فخر المدونين الريفُ صوتك و المدائن صوتهم ، أنت الهدوء و كلهم إزعاج ! (1 زائر)

بعد صلاة العشاء اليوم
بدأت اقرأ الورد اليومي كانت عندي سورة الصافات .. و كمان قررت اقرأ سورة الكهف بما انو بكرة الجمعة
فجأة الدنيا قامت و ما قعدت هون بمخيم النصيرات المخيم الجديد
اللي من اول الحرب ما ذقنا بهالمكان لو لثانية راحة بال
من كل شي عنا رعب
من الكواد من النسف من الدبابات من البوارج و من الطيران الحربي و الزنانة من كل شي جربنا الموت هنا

لكن و الله و لا شي من هالخوف هاد كلو متل صوت الصاروخ اللي يضربوه و خصوصا لو هالصاروخ نازل جمبك

المكان هنا مرعب لكن ما في مكان تاني نروح له حرفيا نحنا مو بأمان و لا بأي بقعة على ارض غزة

اليوم نسفوا مربع كامل و انا بنهاية سورة الكهف .. و لما جاء الاسعاف قرروا يكملوا ع المربع الباقي و يقصفوا بيت ناس يقربوا لنا
انت تخيل بس انو ناس شفتها قبل بيوم و كنت جالس معها ثاني يوم يجي خبر استشهادها و هالناس حرفيا مالها بأي شي يخص المقاومة
بس هيك جاء ع بال اليهود تقصفهم

و كل شهيد له قصة تدمي القلب كأنه كل قصة تقولك ليش ربنا يختارهم و ليش ربنا يصطفيهم و نحنا الباقيين يا حسرة علينا مدري ليه باقيين حتى نزعل على هذا و هذا و نقول يا رب تحسن خاتمتنا

ما اعرف القهر هاد لمتى يكمل بس و الله اليقين بقلوبنا انه فرج الله قريب مهما نحسه تأخر مهما يكون تأخر نعرف انه قريب
انا اعرف ممكن اليوم أكون عم أكتب
و بأي وقت أموت .. انا من داخلي مو مسامحة حد خذلنا
مو مسامحة اي حد استهزئ بدمنا و لا مسامحة اي حد مسلم ما وقف بصفنا

يا الله انت تعلم كمية الرعب اللي بقلوبنا من كل اللي شفناه و سمعناه و لو هالشي ع قدنا نحنا كبار و نتحمل .. بس الاطفال و رعبها ما يتحملوا
يا الله وحدك تعلم مهما تكلمنا ما نوصف الكلمات و الشعور ما يوصل لو نقطة من بحر اللي نشوفه

يا رب تعبنا و نحنا نحكي امام عالم اصم ابكم و أعمي

يا الله انتقم