.png "ne (6) ب11")
.png "ne (12) هي11")
و في برامج للابتوب زي الفوتوشوب و مدري و في تتوريال و شروحات في اليوتيوب و مدري 
اكيد في دورات و فيديوهات تساعدك و بالنسبة للفوتوشوب في ادوات تساعدك بالتصميم زي الفرش و الاشكال و التأثيرات و غيرهم لو احتجتي اطلبي مني اساعدك انا شخص فاضي 
.gif "at1 ق1")
! :.png "ne (1) هه4")
كنا نشحد المعلومة شحادة بس هلأ ما شاء الله
-
نصيحتي الي كنت رح اخدها قبل 10 سنوات من هلأ
لو حدا عطاني ياها , كنت اختصرت كتير تعب !
طبعاَ اذا حابة تتعلمي التصميم ( الصح ) مو مجرد صورة و عليها كتابة !
1- تعلمي اساسيات التصميم - لحتى تعرفي اساساَ شو هو التصميم ؟
2- تفهمي الالوان و كيف تنسقيهم مع بعض ( خديلك لفة على نظرية الالوان )
3- شو هن عناصر التصميم ؟ و مين فيهم الو قوة و تأثير أكتر و ليه لازم استخدمهم ؟
4- (1) تختاري فن تصميم مال قلبك عليه (2) تغذي بصرك بكتير تصاميم من هالنوع
لحتى يهيىء مخك مخيلتك أفكار خاصة فقط بهل النوع من الفن " لحتى تقدري تبتكري فكرة لتصميم "
بعض المواقع المشهورة لحتى تستلهمي منها أفكار :
1- https://www.deviantart.com
2- Behance
3- Pinterest
نصيحة : لا تخلي تصاميمك عشوائية , لأن هالشي رح يصعبلك كتير طريق البداية بتعلم التصميم
كبداية الأفضل انك تختاري نوع واحد من التصميم و متل ما حكيت بالنقطة رقم 4 هيك رح تحطي كل
تركيزك ع نوع واحد و لما تتقنيه روحي للنوع التاني و يفضل النوع يكون قريب من النوع الأول مثلا :
اول نوع تصميم اخترتو هو فن البليند Blend بعد ما اتقنت هالنوع بروح للنوع قريب منو و هو
Texture blend الفرق بين الاول و التاني انو الاول مو محصور بالخامات فقط ( ممكن تدمجي ستوكات )
اما التاني ف محصور بدمج الخامات فقط . تغير نوع التصميم بس كان النوع التاني قريب من الأول
مثال تاني :
اول نوع تعلمتو هو فن السكرابز بعد ما اتقنتو بروح للنوع الي بعدو و يكون قريب منو و هو فن الكولاج
نفس فكرة السكرابز بس بمود مختلف ( غيرت نوع التصميم بس ضلوا بنفس المود )
و هيك بتدرجي بأنواع التصميم
ليه عم نعمل هيك ؟
لأن كتير صعب كمصممة مبتدئة تتقني جميع أدوات الفوتو بالشكل الصح و بإحترافية
فبدال ما تشتتي جهدك بعدة أدوات الأفضل انك تركزيه على اداة او أداتين
اخد مني 3 سنوات لحتى ايدي اخدت ع الدمج و إستراتجيات المسح بالطريقة الصح
و حتى ايدي ما عادت تتشنج نفس اول محاولة
تخيلي لو انتي رح تركزي ع كل فن شو رح تعملي ؟ رح تفوتي بالحيط رسمي !
لأن في كتير اعدادات لا تعد و لا تحصى بالفوتو و لكل اعداد مختص بنوع معين
من التصميم ! ف الأفضل و هاد الي تعلمتو من خلال تجربتي بالحياة انو الواحد
بالبداية يختار نوع واحد يركز عليه لبين ما عقلو يتعود ع اعطاء افكار جديدة بمخيلة
خصبة ( و هالشي بيجي مع التدريب ) و ايديه تتعود ع استخدام البرنامج
انا هلأ بقدر اعمل تصاميم عمري ما عملتها من التجربة الاولى مو مشان انها سهلة
لا بالعكس ممكن تكون كتير صعبة بس لأن مخي و ايدي هن بأقوى حالاتهم
مخي بيعطيني افكار جديدة و بحلل المشاكل الي ممكن تواجهني بطريقة سلسلة
و ايدي بتعرف تستخدم البرنامج منيح
لتوصلي لهل المرحلة بدك تبلشي بتعلم اسلوب واحد فقط كبداية و بعدين بتقدري
تكتري مثلاَ بالاسبوع اسلوب بنهاية الشهر متعلمة 4 اساليب بس هي بتجي بعدين
ب كبداية خدي ككل وقتك بتعلم أول نوع تصميم لأن اد ما بتعطي وقت لتعلمك كلما
بتحصدي ثمار تعبك لما تبلشي تتعلمي نوع تصميم تاني
بالأخير التصميم نفس السلسلة , لما تنفقد حلقة منها بتنقطع !
5- تعرفي شو هي انواع التصميم , تسألي عن مسمياتهم لتتكونلك فكرة كاملة عن اي تصميم حابة انك تتعلميه
و تاخدي الاسم و تفتحي اليوتيوب او تسألي المصممين هون عن هالنوع من التصميم ليساعدوكي فيه
كتير مهم تعرفي اسم نوع التصميم الي حابة تتعلميه , ما بتخيل حدا يكون متقن شيء ما بيعرف شو اسمو ؟
6- يكون عندك ملحقات غنية و لحتى يكون عندك هيك ملحقات لازم تتعلمي مسمياتهم و كيف
تنزليهم من النت بطرق مجانية ؟ و الأفضل انك تتعلميهم باللغة الانجليزية , لأن العربي شبه انقرض
من محركات البحث الخاصة بالتصميم و نتائج البحث الانجليزية غنية اكتر + لا تنسي لما تنصبي
البرنامج يكون بالانجليزي , لأن اذا واجهتك اي مشكلة بالبرنامج ( تقنية ) او مثلاَ درس حابة تتعلميه
ف اكتر القنوات فائدة بتلاقيها عند الاجانب فلما يكون برنامجك عربي رح تلاقي صعوبة بتتبع الشرح
- حتى اغلب العرب الي عندهم قنوات يوتيوب برنامجهم بالانجليزي - و رح تواجهك نفس المشكلة
بعض من مسميات الملحقات المشهورة :
1- باترن - pattern - نمط
2- تكتسجر - texture - خامة
3- بكتجر - picture - صورة
4- جراديينت - gradient - تدرجات لونية
5- بسد كولور - psd color - ملف لوني ( بيجي بمعنى تأثير )
6- بسد - psd - ملف مفتوح
7- جرافيك بسد - graphic psd - أعمال المفتوحة من التصاميم
8- فونت - font - خط
9- براش - brush - فرشاة
10- بنق - png - صور مقصوصة
11- سكراب - scrub - صور مقصوصة
12- قيف - gif - صورة متحركة
13- ستايل - style - انماط للخط
14- ستوك - stock - صور للدمج
15- اوفر لاي تيكستجر - overlay texture - خامة تندمج فوق العمل ( بالعادة بتكون نجوم او لمعة او اضاءة )
و في منها بيجي كصورة متحركة و اسمها ( اوفرلاي قيف تيكستجر - overlay gif texture )
16- سواتش - Swatch - تدرجات لونية ( بالعادة بتنسحب الالوان من صورة و تعطيني تدرجاتها اللونية )
17- ريندر - Render - صورة مقصوصة و بالأخص بكونوا موديلز او شخصيات انمي
18- شيب - Shape - شكل
7- الخط الخط الخط , لازم تركزي ع الخط كتير كتير منيح قبل ما تطلعي مستوى أعلى بالتصميم
لأنو الخط بعلمونا ياه من اول ايامنا بالتصميم بس محدا بيحكيلنا اديش مهم هالعنصر ! و انو لولاه
لكان التصميم باهت حتى لو كان التصميم كامل دائما عنصر الخط بكملو لو كان بالطريقة الصحيحة َ!
بس قبل ما كنا نلاقي حدا يعلمنا اسس الخط بالطريقة الصحيحة ! و شو الممنوع و شو المسموح فيه بالتصميم !
بس هلأ انتشرت كتير فديوات و دروس تعليمية كيف فينا نستخدم هالعنصر بالطريقة الصح و بحكيلك قصة
يمكن ما تكون الها علاقة بموضوعنا التصميم بس بالاخير بالحياة كل شيء متصل
لما وصلت لمستوى B2 من اللغة الالمانية حكتلنا الاستاذة انو لازم نركز على الأفعال مع
الحروف الجر الخاصة فيها , متل ما بتعرفي انو اغلب الافعال باللغة الالمانية
الها حروف جر خاصة فيها تستخدم معها , و لتكوني مٌتقنة اللغة بالشكل الصح لازم تحفظيها
عن ظهر قلب بدون ما تسألي ليه هالحرف الجر مع انو التاني شكلو ازبط ! هي هيك اللغة
ف تخيلي انو الاستاذة حكتلنا انو في طلاب واصلين لمستوى C1 & C2 باللغة الالمانية
و هدول المستويات تعتبر يعني خلص متل ما تحكي انك ختمتي اللغة ! و حكت انو لسا في
طلاب بخربطوا بحروف الجر و في منن ما بيعرفوها !
تخيلي انو الموضوع اديش فيه تقليل من الطالب , متل ما تقولي واحد واصل جامعة
بس هو لسا مستواه الدراسي ثانوية عامة
مشان هيك هالشي انا حسيت فيه لما بلشت تصاميمي تتوهج بس الخط عندي كان مضروب
نفس ما تقولي تخرجت من نوع التصميم الي بحبو بس مستواي لساتو بالثانوية العامة !
و هالاحساس ما رح تحسي فيه الا لبعد ما اسلوبك يكتمل , بقى هون الاشياء الغير
مكتملة رح تكون واضحة وضوح الشمس !
مشان هيك بحكيلك لا تتجاهلي الخط و تخليه لبعدين , حاولي تطوريه بنفس مستوى
تطورك مع باقي العناصر لأنو صدقاَ مافي مصمم الا و عم يعاني منو مشان هيك
انا جايتك من بعدين بحكيلك الخط مهم مهم مهم
حاولي تبحثي عن أنواع الخط و كل نوع لشو بيستخدم بالتصميم ؟
اساسيات الخط ؟ كيف نلعب بالخط بطريقة بتخلي التصميم حلو
بالطريقتين الانجليزية و العربية
شو في برامج خارجية تستخدم للعب بالخط مثلا في برنامج مشهور
اسمو كيلك خاص بالكتابة العربية
ضلي اسألي و ضلي خلي عندك فضول تجاه التصميم
الفضول بخليكي تعرفي شغلات ماكان ممكن تعرفيها لو ما عندك ياه
هاد الي عندي حالياَ , حاولت فيدك قد ما اقدر و هالمعلومات حقها فلوس ع ايامي
لأن ما كان حدا يقدمها
المعلمين صاروا بكل مكان و انتشر التصميم بشكل خيالي ف صار سهل
كتير ع الجدد انهم يحترفوه بفترة قصيرة
المعلومات هي مو بس مشان تصممي ع صورة , هالمعلومات ممكن انك تعمليلك دخل مادي
بالمستقبل من التصميم اذا مشيتي عليهم
موفقة
