الختم الماسي فيلم الحظ| Luck 2022 (5 زائر)

[EINAS]

السلام عليكم ورحمة الله وبركاته

كيفها جميلتي سلوى ؟

توقعتي اشارك ولا لا ؟ TT ، انا ذاتا ما توقعت فعادي

هو اساسا مو معقول يمر شي يخصك وما اشوفه وادعمه
زماااان ما كتبت ردود ودخلت لمنتديات ، اخخخ الذكريات رجعت فرد مرة

يلا نقول بسم الله ...

بدايةً الفيلم اول مرة اسمع عنه ، لان اساسا ماني متابعة كتير افلام ، نادر اشوف ولازم مع حدا حصرا حتى احس بأجواء متل السينما ، بس من سوق الجمعة وبالبيجاما هههههه

الفيلم شدني للصراحة واكيد رح اشوفه بوقت فراغي واستمتع ، لان الانيميشن بشكل عام ممتع بالنسبة لي اكتر من الافلام الحقيقية ، ألوانها وشخصياتها بتكون مميزة ومو مكررة ، يعني مو وجه ممثل تشوفيه كل مرة بفيلم ، فبتكون شخصيات ترسخ بالمخ وتعطي تأثير اقوى

ومن منبري اشكر اللي ابدع وعمل الانميشين

حبيت فكرة الفيلم ان عن الحظ والنحس ، كلمتين بنستخدمهم كتييير وبنربط كتير اشياء بحياتنا فيهم

انا من جهتي بحس ان كلشي متعلق بقراراتنا بالحياة وما دخل الحظ ولا النحس بالموضوع

حبيت سام ، حظها منحوس متل كتير بنات بس رغم هيك روحها مرحة وكوميدية وانا بحب الناس اللي هيك حتى بالواقع ، ان مهما مرو بمشاكل وعقبات واشياء صعبة بالحياة بتضل الضحكة والابتسامة ملازمتهم ، لان اكره ما عندي النكد ، معليش بنمر بأيام صعبة بس اكيد بتتعوض بأيام حلوة

وهي رغم انها تربت بميتم وعاشت وحيدة بدون عائلة حقيقية بس مع ذلك قلبها طيب ويلي خلاني إدرك هالشي صديقتها هيزل ، رغم ان في فارق عمر كبير بينهم بس هالشي ما منعهم يصيرو صديقات بطريقة حلوة ، بحب العلاقات مع الاطفال ، بحسها صادقة وعميقة اكتر من علاقتنا بالكبار ، بتكون علاقة صافية مو مبنية على اي مصلحة

هيزل مبينة مشاكسة ولطيفة ، ومحظوظة بسام كتير ، هما سوا متل عيلة صغيرة ، ولو الفيلم إله تكملة او كان مسلسل اكيد كنا شفنا هيزل وهي كبيرة كيف رح ترد لسام جميلها وفضلها عليها وتهتم فيها كمان ويصيرو متل اخوات اكتر حتى لو تبنتها عيلة تانية ، لان ما حدا بينسى اي شي حلو بطفولته بالعكس بنتمسك فيها قدر الامكان

حبيت كيف صورو القط الاسود عكس المتداول بين الناس ، وهو كان اساس وفكرة الفيلم

التنينة عجبتني حاطة الحب على آخر الرف متلي ههههههه ، يعني بتتحمل مسؤولية وعندها اولويات وبتهتم بشغلها وبالناس اكتر من العلاقات العاطفية

بالنسبة للاقزام بس شفتهم وقرأت عنهم حسيت ان وظيفتهم هي وظيفة احلامي هههههه ، ياريت الحياة بسيطة هيك كان يااااااه ما احلى الايام
ما توقعت اغار من قزم بحياتي ، وحتى الارانب عايشة احسن مني ههههههه

بس صار عندي فضول اشوف الفيلم لحتى اعرف اكتر شو سبب اختيار كل كائن لوظيفة معينة ، لان حسيت الاختيار مو عشوائي ، في معنى بالموضوع

التقرير بشكل عام ممتاز وحلو وواضح ان متعوب عليه بكل تفاصيله ، والالوان وتنسيقها يفتح النفس والgif شغالين متل ما صممتيهم وعاملين جو حلو للتقرير ، والرمزيات لطيفة وحلوة

كالعادة فنانة بالتصاميم ما شاء الله ، وفي تطور ملحوظ بمستواكي ، واكيد لسة القادم اجمل كالعادة

وبالنسبة للحظ والنحس فنحن اقوى من ان نعتمد عليهم بحياتنا ، او حتى نبرر فيهم اي لحظة فشل مرينا فيها او اي شي صعب بالنسبة إلنا ، طبيعي ان تمر علينا اوقات سيئة وعقبات بالحياة بس من جانب آخر في ايام حلوة ولحظات سعيدة ، واي انجاز بالحياة ما رح نوصله بسهولة وهنا يكمن شعور الفخر لما نحققه

يعطيكي الف عافية ، و تسلم اناملك وما يحرمنا ابداعك
في ودائع الله ​