نتعاطى الخيال عندما يخذلنا الواقع (3 زائر)

[MADNESS]

احم احم .. وقررت اسوي مدونة جديدة غير عن الاولى الكئيبة
بثيم شخصيتي الرهيبة الي ماتوقعت اني اعشقها قد كذا غوجو سينسي
بداية احب اكتب نبذه بسيطه عني انا انسانه تعشق 3 اشياء بالحياة ( الاكل - التصميم - الانمي )
عمري بداية الزهور > بمعنى عجزت وصرت ثلاثينيه جادة
اعشق اللون الموف من عمري 15 وهو لوني المفضل واكثر شي احبه بعد اهلي هم صحباتي
الحمدلله يارب ان ربي رزقني هالنعمه الحلوه عندي صحبات من كل مراحل عمري وللان معاي
اشوفهم كنزي الثمين لان وخصوصا بالوقت الحالي نادر نلقى ناس قلوبهم نظيفه وصافيه
و يدخلون من ضمنهم صديقاتي الالكترونيات عندي كثير وماشاء الله صداقتي فيهم حيل قويه
لدرجه ان عندي صديقه من 2010 وهي معاي وللان تعرفني اكثر من نفسي واكثر من اهلي
بداية دخولي لعالم المنتديات كان تقريبا عام 2008 يمكن كان عمري 14 تقريبا اخ بس ياحلوها من ذكريات
اتوقع ذاك الوقت ما خليت منتدى ما سجلت فيه لو احكي بس عن تجربتي بالمنتديات
ماراح تكفي الصفحات لذلك خليها بذكرياتي الجميله احتفظ فيها لنفسي
و احب الضحك والفرفشه والايجابيه > رغم اني مليانه حلطمه وقلق
الناس البسيطه العفويه الي لهم ابتسامه مريحه هذول يجذبوني لا اراديا والله يكثرهم بحياتي
احب التصميم عشقي الذي لاينتهي بدايتي فيه من 2009 لكن مستواي ضعيف للاسف
بسبب كنت اقطع كثير جدا وماكنت امارس ولا اتعلم دروس جديده ولا طورت نفسي
ولكن الان رجعت وبقوه وحبدأ من اول وجديد لان ناويه باذن الله احوله لرزق ودخل لي بالمستقبل
وهو يعتبر سبب من اسباب رجوعي للمنتدى + الحنين الي بداخلي لهذي الاماكن

My Story With Anime Toon
قصتي مع انمي تون كانت من بداية المنتدى القديم الي تقفل
اذكر وقتها اول ما تقفل سوو هالمنتدى بداله وتجمعو اغلب التونين فيه
ومره انبسطنا اول ما فتح لان لقينا مكان يلمنا بدل ما كنا تشردنا
فشكرا بحجم الكون لصاحب هالمكان الحلو الي جمعنا
اذكر التون القديم كنت دوبي اتفاعل فيه واصير نشيطه
فجاه تقفل حسيت بالنحس وقتها استغفر الله بس صدق حيل زعلت
ولكن هذي سنه الحياه اصلا زمن المنتديات جالس ينقرض
ماعلينا خلونا الحين بالوقت الحالي نصنع ذكريات جميله قد ما نقدر




​

الى هنا واصل لنهاية التدوينة الاولى ان شاء الله مع الوقت تتعرفو علي اكثر
وتحبوني واصير مشهوره وتشوفون لوني احمر بعد > امزح​

​

 

[MADNESS]

متى دخلت عالم الانمي وكيف كانت البداية ..!!
اول شي خلونا نرجع بالزمن لعام 2008 ذاك الوقت كنت لسى اعتبر طفله عمرها 14 سنة
كانت ذيك الفتره هبت الابتوب توها تطلع عندنا وصار الكل يملك جهاز خاص فيه
طبععآ اول شي انا ماجاني على طول لكن فجاه بنت خالتي الي بنفس عمري اشترت لابتوب
ووقتها انا رحت اصيح عند ابوي يجيب لي واحد كنت شوي حنهار واموت
حتى وقتها قلت له لو ماجبته لي الحين خلاص ماعاد ابغاه > صدق ما استحي
الا اتفاجأ بعد اسبوعين ابوي العزيز جاب لي لابتوب جديد وخاص فيني وما احكيلكم وقتها فرحتي
بدات رحلتي من هناك اول شي لعالم المنتديات > ماراح اتكلم عنها الحين
خلونا بالمهم بالسالفه ذاك الوقت صرنا انا واخوي نتبادل افلام ومسلسلات بالهاردسك
وقتها كنت اتابع كوري وامريكي ..الخ ولكن لسى ماكنت اعرف ان فيه شي اسمه انمي اصلا
على بالي انه فقط كرتون الي هي سبيستون وام بي سي ثري وطقتها
المهم فيه مره اخوي بالغلط نسي بعض حلقات انمي ريبورن عندي بالهاردسك انا فتحت الحلقه فضول فقط
اذكر وقتها حتى كانت الحلقات الموجوده من نهايه الانمي مو من البدايه
انا شفت اول حلقه من هنا ومن بعدها دخلت عالم الانمي وصار عشق ماينتهي والى الان اتابع انمي
الشي الوحيد الي الا الان ماكبرت عليه
على طول رحت عنده جري وقلتله اعطيني كل حلقات هذا الانمي من البدايه للنهايه
ولمن شافني طحت بالفخ ودخلت الجو اعطاني بعدها انمي بلتش وكان هذا ثاني انمي اشوفو بحياتي
عشان كذا هذول الانميين جدا لهم مكانه خاصه عندي لانهم هم بدايتي الاولى
اذكر وقت ما كنت اتابع بلتش التحميل كان عذاب اروح حلقه حلقه واحمل من مليون منتدى وحوسه
لان وقتها كان لسى ينزل فكنت كل اسبوع استنى حلقه وهكذا
وبس هذي قصتي بكل اختصار حرفياا في دخولي لهذا العالم الجميل


Random Anime I Iove

^ لو اعطيت نفسي مجال اكثر من كذا راح تكون صفحات مدونتي كلها انميات
بس خليني اتكلم عن كم انمي من مفضلاتي ماكفو اني احطهم فوق ولا حيكفي


One Piece

ون بيس العشق الاول والاخير الانمي الي دايم يغير لي مودي
من اكون مكتئبه على طول افتح حلقه من ون بيس واصير بمود ثاني تماما
يمكن تكلمت عن انميات كثير وعشقت انميات كثير والبعض له مكانه خاصه
بس دائمًا وللابد ون بيس غير عندي

Kimi ni todoke

هالانمي اعشقه جدا والتوب عندي شفته ايام الثنوي وله مشاعر خاصه حيل
مبسوطه ان واخيرا بعد كل هالمده سوو منه الحين جزء ثالث
تخيلو تشوفون انمي وانتم بالمراهقه والحين يرجع بجزء جديد وانتو ماعدتو مراهقين صغار
شعور غريب ولكن حلو بنفس الوقت لسى ماشفت الجزء الجديد وحماسي له مليون

Blue Exorcist

احبه هالانمي ومن اجمل الانميات الي شفتها وبرضو شفته ايام الثنوي ذكريات
يجننننن يجنننن اتعب وانا اقول يجننن اذكر وقتها كنت مهووسه برين

You And Me

آخ من هالانمي وجمال هالانمي يوم كنت اشوفه كنت مره متاثره بصداقتهم
حتى كنت اطفش صديقاتي بالمدرسه ذاك الوقت فيهم مرهه احبهم انمي ممتع جدا
اشوف نفسي مع قروبي مثلهم وعايشه الجو مع نفسي > نسال الله السلامه وش كنت احس فيه

Working

الانمي الي شفته بسبب شخصية بوبرا لانها سنفوره مثلي ودايم تجيب العيد
احبه جدا ذا الانمي مستحيل انسى ايام ماكنت اتابعه كله ضحك يهبل



Random Anime Movies I Iove

الى هنا أكون انتهيت من هالتدوينة تعبتني حيل ولكن جدا استمتعت وانا اسويها
سايوونآرآ ميــنآآ الى تدوينة اخرى

​

 

[MADNESS]

مسااآء الخخير لـِ مُدونتَي الحَبيبةة ولـ زوآرهآ الأعزاء
حآآبة أتكلم في هذي التدوينة عَن تجَربتي للسَفر , لأنها من أكثر التجآربْ
الي مبسَوططة انهآ كآنت جُزء من مرآحل حيآتِي وأعتز بذككريآتها جدًا
أول سفرةة ليآ كآنت لنيويورك وكَآنت وحده من أحلامي اني ازورهاآ
ططبعآ لانها كآنت أول سَفرة لي للاسْف كآنت كلها توتر وخوف وقلق
كله بِسببي لأني كُنت خوآفة للاسف الشديد وفعلاً ندمت
آني ما قَدرت استمتع بكَآمل الرحلةة بسَبب خوفي وقلقيَ طبعآ هذا كله من الي خوفوني
قبل السفَرة كَآنو يقولو انتبهي واحذري هنآك الخطَر بكل مكَان ومن هالامور
مآ علينآ تعلمت مِن هالدرسَ وتغـيرت خلال سَفرآتي الثانيةة الحمد لله وصِرت عآقلة
المهم سفرة نيويوك علمتَني أشياء كثير صَرآحةة
أولها ان مو كل شي نشوفه ع اجهزتنا أو نسمعه حتى لازم يكون حقيقيْ
انصَدمت من شوآرعهم والناسَ هنآك مآهو مثل ما يروجو لنفسهم
صح اني استمتعت وكانت تجَربه حلوة ولكن في أشياء سلبيةة كَثير عندهم
روايح شوراعهم تسد النفسَ والله شوآرعنا انظف من شوراعهم بمليون مرة حمدلله
ثآني شي اني ما اخآف من شيَ واتوكل على الله واستمتع بكل لحظه بدون توتر وقلق
وثآلثا وآخيرا وهو اني اعتز ببلدي واقدر النعَمة العظيمه الي آحنا فيها يارب لك الحمدوالشكر
سفرتي الثآنية كآنت لفرنسَآ للامانة وآنا صغيرة وبمراهَقتي كآن اكبر آحلامي اشوف برج ايفل ع الطبيعة
وجآت هذي السَفرةة صدفة حرفيآ ما اتوقعت ولا وآحد من مية آن اهلي كانو يخططو لها
اصلا لمن جو يقولولي انصدمت وما صَدقتهم ولا استوعَبت الا بعد ما وصَلتْ لفرنسآ
للآمانه فرنسآ مو حقت تمشيةة أشوفهآ تنفع لشهر عسل أو تسَوق فقط
نظَرتي لها آنها مدينة رآيقة وناسَها هآدين وككَذا أحسهم فنتج وكلاسيكين
عموما نفسَ كلامي لنيويوك النظآفه عندهم 5/10 والاكَل طبعآ كان حيل حيل صَعب
لان زي مو عآرفين الحلال عندَهم نآدر وشبه معدومَ كنآ عايشَين ع اغرآض البقآلة تقريبآ
وبعَد مآ رحت لبرج آيفل وطلعت فيه اقدر اقولكم آنه جدا عآدي > يعني مدري وش كنت متوقعه او متخيله
بس من سوء حظي وقتهآآ كآنو مقفلين الطَلوع للاخير كآنو فآتحين جزء بسْيط بس لمستوى الطلوع
بس كآنت تجربة حلوه تبقى حلم من آحلامي وتحقق
وآخر سفرةة لي كآنت لتركيآ أحسن شي كآن بهذي السفرةة وهو الاكل كآن ممتع لان الحلال بكل مكان
جدا استمتعت بتركيا وحبيتهآآ واتمنى ارجع ازورهآ مرة ثانية ولكن صار معآنا موقف جدا خايس
من أول سآعه لنا فيها طلبنا تآكسي يوصلنآ للفندق الي حجزنآه وكان حيل سيء و#$#%#%
لانه تخيلو جلس يحوس فينآ بالحواري والشوآرع الضيقةة هذا كله عشان يآخذ فلوس أكثر بالعداد
أبوي عصب منه وقله وقف الان وخآصمه ونزلنآ ودورنا تكسي ثآني غيره والحمدلله الثاني كآن احسن
صرآحه للان ادعي عليه حسبي الله عليه خرب جَونآآ من آول ساعه لنا بتركيآ
بس مآعليه بعدين حاولنآ نتخطى وننسى الي صآر ونستمتع بالسفرةة
وبس هذي هي كل سفرآتي بالحياة كلهآ كانت جميله وممتعة وتجربة اتمنى اكيد اكررها
مدن أتمنى أزورها ...!!
1- كوريآ
2- اليابان
3- روما
4- سويسرآ
5- كندآ
6- القطب الجنوبي
7- استراليا
والقآئمة حتزيد ان شاء الله

بعض من تصويري خلال السفرآت والي قدرت القاها اصلا بالجوال
نصهآ انسمح ورآح والشي المحزن كل صور تركيآ راحت من جوالي القديم
المهم آتركم مع الصَور ... انجووووي

محتوى مخفي: كليك هير

 

[MADNESS]

أيام المنتديات القديمة مدوناتي فيها كآنت تنسرق من كثر ماكنت اكتب واقرقر من قلب
والله العظيم يا جماعه اذكر كنت اشوف مدونتي بمنتديات ثانيه وكلامي فيها كله منسوخ
يعني صاحبه المدونه جالسه تنسخ كتاباتي ومواقفي وحياتي لنفسها شي يضحك
كل ما افتكر هالشي اضحك الصراحه اصلا حتى وقتها ماكنت ازعل ابدا
ولا كنت اسوي مشكله مع السارقين بس الي يضحك تخيلو اكتب موقف حصل لي بحياتي الواقعيه
القاه نفسه ناسخينه بمدونتهم متخيلين غرابة الشي
سبب هالكلام الي قلته لاني جدا تغيرت الآن ماعاد حماس وشغف الكتابه مثل قبل
مع اني شخصيًا اعشق الكتابه واحب أكتب بس مدري وش الي تغير فيني فجأهـ
يمكن هالسبب بعقلي الباطني هو الي حمسني افتح هالمدونة
لان اشتقت للكتابه واشتقت اقرقر وافضفض و اشارك الناس اهتماماتي وارائي احب هالشي
وأحس ودي اصنع لي ذكريات كتابية عشان بعد سنين ارجع اشوف كيف كنت وكيف صرت
وايش الي تغير فيني وايش الي مازال موجود فيني
كنت اتمنى شي واحد من المنتديات القديمه انها ع الاقل تسوي ارشيف محفوظ لمدونات الاعضاء
عشان تبقى للابد موجودة > يعني الفضايح والماضي الاسود مايختفي ابدًا
اذكر كمان كان في شي جدا قاتل يوم نكتب ونكتب بالمدونة لين تصير جريدة طويلة
وفجاه تسوي ارسال تلقاه ما انرسل او النت فصل او علق وبعدها يروح كل الكلام "خدت الصدمه بئى"
انا عن نفسي كثير صارت لي وقتها طبعا اعصب واقفل الجهاز بكبره واكنسل ابو المدونة
فيه موقع اسمه ارشيف يطلع لك الظلام الاسود حرفيا القديم مره
احيانا ادخل عليه اتفرج ع بعض منتدياتي القديمه بس طبعا مايفتح كل شي يادوب كم صفحه
مره تذكرت اسم منتدى كنت ادخله تقريبا 2009 010 المهم وقدرت ادخل ع مدونتي
وقتها كنت كاتبه فيها تدوينة انو اتمنى اروح برج ايفل وانه يعجبني
وانه مستحيل ومن سابع المستحيلات اني اشوفه بالحقيقه
وانا اقرا كلامي كان عام 2021 وقتها قيدني رحت لبرج ايفل وسافرت فرنسا
> متخيلين وش كميه المشاعر وانا اقرا تدوينتي القديمه
المهم اكتفي بهذا القدر من الفضفضه عشان لا اخربها واجيب العيد وادخل بالاعماق
حتصير المدونه ديب ويب




​

 

[MADNESS]

محتوى مخفي: 1994

حبيت احتفظ بهذي الذكرى وهي تاريخ ميلادي مع عدد مشاهدات الملف الشخصي
انتظرهم يوصلون للالف واذا مازلنا موجودين وأحياء بوثقها تاني
وتفاعلي بالمنتدى هالفتره كأنه تعويض ع سباتي لـ 11 السنه الي فاتت
عندي عضويه ثانيه اتوقع اني سويتها 016 كنت اشارك فيها بس ع الخفيف جدا
وبعدها مارتحت حسيت ان ودي ارجع لعضويتي الاوله لانها الاساس
وصراحه ندمانه اني ماكنت اتفاعل زمان وكنت حرفيا ماخذه وضعيه السايلنت بالمنتدى
مدري وش الي كان مانعني هل بسبب اني كنت حيل زعلانه يوم اتقفل التون القديم
واخذت ردت فعل عكسيه مع اني كنت جدا مبسوطه ان هالمنتدى جا بعده ع طول
بس كأني كنت خايفه من ان مشاعري بالتون القديم تتكرر وتنعاد بهذا المنتدى
حاليا اتمنى لو اني تفاعلت هنا أكثر وصنعت لي ذكريات أكثر
لان ذكرياتي هنا قليله والاشخاص الي اعرفهم كانو جيلو ورغد فقط وحيل عزيزين بقلبي
والان هم مختفين واحس اشتقت لهم > ان شاء الله انهم بخير وين ماكانو
كانو جدا قريبين مني حتى برا المنتدى ومازالو بس اختفى اثرهم الله يذكرهم بالخير
و قريب اكتشفت ان معاي بالتون صديقه حييييل مهمه وغاليه علي كثير كنا سوا بمنتدى اخر
فرحتي يوم عرفت انها معاي هنا مقدر اوصفها طرت من السعاده حرفيااا
شعور حلو يوم يكون معاك بالمنتدى صديقك وبالذات لو كان شخص قريب منك كمان
حسيت بالانتماء صراحه ويمكن هالسبب حمسني اتفاعل مدري فيه احد مثلي ولا انا بس الغريبه
عموما الصديقه هي فلورتي ياويل الي يفكر يزعلها بس بيلاقيني قدامه دايركت
+ كسبت صديقه جديده ومبسوطه بمعرفتها جداا عسل وتدخل القلب من غير استئذان
جوجو = نجلاء > اي بالغصب انتي صديقتي خلاص مافي تراجع ولا استسلام
+ فريقي الجميل (فريق التصميم) هذا كان احلى شي اسويه بالتون اني دخلت هالفريق اللطيف
ياجماعه ماراح تلقون فريق احسن من هالفريق كل شخص فيهم يقول الزين عندي
يعني مبدعين وفنانين وفوقها يهبلوووووون تدرون من اول يوم حسيت بانتماء معاهم
المهم اخر شي بقوله اني قررت اصنع ذكريات كثيره وحلوة بالتون من اليوم ورايح






​

 

[MADNESS]

وأنا اقرأ مدونة حسن لفتتني تدوينه له خلتني اوقف فترة طويلة وانا افكر فيها
كان يقول انه كرهـ الانمي خلاص وماعاد مثل زمان كلامه اثر فيني صراحه وخلا مخي يصير ايرور
تدرون ليه أول شي لاني أكبر عاشقة ومدمنه للانمي ثانيا والصدمه الي راح تصدمكم
ان كلام حسن كان هواجيسي بفتره من الفترات وكنت اقول ان خلاص طفشت من الانمي وبوقف
ودايم اسأل نفسي هالسؤال انه متى راح يجي اليوم الي اوقف فيه متابعه الانمي
او هل راح اوقف اتابع انمي او حكون طول عمري اتابع انمي والي توصلت له يا جماعة و ريح مخي من هالتفكير
ان هذا الشي علمه عند الله وحده وبلاش اتعب راسي من التفكير دامني الحين مستمتعه ومبسوطه
وانا اتابع انمياتي المفضلة مافي اي شي يمنعني من اني اسوي الشي الي احبه بحياتي وانتهى
لأن كثير من الاشخاص بحياتي يشوفون متابعتي للانمي طفولية مايدرون ان نص الانميات ماينفع ابدا الصغار يتابعوها
حرفيا اكره الاشخاص الي تفكيرهم محدود ويحددو بكيفهم ومن راسهم اسلوب الناس الخاص بحياتهم
خلو الناس بكيفها تتابع الي تبغى وتسوي الي يعجبها بدون اصدار احكام ع الناس
لان مافي احد بالدنيا يحق له انه يُحكم ع شخص سواء بالي يتابعه او يسويه بحياته و ربي خلقنا أحرار
وعموما مرآت يا جماعة تجيني فترة اصلا صحيح اطفش من الانمي واخذ بريك واجلس فتره طويله ما اتابع شي
بس بعدين بعد فتره يرجع الشغف من جديد وارجع اتابع بكل حماس فاكتشفت اني فعلا اعشق الانمي
ومرات تجيني حاله اني اتابع كرتون زمان مثل عهد الاصدقاء وانا واخي وريمي وهالكراتين الحلوة الي كلها اصلها انمي
يعني بالمختصر عشقي للانمي لن ينتهي الا اذا ربي اراد لي شي ثاني انا مدري عنه
طبعا أشكر حسن انه صحى هواجيسي من جديد وخلاني اكتب هالتدوينه طلعت الي بخاطري شوي


هواجيس الصفحة الاولة
مدري هل انا فقط الي كذا او في اشخاص تجيهم نفس هواجيسي العجيبة ذي
بمعنى عندي هاجس ان صفحه المدونة الاولى لازم تكون بروفشينال وخقة ومليانه حركات بركات
بعدين بالصفحه الثانيه ومابعدها خلاص عادي اكتب اي خرابيط حتى لو سخيفه ومالها معنى
كله من حسن خلا كل الهواجيس الي فيني تطلع فجأة وصارت تدوينه هواجيس
المهم حآبة اشطح وأحط بالتدوينة هذي وبالصفحه الاوله من مدونتي المدونات الخنفشآآرية
الي شخصيًا احب جدا اقرأ تدويناتهم واستمتع بكل صفحه فيهآآ ويستاهلون اني احطهم بصفحتي الاوله
اول شي مدونة ريم اعتقد هي من اول المدونات الي بدات اتابعها
مدونة راقية - أنثى نادره من عبّق الورد خُلقت ♡
ثاني مدونة طبعآ واكيد لـ حسن جدا مدونته ممتعه واسلوبه خنفشاري ماشاء الله
مدونة مميزة - A Ca$e for a Gentle Thief and a Treasured Heart - 7sN
ثالث مدونة صديقتي الصدوقة فلوري اعشق هدوئها ولطافتها بالتدوينات
-" سوف تنقشع الأحزان وينهمر المطر" ~
رابعآ الحلوه هدى صراحه تابعتها عشانها اول وحده تسوي لي لايك من اول ما فتحت مدونتي
واكتشفت ان مدونتها رهيبة وتونس احب سوالفها وقصصها الي تصير معاها
مدونة راقية - دائمًا أبهرٌ نفسي إنه الشيء الذي يجعل الحياة تستحق العيش❥
خامسآ وهل يخفى القمر جوجو مستحيل اني ما اتابع مدونتها هالبنت
مدونة جولز | Joulz's Blog ،
واخيرا وليس آخراً فرايدي العسولة والي اسميها فوفو مدونتها حيل اعجبتني
وفلسفتها ببعض التدوينات راقت لي
[ Little Free Soul ]
ومازلت لسى افرفر بهذا القسم واكتشف مدونات الاعضاء يعني العدد قابل للزياده أكيد
حآبه اقول شغلة اخيرة قبل انهي هذي التدوينة أحب اشكر من كل أعماق قلبي وصميم روحي
كل شخص حط لايك او ارسل تقييم بالمدونة والله يا جماعه هالشي يفرح الخاطر
وودي اشكركم من قلبي صراحه يمكن تشوفون هالشي بسيط او مجرد لايك او اعجاب والسلام
لكني اشوفه بنظره ثانيه تمامًا نظره اعمق من كذا < ماراح اشرحها لان ما تنشرح
بس اتمنى امتناني وصل لكل شخص فيكم وأحبكم يا احلى ناس بالكوكب




​

 

[MADNESS]

صباح الخير يا جمال الصباح وأجواء الصباح
سبحان الله دايم شعور الصباح يكون مختلف مهما عشقت الليل
أحب الليل وأحب الصباح بس كفّت الصباح تفوز على الليل عندي أعشق الاجواء الصباحية
وان صحيت بدري وكنت نايمه زين قبلها اوف يا سلام بيكون يومي كله جميل وفيه بركة واقدر انجز كل شي بخاطري
المهم ودي أتكلم عن نمط الحياه الصحي لان لي فترة من بدأت هالحياة وحرفيا اتمنى الكل انه يبدا هالحياة الحلوة
والله اني كنت بجهل فظيع ولا ادري عن هالنعمه وقد ايش فرقت وتغيرت حياتي 180 درجة للافضل
سابقا الحياه كانت عشوائيه حرفيا وبما تعنيه الكلمه من عشوائيه ولخبطة ولا كنت اقدر اركز ع اهدافي بالحياه بشكل صحيح
هذا غير التعب والارهاق الي يجيني خلال اليوم ويومي كله يكون صفر انجاز للاسف
لكن من بدأت اخلي نمط حياتي صحي اختلف كل شي وصار يومي مليان انجازات واهدافي صرت قادرة اني احققها واركز عليها
حتى نفسيتي سبحان الله تغيرت صرت رايقه اكثر من اني اعصب ومشكلة التوتر والقلق بدأت تخف
وباذن الله وحده من اهدافي وهي اني اعالج نفسي من القلق والتوتر الزايد > النوع الي عندي يعتبر مشكلة للاسف
ويا جماعة اول شي سويته عشان اخلي نمط حياتي صحي وهو النوم الي يعرفني من زمان
عارف معاناتي مع النوم قد ايش كانت معاناه فظيعة معاناة قاتله ودايم اتحلطم ع نومي طفشت الناس معاي
بعدين غيرت اكلي بشكل كامل تماما وقفت كل الخرابيط وصرت اخلي صحني مكون من 3 اساسيات
طبعا عشان اكون صادقه الخرابيط مسموح اكلها بس ماهو بشكل يومي مثل قبل لا
صار الوضع احسن صرت اكله بالاسبوع مره تقريبا ومرات حتى يمر اسبوع ولا اكل خرابيط حمدلله
وسويت لي to do list احاول اخلصها خلال اليوم كامل وهالحركه كنت اتعب منها زمان
بحيث اني ماكنت ابدا اقدر انجز منها شي والله العظيم الحين صرت انجزها كلها وفوقها اقدر ازود بعد انجازات غيرها
ومن الاشياء الجديدة الي دخلتها بنمط حياتي او بمعنى اصح جربتها وجازت لي هو خبز الساوردو
مره عجبني وحبيته جدا يشبع والله انه جدا مختلف عن التوست والعيوش الثانيه لاني من صرت افطر فيه
احس بالشبع فتره اطول وهالشي ساعدني كثير وقريت انه مفيد كمان هالخبز صار من مفضلاتي
كمان صرت أطبخ لنفسي وبنفسي ياجماعه من بدات الطبخ وحرفيا ماصرت احب اي اكل غير اكلي
مدري وش السالفه وليه صرت كذا بس جد صرت ما اتقبل اي اكل غير اكلي
واهلي منزعجين من هالشي يحسبوني اتدلع ولا يفكرو اني جالسه استهبل عليهم ويعنني
اوك عادي اكل اكيد غير اكلي ولكن اتكلم ع نمط حياتي الكامل الي يكون شبه يومي فهمتو علي !
وطبعا مايكمل النمط الصحي الا بالرياضة من دخلتها بيومي وانا بنعيم من فضل ربي الحمدلله
السبب الي خلاني اكتب هالتدوينة وهو يمكن ولعلي افيد احد او يتحمس شخص بسببي
كمان عشان لا اسحب ع المدونة هدفي اني اوصل لـ 20 صفحة فيها
تشآآآوو


​

 

[MADNESS]

عدنآآ ، بتحديثات جديدة في حيآتي
أول شي من بكرا حصير موظفه ان شاء الله ولكن الوظيفه الجديدة هي نفسها الي هربت منها بوظيفتي السابقة
وكأن الحياه تقولي غصبا عليك هذا قدرك لو مهما سويتي وتعبتي نفسك بالبحث هذا مصيرك المحتوم
الشي الجديد ان هالمره بتكون وظيفتي اصعب من الي قبلها هو يعتبر تحدي لي ولكن حبيت اغامر واتشجع واقوي نفسي
تخصصي حييل انساني وصعب ويحتاج لصبر يفوق صبر العالمين والحمدلله بدأت احبه واتقبله بالرغم من كل حلطمتي
للامانه مو عارفه هل قراري هذا صح او خطأ كون اني اساسا هربت من وظيفتي السابقه
والحين رجعت لوظيفه نفسها وفوقها اصعب بكثير
بس فعليا طفشت من جلسه البيت وابغى اشتغل واوقف على حيلي وارجع لروتين الدوام والحياه الصاخبه
الي جرب نعمه الدوام بيفهم قصدي وبيفهم قد ايه العطاله بعد ماتذوق طعم الوظيفه صعبه مررة
وسبحان الله جاتني صدفه حرفياااا
كنت اسولف مع صديقتي واشوف اخبارها وجات تقولي انها توظفت بمكان جديد وحيل حلو الدوام واوقات العمل مريحه
وقالت لي شرايك تجي تشوفي وتجربي ترسلي لهم السيفي وفعلا رسلته لهم
> وانا منتظره رفضهم كأني ابغاهم يرفضوني اصلا
بس سبحان الله كلموني للمقابله على طول ورحت للامانه ارتحت للمكان نوعا ما
ونفس الموظفه الي سوت معي المقابله حبوبه مره
كنت متوتره جدا وكان واضح عليا وجبت العييد كالعاده
لدرجه اني حسيتها مصدومه مني وتقول وش هالبنت الغريبه الي جاتنا
اتوقع لو ماكان عندهم احتياج شديد للموظفين كان شاتوني على طول
كل شوي كانت تضحك علي من كثر ماجبت العيد
بس حمدلله عدت المقابله على خير
والي مريحني بالسالفه كلها ان فتره العقد فيها 3شهور تجربه
ان مارتحت اقدر اطلع على طول
بس اتمنى اني اكمل معاهم وارتاح بالدوام ويكون عوض لي يارب ويكون خفيف سهل
متخوفه فقد لانه اصعب من وظيفتي السابقه بكثير جدا
لكن باذن الله انا قدها وقدود وهالوظيفه بالذات محتاجه لطولة بال وقوه وصبر
لاننا نتعامل مع اطفال ذوي احتياجات خاصه مالهم لاحول ولاقوه
الله يقدرني واقدر اكون عون لهم ومعلمه كفؤ لهذي الفئه البريئه اصحاب القلوب الطاهرة








​

 

[MADNESS]

وخلصنا أول اسبوع بالوظيفه الجديدة على خير الحمدلله فخورة بنفسي جدا اني وقعت العقد وانا كلي قوه وثقه هالمره
التجارب فعلا تعلم الانسان والخبرات اكبر مكسب للشخص بهذي الحياه لاني لولا الله ثم وظيفتي السابقه
كان اشياء كثير الحين اكلتها ع راسي ولكن لان لي خبره وتجربه لاباس فيها بدوامي السابق قدرت اتجاوز اشياء كثير كنت حتورط بسببها
اعطوني فصل كبيرات وهالشي كان بالسابق خوف بالنسبه لي لانهم كبار وبطولي واطول مني بعد ماشاء الله
لكن سبحان الله يوم تشوفون شلون بريئين وحليلين دخلو قلبي من اول يوم شفتهم فيه ولاول مره يحصل معاي هالشي حبيت فصلي حيل
اكتشفت ان الكبار مريحين جدا عكس الصغار وخصوصا اطفال التوحد متعبين حيل الله يصلحهم ويحفظهم
وفيه طالبتين بفصلي شوي عنيدات وراسهم يابس مثلي هههههههههههههه قلت اوريهم وغصبا عليهم بخليهم يسمعون الكلام مع الوقت
بس انتظرهم يتعودون علي كلهم وابدا الشغل الصح معاهم الحين مدلعتهم لكن بعد ما اخلص من جداولهم بوريهم الجد
ومعاي بالفصل مساعدة تهههههبل لكن للاسف متدربه يعني 3 شهور وبتروح وتتركني لحالي بالفصل الصدق بحاول ما افكر بـ هالشي حاليا
واحاول اركز بشغلي وشلون اخلص الجداول وهالامور لاني جيتهم متاخر بس سالفه ان المساعده بتروح وبجلس لنهايه السنه لوحدي توترني جدا
لان المساعده بالفصل جدا جدا مهمه والمراكز بشكل عام عندنا عليها احتياج شديد ونقص المعلمات كبير اخ الله يعين
عموما اللهم لك الحمد والشكر انا جدا راضيه ومبسوطه بشغلي وفصلي مع ان مالي اسبوع معاهم بس والله اني ان رجعت البيت اشتاق لهم
يونسوني الله يحفظهم بالفصل بالذات الطالبات الي عندهم ادراك عالي اجلس اسولف معاهم ماشاء الله وبعضهم يتعبوني ويشقوني لكن فدا
الشهر الاول بيكون جدا ضغط علي وهذا شي طبيعي عشان اسوي الخطط والتقييمات وهالامور لكن بعدين نرتاح لان بيكون مجرد تطبيق خلاص
للان الاوضاع مستقره الحمدلله ومتفائله ان فتره التجربه 3 شهور بتخليني اكمل معاهم لنهايه السنه ان شاء الله
صحيح نسيت اقول اني تعرفت ع بنت تجننننن وصارت صديقتي من اول يومين وطلعت تعرف صحباتي وهي صحبتهم اصلا
يازين الصدف الحلوه الي مثل كذا احبهااا وحسيت اني محظوظه لان انا انسانه اجتماعيه مره فالصداقات هذي تواسيني بالدوام
والبنت حيل حيل حبوبه وساعدتني كثير الله يسعدها طبعا ماقدرت اقاوم ورحت خطفتها وخليتها تصير صديقتي غصب
المهم الحين انتهت فقرة الفضفضه و ياجماعه الناس الي عايشه بدون مدونات شلون عايشين يوم اكتب واطلع الي بقلبي بالمدونه
احس اني ارتحت وفرغت طاقه كامنه بداخلي احس انها صارت شي مهم عندي هالمدونة مدري انتم مثلي او بس انا كذا
يلا تشآآآآآآو
​

 

[MADNESS]

صباح الخير .. احس اني مشتاقه لمدونتي لي فترة ماكتبت فيها
بس كذا احسن عشان اجمع لكم احداث ومواقف يمدي اكتبها بالمدونة
اول شي صارت لي اشياء كثير هالفترة للاسف استقلت ورحت مكان ثاني غيرت المركز يعني
لمركز آخر هي نفس الوظيفه معلمة تربيه خاصه بس رحت مركز جديد لاسباب افضّل اني ما اذكرها

و مبدئيًـا مو حابه اعطي انطباعي ع المركز الجديد لان لسى يادوب شفت فصلي والاطفال الي حمسكهم
معاي معلمه بالفصل اساسا هو فصل مره كبير ومقسمينه اثنين فصارو كانهم فصلين مقسومين
ولكن على بعض كل الي بيننا مجرد بارتشين كبير ولكن بالاصل نعتبر كاننا فصل واحد
يعني تخيلو معاي 4 معلمات بمكان واحد ولكن لكل فصل معلمه ومساعده صراحه الفكره مو حلوه ومره قروشة
لان تخيلو كل شوي الاطفال الي عندهم يجون عندنا والي عندنا يروحون عندهم وشغلة

بس الشي الايجابي ان بالصدفه طلعت صحبتي معاي بهذا الفصل لكن هي بالقسم الثاني
للامانه متخوفه من المعلمه الي معاي اخاف مارتاح معاها او تطلع شخص مو كويس
لان بسبب ثقتي السريعه بالناس دايم القم وانصدم وما اتوب فقررت ان من بعد الان اتغير واصير حذرة اكثر
لان من جد مو كل الناس طيبين او تكون نيتهم خير فالله يكفينا شر الناس السيئه ويرزقنا بالناس الطيبة

هالمرة حمسك اطفال حيل صغار اعمارهم من 3 سنين وطالع تقريبا
لسى معرف ولا اي شي حرفيا عن هذا المركز وهذي اول تجربه لي معاهم فالله يجعلها بدايه خير لي
ويكونو مكسب لي واكون مكسب لهم ويسخرني لهم ويسخرهم لي
اليوم ماداومت لان فيه مشكله صغيره وانحلت الحمدلله فبكرا بيكون دوامي الرسمي معاهم

احب اجواء الصباح والهدوء والروقان الي فيها وهذا الشي مع الوظيفه مابيكون موجود
والنقطه الي مخليتني شوي متضايقه وهو مع الدوام مو قادره اعطي التصميم وقت
لان ارجع البيت الظهر وانا ميته تعب حرفيا اكون جدا جدا مرهقة ادور ع الاكل والراحه دوامنا مره متعب
بعدين عندي التزامات وامور اخلصها بعد كذا خلاص يجي الليل ولازم انام بدري عشان اقوم بدري
لان لو نمت متاخر بيكون يومي كله ضيم وظلايم وانا مابغا هالشي يصير ابدا
لان تعاملي يكون مع اطفال ومابغا اكون بمود مش تمام ولازم اعطيهم من كل قلبي وبكل حب
لذلك مو عارفه اوازن بين الوظيفه ووقتي الخاص لهوايتي الي بتكون بزنس بالمستقبل ان شاء الله
بس راح احاول اني القى وقت وطريقه وباذن الله بلقى يمكن احتاج شوي وقت اتعود ع المركز الجديد
واتأقلم مع الدوام وكل شي فيه عشان ارتاح بعد واقدر افهم طبيعة الشغل عندهم كيف
الله يقويني ويعينني ويسهل لي جميع اموري ويكتب لي الخير

فضفضت وارتحت شكرا لحسن استماعكم لحلطمتي وقروشتي
سي يو الى تدوينة اخرى وحلطمات جديدة




​