مدونة مميزة ☆~بين الواقع والخيال هناك أنا ~☆ (1 زائر)

[Dr.Saki~☆]

صباح الخير
اليوم حابة اكتب بس ما بعرف شو اكتب قريت مدونات الاعضاء مشان اخد فكرة و لقيت يارو

سابقًا كان الناس يحترمون الأشخاص الصالحين، إلي يأمرون بالمعروف وينهون عن المنكر
لكن ما أعرف شنو صار؟ حتى الناس بدأت تكره الإنسان المصلح!

يا عزيزتي دائما منحترم الأشخاص الصالحين بس بعض الناس يلي بيعملوا حالهم اصحاب تقى و وبيستخدموا الدين لمصالحهم الشخصية و لما تسمعي حكيهم بالدين بتقولي ما شاء الله عنهم و بتفكريهم قمة في الورع والتقى ولما تشوفي تصرفاتهم بتقولي استغفر الله و بيفتوا لنفسهم لمصالحهم

دائما بعض الشخصيات السيئة بتخرب عن الناس الكويسين مارح اعطي أمثلة عن الشيوخ المسيرين سياسياً لأن هدول ما بمثلوا الاسلام

بسبب هالشخصيات انا كرهت احضر حلقات الذكر بالمركز صرت حسه مركز نفاق مو ذكر و تحفيظ قرآن رح أعطيك مثال عن شيخ معروف بالمدينة وله اسم والكل يأمن فيه وبعدين اكتشفوا انه كان يسرق من أموال الزكاة

وإحدى المعلمات بحلقات الذكر و بنفس الوقت بتكون جارتنا طول وقتها بتنصحنا ان نقلل حكينا عن الآخرين و تحكيلنا عن الغيبة و النميمة و كل ما تجينا زيارة على البيت ما بتخلي جارة الا و بتحكي عليها ويلي متقاتلة مع اخوها و صرلهم متقاطعين 7 سنين ما بيحكو مع بعض و بمروا جنب بعض ما بسلموا على بعض و لما صار الها مصلحة مع اخوها صالحته و بنفس الوقت بتعمل فتنة بين رفقاتها هي كيف بدك تصدقي حكيها بالحلقة طيب ما نحكي عنها نشوف يلي بيحكوا عن اللبس و طولوا جواكيتكم و بنتها لابسة بلوز قصير

لو بدي احكي اكتر مارح خلص هو دائما شخص واحد سيئ بغطي عن مية صالحين للأسف و هدول الشخصيات هنن يلي بتضر الإسلام و بتشوه صورته

 

[Dr.Saki~☆]

مرحبا اكيد اشتقتوا لمدونتي الجميلة

عم نضف الغبرة المتراكمة بالمدونة لازم اشطفها بالمي بس الدنيا برد بكرا اذا الجو حلو بشطفها و بعزمكم على فنجان قهوة

كتير اشيا حابة احكي عنها بس متكاسلة و مو عارفة كيف ابدأ لقيت فعالية اسبوع منتهية رح ابدا فيها بركي بتتشجع وبرجع لنشاط مدونتي المتواضعه

فعالية الإسبوع

هل تذكر أول كتاب قرأته كـ مطالعة، باستثناء مناهجك الدراسية والقرآن الكريم ؟ حدثنا عنه..

أول كتاب قريته وانا صغيرة كان مو كتاب بل مجلة للأطفال وقتها كنت صف اول و عم اتعلم القراءة وكانت المجلة جديدة و عم يعملولها اعلانات كتير ف ماما جابتلي المجلة تشجيع انو صرت كبيرة و بعرف اقرأ 《ما كنت اقرأ كنت هجي تهجئة بس يعني بشجعوني 》المهم وانا انبسطت وفرحت و رحت فضيت درج بالمكتبة انو هاد الرف رح يصير الي و حط عليه الكتب و المجلات يلي بدي اقرأها

كان بالمجلة في قصص و الغاز و مقالات صغيرة وانا حسيت حالي وقتها صرت كبيرة و مسؤولية فصرت بالليل اقرأ من المجلة لأخواتي و كافئني بابا لما شافني عم اقرأ لآخواتي و صار يجيبلي كل نسخة بتنزل من المجلة بس لهلق بضحك لما اتذكر رد اختي الصغيرة لما بابا صار يمدح تصرفي قالتله بابا عدلنا القصة ما فهمنا منها شي غير كان يا ما كان والباقي عم تغني قصدها اني عم هجي الحروف ببطئ و مد الحرف كتير و لحنهم

 

[Dr.Saki~☆]

مساء الخير
طبعاً متل العادة يا بترك المدونة تغبر او بدبقها مرة وحدة

عنجد بوقت الازمات و المحن بتبين معادن الناس وبعد المصايب لازم الواحد يغربل الناس يلي حواليه و يكشف المحب من الكاره

الحمدالله على كل شي هاد من شهر تقريبا صار عنا حريق بالمطبخ نوعاً ما كبيير يعني اقل من نص المطبخ صار اسود واجت الإطفائية و التموا الجيران يعطيهم العافية هنن طفوا النار قبل ما تجي الاطفاء << قوات التدخل البطيئ

مارح قول ان اليوم مضي عادي بس وقفت الجيران و لهفتهم بتحسوها متل المرهم الجيران كانوا كأن البيت الهم من خوفهم يعني صاروا يركضوا يجيبوا سطول مي يطفوا النار ولما اجا الاطفاء طلعنا قعدنا عند الجارة و يقولولها لماما خلص نحنا موجودين خلص مافي داعي تضلي واقفة هون والمطبخ طاف من كتر المي يلي رشتها الاطفاء ضلوا الجيران لنشفوا المطبخ و شالولنا السيراميك يلي وقع و في قطع كهربا دابت جمعولنا ياها و صار عنا تماس بالكهربا دقو على 3 مصلحين ما اجوا لأنهم مربوطين بورشات تانية فظبطوها اي كلام لحالهم و فوق هيك اكلين هم بابا و يقلولنا لا تخبروه لتتصلح الكهربا مشان ما تشغلوا باله وهو بعيد و من الصبح بكير ع 7 اجت جارتنا مع انه هنن ما بفيقوا للظهر بالعادة مشان تقلنا نطلع لعندها لأن جوزها رايح يجيب كهربجي

شفتوا كل اللهفة يلي من الجيران يلي هنن غرب يعني قصدي مو قرايبين هلق رح احكيلكم عكسها من القرايبين

اقرب حدا لألنا لهلق ما اجا ولا شافنا دقلنا حكى معنا مكالمة و بس مرته اجت تطمن علينا بالعقل مرته بدها تكون معنا بين الرجال ولا هو؟ مرته بدها تجيب مصلح يعني؟ يلي كان المفروض يعمله هو الجيران عملوه و كفو وفو لاء مو بس هيك مرته جاية نوع من الشماتة عدراسة اختي الصغيرة على ليش ما جمعت مجموع كويس بالبكالوريا و ليش هيك سجلتولها بالجامعة واله مستقبل و ما اله مستقبل وليش مو متل خواتها و من هالحكي يعني مقتتنا يا ريتها ما اجت وفي قريبنا واحد تاني عم يحكي مع بابا عن الحريق يلي صار فسأله انو شو راح من المطبخ فبابا حكاله بتعرفوا شو رد عليه هداك بكل شناعة قله انت عندك بلاطة مو مشكلة بدال ما يقله الحمدالله على سلامة العيلة بالمال ولا الارواح لك يضل ساكت احسن شو هالجواب هاد (عندك بلاطة يعني معك فلوس هدول اهل زمان كانوا يخبوا المصاري تحت البلاط و مشيت الكلمة لهلق )

يعني مو كل واحد بيقربك بالدم و من الارحام تتوقع منه الخير و المحبة دائما و مقولة الاقارب عقارب ما طلعت كذب و عنجد اشتري الجار قبل الدار نحنا لهلق ما ننسالهم للجيران يلي عملوه و وقفتهم معنا

بالاخير تقديرات ربنا رحمة عنجد الحمدالله ان محد صابه شي او تأذى هو بس نقطتين صغار ع ايد ماما و المطبخ يلي شاف النار و الدخان بفكر انه فحم بس لا الحمدالله مو لهدرجة و نحنا عم ننضف الشحوار و نمسح الخزن السليمة كل شوي نشوف شي نقول الحمدالله ما وصله النار يعني جنب الغاز كان في خزانة فيها قناني زيت طبخ الحمدالله ما وصلتلها النار ولا كان هبت اكتر في بالمطبخ تحت المجلى كان موجود قنينة صغيرة فيها كاز الحمدالله ما صرلها شي بالوقت نفسه ان في قطع برا المطبخ دابت فالحمدالله على كل شي صار و لهلق نحنا مقتنعين انو في حكمة و خير من يلي صار

اهم شي الواحد يحمد الله على كلشي و الضراء قبل السراء و يرضى بالقضاء و القدر لا يقعد يربط و يندب و ياريتني عملت كذا لأن كلشي مقدر و مكتوب
حسيت حالي عم طالعلكم الحكمة من القصة بالاخير دائما بعد ما احكي الموقف بختمه بحكمة من القصة راجعوا كل تدويناتي نفس الحركة

بعد المقت والحزن يلي فوق رح قلكم موقف حلو لازم شخصن فيه معكم و شوف حالي لأن انتو الوحيدين ما دريتوه يمكن هاد يا سادة يا كرام لما اجت الاطفاء نحنا رحنا قعدنا عند الجارة بس انا و اختي ما رحنا وقفنا عالدرج من فوق يعني نحنا شايفين الداخل و الطالع من بيتنا نراقبهم من فوق فهنن طلبونا مرتين مرة كان بدهم يانا نفتحلهم الباب التاني و مرة كان بدهم بطاقة الهوية فأنا وقت الباب من عالدرج من فوق قلتلهم كيف يفتحوه ليش لأنزل بين الرجال افتحلهم ياه جارتنا حكتلنا شو قللها زوجها عن الموقف قللها البنت من عالدرج بصوت واثقة و بقوة ولا كأنهم متأثرين بيلي صاير قالتله للاطفائي كيف يفتح الباب و لما طلبوا الهوية كان الرجال واقفين عالباب بدها تدخل تجيبه وصلت عالباب ما خافت او ترددت و بنفس النبرة اعطوني طريق لجبلكم الهوية و لما دخلت البيت فوراً اختها دخلت وراها ما تركتها حتى التانية (قصده عن اختي ) ما عطت المفتاح البيت لحدا بايدها فتحت و بايدها سكرت لو عندهم شب ما رح يطلع متلهم طبعا اكيد خليت ماما تحكي هالسيرة للكل وانا اقعد شخصن وآخر شي ضحككم فيه بعد الحريق بكم يوم ماما راحت تجيب غراض من محل جنبنا فاتح جديد عنده ولد صغير بوصل الغراض فماما عم تدله عالبيت راح الولد صافن و قللها عرفته عرفته مو هاد البيت يلي احترق ماما اطلعت فيه نظرة استغراب ان بيتنا صار نقطة علام البيت يلي احترق

​

 

[Dr.Saki~☆]

في عندكم هذا النوع من الناس حواليكم ولا انا بس اللي متحسسة زيادة من الموضوع ؟

مساء الخير
طبعاً عندنا نفسه اصلا مستحيل ما يكون بحياتنا هيك شخص

هاد الشخص بيقربنا بس من بعيد و بيسأل عن كل شاردة و واردة بتصير واذا سألتيه بصير بمغمغ بالحكي واذا عرف بأي معلومة بقول ليش ما قلتولي . لحد ما طفشنا منه صار لما يسألنا نتعامل نفس ما يعاملنا مثلا مرة سألناه عن أولاده بالسويد صار يقول والله الجو برد بالسويد و صار يحكي عن اجواء السويد و لا كأن سألناه عن اولاده و صرنا نعمل متله يحكينا يمين نرد عليه شمال و محد بيعرف عنه خبر كلشي مخبى تخيلي خطب لابنه و اخواته ما بيعرفوا وفوق هيك لما يعرف أي خبر لازم ينقله للكرة الارضية كلها

المهم بالأخير الحل ان صرنا نتعامل معه نفس معاملته كل ما شفناه نكتر أسئلة لحد ما يطفش و اذا عرفنا خبر عنه ندقله نقله ليش ما قلتلنا و هلق بطل يحشر انفه بحياتنا بيستاهل و بنصحك تتعاملي مع هالناس بنفس اسلوبهم لأنهم ما بيحترموا خصوصية العالم وان كل واحد بحقله يحتفظ بأخباره فنحن ما منحترم خصوصيته