مدونة جولز | Joulz's Blog ، (2 زائر)

[J o u l Z]

ملاحظة: لا تستهين بنا نحنُ معشر النساء قد نصدمكَ بأفعال لم ولن تتوقعها < احلفي

-

السلام عليكم
يالله ان تحييهم شحالكم؟ عساكم طيبين ؟
< غريبة جاية بداية السنة هههه
اولاً مبارك عليكم الشهر وينعاد عليكم بخير يا حبايبي
وحشتوني بلا استثناء
قلنا نجي نفرفش ونسولف شوي
اخبار رمضان معاكم ؟
رمضان هذا تعبني واجد مب كصيام وعبادة لا الحمد الله
عيالي من بدا رمضان حرارة وزواع وحكة وزكام
وكل انواع الامراض حاليا جانا اسهال -اكرمكم الله-
< قسم بالله تعبت
بس هم اليوم احسن الحمد الله وافضل
واتمنى ان ربي يبعد عنكم جميع انواع الامراض

كنت افكر اخصص فقرة بمدونتي اسميها 'تحقيق اليوم'
< لازم ادخل كونان في الموضوع
اقول لكم وش صار بيومي مثلا وش حدث وماذا حصل..؟
اذا عندكم اسم ثاني للفقرة قولوا لي او اذا حابين تشتركون بالتحقيق علموني

( تحقيق اليوم )

الله يسلمكم شفتوا لما الصايم يشوف الاكل في الانستا،
ويشتهي الاكل ولما يفطر خلاص ما عاد يشتهي شيء
انا اشتهيت كيكة تراميسو تججججنن كشكل واشتهيتها
المهم طلبتها اهل البيت كلهم تعبانين ويرجعون وحرارة
(بما فيهم عيالي) المهم جات الكيكة وهي عليها زينة وهالسوالف
بعد صلاة التراويح قلت لهم جيبوها مع الصحون نذوقها
لقيت الزينة كلها مأكوله
وقعدت اقول مستحيل حد ياكل منها لانها بالثلاجة
غير كذا اهل البيت تعبانين :/
فشكيت بالاطفال ومسكت واحد واحد اسأله اخر شيء
قالوا لي ان بنتي كلتها
( ومستحيل تأكلها لان بنتي ما تطول الثلاجة )
وبعد تحقيق طويل تبين ان ولد حماي هو اللي مأكل الزينة

< عصبت بس وش اسوي مقدر اقول شيء 🥹
اهم شيء كليناها وكانت فعلا لذيذة وشكلي بطلبها مرة ثانية

قد مرّ عليكم موقف حد اكل او شرب شيء يخصكم من الثلاجة ؟

كانت هنا
جولز ​

 

[J o u l Z]

ملاحظة : صايرة احب الرسم التشيبي الكيوت لكونان





-

السلام عليكم
شحالكم ايها التونيون ؟
عيدكم مبارك وتقبل الله طاعتكم
وحشتووووني حيل
< وين فقرتس ومسوية انك رجعتي وانتِ في السنة مرة

امانة عاد لا تددققون
عموما اخبار العيد وعسى جمعتوا عيديات
انا ضد ان الواحد يقول كبرنا على العيدية
والله انا للامانة محد عطاني
بس خذيت عيديات عيالي

لهم طبعا اكيد
شرايكم بلوني الخطير ؟!
والله اني فكرت ارجع اصمم في التون اسوي رفرش ؟
عندكم اقتراحات ابدأ بماذا ؟
+ ارجع وكالتي المغبرة ض1​

 

[J o u l Z]

-


السلام عليكم
كيف حالكمَ يا حلوين د ؟ ان شاء الله تمام !
والله كون ان الاغلب طلب يشوف كيف كانت بداياتي حبيت اقولكم عن تجربتي بمجال التصميم
امانة اول تجربة لي كانت عام ٢٠٠٨ كنت حتى ما اعرف اضيف الخامات ولا اعرف وش هي اساساً حسبت انها في الفوتو < برا
فكانت النتيجة سيئه سيئه ههههههه عموماً يأست من التصميم ولكن شجعني تصاميم الأعضآء
أقول يا حححظهم يا ليتني اقدر اسوي مثلهم فجلست افتح فيديوات وجلست اطبق
طبعاً اول تطابيقي ما كانت بالمستوى الوآو كانت لا بأس به كمبتدئه عموماً وانا اشوف لابي القديم
حصلت بعض التصاميم من عام ٢٠١٠ و ٢٠١١ و٢٠١٢ تتكلمون عن حوالي ٨ إلى ١٠ سنوات ورا
وللعلم اسمي وقتها كان آحلى قلب وكنت مشتهره فيه قصدي انه نكي الرسمي ايام قبل
فأمانة اللي يشوف ان تصاميمه مو لهناك لا تيأس وبالممارسة بتصير محترف تصميم
وكالعادة عدوي اللدود قبل ولا زال كان هو الخط هههههههه
فنبدأ أول تصميم كان عبارة عن رمزية وتوقيع كان تحدي اذا اذكر بيني وبين واحد واستخدمنا نفس الصورة
وللعلم هو فاز علي بس مدح شغلي وقال استمري <

^ ما اصدق ان انا مسويته ههههههه
لا بأس بس الخطوط تجيب الهم هههههههه
التصميم الثاني كان لتحدي جبس واختارو الجبس وصمموا عليه < علينا فكرة
أخترت انا ليز ههههههههههه

^ التكرار وتنوع الخط كآن موضه أول وش عرفكم انتوا الحين والايطار المفتوح من تحت كان هيبه < مت ههههههههه
التصميم الثالث كان تطبيق درس اذا اذكر بس الخط وما ادراك ما الخط
كان تعقيد قبل

^
ما فيه تناسق ابداً بالخلفية حتى احس انها فاضيه من تحت !
واختيار الريندر الييييم
التصميم الخامس عباره عن صورة من مدونتي القديمة في انمي تون السابق
عاد اذكر ان توني ماخذه البلاك بيري اول ما نزل الجديد وحححححيل كنت مستانسه عليه
فطرت بسرعة لفوتو وصمم هالتصميم بعد ما صورت تلفوني الجديد

التصميم السادس كان بعد تطبيق لدرس واذا اذكر كان الدرس درس دمج وطبقت الخطوات كلها
بس كالعادة الخط كان خايس شوفوا النتيجة

^ بالله الخط العربي كان تعقيد ولا اخفيكم ما كنت اعرف احمل خطوط ولا اثبتها في الفوتو
> كنت بدائية واجد في التصميم زين مني اعرف ادمج ههههه

^
التصميم السابع كان اهداء لواحد اسمه انسان ذوق كان زميلي في القسم العام ايام انمي تون القديم عام ٢٠٠٩ اتوقع
عموماً الاهداء مدري كيف اني كنت مستانسه عليه قبل ههههه

^ ما لاحظتوا اني ميتتته على هالخط ؟
شكله كان موضه بعد انا متأكده ههههههه < ترقع لنفسها
هذا سويته لمدونتي في اليوم الوطني

التصميم الثامن كان اول تصميم كبير اسويه ومن مخي مش تطبيق درس هههههههه
< ما كنت مصدقة نفسي + الصوره اللي بالتصميم كانت من احب الصور لي
يمكن في كل تصميم احطها ليش ما اعرف هههههه

^ قلت لكم الخط ذا هيبه ههههههه
بس لاحظوا العيب هنا اني ما دمجت الصوره عدل ومبين اثار المسح فيها
فأفضل حل يا اني ادمجها عدل حح او اني احط خامة تغطي الفاصل بينهم
عموما كنت لسى صغيره في مجال التصميم بس الواحد لو يرجع يشوف تصاميمه بيلقى فيها عيوب وهو بنفسه بيعدلها
التصميم التاسع لنفس الصوره تقريباً

^ كنت احب الايطار المنقط كثثثير وحركة اضافة البيكسلات المربعه تعلمتها من درس
بس الخط ييييجيب الهم فعلاً كانت كلمة Love عباره عن فرشاة مش خط < شفتوا الفن
التصميم العاشر كان نتيجة اول درس اسويه في حياتي ولا كنت سعيده كثثثير بالنتيجة
والدرس عباره عن عمل خلفية بدون استعمال اي خامة < كنت احاول ابتكر شيء من ولا شيء من زمان

عموماً عيبي الوحيد هو الخط طبعاً ومدري ليه البيكسل تبع الحقوق رايح فوق ههههههه
اختياري للريندر والكلمات ما كان موفق ابداً
بس كأول درس لي يعتبر زين
التصميم الحادي عشر كان مستوحى من أغنية كنت احب اسمعها قبل هههههه
تخيلوا يوم شفتها رجعت اروح اسمعها

^ لا بأس به والله عجبني الدمج كنت شطوره والله بس هممم الخط شوي يبي له
التصميم الثاني عشر كان من مخي وحاولت اني اخفي الشخصيه وادمجها لحتى تصير الصوره والخامة وحده
< ما اعرف وش كنت افكر فيه وقتها بس كنت ابي الصوره والخلفية وحده مثل كذا

^ ما كانت النتيجة زينه خصوصا ان فيه فراغات كثيره بالتصميم لو تلاحظون
التصميم الثالث عشر والرابع عشر والخامس عشر والسادس عشر كان تطابيق لدروس بعد بس انا سويت اكثر من نموذج لنفس الفكرة

^ بالله فيه مساحات فاااااضيه وانا متأكدة انه من الدرس اللي طبقته
بس هذي التصاميم في ذاك الوقت كانت هيبه ترا !
والتصميم الاخير لجولتنا كان نقطة تحول حيث كان تطبيق لدرس وحده كنت امووووت في تصاميمها وكانت مثل ما تقولون مثلي الاعلى بالتصميم
كانت متحرفة جدا جداً وتعرف جميع انواع التصميم فالحمد الله انها هي احد اسباب وصولي لهذا المستوى
ما تعرفونها لانها كانت من منتدى اخر بس الله يحفظها وين ما كانت لاني تعلمت منها الكثير

^ لاحظوا تحسن مستواي هنا كثييير
والله عجبني التصميم جداً ومبين اني انا اللي قاصة الريندر شوفوا كيف شعر ديمن ههههههههه
وبس والله هذي كل تصاميمي القديمة
وحبينا نرويكم ما كانت عليه جولز قبل هههههههه
ونوصل رسالة ان اي واحد تصاميمه في البداية اذا ما كان راضي عنها وبكره بأذن الله اذا تحسن مستواه ورجع يشوفها بيقول زين ما وقفت
لا تخلي الانتقادات تطغى عليك واستمر بعجلة الابداع
حبيت اسمع ارائكم على بداياتي هههه


كوناتو - جولز

ملاحظة : جميع المنتديات القديمة اندثرت لذلك عرضت تصاميمي بروابطهم وليس القصد الاعلان !
​

 

[J o u l Z]

ملاحظة: من المؤلم ان تفقد انسان غالي عليك وتتوق للقائه وهو دائما ما يكون بجانبك ولكنك لا تشعر بوجود مشاعره تجاهك



-

السلام عليكم
كيف حالكم ؟
مبارك عليكم ما تبقى من شهر رمضان
الحمد الله على ما اعطى ربي وهب لي ابني عبدالله
توقعت والله ان اخوانه يغارون منه كون انه صغير ودايم معي
بس للامانه استوقفني موقف صار اليوم
انا كنت اصلي العصر والبيبي كان نايم في سريره
وقلت لاخته الكبيرة شيخة (٥ سنين) تنتبه لاخوه راشد (سنتين) ان ما يجيه لين اخلص صلاه
المهم وقت اني اصلي بكى النونو تخيلو جاء اخوه وركب فوق السرير ( هنا انا خفت) بس والله المنظر فرحني
راشد يقول لعبود اخوه بس بس بس ( ويربت عليه ) ماما الي (ماما تصلي)
المهم خلصت صلاه وحبيت راشد ومدحت اللي سواه وقال لي ماما بيبي يبكي
هنا حسيت اني لازم ازرع الثقة فيهم واخليهم يساعدوني بدل ما اخاف صراحة كنت متخوفه من اخوه (لانه متعلق فيني )

اللهم بارك لي فيهم يا رب العالمين واجعلهم من البارين
والله المدونة مغبرة
لي رجعة ان شاء الله ما اسحب
-

سؤال لكم
تبوني اتكلم عن مواقف قديمة صارت لي بانمي تون القديم ​

 

[J o u l Z]

ملاحظة: قد تكون كلماتكَ هي ابشع سلاح ممكن ان تتخيله اذا لم تنتقي الكلمات وحتى ولو كانت بمسمى (صراحة) فليس كل قلب يتحمل فكنّ انتقائي في كلماتكَ


-

السلام عليكم ورحمة الله وبركاته
شحالكم ؟ ان شاء الله تمام
امانة كنت بكتب هالتدوينه امس وتكيسلت صراحة < العجز
امس جبت وحده تسوي لي مساج لاني جدا احتاج وبشدددة
قبل المساج كنت متفككة وبعد المساج احس ان جسمي ارتاح فصفصت عظامي وجدا ارتحت لان طلع فيني هوا بجسمي < كيف مدري
عموما كان جدا جميل واستخدمت الاحجار الساخنة ارتحت حيل بعدها

وقالت لي بعد ٣ اسابيع تحتاجين مساج تايلندي < عاد مدري اذا كانت صادقة ولا تسوي دعاية

انتوا وش رايكم تحبون تسوون مساج بشكل عام وكم مرة ؟
انا احب بس مب كل مرة اذا احتجت يعني عظامي تعورني او جسمي متفكك وهكذا

-

تضايقت اليوم لما دريت ان شاحني ضاع
انا حاطته على الطاولة وكنت اصمم ولما طفى تعيجزت اجيب الشاحن وقلت بكره بكمل التصميم (الكسل)
لما جيت بفتح اللاب اليوم تذكرت انه مفضي جلست ادور عليه وقلبت البيت وسألت عيالي خصوصا الصغير قال ما يدري وانا متأكده انهم ضيعوه

يأست وافكر اشتري واحد جديد بس يا ترى هل بلقى شاحن Apple Air اصدار 2013 لان لابي قديم حيل

بحاول ادور عليه اكثر اذا ما لقيت بجلس ادور في امازون ولا مواقع اذا تعرفون وين القاه فيدوني

< ادعو القاه

ترقبوا تدوينتي الجاية تفجيرية لاسرار انمي تون القديم
واسرار @SKY NET هههههههههههههه ​

 

[J o u l Z]

-
فاصل
بآنقّ بانقّ بآنقّ بانقّ​

 

[J o u l Z]

-


السلام عليكم حبايبي

بما ان الكل يطالبني اني اكشف اسرار سكاي @SKY NET

اولا كان راعي مشاكل صراحة باعتراف منه في الانمي القديم ما حس بالمسؤولية لين مسك الاشراف

ولا كم مرة غير نك عضوية واجد

snake_asas
.snake.
snake the spy
SNAKE~
S.N.A.K.E

انا صراحة اذكرك بالهنكين (snake the spy & S.N.A.K.E)

ولانه كان صريح جدا < ولا زال صريح وجاد للامانه ما تغيرت شخصيته واجد على انه كان مسالم بس وقت الجد جد

وهذا اللي يعجبني فيه عموما صراحته سببت مشاكل في طاقم فال الامارات قديما بعد ما استلمه من المحال واحساس

وطلع من الكوكب لكن اذكر روز ونارمين كلموني قبل ان يبون يحاولون يرجعونه

وانه جدا محب لانمي تون < ما انكر هالشيء فعلا سكاي من المحبين وبقوة ولا فرطوا فيه ابدا

ورجع بعضوية جديدة غير القديمة THE PUNISHER

وقعد فيها فترة من الزمن قبل ليبيع فال الامارات المنتدى لوجدان اللي سوا سالفة الدمج ونحوه

ترك الطاقم بس ظل بالمنتدى مو نفسنا انا عن نفسي طلعت لما انباع لفال الامارات كنت متضايقه لان احساس والمحال بيروحون

بس عزموني على منتداهم ورحت معهم بس ما تركت انمي تون للامانه ظليت هنا وهناك

نرجع لسكاي تراااااه قبل انسان كسوووول في المواضيع الكبيرة < اعترف

في بداياته كان يمووووووت في الالعاب والترفيه

اكثر قسم كان يحبه سكاي قسم الالعاب وتشوفونه مسنتر هناك ترا مو راعي كرف قبل < اسهل شيء تزود مشاركاتك بالالعاب صح

وابشركم بعد سوا عضوية ثالثة بعد غير القديمة < ليش ليومكم هذا ما ادري

واستخدمها عشان يقنع المشتري الجديد ما يدمج انمي تون ولا يغير اسمه لاسم اخر < طول يومه راعي فزعات

وبنقاشه تم طرده من الكوكب التوني هناك < احزني والله يوم دريت

وبعدين صارت قصة الدمج وافتتاح هالمنتدى وانقسام انمي تون بشكل رسمي هنا وهناك للاسف

بس جعله يسلم ابو الشباب جمع الرفات وجمعنا مرة ثانية تحت راية انمي تون

وطرح الفكرة علينا واللي قالت لي عنه كانت روز "الرسامة روزاليندا" ولا انا قبل ما كانت علاقتي بسكاي قوية كنت اعرفه باسمه

وللامانة ما ترددت اني اكون انا جولز من المبادرين ببقاء انمي تون كمنصة غير مملوكة لاحد بحد ذاته

فهي منصة الجميع والكل يقدر يساهم فيها وهذا اللي يميزنا غير افكارنا اللي الكل كان يسرقها منا

تصدقون ان فكرة عملة التون والبنك وتبادل التونات اول ما انطرحت تم سرقتها من عندنا في كذا منتدى

ولكن يبقى الاصصيل للاصيل دوما مهما تعددت النسخات فهو اصلي بما تعنيه الكلمة

هذا اللي اعرفه بس للامانة على انه كان عاي مشاكل بس كان خوش رجال < ترا امدحك يعني


لي رجعة بشيء يخص المهرجان

​

 

[J o u l Z]

-

اول شيء شوفو هالفيديو ذكرى لكيف كان المهرجان من كالين
اهم شيء البلونات ههههه كانت كشخة

والان اقدم لكم اول فقرة تشيبي انعملت في انمي تون يعني التصاميم هذي من عام ٢٠١٤
صار لها ١٠ سنين وحقوقها لربعي الاجانب

@SKY NET

@Qυeeи

@الحساس

@القطعة النادرة

@THE LAST

^ ما اصدق ان علي نك يكسر الصخر
كانت هبة صدقوني للتطقيمة انا متأكدة

@G O H A N

@ᴅяεαм ғισωεя

@المدمر الفاني

@R O O B E

@RELENA

@H U N T R E S S

@G W Ė N

@SILVĘR

@Shawn Michaels

@S H E R O

@Kałłеń

@L O S T

@o0 loofy 0o

@juliet sama

@ماركيزة هند

@وميض الأمل

@wind OpPa !

@gg5g




^
اترك لكم التعليق على الازياء القديمة
منشنت اللي اتذكرهم واتمنى يكونون بخير وين ما كانوا

كان معكم ازياء المهرجان الاول

​

 

[J o u l Z]

ملاحظة : احلى شيء في الحياة انك تستمع لشخص يكذب عليك وانت تعرف انه يكذب ومكمل معه السناريو وبعدين تصدمه انا هنا انبسط حيل -افهم اني كاشفتك-


-

السلام عليكم ايها التونيون
شحالكم عساكم بخير ؟
من زمان ما حطيت شيء بمدونتي
عموما عجبني سؤال فعالية المدونين قلت اشارك
​

ماذا لو أتيحت لك فرصة السفر إلى أي مكان في العالم،فأين ستذهب ؟ أتحفونا بالوصف​

بخاطري ازور الصين وتحديدا هونج كونج
كون اني جيت اليابان وجدا انصح فيها وبقوة
ولاني محبة ابدية ازلية لشرق اسيا
بخاطري ازورها واشوف معالمها اللي يشهد الكل انها جميلة
اذكر مره عام ٢٠١٩ كنت انا وزوجي مخططين نروح و كان عمر بنتي سنة وما كان عندي الا هي وقتها
قبل ازمة كورونا (كان وقتها توها بالبدايات تنتشر بالشرق )
وسبحان الله ما ربي كتب لان كان فيه مشاكل بين الحكومة الصينية وبين حكومة هونج كونج وكان الوضع غير امن !
اذكر كلمنا سفارتنا هناك نتأكد اذا نقدر نجي ولا لا ؟
قالت لنا السفارة لا تجون الوضع مش امن وعادي جدا تتوقف القطارات ساعة او اكثر وصعب التنقل مع المظاهرات
قلنا رب ضرة نافعة وغيرنا الوجهة الى سانغفورة (كانت ثاني مره اجيها)

وكما قلت كانت بداية ازمة كورونا وما كان الكل يعرف كورونا وقتها عدل حتى اني انصدمت انهم يتأكدون من حرارتي وحرارة بنتي كون انها ما بينت في الجهاز !
قلت غريبة وش يبون بحرارتي يفحصوني ولا بعد في المطار كان شيء جديد بالنسبة لي

وللعلم كان زوجي داري بالوضع بس ما قال لي وحتى عاتبته وقال شالفايدة تدرين وتخترب السفرة هههههه

استمتعنا فيها ولله الحمد
بس كنصيحة لاي احد بيجي سنغفورة ٥ ايام لشخص زارها من قبل الى ٦ ايام كاول مره كافي عليها لان بتخلصها وتخلص الانشطة اللي فيها من صغرها

وبس والله اتمنى اني اجي الصين عموما في المستقبل القريب


استمتعت بالفعالية جدا وحبيت السؤال

قولوا لي وش خاطركم اتكلم فيه في التدوينة الجاية
< افكارها ماش مصفر مخها

​

 

[J o u l Z]

ملاحظة: لهو امر جميل ان يكون هناك من يهتم بك ويضعك في اولى اولوياتك بلا مقدمات

-

السلام عليكم ورحمة الله وبركاته
كيفكم ايها التونيين ؟
شحالكم ؟ ان شاء الله تمام
سر التدوينة هنا بقسمها الى نصين للامانة
اولا فرحتي لا تكاد تسعني لان اولى فرحتي قد تخرجت من الروضة <
ادري ان مشوارها طويل بالمدرسة عموما بس فرحوهم بالحفلة اللي مسوينها لها
وكان الحضور لاولياء الامور منظم ومسوين لهم فعاليات مثل
الرسم على الوجه وغزل البنات وفشار وكورنر رسم وتلوين
وطاولة مرتبينها عليها كيكة لدفعتهم كاملة وقصوها
(٤ كيكات لكل صف وحده )
استانست بنتي واجد وكملت وناستها لما وديتها تشتري اللعبة اللي تبيها
بعضهم قال لي تو مشوارها بدا والجد بدا وبتتعبين وما نحوه
مثل ما انا تعلمت اتوقع ان الموضوع يبي له متابعة واستمرار
ووراح ابدا معها بالصيف كون اني ما راح اسافر الصيف هذا
فمخططه ادخلها مركز تحفيظ قران وتعليم القاعدة النورانية
بدل ما يضيع الصيف وهي ما استغلته بشيء يفيد

-

الامر الثاني اللي ابي اقوله وصار لي اليوم ونرفزني
الاطفال مسؤولية الاهل وخصوصا الام بشكل كبير
اذا كان الاهل مو قد المسؤولية ليش يجيبون عيال !
اليوم تواصلت مع ولية امر مهملة للاسف جدا
كان الهدف من اتصالي ان البنت تعاني من مشاكل صحية
عليها حرارة وترجع من صبح وتم التواصل معها من قبل الاخصائية الساعة ٨ الصباح
لما جاء وقت حصتي الساعة ١٠:٤٥ اكتشفت ان البنت فيها اسهال لان كل شوي رايحة الحمام -الله يعزكم-
لما طلعت تواصلت مع الام لاني اكتشفت امر قالته لي البنت
- عذرا ما اقدر اقوله لانه امر حساس شوي -
انصدددددمت جدا جدا واول ما طلعت رحت تواصلت مع الاخصائية
وقلت لها الموضوع كذا كذا قالت للحين الام ما جات تاخذ البنت قلت لها لا
قالت انا كلمتها الساعة ٨ وكان الوقت وقتها ١٢
عموما اول ما كلمتها وش اول كلمة قالتها لي هاه بنتي وش مهببة بعد وش مسوية غلط !!!!
قلت لها بنتكِ ما سوت شيء غلط انا كلمتك لان بنتك الان تحتاج تروح للدكتور تحتاج مضاد حيوي حرارتها ما تنزل !
ولما واجهتها باللي قالته لي بنتها انكرت وقالت تكذب
قلت لها مستحيل الطفل يكذب الاطفال في هالامور ما يكذبون
بررت بسبب غير مقنع واعترفت وعصبت عليها وش قالت في النهاية
حسابي معك يوم الاحد قلت لها تعالي باب المدرسة مفتوح
المضحك المبكي انها ناوية تشتكي علي
وبس صكرت هههههه

وبس والله انتظرها يوم الاحد عشان اشوف اخرة هالموضوع
لان مب اول مره !
صح الظروف العائلية قد تلعب دور في شخصية الطالبة
بس لا يتعدى الموضوع الصحي والاهمال عن هالموضوع
شتان بين الاثنين ! انتِ كأم مسؤولة عن هالروح اللي بفضل الله جبتيها بعد ٩ شهور تعب ..

ما اقول الا الله المستعان وجعل هالشخصيات تنقرض يا رب
معليش حبيت ادون اللي صار معي اليوم !

شرايكم بهالشخصيات ؟
تنرفز صح ؟؟

- اشكر @ديمو. على طقم المدونة الجديد -

​