You live once .. (1 زائر)

[J o u l Z]

-

السلام عليكم

كيف حال الجميع ؟

-فضفضة-

من زمان ما كتبت شيء ! صراحة مليت من مدونتي القديمة اللي لازم افكر وش اسوي ولا وش احط فيها قبل لاكتب خصوصا من ناحية الصور !

بخاطري تكون مدونتي لي انا بحيث تمثلني انا بما اختاره سواء حبيت يكون لها خلفية ولا لا.

يعني هذيك افكر وش اختار صورة متحركة ولا وش خلفية بحط ولا وش تصميم بسوي ولا ولا ولا

صار اذا بكتب شيء لازم اخطط وش احط قبل لاكتب خصوصا ان ذيك من زماااان مسويتها وكل ما فكرت افتح وحدة جديدة اقول لا حرام ووووو

وبعصرنا الحالي نادر ما الواحد يفتح لاب عشان يكتب في مدونته -ما اقول ما فيه بس قليل- الحين الواحد يفتح جواله ويكتب اسرع واسهل !

ولاني احب اكتب من سالف العصور ! وودي اكتب يومياتي بس كون مدونتي ذيك تقيدني بثيم معين صرت اتكاسل حيل حيل ويمكن هالسبب اللي مخليني هاجرتها من زمان

هالسبب اللي خلاني افتح هذي بدون قيود ولا ثيمات !

فخلوني ابدأ اعرفكم بنفسي للي ما يعرفني < بعد شنو

نجلا من قطر
عمري ٣٣ سنة
معلمة لغة انجليزية لصف ثاني ابتدائي
عاشقة لكونان واي شيء فيه تحقيق وغموض وجرائم
احب اصمم وسبق وصممت اشياء كثيرة هنا وهاوية رسم وكنت اترجم في ما مضى انمي ومانجا

هذا اللي بمخي حاليا
ان شاء الله كل يوم بكتب اللي بخاطري هنا

جولز
​

 

[J o u l Z]

-

-يوم جميل-

السلام عليكم ورحمة الله وبركاته

امانة كنت بكتب امس بس انشغلت ما علينا
انا قديمة حيل بالتون يعني خلينا نقول اني سجلت فيه من ٢٠٠٨ (التون القديم) و٢٠١٣ (التون الجديد) تعرفت على كثير ناس منهم اللي بقيت على تواصل معه ومنهم اللي ادعي له بالخير وين ما كان ،
فمن احد التونيين اللي اقدر اقول اني اعتبرها قربا لي
@H U N T R E S S وخلونا نقول اني اعرفها من ٢٠٠٨
عموما قالت لي انها بتجي الدوحة عاد ما تتصورون فرحتي حيل حيل انبسطت وتحمسست في الحقيقة
تواعدنا نشوف بعض في محل فطور وافطرنا مع بعض وسولفنا حيل انبسطنا (يوم الاربعا اللي فات اتوقع ؟) وقالت لي ان امها واختها يبون يشوفوني بس مو الصباح

اتفقت انا وياها اني بشوفهم بكوفي ورحت له على ٤ العصر
(في الوست ووك) وحيل انبسطت معهم وكانت جلسة جميلة والجو كان يجنن جدا

هي عاد اول وحدة اشوفها بعد اسرار (صديقتي بالمدينة المنورة) والله لا يجعلها اخر مره يا رب ويدوم المحبة بينا
1ق

اجمل شخص ان تتعرف على ناس يشوفونك ويتقبلونك بطبيعتك انت مش انك تحاول تواكبهم او انك تضطر انك تغير من هويتك عشانهم

-

كون اني بإجازه فحاليا لناموا العيال بالليل تبدأ سهرتي <
فبديت انتقي الافلام التشويق والاثارة والجريمة وخلصت ٥ افلام بكتب عنها تدوينة اكيد واذا تستاهل تنشاف ولا لا !
حاليا اذا عندكم من نفس هالنمط قولوا لي شرط يكون مسلسل قصير او فلم


​

 

[J o u l Z]

-

-وجهة نظر -

المواجيب او ما تسمى الزيارات العائلية اللي لازم تروح لها
ولا الناس ببتكلم عليكم < اتوقع وصلت الصورة

وحده من صديقاتي مرت اخوها ولدت وجابت نونو تهبل الله يحفظها وقلت لازم اجيها لاني اعزها حيل
وكل مره ااجل ااجل ااجل لين جا اليوم اللي بروح لها

وديت قهوتي وفوالتي (حلا وسويت وما الى ذلك) ورحت لهم
انبسطت ححححيل والله استانست مع اني ما طولت معهم
بس قعدتهم ما تنمل خصوصا انها كانت برا وشب حطب وجو ولا اروع

عموما خلصت ورجعت ولا القى مسجات من اشخاص من زمان ما تواصلت معهم (زميلات عمل) اشوفك تعرفين تروحين لربعك ولا مريتي تسلمين علي (بيتهم قريب منهم) رديت بكل ادب ما امداني المره الجاية ان شاء الله وبكل بجاحة تعرفين متى تروحين ولمن تروحين له ولا تحسبين لي حساب وانا من زمان ادعيك لبيتي (ما ارتاح لها اساسا) قلت حياتي لصار عندكم مناسبة اعزميني وراح اجي وقت يصير عندكم شيء
راح اجي ولا راح اقصر وعاد انتي بعد مرينا ترا اللي ما يمر الناس لا يتشره (يعاتب) !

وانتهى النقاش هنا وللامانة تصادفني من هالنوعيات واجد حتى بالعائلة يخي قدر الظروف راع الناس يمكن هي ناوية تجيك بس ما جاها مجال ولا تحكم على الناس لانها زارت ولا وجبت احد بمناسبة ما ولا جاتك !

ما ادري اذا اسميه نضج ولا عدم مبالاة صار كلام الناس ما يهز فيني شعرة والله مع ان قبل كنت اتأثر واجلس ابكي ووو بس الحين يا جبل ما يهزك ريح

صح تذكرت بديت مسلسل ياباني مدري اذا سمعتوا فيه
Alice in boardland مبدأيا يذكرني squid game مع اني ما شفته بس نفس الفكرة
زوجي قالي نفس فكرة مسلسل saw حتى هذا ما شفته

اذا اي حد عنده مسلسل قصير او فلم جريمة وتشويق يقول لي والله ابي

صح التدوينة الجاية بسوي قائمة لافلامي اللي شفتها
ودي ارجع وكالتي < بال هاجرتها انا من زمان اذكر حد طلب مني شيء وما سويته واساسا وكالتي اختفت

ودكم ارجعها ؟ اذا ايه ما راح اسوي اطقم مواضيع < برا

جولز
​

 

[J o u l Z]

-

- زيارات المفاجأة-

كل عام وان شاء الله التونيين بخير وصحة وسلامة
وعسى احلام كل واحد فيكم تحقق < احلفي
قررت امس اخذ العيال واروح اسلم على جدتي وللامانة لم تكن مخطط لها ودخلت بيت خوالي (جدتي ام امي ) عموما وكثييير انبسطوا عيالي مع احفاد خوالي < صلة قرابة متشابكة

واستانسنا كلنا امانة حتى كان عندهم قطة توها جابت نونوات صغار وبنتي بغت تموت تبي وحده وانا رفضت قطعا ان تجي معي وحده بس وعدتها ان كل مره بنزورهم عشان تشوفينها

< القط مسؤولية تربية وانا كافي علي مسؤوليات

وبس والله رجعت البيت تقريبا على الساعة ١١ ونص نيمت العيال وسويت لي كوفي وشفت فلم السهرة كان bricks فلم الماني حلو غموض واثارة وجريمة بس للامانة فلم تشوفونه مره وحده يعني اعطيه ٧/١٠ حسيت فيه اشياء لو اضافوها بيكون احلى

جولز


​

 

[J o u l Z]

-

- قضية نقاشية -

مرحبا حبايبي شحالكم ؟

رجعنا للدوام وانتهت الاجازة وامانة الفصل الثاني بالنسبة لي طووووويل حيل

اطول فصل ممكن يمر لان الاجازة الجاية راح تكون اسبوع عيد الفطر وبعده اختبارات على طول للاسف

فنقدر نقول ان الشغف شبه ميت او نايم في سبع نومه

للعلم ان طلابي هالسنة افضل نسبيا من السنوات السابقة من الناحية الاكاديمية

لان لو بنتكلم سلوكيا وهذا محور تدوينتي ما راح اخلص لان الاطفال هالجيل صاروا صعبين حيل بالتعليم

مر علي في السنتين اللي راحت بالتحديد طالبات (بنات) متعبات جدا جدا مع انهم صف ثاني يعني اعمارهم ٦ - ٧ سنوات

بس حسيت اكلم بنات في الاعدادي او الثانوي

خصوصا في السلوك الغير اخلاقي ولا اخص بالذكر سلوك معين

بس اذكر ان مره حصل الشتم والضرب وووصلت لمرحلة التعدي على المعلم "كقص الشعر مثلا" والمعلم واقف من طالبة تعتبر طفلة !

غييير الاشياء الاخرى ولا اقصد بالاشياء الطبيعية مثل التشتت وعدم التركيز لا بل اكبر شويات < ادري بالغت بس هذي الحقيقة

جيل الجديد والله ان صعب شيء يجذبهم سر تدوينتي اليوم مش نبش الامور القديمة لانها ماضي وانتهى واتوقع البنات صاروا يا سادس يا اعدادي

اليوم جبت هدايا للطالبات المتفوقات " دفاتر تلوين واقلام وممسحة مرتبتها بشكل بسيط من تصميمي و من راتبي مش من المدرسة" وحصل هالنقاش الصادم

طالبة ١ تقول حق طالبة ٢: اساسا هذي بشي ان طلبت منها انا وماما بالاجازه

طالبة ٢: صح مس نجلاء اولد سكول "old school" توقعت تجيب لنا لابوبو او كراي بيبي "فيقرات بالعربي"

وكتبت هنا لاني انصدمت ومو مره ولا مرتين من كذا بنت في مدرستي بتباعد الفترات وباختلاف الحوار بس بنفس الفكرة

لاني من جد انصدمت لان بنتي بعمهرهم وهالاشياء حيل تفرح فيها !

انا ما اعمم على الجميع بس لنقل انهم صعبين الارضاء و ملولين جداً اذا كانت الدراسة السابقة تقول ان الطالب بيركز معاك اول ١٠ دقايق

فابشركم صارت يركز اول دقيقتين

ناهيكم عن موضوع التربية الحديثة المستحدثة < لها موضوع مجهزته من زمان لان قاهرني من زمممممممان وعندي كثير امثلة

فلذلك عزيزي ولي الامر الكريم حاول انك تعلم اولادك متى وكيف يقدروا قيمة الشيء لان الشيء حاليا لا يقدر بقيمته المعنوية للاسف

وانتوا شرايكم كلامي صح ؟ هل لاحظتوه من الجيل الحالي ؟

-

خلصت بعض الافلام ودي اقول لكم رايي عنهم

Brick

7\10

فلم حلو لمشاهدة لاول مره بس عرفت الحل وعرفت القاتل من نص الفلم حسيت فيه شيء ما عجبني

بس عموما حلو للمشاهدة الاولى

-

Fractured

9\10

بطططططططل البطلات ولا ابي احرقه عليكم جدا استمتعت بكل لحظة بالفلم حلو للي يحب لحسة المخ ذيك اللي ما تعرفون اساس الفلم

تختفي بنته وينكر الجميع انها كانت معه ليه ؟ وكيف ؟ اكتشفوه بنفسكم

صايره هالافلام تجذبني

-

Totally killer

6\10

حلو الفلم للمشاهدة اول مره بس ما حبيت بعض الاشياء فيه حسيت مالها داعي

تتكلم عن بنت رجعت من الزمن للماضي عشان تمنع قاتل لا يقتل امها لان في المستقبل امها ماتت

تنصدم من اشياء كثيرة في الماضي سواء من قبل امها او ابوها

حبكة الفلم مكررة نسيبا بس شدني ان في جريمة < كونان اللي بداخلي يحب يحلل هههههه

حلو لمشاهدة مره واحدة بس بالإضافة ان لي اسباب ما عليت تقييمه اللي بيشوفه بيعرف ليه

< سبب الجريمة بايخ نسبيا كان في اسباب افضل


نراكم قريبا
​