بين نُور و رِضا ! (2 زائر)

[M O O N]

-

أبا أحكيكم موقف صار بقروب الدفعة قبل شوية ):
ولأنو ما أبا أذكر أسماء .. بفترض رموز لهم ~
البنت A : صحبتي وأعرفها من سنة ومرة لزيزة وأحبها .
البنت B : ما أعرفها واليوم شِفتها بقروب الدفعة لأول مرة .

المهم لما دخلت القروب لقيت رسائل كثير كالعادة
آخر رسالتين كانت A تضحك ، وردت عليها B بـ "الله يديم الضحكة"
فرجعت A ردت بـ " الله يديم لنا B " ..
جيت أنا بكُل عفوية قلت " أبغا أصير B يا رب " < عشان تدعيلي A بالدوام
يعني صدق الدعوة كلها مزح وميانة وحاجة لطيفة مو أكثر ):
بس ردت عليا B بـ "ههههه ما أنصحك" وبعدها جات ليا عالخاص
وقالت لي إنو "لا تتمني تصيري أحد عشان حياتنا مش مغرية زي ما يتهيأ لك"
وصدق حزنت لأسباب كثير ! أولها : حسيتها كبرت الموضوع! أنا ما تمنيت حياتها
وما أعرفها ولا أعرف شيء عنها عشان أتمناها ! كل السالفة تعليق على دعوة صحبتي
وحدها مِزح يعني ، وكمان حزنت عشان حسيتها ما كتبت هالكلام إلا لأنو منجد فيها شيء
أو بتعاني من حاجة ): فـ أعتذرت منها ووضحت لها مقصدي
رجعت ردت بإنها قالت هالكلام عشان مصلحتي بس وعشان لا تكون أبواب السماء
مفتوحة ويستجاب هالشيء ليا ):
وبعدين قالت بحكيك حكاية أعرفها بهالخصوص .. < وقتها حسيتها شخص مرة طيّب
ومرة مهتم بإنو منجد ينبهني بهالخصوص !
حكتني عن شخص ببداية زواجه تمنى يُرزق بـ 8 أطفال ونسى الموضوع
بعدها لما رُزِق بالطفل الخامس تِعب وما صار يقدر يتحمل كُل هالأطفال
وقرر هو وزوحته ما ينجبون كمان ، بس إرادة الله كانت أكبر وإستمروا يرزقون بالأطفال
إلى أن وصلوا لـ 8 أطفال ، وأفتكر كلامه سابقًا .

- المهم الله يسعدها ويعطيها حتى يرضيها
وفعلًا لازم نركز على كلامنا وما نقول شيء ما نقصده وما نعنيه
وبالذاااات بالدعاء ، ممكن نجيب لنفسنا شيء مو كويس ):
يارب الخير والخيرة .

 

[M O O N]

-

يا الله قد ايش الإنسان مخلوق رقيييق ويتحكم فيه قلبه
حقيقي أتعجب من كيف شعور الإنسان يأثر على كل حاجة فيه
من ملامح وجهه، لنشاطه وإنجازه، طريقة كلامه وحتى طريقة مشيته !

من كثر ما أنا متضايقة هاليومين .. صايرة أنام من 15 إلى 19 ساعة باليوم
بالقوة أصحى وطوال الـ 24 ساعة عندي رغبة وإستعداد للنوم

+ الآن وأنا رايحة أنام للمرة الرابعة لليوم..
شفت خبر لذييييذ ورائع وصارلي فترة أتمناه
فورًا صحيت وتربعت وصحصحت وطار النوم
وحاسة إني ما حعرف أنام من الفرحة !
الله يكتب التمام وييسر الأمر بأحسن ما يكون ، يا رب يا رب .

اللي يحزن شوية إنو بعد ما فرحت وإحتفلت وطار قلبي
بدأو الناس يخربون الخبر! ويضيفون تفاصيل تمحي فرحتي ):
ومرة خايفة يكون كلامهم صح! لأنو كذا ما حيبقى خبر سعيد ليا
بس حاسة إنو ربي حيحققها ليا زي ما أتمنى بقدر إيماني بها .
ورغم إستحالة الأسباب .. وكلام الناس : الله قاااااادر
+ بليز حفوني بدعواتكم "غيبًا" ، الله يحقق ليا مرادي وأجي أبشركم به .

 

[M O O N]

-

تعرفوا المثل اللي يقول "اذا اشتدت المهام.. اسحب اللحاف ونام" ؟
هذا أكثر شيء ينطبق عليا اليوم
طول الأيام أذاكر بِجد وإجتهاد ويوم بقى على إختباري يوم..
راح نص يومي نوم والنص الثاني جاري قضاءه بالتون .

+ الثلاثاء عندي ميد تيرم ، والخميس ، والأحد من الأسبوع الجاي
^ مرعوبة من اختبار الخميس لدرجة مو جالسة أهتم بغيره
يا جماعة حاسة إني راسبة بعيد الشرxD
بس يااا رب توفيقك من حيث لا أحتسب .

+ حاجة لزيزة :
بشكل عام مرة أحب الناس اللي تقدّر كلمة "آسف"
وتعرف ضرورة الإعتذار وما تخجل منه أبدًا ..
حقيقي "الإعتذار من شيم الكبار" وما يزيد صاحبه إلا رفعة وعلو .
بس الناس اللي أحبهم أكثر وأكثر وأكثر هم اللي يعتذروا عشان خاطرنا
سواءً كانوا غلطانين ولا لا ، وما يكتفوا بالإعتذار لا !
ممكن يعتذروا مرة ومرتين وثلاث وما يوقفوا غير لما يتأكدوا إننا راضين ..
ويستمروا يهونوا علينا الموضوع لين ينمحي الزعل وأثره من قلوبنا .
هذول الناس اللي حقيقي نحتار كيف نجازيهم ؟
وايش احنا بدون محبتهم ووجودهم الرقيق ؟
يارب كثرهم بحياتنا وإجعلنا منهم .

+ اليوم طايحة بحركة تلوين النص زي ما تشوفون بهالتغريدة جالسة ألون عشوائي !
ومستانسة عالشكل مرررة ، بس المشكلة يأخذ وقت وأنا دايم مستعجلة .

أستغفرك يارب من كُل الذنوب والخطايا ~​

 

[M O O N]

-

اختبرت اليوم أول اختبار نصفي ):
نقصت بالاختبار 5 درجات! حاجة تزعل
اللي يزعل أكثر إنو أغلب الأسئلة عليها درجتين وهذا يودي درجاتنا للطريق المنحدرة
صدق أكره اللي يقللوا الأسئلة ويكثروا الدرجات عليها
فيني غضب مررررة !
وفوقها علق علينا البلاك بورد وقت الإختبار.. 3 أرباع الدفعة ما كان قادر يدخل يختبر
أو يدخل والأسئلة ما تظهر له، أو الصفحة فجأة صارت مليانة رموز
حاجة فظيييعة وتوتر مرة! بالبداية أنا فتح معايا كويس وأشوف الناس حايسين
وحزينة عليهم وكمان شايلة هم لا يحوس معايا ):
عديت 3 أسئلة والوضع طبيعي ومو معلق معايا والأمور عسل
فجأة بالسؤال الرابع علق عليا ، وجلست مع باقي البنات ننتظر الفرج
من قوّ التوتر كنا ميتين ضحك صدق .. ما أعرف هو من كثر الخوف
ولا من فقدان الأمل ولا شنو ؟
بس حمدلله عدا بالأخير وتعدل بعد 20 دقيقة من وقت الإختبار ..
+ يزعل إنو هالشيء خلانا نستعجل ببعض الأسئلة ونختار إجابات بشكل عشوائي
بس عشان نلحق نخلص قبل ينتهي الوقت ، لأن ضاعت 20 دقيقة !
اف ما أبي أكثر حلطمة بس صدق يزعل هذا النقص!
مو ذنبنا ونستاهل درجات أفضل وأفضل وأفضل ):

# من جهة ثانية.. حاجة لذيذة :
ليلة الإختبار وبالصباح قبل الإختبار برضو طول ما إحنا جالسين نذاكر
لفتني تفاعل قروب الشعبة وقروب الدفعة !
مرة حُلوييين البنات يا ناس 1
مرة كنت مبسوطة على كيف قلوبنا على بعض والكُل يشرح ويوضح لغيره
حاجة عظيمة وحُلوة مرررة ، "زكاة العلم نشره"
فصدق مرة يفرح إنو نكون شاكرين الله على نِعمة المعرفة والعلم اللي عندنا
وما نبخل فيها على غيرنا .
+ أنا سألت سؤال بالقروب وجاوبتني وحدة هناك وبنفس الوقت
جوني 3 بنات عالخاص يشرحوا ليا بالصوت والصورة ووحدة منهم تعطيني أمثلة
ووحدة تسألني عشان تتأكد من فهمي .
مرة كنت سعيييدة ورفعوا لي طاقتي ، الله يسعدهم .

الحمدلله عهاليوم ويارب تتعدل درجاتنا أو يجينا بونس بأي شكل
والله يجعل باقي الإختبارات أخف وأسهل وأروع .

 

[M O O N]

-

صبااح النوووووور يا دُنيا ~
صاحية بمزاج رايق وسعيد حمدلله ..
والسبب فقط لأني نمت بالليل وصحيت بالصباح بدري
وهذي نعمة عظيمة والله، بعد أيام طويلة ما كنت أنام فيها
غير بالنهار ! أتمنى يكون هاليوم بداية لتنظيم نومي للأبد .
*أحس سِر الأيام السعيدة = نمط الحياة الصحي،
وأهم نقطة هنا النوم المتعدل .

بصراحة هدف هالتدوينة الأول : تعبير عن إمتناني لبنوتة حُلوة هنا
+ وشُكرها عهالحلاوة ..
أمس كُنت مشاركة بسهرة لعبة رسم الشخصيات ،
المهم إنو أحد المشاركات معايا واللي تعتبر منافستي
كانت لطيفة جدًا ، لما تأخرت صارت تمنشني عشان تناديني
وتحكي لرودي تنتظرني، ولما رِحت وتركت السهرة.. رودي ضيعت مشاركاتنا
وطلبتنا نرسلها مرة أخرى -بس أنا غير موجودة -
لقيت هالبنوتة راسلة مشاركتي بدالي.. وما ضيعت جهودي .
غير تعليقها الحُلو على رسمات الجميع وثناءها اللي يفرح القلب ..
شكرًا @Hellevator. ، كنتِ المسؤولة عن إبتسامتي ليلة أمس
ومنحتيني الكثير من المشاعر الحُلوة ll الله يسعدكِ ويجزاكِ كُل الخير لطيبتك ~


والآن وقت الإفطار والإنطلاق بهذا اليوم
بكرا إختبار المادة المُرعبة .. حقيقي لا تنسوني من الدعوات ):
يارب فُل مارك يارب بلطفك وتوفيقك .
خطتي = دراسة طول اليوم ومن ثم النوم بدري
عشان نحافظ عهالنظام الرائع ويارب أقدر فعلًا .

 

[M O O N]

-

جالسة أتمشى بألبوم الصور ولفتتني صورتين -قديمة-
عادية بس أحبها ، صورتها بمصر عام 2018 تقريبًا ~







* النور ، يا رب النور .

+ على طاري الصور والتصوير..
مرررة بخاطري أنزل موضوع أجمع فيه الصور اللي أحبها من تصويري
^ من خطط الإجازة إن شاء الله ، بس يارب تعدي هالأيام وتهون على خير ):

 

[M O O N]

-

{مَا أَنزَلْنَا عَلَيْكَ الْقُرْآنَ لِتَشْقَى}
أحب هالآية وما فيها من سكينة وطمأنينة وأمان،
أن الشقاء وارد ولكن النجاة منه يسيرة طالما القرآن موجود.
حمدلله لأن القران موجود ولأن فيه عافية من كُل داء ونُور
وعِلم ودليل وراحة وسعادة عاجلة وآجلة وفوز بالجنة!
يا رب . .

فعليًا ما فيه أمان يساوي الأمان الموجود في إنه :
مهماا ضاااقت ومهما إنعدمت الحلول وإستحالت النجاة
وصرت وحيد وبائس وتوالت عليك الصعاب وتخلى عنك الجميع..
إلا أن القرآن موجود، دائمًا موجود، ودائمًا فيه تهوين وراحة
ونصر وتيسير وسند وعافية وحل وقووووة عظيمة ما تكون بغيره،
فالحمدلله اللطييييف .


* وبهالخصوص يقول ابن القيّم -رحمه الله- :
"وإذا أحسن العليلُ التَّداوي بالقرآن ووضعه على دائه
بصدقٍ وإيمانٍ وقبولٍ تامٍّ واعتقادٍ جازمٍ واستيفاء شروطه
لم يقاومه الدَّاء أبدًا، وكيف تقاوم الأدواءُ كلام ربِّ الأرض والسَّماء؟!
الَّذي لو نزل على الجبال لصدَّعها أو على الأرض لقطَّعها."

 

[M O O N]

-

أحس إنو أنا مرة واحشتكم 1
^ أو يمكن إنتو واحشيني؟ ..

بكرا عندي إختبار نصفي ولأول مرة في هالترم أذاكر بهالقوة والطاقة
حاسة إن حرام ما أجيب الدرجة الكاملة لأني مرة قاعدة أتعب ):
ولأني أحب المادة < مو متعبني بحياتي إلا إن قلبي شاد حيله دايم

المهم مرة لذيذ شعور دراسة حاجة تُحبها
كيف تصير ساعات المذاكرة من أمتع ساعات اليوم ؟
والبريك حاجة غير ضرورية ..
فـ جد الحمدلله على نِعمة حُب المواد الدراسية
والشغف بالعلم اللي تحمله
< والله يرزقنا هالنعمة بالمواد اللي ما نطيقها وحتخرب لنا حياتنا !

++ مرررة متحمسة لشهر أبريل
حيكون شهر ملياان تحديات ليا بكُل حِتة في حياتي
حتى في التون ! أحس لو عدا هالشهر زي ما أنا مخططة له
حعلق نجمة على جبهتي إحتفالًا بروعتي
فـ ياا رب يعطينا الأيام زي ما نتمنى ونسعى
ويجعل ما فيها : خير نرضا به ويرضا به الله علينا ~

وتنتهي التدوينة هنا لأن ما باقي من البريك غير دقيقتين
^ درس سريع في الجد والإجتهاد وتنظيم الوقت
لله دررك يا يارو ! تنقطي حِكمة وفائدة
*يا تونيين تعلموا تعلموا.. مو كل شوية حتلاقوا بنوتة سوبر زيي .





- :
"ما سعَ لله ساعٍ إلا بلغ" ..

 

[M O O N]

-

مرة فرق بين نفسيتي أمس واليوم
كيف كُنت مرة مشعة ومتحمسة وطاقتي عاالية
واليوم مطفييييييية وحزينة وكُل إحباط الدُنيا فيا ):

أبا مثبت نحطه على قلوبنا في الأيام الحُلوة
عشان تبقى دايمًا بحال جيد ..

بس مَعلش "الرضا ثم الرضا ثم الرضا"
^ نطبطب بهالجملة على قلوبنا !
ولكُل حاجة عوّض عظيم من ربنا الكريم اللطيف ..

+ نعيد ونكرر :
الشيء الرهيب بفترات الإنطفاء والحزن هذي
إننا نعرف مين اللي يحبنا فعلًا ؟
مين يهتم لأمرنا ؟ مين يمسه ما يمسنا ؟
مين قلبه مُتصل بقلبنا.. يفرح لفرحنا ويزعل لزعلنا ؟
مين اللي يتحملنا مهما صار ويبقى حوالينا
وبكُل ما فيه يحاول يطبطب ويراضي ويتطمن
ولو ما كان قادر .. يبقى ساكت بس جنبنا ومعانا .

^ وهذا مقياس رهيب وحقيقي لقوة العلاقات وصِدقها
لو ما كنت معايا بالوقت الـ مو حلو .. متى حتكون معايا ؟ وايش لازمة وجودك وقتها؟

مليانة إمتنان لكُل القلوب اللي حاستها شايلة همي
وصدقًا أتحسن بسبب إني ما أبا تعبهم يزيد بسببي ~

ووصية اليوم :
لا تتركوا أحبابكم بأوقات إنطفاءهم..
مهما كان السبب تافه بالنسبة لكم، ما تعرفوا حجمه جواتهم
ولا تعرفوا إيش حاسين وكيف تأثيرات هالشيء عليهم ؟
*الهدف الأول للمحبة : التهوين وجعل الحياة أخف وأسهل
وأكثر حنيييييييييييية !



- اللهم أخرجنا من حلق الضيق إلى أوسع الطريق
بك ندفع ما لا نُطيق ولا حول ولا قوة إلا بالله .

 

[M O O N]

-

نبدأ تدوينتنا اليوم بشكر الناس اللي تسمعنا دائمًا
والشكر مضاعف للي يسمعونا بقلبهم وكُل ما فيهم من إهتمام ~

تخيلوا معايا أعزائي القُراء ..
في أسبوع واحد مطلوب مني الآتي :
الشغل على مشروع برمجة - فهم ومناقشة مشروع العمارة
تسليم واجب هياكل - تسليم واجب جبر
كويز هياكل - اختبار عملي للعمارة - كويز جبر

وأنا مصدومة هنا ، أتألم لكن لا أتكلم
هوَ الترم ليش يحب يدعسنا قبل ما ينتهي؟
ما يعرف ينتهي بهدوء ولُطف زي ما بدأ؟

ما عندي فكرة عن كيف ممكن يعدي كُل هذا وأنفذه كما يجب ):
بس عزائي إنو يهووون وكُله بعون الله يسييير
< رغم إن درجاتي وكُل ضغوطات هالترم تخليني أوافق على :
" الست مالهاش غير بيت جوزها "

+ الكارثة الأكبر فيه موضوع لازم أشتغل عليه وأنزله هنا قبل يوم السبت

بقد ما يبدو صعب وكثير وكارثي
بقد ما فيا تحدي إنو يعدي بالخييير بإذن الله ..
وأجي يوم السبت الجااي هنا أحط ليا سطرين نجوم عشان أنا مرة حأكون سوبر
^ يمديكم تحطوا ليا كمان نجوم ونحتفل كلنا بيا ..


- مواساة: الأيام المليانة ضغوطات.. تكبرنا وتزيد لمعاننا
تنبهنا لقد ايش إحنا رائعين؟
وقد ايش فينا طاقة وقدرة خارقة؟
ونصير بعدها نقول إننا حنقدر على أي شيء طالما قدرنا عليها
حنصير ممتنين لها في وقتٍ ما -