مدونة فخمة Noor dairy ♡ (1 زائر)

[Deniz]

-

خلال السنة الماضية وهاي السنة أدركت تغييرات كبيرة حصلت فيني خصوصي بعد الفقد
كنت قبل أهتم بدراستي كثير وأحلامي وأخطط لها , حتى في مرحلة التوجيهي صديقاتي استغربوا اني عم كنت أخطط وأنا في بداية التوجيهي وقلتلهم كثير مهم
بس بعد ما خلصت توجيهي وخصوصي بعد ما فقدت والدي ربي يرحمه ويغفر له ازداد انتباهي على أحلامي ودراستي أكثر بكثير
صرت حس فيني طاقة أكافح وأكابر وأغامر بدول أو دولة جديدة كرمال مستقبلي , وانو ضحي باللي قدامي بس عشان أكمل
وغير عن دراستي , صرت حس نفسي شخصية صعبة الفهم أو التقرب منها بزيادة , وفيها عمق ونضج أكبر بكثير عن أي سنة مضت
وهاد الشيء لما تعمقت فيه كيف بكون الأثر لما يتوفى الأب بالنسبة للبنت بتصير تغييرات وبتصير شخصية البنت أصعب وأركز بكثيير وهالشي مو غلط بشكل كلي
لأنو مرات بمنعها توقع في مشاكل وقصص هي بغنى عنها , بس يعني الحمد لله رغم كل هالتغييرات ضليت طيبة وأحب وأتمنى الخير ما أثر بشكل سلبي علي يعني صار فيه انغلاق بس على نفسي وهالشي رد دفاعي من ناحية نفسية
لأنو العقل بختار 2 ألية حسب الشخص أما بتقرب بكثير وبتعلق وأما بصير ينغلق وما يتعمق , ويتعلق في الشخص وأنا من النوع الثاني
ما أدركت عمق هالتغييرات الا لما مضت أشهر وما فيني أفكه بسهولة لأنو العقل تبرمج من لما فقدت على هالطريقة
وبحسها مريحة رغم انها تغلبني مرات , بس ممتنة للنضج والعمق والتفكير اللي وصلت له رغم أغلبه تفكير زائد
كتبت هاي التدوينة لاني حسيت فخورة انها بقت شخصيتي كويسة رغم هالتغييرات
دمتم بخير وبأمان الله
​

 

[Deniz]

-
تنتابني مشاعر الحنين وبالتحديد الحنين للناس اللي يكونوا في عمر والدي المتوفي رحمه الله
ألاقي نفسي وسط يومي الطبيعي أسرح وأتامل بدون قصد لانه يرجعني لأيام كان فيها خير وحنية وضحك وان كانت بسيطة
يجيني حنين واشتياق للناس اللي في مثل عمره ونفس الملامح , وبكونوا نفس التجاعيد ولما دايما بشوفهم بشتغلوا وتعبانين بدعي من كل قلبي ربي يعطيهم على تعبهم وانهم بكافحوا عشان أولادهم مهما كانت الظروف
وبكون بدعي دايما ربي يحفظهم لأولادهم وما يجربوا أولادهم شعور الفقد والفراغ وكل الأحاسيس السيئة اللي يمر فيها الواحد بعد هاي التجربة والتغيرات , لأني جربت ف ما بحب غيري يجرب نهائي
وكثير أدركت هالشعور بضل موجود والحنين وما بختفي ولا بقدر الواحد يعتاد عليه زي ما الناس بتقول في العادة , بالعكس بكبر كلما الواحد كبر
ومهما تجمع ناس حواليه الشخص بضل يحس في شي ناقص مو لأنه ما ممنون بالعكس بكون ممنون للناس الحلوة بس بضل مفتقد شخص كان مخلي الحياة أسهل وأحلى بوجوده
بس الحمد لله عم دايما أحاول أحول طاقة الحنين والاشتياق ولو كانت حزن كبير او غصة لدعاء أو تبرع أو أي شيء عن روح والدي
بحس بطريقة ما يخفف عني ثقل الأيام اللي أمر فيها ويخفف عني أي ضيق أمر فيه
حتى كثير كويس الواحد يضل يخلي الناس تدعي له لأنه يرفع مكانته في الجنة
ما أدري ليه كتبت هالتدوينة بس طلعت فيها أحساس كان مرافقني من شهور وبنفس الوقت حبيت أفيد لو أحد له شخص متوفي يقدر يتبرع أو يدعي له بكثرة
أو يخلي الناس تدعي له ترفع مكانته بالجنة بدل الحزن الدائم والغصة
دمتم بخير وبأمان الله


​

 

[Deniz]

لما شفت هاللقطة وأنا أشاهده استوقفتني
لأنها البطلة استرجعت ذكرياتها مع والدها المتوفي لما شافت بس مشهد بسيط أب مع بنته
ذكرني بنفسي كلما أكون أمشي أو أي شيء وأشوف أي مشهد ولو كان بسيط أجلس أتأمل والحنين والشوق يجتاحني
حتى مزاجي أو نفسيتي ممكن تنقلب بيوم لأنها بس تيجيني لحظة ادراك كل هاللحظات والمراحل في حياتي راح تمر بدونه وبدون وجوده
أنا لم أستقبل أبي في بيتي
ولم أذهب إليه حين يحزنني الزمن
لقد هجرني مبكراً جداً
رحم الله أبي وأسكنه فسيح جناته وغفر له ​

 

[Deniz]

-
اللهم امين

https://x.com/i/web/status/1561059767870791688

https://x.com/i/web/status/1787852972484878747

 

[Deniz]

-
اللهم امين

https://x.com/i/web/status/1030309866727002112

https://x.com/i/web/status/1358211211834368001

https://x.com/i/web/status/1788130291938111546

​

 

[Deniz]

-
استوقفتني هاي التغريدة وفعلا جدا أشكر والدي المتوفي لأنه كان داعم لي سواء بشكل مادي أو معنوي خصوصي بشكل معنوي
لأني كلما بضعف أو بستسلم بتذكر كيف كان يحرص على تعليمنا أنا وأخواني هو وأمي ولما أساعده في أي شيء كان يقول لي بشوفك ممرضة أو في مجال طبي لأنك تحبي تساعدي الناس وفيك رحمة
كان داعم بشكل جميل , ووقت التوجيهي كان أحن علي نفسي حتى في مرة جبت علامة ما كنت متوقعتها بمادة درستلها كثير وكنت ببكي ومنهارة ووقتها طبطب علي وحكالي بالنهايات بتزبطي مش معيار بداية التوجيهي المهم النهاية ووقتها حسيت الموضوع أخف بكثير
حتى كان حريص ندرس كلنا هو وأمي ويشجعنا لو اخترنا طريق غير الهندسة والطب , وكان يشجع ولو شيء صغير يعطي رأيه وجد يكون شايف فيني وفي أخواني مستقبل
كان يحب التعليم ونتعلم , وكان يشوف التعليم مهم خصوصي للبنات لو شو ما جابت المهم تدرس وتصير , بستمد اني أضل قوية من ربنا وامي وهم , وأبوي لأنه كافح لحتى عاش وعمل مستقبل له
دايما بشكره من كل قلبي لأنه ما قص جناحي وعلمني أطير وأكون على قد نفسي وشطورة ودعمني بكل طاقته , وبكل ما فيه دعم وأعطى وهالفضل راح أضل متذكرته لو قد ما صار عمري
ربي يرحمه ويغفر له ويسكنه فسيح جناته

https://x.com/i/web/status/1231523000450715649

دمتم بخير وبأمان الله ​

 

[Deniz]

-
من فترة وانا قاعدة بفكر كثير بتخطر عبالي أفكار لأني بكون بفكر بمليون شي بنفس الدقيقة لأني انسانة عندها over thinking
كنت بفكر شو حابة أعمل للمستقبل لأنو بحس العمر بمضي والواحد لازم يجهز أو يخطط لأشياء حابب يعملها
كنت بفكر ان شاء الله بجانب مهنتي وشهادتي الجامعية بس أنهي منها بالمستقبل ان شاء الله يكون لي معرض تصوير أو صور يعني صور أصورها من نفسي وبكاميرتي
وأنشرها على موقع صور الكتروني لأني من الناس اللي تعشق التصوير وتوثيق السماء وغيره بس لما أنطفي أو أفقد الشغف ما أعود الصور
وبرضو حابة أتعلم الرسم والتلوين الرسومات بحسها هواية ممتعة خصوصي لما تكون انسان كتوم وتيجي أشهر وأيام ما تقدر تفضفض بتحس هالألوان والرسومات قادرة تعبر عنك , وصير أنشرها وما بتفرق في منها دخل مالي لو لا هيك لتطوير موهبتي وأغير جو عن المهنة والحياة الروتينية المعتادة
حابة أتعلم الفنون القتالية , سبق وقلت اني بعشق kick boxing وغيرها من الفنون القتالية بحسها بتعطي قوة ولياقة , ومهمة خصوصي للبنت
وبرضو حابة أكون أكتب روايات لأني جد بحب هالشي ومن صغري كنا أنا وأختي نحب نكتب روايات , الكتابة جدا مهمة وتخلي الانسان فصيح وتنمي موهبته ولغته , وتفيد الكتومين لأنهم ما بعبروا بالحكي بعبروا بالكتابة , حلو الواحد يكون كاتب مشهور بجانب مهنته العادية
كثير بحب الطموح والهوايات بعشق شي اسمه أسافر وأغير وأشوف الحياة , واني ما ضل على نفس الشي ضل أجرب وأتطور وأغير جو
ما بحب أنطفي ولا أفقد شغفي حتى دايما بدعي انو ربنا ما يبتليني اني أنطفي أو أفقد شغفي لأنو جربت هالشغلة وكثير كانت صعبة علي وبدعي للناس نفس الشي كمان
لأنو ما أحلى الانسان يعيش ويجرب ويكون مشمس ولو بأبسط الشغلات مو شرط هوايات وأشياء كبيرة وصعبة عليه
لو كانت مجرد كروشيه ولا خياطه كويس جدا , المهم ما يضل بدون شغف وروح للحياة وطبعا الناس نفسيات وتجارب وظروف مو الكل يقدر يحب يغير ويجرب ويغامر
حبيت أحكي عن أحلامي وطموحاتي
دمتم بخير وبأمان الله
​