مدونة متألقة A Ca$e for a Gentle Thief and a Treasured Heart - 7sN (1 زائر)

[7sN]

​

أولاً مبرووك تطوير المنتدى , الشكل صار احسن بوايد من قبل خصوصاً مع الثيمات
, لأول مرة احط لون المنتدى احمر عشان يتماشى مع ثيم كارتون < يحب ديزاين
شخصيات ثيم الكارتون ​

ثانياً بالحديث عن الشخصيات في شي لاحظته بالآونة الأخيرة و اهو يخص الشخصيات
بالقصص .. هالشي اهو ماضي الشخصيات​

في ناس شافوا فيلم Dunkirk ( ما شفته ) و قالوا ان مشكلتهم كانت بأنهم ما يعرفون منو
الشخصيات , شنو قصصهم و شنو ماضيهم يعني , و في ناس يتكلمون عن Freeza شرير
دراغون بول و يقولون عنه شرير سيء لأن ما نعرف ماضيه ولا دوافعه لإنه يكون شرير​

انا اتفق ان الدافع يخلي الشخصية مثيرة للانتباه أكثر من الشخصية الي ما نعرف دوافعه , لكن
بنفس الوقت انا مؤمن بإني كمشاهد لازم اعرف عن الشخصية الشي الي يكفي وجوده و أهميته
بالقصة​

مو شرط اعرف ماضي الشخصية لو ان القصة ما كانت ترتكز على ماضيه , هذا شي ينطبق
على Freeza , الي حصلته من هالشرير يكفيني عن معرفة ماضيه لأن ماضيه مو مهم
للقصة ولا للبطل , المهم للبطل ان هذا شرير .. المهم لي كمشاهد اني اشوف افعال هذا
الشرير و اسلوبه بتطبيق الشر نفسه​

هالمنطق ينطبق على ابطال القصص و ايضا الشخصيات الثانوية .. مو شرط نعرف ماضيهــم
و ببعض الأحيان الماضي يخلي الشخصية مملة اكثر .. لو في احد يتذكر كلامي عن الموســــم
الثاني من الهجوم على العمالقة يتذكر اني دايما دايما انتقد الشخصيات و مو عاجبيني , هــــــذا
لأن شخصياتهم تعتمد على ماضيهم اكثر من حاضرهم .. هيستوريا أميرة - يوميرو اسمهـــــا
مهم - راينر و بيرتولت لهم ماضي و سر - ايرين له ماضي و سر - ابو ايرين له ماضــــــــي
و سر - ميكاسا فقط ماضي .. فـ اوكي انا عرفت ماضيكم .. ممكن تأدّون واجبكم كـ شخصيات
و اشوفكم تسوون شي؟ مثلا سوو نفس ساشا الي عرفت انها تحب تاكل وايد , او جون الي
عرفت انه كان مغرور و جبان و بعدين صار طيب و شجاع , او آرمين الي كان جبان و معدوم
الثقة و بعدين وثق بنفسه و اكتشف موهبته بالاستراتيجية​

هذيلا 3 شخصيات احبهم و لما اشوفهم اندمج معاهم بمتعة لأني احس اني اعرفهم من خلال
تطوّر شخصيتين آرمين و جون .. و من خلال ساشا الي قدرت تعرّفني بحبها للأكل , مافي
اعتماد على ماضيهم ابد بل اعتماد على شخصياتهم .. و طبعا الحالة تعكّرت مع ساشا للأسف
بالموسم الثاني لما حطّوا ماضيها الي اخذ وقت طويييل من الحلقة لكن كلامي واضح بخصوص
نجاحها كشخصية​

لهذا انا ما اقتنع بكلام الي يقول دافع الشخصية بواسطة الماضي مهم , أهمية هالشي تختلف
على حسب القصة و على حسب عمق الشخصية نفسها​

​

 

[7sN]

?Games are interactive .. How

الجميل بالألعاب الإلكترونية لما تحس انك بـ قدم البطل .. تحس بمشاعره و بحالته النفسية
و التشويق من ناحية قصته و الخطر الي اهو فيه , اعتبر هالشي كبير لأني ( طبعا ) اعشق
القصص وعشقي لهم بالمرتبة الأساسية يعتمد على الشخصيات .. فـ مافي مكان افضل من
الألعاب انهم يحببوني بالشخصية الي العب فيها

تكلمت سابقاً عن اني انبهرت من لعبة Half Life بجميع اجزائها , هذا يرجع لعبقرية صانعين
اللعبة .. مثل ما يعرف الأغلب ان بالألعاب في لقطات سينمائية بعد كل مرحلة تقريبا , و هاللقطات
هدفهم انهم يكملون القصة لنا كـ لاعبين .. هذا شي مقبول لكنه يشيل تأثيرك كـ لاعب من نواحي
عديدة أهمها : ان لو اللقطات السينمائية تكمل القصة فـ ليش قاعد العب؟ عالأقل ابي الي سويته
يكون له معنى مو معتمد على لقطة سينمائية ما عندي تحكّم بالشخصية فيها ابداً

و من هالناحية لعبة Half Life تتفوق على 95% من غيرها من الألعاب !

التحكّم دااايماً بيد اللاعب و القصة مستحيل تكمل بدون تحكم اللاعب بالشخصية الرئيسية ,
هالحركة البسيطة هذي تأثيرها كبير و مهم جداً بحيث اللاعب يحس انه اهو المهم و ان
القصة معتمدة عليه اهو فقط , هذا يخلق التشويق حتى لو كانت القصة مافيها تشويق لمجرد
احساس الأهمية المطلقة .. قصة اللعبة ايضا ساعدت بشكل لا يُصدّق

القصة مافيها احداث كثيرة , غالباً "روح للمكان الفلاني قاتل وحوش" و هالمهمة تنعاد طـول
اللعبة بأشكال مختلفة .. تنويع الوحوش باللعبة ما يسبب بالملل ابداً خصوصاً و ان اشكالـــهم
و ديزاينهم منطقي على القصة و المكان الي يتواجدون فيه .. بمرحلة الوحوش يكونــــــــون
عاديين كأنهم زومبي و تركيزها يكون اكشن .. بمرحلة ثانية الحالة تتحول لـ رعب بـ ديزان
وحوش اشكالهم يخوّف و اضاءة تساعد على خلق اجواء الرعب .. و بمرحلة اخرى بــــدل
الوحوش يكون فيه جنود تقاتلهم .. فـ الحالة دائمة التغيير و رغم تكرار المهمات و المراحل
الا ان المحيط يختلف و ديزاين الخصوم يختلف اختلاف كلّي لإبقاء المتعة و التشويق , كل
هذا و مع قلّة الاحداث .. قلّة الاحداث توظّفت بالشكل الصحيح لأنها تخليك تعيش اللحظات
بكل تفاصيلها : يبوني اروح من مكان لمكان ثاني؟ اوكي اركب قارب و اروح بنفسي بدون
ما اعتمد على لقطة سينمائية او على شي ثاني يتحكم بشخصيتي غيري

متعة الوسائل التفاعلية ( الإلكترونيات و الألعاب ) تنوجد لما تعطي المتفاعل احساس انه
Active ( فعّال ) ليس Reactive ( غير فعّال او مؤثّر ) و هاللعبة نجحت بكل هذا بتفوّق
على غيرها من الألعاب و لهذا بكثير من قوائم افضل الألعاب نشوف ان تواجد Half Life
مضمون لكل الي ذكرته و أكثر بعد
​

​

• من أجمل ما قرأت :

1. الناس يكبرون من شأن الي يحصلونه بـ 10 سنوات , و يقللون من شأن الي يحصلونه بـ 20 سنة
2. وُلد الإنسان ليعيش لا ليتجهّز لعيش
3. تحكّم برغباتك لا تجعلها تتحكم فيك
4. الإنسان ليس أداة للظروف , بل الظروف هي أداة الإنسان

 

[7sN]

موقف

قبل كم يوم حطوني بموضوع حبل المشنقة و ريلينا طلبت مني اني
اكتب موقف ما انساه بالمدونة .. فـ بكتب الموقف

اهو موقف ماله معنى ولا تأثير ولا طويل ولا له اي شي
مهم بحياتي بس دايماً اتذكره و جدتي تذكرني فيه كل
ما تشوفني

كنت صغير و كنت طالع مع الأهل كلهم الى مكان يشبه الحفلات نسيت
اسمه , كانوا الناس لابسين ملابس غريبة تنكرية و انا بدل ما اتنكر بشي
حلو بس حطيت نظارة وردية فيها شنب -_-

فـ كان في اغاني و كان في مسرح .. بالمسرح في شخص عنده ميكروفون
يكلّم الأطفال و يتفاعلون معاه , ناداني عشان اصعد له و صعدت , سئلني :
شسمك؟ .. جاوبت عليه : اسمي سلفستر

انتهى الموقف

مااادري ليش هالموقف بالذات ما انساه , بس الأهم من هالسؤال مادري
ليش قلتله اسمي سلفستر ​

 

[7sN]

109 + 110

للتوضيح للمرة المليون .. انا اكره دراغون بول سوبر , بس بتكلم عن شي حمسني فيه

اليوم نزلوا حلقتين من دراغون بول سوبر , الاسبوع الي فات نزلوا حلقتين من ون بيس
و اليوم حلقتين من سوبر .. ما اعرف المناسبة بالضبط بس سوالف توي انيميشن دايماً
تسويق و هالأمور , بس بسبب التسويق هم بذلوا جهدهم و اكثر من جهدهم بهذيـــــــلا
الحلقتين , يابو احسن الرسّامين عشان يطلعونهم بأحسن صورة و فعلا نجحوا بهالشي

ممكن الحلقة 109 ما كانت بالشكل المطلوب من ناحية الأنيميشن ( التحريك ) لكن الستايل
كان راكب و مضبوط و ما عندي اي تعليق سلبي ضده .. لكن حلقة 110 .. خلتني اصارخ
بداخلي من الحماسس

لو احد يتابع المدونة من زمان يعرف اني بصفحة حطيت 3 تدوينات عن رسّامين احبهم
بأستوديو توي انيميشن و تكلمت عنهم الثلاثة بالأشياء الي تميزهم , هنا رابط التدوينات :

مدونة مميزة - We Fall To Learn How To Pick Ourselves Up | 7sN

فـ بحلقة 110 رجعوا اثنين من هالرسّامين و قدّموا افضل شي شفته بحياتي كلها ,
الرسّامين هم Naotoshi Shida و Naoki Tate .. الأول يعتمد على السرعة
و الوضوح و الكاميرا .. الثاني يعتمد على الأنيميشن الخيالي و المبالغة المبتكرة

انا بصراحة كنت منتظر اشوف ناوكي تاتي اكثر من شيدا لأني احبه اكثر و ستايله
يناسبني جدا جدا , شيدا طبعا لا غبار عليه اهو من افضل الرسّامين الي شفتهــــــم
بحياتي .. فـ المهم اني ما تحسفت على الانتظار

ناوكي تاتي قدر يقدّم لقطة روعة بشكل لا يصدق , لأول مرة اشوف لقطة حماسية
من انمي و بدل ما اقول اسم الشخصية المسبّبة بالحماس بل اقول اسم ناوكي تاتي
حتى اخوي الصغير قالي "انت تشجع ناوكي تاتي؟"

هذي اهي اللقطة :

تبدا من اول ثانية الى 2:40

التحرييييك روعة , هنا نشوف كل الي معروف فيه تاتي , المبالغة بشكل اجسامهم خصوصاً
بالقتال الأجسام تكون طويلة و هذا اعتقد انه يساعد على تقبّل الأكشن اكثر , حركات الجسم
واقعية جدا جدا و هذي من مميزات تاتي .. يعرف كيف الجسم يتحرك فـ كل ضربة و كل
حركة مدروسة بواقعية .. تعابير الشخصيات اقل شي اقدر اقوله عنهم انهم روعة ق5 ,
افضل لقطة عندي بالفيديو اهو بالدقيقة 1:48 لما توبو قعد يطلق على قوكو طاقات كثيرة
و قوكو يمشي بدون ما يهتم .. طبعا تفسير هالشي موجود بالقصة بس اهي افضل لقطة لي
مو لتفسيرها , بل لإبداع ناوكي تاتي فيها .. مشية قوكو وسط هذي الطاقات تثبت هيبته و
حالته النفسية بشكل كبير , و بزيادة لما نشوف قوكو يمشي باتجاه الكاميرا نعرف حالته
اكثر و يوصلنا احساس الهيبة .. روعة

ننتهي من ناوكي تاتي و ننتقل للأسطورة ناوتوشي شيدا :

لقطته تبدا من الثانية 00:48 إلى 1:32
( ما اعرف منو الي راسم اللقطة الي ببداية الفيديو .. لازم اعرفه لأنه مبدع بعد )

الوضوح خيالي .. استخدام الكاميرا مرة ثانية من رسّام ثاني لتوضيح القوة و السرعة
و التأثير , الضربة لها وزن نحس فيها .. و طبعا ستايل الرسم الأسطوري يكمل كل
هالابداع و يعطينا شي مختلف و فريد من نوعه سواء بدراغون بول او بأي انمي
بشكل عام

على رغم المبالغة بالقوة و القتال , هذا شي صار ما يهمني لأن انمي دراغون بـــــول من
جزئه الثاني كان مبني على القوة و المبالغة .. لدرجة ان هذي الأشياء الحين صــــــــارت
مو مبالغة بالنسبة لي لأني تعوّدت عليها .. لكن انك توظّف المبالغة و تضيف عليها رسم
أسطوري و تصميم منظّم؟ بهالحالة عطني كل المبالغات الي عندك

.... الحماس طلع .. خلصت الحين .. مع السلامة

​

 

[7sN]

Shigeo Kageyama

تكلمت من قبل عن حبي لشخصية ايزوكو ميدوريا بطل انمي بوكو نو هيرو و عن احساسي
فيه بالمواقف الي يمر فيها و المصاعب و هالأمور , لكن هذا شي ما يخليه افضل شخصية
رئيسية عندي بل هذا يخليه شخصية قريبة مني و احس فيه .. الي اليوم بتكلم عنه شخصية
ما توقعته يعجبني ابداً بس بعد ما شفته صار اسرع شخصية يكون له مكانة كبيرة و قوية
عندي .. ممكن يكون افضل شخصية رئيسية عندي؟ مادري .. ممكن

احنا تعودنا نشوف نمط يمشون عليه الأنميات من ناحية شخصياتهم الرئيسية , البطل ضعيف
جسدياً و نفسياً و عنده هدف يكون شي كبير بحياته .. خلال الأنمي نشوفه يحاول يواجه
الصعاب و يتغلب على مخاوفه عشان يحب وحدة و تحبه , و بالنهاية فعلاً هذا الي يصير له
لما يوصل للهدف , و القوّة الي كان يبيها صارت له و صارت تخلي الي حوالينه يحبونه بكثرة
و يحترمونه

هذا مو نمط سيء ابداً ولا فيه اي شي سلبي بل القصص ماشية على هالنمط لنجاحه , لكن
هنا يجي الموضوع الي بتكلم عنه بهالتدوينة :

شيغيو كاجيياما اهو شخصية ماشي بالنمط نفسه ولكن بأسلوب مختلف كلياً

شيغيو عاش حياته و اهو عنده هذي القوة , شيغيو عنده قوة التحريك الذهني .. طبعا يعني يحرك
الأشياء و الناس من حوله و اهو بالذات عنده هذي القدرة اكبر و اقوى من اي شخص عنده نفس
القدرة

الي يميّز شيغيو عن باقي الشخصيات الرئيسية اهو مؤلف مانجا Mob Psycho 100 لما قال
ان لما كان بيسوي شيغيو كان يبي يسوي شخصية ضعيفة نفسياً , و هذا واضح من نشوف الأنمي
ان شيغيو شخصية مو بس ضعيف نفسياً بل ايضا جسدياً و اجتماعياً حالته لا يُحسد عليها , و هذي
اشياء خلتني افكّر بشي قراته من قبل و اهو ان الإنسان عنده 6 حاجات تؤدّي للسعادة و هم :

اليقين - التنويع - الحب و التواصل - الأهمية - التطوّر - العطاء

ولو نشوف شيغيو .. نعرف ان مافيه اي شي من هالـ 6 اشياء , شيغيو يحتاجهم اكثر من اي
شخص غيره رغم ان عنده القدرة الي الكل يتمناها و اهي التحريك الذهني

اليقين : اليقين يحتاج ثقة و شيغيو مو واثق من نفسه
التنويع : شيغيو عاش طول حياته ثابت على قدرته و ثابت على درجاته السيئة بالمدرسة
الحب و التواصل : شيغيو ما عنده احد يحبه و يتواصل معاه غير رئيسه بالعمل
الأهمية : مو مهم عند اي شخص
التطوّر : نفس حالة التنويع .. عاش حياته بدون اي تطوّر و اي تغيير
العطاء : العطاء يحتاج تنويع و تطوّر و شيغيو يفتقد لهالأشياء الثلاثة

شيغيو يفتقد لكل شي سبق و ذكرته لكنه يحتاجهم و اهو معترف بحاجته لهم
اكثر من اي شي ثاني .. و هنا الكلام ياخذنا إلى الشخصية الي عكس شيغيو بكل شي :

Ritsu Kageyama

ريتسو هو الأخ الأصغر لـ شيغيو ..ريتسو انسان كامل , عنده كل الي ما عند
اخوه و شيغيو يتمنى انه يكون نفسه لدرجة انه يمدحه كثير , و منو يلوم شيغيو
على هالأمنية؟ لو نشوف ريتسو فـ نشوف :

- افضل من شكل شيغيو
- درجاته عالياً جداً بالمدرسة
- مهم عند كثيير من الناس و الطلبة
- الأم و الأب يعتبرونه الإبن الأفضل من بين الأثنين
- دائم التطوّر و العطاء

لكن عنده مشكلة .. هي اليقين

ريتسو ما عنده يقين بأنه حقق اهدافه , لأن على كل الي عنده فـ هو يحتاج شي ثاني
اكبر من كل هذا .. و هو التحريك الذهني , قوة شيغيو

هنا يكون عندنا شخصيتين كل واحد فيهم يتمنى يحصّل الي عند غيره للوصول للحياة
السعيدة , الفرق بينهم ان شيغيو بالحلقة الثانية بدا يغير من حياته للأفضل و بالجانب
الثاني ريتسو رافض انه يشوف حياته مميزة بدون القدرة الي يبيها

و هنا يجي افضل شخصية عندي بالتاريخ

Reigan Arataka

ريغان اهو رئيس شيغيو بالعمل .. هذا اهو الشخصية الي يحل جميع المشاكل
بأسلوبه المقنع و بمنطقه البسيط جداً و الواقعي .. فـ هو يعتبر ان التحريك
الذهني هو مجرد "'طبع" او "سمة"

مثل مافي ناس يتميزون بالسرعة و القوة فـ في ناس يتميزون بالقوة الخارقة ,
القوة الخارقة مو شي غريب او مختلف بل اهو شي حاله من حال لون البشرة
و حاله من حال اي شي طبيعي ثاني

هذا اهو منطق ريغان و هالمنطق ينعكس على شيغيو بالحلقة الثانية لما نشوفه
يقرّر انه يغيّر حياته و يدخل نادي الأثقال , هذا لأنه اقتنع بإن قوته طبيعية مو
غريبة

و هذا الي يميّز الأنمي و شخصية شيغيو

بالأنميات الأخرى نفس ناروتو و بوكو نو هيرو و ون بيس نشوف الأبطال يبدون
بداية عادية او ضعيفة .. بدايتهم ناس طبيعيين و نهايتهم ناس عندهم قوة خارقة من
نوع معين .. نينجا + بطل خارق + قرصان

بـ انمي Mob Psycho 100 نشوف حالة مختلفة و عميقة .. البطل يبدا بداية قوية
و عنده قدرة خارقة الكل يتمناها , لكنه يحاول يقوّي حياته الشخصية و الاجتماعية
عشان يوصل لهدفه .. ما يحاول يصير خارق بل يحاول يصير انسان طبيعي ,
نفسنا

كـ مشاهد ما اقدر اشوف اي عمل ثاني له رسالة افضل من رسالة هالعمل , يحث
هالعمل على اننا ما نركّز على صفة وحدة من صفاتنا مهما كانت حلوة , سواء
كانت الصفة تهتم بالجسم او بالذكاء او بالحالة الاجتماعية .. مافي انسان كامل
لكن الانسان لازم يحاول انه يطوّر من نفسه و يعطي لنفسه و لحياته و ما ينساها

​

 

[7sN]

المساواة

كثرت امور المساواة بحياتنا سواء كانت الحالة مساواة بين الأسمر و الأبيض
او المساواة بين الرجل و المرأة .. انا بتكلم عن المساواة الي بين الرجل و
المرأة لأنه شي ينرفزني .. بكثرة

المساواة بين الرجل و المرأة اهو شي بعنوان Feminism , الفيمينزم اهي الحركة
الي تبي تثبت ان أهمية المرأة بالمجتمع هي مساوية لأهمية الرجل , و ان المرأة
لازم تكون على مستوى متساوي مع الرجل بكل شي

هالحالة ما كنت راح اتكلم عنها ابداً لين شفت ان في عرب مصدقين هالحركة و متتبعينها
و متأثرين فيها .. و هذا شي يخليني اتنرفز لأن هل المرأة الي تتّبع هذي الحركة مسلمة؟
ولو مسلمة فـ كيف تتّبعها؟؟

الإسلام هو دين المساواة .. الإسلام وازن امور الرجل و المرأة بحيث ان الرجل يسوي
الشغل الخارجي ( برا البيت ) و المرأة تسوي الشغل الداخلي ( داخل البيت ) , و بجذي
انخلقت عندنا المساواة بأفضل شكل ممكن .. لكن الي اعرفه ان الحريم الي يتّبعون هذي
الحركة يبون يثبتون انهم يقدرون يعيشون بدون مساعدة الرجل .. و بهذا الشي انا اقول
"مستحيل"

للتوضيح : مستحيل المرأة تقدر تعيش بدون الرجل + مستحيل الرجل يقدر يعيش بدون المرأة

لو نبتعد عن الأمور العاطفية فـ نقدر نقول ان - اكيد صح - الرجل يقدر يعيش بدون مرأة
و المرأة تقدر تعيش بدون رجل , لكن هذي حالة ممكن تسبّب بأمراض نفسية للأثنين ولو
ان الأثنين يقدرون يعيشون بدون بعض فـ ليش في شي اسمه زواج؟ خل اعيد شي ذكرته
بتدوينة سابقة و هم الحاجات الـ 6 للإنسان :

الأهمية - التنويع - اليقين - الحب و التواصل - التطوّر - العطاء

هذيلا 6 اشياء نحصلهم بشكل مضموون من الزوجة و الزوج , اي حاجة من هالـ 6 حاجات
ما نقدر نحصلها من أحد ثاني ( صاحب\ة - ام - اب - اخ\ت ) و لو حصلناها من احد ثاني
فـ مستحيل يكون بنفس تأثير حصولها من الزوج\ة , لأن بالزواج ندخل مرحلة ثانية و فريدة
و مختلفة عن كل شي عشناه سابقاً .. و بالزواج نحصّل التوازن و المساواة الي نحتاجها و الي
انذكرت لنا بالقرآن و الأحاديث النبويّة

احنا مو اطفال عشان نتّبع ناس مسوين حركة بس لأن عنوانها "المساواة" , بدل ما نتّبع و
نسمع راي الشخص الواحد لازم نسمع جميع الاطراف و الأفضل من هالشي لازم نبحث
و نقرأ بالعلوم و بالدين .. لما تقول ان "اقدر اعيش بدون الجنس الآخر" فـ انت قاعد تقول
شي مستحيل تحصّل فيه سعادة او راحة خصوصاً و ان عالأقل بيكون فيه 4 حاجات ما
تحصلها من الـ 6

للأسف اننا الحين بـ وقت يطلعون فيه "دكتورات" بالجامعات بس يسمعون جملة فيها كلمة
"مرأة" على طول يدافعون و يتكلمون بتهجّم مع ان بالأساس ما يحتاج يكون فيه دفاع لأن
اساساً ما كان في اي شي ذُكر ضد المرأة .. الناس صاروا يتفاعلون على اي شي هم معتقدين
فيه و صاروا ما يتحملون لا نقد ولا مناقشة .. هذا اسمه غباء و جهل

هالتفكير الجاهل ممكن انه يسيطر على دولنا و هذا شي مو بعيد لأن حالياً صار عندنا
تقدير كبييير جداً للعادات و التقاليد و صار عندنا نسيان عميق و مقصود لتعاليم الدين

امنيتي بهالحياة ان المرأة تقدّر نفسها كـ مرأة .. الناس يقللون من شأن المرأة لأنها نفسها
تقلل من شأن نفسها , وجود المرأة مهم جداً و كل الأشخاص المتزوجين يعرفون احساس
لما يرجعون من الشغل بعد يوم طويل و يشوفون زوجاتهم متزينين و مزينين البيت لهم ,
هذا شعور مافي وصف يوفي بحقه .. بس لما الرجل يرجع البيت و يشوف المرأة تصارخ
و تشتكي من كل شي فـ طبيعي يقلل من شأنها و يقول "انا اشتغل للبيت و زوجتي تشتكي
من كل شي", لازم يكون في مبادلة الاهتمام بين الأثنين و بهالطريقة نشوف توازن و
مساواة .. اتّبع دينك لا تتّبع دنياك

​

 

[7sN]

لما كان عمري 13 كنت اشوف بـ نيكولودين كارتون اسمه Avatar The last airbender , كانت تدور
قصته عن 4 عشائر و كل عشيرة تتحكم بعنصر من 4 عناصر .. عشيرة النار + عشيرة الماء + عشيرة
الأرض + عشيرة الهواء .. و كل كم سنة يطلع شخص يكون عنده تحكّم بالـ 4 عناصر و هذا الشّخص له
لقب و اهو لقب "أفاتار" و له هدف و هو حماية العالم .. كل ما يموت الأفاتار يولد شخص آخر يعتبر هو
الأفاتار و هكذا تكون الحالة للأبد .. لكن بيوم من الأيام فجأة اختفى الأفاتار لأسباب غير معروفة و هنا تم
استغلال هذي الحالة من قِبل عشيرة النار الي هجموا على العالم و صاروا يسيطرون على كل شي وبنفس
الوقت يبحثون عن الأفاتار لقتله

كارتون افاتار نوعه : مغامرات - كوميدي - أكشن

طبعا هذا النوع منتشر بكل مكان بكل كارتون و انمي , لكن مو بالضرورة يكون مضبوط بكل الأماكن
هذي , بـ افاتار النوع مضبوط بشكل يريح النفس و الموازنة بين هالأنواع منعشة خصوصاً و انه صعب
نلاقي عمل فيه هالأمور و موازن بينهم

قصة افاتار العميقة تهتم بجوانب المسؤولية و العار و الفخر و الجشع و الغرور .. بكل هذي الجوانب نشوف
تطبيق ولا اروع من جميع النواحي سواء كانت موسيقا - اكشن - شخصيات - اداء صوتي , تقديم هالجوانب
عمره ما فشل لأنها تقدّمت بـ روح و حب و دافع للعمل نفسه

الشخصيات كلهم ممتعين و مختلفين عن بعض , بـ آنغ نلاقي الشخصية الرئيسية الطيب و الي على نياته
و الي دايماً يحاول يسوي الشي الصح وبنفس الوقت نشوفه يتخذ قرارات خاطئة تأثّر بغضبنا احنا عليه
و هذا يمنعه من الدخول الى عالم الملل بتاتاً

بـ كيتارا نلاقي شخصية البنت المحترمة و الحنونه و صاحبة المسؤولية الي بواسطة قيادتها نحس كأنها
الأم الي تبقي الفريق متمسّك ببعضه و كل هذا متوازن مع حالاتها السلبية الي لما يصير موقف يعصبها
بسبب غباء اخوها سوكا او عدم احترام الغير لها او تخريب مخططاتها و ترتيباتها

زوكو نلاقي فيه الصراع النفسي بين اصطياد الأفاتار و الرجوع للمملكة مع ابوه الملك او التخلّي عن
مكانته عشان يعيش حياة طبيعية مع ناس طبيعيين

كل الشخصيات سواء ذكرتهم او ما ذكرتهم لهم مسؤوليات و كل شخص مسؤوليته واضحة بكل
لقطة يطلع فيها و يتكلم فيها , الجميل بهالكارتون اهو الواقعية الي نقدر نشوفها بالشخصيات و
نقدر نتفهمها و نعيشها معاهم و نشجعهم

نظام الكارتون بحلقاته نظام جميل .. كل حلقة قصة لكن كل قصة مترابطة مع الي قبلها بشكل
او بآخر و هذا يخلي الكارتون مميز من ناحية انه يتنوّع بكل حلقة لكنه يحافظ على ثباته من
ناحية القصة و هدفها

من بين كل الأشياء الي اشوفها ما اقدر اعبّر عن مدى حبّي لهالكارتون الي يحتوي على كل
شي احبه و أقدره .. أنصح فيه بشدّة خصوصاً لو عندكم حب المغامرات و حب العمق في
الشخصيات .. تطوّر الشخصيات بينما ببعض القصص يصير بموسم كامل هنا نلاقيه يصير
بكل حلقة و كل تطوّر دايماً يكون مدروس بشكل متقن و مُستحق

على فكرة اهو 3 مواسم و انا بالموسم الثاني حالياً .. اعرف نهايته لكن ما اعرف تفاصيله
و له جزء ثاني اسمه Avatar The Legend Of Korra بمعنى :

طريقة المشاهدة

الجزء الأول :
Avatar : The Last Airbender
له 3 مواسم

الجزء الثاني :
Avatar : The Legend Of Korra
له 4 مواسم

شفت الجزء الثاني كامل من اول ما نزل على اساس اني اعرف نهاية و بعض احداث
الجزء الأول , لكن انصح بمشاهدة الأول و بعده الثاني عشان تعيشون حالة الابداع
المتواجدة طول المواسم .. و ما راح تتحسفون لما توصلون للجزء الثاني الي لو بتكلم
عنه لباجر ما راح اوفي بحقه

​

 

[7sN]

التضخيم + التبسيط

الأهداف و الدوافع في القصص هي اشياء لا مجال للتخلي عنهم , تحتاج القارئ بإنه يكون مندمج بالقصة؟ بكل بساطة
لازم تضع دافع يبيّن و يوضّح أفعال الشخصيات و اهدافهم .. الكل عارف بأن الشخصيات الرئيسية يحتاجون دوافع
مقنعة لبداية مغامرتهم سواء كانت "أبي أصير ملك القراصنة" او كانت "أبي اصير الهوكاجي" .. لكن في صعوبات
تواجه الكُتّاب من ناحية دوافع الأشرار بقصصهم .. و هنا تجي حالة التضخيم و التبسيط

الأشرار بشكل عام وجودهم يمثّل عائق ضد ابطال القصة و ببعض الأحيان أهدافهم يتقاطعون مع أهداف أبطال القصة ,
لكن الشي المهم و الأساسي ان الشرير يكون له هدف أيضاً مقنع عشان ما يحس القارئ او المشاهد بإن هالشرير مجرّد
عائق و جدار بلا شخصية ولا اعماق .. لإجتياز هذا الخطأ بعض الكُتّاب يواجهون مصاعب من ناحية انهم يضيفون اهداف
جداً ضخمة و معقّدة و عاطلة بدل ما يحطون أهداف بسيطة و سهلة و فعّالة

على سبيل المثال بتكلم عن شخصية Lex Luthor من DC Comics من ناحية أهدافه في فيلم Batman V Superman
و أهدافه في الكوميكس بشكل عام

في فيلم Batman V Superman ليكس لوثور يكره سوبرمان لسبب معين و اهو انه مؤمن بأن مافي شخص عنده القوة
المطلقة و الطيبة المطلقة .. الشخص يا انه يكون طيّب و ضعيف او انه يكون قوي و شرير , هذا يرجع لسبب انه لما كان صغير
ابوه كان شخص متديّن و كان يضربه فـ الضرب تترجم لعقل ليكس بإن الإله قوي جداً و شرير .. و ربط الإله الشرير بـ سوبرمان
و لهالسبب صار يكره سوبرمان

هذا دافع مضخّم - معقّد - له الكثير و الكثير من النقاط - عاطل و غير فعّال - لا يبرر أفعاله الشريرة في الفيلم

بالمقابل نشوف ليكس لوثور في الكوميكس و الكارتون

في الكوميكس ليكس لوثور انسان تعب على نفسه , انسان كبر و أنجز انجازات كثيرة و صار غني و صار يساعد مدينة
ميتروبوليس بواسطة نقوده .. لكن فجأة بيوم طلع شخص يسمّونه الناس "سوبرمان" هالشخص صار يساعد مدينة ميتروبوليس
بواسطة قوته الخارقة و الكل يحبه و الكل يتكلم عنه و دايماً بالصحف صورته تكون بالصفحة الرئيسية .. اشتعال الغيرة بـ ليكس
لوثور تخليه يستصغر و يستحقر سوبرمان و يستحقر سكّان المدينة , منو هالـ سوبرمان الي ياخذ مكانه؟ ليكس تعب على نفسه و
سوبرمان وُلد بهذي القوة و كأنها هدية

هذا دافع بسيط - له نقطة واحدة - فعّال - يبرر كل أفعاله

بالكوميكس دافع شخصية ليكس هو الغيرة من سوبرمان , و هذا يساعد بإننا نشوف شخصية واقعية نقدر نصدّق بوجودها خصوصاً
و انه تعب على حاله و حقّق اهدافه .. بالفيلم نشوف شخصية خيالية .. له أعماق و لكنها أعماق معقّدة و منثورة لازم نجمّعها و من
بعد تجميعها نكتشف بأنها غير منطقية و انها ما تبرّر أي شي من افعاله

هذي أهمية التبسيط بشخصيات القصص , و لهالسبب لما نشوف فيلم يتواجد فيه شرير يبي يدمّر العالم ما نتأثر , و لما نشوف فيلم
يتواجد فيه شرير دوافعه جميعها على المستوى الشخصي نتأثر و بشدّة

بعض الأفلام الي فيهم دوافع شخصية و فعّالة :

The Godfather 1 & 2 < واجب على كل انسان انه يشوفهم
Nightcrawler
Forrest Gump
The Dark Knight
X Men : First Class
Django Unchained
12 Angry Men


​

 

[7sN]

ما قبل الفيلم

اليوم راح أروح فيلم Justice League

فيلم فرقة العدالة اهو خامس فيلم من عالم دي سي السينمائي من بعد :

1- Man Of Steel .. تقييمي : 5\10
2- Batman V Superman .. تقييمي : 4\10
3- Suicide Squad .. تقييمي : 2\10
4- Wonder Woman .. تقييمي : 6.8\10
5- Justice League

واضح من تقييماتي للأفلام ان عالم دي سي مو عاجبني ابداً و فيلم فرقة العدالة
أتوقع فشله يكون ذريع و أتوقع اني اطلع من الفيلم كاره نفسي و كاره حياتي .. بس
عادي انا كل يوم اكره نفسي و اكره حياتي

شفت مراجعات بعض القنوات باليوتيوب و بعض الحسابات بالانستقرام و كلهم تقريباً
يقولون ان هالفيلم يعتبر خطوة للأمام لعالم دي سي بأنه يتحسن , و قالوا بأن الفيلم له
سلبيات و لكن له ايجابيات أيضاً

و تمام كل شخص له رايه الشخصي لكن انا مابي اوصل لحالة ان كل فيلم جديد لعالم
دي سي يكون "خطوة للأمام" .. الشركة المسؤولة عن أفلام أسطورية نفس ثلاثية
باتمان المفروض أفلامهم تكون اكثر من مجرد "خطوة للأمام" .. خصوصاً و ان
هذي الصفة وجّهوها الناس لفيلم Wonder Woman اول ما انعرض .. الكل قعد
يقول عنه خطوة للأمام و بالمواقع تقييمات هالفيلم عالية جداً .. و الحين مرة ثانية
يعيدون الكلمة لفيلم آخر !

عالعموم اليوم انا رايح و الفيلم راح يبدأ الساعة 7:30 .. لما اخلص منه راح اكتب
عنه هنا و أشوف لو بيعجبني ولا كالعادة

 

[7sN]

Justice League

أمس رحت فيلم فرقة العدالة و طبعاً مثل ما قلت بالتدوينة السابقة راح اتكلم عنه

رحت الفيلم متوقع فشل ذريع ولكن بالنهاية طلع فيلم جيد فيه أشياء سيئة , يعني
صدمني من المتعة الموجودة فيه لكن نرفزني بأماكن أخرى راح اتكلم عنها

فيلم فرقة العدالة هو فيلم جيد و تقليدي .. قصته تبدأ من باتمان الي يكتشف بأن
في مخلوقات فضائية تهجم على الأرض فـ يقرر انه يجمّع فريق كلهم عندهم
قوى خارقة لردع هذا الهجوم الفضائي و تنتهي الحالة بـ جمع فريق بإســـــم
فرقة العدالة الي يكوّن من شخصيات مثل : ووندر وومان - أكوامان - سايبورغ
- فلاش - باتمان

الي عجبوني من شخصيات فرقة العدالة : باتمان - ووندر وومان - سايبورغ

باتمان عجبني دوره بالفيلم من ناحية أنه القيادي الي شايل مسؤولية الفريق و كل
عضو من هالفريق فـ أهو الي جمّعهم و أهو الي يأمرهم .. بالناحية الأخرى أحب
و أعشق لقطاته بينه و بين الشخصيات وجهاً لوجه على سبيل المثال كان في لقطة
بينه و بين ووندر وومان و كانت اللقطة تتكلم عن خلاف بينهم , فـ كان شي جميل
لما نشوف باتمان يقرر قرارات ممكن انها ما تكون قرارات صائبة و ممكن انها
تفتعل خلافات قوية .. هذي اللقطات عادةً تعطينا نظرة عميقة لشخصيات الفيلم
و بالنسبة لي هذا الي نحتاجه بالأفلام الي تعتمد على فريق كامل

ووندر وومان بالنسبة لي أفضل شخصية بالفيلم .. كرهتها بفيلمها ووندر وومان لأنها ما كانت
تعطي الطاقة المناسبة للتمثيل و ادائها كان جداً ضعيف , لكن هنا مع المخرج جوس ويدون
أحسه قدر يلاقي النقطة الي تخليها تبدع بالأداء و تقنعني بـ دورها .. صراعها بالفيلم كان صراع
نفسي يعتمد على المسؤولية و القيادية و نظرتها لهذيلا الأمرين و تعاملها معاهم .. لقطاتها بالفيلم
كان مافيهم ولا عيب بل خلتني أتمنى يطول وجودها لأني حبيت شخصيتها

سايبورغ بالنسبة لي هو أفضل إضافة لعالم دي سي .. قصته كانت متصلة بـ قصة و هدف شرير
الفيلم و هذا يخليه أول الشخصيات الي لازم يكونون متواجدين بهالتجمّع , تمثيل راي فيشر كان
جميل و يفتح النفس .. صوته كان مناسب جداً لشخصيته .. نبرته كانت تعكس صراعاته الداخلية
.. علاقته مع ابوه كانت من أفضل مافي الفيلم

الي ما عجبوني من شخصيات فرقة العدالة : أكوامان - فلاش

أكوامان شخصية انا أحبه بـ كارتون Justice League و حبيته بلعبة Injustice , لكن في مشكلة
و هي ان الناس لما يشوفون شخصية أكوامان يضحكون عليه لأنه عايش بالبحر و قوته الخارقة
متصلة بوجوده بالبحر فـ عادةً الجماهير يتمصخرون عليه و يقولون "قوته الخارقة انه يكلم السمك"
مع الأسف الي عاملين على الفيلم حاولوا قدر الإمكان انهم يثبتون للجمهور ان أكوامان شخصية
روعة .. هالمحاولة بالنسبة لي كانت فاشلة , أكوامان بهالفيلم صار تحت مسمّى الشخصية الـ "Cool"
بدل ما يكون فيه عمق .. قصته انقالت بجملة وحدة و ما كانت جملة كافية لمعرفة شخصيته بل
كانت غريبة و مالها داعي ابداً .. الممثل عن نفسي ما حبيته , حسيته غصب يمثّل و حسيت ان
شخصيته رخيصة

فلاش من أفضل الشخصيات عندي خصوصا بعد مشاهدة الموسم الأول من مسلسل The Flash الي
قدر يعطيني أفكار و انطباعات عن شخصيته و خلتني اتمنى يسوون له فيلم بـ تأثيرات أفضل .. للأسف
انه كان أسوأ مافي فيلم فرقة العدالة .. كان وجوده وجود كوميدي 100% , الوجود الكوميدي بحد ذاته
مو سلبي لكن السلبي هو تطبيق الكوميديا الي كانت فاشلة فشل ذريع من الممثل .. احنا مو اطفال عشان
تسوي تعابير بوجهك و نضحك عليك .. غالباً لقطاته الكوميدية تبدأ بداية حلوة تخليني اتجهز للضحك
لكن تنتهي نهاية مافي أسوأ منها و تخليني أتحسف .. للأسف ان هذا الاتجاه الي اخذوه مع شخصيته الي
لو كانت درامية كان أحسن

في شخصية بالفيلم طلع و ما اعتقد حطوه بالاعلانات فـ راح اتكلم عنه بوجود كود الحرق .. الي ما
عنده مشكلة يحرق على نفسه الشخصية و أحداثها يضغط :

محتوى مخفي

سوبرمان من الشخصيات الي اعشقها بالكوميكس و الكارتون .. كرهته بفيلم مان اوف ستيل و كرهته
زيادة بفيلم باتمان ضد سوبرمان , كنت عارف انه راح يطلع بالفيلم لكن ما توقعت انه يعجبني .. ابداً
, و انصدمت من مدى اعجابي فيه .. شخصيته كانت روعة بالمقاييس الي انا افضلها على شخصية
سوبرمان نفسها , وجوده كان يعطي طابع البطل الخارق , ألوان لبسه واضحين و فاتحين على عكس
أفلامه السابقة الي الألوان كانو كئيبين لدرجة تخليني انا اكتئب .. حواراته جميلة و أدائه جميل و له
لقطات تخليني ابتسم رغماً عني , كان من الأشياء الي صدمتني بالفيلم و الي حبيت وجودها و أتمنى
اشوف له افلام و اهو يكون فيهم على نفس المستوى

الحين بتكلم عن شرير الفيلم : ستيبنوولف

سمعت من أغلب الناس ان ستيبنوولف اهو من سلبيات الفيلم و بعد مشاهدتي للفيلم أحب اقول اني اتفق
و أخالف هذا الراي بنفس الوقت .. ايجابيات الشخصية تكمن في صوته أولاً الي اعتبره كان موفّق من
ناحية الأداء , ثانياً حبيت شخصيته و التوضيحات لشخصيته بأنه يكره خسارة أي معركة و ان الخسارة
تأثر عليه بشكل سلبي جداً , ثالثاً جنود ستيبنوولف هم حشرات فضائية ياكلون الشخص الي يخاف منهم
لأنهم يقدرون يشمّون ريحة الخوف و هذا شي ينعكس على ستيبنوولف نفسه بأنه يتحكم فيهم لأنه ما
يخاف من شي و هذا بالنسبة لي يزيد من هيبته و وجوده

سلبيات الشخصية تكمن في ديزاينه ( شكله ) الي جدا جدا جدا سيء , تم تشبيهه بأشرار الألعاب الالكترونية
و هالتشبيه أوافقه 100% .. ديزاين الشرير هو شي مؤثّر و تأثيره علي كمشاهد المفروض يكون أساسي ,
ستبينوولف تأثيره علي كان غير موجود و بالعكس خلاني اضحك اكثر من ما أخاف .. السلبية الثانية تكمن
بـ هدفه كـ شرير , ستيبنوولف يبي يجمع 3 مكعبات عشان يحوّل الأرض لكوكب يشبه كوكبه الأصلي ..
هذي خطة نففسسس خطة الشرير بفيلم مان اوف ستيل بدون أي تعديلات او زيادة عليها

الإيجابيات أكثر من السلبيات من ناحيته لكن السلبيات تأثيرهم كبير جداً و بالنسبة لي
خربوا شخصيته الي كان ممكن انها تكون أفضل

بعد ذكري لقصة الفيلم و هدف الشرير فـ حبيت اوضّح ان قصة الفيلم تقليدية و تطبيقها تقليدي
جداً .. فيلم فرقة العدالة ما يفرق أبداً عن فيلم The Avengers الا من ناحية ان افنجرز أفضل ,
ما حبيت فكرة ان باتمان يجمّع الفريق بنفسه .. كنت أتمنى انهم يتواجدون بالمعركة و بالصدفة
يشوفون بعض و من هالحدث يتجمّعون مع بعض كـ فريق .. لكن حالة ان باتمان يجمعهم اهي
حالة تشبه فيلم أفنجرز بشكل كبير + حالة رخيصة و سهلة و غير فعّالة

بالنهاية فيلم فرقة العدالة هو فيلم له ايجابيات و سلبيات , كان فيلم ممتع لسرعة الأحداث لكن بنفس
الوقت كان يحتاج ان الأحداث تخفف من سرعتها لتوضيح كل شخصية و سماتها , كانت فيه لقطات
حلوة بين الشخصيات و تفاعلهم مع بعضهم لكن كان يحتاج انهم يكونون لقطات أطوَل .. الأكشن كان
ممتاز و توازن الشخصيات بالأكشن كان رائع لكن ديزاين الشرير ما خلاني استمتع او اتأثر بالشي
المطلوب مني بالفيلم نفسه

تقييمي : 6\10

فيلم ووندر وومان للآن بالنسبة لي هو أفضل فيلم لعالم دي سي السينمائي و ما
اعتبر فيلم فرقة العدالة انه "خطوة للأمام" .. لو في فيلم يستحق هالكلمة فـ بكل
تأكيد هو فيلم ووندر وومان .. يارب يتعلمون من اخطائهم الي تتكرر كل سنة
و يخططون و يسوون أفلام حلوة