Breathing Space (1 زائر)

[Minory]

مساحة للتنفُس ...​

 

[Minory]

-







كسرًا للروتين قررت أدون .
احس إني بحاجة للكتابة بذات في هذي الفترة ⭐️


مع بداية السنة بدأت شابتر جديد في حياتي
كل شي فيه جديد عليا ! الروتين المدينة المُجتمع الإلتزامات احس نفسي بوضع غريب
انتقلت لمكان جديد ..
وإلى الآن ماانسجمت وماعرف اذا راح أقدر انسجم !


احس الحياة حطتني في وضع مختلف عن الشي الي كنت مُعتادة عليه !
في السابق احس كأني كنت اركض في ماراثون ! او كأني كنت في داخل لعبة !!
لعبة بيبسي مان نسخة الواقع
ودائمًا مافي وقت ومضغوطة ومتوتررة وإزعاج مُتواصل !
وقتها فتحت هالمدونة حتى اتنفس شوي !
وماكتبت فيها شي ..


أما الآن في الوقت الحالي انا مرحلة هدوء وسكون تام ..
و….. أسسحب كلامي ماأبغا أتنفس
رجعوني للضغط
الحياة في ظل تدفق الادرينالين مُمتعة جدااا
وبتضيف لي الكثير !
في نفس الوقت الهدوء والراحة صح بيساعدوك ترتب نفسك من الداخل ! وححلو يكونوا جُزء من اليوم ! بس مايكونوا اليوم بأكمله !!

في النهاية مُهم التوازن لأنه بيعطي لكل شي قيمة ومعنى !


وحاليًا راح أعتبر هذا السكون استراحة مؤقتة
حتى أرتب أموري وأولوياتي للفصل القادم ⭐️








​

اللهم لك الحمدُ والشكر كما ينبغي لجلال وجهكَ وعظيم سلطانك ..

 

[Minory]

-​

#فعالية_الإسبوع

.
.

إنه لو حصلت على مبلغ كبير من المال حاليًا ايش راح أسوي فيه !!
مع إني ماحشارك في اليانصيب بس نفترض إنه جاني مبلغ خيالي !

ماعرف كم مقدار المبلغ بس بما إنه خياال راح أفترض إنه مبلغ كبيير
أول شي راح اشتري 3 عماير سكنية حتكون كلها كبيرة وفيها عدة طوابق ، وفيها كحد أدني من 12 لـ 15 شقة أو أكثر على حسب المساحة وقتها !!
وراح تكون كل عمارة في دولة مختلفة ( عشان اذا صار شي في دولة اهرب أنا واهلي للدولة الثانية )
راح اعمل وحدة في اليمن ، وثانية حتكون في الدولة الي انا وأهلي مقيمين فيها حاليًا
وثالثة حتكون في احد الدول السياحية ابغاها تكون دولة مسلمة !
ماليزيا أو تركيا !! امممم مش عارفة راح افكرر وقتها وأدرس قوانين الدول في التمليك بس تجي الفلوس

وبعدين راح أعمل تأجير لشقق الموجودة في العماير هذي !!!
وراح اخلي في كل عمارة طابق كامل يسكنوها أشخاص بدون مقابل عشان الله يبارك لنا
وباقي الشقق حتكون إيجارx إيجار
وبكذا اكون حفظت جزء كبير من المال ! وحولته لـ ( أصول ) !! وضمنت مصدر دخل ثابت ودائم لأهلي ولي

وراح تختلف الإيجارات من دولة لثانية حسب ظروفها الإقتصادية !
في اليمن حتكون شي بسيط ورمزي وماحيكون الغرض منها الربح ابدا .
والدولة الي انا فيه حتكون متوسطة ، والي في دولة السياحية حتكون مرتفعة وحخليها في مكان راقي ، وحشتغل على التصميم الداخلي وحختار حي مرغوب ، وعليه إقبال وممكن أسويها كمباوند صغير ومرتب ! ولا مش عارفة ! محتارة خلي الفلوس تجي وأفكر بشكل جدي أكثر

ولأنه عندي كثير أخوان وأخوات مع أمي الله يحفظها وأحفادها الله يحميهم كلهم
ف تفكيري راح أول شي لعماير سكنية بعدة طوابق وشقق كثيرة ، عشان ماتكون بس مصدر دخل ثابت لنا كلنا تكون كمان مأوى للجميع !
وإذا صار بيوم مشكلة في مكان وقررنا نسافر لمكان ثاني ! وقتها حكون ضمنت على الأقل وجودنا كلنا في مكان واحد

وثاني شي حشتري كم أرض .. وراح أأجرها برضوا بس على المدى البعيد أو راح أستنى ترتفع قيمتها السوقية وابيعها بفائدة أعلى !!!

وأخر شي حسوي مشاريع لي ولأخواني
أو حسوي لنا كلنا مشروع واحد ! هو أفكاري للمشاريع لوحدها يبغالها كنز علي بابا وتدوينة ثانية !
وإذا خلصت الفلوس على العماير والأراضي وماباقي شي للمشروع !!
عاددي جداا عادي !!! راح ننتظر حق سنتين تتجمع فيها إيجارات الشقق الي في الدولة السياحية
وبعدين نستخدم الإيجارات حتى نسوي فيها المشروع !!
هو صحيح انه العوائد من إيجارات الشقق حتكون شي بسيط مُقارنة بالمبلغ الي إنصرف عليها وقت شرائها !
بس مثل ماقلت بهذي طريقة راح أحفظ فيها الفلوس وراح اكون في save side
واكون منها ضمنت وجود ( أصول ) عندنا واذا في يوم قررنا نستثمر بـ مشروع كبير أو احتجنا لمبلغ ضخم والإيجارات ماكانت كافيه !
وقتها نقدر نبيع وحدة من الأصول الي عندنا ( أرض أو بيت ) ونستثمر بقيمتها !!



وعندي خطط كمان لبعد عشرة سنوات بس خليني أوقف هنا يكفي خيال لليوم .

​