Beyond the tale | میسیزو (5 زائر)

[T W I N K L E]

*
،

كم شخص بالمنتدى عايش بالغربة ؟ قولوا لي خل احسبكم ؟
كذا مرة كنت اسمع @SKY NET يقول يبي يهاجر من العراق ، مب من صجججكككك !!!
إن شاء الله بس راحت عنك هالافكار

والله صدق من قال ( الغربة چتالة - قاتلة - )، ياخي قمت احس ان صادني اكتئاب
مع ان عايشة مع زوجي، واختي مع زوجها جيرانا، يعني مب بروحي .. واقول يا الله اختي شلون
كانت عايشة بروحها اهني ؟؟!!!!

بس فترة الامتحانات صرت ما اتيمع مع اختي يوم الخميس .. لكم ان تتصوروا حالي هالثلاث اسابيع !
والله قمت اخاف على نفسي اني ادخل مرحلة حادة من الاكتئاب ! والله قمت اصيح اصيح بدون سبب
واحس بضيقة وخنقة، اول يوم صادني جي يوم ثاني طلعت مباشرة ع الغدا مع ان كان علي لوووددد دراسة مب طبيعي وضيعت اليوم كله برا بس عشان اغير من نفسيتي ، وفعلا رفهت عن نفسي ، سويت غدا وطلعت مع زوجي وبنت اختي رحنا بستان كله خضرة ، اعتدلت نفسيتي ، بعدين الاسبوع الثاني نفس
اليوم صادتني مثل هالحالة ، استغرببتتت اني طلعت اشتري لي ادوات رسم غاااللييةةة المفروض اموت
من الوناسة ، حتى ما بطلتهم وولا لي خلق اسوي شي ! ورجعت اصيح ، اقولكم اكتئاب
ونفس الشي هاليومين ، الوضع ابدًاااا ما يطمنننن...

ترا بس صارلي 7 شهور اهني تقريبا واحس بمووت وحشني هوا الديرة ، وحشني بيتنا ، وحشوني
امي وابوي وخواتي واخوي، خالاتي وخيلاني وعمومي وكلمننن يصير لي، وحشوني ربعي ، وحشني كل شيييي !

اهوا مادري السبب لود الدراسة على الحبسة بالبيت على اني ما قمت اجوف احد!
يعني حرفيا تخصصنا مُتعبببببب ، للي ما يعرف كتبت بالتدوينات فوق ان بدش هندسة معمارية
وفعلا حصلت القبول وانه الحين طالبة هندسة ، البروجكتات والاسايمنتس ما يخلصون، الدراسة صعبة
والله ما صدقت اني اصيح بسبب الدراسة ! جم مرة قلت اصيح الحين ؟

بس حياتي حرفياااا صايرة كلها صياح ! وبس يعني ترا تدوينة فيها صفر فايدة ومجرد فضفضة

 

[T W I N K L E]

​

*
،

- تحذير: تدوينة تحلطم -

نسيت يا جماعة شلون اكتب بالمدونة او شلون افتح سالفة
والله احسني شيبت يعني مب معقولة اجوف المنتدى جنه البيبي الصغير مالي واتذكر الاعضاء
القديمة والايام الخوالي ، المهم مااا علينااا..

ياية اتحلطم ان خلصنا نص شهر رمضان، بالمناسبة مبارك عليكم الشهر متأخرة
وين كنا ؟ ايي خلص الشهر وانه ما سويت شي لا على الصعيد الروحي ولا الدراسي ولا النومي
ولا حتى الاكلييييي متخيلييين! يعني بسبة التخصص الزفت والجامعة الزفتة والدكاترة الزفتة مب قاع
انجز ولا شي، حرفيا شهر رمضان ضاع لا عبادة نفس الناس، لا دراسة نفس الناس بحكم ان كل دكتور
يعطي اسايمنت اخس من الي قبله وكل واحد يقول الزود عندي فاصلا ما يمديني انجز باتقان ، وولا يمديني
اراجع على المواد النظرية والي حرفيا ماعرف منها ولا شييي من اول الكورس، فالدراسة ماخذة وقتي
ما اقدر اطبخ فطور سنع والله بطني بيشتكي علي يوم القيامة !

يعني صفرررر ، صفر انجاز صفر كل شي ، حياتي حاليا عبارة عن صفر قد ويهي ، تعبتتت
وانه اتحسب ع الدكاترة مادري اكتب اساميهم في لستة واقعد ادعي عليهم واحد واحد بليلة القدر
لو شنو ! يعني دكتور البيان المعماري الي هو الاسكيس - يعني دكتور مادة الرسم الحر - اخخخ تخيلوا
ودي ازنطه ، تحسونه ينتقم، والله تحسون عنده عداوة غامضة الاسباب مع الطلاب.. يعطي اسايمنتات
بالهبل والله اقعد عليهم طول الاسبوع وايخذون وقتي كله وبعد ما اخلصهم وولا اسويهم باتقان اصلا
وتتكسر يدي، ووقت ما نقول له ترا رمضان وعبادة مب فاضيين لك، يقول حتى العلم عبادة ! الله والعلم
الي تدرسنا اياه عاد

لا وتخيلوا عندنا مادة اسمها فارسي عمومي عليها كردت عالي اكثر من بعض
المواد التخصصية حتى ، عاد انه احسبه لغة عامة حالها من حال الانقليزي، طلع شعر فارسي
عاد استلموا وضعي ، حرفيااا الاطرش في الزفة ، مب فاهمة ولا كللللمممةةة !!!! بارسب يا جماعة
والامتحانات حضورية ما يمديني اغش لا وبعد شهر رمضان بصير الدوام حضوري وكلششش
مافيه نقطة استعداد .. خصوصااا ان كلاساتي شطولها ، احس بامووت من الخبر الخايس ذي

والله لو باتحلطم بعد ما باسكت ، والله كل يوم يزيد قهري قهررر، خلني ساكتة..
ايي عاد شخباركم مع الشهر الفضيل ، شمسويين ؟
^ ع اساس ان فيه احد يقرأ المدونة وبيي يسولف وياي ​

 

[T W I N K L E]

*
،

سجلت بالمنتدى سنة 2014 يعني كان عمري بوقتها 11 سنة تقريبًا ، اليوم عمري 20 سنة، يعني نتكلم عن 9 سنوات !
كل ما ادخل المنتدى بعد فترة ، أول شي اسويه اروح ملفي وأقرأ المحادثات القديمة ، بعدين أرجع اتصفح
مدوناتي من الصفحات الأولى .. وايد أشياء تغيرت ، وااايددد !! بشكل مخي ما يستوعبها ..
أطالع صديقاتي والمحيط الي حولي تغير وااايددد، تفكيري تغير وايد ، اسلوبي تغير وايد ، كل شي تغير ..

أتصفح التون ما اعرف احد فيه ، يمكن بس سكاي و ترنومة
حب الكيبوب والكوريين ؟ ولا شي صار ! من يصدق ان آنه قمت اجوف تركي والمسلسلات الكورية
ما قامت تجذبني ! لا والأدهى من يصدق اني اجوف الي يصيرون فانز للفرق يهال - لحد يهجم -
الدنيا تركض ، وتركض أسرع من ما نتخيل ..

دايمًا الياهل يحلم يكبر ، وللحين أتذكرني من يوم كنت صغيرة شلون انتظر بشغف اني اكبر !
كنت لما أسأل اعضاء المنتدى عن اعمارهم الي يقول 18 وفوق ، احس واو هاي انسان عوود ! بالغ ، عاقل .. مسؤول عن نفسه،
اتمنى اوصل لعمره ، وإلا چک پوم صرت 18 ، وبعدين 19 والحين 20 بدون لا آحس حتى ..

ساعات أصفن ، ميسو شنو قاعد يصير؟
انتي تزوجتي ؟ انتي مب عايشة في البحرين ؟ انتي كل الي حولج يرطنون عجمي ؟ لا وصرتي تسولفين
وياهم؟ احس كل شي حلم ! اقعد مع نفسي افكر هاي البنت الصغيرة صارت بهالطول والحين مسؤولة عن عائلة صغيرة
باجر تكبر ويصير عندها عيال ، لما اقعد يعاملوني معمالة المرأة مو البنت ، المجتمع الي حولي يسولفون عن الأمومة
والتربية وشغل البيت ، خلاص صرت عودة

لا ماعندي سالفة ! ياية بس اقول سبحان الله ، شلون الوقت يمشي ..
الناس تمضي ، محد لاحد ، شكثر ناس كانوا بحياتنا احين بس نتذكر مواقفهم واساميهم ،
وبعضهم يمرون علينا وحتى اسمهم ما يبقى في ذاكرتنا ، الطفل الصغير باجر يكبر ، بدون لا نحس ..
احنا ما نتم مثل ما احنا ، الدنيا ع طول في تقلبّات قد تكون صغيرة ما نحس فيها ، او كبييرة لدرجة ان تغير
مجرى كل حياتنا !

هالتسارع في الأحداث .. خلاني أخاف !
أخاف لاني بعيدة عن أهلي وناسي ، الواحد ما يلحق يرمش تتغير وايد أشياء حوله ، من المواقف الي وايد أثرت فيني
الفترة الي طافت؟ کنت قاعدة أدرس في لوية الامتحانات فجأة واحد يطق علينا الجرس ، لحقوا الحارس منسدح في دورة المياه
ماندري شفيه ، إلا الريّال توفى ! وكنت كل يوم اجوفه حرفيًا ، ويوم وفاته بعد جفته مافيه أي شي الصبح ، هاي أجله الله يرحمه !
قبل جم يوم ، كنت متصلة فيديو كول حق بيتنا .. ابوي قام يتأمل فيني وساكت ويسمعني وآنه اسولف
وفجأة قام يصيح ، كسر لي قلبي وايدد .. صار فيني خلاص ما ابي ادرس برا .. ما ابي اقعد ثانيتين برا البحرين .. مادري
لو يرجع فيني الزمن ؟ أرد أتخذ مثل هالقرار المصيري ؟ الي ما فكرت بتبعاته بشكل جيد ..

مو اهني المشكلة! المشكلة ان لا زلنا عايشين ولا زال الزمن يركض ، مادري باجر شنو بهبب من قرارات بعد ..
مادري الصراحة شنو قاعدة أقول احس وايد كلام متكرر ولا لي خلق أعيد قراءته ، حبيت يكون اي شي أفكر فيه
أكتبه بدون تنقيح للكلام .. المهم حاليًا، كل الي اقدر أقوله الله يستر علينا جميعًا !
​

 

[T W I N K L E]

،
*

أهلًا مجددًا ..

خاطري أفضفض شوي ، مع ان الاحتمال الاكبر محد بيقرأ بعد كل هالوقت من القطيعة !
لكن أحس اني امر بحالة من الخوف على أهلي و ناسي وربعي و كل عزيز علي ، بل حتى على نفسي ..
آدري هالشي من الشيطان، وقاعدة اتعوذ من ابليس كل ما حسيت ان هالافكار سيطرت عليّ بس فعلًا أحسني اواجه
مشكلة في التخطي من الصدمات الي قاعدة تصيدني هالسنة !

وايد ناس قاعدين يموتون من حولي ، والمشكلة فجأة و بدون مقدمات أو ممهدات لموتهم !
في هذه السنة شهدت أكثر من حالة وفاة لشخص جفته يتحرك جدامي بكل قواه وعنفوانه في الحياة ..
يعني مثلًا بدأ الموضوع بوفاة دكتورتنا في الجامعة ، الي علاقتي فيها سطحية .. لكن بحكم ان تخصصي عملي
أكثر من نظري ، احتكيت فيها بالواقع و سولفت وياها وفجأة بدون سابق انذار توفت وما كملت معانا لين تسليم الدرجات ..

بعدها بفترة ، حارس العمارة الي آنه ساكنة فيها .. كل يوم من الصبح اجوفه وآنه رايحة الجامعة واهوا الي يستلم
اوردراتي من عند المناديب وآنه استلمها من عنده ، فجأة بدون سابق إنذار واحد يطق جرس شقتي يقول حق زوجي الحارس
منسدح وما يقوم ، نزل زوجي بأسرع ما عنده إلا الريّال طلعت روحه من زمان !

قبل جم يوم .. كنت بأحد الفعاليات الدينية، فجأة من غير سابق إنذار الكل قام من مكانه واصوات صياح ..
الناس قاعدة تطلع من المكان ، مآدري شالسالفة ! بعدين انصدم ان صديقتي ورفيقة دربي واختي توفت !!!!
و في شنو توفت؟ في نفس الفعالية الدينية ولكن بمكان ثاني والخبر وصل للناس الي معاي وكلهم طلعوا ..
صغيرة ، بعمري ، مافيها أي شي .. فجأة الموت خذاها ! ما صدقت .. رحت جفتها بالمغتسل ، و للحين صورتها ببالي .. أمها يا قلبي
الله يصبرها ، أول ما جافتني انفجعت ، تجوفني وتتذكر بنتها .. تقول لي تعالي جوفي صديقتج شصار عليها !

ما نمت ليلتها ، وما طلعت من بالي ولا لحظة ، ما ادري اصيح عليها .. أو اصيح على نفسي ؟
الواحد ما يدري بأي لحظة يموت ، وبأي مكان ، وبأي كيفية، آنه في غربة .. شنو لو يصيد أحد من أهلي شي لا سمح الله شلون
بقدر أكمل حياتي ! هواجس و هواجس و هواجس .. فكرة تجر فكرة ، نسأل الله حسن الخاتمة


​

 

[T W I N K L E]

*
،

الموضوع السائد بتويتر هاليومين ، والي وين ما اروح يطلع في ويهي .. قرار منع الاختلاط بجامعات الكويت الحكومية ..
بغض النظر عن كل شي ، ما فهمت ليش فيه ناس معارضة القرار و تقول ان الي مع القرار عينه وصخة وتفكيره وصخ ووو..!!
يعني ما افهم ليش متحمسين للاختلاط وعاجبكم ؟ يعني ما فهمت شنو تبون تسوون من الاختلاط ؟ بشنو بتستفيدون؟
عندكم نداء تزاوج في الجامعة ولا شنو؟ يعني حرفيًا مهما افكر فيها ما فيه أي مبرر أو تفضيل للاختلاط ؟
اذا فرضنا ان ما فيه أي فائدة من منع الاختلاط ، يبقى ان ما فيه أي ضرر من المنع ، فماله داعي تقتلون روحكم
ع هالسالفة الا اذا انتو في الجامعة مجابلين شي غير الدراسة وفي بالكم شي غير الدراسة !

طبعًا الي خلاني افتح السالفة ان بإيران بالفترة الي طافت صار فيه شغب ومظاهرات عشان سالفة الحجاب..
وان يبون يخلونه غير اجباري ، ومن ضمن هالشي كانوا البنات الي معاي بالدفعة يطالبون بان الكلاسات تصير مختلطة
ويطالبون ان الحجاب ما يكون اجباري !! طبعًا واضح ليش يبون الكلاسات مختلطة صح ؟ اكيد حق التعارف مع المصبنة
والسوالف وطياحة الحظ وكل وحدة تحصل فارس احلامها الي من نفس التخصص .. غير جذي مافيه اي فائدة!

في حال ان منع الاختلاط بالعكس تمامًا .. له ايجابيات وايد للبنات !
باتكلم من واقع تجربة كوني ادرس في جامعة مافيها اختلاط ، البنية تقدر تاخذ راحتها في الجامعة بشكل أفضل
يعني تتسدحين تتبطحين تقعدين بالقعدة الي تبينها ، تضحكين ع راحتج ، تلبسين ع راحتج .. يعني مافيه احلى من جذي!
آنه لو الود ودي حتى الدكاترة ما يدرسونا رياييل .. لان حرفيًا اضطر اني البس عباية بالكلاس و اتصنم ما اخذ راحتي بالقعدة
وبالكلام وغيره وغيره ..

+ الفشايل جدام البنات وايد اهون من الصبيان بمليون مرة يعني
لو الدكتور فشلج جدام البنات تحسين يهووون وايد ، اما جدام الصبيان شنو يرقعها ذي !

لا لا خنسولف من ناحية الجد ، أأمن للبنات وقلب البنت الي جنه جزازة ( زجاج ) ينكسر بسهولة .. محد ينكر
ان الشيطان مستقعد لنا ، اكيد لما يكون فيه اختلاط بتنجبر البنت انها تشتغل مع الأولاد ! بشغل القروبات وحتى
مو القروبات ، بتضطر انها تدخل معاهم في قروبات و بتضطر انها تتعامل معاهم معاملة تنجر من الرسمية الى الضحك
والسوالف ! لا تقولون بتصير زمالة وصداقة عادية الا تلقون البنية بسرعة تميل لفلان وعلان ، وعادي حتى لو ما سولفت و ضحكت
معاهم الا يصير لها انجذاب حتى لو بالسكّاتي وبدون ما تبين ، ونفس الشي الصبيان 75% منهم بيشتغلون شغل الصيادين !

الصبيان الي معانا بالتخصص يمكن ما نجوفهم الا ايام المعارض والمؤتمرات واجوف شلون لزقة يتلزقون في حتى المتزوجة
مب بعد البنات المو مرتبطات ! ومن يجوفون بنت تبدي حالات التخيفف و انه الولد الكوميدي الظريف ! وبالنهاية الانسان ما ينجر
للغلط مرة وحدة ، الواحد حبة حبة ، خطوة خطوة ينجرف في الغلط ! والشيطان يبدأ يزين للانسان الشي ، لا نقول ان احنا معصومين
لا نقول حتى ان احنا على قدر محترم من الإيمان وما راح ننجر لهالشي ..

ترا الشيطان ايي - يجي - للانسان من أماكن ما تتصورونها حتى من العبادات و شوي شوي يجره للمنحدر !​

( يَا أَيُّهَا الَّذِينَ آمَنُوا لَا تَتَّبِعُوا خُطُوَاتِ الشَّيْطَانِ ۚ وَمَن يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاءِ وَالْمُنكَرِ ۚ وَلَوْلَا فَضْلُ اللَّهِ عَلَيْكُمْ وَرَحْمَتُهُ مَا زَكَىٰ مِنكُم مِّنْ أَحَدٍ أَبَدًا وَلَٰكِنَّ اللَّهَ يُزَكِّي مَن يَشَاءُ ۗ وَاللَّهُ سَمِيعٌ عَلِيمٌ )​

طبعًا ما انكر ان المرأة صارت في زمن لازم في نقطةٍ ما بتتعامل مع الرجال ، ان ما كان في الدراسة بكون في العمل !
ان ما كان في العمل بكون في الحياة الواقعية ، وهاي الاختلاط بنظري يكون في عمر البنت أوعى للمشاعر الي تمر فيها وللتقلبات
والاحتياجات وتكون مستقرة أكثر أحسن ، غير ان ساعات العمل وطبيعة العمل غير عن أجواء الدراسة وطبيعة الاختلاط فيها فالمقارنة باطلة.
ما عندي مشكلة ان ادرس في جامعة الكلاسات فيها مختلطة ، يعني لو ما كنت ادرس بإيران جان انه في جامعة البحرين ( مختلطة ) ولكن أكيييد منع الاختلاط أحسن ، وأريح لنا كبنات ومافيه أي داعي ان نعارض هالشي!
وما فيه مبرر أصلا للمعارضة ! وشكرًا وعفوًا..
​