مدونة متألقة A Ca$e for a Gentle Thief and a Treasured Heart - 7sN (1 زائر)

[7sN]

رد: we fall to learn how to pick ourselves up | 7sN

ما هو الفن

تابعت برنامج اسمه "اما بعد" دايما يتم افتتاح البرنامج بسؤال
الضيف هذا السؤال : ما هو الفن

و اغلب الاوقات نسمع اجابة السؤال هي : الفن رسالة
و نادراً نسمع اجابات يُقال فيها : الفن متعة مو رسالة

طبعا لما سمعت الاجابات هذي اكتشفت اجابة يديدة و
ممكن انها تكون اجابتي العامة الغير تفصيلية :

"الفن هو اختلاف وجهات النظر"

الفن هو :

إبداع - متعة - تأثير - إحساس - إهتمام - تفاعل - تعبير- رسالة - هدف - حب

هذي كلها اشياء تعبر عن الفن , و تعتمد على وجهة نظر الصانع نفسه
و له الحرية الكاملة بإنه ياخذ وحدة منهم او كلهم

اجابتي التفصيلية :

الفن هو الي يحتوي على ابداع صانعه و اهتمامه و حبه مع تضمن الرسالة
الي ممكن تعبر عن هدفه و تأثر على احساس المتلقي الي ينتج عنه تفاعل
مع العمل و استمتاعه فيه

​

 

[7sN]

رد: we fall to learn how to pick ourselves up | 7sN

أداء و فعالية الإنسان

اليوم كعادتي دخلت اليوتيوب اشوف شنو الفيديوهات الموجودة
و شفت فيديو لفت نظري عن شخص متخصص بإنه يطلّع الناس
من مزاجهم لو كانوا مكتئبين او بحالة صعبة

هالشخص اسمه Tony Robbins

شفت له فيديو و استفدت منه وايد بصراحة و تكلم عن شغلة قلت لازم
افيد غيري فيها و اهي تحت مسمى فعالية الإنسان

في 4 اشغلات اساسية تساعد الانسان في عمله و انجازاته و هم :

1- الإمكانيات
2- النتائج
3- المبادرة
4- المعتقدات

اولا : الإمكانيات

انت كـ انسان امكانياتك غير محدودة

مافي انسان عنده امكانيات محدودة ولو كان الانسان محدود كان ما وصلنا
للعلوم الي وصلناها الحين و كان ما قدرت تقرأ كلامي الحين , مافي حد
بالإمكانية و هذا شي يخليك تطلّع طاقتك و تعمل و تتفاعل بحياتك

بس ممكن الإمكانية بروحها ما تسوي شي فـ هنا ندخل بـ :

ثانيا : النتائج

مافي انسان ما عنده نتيجة

كلنا مرينا بمراحل صعبة بحياتنا و اجتزناها سواء بمساعدة غيرنا او بقوتنا و عزيمتنا
و بكل الأحوال احنا شاركنا في هذي النتايج و لو مو احنا و امكانياتنا كان ما طلعنا
فيهم و ارتحنا بوجودهم

بس في ناس عندهم نتايج مو حلوة , هذا بسبب :

ثالثا : المبادرة

الإنسان يعمل و الله يوفرله المساعدة

في ناس نشوفهم بحياتنا اليومية ما عندهم نتايج حلوة تراضيهم هذا بسبب انهم اعتمدوا
على تحقيق الرغبة او التمني بإنها تتحقق بدون ما يبادرون فيها و يتعبون نفسهم عليها ,
قاعده تنحط ببالنا و لازم نتفق عليها ألا و هي :

لا تفكّر بالنتيجة , فكّر بكيفية تحقيق النتيجة

المبادرة مهمة لكن الي اهم منها :

رابعا : المعتقدات

مبادرتك بدون معتقد ما راح توصلك لهدفك

المعتقد مهم لأنه اهو الي يحدد اساس و معنى مبادرتك و هدفك من البداية ,
بدون المعتقد مستحيل توصل للي تبيه لأن مبادرتك و عملك لازم يكون
فيها روح و ارادة , و بدون الروح و الإرادة حالتك بتكون سيئة و ما
بتوصلك للهدف المراد

هذيلا 4 اشياء كل واحد فيهم يكمل الثاني و كل واحد اهم من الثاني

امكانياتك غير محدودة و تقدر توصل فيها لنتائج
خيالية بواسطة المبادرة الموجودة بسبب معتقداتك

هالأيام وايد قاعد ادمج كلمات بجمل


​

 

[7sN]

رد: we fall to learn how to pick ourselves up | 7sN

" يمكن مكرر بالنسبة لك بس مو بالنسبة لغيرك "

هذي وحدة من الجمل الي غالبا اسمعها لما اناقش شخص عن فلم او مسلسل او انمي
و اقوله مو عاجبني لعدة اسباب و من بينهم التكرار بالقصة و الأحداث

الجملة نفسها مو خاطئة من ناحية المعنى لكنها خطأ من ناحية الفن و الابتكار

بسبب هالجملة ما قمنا نشوف تجديد او تطور بالقصص و الشخصيات , صارو الأفلام
كلهم مكررين و كلهم ماشيين على خط واحد لأن هذي الطريقة صارت اسهل طريقة
لجلب المشاهدات و الجماهير .. بس غلط

الي يقول هالجملة ما يدري انه قاعد يحط حد لابداع المؤلفين و المخرجين بصناعة الفيلم
و القصة , راح يقولون يمكن مكرر لبعض الناس بس للبعض الآخر مو مكرر فـ خل نعيد
نفس الفيلم بس بأسلوب ثاني بدال ما نسوي و نبتكر شي يديد و مبدع

و هذي مشكلة قاعدين نشوفها بـ هوليوود و بالأنميات

الأنمي في تكرار للأبطال بشكل مو طبيعي .. فكروا كم مرة شفتوا بطل فيه هالمواصفات :

- طيب
- شجاع
- قلبه نظيف
- على نياته
- وقت الجد جد و وقت المزح مزح
- يهزم الشرير لأنه يحب اصحابه و اهله

تقريبا كل ابطال الأنمي فيهم هالمواصفات و المشكلة ان مو قاعدين نشوف ابتكار
بهذي الحالة الا قليل جدا و يكاد يكون معدوم

لهالسبب احب المخرج Christopher Nolan

لأنه مخرج دايما يحاول يروح ورا الابتكار و التجديد المستمر , افلامه :

Inception - Batman begins - The dark knight
The dark knight rises - The prestige - Memento
Interstellar

هذا مثال على صانع فيلم يهتم بتقديم الابداع و يبتعد كل البعد عن التكرار , ولو
مو مصدقيني شوفوا افلامه و طلعولي اي شي مكرر فيهم ( حتى افلام باتمان
الثلاث مو مكررين )

فـ نصيحة بالنهاية : ابتعدوا عن هالجملة
​

 

[7sN]

رد: we fall to learn how to pick ourselves up | 7sN

هناك قانون واحد فقط

تقريبا كل فترة انا اعيد الفيديوهات الي احبهم و من بينهم فيديوهات واحد
من مؤلفيني المفضلين Max Landis عشان اتذكر نصايحه للتأليف و
ما يروحون عن بالي

فـ في الفيديو ذكر نصيحة جدا جدا مهمة من ناحية البطل و دوره
بالقصة من ناحية حلوله و تأثيره عالأحداث النهائية

النصيحة اهي "لا تحطون نفسكم بصندوق"

غالباً بـ كتب تعليم التأليف نشوفهم يحطون قوانين معينة لكتابة القصص
و من بينهم قانون "البطل لازم يحل مشكلة القصة"

هذا قانون خاطئ لأنه يخلي الكاتب بصندوق ما يطلع منه و ما يفكر خارجه
و هالشي يحط حد لإبداع الكاتب , الشي الصح اهو ان البطل عادي يحل
المشكلة او ما يحل على حسب الي انت تبيه و كاتبه , بعض الأمثلة الناجحة :

نهاية فيلم The Dark Knight

جوكر حاط قنبلتين , وحدة بسفينة فيها ناس عاديين و الثانية بسفينة فيها مجرمين .. و اثنينهم
عندهم ريموت التحكم بالقنبلة الي بالسفينة الثانية , يعني مثلا الناس عندهم ريموت التحكم بـ
قنبلة سفينة المجرمين ولو احد ضغط عليها فـ سفينة المجرمين بتنفجر و الناس راح يعيشون
و العكس صحيح ايضا .. ولو محد ضغط على الريموت فـ الساعة 12:00 راح ينفجــرون
السفينتين اثنينهم

بهالحالة باتمان ما يقدر ينقذ السفينتين لأن ما عنده ريموت ولا يقدر يعطّل القنبلتين عشان محد
يموت فـ ماكو حل يقدر يسويه الا انه ينتظر احد يفجر الثاني .. و النتيجة شنو كانت؟

محد فجّر الثاني و الساعة عدّت الـ 12:00 , جوكر كان مقتنع و واثق ان في احد
من الناس راح يفجر السفينة الثانية بس ما صار هالشي و بهالطريقة الي حل المشكلة
هم الناس مو باتمان .. مع ان بطل الفيلم اهو باتمان

هنا تبيّن حالة ان القصة كلها تتفاعل مع نفسها مو بس بطل القصة الي يتفاعل مع القصة
و هذي الرسالة الي وصّلها لي ماكس لانديس خلال الفيديو , تعلّم انك تعطي قصتك حقها
و ما تحد من ابداعك فيها بسبب بعض القوانين .. فكّر خارج الصندوق

و بالنهاية قال جملة تختصر كل كلامي :

"هناك قانون واحد فقط : بداية - وسط - نهاية"


​

 

[7sN]

رد: we fall to learn how to pick ourselves up | 7sN

Man Of Steel

مان اوف ستيل فيلم ما اقدر اقول انه فشل لأن ببساطة لو دورتوا
بقوقل عن تقييماته بتحصلون تقييمات بعضهم جيدة و بعضهم سيئة

هذا كان اول فيلم لعالم دي سي السينمائي اليديد و كـ بداية فـ بالنسبة لي
كانت اسوأ بداية ممكن تحصل لهذي الشركة , راح اذكر اسباب عدم حبي
لهذا الفيلم .. بعض الأسباب و مو كلها

بالبداية اسباب عالماشي و عالسريع :
التمثيل :

تمثيل هنري كافل ( سوبرمان ) بارد
تمثيل مايكل شانون ( زود ) اوفر
تمثيل آمي آدامز ( لويس لاين ) ممل بمعنى الكلمة

الشخصيات :

سوبرمان شخصية مملة
جنرال زود شخصية مضحكة بشكل سلبي بسبب تمثيله
لويس لاين شخصية مالها داعي بالفيلم كله وجودها نفس عدمه

احداث الفلم :

مافيها ولا نسمة ترتيب , ما عشنا حالة اي شخصية ( التفاصيل قادمة )

التفاصيل :

اول شي بتكلم عنه اهو سوبرمان

سوبرمان اكثر شخصية مفهوم غلط بالنسبة للعالم , الكل تقريبا يقول شخصية
سوبرمان مملة لكن هل هذا شي صحيح؟ ولو صحيح فت ليش اهو اشهر بطل
خارق بالتاريخ و ليلحين له جمهوره؟ الجواب اهو ان سوبرمان شخصية غير
مملة لما يكون عند الكاتب الي يفهمه , عند الكاتب الي ما يفهمه فـ فعلا بيكون
ممل بشكل مو طبيعي .. نفس بهالفيلم

بكل صراحة انا شفت الفيلم 4 مرات او 5 و ليلحين ما اقدر اقول شنو شخصية
كلارك ( سوبرمان ) شنو يحب و شنو يكره و شنو حياته .. ما اعرف عنه ولا
شي بسبب ان الفيلم نفسه مو معطيني مجال اعرفه .. فجأة نشوفه كبير و حياته
و اهو كبير , فجأة نشوفه صغير بـ لقطة صغيرة ما توضّح لنا غير انه شلون تعامل
مع قدراته بدون تفاصيل اكثر و بدون وقت نتعرف عليه كـ شخصية

الفيلم اهتم بإنه يعرّفنا على سوبرمان كـ رمز بدال ما يعرّفنا عليه كـ شخص

الشي الثاني اهو نهاية الفيلم .. فـ حرق لـ نهاية الفيلم

بالنهاية طبعا تعرفون سوبرمان يقاتل جنرال زود بالمدينة و كل شي
يتدمر و سوبرمان يقتل زود بكسر رقبته

لما انتقد كمية الدمار بالنهاية غالباً الناس يردون علي "زود كان راح يدمر
كل شي فـ تبي سوبرمان يقوله لحظة خل نغير مكاننا؟" .. شوفوا

انا ما انتقد الحدث نفسه لما انتقد الدمار .. انا انتقد المؤلف الي حط بقصة
سوبرمان هالكمية من الدمار .. لأنه اعتبر سوبرمان شخص قوي و بس , ما
اعتبره شخصية عادية بالعكس قعد يثبت كلام ان سوبرمان شخصية مملة و قوية
بزيادة فـ نهاية فيلمه لازم يكون في قتال كبير و مدمر .. هذا خطأ انك تسويه بـ
فيلم لـ سوبرمان لأن سوبرمان عمره ما كان يرمز للدمار بأي شي كان فيه .. الدمار
بنهاية هالفيلم كان عبارة عن نهاية فيلم هوليوود تجاري .. ما كان نهاية فيلم عميق
بأحداثه و بشخصياته نفس افلام باتمان الثلاثة مثلا الي نهايتهم كلهم روعة و
لهم معاني

بالنسبة لـ ان سوبرمان قتل زود فـ انا ما عندي مشكلة من هالناحية , كنت اتسائل
هل هذي مشكلة ولا لا بس توصّلت لـ لا بسبب ان في مؤلف يفهم سوبرمان قال كلام
مقنع و هو ان سوبرمان ما يقتل المجرمين لأنه كـ شخص اقوى منهم يشوف نفسه
مسؤول عنهم , و كـ مسؤول ما يصير تقتل الي تحتك .. لكن زود شخص قوي و
قرر انه يقتل كل هالناس فـ المنقطي ان سوبرمان لازم يقتله عشان يحافظ على الي
اهو مسؤول عنه من البشر

هذيلا سببين قلتهم بالتفصيل عن سبب كرهي لهالفيلم و ما اعتقد في سبب
اقوى يخليني اني اكره فيلم غير عدم فهم الشخصية و حالته من قِبل المؤلفين
و تصغير عقولنا كـ متابعين بإنهم يحطون دمار بالنهاية عشان نستانس

تقييم :

اخراج : 5\10
قصة : 5\10
تمثيل : 3\10

ممكن بعضكم يقول الاخراج كان حلو , الصورة كانت حلوة صح بس الاخراج
مو بس يشمل الصورة , ترا الاخراج قصة و يهتم بكللل صغيرة و كبيرة بالفيلم
نفس تسلسل الأحداث و الموسيقا و الترتيب و غيره من الأمور


​

 

[7sN]

رد: we fall to learn how to pick ourselves up | 7sN

Anime Poster

اولاً انا متحسف على اني ما اكتشفت هالشي الي بتكلم عنه بنفسي -_-
لأنه شي عجبني و اتوقع لو شفته بنفسي كان استنتجت منه
أشياء متعلقة فيه بس للأسف شفته بفيديو واحد يحلله , الحمدلله
على كل حال

ثانياً الموضوع الي بتكلم فيه :

بهالتدوينة ابي نتشارك مع بعض عشان ما اعيش المعاناة هذي بروحي
في انمي ما انصدم لو تعرفونه و ما انصدم لو ما تعرفونه , اهو نزل
سنة 2015 بإسم The Asterisk War .. من انتاج الأستوديو الي
اكرهه اكثر من اي شي ثاني بحياتي A-1 Pictures

هالأنمي اقدر اقول عنه حقق نجاح و تقييمه بـ My Anime List مو سيء
7\10 .. طبعا هالتقييم بالنسبة لي سيء بعد ما شفت الي يصير بأول حلقة
حسيته يستاهل 1\10 بس ما راح اتكلم عن هالشي

الي بتكلم عنه البوستر .. راح احط بوستر الأنمي الحين تحت كلامي و ابي
احنا مع بعض نحلل هالبوستر من جوانب راح اوضح لكم اياها تحت

البوستر :

هذا مثال معين يبيّن لكم انكم ساعات تعرفون لو الأنمي حلو او فاشل
من مجرد البوستر .. لو دققتوا بالبوستر و شفتوا كل شي ابيكم تقولون
لي شنو الي استنتجتوه من هذي الأشياء :
مصدر الأنمي :
نوع الأنمي :
الولد :
البنت :

لو عرفتوا مصدر الأنمي الباقي راح يكون سهل

..

راح احط النتايج للي عرف يستنتج عشان يشوف لو استنتاجاته صحيحة او لا
و للي ما قدر يستنتج و يبي يعرف الإجابات

مصدر الأنمي :

الأنمي اساسه كان رواية , فـ المصدر هو رواية

الأنميات الي اساسهم رواية كلهم متشابهين بالأبطال و اللبس
و الأسلحة و النوع .. فـ هنا نتوصل الى

نوع الأنمي : مدرسي - أكشن - رومانسي

- عرفت انه مدرسي بسبب اللبس طبعا
- اكشن بسبب الأسلحة
- رومانسي بسبب ان البوستر فيه لد و بنت

و بما انه مدرسي فـ حالة انه رومانسي شي مؤكد 100%

الولد : طيب - شجاع - خجول

مكانه بالبوستر يوضّح انه قوي و شجاع لأنه بالأمام ماسك سلاح
و كأنه قاعد يحارب , تعابيره تعطي فكرة انه يحب اصحابه و يدافع
عنهم و ما يرضى عليهم .. بنفس الوقت تسريحة شعره تبيّن انه في
وايد بنات بنفس الأنمي راح يحبونه لكنه خجول جداً

لو توقعت هالشي فـ انت صح 100% ^^

البنت : طيبة - شجاعة - خجولة ..

مكانها بالبوستر ورا الولد يبيّن انها البطلة الثانية طبعا للأنمي و اهي
الي راح تحب البطل و يحبها , ولو هذا ما كان مؤشّر فـ شعرها الوردي
يثبت كلامي .. ولو بنمسك شعرها فـ بنستنتج اشياء اخرى نفس :

- لها ماضي حزين
- بالبداية بتكون عصبية و بعدين
نكتشف ان قلبها طيب
- تغار على البطل من باقي البنات
- بالبداية بتكره البطل بس بعدين بتحبه
- الأنمي راح يركز عليها بـ عدة حلقات و البطل بينقذها
من الاحساس الي اهي عايشته بدون ما تنقذ نفسها بنفسها
و هذا المؤلفين سووه عشان يثبتون قوة البطل بدال ما يسوون
شخصية حلوة من البنت

لو توقعت كل هذا فـ انت بعد صح 100%

الأنميات المقتبسة من الروايات عندهم مشكلة التكرار , تكرار نفسهم
بدال ما يفكرون بأشياء يديدة و مبتكرة و غالباً ننتهي عند انميات نفس
هذا و Sword Art Online و Gate الي ما يهتمون الا بالتكرار و
بعدم التنويع

الأنمي صحيح ان تم تحليله من البوستر بس لكن هذا يثبت نجاح؟ طبعا لا

لأن البوستر على رغم انه يعطيني فكرة الأنمي الا ان فكرته سيئة جداً
من ناحية اللبس الممل بشكل خيالي + ديزاين الشخصيتين الممل بشكل
خيالي + شخصية الولد و البنت المملين بشكل خيالي

طبعا هذا غير الخلفية الغريبة و الي مالها معنى وراهم .. الأصفر هذا
يعني جناح؟ لو انه جناح فـ وين جناح الولد؟ لو جناح الولد موجود
عاليسار المسكين ليش مو كامل باليمين بعد؟ شلون جناح الولد
طالع ورا البنت مع ان المفروض يكون جدامها لأن الولد جدامها؟

شنو هالتأثير الغريب الموجود بسلاح الولد؟ ليش ديزاين الأسلحة
اشكالهم سيئة لهالدرجة؟ .. إلخ

بوسترات ناجحة لأنميات ناجحة :
( اضغط على الإسم )

Boruto : Naruto Next Generations

Dragon Ball Super

My Hero Academia


​

 

[7sN]

رد: we fall to learn how to pick ourselves up | 7sN

عبقرية One Piece

انا من زمان اعرف عن ون بيس طبعا كعادة اي متابع لـ انمي و من زمان
شدني بقصته و شخصياته و بإطار القصة ( المكان - الزمان - الخلفية )
لكن ما حصلت لي فرصة اتابعه و لما حصلت فرصة ما كان لي خلق اشوفه
لطوله و لتواجد الأنميات الثانية الي اقدر اشوفها

بس قبل فترة وصلت لـ حالة اصرار " ابي اشوف ون بيس " و هالاصرار ما تشبّع
الا لما فتحت المانجا و شفت كم تشابتر .. انا حالياً بأوائل ون بيس و تقريبا اعرف
الي راح يصير كله لأني حرقت على نفسي من قبل لكن عبقرية ايشيرو اودا صانع
ون بيس ما تخليني ازهق من الي قاعد اشوفه

ون بيس قصة رائعة تتكلم عن لوفي شخص هدفه يصير ملك القراصنة و ما راح
يحصل هاللقب الا بحصوله على كنز ون بيس .. هذي قصة ون بيس الي نقدر
نقولها ببساطة لغيرنا من الناس عشان نعطيهم نبذة .. بساطتها ممكن تخلي الي
جدامك ينصدم و يقولك " القصة سخيفة و بسيطة ليش مشهورة لهالدرجة؟ "

هذا السؤال الي يحيّر و يبهر .. ايشيرو اودا من اول تشابتر ( او ثاني تشابتر ) قدر
يوصل لي انه عبقري لأن اول اثنين تساعدوا مع بعض هم لوفي و كوبي .. لوفي
هدفه يصير ملك القراصنة و كوبي هدفه يكون من المارينز الي هم اعداء القراصنة
و شرطة البحر .. هذي عبقرية و شي جميل بإنك تفتح قصتك بأثنين مقدّر لهــــــم
يكونون اعداء بالبداية اصحاب و يتساعدون مع بعض !

بعدين لوفي لما راح يجنّد لطاقمه , اول اثنين اخذهم و انضموا له هم رورونوا زورو
و نامي , رورونوا زورو معروف بـ صائد القراصنة و نامي تكره القراصنة لأنهم لهم
تأثير سلبي بماضيها .. من هنا انا عرفت اني اعشق ون بيس

مغامرة لوفي الفريد من نوعها انها قاعده تغيّر معنى كوْن الشخص قرصان لدرجة انه
فعلاً أثّر بعقول الناس لما يفكرون بـ قرصان يتذكرون ون بيس و لوفي من ناحية انه
فعلا قرصان لكن هدفه ايجابي و افعاله دايماً ايجابية .. اودا قدر انه يغير معنى موجود
بالوقت الحالي من خلال حبه للقراصنة و لقصصهم قدر يألّف قصة ثانية تخليه يطلّع
ابداعه و عبقريته من البداية فقط

ون بيس مانجا اسطورية و تستحق كل الحب الي حصلته لأن اودا مؤلف ما يهدأ
من نواحي تأليفه و ابتكاره لشخصيات ون بيس اولا , ثانيا قصص الشخصيات ,
ثالثاً ديزاين الشخصيات الأكثر من رائعة , رابعاً التفاصيل الموجودة بعالم ون بيس
, و صدقوني كمية التفاصيل الموجودة تحببك بالقصة اكثر من ما انها تمللك منها

و بما اني بالبداية فـ انا احسد نفسي لأني للآن ما حصلت 1% من عبقرية
اودا و متحمس اني اعرف اكثر و ان شاء الله راح اوصل

..
مو مصدق اني وصلت اكثر من 2000 مشاهدة

ق4 شكراً ق4


​

 

[7sN]

رد: we fall to learn how to pick ourselves up | 7sN

Attack On Titan

هجوم العمالقة الموسم الثاني .. كارثة

من بعد الاخراج الرائع بالموسم الأول و الأكشن و الأنيميشن الأروع
تحمست للموسم الثاني و كانت عندي بعض الانتقادات بخصوص الشخصيات
بإن الشخصيات مو ماخذين حقهم , و تمنيت لو انهم يصلحون مشكلتهم بإنهم
يعطونا قصة حلوة بنفس مستوى الموسم الأول مع شخصيات لهم اعماق و
ممتعين بالمشاهدة

نزل الموسم الثاني كله و حماس الناس حمسني لأن الكل عاجبه هالموسم و الكل
يقول جبار و احداثه روعة و شخصياته روعة .. تحمست قلت اوكي بشوفه لما ينزل
كله عشان اتفرغ وقتها .. شفته .. تحسفت و انحبطت

المشاكل الموجودة بهالموسم من كثرهم مو قادر اقولهم الا بالترتيب و على
عكس هجوم العمالقة فـ انا اهتم بالترتيب .. المشاكل :

1- الاخراج

الاخراج بالموسم الأول كان جبار و هذا المتوقع من المخرج تيتسورو أراكي
الي أخرج Death Note و اتوقع عارفين الشبه بين مذكرة الموت و العمالقة
, لو مو عارفين فـ الشبه اهو تحريك الكاميرا بشكل زيادة عن اللزوم لخلق جو
المتعة و الحماس و طبعا نجح بهذا الشي بالموسم الأول من العمالقة

لكن بالموسم الثاني مادري شنو صار مع فريق الإخراج بس الاخراج سيء

بالموسم الأول الشخصيات لما يتكلمون كانوا يتحركون و حركاتهم تبيّن لنا
شخصياتهم و تحسسنا ان في حركة قاعدة تصير .. بالموسم الثاني نشوف
مجرد صور واقفة مافيها حركة و معاها حوار سيء بمعنى الكلمة , الحوار
و الاخراج وجهين لعملة واحدة و لما اثنينهم يكونون سيئين نحصّل نتيجة
سيئة جداً و مملة و بعيدة كل البعد عن المتعة

بقارن بـ لقطة من الموسم الأول ضد لقطة من الموسم الثاني

شوفوا هذي :

[YOUTUBE]VOuQlz4k5OQ[/YOUTUBE]

هنا العملاق رسمه رسم يد , واضح وضوح جميل جدا و تحركات الكاميرا
اقدر اقول عنها بكل ثقة انها اسطورية بكل ما تحمله الكلمة من معنى ,
تحريك ايرين كان فيه اهتمام كبير من ناحية جسمه و تأثير الهواء على
جسمه بحركته + احنا طول الوقت مع ايرين عايشين حالته و مركزين على
كلامه و احساسه و تنفسه و مع كل هذا قاعدين نشجعه و عارفين كل
تحركاته

الحين هاللقطة من الموسم الثاني

[YOUTUBE]u7ezbxVcUSc[/YOUTUBE]

العملاق هنا رسم كمبيوتر , شكله مو واضح نفس اللقطة الأولى و تحركاته لو
تركزون عليه بتلاحظون انها غريبة و مو لايق عليها تكون بأنمي رسم يد ابداً
و الكاميرا هنا ما تعطي زوايا حلوة نفس اللقطة الي قبل , الزوايا هنا على عكس
باللقطة الأولى ما تهتم بإنها تعطينا فكرة للي يصير كثر ما اهي مهتمة بإنها
تعطينا فكرة ان في اكشن قاعد يصير و بس .. الشخصيات مالهم اهتمام بـ
تعديل اجسامهم و تحريكها بالعكس اصلا كلهم ثابتين و يتحركون بالهواء بدون
ما نحس انهم بشر من الأساس + ما عشنا حالة شخصياتهم نفس ما عشنا
حالة ايرين باللقطة الأولى

ممكن بعضكم يقول ما نقدر نعيش حالتهم لأن هالمرة هذيلا شخصيات وايد
بس انا ما اتفق معاكم لأننا شفنا من قبل ان في انميات يخلونا نهتم بـ شخصيات
كثيرة بمكان واحد .. الحالة تحتاج لها ابداع و شغل مو كسل

2- فلاش باك

الفلاش باك هو ذكريات الشخصيات لموقف سابق حصل لهم , من الطبيعي
اننا نحصل فلاش باك لكن من الغير طبيعي اننا نحصل فلاش باك بكللل حلقة
من الموسم كله الي ما يتضمن غير 12 حلقة بس

كل حلقة بدايتها فلاش باك طويل يتم ببعض الأحيان لـ 12 دقيقة ما نحصل منه
غير معلومة وحدة بس .. مثلا فلاش باك يوميرو و هيستوريا\كريستا :

كانوا بالثلج و معاهم واحد مصاب فـ قاعدين يساعدونه للوصول للمكان المطلوب ,
بهاللقطة كلها ما عرفنا غير ان يوميرو قالت لـ هيستوريا انها تعرف ان كريستا
مو اسمها الحقيقي , و بسسسس ما استفدنا ولا شي ثاني و كل هذا اخذ من
الحلقة 12 دقيقة كانوا يقدرون يستغلونها بتكملة الأحداث الحالية

نقد اضافي لهالحدث : ايرين و الي معاه سئلوا وين هيستوريا؟ ميكاسا قالت انها
قاعده تساعد واحد مصاب .. انزين يا ميكاسا لو انج تعرفين هالشي ليش ما قعدتي
معاها تساعدينها؟ لو انها كانت معاهم عالأقل كان بيصير لـ ميكاسا شخصية منفصلة
عن ايرين .. و طوول الموسم ميكاسا واقفه مع ايرين و كل جملة تقولها تتضمن اسم
ايرين .. لهالدرجة هالشخصية مالها شخصية؟

فـ الفلاش باك موجود بكثرة بهالموسم و بكل حلقة في فلاش باك يخرّب سرعة
الحلقة و سير الأحداث .. انا مهتم بالأحداث ليش تحطون فلاش باك؟

3- التشويق

هذا اسخف شي بهالموسم .. عمري ما شفت مؤلف يبي يستغل كل فرصة صغيرة
بإنه يسوي لقطة تشويق عشان يخلي المشاهد مندمج و متفاعل .. مثال :

بالحلقة الثالثة في قروبين منتشرين بالغابة .. صار ظلام و الغيوم غطت على القمر
فـ رئيس القروب الأول كان يمشي بالظلام و خايف ان ممكن العمالقة يهجمون عليه
و على قروبه فـ لازم يوصلون لمكان يتخبون فيه .. وصلوا للمكان و بعد فترة شافوا
العمالقة قاعدين يهجمون عليهم و كلهم انصدموا و قالوا مستحيل العمالقة قاعدين
يتحركون بهالوقت من الليل

لو انهم مستحيل يتحركون بهالوقت فـ لييييش انت كنت خايف و مرتبك لما كنت
تمشي بالظلام من انهم يهجمون عليك؟ مو هم ما يتحركون بالليل؟ فـ ليش كنت
خايف من هجومهم عليك بالليل؟

نقد اضافي لهالحدث :

القروب الأول كانوا يمشون بالظلام مرتبكين و بالصصصدفة شافوا القروب الثاني
امامهم .. رئيسة القروب الثاني قالت "احنا نحتاج نور عشان نشوف وين نروح"
بسسس انتهت من جملتها بالصصدفة الغيوم ابتعدت عن القمر عشان ينوّر المكان
, و بالصصصدفة لقوا مكان يتخبون فيه

هذي 3 صدف صاروا بـ لقطة وحدة .. شلون ممكن اتقبلها؟ مستحيل

المثال الثاني للتشويق اهو لما المتدين يكلم ايرين و هانجي و ميكاسا و ليفاي
و يقولهم "في بنت احنا نراقبها" تسائلوا منو هذي البنت؟ .. بنفس الوقت برا الباب
ساشا واقفة و تبي تدخل .. فـ المتدين قال "البنت اسمها -" لما قال اسم البنت
دخلت ساشا عليهم و قدّمت نفسها , المعنى من اللقطة ان المتدين قال اسم البنت
الي يراقبها و المفروض احنا ما نسمعه لأن ساشا دخلت و قدمت نفسها .. هنا
احنا لازم نعرف ان خلاص بما اننا ما سمعنا اسم البنت فـ راح نعرفه بالحلقة القادمة
و راح نقعد نتوقع منو البنت ليين الاسبوع الجاي .. لكن هذا ما راح يصير لأن
بعد دقيقة بالضبط هانجي سئلت ايرين "منو هذي البنت؟" ايرين قال "هذي وحدة
من الجنود شعرها اشقر و قصيرة" .. و الكاميرا تحط على هيستوريا عشان نعرف
منو يقصدون

اوكي .. لو انكم بتقولون لنا منو هذي البنت , ليش من الأساس تخبون اسمها علينا؟

يعني ابسط امور التشويق تخربونها بإنكم تشوقونا لـ شي و بعد دقيقة
تفصحون عن الشي هذا الي المفروض نكون متشوقين عليه؟

4- أهمية الأحداث .. ؟

بالحلقة الأولى من هجوم العمالقة الموسم الثاني نشوف عملاق كأنه غوريلا
يطلع و يقتل واحد من الجنود .. هنا قلنا اوكي هذا بيكون الشرير و بما انه
طلع من اول حلقة يعني دوره كبير بالقصة , لكن من بعد هالحلقة ما طلع ابداً
طول الموسم الا لقطة لقطتين .. لو انه ماله دور بهالقصة فـ ليش تحطونه
بأول حلقة اساساً؟

الي بيقولي ان هذا تجهيز للموسم الثالث فـ ليش حاطينه بالمقدمة يركض
و معاه حوت طائر و سلحفاة طائرة و ديناصور و فيل عمالقة؟ هل المقدمة
بعد تعتبرونها تجهيز للموسم الثالث؟ لأن الي اعرفه ان المقدمة اهي للموسم
الحالي مو للموسم القادم

5- الكوميديا

اشكال العمالقة من الموسم الأول كان فيهم الي اشكالهم يضحكون لكن كانوا
يخوفون بنفس الوقت بسبب زاوية الكاميرا و الموسيقا و الحدث .. بهالموسم
هذا فهموا هالشي غلط و صاروا العمالقة كلهم اشكالهم تضحّك بدون معنـــى
ولا تأثير فقط اشكالهم تضحّك لمجرد الضحك .. و هذا شي فهم نفسه غلط

6- الشخصيات

- ايرين شخصية مملة كـ بطل للأنمي
- ميكاسا طول الأنمي بجانب ايرين و كله تقول ايرين
- هيستوريا شخصية لها اعماق بس مالها متعة ولا تمييز
- هانيز او هانز ماله داعي يكون بهالموسم ابداً ابداً الا
عشان الي صار بآخر حلقة و كان سيء
- يوميرو شخصية ساعات تكون حلوة و ساعات تكون سيئة
لما اعرف ان هدفها الوحيد بالحياة متصل بشخصية ثانية
- بيرتولت شخصية مملة بزيادة
- جون افضل شخصية بهجوم العمالقة ما اعطوه دور ولا تأثير
بهالموسم للأسف

افضل شخصيتين هالموسم بكل جدارة هم راينر و آرمين

و على فكرة جون و راينر و آرمين افضل 3 شخصيات عندي
من الموسم الأول و الحين حبيتهم اكثر , لكن كرهت الأنمي
فـ حبي لهم صار ماله معنى

انتهيت من مراجعتي لهالموسم الي خلاني اتعب نفسياً و احبطني
لدرجة عميقة .. كنت اتمنى يكون حلو لكن انحبطت

شي ينرفز صراحة ان بعد 4 سنوات يرجع هجوم العمالقة بـ 12 حلقة فقط !
الجمهور ناطرين 4 سنوات عشان تعطيهم 12 حلقة بإخراج سيء بـ تحريك
سيء

تقييمي :

اخراج : 4
قصة : 1
تحريك : 4
أكشن : 3
اداء صوتي : 10
موسيقا : 5

لو في احد ما يتّفق معاي و يعتبر هالموسم على الأقل جيد فـ اتمنى
يكلمني و يوضّح لي ليش جيد عشان بسمع نظرة شخص يحب هالأنمي
و ابي اعرف لو ان الحماس خلاكم تحبون هالأنمي ولا المحتوى نفسه



​

 

[7sN]

رد: we fall to learn how to pick ourselves up | 7sN

تكرار الشخصيات اهو شي شفناه بكثير اعمال و بالأخص انميات
الشونين .. البطل الي يحب اصدقائه و يدافع عنهم + البطل الي
مستقبله مميز لكن اهو ما يعرف بهالشي + البطل الي على نياته
و تصرفاته صبيانية .. إلخ

فـ لا غبار على ان الشخصيات في كثير منهم مكررين و كثير منهم راح يتكررون
بالمستقبل لأن هذا شي ماله مفر .. لكن كيف نقدر نعرف نفرّق بينهم؟

الشخصيات بشكل عام لهم 4 ابعاد :

بعد اجتماعي - بعد جسدي - بعد نفسي - بعد روحاني

فـ طبعا البعد الاجتماعي يتكلم عن اجتماعية البطل و علاقاته
و تصرفاته مع الناس الي يعرفهم و حوالينه

البعد الجسدي يشرح نفسه لأنه يتكلم عن الجسد و الاهتمام فيه

البعد نفسي ايضاً يشرح نفسه من ناحية نفسية البطل و ثقته بنفسه
و رغباته

البعد الروحاني يتكلم عن معتقدات البطل و غالباً هذي امور تكون
متصلة بالدين و المعتقد لكن ايضاً يتضمن المعتقدات الحياتية

كل هذي الأبعاد ناخذهم و نطبقهم على الشخصيات الي نشوفهم بالأنميات
و راح نشوف اختلاف كبير جدا بينهم و نعدّي حالة التكرار

فـ مثلا كيشيموتو ( صانع ناروتو ) عبّر كثير عن حبه لـ دراغون بول و
لشخصية قوكو لدرجة انه سوّا شخصية ناروتو يشبهه .. لكن حتى مع
هالتشابه نقدر نطلّع اختلافات بينهم لو استخدمنا حركة الأبعاد

البعد الاجتماعي :

قوكو انسان مو اجتماعي ابداً .. عنده علاقات مع الناس حوالينه اكيد لكن علاقاته
تعتمد على اصحابه اكثر منه , الاجتماعية عمرها ما كانت مشكلة بالنسبة له ولا
ذات اهمية له لأنه ما يعترف بوجودها و اتحدى لو كان يعرفها

ناروتو من اساسيات شخصيته الاجتماعية , فـ نشوفه بالأنمي يحاول يكوّن صداقات
و علاقات مع الناس عشان يحصّل حبهم و هذا كله يبيّن فيه لما يتكلم و يصير حكيم
ببعض اللقطات و هالشي ينعكس على قدراته الاجتماعية فـ هو يقدّر الكلام اكثر من
القتال على عكس قوكو

البعد الجسدي :

قوكو يحب القتال .. طول حياته يتدرّب و ما يمر عليه يوم ما يتدرب فيه .. الا لما
يكون بغيبوبة , فـ اهو يعتبر القتال و التدريب اسلوب حياة و من هالناحية يحافظ
على جسمه و شكله

ناروتو يستخدم التدريب كـ وسيلة لحل مشكلة الخلافات الموجودة بقريته و خلافه مع
ساسكي و المشاكل بشكل عام .. اهو ما يعترف بالقتال كـ اسلوب حياة و لهذا التدريب
و الحفاظ على الجسد بالنسبة له مو نفسها الي عند قوكو

البعد النفسي :

قوكو شخص على نياته و ما يبذل جهد بالتفكير بشكل عميق او يحاول يفهم غيره , فـ مثل
ما قلت اهو يهمه القتال ما يهمه الشي الي ورا القتال ولا السبب فـ اهو يلاقي الراحة بالقتال
و يلاقي الشي الي يدوّر عنه طول حياته

ناروتو انسان تعب نفسياً من صغره من معاملة الناس له و وحدته .. فـ حياته كلها صارت
مبنية على انه يصلّح هذي المشكلة و لما لقى ساسكي لقى شخص يفهمه و نفس حالته لهذا
نشوف الأنمي يعتمد على صداقتهم اكثر من اي شي ثاني

البعد الروحاني :

قوكو ما يعتقد بأنه مقصّر بحق نفسه او بحق عايلته .. اهو شخص عايش حياته بدون معتقدات
و بدون قيود لدرجة انه يزعل لما يضطر انه يشتغل و ما يعيش حياته نفس ما يبي

ناروتو كما هو واضح من انمي بوروتو نشوفه يلوم نفسه على تقصيره اتجاه بوروتو و
بيته كله .. يعتقد بأن الترابط اهو اهم مافي الحياة و بدونه ما راح يكون في حياة يستحق
العيش فيها و هذي الفكرة الرئيسة لشخصيته و للأنمي كله

مثل ما شفتوا .. اختلاف عميق

حركة الأبعاد تخلي الشخص يستمتع اكثر بالي يشوفه خصوصاً لما يشوف
جوانب من شخصية ما كان يدري انها موجودة و يقدّرها بالمؤلف نفسه

و هذا شي ينطبق على شخصيات كثيرة الناس يشوفونهم متشابهين و من
بينهم شيغيو من موب سايكو 100 و سايتاما من ون بنش مان



​

 

[7sN]

رد: we fall to learn how to pick ourselves up | 7sN

قرار اني اسوي مدونة يمكن كان احسن قرار اتخذته بحياتي

نظرتي كانت مختلفة كلياً بالسابق على المدونات .. لما كنت بمنتديات ثانية
كنت ألاحظ ان قسم المدونات موجود لكن ما كنت ادخله لأن ما عندي اهتمام
بإني اعرف حياة الناس اليومية

انا احب اتعلم .. الشغلات الي اتعلمها احب انها تكون بميولي كالعادة , احب الأفلام -
الأنميات - المسلسلات - و غيره من الأمور الفنيّة طبعا الي اعتبرها اولوية

انا انسان اتابع كثير من النقّاد على اليوتيوب و اغلبهم انجليزيين

RedLetterMedia - Digibro - Chris Stuckmann
RalphTheMovieMaker - BestGuyEver

هذيلا الخمسة اعتبرهم من افضل النقّاد الي اتابعهم لأسباب معينة ممكن اتطرق
لها بتدوينة اخرى .. لكن سبب ذكري لهم هو ان هذي ميولي و هذا الشي الي
اعتبره طموحي .. احب انتقد اشياء و بنفس الوقت أعششق اسمع نقد غيري لعمل

و هذا سبب انشائي للمدونة

احب انتقد الأعمال .. احب اوضّح بعض الأمور الي نشوفها بالأعمال الفنيّة و دايماً
اذكر اني مو انسان مختص بهالأمور انا مجرد شخص احب هالأمور و هدفي
اني دايماً اعرف اكثر و اكثر عنها

و طبعا خلال التدوينات واضحة اهدافي من ناحية اني احب النقاش .. و اساساً
سبب تسجيلي بالمنتدى اهو اني شفت قسم الأنمي العام

..

بما اني ذكرت النقد و الي اتابعهم فـ انا انصح بمتابعتهم بشدة لأنهم يتكلمون عن تفاصيل
التفاصيل بأسلوب جميل و بناحية تبيّن اهتمامهم و حبهم للفن

لكن افضل ناقد عندي شفته بحياتي اسمه فيلم جامد

باليوتيوب تكتبون فيلم جامد او Film Gamed و يطلع لكم

هالإنسان خطير

انا ذكرت اني اعشق اسمع نقد غيري لعمل معين .. مهدي ( صاحب القناة ) يتكلم
عن الأفلام بعمق زايد و سبب حبي له و لكلامه انه يعرف يوصّل مشاعره بكلامه
و هذا شي اعتبره صعب جداً

يوصّل التفاصيل بالأسلوب الصحيح و المناسب مع التشبيهات المناسبة .. انصح بمشاهدته

..

فـ القصد من كلامي كله

المدونة خلتني ألاقي المكان الي اطبّق فيه حبي للنقد و الإفادة

فـ يعطيكم العافية الي تابعوني من البداية و في سؤال ابي اعرف جوابه بكل صراحة

هل اسلوب كتابتي حلو او ممتع؟



​