الختم الذهبي برنامج زرعاتنا و شتلاتنا - 1 - نبتة الكركديه (1 زائر)

[S a n d r a]

نورت القسم يا مبدعة ~
إيفا 22/07/2024

مرحبا يا ايها السيدات و السادة !!
اهلا و سهلا فيكم بهالمسا الحلو المنور بعبق طلتكم الحلوة علينا و بجلوسكم قدام الشاشة لتتابعونا !!
, بنتشرف بهاد اليوم انه نعرضلكم إنطلاقة اولى برامج قناتنا الفضائية " قعداتنا "
و هو برناااممج " زرعاتنا و شتلاتنا "
و هاد البرنامج حيتناول مواضيع كثيرة متعلقة بالنباتات اللي بنزرعهم عادة ببيوتنا و بحدائقنا
و برضه بنتعرف على انواع نباتات غريبة و عجيبة من حول العالم !
رح تقدملكم هاد البرنامج المذيعة فادية - أنا -
و رح كون كثيير مبسوطة اني استضيف في كل حلقة ان شاء الله اخصائي أعشاب او مختص بالشؤون النباتية !
اللي ممكن نستفيد منهم خلال برنامجنا هاد !

و عشان ما نطول عليكم ! بسم الله و على بركة الله نبدأ اول حلقة من البرنامج بعنواااااان

" نبتة الكركديه "

أولًا و قبل شي بدنا نشكر راعي هالحلقة و اللي هي شركة LORIZINA للشوكولاة و الحلاوة
و اللي قدمتلنا اليوم تشكيلة كثثثييير لطيفة من الشوكولا و الحلويات .

و أكيد أكييييد بنتشرف بهاللحظة بإننا نستقبل السيدة صبحية أم صبحي
مختصة بنبتة الكركديه و عندها مزرعة منزلية زارعة فيها أنواااع كتير من الكركديه
بتحب هاي النبتة كثير و بتعمل منها كثير شغلات زي العصائر و مسحوق الكركديه اللي بيستخدموه للحنا برضه !

فادية : مسا الخير ست صبحية , كثير مبسوطة بشوفتك اليوم و بقبولك لهاي الاستضافة
صبحية : أهلًا
تعرقت - شبكت ايديها - احم, بالحقيقة كنت متحمسة كثير اني ادخل معاكي بمواضيع كثيرة بخصوص نبتة الكركديه
زي فوائدها و اضرارها و استخداماتها ..
- طيب
- رمشة - رمشة -
فادية : اوكيه عشان ندخل بالحلقة بسرعة
, نبدأ بأول فقرة لليوم ! و هي فقرة التعريف بالنبتة مع المذيعة لؤلؤ

- ايش استنوا الكاميرا علي مباشرة ؟؟ لسا مزبطتش المكياج !
همس - الكاميرا شغالة -

اححممم ,,, أهلييييييين متابعينا الكرام ! بشكر فادية على تحويل الشاشة - الله يخزي عدوينك يا فادية -
و هلأ رح نبدا معكم بالتعريف عن نبتة الكركديه :

طيب هلأ نبتة الكركديه هي نبتة مزهرة ثنائية الفلقة من جنس الخطمي بتنتمي للنباتات الخبازية و هي نباتات وعائية حقيقية النوى
- مش هييييكككك احكي شوي شوي , لا فهمنا ولا حرف -
ماشي ماشي ! يا الله ! ما انكدكم خليني اكمل طيب !

هلأ بفهمكم كلشي اصبروا علي , ..
شو يعني نبتة مزهرة ؟
النبتة المزهرة هي : هي نباتات يطلق عليها ايضًا اسم كاسيات البذور
و تعني كاسيات البذور هاي انهم نباتات بذورها مغطاية , يعني اما بكونوا جوا الفاكهة
زي : الدراق و المشمش و التفاح
و كلهم نباتات زهرية يعني قبل الثمرة بتطلعلنا زهرة حلوة هيك بتفرق من ثمرة لغيرها.
أو بكونوا جوا المبيض تبع الزهرة زي اللقاح يعني .

و برضه هالنبتات الزهرية - معهم الكركديه اللي حنشرح عن شكلها كمان شوي - بتنتمي للنباتات الوعائية , و ايش يعني وعائية اكييييد هلأ رح احكيلكم ولو !
النبتات الوعائية هي نباتات بيتشبه نظامها بالنظام الدموي تبع الانسان و الحيوان , ليه يا ترى ؟
لانها انظمة زي الانابيب اللي بتربط اجزاء النبات ببعضها
فبتنقل هالنبتة غذاءها و مياتها و حبشتكناتها عبر انظمة معينة
لتوصل للساق و الورق و الجذور و إلى آخره .
و هاي الانظمة بتنقسم ل :
- خشب
- لحاء

و هاي معلومات بسيطة بدكم زيادة بحلقة تانية

هلأ نرجع لتعريف النباتات الزهرية : هالفئة من النباتات بتشكل غالبية النباتات اللي بتوجد على هالكرة الأرضية ...
بتتكون اجزاءها كأي نبتة طبيعية من جذر , ساق , أوراق و بالإضافة هالمرة للزهور .

تعو معي لنعرف هاي المرة ثنائية الفلقة , ايش يعني ثنائبة الفلقة ؟؟
جوابنا : انه النباتات ذات الفلقتين هي النباتات اللي بذورها بتكون من نصين بتنبت النبتة منهم و بكون الها مميزات ,
-
زي : { شكل الورقة بكون مبسوط و عريض ,
و عروقها بكونوا زي الشبكة متفرعين مش زي وراق الذرة مثلا بتكون الورقة طويلة و نحيفة و عروقها متوازية ,
برضه الاوعية جوا السواق تبع نبات الفلقتين
بتكون مرتبة و حلقية يعني صفوف قدام بعض و على شكل حلقة ,
و زيما حكينا بذرتها نصين زي التفاح و البرتقال و الحمص و الفاصولية ,
و آخر شي زهور نبات الفلقتين بكون عدد بتلاته من مضاعفات الأربعة }

هلا بدنا نعرفلكم شو هو جنس الخطمي : هو نوع من أنواع النباتات ,
بينمو لارتفاعات طويلة , شي مثلا متر متر نص مترين , بيتفتح هالنبات عادة بفصل الصيف ,
و بكون لهالنبات ألوان مختلفة زي الابيض و الوردي و الاصفر و الاحمر .

أما فصيلة النباتات الخبازية , بالمختصر هي احدى فصائل النباتات
و فيها 200 جنس و اكثر من 2300 نوع , من هالانواع القطن , الخبيزة , البامية , و الكركديه .

باقي بس نحكيلكم شو يعني حقيقية نوى : هي انوية تحتوي على حمض نووي داخلها و محاطة بغلاف نووي ,
اذا بدنا نفصّل أكثر فهي بتحتوي على عضيات الخلية المعروفة زي : الميتوكندريا , جهاز غولجي , البلاستيدات الخضراء , الشبكة الاندبولازمية ..

نرجع هلا للكركديه - و أخييييرًا -
فهو نبات اله زهرة كبيرة شبه البوق , و بتلاتها لونها هيك بدرجات الأحمر بس باين لونا احمر
و ممكن تروح للون الوردي الاحمر يعني لون مختلط , اله كتيييير استخدامات طبية بالعلاج الطبيعي .

نرجع لفادية ...

شكرًا الك لؤلؤ استمتعنا كثييير بالفقرة , هسا بدنا نرجع نحوّل الكاميرا على السيدة صبحية أم صبحي عشان نكمل موضوعنا عن فوائد و أضرار الكركديه
... بصير نبدا يا خالتو ؟
- أكبد
-
- طيب ممكن تحكيلنا عن فوائد نبتة الكركديه لو سمحتي ؟ و بتمنى انك تاخدي راحتك بالكلام .
- تضبط الورقة و القلم -

- كح كح - بالحقيقة يعني يبنيتي , الكركديه اله أظرار تشثيرة زي ما اله فوايد تشثيرة ,
تشنت حابة ابدى بالأظرار عشان لما انطيكوا الفوايد تركزوا فيها .. بس معليش ببدا هسا بالفوايد , اول اول اشي.. و بما اني قبل التقاعد تشنت اساعد دكتور في التغذية الله يسهل أمره , فعندي معلومات بتفيدكم.

اولًا : انه بحافظ على صحة الكبد , يعني بيشيل السموم بالكبد
و بقلل من مخاطر الاصابة بتليف الكبد و مرظ الكبد الدهني .

ثانيًا يبنيتي : بيخفظ ظغط الدم , و بما انه بيخفظ الظغُط
فهو رح يساعد على تقليل الاصابة بالجلطات و السكتات الدماغية .

ثالثًا : سمعت مرة من ابني اللي كان يقرا بمجلة علمية
انه الكركديه يعتبر مصدر من مصادر ايش بقولوا عنها خليني اتذكر
, اللهم صلِّ على سيدنا محمد آه , هو مصدر من مصادر مظادات الأكسدة ..
قرالي انه بقوّي المناعة , بيحمي من التهاب المفاصل و العظام , و انكتب كمان انه ممكن
يساعد في الوقاية من السرطانات , و كان في مرض بالعقل برضه الختايرة مثلنا بينصابوا فيه , ايش كان اسمه ؟
- زهايمر؟
- عين الله عليج , زهايمر , و أمراظ القلب كمان .
- حلو و ايش فيه كمان فوائد خالتو ؟
- غني بفيتامينات , أكثرها فيتامين ج , يعني C .. فهو قريب من الليمون و البرتقال
يعتبر مظاد طبيعي للانفلونزا و الرشح و غيره .. في برضه من يحتشي انه يقلل من الوزن
قيل انها دراسة يعني , بس مالي في الموظوع تشثير , يعني اقصُد تخفيف الوزن .
- طيب حلو كثير خالتو , شكرًا الك عالمعلومات الوفيرة هاي , ممكن تحكيلنا هسا عن الأضرار ؟
- طبعًا

- أكيد مهما كان الاشي له فوايد الا انه يكون فيه اظرار ,
و لما نحتشي و نسولف عن الكركديه فهو زي أي شراب اذا كثرنا منه راح يظرنا اكثر من ما راح يفيدنا ..
فزيما بنعرف الاشي اذا زاد عن حده , بينقلب ظده .. هسع نرجع لموظوع الاظرار و على الرغم من انها مش شايعة انها تصير .. فالكركديه ممكن يسبب التهاب بالجلد ,
الصداع , غثيان , ممكن يسبب اظطراب بالمعدة , غازات في القولون , إمساك لا سمح الله
الم اثناء التبول .. و هي مثل ما قلتلك مش تشثيرة و مش شايعة .

- ممتاز , شكرًا خالتو فدتينا كثيييير بهالفقرة , استمتعنا بسماع كل هالفوائد
و بتعرفنا على الاضرار كمان .
- اهلين .

--

 

[S a n d r a]

-

و هييييكككك انتهت حلقتنا لليوم , معلش كانت صغيرة و خفيفة المرات الجاية بنعطيكم معلومات ادسم !
كانت معكم فادية و المذيعة لؤلؤ !
نرااااكككممم في حلقات قادمةة !!




---

كان في عندي فقرة عصير بمطبخ البرنامج بس مزبطتش اسويلكم اليوم و اصور التحضير فخليها لمرة جاية و بعمللكم تحديث في الموضوع نفسه
شكرًا على حسن قراءتكم ! كانت معكم ساندرا حامية حمى البشرية !
دمتم في آمان الله !! ​

 

[S a n d r a]

- نسيت أشكر المصممة المبدعة @A I D A N اللي صممتلي هالطقم الرهيب !!
الله يعطيكي الف عافية حبيبتي -​