-
إنّ الطريق إلى القمة صعب . ولكنْ يصبح التسلق سهلًا إذا صـعدتَ على أكـتـاف الآخرين ، ويكون أكثر سهولة إذا جعلتهم يعتقدون أن فـي الأمـر شـيـئًـا مـا من أجلهم .
و كبرنا سنة
مو مصدقة كيف هالعمر عم يمر بسرعة !
لسا مبارح يالله كنت 19 و اليوم دخلت ال 29 !
بس حبيت احكيلكم اني انا بنت حرفياَ آخر همي اديه عمري وصل
لأني و للأمانة اني عايشة الحياة بالطول و بالعرض
و عمري ما حاولت لا كبر من عمري لما كنت صغيرة
ولا صغر من عمري لما صرت كبيرة
كنت دائماَ عندي اعتقاد انو ليه البني آدم يلعب بشكلو
و ستايل لبسو ليبين اصغر او اكبر ؟
هاد دليل على قلة الثقة
كنت دائماَ احكي مع انو والله كنت صغيرة ع هالحكي
وقتها , احكي انو انا بدي عيش عمري متل ماهو
لما كون صغيرة بدي عيش حياة الصغار مابدي حاول
كبر من حالي , مابدي اشرب القهوة المرة غصبن عني
بس ليبين اني صرت ست اكتر من اني بنت طفولية !
و لا اني البس كعب و فساتين ما بتليق بعمري بس لبين
اني * Lady * حسيت بعمر ال 15 ع هيك تفكير كتير بكير
عليه و كنت بعرف انو لكل مرحلة عمرية شغلاتها الي بتخصها
ف ليه لحتى عيش مرحلة عمرية ما وصلتلها لسا ؟
لهل السبب بفكر و متأكدة انو الناس بتشتاق للطفولة او
لمرحلة المراهقة لأنهم ما عاشوها مزبوط مو بس مشان
الذكريات ! اما انا ف عشت كل مرحلة من مراحل عمري
بالطول و العرض و بدعت حرفياَ ! بعمر المراهقة كنت العب
لعبة Pump it up zero افتحوا عليها باليوتيوب لتعرفوها
و كتير ناس حكتلي تركيها شو بدك فيها هي للصغار
ما انا شو ؟ يعني اعتبر كبيرة ؟ ما انا كمان صغيرة !
ضليت العبها يعني لهلأ يعني لو بصحلي هلأ العبها ما بقول لأ !
ومن عمر المراهقة لعمر 21 سنة ضليت العب سكيت مع انو
يعني كانت حرفياَ هارية جسمي من كتر الضربات
و حكيت معليش اساساَ هي مرحلة عمرية و مارح تنعاد
اذا رح ضل عيش حياة الراكزين رح وصل لعمر لما اكبر
اتندم ع كل لحظة ما عشت فيها حياتي لما كنت صغيرة !
لما كان عمري 20 حلقت شعري و صدقاَ اني مو ندمانة لا هلأ
ولا قبل اني سويت هالحركة ! بتعرفوا ! انا بزعل اساساَ ع كل
وحدة ما غامرت بحياتها ! ما عملت أشياء مجنونة ! لأنو لما تكبر
و تتذكر و اكيد بتكون صورت و احتفظت بالصور رح تضحك و كتير
و تحكي اييييييه على هديك الأيام ما احلاها ! ماعم بحكي لازم كل
بنت تحلق شعرها بس انو تسوي شي هيك فيه مغامرة كبيرة
لون شعري فوق ال 10 الوان : ازرق , سماوي , وردي , برجندي
احمر ناري , احمر غامق , أخضر , تركواز , أشقر , بنفسجي و أسود
حرفياَ انا وصلت لمرحلة انو ما عاد عندي خلق اني لون شعري
مع انو لهلأ اللون الأزرق بنفسي اني اعملو بس شايفين كيف ؟
الواحد بجن بالصغر و بيركز لما يكبر مو العكس !
هلأ عنجد حسيت اني ركزت ! هلأ ادي بشوف الوان شعر بتجنن
و بكون نفسي فيها بس بقول لا ما بدي شي من داخلي يعني
بيحكي هيك احلى و انو مليت من الالوان و شعري هلأ ما احلاه
و نفس الشي بالنسبة لقص الشعر , هلأ تخيلوا كان شعري 75%
منو محلوق و هلأ طول وصار طولو لنص ضهري ! و عنجد يعني
هديت فجأة و ركزت !
انا سويت شغلات بحياتي و جنون عنجد مستحيل احكي ياريت عمر
كذا يرجع , ياريت اصغر بالعمر , ياريت و ياريت !
بالعكس انا بحكي و بكل ثقة انا متحمسة ادخل عمر ال 30 لأنها مرحلة
جديدة و رح تنفتحلي أبواب جديدة , أبواب جديدة من النضوج الفكري
أبواب جديدة من النضوج الجسدي , أبواب جديدة الله و اعلم من أمراض
عمر ال 30 الي بتخص البنات , مستعدة لكل هاد بكامل طاقتي و حماسي
التدرج بالأعمار شي كتير بحبو و بحترم كل بنت ما لعبت بخلقتها لتبين صغيرة
مابعرف انا اعتبر هدول خطوط تجاعيد او لا بس عندي خطوط تحت عيوني
و لما شفت صور الي قبل 10 سنوات كانوا كمان موجودين فما بعرف اذا هدول
من تفصيلة عيني او هن تجاعيد و على الحالتين كتير حاببتن !
انا كتير حابة نفسي متل ماهي , بعلامات التقدم بالعمر !
هي عنجد نوع اخر من الجمال ! هالنوع الي نادر ما حدا يشوفو !
و اساساَ مابدي اي حدا من الي مابهمو هيك جمال يشوفو !
-
انا مابعرف احكيلكم اني زعلانة ولا حازة بقلبي مابعرف كيف الاحساس
بس اليوم و انا عم احكي مع اختي الي الفرق العمري بيني و بينها هي سنة
كنا عم نحكي عن اغاني يعني تخيلوا كبرنا لدرجة نقول عن غنية ييييي اديشا قديمة !
قبل ما كنا نحكي هيك لأنو كل عمرنا كان 13 سنة !
هالاحساس جديد علي , وما بكذب عليكم انها حازة بقلبي شوي انو كيف العمر ركض
بدون ما نحس حتى ! مبارح حاسة اني تخرجت من المدرسة ! هلأ
كملت السنة 11 على تخرجي متخيلين !
اي صح بدا عقل يشيل خاصةَ هالوقت بتحسوا مافيه بركة !
بس المهم انو نحن وصلنا لهون !
انا كتير مبسوطة اني وصلت لهون ! بكامل قواي العقلية و الجسدية
مبسوطة اني وصلت لهون و كل الي بحبن جمبي !
بتحسوا انكم بحرب و فعلاَ هي هيك بظروف هالوقت الصعبة !
-
ما بقول غير , عيشوا عمركم لأنو كل مرحلة من مراحل العمر مارح
ترجع
شكراَ لكل الي وصل قراءة لهون
انا شفت فديو بالصدفة ع الانستا فديو بضحك ( ع اساس )
انو - شخص قال انو شخصية باربي بتلبق ع بنت نحيفة
ف هو شاف بنت سمينة لابسة فستان وردي قال انتي مو
لازم تلبس وردي انتي لازم تلبسي بنفسجي نفس بارني !
كون بارني كبير و سمين !
انو وين المضحك بالموضوع !
و الغريب اني شفت كتير ناس بالتعليقات عم تضحك !
الشخص الي عمل هالفديو واحد وقح و مو متربي !
مين هاد الشخص الي معطي حالو صلاحية انو يعلق ع الناس !
لك والله العظيم انا تعلمت من وانا صغيرة ما اجي اتمسخر ع اشكال الناس
ان كان فيهم مرض او هن حابين شكلهم هيك ! لأن بالمختصر انا ما دخلني فيهم
و الي فيه مرض الله يعينو !
و في ناس جاهلة و كتيرة هالناس ! مفكرة لو علقت ع اشكال الناس رح تكون خفيفة دم !
بس هي بكل بساطة وقحة !
ان كنت حابة هالشي , او ان كان مرض , انت ما دخلك ومحدا طلب منك ابداء اي رأي
أو انك تتمسخر ! و تعمل حالك انك خفيف دم ع حسابي !
عنجد لا حدا يسكت لحدا تمسخر ع شكلو او بيحكيلو ليه انت كذا ؟
و على فكرة في كتير كلام بينحكى بالمزح بس ملغم بمعاني مابين
السطور حتى هاد لا تسكتوا عنو
لان والله العظيم السكوت على هاد صحتكم النفسية رح تدفع حقو
بتحكولي ما بتتأثروا ؟ مافي بني ادم على وجه الكرة الأرضية ما بيتأثر
من حكي العالم ! بتعمل حالك مو فارقة معك قدام الناس هي قوة شخصية
بس لما تكون لحالك رح تفكر بالحكي !
و مين هالبني ادم الي الله خلقو بيستاهل انك تسكتلو لأنو خلاك ولو
للحظة انك تفكر بالموضوع و تشكك بحالك ؟
احكوا بالمشرمحي و بكل أريحية
انت سمنان , اي انا بحب الاكل كتير , انا بحب كون مليانة
انت نحفان , اي انا بحب صوم كتير , انا بحب اجسام عارضين الأزياء
عطوهم هيك ردود بنص خلقتهم !
و في مقولة والله ضحكتني بقد ماهي حزنتني !
انو مشكلتي الوحيدة بهل الأيام انو اهلي ربوني زيادة عن اللزوم
ولو ما تربايتي والله العظيم كنت رح طلعلهم مئات العيوب
بخلقتهم , بجسمهم , بفكرهم , بمنطقهم !
لك الي بيستمخر مفكر حالو انو هو كامل ؟ لك انا بضمنلكم
انو هيك شخص اكتر شخص بكون فيه عيوب !
بس للأسف متل ما قالت @RELOW QUEEN بتدوينة من تدويناتها
انو ماننزل لمستوى هيك شخص لأنو حرفياَ بنحس اديشنا نحن سيئين !
اكتفوا بالردود تكون دوبلوماسية او مضحكة بس من وراها رد واضح
انو يا فلان ما دخلك
لأن عنجد وصلنا لزمن جدا جدا جدا جدا مقرف لدرجة لا توصف !
وصلنا لمرحلة نعمل فديوات نتمسخر فيهم ع ناس و الناس فئة كبيرة
بتضحك عليها !
عنجد يا عيب الشوم على هيك ترباية . هاد اذا كان في ترباية
و اديش في ناس - في منهم عاشرتهم - حرفياَ صارت معهم أمراض نفسية
من ورا هيك تعليقات بتقرف !
هدول الناس كبروا و لسا فيهم ضعف بشخصيتهم ! يمكن ما يكون واضح
للعلن بس بكون داخلي !
ف جد وصلنا لمرحلة نضحك ع هيك فديوات و هيك تفكير و هيك منطق ؟
مابعرف شو هالصلة الغريبة بيني و بين الإكتآب ؟
او ما بعرف شو بسموه . . هيك فجأة بتحس الدنيا ظلمت عليك
و بتحس بحزن فظيع ووحدة غريبة !
اغنية سعيدة كتير و كلماتها مشجعة بتسمعها كأنك عم تسمع أحزن
لحن و كلمات بالعالم !؟
و انا بستغرب كتير , من كتر مافيني طاقة بحاول اني وزعها
و فضيها مني و هي ايجابية بغالب الوقت على قد ما بقابلها
طاقة سلبية كبيرة .
كل مرة لما حاول ما فكر بالسلبية و ضل شوف الجانب المشرق
من الحياة بحس كأنو عقلي عم يخزن الطاقة السلبية ليطلعها
بغير وقت !
و فجأة ما بشوفها غير بتنفجر ! من كم يوم انفجرت بمكان مابدي
ياها تنفجر بصراحة , يعني كنت عند ماما و سمعت خبر مو حلو ابداَ
و مابعرف كيف قدرت اطلع من عندها بدون ما تحس انو فيني شي
لأني مابدي ياها تعرف اني تضايقت , بس مابعرف كيف قدرت امسك
حالي لأوصل للبيت , كنت رح افرط بالشارع حرفياَ , حاولت لهي تفكيري
بالأغاني و حط اكتر اغاني روك صخب مشان لهي تفكيري بس عبث
ولما وصلت ع البيت ضليت ابكي شي ربع ساعة بس من قلب و رب
حسيت اني طلعت حزن كان مكبوت من 5 شهور الي راحوا لأني مابكيت
من زمان , كان كل شي يضايقني اجلو او ما كان بيستاهل مرحلة البكاء
بس لما سمعت موضوع زعلني حسيت انو حرك حرفياَ كل شي كنت مأجلتو
و تجمعوا مع بعض بهداك الوقت .
هالشي ما لقيت الو حل , كبت المشاعر , لأن فعلياَ في شغلات بتصادفنا
ما بتوصل لمرحلة انو نبكي عليها , ممكن انو نتضايق فترة من الوقت
و بتمشي بس ما بتوصل ابداَ لمرحلة البكاء , و هي هية المشكلة انها ما بتوصل
لمرحلة البكاء , بتضل معلقة بالنص , متضايقين و ما بتقدروا تبكوا عليها !
طيب بهل الحالة كيف ممكن الواحد يفرع هالشي اذا ما كان عن طريق البكاء ؟
و شغلة ورا شغلة بتضايق بتجمع و عنجد بالآخر بتنفجر متل ما صار معي
ف منرجع لموضوعنا انو انا حالتي غريبة عنجد , من كتر ما فيني امل من كتر
مافيني يأس بكل شي حرفياَ , فيني تناقض عجيب و حكيتها لحالي كذا مرة !
مين هالشخص الي بشوف الحياة مشرقة و حلوة و بتستاهل انو الواحد يعيشها
ومن جهة تانية بيحكي انو هالحياة بائسة و غير عادلة و مابعرف ليه عم نعيشها ؟
مرة كنت مع اخواتي لما كنا رايحين على التشيك ونحن راجعين و مبسوطين و اذ
اختي حكت جملة علقت بمخي لحد هلأ , حكت :
الحياة حلوة أحياناَ
ما تخيلت تطلع هالجملة من اختي الكبيرة الي بعتربها قدوتي و مثالي الاعلى
بالقوة الي انا فيها هلأ , لأن على قد ماني قوية هلأ على قد ما هي اقوى مني بمراحل
انا اليوم مبسوطة لأني كسرت رقم بالحديد
بتمرين ال bench press كرسي نايم ( بدون زاوية )
اليوم انسوا عضلات صدري بس ايدي قدرت تشيل وزن 10 كيلو الحمد الله
ما تتخيوا كيف قبل ب وزن 4 كيلو بس و لما اعمل هالتمرين كانت ايدي ترتجف من كتر ما كانت ضعيفة
اليوم انا مو بس حملت الوزن لا و سويت 15 عدة كاملة و صحيحة
ماتتخيلوا اديشني مبسوطة !
انا اساساَ كان المفروض من زمان اعمل load للوزن لان مابصير ضل ع نفس الوزن فترة طويلة
بس كنت خايفة من وزن 10 تخيلوا كيف كنت خايفة و اليوم لو ما كنت معصبة قلت خليها تخرب
و ما صدقت كيف حملتو
الحمد الله هاد بعد تقوية الجزء العلوي لمدة تصل الى سنتين الحمد الله بدت تبين النتائج
لو بيوم الايام قررت اني اتعلم على الة موسيقية بكل تأكيد رح اختار الالة الي ماعمرو حدا بفكر فيها
طبعاَ بعالمنا العربي مابعرف ليه بصراحة بس حسيتها كتير مظلومة يمكن لأن الموسيقى تبعنا ما
بكون فيها هالنوع من الموسيقى ؟ ممكن ليه لا
الالة هي الطبل او ال Drums
هي اكتر اكتر الة ملت عليها و بحسها كتير فيها قوة و فخامة و ايصال الشعور فيها كتير قوي
بسبب شدة الصوت فيها و كمان هالالة تعتبر صعبة و معقدة بالنسبة لباقي الالات بسبب انو
موجود كذا قطعة قدامك و لازم تدرب ع صوت كل واحد منهم , بكل مجموعة طبول لازم يكون
موجود فيها 5 قطع على الاقل 2 من الي بيعملو طشش هي الحديدة الصفرة و هالحديدة وحدة
تانية بتكون مسطحة و 3 انواع من الطبول منها واحد عند الرجل وواحد base
-
هالالة كتير عشقتها قبل ما فكر اني اتعلمها حبيتها من فرقة Avenged sevenfold و بالأخص
قبل ما يموت The Rev لأن كان حرفياَ فناان فيها ! كان يخلق حرفياَ فن رهييب يوصل المشاعر
بأعلى صوت , الايقاع كان رهيب , غصبن عنك بتهز راسك , و هاد غير حفلاتهم اللايف دائما
بكون عازف الطبول بجو تاااني , شالح التي شيرت و العرق من راسو لرجليه ( طبيعي لأن
اتضح ان عزف الطبول بيحرق سعرات ) و بيعمل حركات بالعصايتين Sticks شي خرافي
بربي !!
و هاد غير انو من اكبر فوائد عازف الطبول انو لما اي حدا بيعزف ع الطبل ما رح ينحط ع عازف
Base متل الجيتار الكهربائي , عازف الطبول واحد يعني فرصة انك تنشهر اكتر بأي فرقة لأنك
رح تكون اساسي اما الجيتار ف لو ما كنت موهوب كفاية انك تكون ال Lead guitarist ف رح تنحط
ك عازف قيتار Base , طبعاَ هاد لأني عازف الطبول رح يعزف البيز و الاساسي مع بعض مشان هيك
ما تعتبر سهلة , اما الجيتار مافينو يعزف اساسي و بيز ف لازم يكون في عازف بيز بالخلفية و عازف الاساسي
يدخل باللحن مع البيز ليكونوا لحن واحد و اذا الفرقة كبيرة عادي يكون في كذا عازف بيز طبعاَ هاد بكون
اللحن معقد اكتر
-
مالنا بالطويلة , طلع العزف عليها في منو صعب و منو سهل على حسب عدد الطبول الي قدامك
و على حسب اللحن الي اخترتو و على حسب كمان قوة ملاحظتك السمعية لما تسمع الحان فيها طبول
تعرف تفرق بين عدد الدقات و الوقت بينهم و هكذا و هالشي بيجي مع التدريب .
و ال Sets الجداد عم بكون فيهم خاصية انو نوصل صوت الدرمز على السماعات بالضبط نفس
نظام الجيتار الكهربائي و هالشي مشان ما نزعج الي حوالينا و نحن عم نعزف
( مع انو اجا ببالي سؤال انو اوكي الصوت العالي ما بيطلع لبرا بس ضربة الستيك على الطبل
مالا صوت ؟ )
-
من اكتر المعزوفات الي فيها عزف طبول كتيير حبيتو هدول رح حط كل غنية و من اي دقيقة لأي دقيقة
مشان تروحوا عليها و تسمعوها
هالغنية من افظع الاغاني الي سمعتها ! و قصدي بكلمة افظع قصدي فيها من الناحية الايجابية !
ما تتخيلوا اديش بترفع الاندرينالين بجسمي لما اسمعا ! عزف الطبول اقوى شي سمعتو بحياتي !
روحوا لدقيقة 3:07 و اسمعوا فن العزف على اصولو !!! شي بربي خيالي ! الي ما بحب الدرمز رح يحبو
من هالاغنية !!
اما هالأغنية عنجد من اكتر اللحان الرمز تعقيد اخد مني وقت لحتى احفظ ال Rhythm تبع الطبل
عم احكي بأول الأغنية اكيد
و هاد كفر للأغنية الأصلية طبعاَ هالعازف عزفا مزبوط مشالله عليه عنجد رهيب !
رحوا لمقطع 1:30 و شوفوا الفن على اصولو !
هالأغنية من الأغاني المحببة لقلبي بشكل ما بتتخيلوه !
هلأغنية سمعتني ياها رفيقتي اول مرة سنة 2011 و ما كنت بعرف بالفرقة
و عشقت الفرقة من ورا هالاغنية و لهلأ انا من ال Big fan لألها بسبب هالأغنية !!
اسمعوا اديشها بتشششل و عزفها رهيب و اللحن دمااار ! كيف بدا هااادي
و صار صاخب !!
هالأغنية مسسسسسسسستحيييل تقدم !!! هي من الأغاني القولدن الي كلما قدمت حلوت !!!
لحنها رهييييييييب ! فيه طاقة خرااافية ! ان كان من الطبل او من الجيتار او حتى من الغناء !
بإختصار هالأغنية كااااااااملة !!!
-
عنجد انو عالم الروك اند رول او عالم الميتل من اكتر العوالم مثيرة للإهتمام من كل النواحي
الكلمات , الألحان , العزف , الغناء و حتى نوعية المشاعر المراد توصيلها رهييبة بشكل !
من اكتر الاشياء الي اشتقتلها و للأسف مانها موجودة بالمانيا هي لعبة PIU AKA PUMP IT UP
لعبة المراهقة , من اكتر الالعاب الي تأثيرها بين عليي لحد الآن و قصدي بتأثيرها و هو شكل جسمي
لأنها لعبة رقص بتركز اكتر شي على الرجلين و بالأخص البطات , قويت رجلي بشكل خيالي حتى الي
بالجم مفكر اني بلعب بطات من كتر مانهم كبار مقارنة مع بطات البنات التانيين
" طبعاَ التزلج كمان كان الو دور بالموضوع بس قبل ما ادمن السكيت بديت بإدمانها قبلو "
-
اشتقتلها كتير و نفسي العبها , دورت عليها هون كتير , بعد بحث مطول اتضح انو هاللعبة و غيرها
من الألعاب الأركيد Arcade ممنوعة بالمانيا لأنها تعتبر " قمار " بالنسبة الهم ( بتدفع فلوس و بتلعب )
و لما تربح بتربح كوبونات و هالكوبونات بتشتري فيها جوائز , هن هيك شايفينها ( و انصدمت من هالتحليل )
و لأن القمار بدهم اعمار معينة " فوق السن القانوني " و هويات و تسجيل ببصمة و كل هاد و الهم
اماكن معينة محدا بيقدر يدخلها الا المصرحين لهم و اهم من هاد كلو انو عليها ضريبة زيادة عن
باقي الشغلات لأنها مضرة متل المشرب مثلاَ عليه ضريبة و الدخان كمان !
ف منعوها بكل المانيا و انا استغربت ليه بالمولات او بأي مكان مافي ولا مكان عندو العاب اركيد ؟
حتى مافي ولا مكان هون عندو محل بتلعب لتربح كوبونات , صدمة عمري هي
مع انو هاللعبة ما بتربحك كوبونات بس بتلعب ع حسب عدد الاغاني ؟
دورت ع اقرب مكان ممكن يكون فيها طلعت موجودة بهولندا , تخيلوا روح ع هولندا مشان العبها !
هلأ هون الدول الحدودية قريبة من بعضها بس الفكرة انو بدها تخطيط و لشو كل هاد
بس كتييييييييير مشتهية العبها انا كتير بتمسك بالشغلات الي اخدت من عمري لأني كنت
كتير مبسوطة فيها هاللعبة لعبتها ما يقارب 9 سنوات من 2008 لحد 2017 و كان عندي كتير
رفقات فيها , و كنا نعمل مغامرات حتى برا هاللعبة اذا بتحكولي شو اشتقتي بمرحلة المراهقة
اكيد مو المدرسة , كل سنوات المدرسة مع ناسها كانت كريهة , بس اشتقت للنشاطات الي كنت
اعملها و رفقة هالنشاطات , اشتقت لهبلي و طاقتي الايجابية و اندفاعي حتى لو كان سلبي
اشتقت للبسي الغبي ايام زمان , قال كنا نلبس " كول و حركات " و ايام الباندانا الي كنت اربطا
ع ركبتي ولا على ايام موضة الكوفة و قال لبست كف بإيد و ايد التانية مافيها كف قال يعني
هي حركات عنجد كان ايام من ذهب برغم غبائها ! , اشتقت اعمل عروض للمارة بهل اللعبة
كلما العب كان يجتمعوا ناس كتار يشوفوا لعبي و طبعاَ كان في غيري كتير بس انو بالنسبة
الي كان احساس تاني هاد غير كنت اخجل كتييير لما خلص لعب و التفت وراي و شوف امة الله
عم تتفرج و اعمل حال لا اسمع لا ارى لا اتكلم ,
كان في اشخاص ( و شباب هن بالضبط مو بنات ) كانوا امهر مني بسنوات ضوئية و كان لا بأس بس
ما شفت ولا بنت بنفس لعبي , وصلت لمرحلة من تقدمي باللعب اتحدى شباب و فوز عليهم ماعدا
كم من شخص الي ذكرت انهم امهر مني بزمااان كنت حرفياَ مدمنة هاللعبة , كنت كل ويكند بابا
يعطيني مصروف 400 درهم 200 منهم عبي فيها بطاقة الالعاب لحتى العب فيها و اللعبة كانت ايامها
بتكلف باول ايامها بالمول 3 دراهم بعدين لما شافوا زحمة عليها عملوها 4 دراهم و بكل سحبة كرت فيها بتعطيك
من 3 ل 4 اغاني حسب العلامة الي اخدتها
ف تخيلوا كمية المرات الي كنت العبها ب 200 درهم ؟ كان يخلص اليوم حرفياَ جسمي كلو عرق , حتى كل مرة
كنت انوي روح لهنيك ما حط ببالي حط ميكب لأني رح اعرق و هاد غير بتذكر و كنت انبسط لما اعمل هيك
كنت اشتري قناني مي من السوبرماركت تحت بالمول ( كانت بعيدة عن مكان اللعبة , اللعبة بالطابق الرابع و السوبر
بالطابق الارضي فكانوا اغلب اللاعبين يتعاجزوا ينزلوا لتحت ليشتروا مي و لأن المي من الكافيهات بالطابق الرابع غالية
ف كنت روح اشتري شي قنينتين مي كبار ووزعها ع العطشانين ليشربوا و كانوا يشربووا من كتر العطش و انا انبسسسط
كنت كتير معروفة هنيك حتى كلن كانوا ينادوني الاخت الكبيرة لأني كنت اكبر وحدة و كنت الوحيدة الي طلعت شهادة
السواقة اول وحدة منهم و تحولنا من المول الي بالشارقة لأنو اقرب شي عليهم من بيتهم لدبي مول لأن صار معي سيارة
و عنجد شو بدكم بالحكي ايام لا تٌنسى حرفياَ !
-
اعذروني لو كانت هالتدوينة كلها بصيغة ال " انا " بس اتضح انو لما اكتب بهل الصيغة كأني عم خاطب نفسي و ذكر
نفسي اني عشت ايام حلوة و انو ما لازم انساها , و انا عم اكتب هالتدوينة تحركت ذاكرتي حرفياَ و حاسة اني مبسوطة كتير
مع انو بعرف انها ايام مارح ترجع , صح ما رح ترجع بس هاد مو يعني انو مارح تجي ايام حلوة نفسها , لأن اقتنعت لكل مرحلة
.gif "at1 ق1")
.gif "At (208) ض0")
؟ ما انا كمان صغيرة !
.gif "At (209) ش2")
.png "ne (1) هه4")
و اليوم لو ما كنت معصبة قلت خليها تخرب .png "At (116) حز88")
.png "At (39) ش1")
.gif "At (138) ه1")
) و بيعمل حركات بالعصايتين Sticks شي خرافي .gif "At (136) ه2")
