبد ، اتمنى اني فعلًا ابدع بتخصص الانجنيرنق واثبت لنفسي ان مافيه اي حسافة على ما مضى !



​

 

[T W I N K L E]

*
،

" الحُسين تاريخ ، والتاريخ لا يموت "
​