نتعاطى الخيال عندما يخذلنا الواقع (2 زائر)

[MADNESS]

احم احم .. وقررت اسوي مدونة جديدة غير عن الاولى الكئيبة
بثيم شخصيتي الرهيبة الي ماتوقعت اني اعشقها قد كذا غوجو سينسي
بداية احب اكتب نبذه بسيطه عني انا انسانه تعشق 3 اشياء بالحياة ( الاكل - التصميم - الانمي )
عمري بداية الزهور > بمعنى عجزت وصرت ثلاثينيه جادة
اعشق اللون الموف من عمري 15 وهو لوني المفضل واكثر شي احبه بعد اهلي هم صحباتي
الحمدلله يارب ان ربي رزقني هالنعمه الحلوه عندي صحبات من كل مراحل عمري وللان معاي
اشوفهم كنزي الثمين لان وخصوصا بالوقت الحالي نادر نلقى ناس قلوبهم نظيفه وصافيه
و يدخلون من ضمنهم صديقاتي الالكترونيات عندي كثير وماشاء الله صداقتي فيهم حيل قويه
لدرجه ان عندي صديقه من 2010 وهي معاي وللان تعرفني اكثر من نفسي واكثر من اهلي
بداية دخولي لعالم المنتديات كان تقريبا عام 2008 يمكن كان عمري 14 تقريبا اخ بس ياحلوها من ذكريات
اتوقع ذاك الوقت ما خليت منتدى ما سجلت فيه لو احكي بس عن تجربتي بالمنتديات
ماراح تكفي الصفحات لذلك خليها بذكرياتي الجميله احتفظ فيها لنفسي
و احب الضحك والفرفشه والايجابيه > رغم اني مليانه حلطمه وقلق
الناس البسيطه العفويه الي لهم ابتسامه مريحه هذول يجذبوني لا اراديا والله يكثرهم بحياتي
احب التصميم عشقي الذي لاينتهي بدايتي فيه من 2009 لكن مستواي ضعيف للاسف
بسبب كنت اقطع كثير جدا وماكنت امارس ولا اتعلم دروس جديده ولا طورت نفسي
ولكن الان رجعت وبقوه وحبدأ من اول وجديد لان ناويه باذن الله احوله لرزق ودخل لي بالمستقبل
وهو يعتبر سبب من اسباب رجوعي للمنتدى + الحنين الي بداخلي لهذي الاماكن

My Story With Anime Toon
قصتي مع انمي تون كانت من بداية المنتدى القديم الي تقفل
اذكر وقتها اول ما تقفل سوو هالمنتدى بداله وتجمعو اغلب التونين فيه
ومره انبسطنا اول ما فتح لان لقينا مكان يلمنا بدل ما كنا تشردنا
فشكرا بحجم الكون لصاحب هالمكان الحلو الي جمعنا
اذكر التون القديم كنت دوبي اتفاعل فيه واصير نشيطه
فجاه تقفل حسيت بالنحس وقتها استغفر الله بس صدق حيل زعلت
ولكن هذي سنه الحياه اصلا زمن المنتديات جالس ينقرض
ماعلينا خلونا الحين بالوقت الحالي نصنع ذكريات جميله قد ما نقدر




​

الى هنا واصل لنهاية التدوينة الاولى ان شاء الله مع الوقت تتعرفو علي اكثر
وتحبوني واصير مشهوره وتشوفون لوني احمر بعد > امزح​

​

 

[MADNESS]

متى دخلت عالم الانمي وكيف كانت البداية ..!!
اول شي خلونا نرجع بالزمن لعام 2008 ذاك الوقت كنت لسى اعتبر طفله عمرها 14 سنة
كانت ذيك الفتره هبت الابتوب توها تطلع عندنا وصار الكل يملك جهاز خاص فيه
طبععآ اول شي انا ماجاني على طول لكن فجاه بنت خالتي الي بنفس عمري اشترت لابتوب
ووقتها انا رحت اصيح عند ابوي يجيب لي واحد كنت شوي حنهار واموت
حتى وقتها قلت له لو ماجبته لي الحين خلاص ماعاد ابغاه > صدق ما استحي
الا اتفاجأ بعد اسبوعين ابوي العزيز جاب لي لابتوب جديد وخاص فيني وما احكيلكم وقتها فرحتي
بدات رحلتي من هناك اول شي لعالم المنتديات > ماراح اتكلم عنها الحين
خلونا بالمهم بالسالفه ذاك الوقت صرنا انا واخوي نتبادل افلام ومسلسلات بالهاردسك
وقتها كنت اتابع كوري وامريكي ..الخ ولكن لسى ماكنت اعرف ان فيه شي اسمه انمي اصلا
على بالي انه فقط كرتون الي هي سبيستون وام بي سي ثري وطقتها
المهم فيه مره اخوي بالغلط نسي بعض حلقات انمي ريبورن عندي بالهاردسك انا فتحت الحلقه فضول فقط
اذكر وقتها حتى كانت الحلقات الموجوده من نهايه الانمي مو من البدايه
انا شفت اول حلقه من هنا ومن بعدها دخلت عالم الانمي وصار عشق ماينتهي والى الان اتابع انمي
الشي الوحيد الي الا الان ماكبرت عليه
على طول رحت عنده جري وقلتله اعطيني كل حلقات هذا الانمي من البدايه للنهايه
ولمن شافني طحت بالفخ ودخلت الجو اعطاني بعدها انمي بلتش وكان هذا ثاني انمي اشوفو بحياتي
عشان كذا هذول الانميين جدا لهم مكانه خاصه عندي لانهم هم بدايتي الاولى
اذكر وقت ما كنت اتابع بلتش التحميل كان عذاب اروح حلقه حلقه واحمل من مليون منتدى وحوسه
لان وقتها كان لسى ينزل فكنت كل اسبوع استنى حلقه وهكذا
وبس هذي قصتي بكل اختصار حرفياا في دخولي لهذا العالم الجميل


Random Anime I Iove

^ لو اعطيت نفسي مجال اكثر من كذا راح تكون صفحات مدونتي كلها انميات
بس خليني اتكلم عن كم انمي من مفضلاتي ماكفو اني احطهم فوق ولا حيكفي


One Piece

ون بيس العشق الاول والاخير الانمي الي دايم يغير لي مودي
من اكون مكتئبه على طول افتح حلقه من ون بيس واصير بمود ثاني تماما
يمكن تكلمت عن انميات كثير وعشقت انميات كثير والبعض له مكانه خاصه
بس دائمًا وللابد ون بيس غير عندي

Kimi ni todoke

هالانمي اعشقه جدا والتوب عندي شفته ايام الثنوي وله مشاعر خاصه حيل
مبسوطه ان واخيرا بعد كل هالمده سوو منه الحين جزء ثالث
تخيلو تشوفون انمي وانتم بالمراهقه والحين يرجع بجزء جديد وانتو ماعدتو مراهقين صغار
شعور غريب ولكن حلو بنفس الوقت لسى ماشفت الجزء الجديد وحماسي له مليون

Blue Exorcist

احبه هالانمي ومن اجمل الانميات الي شفتها وبرضو شفته ايام الثنوي ذكريات
يجننننن يجنننن اتعب وانا اقول يجننن اذكر وقتها كنت مهووسه برين

You And Me

آخ من هالانمي وجمال هالانمي يوم كنت اشوفه كنت مره متاثره بصداقتهم
حتى كنت اطفش صديقاتي بالمدرسه ذاك الوقت فيهم مرهه احبهم انمي ممتع جدا
اشوف نفسي مع قروبي مثلهم وعايشه الجو مع نفسي > نسال الله السلامه وش كنت احس فيه

Working

الانمي الي شفته بسبب شخصية بوبرا لانها سنفوره مثلي ودايم تجيب العيد
احبه جدا ذا الانمي مستحيل انسى ايام ماكنت اتابعه كله ضحك يهبل



Random Anime Movies I Iove

الى هنا أكون انتهيت من هالتدوينة تعبتني حيل ولكن جدا استمتعت وانا اسويها
سايوونآرآ ميــنآآ الى تدوينة اخرى

​

 

[MADNESS]

مسااآء الخخير لـِ مُدونتَي الحَبيبةة ولـ زوآرهآ الأعزاء
حآآبة أتكلم في هذي التدوينة عَن تجَربتي للسَفر , لأنها من أكثر التجآربْ
الي مبسَوططة انهآ كآنت جُزء من مرآحل حيآتِي وأعتز بذككريآتها جدًا
أول سفرةة ليآ كآنت لنيويورك وكَآنت وحده من أحلامي اني ازورهاآ
ططبعآ لانها كآنت أول سَفرة لي للاسْف كآنت كلها توتر وخوف وقلق
كله بِسببي لأني كُنت خوآفة للاسف الشديد وفعلاً ندمت
آني ما قَدرت استمتع بكَآمل الرحلةة بسَبب خوفي وقلقيَ طبعآ هذا كله من الي خوفوني
قبل السفَرة كَآنو يقولو انتبهي واحذري هنآك الخطَر بكل مكَان ومن هالامور
مآ علينآ تعلمت مِن هالدرسَ وتغـيرت خلال سَفرآتي الثانيةة الحمد لله وصِرت عآقلة
المهم سفرة نيويوك علمتَني أشياء كثير صَرآحةة
أولها ان مو كل شي نشوفه ع اجهزتنا أو نسمعه حتى لازم يكون حقيقيْ
انصَدمت من شوآرعهم والناسَ هنآك مآهو مثل ما يروجو لنفسهم
صح اني استمتعت وكانت تجَربه حلوة ولكن في أشياء سلبيةة كَثير عندهم
روايح شوراعهم تسد النفسَ والله شوآرعنا انظف من شوراعهم بمليون مرة حمدلله
ثآني شي اني ما اخآف من شيَ واتوكل على الله واستمتع بكل لحظه بدون توتر وقلق
وثآلثا وآخيرا وهو اني اعتز ببلدي واقدر النعَمة العظيمه الي آحنا فيها يارب لك الحمدوالشكر
سفرتي الثآنية كآنت لفرنسَآ للامانة وآنا صغيرة وبمراهَقتي كآن اكبر آحلامي اشوف برج ايفل ع الطبيعة
وجآت هذي السَفرةة صدفة حرفيآ ما اتوقعت ولا وآحد من مية آن اهلي كانو يخططو لها
اصلا لمن جو يقولولي انصدمت وما صَدقتهم ولا استوعَبت الا بعد ما وصَلتْ لفرنسآ
للآمانه فرنسآ مو حقت تمشيةة أشوفهآ تنفع لشهر عسل أو تسَوق فقط
نظَرتي لها آنها مدينة رآيقة وناسَها هآدين وككَذا أحسهم فنتج وكلاسيكين
عموما نفسَ كلامي لنيويوك النظآفه عندهم 5/10 والاكَل طبعآ كان حيل حيل صَعب
لان زي مو عآرفين الحلال عندَهم نآدر وشبه معدومَ كنآ عايشَين ع اغرآض البقآلة تقريبآ
وبعَد مآ رحت لبرج آيفل وطلعت فيه اقدر اقولكم آنه جدا عآدي > يعني مدري وش كنت متوقعه او متخيله
بس من سوء حظي وقتهآآ كآنو مقفلين الطَلوع للاخير كآنو فآتحين جزء بسْيط بس لمستوى الطلوع
بس كآنت تجربة حلوه تبقى حلم من آحلامي وتحقق
وآخر سفرةة لي كآنت لتركيآ أحسن شي كآن بهذي السفرةة وهو الاكل كآن ممتع لان الحلال بكل مكان
جدا استمتعت بتركيا وحبيتهآآ واتمنى ارجع ازورهآ مرة ثانية ولكن صار معآنا موقف جدا خايس
من أول سآعه لنا فيها طلبنا تآكسي يوصلنآ للفندق الي حجزنآه وكان حيل سيء و#$#%#%
لانه تخيلو جلس يحوس فينآ بالحواري والشوآرع الضيقةة هذا كله عشان يآخذ فلوس أكثر بالعداد
أبوي عصب منه وقله وقف الان وخآصمه ونزلنآ ودورنا تكسي ثآني غيره والحمدلله الثاني كآن احسن
صرآحه للان ادعي عليه حسبي الله عليه خرب جَونآآ من آول ساعه لنا بتركيآ
بس مآعليه بعدين حاولنآ نتخطى وننسى الي صآر ونستمتع بالسفرةة
وبس هذي هي كل سفرآتي بالحياة كلهآ كانت جميله وممتعة وتجربة اتمنى اكيد اكررها
مدن أتمنى أزورها ...!!
1- كوريآ
2- اليابان
3- روما
4- سويسرآ
5- كندآ
6- القطب الجنوبي
7- استراليا
والقآئمة حتزيد ان شاء الله

بعض من تصويري خلال السفرآت والي قدرت القاها اصلا بالجوال
نصهآ انسمح ورآح والشي المحزن كل صور تركيآ راحت من جوالي القديم
المهم آتركم مع الصَور ... انجووووي