مدونة متألقة A Ca$e for a Gentle Thief and a Treasured Heart - 7sN (2 زائر)

[7sN]

هالفترة قاعد أقرأ رواية The Hobbit و ألف ليلة وليلة + أشوف انمي جزيرة الكنز او كما هو معروف
بالياباني Takarajima وأشوف لعبة Darksiders (ما ألعبها بس ناوي اشتري الجزء الثاني منها)

رواية الهوبيت جدا عاجبتني .. مشكلتها الوحيدة هي الشرح الزايد لتفاصيل الأماكن اللي يروحون لها
الشخصيات ، يمكن هي مو مشكلة في إطار القصة نفسها لأن القصة أساساً تتكلم عن المغامرة وعن
اختلاف الأماكن عن بعضها وطريقة الشرح اسمها World-Building فهي جدا نافعة للرواية ، بس
انا انسان أتعب من الشرح بصراحة أحب الحوارات وأحب لما الشخصيات يتكلمون ويواجهون بعض
بالكلام ويتهاوشون ، الشرح يمللني شخصياً لكن ممكن يكون إيجابي لأغلب الأشخاص

بعيد عن الشرح أشوف ان القصة جميلة جدا وتم تقديمها بطريقة بسيطة ومفهومة من غير فلسفة زايدة وتضييع
وقت ، القصة تاخذ وقتها وما تتسرع بالأحداث وممكن هالشي يتسبب بملل لبعض الناس ولكن بالنسبة لي حبيت
كل ثانية تروح من أجل توضيح الشخصيات ، شخصية بيلبو مميزة وشخصية جاندالف روعة .. وطبعا شخصية
غولام ابداع .. الرواية ما تعتمد على الغموض الزايد بل على العكس الرواية واضحة ومفهومة لأنها تعتمد بالشكل
الأساسي على مغامرة بيلبو وشعوره خلال المغامرة .. بعض الروايات اللي حاولت أقرأها ما قدرت أكملها بسبب
الغموض الزايد اللي بكل فصل يطلع بطل القصة يقول "واه ماذا يحدث" وبعدين يصير حدث غير مفهوم وبعدين
البطل يقول "واه مالذي حدث هذه المرة" Rinse and Repeat

أنصح فيها طبعاً ولو ما حبيتها فأنت ذوقك خايس

انمي جزيرة الكنز شفت منه 3 حلقات خلال 3 أيام (بطيء جداً أدري) وبكل حلقة أستمتع أكثر وأكثر ، ويارباه
على الانعاش اللي احسه لما اشوف انمي ما يستهبل ويذكرني انه انمي ، حبيت كل ثانية من هالـ 3 حلقات بسبب
انه ياخذ نفسه جد ، زهقت من الانميات اللي البطل يصارخ فيه لمجرد انه بطل الأنمي ، كرهت انميات الشونين
كلها ويارب شركة شونين جامب يصير فيها شي وتصير شركة رعب جامب عشان نشوف شي مختلف بس

المهم بعيد عن الدعاء عليهم ، جزيرة الكنز انمي يتشابه مع رواية الهوبيت من جانب أخذ الوقت لتوضيح الشخصيات
وعدم التسرّع اللي يفقد قيمة الشخصيات نفسها ، انتاج الأنمي مميز جدا من خلال هالحلقات القليلة اللي شفتها ، الرسم
وتصميم الشخصيات مناسب جداً لقصة نفس هذي ، البساطة متواجدة ويتم تطبيقها بأفضل شكل ممكن ، الأنمي ما يحاول
يقولك انه عميق لأنه ما يحتاج يمثّل عليك ، بل يحتاج يوريك قصة صحيحة وبسيطة ومؤثرة

أنصح فيه طبعاً ولو ما حبيته فأنت ذوقك خايس

تكلمت عنهم تحديداً لأن بينهم شبه كبير من ناحية رواية القصة ، الكاتب يروي القصة بأبسط طريقة ممكنة ورغم
اننا نتعود على القصص العملاقة ، إلا أن هذي القصص البسيطة لها تأثير علينا لأنها تتعمق بالنفس البشرية ورغباتها
بالمغامرة وتحقيق الأهداف .. طبعا مو كل قصة تتبع هالنظام تنتج شي حلو لأن الموهبة مطلوبة ، ولما تتوافق موهبة
الكاتب مع النظام هذا بيطلع شي فعلا مميز .. ولو ما تحبونه فأنتوا ذوقكم خايس

وهذي تحية للمى هااااي

#آسف

​

 

[7sN]

ما أحس اني اقدر أكتب شي ينسّيكم الكورونا وتعامل الناس مع هالفايروس .. كلنا ندري إنه مو خطر لما يتم
اتّباع الطرق اللازمة ، بس لا ننسى اننا بنفس الوقت عايشين مع بشر! تتوقع انك تقدر تثق بكائن بشري وقت
الأزمات؟؟ لو قلت نعم فشكلك ما ركزت بقصص الزومبي بالشكل الكافي

خلال هالوقت أحس لازم نركز على أنفسنا أكثر وعلى حياتنا .. كلنا قاعدين ببيوتنا وما عندنا شي فاستغلال
هالوقت لأنفسنا أِشوفه ضروري .. هل قاعدين تستغلون وقتكم بشي مفيد؟ هل عندكم خطط معينة لين تنتهي
الأمور؟

حالياً انا قاعد أحاول أقرأ قصص ، صارلي مليون سنة وانا أحاول أتعود على القراءة والحين صرت أحسن
الحمدلله قرأت 4 نصوص لمسرحيات المؤلف تشيخوف

النصوص المسرحية مثل ما ذكرت سابقاً جميلة جدا ومختلفة عن اللي توقعته ، من مميزاتها هي أن الشخصيات
يتكلمون كلام طويل جدا .. هذي الطريقة عادة ما أحبها ولكن لما يكون النص مسرحي تختلف الأمور ، لاحظت
من خلال أسلوب كتابته ان المسرحيات تختلف عن القصص الباقية من ناحية الأفكار والأهداف ، إلى الآن ما
شفت مسرحيات كثيرة بنهايات سعيدة .. غير طبعا المسرحيات الكويتية اللي تجاهلها أفضل من ذكرها ، أنصح
بقراءة بعض مسرحياته رغم كآبتها ، خصوصاً نص مسرحية "الخال فانيا" بما انها آخر وحدة قريتها

وقاعد أشوف فيلم وثائقي عن المؤلف H.P. Lovercraft ، من أهم مؤلفين قصص الرعب بالتاريخ ، وصرت
مهتم بقصصه وحالياً بدأت في The Call of Cthulu

ومن هنا نتوصّل إلى أني ما اختلفت أبداً عن اللي كنت أسويه قبل حظر التجول

وانتوا؟ شلون قاعدين تستغلون وقتكم؟ مهتم أعرف بصراحة

​

 

[7sN]

#يوميات_حسن_في_حظر_التجول

هذا الجزء الأول من يومياتي بظروف حظر التجول ، مع اني ادري ما راح اسوي جزء ثاني
وراح اسحب على اليوميات .. خلاص اصلا شكلي بكنسل التدوينة

لا خلاص اتغشمر (امزح)

الحين هذا اليوم الثالث؟ الرابع؟ من الحظر والحمدلله طول هالأيام بس قاعد مقابل اهلي ، الحلو
بأهلي ان كلهم مهتمين بنفس الأشياء اللي انا مهتم فيهم وهذا يخلي الوضع ممتع :

اخوي الصغير يحب الأنميات والألعاب والأفلام < تربيتي
اخوي الكبير يحب الأفلام والمسرحيات
أمي تحب كل شي .. لأني أعلمها على كل شي المسكينة

ولكن! أبوي ما يحب شي بس يحب تلفونه وقروب أصحابه بالواتس ويصدق كل شي يكتبونه
عن الكورونا وياريته يكتفي بالأخبار لا ويقول نكت بعد وتعال يا حسن اضحك عشان
لا يجيك كف يذكرك ببر الوالدين

المشكلة مو هنا ، المشكلة اني لما اقول شي عشان يضحك ما يضحك
ولما اتغشمر (امزح) معاه بدل ما يضحك يقعد يبرر أفعاله
لا وبعدين يقولي ترا الأب صديق ابنه .. اي شكراً

غير المعاناة الأبوية ، انتهينا من المعاناة الجامعية اللي وأخييييراً أعلنت عن وقف دراسة الأون لاين ، في كثير
ناس جربوا المحاضرات أون لاين وقالوا انها سيئة ، وانا بكل الأحوال ما عندي راي محدد بس كنت أبي أسمع
شي من الجامعة لأن حرفياً الكويت كلها عارفة وضعها إلا جامعتنا -_- بس الحمدلله خلصنا منها

أخ بس .. انا مادري ليش اكتب تدوينة أكون فيها محترم وبعدها على طول تروح الهيبة بتدوينة ثانية

والله أحس شخصيتي تغيرت شوي لما غبت قبل فترة ، من شهر 11 اعتقد لين 2 ، وحتى آرائي بالنقد اختلفت
وايد عن قبل! صرت أحب أشياء محد يحبها وأقول كلام محد يفهمه ، لهالسبب قمت اخاف انصح احد بفلم
الأفلام والأنميات والقصص اللي أحبها بقوه صايره تتطلّب تركيز وتحليل للشخصيات وأفعالهم ، وحرفياً
الناس مالهم خلق هالسوالف

يلا سؤال لكم وإليكم : شنو أكثر شي ما تتحملونه من أهلكم هالفترة؟

تحياتي للبيتوتيين اللي مو حاسين بالضياع

​

 

[7sN]

مرة قرأت بكتاب ان اللي يجلس على كرسي باستقامة ومعدّل أكتافه دايماً يجذب الانتباه ، و في
نوعين من الأصوات ، الصوت العادي اللي يطلع من البطن أعتقد والصوت العالي اللي من مادري
وين ، بس المهم اللي يتكلم بصوت عالي يجذب الانتباه بعد .. فقلت أبي أدمج الأثنين مع بعض واشوف
النتيجة

رحت الجامعة وقتها وكنا نبي نراجع بعض الدروس انا واثنين ، الأول أعرفه معرفة عادية عابرة والثاني أول
مرة أشوفه ، يعني بهالوقت كل المشاركين بالجلسة يبون يثبتون نفسهم .. أول شي كنت ناسي المعلومتين وانا
بطبيعتي أتكلم بصوت خفيف يعني اللي يسمعني أول مرة يقول صوتي يجيب النعاس المهم كانوا يقاطعوني
ويقاطعون بعض بالكلام باستمرار وطبعاً هذي هي الجلسة الشبابية على أصولها

تذكرت المعلومة .. عدّلت نفسي مع أكتافي وركزت على صوتي .. ومن وقتها ما صار أحد يقاطعني
صرت كللل ما أتكلم يسكتون وينتظرون لين أخلص كلامي وبعدها نكمل ، وقتها حسيت بمعنى القوة
وصرت أطبقها كل مرة رغم اني ما أعاني من هالشي بحياتي .. بس لازم لما أتعلم شي أطبقه عشان
أعتبر نفسي استفدت

فأنصحكم بهالطريقة لما تقابلون أحد جديد :

الوقوف\الجلوس باستقامة بحيث يكون الكتف بمحاذاة مع الأذن
الكلام بصوت عالي (لا تفهم غلط وتصرخ بس)

بس المهم الحين كورونا وما راح تقابلون أحد فخلاص انسوا المعلومة

​

 

[7sN]

الشي اللي احبه بمانجات Mob Psycho 100 و One Punch Man هو عمق المواضيع اللي يتكلم عنها
المؤلف وطريقة اختيارها ، دايماً نسمع ان التغيير جيد للمؤلف ولكن أشوف ان اللعب على نفس المواضيع
اللي قدمها المؤلف يعتبر ممتاز

واضح ان الموضوع الأساسي اللي يهتم فيه هو "أهمية تواجد الصراع في الحياة" ولكن أغلب القصص
اللي تقدم هالفكرة تقدمها بطريقة كلنا نعرفها ونشوفها بشكل دائم ، البطل الضعيف اللي لازم يوصل لهدفه
لما يتحول سوبر سامثينق وينقذ العالم .. بينما بهالقصتين نشوف نفس الفكرة تتقدم بطريقتين عكس بعض
مع تشابه النتيجة النهائية

One Punch Man تبدأ بوجود بطل خارق أقوى من كل الشخصيات لدرجة انه يفوز بلكمة واحدة ، ولكن
هل هاللكمة ساعدته بحياته وبنفسيته؟ هل قدر يقدّم شي للمجتمع ما كان موجود؟ بالعكس أصلا محد يدري إنه
موجود أساساً .. قوة سايتاما موجودة للتعبير عن سوء الحياة لما يتلاشى منها الصراع ، لذة الفوز تختفي و
الشعور بالانجاز يأتي مكانه الاحباط لأن كل شي يكون مجرد روتين يتكرر .. صراع سايتاما هو أنه يلاقي
"الصراع" بحياته ورسالة الأنمي هي لا تعتقد بأن الوصول للهدف راح ينهي مشاكلك إلى الأبد ، المشاكل
بتطلع حتى لو كنت غير قابل للأذية

بالناحية الأخرى تقدّم مانجا Mob Psycho 100 قصة ولد عنده قوة روحانية خارقة لا تُهزم من أي أحد ،
ولكن هل هالقوة ساعدته بحياته وبنفسيته؟ هل قدر يساند نفسه أو يحقق هدف واحد من حياته؟ بالعكس !
على الرغم من ملاحظة الناس له إلا أنه هو الوحيد اللي يحاول يختفي ويكتم اللي بداخله عشان ما يأذي
أحد ، وهالشي أثر بسلبية على ثقته بنفسه وصار انسان يخاف وحسّاس وغير اجتماعي وما يعرف يتصرف
مع المواقف الصعبة .. صراع موب هو انه يكسر الخوف والرهبة اللي يحس فيهم دايماً ليتمكن من أخذ
الخطوة الأولى نحو أهدافه .. من أجمل الأشياء ان الخوف اللي يشعر فيه موب ليس خوف من الأشباح
بل من المواقف الاجتماعية وهذا أكبر دليل على تركيز المؤلف على الصراع النفسي

بالقصتين شفنا مثالين لشخصيتين مختلفتين عن بعضهم تماماً ، واحد شخصيته قوية وما يخاف من شي
والثاني يخاف يكح ، ولكن يجمعهم هدف واحد و وفكرة واحدة وهي احتياجهم لوجود الصراع بحياتهم
، لأن بوجود الصراع يرتقي الانسان ويكون له قيمة خيالية مهما كانت الظروف والمواقع ، لا ننسى
ان قصة سايتاما تركّز على العالم بينما قصة موب تركّز على مدرسة ، وهذي كلمة صريحة من المؤلف
"ون" بأن مهما اختلفت الظروف يبقى احتياجنا للصراع

#فلسفة_آخر_الليل

​

 

[7sN]

توقعت الحظر بيخليني أدخل المنتدى أكثر ، بس خلاني أنشغل مع أهلي أكثر -_-
صرت نادراً أقعد بالغرفة أصلا من كثر قعدتي بالصالة مع العائلة الكريمة

خططت بالفترة اللي فاتت لمشاريع كثيرة واشتغلت على بعضهم إلى أن ينتهي الحظر عشان
أنتقل للشغل على المشاريع الأخرى ، بصراحة متعة وخوف بنفس الوقت!

سجلت في دورة أونلاين للإخراج والتمثيل رغم اني ما راح أخرج ولا أمثل بس اهتمامي بهالمجالات
ورغبتي باستيعاب هالجوانب بالأفلام والمسرحيات والأنميات كان الدافع الرئيسي .. الدورة كانت يومين
انتهيت من اليوم الأول بمعلومات قيمة جددداً على أن أبدأ باليوم بالثاني بعد التأجيلات الخيالية اللي أجلتها

مرّينا بظروف مادية معينة كانت هي السبب الأساسي لانشغالي بس الحمدلله انتهت قبل فترة قصيرة

أخيراً .. والحمدلله .. مسحت تويتر من الجهاز كله رانز
قبل كنت أعطّل الحساب ، الحين عطّلت الحساب ومسحت التطبيق بلا رجعة ودااايماً أقولكم والحين
راح أعيد : الحياة بدون تويتر رااااحة نفسيييية

ليش تدخلون وتقرؤون آراء ناس مو متخصصين وكلهم يتسابقون عشان يقولون آراءهم الشخصية
عن مواضيع ما يفهمون فيها ولا قارئين فيها؟ ترا المشاعر عمرها ما كانت مقياس

يعني لما تقول لشخص 1 + 1 = 2
و يرد عليك "هذا رايك الشخصي"
لازم ما تحترمه على فكرة

ليش بكل مرة أرجع للمنتدى لازم أضيع بين أسماءكم؟

وشكراً

​

 

[7sN]

قالجامعة بتكرّهني بحياتي ياجماعة

ليش كل قراراتهم غريبة بالله؟ يعني تخيلوا معاي .. لو سمحتوا يعني -_-

قبل بداية الكورس قالولنا اللي دفع للمادة بالسابق لن نجعله يدفع مرة أخرى ، طبعاً انا استانست (فرحت)
لأني دفعت لتسجيل المادة قبل الكورونا وبس صارت الكورونا ما قدرنا ندرس ، الحين يقولون لو ما درست
اونلاين راح نخليك تدفع لنفس المادة الكورس القادم ! هذا أول قرار غريب

ثاني شي غريب هو الدكتورة اللي كل يوم تغيّر وقت الامتحان والمشكلة عندنا قروب بالواتس وكلنا متعقدين
، ناس يقولون الامتحان المحاضرة القادمة ، ناس يقولون بعد محاضرتين ، ناس يقولون الامتحان بيكون اختيارات
، ناس يقولون الامتحان بيكون مقال ، غيرهم يقولون الامتحان بداية المحاضرة وغيرهم يقولون بنهايته ، يعني حرفياً
جمعنا كل الاحتمالات بموضوع واحد -_-

المشكلة مو هنا ! المشكلة ان وحدة بالقروب قالتلي "يا بنت الحلال"

يعني بالله اسمي حسن وصورتي كلها لحية وشنب ، والحين مع الكورونا لحيتي صارت لحية
سجين ، بنت الحلال من وين جت بالضبط

شنبات عالفاضي

نغيّر الموضوع لشي جدّي شوي

أمس شفت نقاش عالسريع بين مسلم وعلماني ، المسلم كلامه كان عقلاني ومنطقي ويتكلم بنظرة
العلماني اتجاه الشواذ .. العلماني رد عليه باستهزاء - كالعادة - وقال "الأخ فاهم العلمانية خطأ"
وبعدين كمل كلامه وقال عن الاسلام "أكيد يفهم خطأ لأن دينهم كله حفظ"

اللي لفت انتباهي في هالرد هو سرعته بالهجوم على الدين بدل الاكتفاء بالدفاع عن العلمانية كفكر ومبدأ ، وطبعا
انا ما اقول ان كل العلمانيين غير عقلانيين لأن الشخص الواحد لا يمثّل الكل ، ولكن اللي لاحظته ببعضهم هو تسرّعهم
بـ نفي كل شي يخص الاسلام ..

يعني بالمثال السابق على طوول قال ان "الدين الاسلامي كله حفظ" بقصد أن المسلم لا يفهم بل فقط يحفظ ، وأي شخص
متديّن أو على الأقل متعمّق بالدين يعرف ان هذا كلام لا صحة له بل سطحي بشكل غير طبيعي لأن الاسلام يعتمد اعتماد
كلّي على الاثبات عن طريق العقل والمنطق ، الفهم والاستيعاب هو الأساس في الدين وليس الحفظ .. أبداً

وتذكّرت لما أحد يتكلم عن الزواج التقليدي ، على طول نشوف بعض العلمانيين يقولون الزواج بالسابق كان ناجح ظاهرياً
ليس واقعياً لأن المرأة كانت مظلومة بالسابق وما تقدر تطلب الطلاق .. الحلو هنا انهم على طول يقولون هالكلام ولكن لما
نتكلم عن أييي موضوع ثاني نشوفهم يقولون "التعميم لغة الجهلاء" .. مااا شاااء الله الحين صار التعميم لغة الجهلاء؟ بس
لما الموضوع يتضمن الزواج التقليدي على طول تتجه للتعميم بسهولة ، وهذي بالضبط مشاكل العلمانيين والغير اسلاميين
من وجهة نظري ، لا يوجد أساس ولا قاعدة واضحة يمشون عليها..

يقولون "لك الحرية بما تفعل" ، وأول ما "تفعل" الشي الخاص بدينك تلاقيهم اول ناس يوقفون بوجهك

الحمدلله على نعمة الإسلام ، ونصيحتي انكم تركزون على الدين مثل تركيزكم على الأمور اللي مهتمين
فيها ، دايماً أستغرب من الشخص اللي يقولون عنه مثقف لأن قرأ كتب كثيرة ولكنه ما قرأ شي عن الاسلام ،
التناقض هنا عجيب! إذا كنت تبي تقرأ للوصول إلى نتيجة ليش ما تتعمق بالمواضيع اللي تهمك وتشغل بالك؟
بس شاطر تفكّر وتفسّر من نفسك؟

شرايكم بس بتغيير المود فجاة .. أتواجد لتخريب المزاج أعزائي

صدقوني لما أقعد الصبح راح أندم على هالتدوينة -_-

​

 

[7sN]

"احذر جمال غروب الشمس، فعندها يدخل الظلام إلى قلوبنا بسهولة"

مستمرة معاناتي مع الجامعة وسوالفها، سوينا قروب للشعبة على أساس ان الأمور تكون أسهل
والقرارات توصل أسرع .. إلى الآن يسئلون لو في كويز ولا لا المشكلة الدكتورة قالت ان
الكويز يكون كل أسبوع، يعني خلاص لمتى تسئلون؟؟

المشكلة ضيعوا علي جهودي لأني من البداية كنت أشرح كل شي بس مع الكلام الزايد تسجيل
الصوت يروح وما يسمعون

الحين سؤال .. للبنات

ليش لما وحدة تسأل، والثانية تجاوب على السؤال، الأولى تشكرها كأنها انقذت حياتها؟
حبيييبتي مشكووورة ياقللللبي
العفووو ياروووحي انتي ياحيااااتي

ترا عادي وحدة سألت .. الثانية جاوبت .. ليش السعادة واصله لأقصى مراحلها؟
وليش لما انا أجاوب ما يقولون لي جذي؟ #مزحة

ننتظر الإجابة من الأخوات الأعزات

الاقتباس ببداية التدوينة هو اقتباس تقريبي من أنمي جزيرة الكنز، بكل سهولة من أفضل الأنميات
اللي شفتها إلى الآن

ما وصلت للنهاية حالياً انتهيت من الحلقة 13 .. وفعلاً انصدمت من الجمال بكتابة الشخصيات
وصِلَتهم ببعضهم! تفاعل شخصيتين جيم هوكنز وجون سيلفر جدا جدا رائع ومتقن و واقعي
ويلعب دور كبير على الصراع المهم للشخصيتين .. أنصح فيه بشدة

+ أدري ما تكلمت عن هالأنمي ولكن قبل مدة تابعت أنمي البؤساء وخلصته .. رائع كتابياً
وياخذ وقته ويعطي الصراعات حقها وغير متسرع

​

 

[7sN]

السلام عليكم ورحمة الله وبركاته
كل عام وانتوا بخير جميعاً مر وقت طويل على آخر مرة كتبت فيها تدوينة، ببساطة لأن ما كانت عندي
مواضيع مهمة أو أفكار أقدر أكتبها، اللي فكرت فيه هو إني أتكلم عن سنة 2020 بشكل مختصر ومفيد.

بهذي السنة حصلت احداث كثيرة وتغييرات كثيرة، ظهر أسوأ مافي الناس وعرفنا ان البشر بعيدين كل البعد
عن التحكم في رغباتهم من أجل المصلحة العامة، وفي الجانب الآخر وجدنا من يهتم بنفسه ليحافظ على سلامة
أحبّائه، رحم الله جميع أموات المسلمين وحفظكم الله جميعاً.

أنا عن نفسي ظهر أفضل مافيني بهذه السنة، حصل لي تغيير كبير بشخصيتي وكان هالتغيّر ملحوظ وأتمنى
استمراره لأني كنت أحتاجه منذ سنوات ركّزت بشكل كبير بالجامعة هالكورس وتخيلوا أن في اختبارين
كتبت فيهم أفضل ما كتبت في حياتي بسبب تعوّدي على الكتابة في المدونة شكراً للمدونة على مساعدتي في
ترتيب أفكاري وحصولي على درجات عالية ما حصلتها في السابق

انتهيت من مشاهدة أنمي جزيرة الكنز اللي صرت أعتبره أفضل أنمي تابعته، شاهدت فلونة للحلقة 16 وكان جدا
جدا جميل وحالياً أتابع أنمي Cyborg 009 نسخة 2001 وانبهرت بشدة من مستوى الإخراج والكتابة
الممتاز، انا قرأت 16 فصل من المانجا وعلى الرغم من حبي للكاتب Shotaro Ishinimori إلا أني كنت أرى
بعض المشاكل وطرق لمعالجتهم، وكل شيء كانت لدي مشكلة فيه تم تعديله في الأنمي نسخة 2001 ولم يكتفوا
فقط بالتعديل، بل وأضافوا مشاهد كنت أتمنى إني أشوفها في المانجا .. للآن شفت 5 حلقات ومتحمس أكمل الأنمي
ومتحمس لعمل مخرج الأنمي Jun Kawagoe الجديد المُسمّى بـ Getter Robo Arc من شدة اعجابي بأداءه.

ولهنا أنتهي من التدوينة البسيطة في المحتوى، أحببت إني أشارككم كل هذا، أشكركم وأتمنى إني لم أضيّع وقتكم

 

[7sN]

السلام عليكم ورحمة الله وبركاته

قرأت اليوم جملة عجبتني جداً رغم أن قارئها ممكن يفهمها خطأ في البداية وهي:
"من يجرؤ على الاعتراف بإيمانه بالله؟"

بالبداية استغربت، كلنا نؤمن بالله بلا شك، فليش هالسؤال موجود؟ ليش الإيمان بالله يوضَع تحت صفة "الجرأة"؟

ببساطة، لما تعترف بإيمانك بالله أنت تعترف بأنك تدرك الأخلاق وتدرك أن مصدر الأخلاق هو الله، وبما أنك تدرك هذين الأمرين
فلا بد من أنّك تعمل بما تعلم، أو بهذه الحالة تعمل بما تدرك، بمعنى أن إلتفاتك أيها المخلوق لوجود الله يجعلك - من المفترض - حريص
أكثر من غيرك على اتباع أوامره وتعاليم الدين اللي تتبعه، لأن العقل يُلزمك على اتباع المنطق، والمنطق يقول لك أن تطيع أمر صانعك
وتعمل بما يأمر على أكمل وجه، وإن عملت على أكمل وجه فالله يقول "لك الجنة"، وإن لم تعمل بما أمر الله فليش تؤمن فيه من الأساس؟
غير منطقي بأنك تعترف بوجوده ولا تطيع أوامره..

فاسأل نفسك بكل صراحة وجاوب على الأسئلة بقسوة:

هل إيمانك بالله جعلك إنسان أفضل؟
هل إيمانك بالله له تأثير إيجابي على أخلاقك؟
هل إيمانك بالله جعلك تطيع أوامر ربّك وتضحّي برغباتك التافهة؟
هل إيمانك بالله مجرد كلام تقوله؟ أم أن إيمانك فيه ينعكس على سلوكك وأفعالك؟

بعد الإجابة على هذه الأسئلة اسمح لي أسألك .. هل تجرؤ على الاعتراف بإيمانك بالله؟

إذا كنت لا تجرؤ بأن تعترف لصعوبة الأمر في الوقت الحالي .. اعمل على نفسك حتى تفتخر بإيمانك فيه.


إذا محد فهم شي اعتبروا كلامي هلوسة بسبب الجامعة