مدونة متألقة A Ca$e for a Gentle Thief and a Treasured Heart - 7sN (2 زائر)

[7sN]

أحس دروسي الفنّية انتهت حاولت ابحث عن أمور اتكلم فيها و ممكن افيدكم فيها لكن احس
اني تكلمت عن اهم الأشياء خلال هذي المدونة و جد جد جد أتمنى اني افدت بعضكم من الي
يبي يألّف القصص .. لكن في شي واحد مادري لو اني ذكرته او لا و راح اتكلم فيه بهذي
التدوينة

مهما كانت القصة الي تألّفها , لو كانت ذكية او مرتّبة او افكارها حلوة .. هذي كلها أشياء ما تهم ,
لأن الي يهم هو استمتاعك بكتابة قصتك

دايماً لما نكتب قصة فـ احنا نكتبها من القلب و من الاحساس .. لهذا احنا نواجه صعوبات و لهذا احنا
نكنسل القصص و ما نكمل كتابتهم , لما يكون في شعور اننا ما سوينا المطلوب علينا فـ هذا شعور مو
هيّن و مو سهل تقبّله .. الحل هو الاستمتاع

لما تكتب و انت مستمتع راح تكتب و انت مبدع , راح تحط احلى الافكار و راح تخلي الشخصيات يتفاعلون
مع هذي الأفكار , لأن وقتها كل الي يهمك هو انك توصّل رسالتك و تكمّل الي بديت فيه .. خل روحك تبيّن
خلال حروفك , و تتوضّح متعتك خلال افكارك​

من المخرجين الي واااضحة بصماتهم بأفلامهم :

1- Quentin Tarantino
من أفضل المخرجين الي شفتهم بحياتي .. من أفلامه : Django Unchained - Resevoir Dogs

2- Christopher Nolan
أفضل مخرج عندي شخصياً .. من أفلامه : ثلاثية باتمان - Inception

3- Martin Scorsese
أفلامه دايماً واقعية و واضحة بصماته فيها .. من أفلامه : The Departed - Shutter Island

هذيلا 3 مخرجين ذكرتهم لأن كل أفلامهم واضحة بصماتهم فيهم و هذا يدل على المتعة
و الدقة الي حطوهم بأفلامهم .. أتمنى لو شفتو اي فيلم من الي ذكرتهم بتستوعبون الكلام
الي قلته بشكل أعمق ق5

 

[7sN]

كل عام و انتوا بخير جميعا ق5

ادري متأخر 5 أيام صدقوني معذور -_-

مثل ما البعض يعرف انا مسجل من سنة 2015 , لكن ما بدأت أشارك و أتفاعل الا سنة 2017 شهر 4
بالتحديد , خلال هذي السنة تعرّفت على أعضاء كثيرين من بينهم قعدت اتواصل معاهم حتى برا
المنتدى و البعض الآخر إلى الآن اتواصل معاهم بداخل المنتدى .. حبيت اذكر اسماء الأعضاء الي لهم
معزّة عندي و كل احترام و تقدير مع ذكر مواصفاتهم و تحت المواصفات احط رسالة مخصوصة لهم
بـ كود Spoilers .. طبعا الجميع يقدر يقرأ رسايلي الي بالكود لكن ابيها تكون كأنها مخصوصة للأشخاص
المحددين ق5

Donna

أول عضوة تعرفت عليها بالمنتدى , طيبة و نشيطة و طموحة , حبها للمسلسلات لا يقارن
بأي شي ثاني غير حبها للتميّز بأعمالها الشخصية او بمواضيعها و مشاركاتها بالمنتدى ,
لما تعرفت عليها كانت كل يوم تشااارك بكل الأقسام خصوصاً قسم الألعاب بس مادري شلون
بعدين صارت مشرفة الفن و الأنيميشن تصاميمها حلوة و أحب الزوايا الي تختارهم للصور
و هذا يدل على نظرتها و على انها تحب الترتيب .. نفس الكل اهي عندها أهداف لكن على
عكس الكل اهي قاعده تشتغل عشان تحقّق الأهداف و هذا الي يعجبني فيها , عندها اصرار
على تحقيق الشي و لما تحط الشي هذا ببالها راح تشتغل عشانه

محتوى مخفي

كل انسان يسعى لأهدافه راح يواجه جميع أنواع العوائق , القوة الي عندج أكبر من أي عائق ممكن ينوجد بالحياة

THE LAST

عاشقة ناروتو , راح أحاول ما اكرر نفسي بـ كلمة "طيبة" لكن ذا لاست اهي أطيب انسانة
بالمنتدى بمراحل , من ناحية الأخلاق نشوفها كريمة و من ناحية الأفعال نشوفها تعطي كل ما
عندها من طاقة .. تحب مساعدة الأعضاء و الناس بشكل عام و هذا الشي الي يميّزها عن غيرها ,
حب الناس أشوفه يختفي و ينمحي لكنه متواجد بقوّه عند لاست بشكل منعش و ملهم .. و لهالسبب
عطيتها لقب "أم المنتدى" , لأنها متفهّمة و إيجابية و صبورة على كل مشاكلها و ظروفها و هذا
شي يُقدّر و يُحتَرم و يخلّي معرفتها مكسب للشخص أكثر من انه يكون مكسب لها

محتوى مخفي

إيجابيتج تعطي غيرج إلهام كبير , و لهذا هالشي بالمقابل لازم يعطيج انتي الإلهام لعدم الاستسلام و لإكمال السعي نحو الأهداف

Dr.Nadine

قبل معرفتي بـ نادين كانت عندي فكرة سيئة عن كل شي كوري بالحياة .. بعد معرفتي فيها صرت
مهتم بالفن الكوري بشكل عام xD , الاحترام و الهدوء الي شفتهم فيها كانوا أشياء يدلّون على انسانة
لا يندم من يتعرف عليها , عندها إلتزام بأعمالها و هالإلتزام يخليها تسوي كل شي على أكمل وجه
بدون أي تقصير , آرائها بتدويناتها دايماً آراء منطقية و تدل على معرفتها بـ ربها + بأخلاقها النادرة
الوجود , و لهالسبب الكل بالمنتدى يعرفها و يطلق عليها لقب "دكتورتنا" .. و لهالسبب أيضاً لما
عرفت اني صرت مشرف المدونات معاها ارتحت لأن وجودها و إلتزامها دايماً مكسب للمشاركين
معاها​

محتوى مخفي

المجتمع صار يعتبر كلمة الحق ضعف و فعل السوء شجاعة , انتي انسانة قررتي تكونين ضعيفة أمام المجتمع و شجاعة أمام ربج .. هذا شي يستاهل المحافظة عليه

LENA

لينا اعتبرها أختي الصغيرة الي عندها عقل اكبر مني اهي تحصّل جملة "عقلج كبير" كثير من
الناس , و هذا دليل على صحة الجملة .. لينا انسانة ذكية و محترمة و هذا شي شفته فيها اول ما
ضغطت على مدوّنتها , ذكرت بإحدى التدوينات بأنها تقرأ الكتب لكن هذا شي لا يصدم لأن نضجها
ينعكس بحروفها و ترتيب كلامها , لها موضوع رائع بقسم المعرفة بإسم "إصرار رغم الإعاقة" و
بعد ما شفته عرفت ان لينا انسانة تختار مواضيعها بـ دقّة , لما تسوي موضوع ما تسويه عشان
تدخل التكريم و بس بل تسويه لأنها مهتمّة و لأنها تبي تفيد غيرها .. طموحها عالية و مالها حدود
و رغم الحواجز الي أمامها إلى أنها توجّه تركيزها على كل الي تقدر تسويه , أحس انها راح يكون
عندها مشاريع بالمستقبل و راح تكون عندها افكار كثيرة و اتمنى لها كل التوفيق بكل هذي الأمور

محتوى مخفي

بالسابق كان العمل هو الروتين الاعتيادي , الآن الكسل صار اعتيادي .. و هذا شي يخليج مميزة أكثر و أكثر , بما ان الحياة وفّرت لج هذي الميزة استغليها لأنج انسانة أكثر من مميزة بعقلج و أخلاقج , انتي تعملين بإصرار و دافع و هذا شي كافي لتمييزج عن الي يعمل لمجرد العمل

تدرون ان المنتدى مافيه شباب كثير؟

Mahdicchi

رغم إنه أكثر شخص أستمتع بمناقشته إلا اني ما اعرف عنه شي xD , بس اسمه موجود لأني
أشوفه من أقرب الأعضاء لي و اعتبره أخ قبل ما يكون عضو عادي .. اهو صريح و مزاجي
و يكره التفلسف .. يعجبني انه يخلي حياته الشخصية برا المنتدى و ما يعتبر المنتدى إلا انه
مكان للترفيه و الوناسة

محتوى مخفي

لا تتابع دراغون بول سوبر , تابع دراغون بول جي تي xD + الله يوفقك بحياتك الشخصية و العملية و توازن بين كل هذا و المنتدى , لك تواجد كبير بالمنتدى و مكانك واضح بغيابك

YOON

عضوة تعرفت عليها بـ أواخر 2017 و حسيت اني اعرفها من زمان , عندها اسلوب بالكلام جدا
جميل يحسسك انها تعرفك من وقت طويل و هالشي ساعد بسرعة بإني احط اسمها من ضمن الي
أعزهم و احترمهم , أكيد متشوّق لمعرفتها أكثر هذي السنة و اتمنالها كل توفيق

محتوى مخفي

حافظي على قوّتج خلال هالظروف , القوة هذي راح تنتج عن قوة أكبر و كله يؤدي للراحة بالنهاية

~GO~

أعتبرها الأم الثانية للمنتدى انسانة ذكية و مثقفة و موهوبة بكل مجالاتها , اتذكر اول مرة
ردت على اول موضوع لي و دايماً انعجب بمواضيعها .. رسميتها مع الأعضاء اعتبرها من
مميزاتها لأنها تغصب الشخص على احترامها ولو بنتكلم عن الاحترام فـ اهي من أكثر الناس
استحقاقاً له

محتوى مخفي

رسمي مانجا xD

Nero

ما اعتقد ممكن اقول كلمة محد يعرفها عن هالانسان لدرجة اني انصح بمتابعة مدونته
على ان أحد يقرا كلامي , لكن من ناحيتي اشوفه شخص متناقض .. من ناحية انه ذكي لكنه
محشش بنفس الوقت ذوقه بالأنميات جميل خصوصاً لما عرفت انه يحب Fist of the
north star , و لما عرفت انه يحب دراغون بول صرت اعتبره اخوي الكبير xD

محتوى مخفي

الله يوفقك و يسعدك مثل ما اسعدت غيرك و خليت غيرك يضحك على سوالفك بالمدونة

SaRaChi x

ردودها على مواضيعي سعادة انا عندي مبدأ أمشي عليه و هو أي شخص يعرف أي شي عن
باتمان فـ هالشخص يصير مثل الأخ بالنسبة لي .. بهالحالة مثل الأخت طبعا , انسانة ولا اروع
من ناحية الذوق و التعامل و الاحترام ما شفت نفسها , غيابها دايماً واضح و اهي من الناس الي
بسرعة صارلهم معزّة كبيرة عندي

محتوى مخفي

تركيزنا على جوانب حياتنا يخلينا نشوف حياتنا بهذي الجوانب , ركزي عالإيجابيات لأنها دايماً موجودة

MaRia ChaN
​

مريم أول انسانة تحط لي ملاحظة بحسابي ( قبل لما كان فيه ملاحظات ) و ما راح انسى هالشي
مريم من الأعضاء الي شخصيتها سهل الكلام معاها لأنها تعطي مجال و تتفاعل مع كل كلمة تنقال
بالموضوع , تفاعلها جداً إيجابي و يفتح النفس و أحس محظوظ كل شخص يكلمها لأنه راح يتعامل
مع انسانة بهالطيبة

محتوى مخفي

اتمنى لج التوفيق بحياتج وأهدافج , بما ان عندج أهداف فـ لا شيء مستحيل خصوصاً و ان عندج هالشخصية

LoLo ChaN ( كيس نقانق -_- )

لولو من الناس الي يفتحون النفس بخفة دمهم و تفاعلهم الكبير , لما سجلت بالمنتدى بالبداية اتذكر تفاعلها
و كيف ان الكل عرفها بسرعة بسبب هذا التفاعل .. وجودها دايماً يعطي طاقة للي حوالينها و احس هذا
شي مفقود و مطلوب لكننا نلاقيه فيها بشكل كبير

محتوى مخفي

غيْري اسمج لـ LoLo ChaN

ROOD

رغد ثاني عضوة تعرفت عليها , كمية الطاقة و النشاط الي فيها ما اعرف ولا اقدر اوصفه .. تواجدها
دايماً قوي و اهي من الأعضاء الي لهم وجود و كاريزما واضحة من بين الكل , إلى الآن اتذكر موضوعها
الكبيير الي عن اتاك اون تايتن الي كله عبارة عن تصميم روعة وراه تصميم أروع , للأسف ظروفها خلتها
تغيب فترة عن المنتدى و تأثير غيابها كان واضح بقوه .. غريب ان عضوة وحدة تقدر تعكس طاقتها الإيجابية
بهالشكل .. و طبعا ما ننسى أيامها الأخيرة بالجامعة ما خلت أحد ما قالتله من الفرح , اتمنى انها تكمل حياتها
بالشكل الي تبيه و واثق بأن ربي راح يعطيها على قد نيتها

محتوى مخفي

حافظي على طاقتج الإيجابية الي وجودها معدوم عند الأغلبية , انتي مميزة فيها و مسؤولة عنها و عن تأثيرها على الغير

..

في ناس ما تكلمت عنهم و احب اقول لجميع الي كلمتهم و ما حطيت اسمهم اني اعتذر على هالشي ,
لكن ما حطيت اسم الا الأشخاص الي لما كلمتهم حسيت بمعرفتهم و كانوا متواجدين معاي لوقت
طويل و في ناس لسبب ظروفهم و ظروفي ما قدرت اني اتواصل معاهم و اعرفهم اكثر , في منهم
الي انا اعزهم و أعتبرهم نفس اخواني مثل :

HP - Rin - NoNo Shan - Dark Angel - Harley Quinn
L U V I A - WISHES - الحكيمة - Gorira - RELENA - Z a l o s t

ما شاء الله اخوان كثيرين

اتمنى ان تكون هذي السنة خير عليكم جميعاً , سعيد بمعرفة جميع من تعرفت عليه خلال السنة الي
فاتت , و سعيد أيضاً بإني فتحت هالمدونة و قعدت اكتب فيها كل شي انا مهتم فيه .. أتمنى خلال
ما كتبته إني افدت من تابعني بأي شكل ممكن , أتمنى اني ضحّكتكم او عالأقل خليت أحد يبتسم
, تفاعلكم مع الي اكتبه دايماً تأثيره إيجابي و دايماً يسعدني

شكراً

محتوى مخفي

الإنسان وُلد ليعيش , لا ليتجهّز للعيش

​

 

[7sN]

'' مآذآ ترى نفسك بعد 10 سنوآت ، طموحآتك و أحلآمك ''

طموحي خلال هالسنوات لها جوانب و راح احاول اتكلم عنهم بترتيب

الجانب الشخصي \ الاجتماعي \ الجسدي :
​

شخصياً راح اكون متطوّر , الثقة بتكون اعلى - الجرأة بتكون أكبر - الحش و السب راح يقلّون بشكل خيالي ,
راح اتزوج الانسانة الي ابيها و التفاهم بيكون اهو الأساس بكل شي , راح أطوّر قدرتي بكتابة القصص و راح
يكون تركيزي على الأشياء الي انا ضعيف فيها و اهي حوارات الشخصيات و ترتيب الأحداث , راح اشتري
و اقرأ قصص و روايات راح يساعدوني بتطوير شخصيتي و بتطوير قدرتي بالكتابة + ممكن اخير ادخل بفن
الروايات و ابتعد عن الأفلام و المسلسلات شوي

الجانب العملي \ المادي :

تخصصي آداب انجليزي فـ عملي الأساسي ممكن يكون بالترجمة او التدريس , بجميع الأحوال انا ببالي افتح
عمل ثانوي بجانب الأساسي و الثانوي بيكون التأليف .. اتخيل اصير مدرّس و طلّابي يقرون قصصي
راح احاول اجمّع فلوس اكثر لتطبيق بعض المشاريع الي ببالي حالياً خلال السنوات القادمة

 

[7sN]

بموضوع سابق لي ذكرت شخصية الجوكر في فيلم The Dark Knight و تأثير هالشخصية من
ناحية التشويق , قلت ان سبب لقطاته انها تكون مشوقة هو معرفتنا فيه و بدوافعه .. و هذا بدوره ينتج
عن احساسنا بالتشويق

قبل كم يوم شفت فيلم The Dark Knight لأني قلت بشوف الـ 3 اجزاء عشان استرجع ذكرياتي و اشوف
هل رايي تغير فيهم او لا .. طبعا هالفيلم زاد حبي له كالعادة و الجوكر هو واحد من الأسباب .. ابدأ الحين اقول
ان لو تحسب ان الجوكر اهو السبب الوحيد لنجاح هالفيلم فـ اقولك : انت .. مخطئ .. بشدّة

المخرج عمله كان جبار بتركيب الموسيقى بالأماكن المحددة و المناسبة + تحريك الكاميرا بالأوقات المناسبة + زيادة
صوت الموسيقى لإدخال التشويق و زيادة الخوف + ترتيب الفيلم الي خلاه فيلم متكامل + ربط الأحداث بشكل منطقي
و سلس + توضيح دافع و هدف كل شخصية عن طريق وضع الممثلين بالأماكن الي تخدم المحيط نفسه و الشخصيات
نفسهم .. و المزيد

هذا غير المؤلف ( اهو نفسه المخرج ) الي تعب بإعادة كتابة القصة عشان يطلّع القصة الي بتناسب الفيلم + التأليف
كان روعة بكل المقاييس لو نتكلم عن الحوار فـ كان حوار واقعي يناسب كل الشخصيات و يميّزهم عن بعضهم + اهتمام
النص بشكل كبير على تعابير الممثلين و الشخصيات لإظهار مشاعرهم + توضيح دوافع الشخصيات و اهدافهم عن طريق
افعالهم بدل كلامهم + تأثير الشرير على البطل دايماً واضح و مستمر من اول ثانية بالفيلم إلى آخر ثانية .. و المزيد

بعد ما تكلمت عن أهم اسباب نجاح الفيلم الحين بتكلم عن واحد من عوامل النجاح و اهو الجوكر

خلال مشاهداتي لفيلم The Dark Knight السابقة ما كنت اعرف ما هو دافع شخصية جوكر , كنت دايماً اشوفه يسوي
الأشياء الي يسويها بدون ما افهم او استوعب او حتى افكر , كان وجوده و أدائه كافي لجعلي اعتبره افضل شرير شفته
بحياتي .. لكن بعد ما شفته قبل سنة تقريبا استوعبت دوافعه و بعد ما شفته قبل كم يوم لاحظت كل افعاله بالفيلم و قدرت اني
اقدّر وجوده و شخصيته بشكل اكبر

وجود شخصية جوكر بشكل أساسي بهالفيلم يعتبر مثال , مثال على الدمار و الخراب , فكرة الدمار بنفسها تتواجد بشخصيته
و تتواجد بجميع افعاله بالفيلم , له لقطتين بالفيلم يقول قصتين مختلفتين عن نفسه .. هذيلا هم اللقطتين :

بهاللقطتين قال قصة حياته .. باللقطة الأولى قال قصة ابوه و بالثانية قال قصة زوجته , لكن في مشكلة .. القصتين
لا يتماشون مع بعضهم ابداً .. بالقصة الأولى وضّح ان ابوه اهو الي جرحه بفمه و بالقصة الثانية وضّح انه اهو
جرح نفسه عشان يسعد زوجته .. هل هذا شي مقصود؟ طبعا .. هل الناس يعرفون بهالشي؟ أكيد , لكن لأسباب مختلفة
عن الواقع

أغلب الناس و أغلب الي شفتهم باليوتيوب و الي اعرفهم قالو ان الجوكر قال قصتين مختلفتين لأنه مختل عقلياً او مجنون
و من هالأمور , صار التفكير من هاللقطتين معتمد على حالة ما هي القصة الحقيقية من بين الأثنين و ما هو الحدث الي
صارله , هل هو مع الأب أم مع الزوجة .. اجابتي هي : ولا واحد بينهم

دافع جوكر بالفيلم اهو اثبات فكرة , اثبات بأن كل شخص - مهما كان نظيف - ممكن يتغير 180 درجة بسبب يوم واحد ,
القصص الي قالها باللقطتين كانو قصص مؤلمة جداً .. كـ ولد صغير انت دايما تعتبر ابوك قدوتك , فـ لما تشوفه سكّير
و يضرب امك و بالنهاية يجرحك .. هذا شي راح يغيرك بلا شك .. و هذا شي صار بيوم واحد

بالنسبة للقصة الثانية نشوف بأن الزوج ما يبتسم كثير لكن بنفس الوقت يهتم بزوجته كثير , فـ غالبا الزوجة تمثّل مصدر
الراحة النفسية للزوج مهما كان مكتئب او تعبان , و لهذا لما قالتله لازم تبتسم اهو حط هالشي بباله و قال لازم اسويه ,
بيوم معين في لصوص جرحو وجهها و ما كان عندهم فلوس عشان يسوون عملية .. فـ كان الزوج يبي يثبت لها انه
مو مهتم بالجروح ابداً لدرجة انه راح و جرح نفسه عشان يخليها تحس بأنه يساعدها .. لكن لما شافته مجروح صارت
تكرهه اكثر .. و هالشي أثّر على نفسيته أكثر و صار سبب تغييره .. و كان يوم واحد

فـ القصتين ما كانو قصصه اهو , بل كانو قصص تثبت بأن اي شخص ممكن يتغير لو صار له شي تسبب له
بصدمة كبيرة .. و ليش نروح بعيد؟ لا ننسى اننا قاعدين نشوف فيلم باتمان

باتمان لما كان صغير كان طالع مع اهله لمسرحية , لما طلعو من المسرحية وصل لص و قتل امه و ابوه امام عيونه
و أخذ فلوسهم و راح .. هالشي أثّر بـ نفسية بروس و خلاه يتغير و يصير باتمان .. و هذي بالضبط هي عبقرية المؤلف
و عبقرية جوكر

أفضل الأشرار هم الي عندهم اسباب و دوافع تتماشى مع الأبطال , جوكر بهالفيلم عنده قصه شبيهة بقصة باتمان , لكنه
يبي يثبت للكل بأن هذا الشي ممكن و فعلا خلال الفيلم نشوفه يثبت هالشي بشكل كبير و فعّال و مؤثّر

لما شفت فيلم The Dark Knight حسيت اني لقيت اجابة سؤال "ليش تحب السوبرهيروز؟" , هالسؤال دايما يسألوني
الناس عنه و بكل مرة تتغير اجابتي لأن مستحيل اقول الاجابة بجملة وحدة , لكن هالفيلم قدر يختصر الاجابة , العمق
الي فيه هو الي اعشقه , الاهتمام بالشخصيات و دوافعهم دايماً روعة , البساطة الي فيه فعّالة و مشوّقة و تخوّف بنفس الوقت

انصح فيه بشدة : 10\10

 

[7sN]

الأنيميشن موضوع أحسه جميل و يشد , خلال متابعتي لـ انمي دراغون بول سوبر قعدت ألاحظ الأنيميشن بشكل
اكبر و معرفتي له تتكاثر بكل حلقة و هذا شي خلاني افكر بالأنميات و اشكال الأنميات بشكل عام , بسبب هالتفكير
قعدت اسأل نفسي هل في انمي شكله سيء؟

شفنا انميات كثييرة و حبينا منهم الكثيرين بعد لكن في بعضهم ظُلموا من قِبل الناس لأسباب راجعة لشكل الأنمي ,
على سبيل المثال انمي Pong :



من اول نظرة لهالصورة نعرف انه انمي مختلف من الناحية الشكلية و غير معتاد عليه و ناس كثيرين كرهوه بسبب
ان شكله مختلف عن الأنميات الي نتابعها , لكن هل هذا شي سيء؟ هل اختلاف الأنمي عن غيره يعتبر سيء أم تطور؟

الشكل الي أغلب متابعين الأنميات متعودين عليه هو هذا الشكل :



و هذي اهي المشكلة الي كنت ابي اوصل لها من البداية , ليش الناس مو متفتحين للتغيير؟

بأنمي Pong اتخذوا هذا الشكل لأنه شكل مبسّط و البساطة تساعد بالتحريك بشكل خيالي , و بما ان الأنمي عن رياضة
تنس الطاولة فـ التحريك شي أساسي و صار الأنمي بهذا الشكل , بهالحالة هالشكل صار شي يزيد من روعة الأنمي بدل
ما يكون سبب بالتقليل منه , بينما Sword Art Online اتّخذ الشكل العادي .. الشكل العادي مشكلته انه عادي , بسبب
شكله المعتاد و المكرر مافي مجال للابتكار , شخصيات الأنمي ديزاينهم فيه اكثر من لون و اكثر من لبس و هذا كان سبب
بتراجع التحريك , صار التحريك يعتمد على حركة الكاميرا بدل حركة الشخصيات و نتج عن هالشي بأن اللقطات القتالية
صارت مملة و غير ملهمه

بالناحية الثانية لو نشوف انمي نفس Mob Psycho 100 الي رسمه يعتبر مختلف و فريد , نشوف بأن اللقطات القتالية
أيقونية و لها تأثير كبير بسبب ان الشخصيات اشكالهم بسيطة + تفاصيلهم أقل + توظيف تحريك الشخصيات مع تحريك
الكاميرا

تعلمت من مشاهدتي ان بساطة الشكل اهي الحل لعقدة الأنيميشن , و لما يكون هالتوازن موجود فـ النتيجة اكيد بتكون خيالية
و أكثر من رائعة .. لهذا السبب انا متحمس لفيلم دراغون بول القادم .. اي , انا كتبت تدوينة كاملة بس عشان ابرر حماسي
لفيلم دراغون بول

هذي صورة لديزاين قوكو بأنمي دراغون بول سوبر



هالديزاين ما احبه

السبب الأول اهو كثثثرة التفاصيل باللبس و العضلات , هالتفاصيل تعطي احساس بأن قوكو حجمه ثقيل و هالشي يصعّب
التحريك لشخصيته بالأكشن و الحركة العادية

السبب الثاني ان جسمه صاير حاد و ضخم بزيادة , كل شي بديزاينه نقدر نوصفه بكلمة "بزيادة" , جسمه بزيادة + التفاصيل
+ اللون الفاقع لملابسه الي تخليه ثقيل اكثر بعد

لكن قبل كم يوم نزلت صورة لديزاينه بالفيلم اليديد :



< متحمس

التفاصيل قليلة باللبس و العضلات مما يسهّل التحريك بشكل خيالي - جسمه صاير مايل و منحني بدل ما يكون حاد و ضخم -
لوون ملابسه فاتحة و خفيفة على العين مو فاقعة و احس بقتل نفسي بسببها

هذا الشكل الي انا كنت داااايما ابيه من بداية دراغون بول سوبر و ما حصلته , راحة العين مهمة جدا لأنمي نفس دراغون بول
لأنه كان عنصر أساسي بالمانجا و الجزء الأول من دراغون بول , طبعا الأنيميشن و الشكل ما يعتبرون فقط المهمين لكن كبداية
أشوف ان هالشي جميل و خطوة للطريق الصحيح .. يارب يكملونها و يسوون قصة حلوة بس

 

[7sN]

من بداية عام 2018 قررت اني اتغير و اتطور و ما اتأخر على اهدافي و لله الحمد إلى الآن قاعد اتطور
بشكل ملحوظ و مرتّب .. اتذكر مدوّنة لينا لما تكلمت عن فن ادارة الوقت و هالشي فادني كثير بالاهتمام
بوقتي و توزيع مهامي و اهدافي على اوقات فراغي , و مثل ما سمعت من Jordan Peterson بأن
الروتين هو من سيحافظ على عقلك

للآن اهدافي كثيرة جداً لكن قللت منها عشان احققهم تدريجياً بدون ضغط .. الأهداف الحالية :

1- الاهتمام بالصحة و التخلص من الأمراض القليلة المتواجدة فيني عن طريق الرياضة و الأكل
2- قراءة كتب تاريخية + كتب مفيدة اجتماعياً و نفسياً
3- الدراسة بشكل متوازن و مريح
4- التدرب على كتابة القصص بالشكل المناسب

هذي الأهداف اللي اعتبرها اساسية لحالتي و لازم احققهم قبل انتهاء السنة بإذن الله ,
لو بقيس النتايج الحالية على نسب فـ راح يكونون كالتالي :
( النسب ما راح تكون تقييم للي انجزته بل تقييم للي قاعد اسويه و اللي ناقصني )

الرياضة و الأكل : 50%
أنجزت : ملتزم بالرياضة
ينقصني : تعديل و تنظيم الأكل

القراءة : 10%
أنجزت : قرأت 3 كتب افادوني بشكل كبير
ينقصني : كثييييييير كتب

الدراسة : 80%
أنجزت : الدراسة بالمنزل و الاستيعاب
ينقصني : اداوم -_-

كتابة القصص : 50%
أنجزت : تطور كبير بحوار الشخصيات + التدريب المستمر بالكتابة و تحسين الأسلوب و جميع الجوانب
ينقصني : قراءة القصص الأخرى للإفادة بالتسلسل​

هذي بالنسبة لأهدافي اللي بإذن الله راح انجزها .. انا عندي ترتيب لكن ما عندي ترتيب مفصّل و هذا شي
لازم اعدله .. بس حالياً ترتيبي العام هو :

الصبح : فطور - رياضة
الظهر : قراءة كتب
العصر : غداء - كتابة القصص
المغرب : دراسة
الليل : انام من الساعة 9 ​

للأسف ما اتعشى لعدم استطاعتي بسبب النعاس و الشبع , ادعولي تتعدل الأمور الي ناقصتني

و بس هذا بالنسبة لأهدافي و ترتيبي لهذي الأهداف , هم سبب انسحابي من الاشراف و ايضاً سبب
انقطاعي المتذبذب عن المنتدى , كل يوم افتح اللاب لازم افتح صفحة المنتدى معاه بس المشكلة اني
انشغل باللي ذكرتهم و ما يمديني أسوي شي .. بالتوفيق لي و لكم جميعاً ق5

 

[7sN]

السلام عليكم

اليوم عند دخولي القسم لاحظت موضوع نبش الذاكرة الأخير و اهو يتكلم عن المقارنات بين الرجل و المرأة , احس
اني تكلمت عنه من قبل بالمدونة و عبّرت عن كرهي له .. الحين بستغل الفرصة دامها متواجدة بنبش الذاكرة و اتكلم عنه

المرأة لها مكانة كبيرة بالإسلام و المجتمع , تقديري للمرأة جدا كبير و مشابه لتقديري للرجل .. الحياة ما تكتمل بدون مرأة كما
انها أيضا لا تكتمل بدون رجل , اثنينهم يكملون الحياة بمافيها من جماليات و مصاعب و أحداث .. حالياً طلعت مشكلة عند العرب
اللي اهي مشكلة "المساواة" هالمشكلة الكل يتكلم عنها و الكل يتكلم عن ان المرأة مظلومة و تعبانة و صبورة بينما الرجل حر و
يسوي اللي يبيه و يعيش حياته مثل ما اهو مرتاح

انا ما راح انكر تواجد الظلم على المرأة ولا انكر تواجد الحرية بشكل زايد مع الرجل , لكن المساواة عشان تكون موجودة تحتاج
حقائق و تجارب عشان تتوضّح الحالة بشكل اكبر .. و من هالناحية نقدر نشوف الولايات المتحدة الأمريكية اللي تعتبر اكثر دولة
حرّة و بنلاحظ ان جرائم الاغتصاب زايدة .. و بنعرف ان بكل دولة فيها مساواة للمرأة نلاحظ هالنوع من الجرائم زايدة بشكل
خيالي و غير محدود و كل يوم نسمع خبر جديد بخصوص مرأة تم الاعتداء عليها .. هل هذا مقبول؟ و هل هذا يخلّينا نتقبّل المساواة
مع تواجد هالنوع من الخطورة على الجنس الآخر؟

البعض من الناس يشوف ان خروج المرأة من البيت و استمتاعها شي بسيط و انا اتفق ان هذا بسيط و لازم انه يتحقق , لكن خروجها
لازم يكون مع شخص قادر انه يحميها لأن انعدام الحماية يزيد من خطورة تواجدها بأي مكان تتواجد فيه , اعرف ان البنت ما تحب
تسمع اللي قاعد اقوله لكن عدم حبها لسماع هالشي ما ينكر وجوده , و بما انه متواجد فـ لازم يكون في حل بديل له

المرأة تقدر تستمتع , تقدر تطلع , تقدر تشتغل و تسوي اللي تبيه , لكن بجميع الحالات هذي لازم يكون في اخذ احتياطات و هالشي
ينطبق على الرجل لكن بشكل أقل من المرأة لأن تركيبة جسدها اضعف بكثير اولا , و ثانيا مشاعرها مسيطرة عليها اكثر من الرجل

عند القول بأن مشاعر المرأة تسيطر عليها , لا يُقصد بهذا الكلام بأن الرجل ما عنده مشاعر بل يُقصد بأن الرجل يقدر يتحكم بمشاعره
بشكل اكبر من المرأة , و هذا شي انا شفته بعيني و عشته بأكثر من موقف و لاحظت كيف اني قدرت اتحكم بينما المرأة اللي تكون
معاي بنفس الموقف ما قدرت تتحكم .. ولو كلامي مو مقنع فـ في كتب تتكلم عن هالشي و في ناس مختصين بالأمور النفسية المتواجدة
بالرجل و المرأة .. و هذا مو تقليل من المرأة بل بالعكس هذي ميزتها عن الرجل و الاسلام اعطى للمرأة كم كبير من الواجبات كما
اعطى للرجل المثل

لهذا السبب اشوف ان مشكلة المجتمع مو مشكلة مساواة , بل مشكلة اجتماعية تعتمد على افراد المجتمع نفسهم

البشر يختلفون من شخص لشخص و كل شخص فيهم له تفكيره و خبراته بالحياة , لو انتي كـ امرأة عندج مشاكل شخصية فـ
هذي المشاكل ترجع للناس اللي انتي عايشة معاهم اولاً , و ثانياً لو في شخص ما احترمج فـ هذا معناته ان هالشخص سيء
مو النظام اللي احنا عايشين فيه سيء , و المطالبة بالمساواة تثبت بأن المرأة مشاعرها مسيطرة لأنها بدل ما تقتنع بوجود ناس
سيئين بالحياة , صارت تقول انها مظلومة و غير مستوية مع الرجل

اتمنى ان كلامي كان واضح و يعكس قناعتي بالحالة , المساواة شي نبحث عنه لكن بوجود الخطر النابع من الأفراد فـ تواجده
بسلام جداً صعب , و لهذا نحتاج نضحّي بالأشياء اللي نبيها عشان نحقق الأشياء اللي نحتاجها

 

[7sN]

السلام عليكم و رحمة الله و بركاته

كثير تكلمت عن انمي Mob Psycho 100 و عني حبي له لتفاصيل كثيرة , اليوم بذكر التفاصيل اللي حسيتها
أثّرت فيني اكثر من غيرها و كانت سبب بعشقي له .. هالتفاصيل هذي لها دخل بنفسية الانسان و معاملته لحياته
و لنفسيته و لأهدافه , و كيف كل هذا تجمّع بالشخصية الرئيسية للأنمي و هو شيغيو كاجياما

من البداية نعرف ان شيغيو كاجياما هو شخص عنده قوة خارقة و هي تحريك الأشياء عن بعد , يستخدم هذي القوة
ايضاً للقضاء على الأشباح اللي يخوفون الناس او يقتلونهم .. من ناحية معينة احنا كلنا نتمنى تواجد هذي القوة عندنا
لكن من ناحية شيغيو نشوف ان تواجد القوة معاه ما حققت له اهدافه , بل بالعكس هالقوة هي السبب اللي خلّته مكتئب
بحياته .. أحد الكتب اللي قرأتها هو كتاب Awaken the giant within من الكاتب Anthony Robbins ,
توني روبنز ( اختصار آنثوني روبنز ) دايماً يقول بالكتاب و بالفيديوهات ان الطريق إلى السعادة و التشبّع يشمل
6 احتياجات خاصة .. هذي الاحتياجات هي :

اليقين - التنويع - الحب - الأهمية - العطاء - التطوّر

لما الانسان يكون عنده هالـ 6 موجودين , فـ حياته بتكون من افضل ما يكون , لما كان صغير شيغيو كانت عنده كل هالأمور
لأنه كان يحب بنت اسمها تسوبومي و كان دايماً يظهر لها قوته الخارقة و يحرك الأشياء عن بعد , تسوبومي كانت معجبة
بالأمور اللي يسويها و هالشي خلاه يتحصّل عليهم كلهم .. لكن بعد فترة , تسوبومي صار الوضع عندها ممل , وين الجمال
بإني كل يوم اشوف نفس الشي بالضبط؟ وين التنويع؟ وين التطوّر؟ فـ صارت تبحث عن امور ثانية و صارت تحب شخص
يهتم بشكله و بجسمه .. شيغيو بهذي اللحظة انكسر , راح عنه اليقين اللي كان يخليه متيقن بإنها راح تُعجب فيه , راح عنه
التنويع لأنه ما يقدر ينوّع و يغيّر عن قوّته الخارقة نظراً إلى انه غير موهوب بأي شي ثاني , الحب راح عنه لأنها تركته ,
صار غير مهم بالنسبة لها , ما يقدر على العطاء لأنه ثقته اختفت , و رافض بأنه يتطوّر لأنه مو لاقي نفسه بأي مجال ثاني

بالحلقة الثانية من الأنمي نشوف شيغيو ناوي ينضم إلى فريق بالمدرسة , هذا الفريق ما يسوي اي شي غير التكاسل عن
الدراسة , الفريق هو مثال على الفشل و اعضاء الفريق راضيين بهذا الفشل لأن هذي الحياة اللي هم يبونها , نعرف من
المجلس الطلابي للمدرسة بأن الفريق راح يُغلق لو ما انضم لهم عضو جديد ولو أُغلق راح يستبدل بفريق الرياضة , شيغيو
كان هو الأمل الوحيد لبقاء الفريق الكسول و عدم إغلاقه و قبل انضمامه لهم , رئيس المجلس الطلابي كان يسأله بعض
الأسئلة :

الرئيس : ماذا تفعل بعد المدرسة؟
شيغيو : اشتغل
الرئيس : ماذا تفعل بالبيت؟
شيغيو : اشاهد التلفاز و انام
الرئيس : ماذا عن الدراسة؟
شيغيو : لا ادرس
الرئيس : ماذا عن هواياتك؟
شيغيو يتلعثم : هـ هوايات..؟
الرئيس : لديك أصحاب؟
شيغيو : لا

بعد كل هذي الأسئلة , رئيس المجلس الطلابي قاله "شيغيو , ما عندك هدف معين؟ مافي شي تتمناه؟ او تبي تسويه؟"
شيغيو صار يفكر و يتأمّل حياته الشخصية , صار يسأل نفسه سؤال "شنو المهم بحياتي" الوضع بالنسبة له صار مصيري , هل
يبي ينضم لـ فريق كسول؟ او انه يبي يستوعب اخيراً بأن الحياة ما تسامح من لا يعمل .. و فجأه استوعب

تذكّر هدفه الأساسي بالحياة , يبي يعجب تسوبومي

بكتاب Awaken the giant within , توني روبنز قال ان هناك 3 قرارات بالحياة راح تحدد مصيرك بكل لحظة بحياتك
و هذي القرارات هم :

1- قرارك بما تركّز عليه بحياتك
2- قرارك في تحديد أهمية اللي ركزت عليه
3- قرارك باللي راح تسويه لتحصل على النتيجة اللي تتمناها

شيغيو بهذي اللحظة فكّر بالـ 3 قرارات بهالشكل :

1- ركّز على اعجاب تسوبومي
2- حدّد ان اعجاب تسوبومي له هو أهم شي بحياته
3- قرّر ينضم إلى نادي الرياضة عشان يعمل و يشتغل لتحقيق هدفه , الهدف هو تبادل الاعجاب مع تسوبومي

و انضم لفريق الرياضة و سحب على الفريق الكسول , و هالشي صار مؤثّر بأنه يكون عنده امل بالاحتياجات الـ 6 للانسان ,
صار في امل انه يكون متيقّن من تحقيق اهدافه , و انه يكون متنوّع بقدراته و هواياته , و يحصل الحب من الجميع و يكون
مهم عند اغلب الناس و اصحابه و تسوبومي , صار مهتم بالعطاء من ناحية اهدافه لأن هالشي بيخليه يوصل إلى التطور ,
لأن من غير التطوّر لا تتواجد الحياة


هذي الرسالة الأكبر لإنمي موب سايكو .. الأنمي يوضّح ان مهما كانت الأمور اللي عندك قوية او جبارة , مالها
معنى لو ما كنت تقدر تحقق أهدافك فيهم , لأن مافي شي بالحياة مهم أكثر من انك تطوّر نفسك بجميع المجالات
اللي تهمك , لأن تحديد المهم عندك هو اللي راح يحدد مصيرك و هو اللي راح يحقق أهدافك

 

[7sN]

السلام عليكم ورحمة الله و بركاته

من زمان عن المدونة , صرت ما اعرف اكتب مقدمة

طبعا شكرا لـ لاسي على الطقم الجمييييييل جدا , طبعا طلبت منها عن موب سايكو 100
مافي غيره بقلبي حالياً , اهو و القليل من دراغون بول

هالأيام قاعد اكمل الموسم الثاني من بوكو نو هيرو لأن الكل يمدح موسمه الثالث و انا متحمس اوصل له ,
اتذكر لما كانت تنزل حلقات الموسم الثاني كنت اتابعهم كل اسبوع إلى الحلقة 17 و بعدين وقفت بدون
سبب اساسي , الحين وصلت إلى الحلقة 24 يعني باقيلي حلقتين و للآن الوضع ممتع

مشكلتي الوحيدة معاه ان مافي قصة او نغم واضح للموسم , يعني انتقدت الموسم الثاني من هجوم العمالقة
بسبب ان مافي قصة ابدا و هنا نفس الحالة تنطبق , بالبداية كانت مسابقة ممتعة و بعدين انتقل الوضع و
صار مظلم و جدّي إلى الحلقة 17 , و بعده رجع النغم إلى المتعة و انعدام الخطورة .. هذا شي مو سيء
بالنسبة لي لأن اللي يشفع لهذا الانتقال الزايد هم الشخصيات و العالم , العالم روعة و الشخصيات أروع
و غالباً هذي الأمور اللي تشدني بأي عمل بالتاريخ .. يارب اخلصه بس

+

اخيراً بدات اقرأ روايات و للأسف صاير سلبي كالعادة

نسيت اسم اول رواية اعتقد اسمها حوجن , ما عجبتني من البداية , حسيت ان الكاتب اعتمد على شرح حالة
الشخصيات اكثر من اي شي ثاني و الشرح تم لمدة طويلة , مستوعب انه يتكلم عن الجن و لازم يشرح وضعهم
بس وضعهم جدا تقليدي و مشابه لوضع البشر لدرجة ان ماله داعي تشرح اكثر , و ما حبيت ان الجن عندهم
عادات و تقاليد تشابه عادات و تقاليد البشر لأن حسيت هالشي يذكرني بأفلام توايلايت .. اكره افلام توايلايت

من بعده حاولت اقرا رواية الجحيم من دان براون بس بالبداية ما فهمت شي اسلوبه بالكتابة دقيق لدرجة
اني ما اقدر افهم , فـ قلت راح اقرا روايات عربية و بعدين اقرا الجحيم عشان وقتها ممكن اكون مستوعب
اسلوب الروايات و راح افهم .. بس ما لقيت ولا رواية حلوة فـ استسلمت للوضع و رجعت للجحيم عسى الله
يدخلني الجنة

قرات اول فصل و فهمت كل شي على عكس اول مرة , و هالشي خلاني انسان سعيد لأني حبيت الدقّة
اللي اهو يطبّقها بأصغر المواقف .. راح اكملها ان شاء الله و لو في احد يعرف روايات اتمنى يعطيني
بالتعليق

 

[7sN]

[TBL=https://www.anime-tooon.com/up/uploads/at15275437679221.png]























[/TBL][TBL=https://www.anime-tooon.com/up/uploads/at152754376797832.png]
السلام عليكم ورحمة الله و بركاته

هالأيام قاعد اقرا كتاب بإسم The Hidden Tools Of Comedy , يشرح الكوميديا بالقصص من ناحية
معنى الكوميديا و كيفية اضحاك المشاهد او القارئ , ولو ما ضحك فـ وين المشكلة و كيفية تصليحها , انا ما
وصلت للكيفية إلى الآن بس وصلت للمعنى و عجبني بقوه فـ قلت ابي اشارك اللي تعلمته مع بعض الأمثلة

بالكتاب ستيف كابلان يقول بأن بينما الدراما توضّح لنا قدراتنا و محتملاتنا , الكوميديا توضّح لنا حقيقتنا

و الكوميديا هي عبارة عن شخص ضعيف يسعى لهدف مستحيل و رغم قوة العوائق إلا انه ما يستسلم

بعد ما قرأت هالجملتين صرت افكر بالأفلام و الأنميات الكوميدية الناجحة اللي شفتهم و اكتشفت بأن فعلاً هذيلا
الجملتين يُطبّقون بشكل كامل عليهم ! على سبيل المثال آخذ الشيئين اللي انا احبهم :

One Punch Man

من اول نظرة راح نلاحظ بأن سايتاما ( بطل الأنمي ) مو شخص ضعيف ولا يواجه عوائق قوية , اهو بطل خارق يقتل
الأشرار بـ لكمة وحدة .. وين العائق بالضبط؟ العائق هو عائق نفسي

سايتاما كره الحياة السهلة اللي اهو عايشها و صار ما يستمتع بالأعمال البطولية لأنه مو محصّل ولا شي منهم , اولاً
القتالات تخلص بسرعة و ثانياً الناس مو مقدرين اعماله البطولية ابداً , بحلقة من الحلقات لكم وحش امام الناس كلهم
لكنهم طلّعوا عذر بأن السبب الوحيد اللي خلاه يفوز على الوحش هو ان الوحش صار ضعيف من بعد ما قاتل ابطال
ثانيين , و هذا اللي يميّز سايتاما بالكوميديا

سايتاما شخص عنده قدرات خيالية , بس شفايدة القدرات لو ما استمتعت فيها ولا حصلت اللي ابيه منها؟ تجسيد
الكوميديا بهالأنمي معتمد اعتماد كلي على نفسيته و اراداته من الحياة , و طبعا اهو عنده ارادتين و هم : التقدير
من الناس + المتعة بالأعمال البطولية .. و للآن هو مو محصّلهم ابد

و هذا سحر الكوميديا بالقصص , مهما كانت الشخصيات خيالية بقدراتها لازم يكون فيهم ضعف نفسي و ارادات
واقعية , و هالواقعية الخفيفة بالقصص تسمح لنا بأننا نفهم مشاكلهم و نستمتع بقصصهم

المثال الثاني هو مانجا Dr. Slump :

مافي قصة ثابتة او محددة بمانجا دكتور سلامب لأنها تعتمد على ان كل تشابتر قصة مختلفة بنفس الشخصيات -
انا انصح كل الناس بقراءة المانجا لأني ادمّع من الضحك عليها - و الشخصية الأساسية بالقصة اهو الدكتور او
العالم سينبي نوريماكي , اهو يصنع كل شي و اي شي يبيه و هذا بعد يخلينا نعتقد بأنه يقدر على كل العوائق ,
لكن على العكس بالضبط لأن المؤلف اهو اكيرا تورياما ( مؤلف دراغون بول ) و هذا عنده عقلية عبقرية بأي
شي كوميدي بالحياة , و بكل تشابتر يوضّح لنا هدف معين لشخصية سينبي و نادراً ما نشوفه يوصل لأهدافه
بالنهاية

و الحالة تشبه سايتاما من ناحية ان سينبي اهدافه واقعية بشكل مو طبيعي , و هذا اهو العنصر الأساسي بالكوميديا ,
واقعية الأهداف و الإرادة البشرية

و استفدنا من كل هذا بأن مهما كانت القصة و مهما كانت احداثها او شخصياتها او قدرات شخصياتها , لازم
هذي الشخصيات يكون عندهم ارادات واقعية و عوائق قوية , و بهالشكل فـ انت كـ كاتب قدرت تخطي اول
خطوة بنجاح

+

شكرااا رينا و نيرو على تعليقاتكم و بإذن الله راح اقرا الروايات اللي اعطيتوني اياها



[/TBL][TBL=https://www.anime-tooon.com/up/uploads/at152754376800213.png]


[/TBL]