بين نُور و رِضا ! (1 زائر)

[M O O N]

-

" لا أستطيع أن أقول عن إنسان أنه طيّب
إلا إذا كانت لديه القُدرة على فعل الشر ولم يفعله.
يجب أن تكون لديك الخيارات لتعرف حقًا من أنت. "
- أفونسو كروش ..

أتفق مع هالإقتباس غااالبًا ، فعلًا الحقيقة ما تكون بحسب إعتقاد
أو إحساس أو قول أو حتى رغبة !
العبرة بإن ايش كان قدامك وايش اخترت ؟
ايش الفرص اللي أُتيحت لك وأنت قررت تختار أيهم ؟

مو مقبول مثلًا يجي شخص يقول إنه "وفي/أمين"
بدون لا يكون قادر يخون ولكنه أبى أن يفعلها ~
وأقصد هنا الخيانة بكُل أشكالها ..

- الخيانة بالعلاقات ، زي الزوج اللي يدّعي وفاءه وإخلاصه لزوجته
ما يصدق قوله إلا لما يكون بموقف يتيح له إنه يخون ويرفض!
زي : غياب زوجته، غفلتها، تواجد البنات المو كويسات بطريقه، عرض الخيانة عليه بأي شكل ~

- الخيانة بالدراسة ، زي الطالب اللي يدّعي جِده وإجتهاده وما شابه
ما يصدق قوله إلا لما يكون بموقف يتيح له إنه يخون ويرفض!
زي : التعليم عن بعد وسهولة الغِش فيه، المشي بـ"واسطة" ~

ونفس الشيء ينطبق على كُل كُل صفات الإنسان اللي ممكن يحيا بها
الطيبة، الوفاء، الصدق، الرأفة، الحنية، الإيثار، المشاركة .. وإلى آخره ~

ويارب يخلينا نكون زي ما نتمنى وزي ما نعتقد بأنفسنا
ويجمعنا بالناس الحُلوة فِعلًا والثابتة بصفاتها الرائعة عند تعدد الخيارات وبدونها .

 

[M O O N]

-

وأخيرًا رجعت للطاقم ..
أنا بالصباح : هنا ، أنا بالمساء : هنا
وهذا ألذ تغيير ممكن يحصل ونتأمله ~
مررة مبسوطة الحمدلله ،
ولا قادرة أوصف قد ايش هالمنتدى يضيف ليومي مشاعر حُلوة
ولحظات سعيدة ~
إنتماء وحُب قد الدُنيا للتون وأهله ..


+ طوال هاليوم أحس إني ملياااانة كلام وأبا أحكي أشياء كثير
ما أدري هذا شعور طبيعي ولا سببه كبت المذاكرة؟

بس ألذ حاجة تتحكى هيَ :
أمس قبل لا أنام جاء عبالي أسوي حاجة "مفاجأة" لأحد أحبه
متخيلين كذا فجأة جاء عبالي!
وهالحاجة أكبر مني ولا أقدر عليها ولا أعرف لها حتى !
بس جلست طول الليل أخطط وأفكر كيف ممكن أتعلم وكيف أتغلب عالعقبات؟
مرة إنبسطت لأن هالفكرة جات عبالي
ومرة مبسوطة بشعور اللي حسوي حاجة لأحد أحبه
متحممسة جدًًا وكان نفسي أقوم أبدأ فيه من ليلة أمس
بس الموج ما يساعد ولا الأقدار بتساعد
ومع ذلك مرة ناوية إنو أجرب وأحاول أعملها
ببدأ بالإجازة إن شاء الله أو بعد رمضان فورًا
و يارب تتم على خير وأرجع لهالتدوينة وأحكيكم عن فرحتي اللي قد الدُنيا
^ أحس حموت زعععل لو ما ضبطت وصارت نفس اللي ببالي!
يمه يا ويلي لو بعد ما أخلصها أحس إنها معفنة ولا مو كويسة أو مو قد الحماس!
صدقوني محد يقدر يفكني مني وقتها !
عشان كذا نوحد الدعاء أن يا رب تصير رائعة ومليانة فرح .

*حتى وجود أحد تفكر دائمًا في كيف تسعده؟
وكيف تعبر له عن الحُب الكبير المليان بقلبك له؟
.. نِعمة ~

 

[M O O N]

-


قبل فترة قرأت تدوينة لـ @RELENA الله يسعدها وين ما كانت ~
كانت تتكلم عن إنو فيه ناس تتعامل مع الشخص بحسب رتبته
ويتقربوا لصاحب الرتبة العالية وما يهتموا للعضو العادي وما شابه .
وخلال هاليومين صار لي موقف مشابه -مو حابة أذكره-

بس من جد فيا كلام إنو "وات" ؟
مرة عيييب
فكرتوني بالناس اللي يتعاملوا مع غيرهم بحسب وظائفهم أو تخصصاتهم !
مرة أكره هالشيء مرة مرة ><'

التعامل مع الإنسان لازم يكون على إنه إنسان بس
الإحترام والتقدير واجب للكل بنفس المِقدار

الإستنثاء الوحيد اللي ممكن أتقبله.. إنو يكون بحسب أعمارهم
ممكن نحترم الأكبر منا تكة زيادة أكثر، بس ما يعني إنو نسفه الأصغر أو نقلل الأدب معاهم!

مسكييين مرة مسكيين اللي يحدد تعامله مع الناس بحسب مظاهرهم
أو إنتماءاتهم سواء وظيفة/تخصص/عائلة/رتبة/هواية/أي شيء غير إنه إنسان !
+ اللي يعمل كذا : إنسان نااااقص ~

افتكرت إقتباس معناه ينص على إنو :
مقياس الأخلاق عند الإنسان يكمن في تعاملاته
مع الناس اللي ما بينه وبينهم مصلحة أو مو محتاج منهم حاجة

فشكرًا لكل الناس اللي تحمل التقدير والإحترام وطيب الأخلاق لكُل الناس على حد سواء
وما عندها تمييزات لأحد عشان مصالح أو مظاهر أو حاجات غير إنسانية ! .


++ بالذات هنا بالتون وكدائرة ضيقة .. كُلنا بالأساس أعضاء
وبيننا أشياء مشتركة كثييير ولا ما كنا حنسجل هنا !
كلنا نشبه بعض بشكل أو بآخر ، بحاجة أو حاجتين
فليش ممكن تأثر الرتبة ؟
وين الروح الحلوة؟ الأسلوب؟ الأفكار؟ الرسائل اللزيزة؟

 

[M O O N]

-


مرحبا بعد صِراع مع يوم كاد أن يضيع مني بدون ما أذاكر ولا حاجة!
بس صدته بآخر اللحظات xD
( طبعًا كل الناس الطبيعية عايشة بيوم الأربعاء الآن
إلا يارو لساتها بيوم الثلاثاء وما حيبدأ الأربعاء غير لما أنام وأصحى ! )

لما أخيرًا قررت أبدأ أذاكر وإستعديت فعليًا عالساعة 2 بعد منتصف الليل
قلت بأطل على تويتر بس طلة سريعة وبعدها حبدأ مذاكرة فعليًا
لكن لما طليت على تويتر لقيت صحبتي "رزان" مسوية غرفة صوتية
تحمست لها مرة عشان رزان وجلست أفكر أدخل ولا لا ؟
طيب المذاكرة يا بنت؟ بس برضو أبا أطل على رزان؟
وقررت أدخل شوية وأطلع بسرعة ح..

مرررة انبسطت بهالطلة.. حاجات صغيرة، كلمات بسيطة
مواقف عادية وإعتيادية، بس تفررق وتترك أثر حُلو وشعور أحلللى ~

أول ما دخلت.. رحبت بيّا رزان لدرجة من كُثر الحياء كنت حخرج
وأسيبها تتكلم مع نفسها
+ حاجة لزيزة : الناس اللي يتابعوني يطلع لهم إني جوا هالغرفة الصوتية
ففيه بنوتتين يتابعوني دخلوا معانا بالغرفة عشان أنا موجودة
وإنبسطت مررررررة بجيتهم وسببها ..

المهم قعدت أسولف معاهم شوية وبعدها صارحتهم بتساؤل كبير جواتي
وهو : ليش محد فيكم عنده مذاكرة زيي ويقوم يخرج معايا نذاكر ؟
والجواب الصادم إنو كلهم خريجات أصلًا
حسيت أنا حطيت نفسي بمكان خطأ ولازم أهرب

خرجت ودعواتهم غامرتني كأنهم مامات ..
وبعدها فورًا لقيت هالرسائل : 01 ، 02 ، 03
يا رب الكلمة الطيبة والطيب وأهله
ممتنة وشايلة حُب كبير لكُل الناس الحلوة
واللي تمشي بالدُنيا وتسعد غيرها بأبسط ما يكون

+ مررة انبسطت بسالفة الغرفة الصوتية بتويتر
أظن أروع شيء خلاني أنبسط إنو كُلنا كنا بنات
ويا ربي على حلاوة البنااات ~
أحس نفسي أسوي غرفة أجمع فيها كُل الناس اللي أحبهم
يحممممس هيا لييته يا رب !


# ختامًا :
^ كأنو في شيء مهم عشان يصير ختامًا
بس فصل لأجزاء الكلام ح ..

شايلة هم محاضراتي اللي تبدأ الساعة 8 وأنا هنا أكتب تدوينات
ومرة حاسة فيا نوم وتعب ما يكفي له أنام ساعتين ونص
بس الله المستعان*


إقتباس الصباح :
" إن من أفضل أيام المرء.. تلك التي يشعر بها أنه محبوب لدى أحدهم،
إحساسه أن أحدًا يحبه إحساس ثمين وساحر جدًا. "
وهذا شعور غامرني جِدًا حمدلله
شعور قادر يهوّن كُل حاجة وِحشة، يطبطب ويراضي .

++ أحب أن "الحُب قوة" وأحب التركيز على هذا وعدم نسيانه
والعمل به !

 

[M O O N]

-

صايرة أحس التدوين مهمة يومية بدونها يصير يومي كأنو ناقص !
بس مهمة لذيييييذة أنبسط فيها وأترقبها ..

مو لاقية كلمة توصف ضغط هالفترة .. أقل من شهر وينتهي الترم حمدلله
فـ زحمة إختبارات نهائية وتراكم محاضرات وتسليم مشاريع
وفجأة كُل الدكاترة يفتكروا إنهم ما عطونا واجبات كفاية!

بس المفاجأة : رغم إني حاسة نفسي تحت الأنقاض أو ما شابه
إلا إني حابة روتين هالأيام شوية ، شوية بس مو كثير!
صايرة أصحى لمحاضراتي أحضرها وأنام فورًا ..
ساعات أحضرها من السرير عشان لا يطير النوم
أصحى عالعصر .. أحاول أنجز مهام صغيرة أو أجلس أتنفس بس
ومن بعد المغرب لصلاة العشاء تقريبًا أقضيها مشاوير سواء مهمة ولا بس لفلفة عشان أتنفس برضو
ومن ثم الليل بطوله مذاكرة بغض النظر عن الـ 70 بريك اللي أخذها ح~
والفقرة الأهم والألذ : ساعة كاملة قبل الفجر أجلس مع ماما
نتفرج مسلسل مرررة أحبه ، كل يوم حلقة وأحس ودي أخليها نص حلقة برضو
لأن مرة أحبه لازم ما يخلص!
^ ما أخفيكم إنو ماما تجلس معايا بالقوة عشان نتابع المسلسل
هدفها الأول إني أسكت عنها ، بس من جد هالفقرة أفضل شيء باليوم !
# هالمسلسل أحبه لدرجة أحس لازم تكون له تدوينة خاصة كاملة ~
ومن بعد الفجر لمدة ساعة أو ساعتين أجي هنا

حاسة جالسة أجري بحياتي جررري ورغم ذلك مو قاعدة ألحق حاجة ):
أحتاج أسوي مني كذا نسخة يساعدوني شوية ):
بس يااا رب


- المهم ..
صباح الخييير يا دُنيا
مليانة مشاعر حُلوة مجهولة السبب
أو معلومة شوية مو عارفة ومو مهتمة أعرف
بس يكفيني هالشعور والحمدلله .
^ رغم إنو بعد المغرب عندي اختبار شاايلة همه ،
يارب ما يجي يخرب كل المشاعر!
+ وكمان عندي تسليم واجب خااايفة أبدأ فيه أصلًا
درجاتي ما عاد تحتمل إني أكون المسؤولة عنها .. بليز أحد يشيلها عني


* افتكرت موقف عجيب كان منرفزني اليوم ):
كُل يوم أربعاء عندنا لاب نسلمه بأحد المواد
وأنا مرة أحب لما أخلص شغلي.. أشوف باقي البنات مين تحتاج مساعدة
أو مين فيه حاجة مو فاهمتها ودائمًا أرد عليهم من قلبي وأنبسط وأشيل همهم كأنو شغلي أنا
بس اليوم حسيت بصدمة وغرابة !
جات عالمغرب كلمتني وحدة تقول إنها ما حضرت المحاضرة عشان كان عندها مشوار الصباح
وتباني أرسل لها أكوادي عشان ترفعها لأن ما لها حيل تسوي هيَ !
^ طبعًا لو تعبانة كنت حتعاطف معاها والله بس حكتني مشوارها ما يتعب!
قمت إعتذرت منها وقلت إنو الحل له أكثر من طريقة..
لو رفعتِ نفس طريقتي حتعرف التيتشر إنك ناسخة حقي
وصدمتني بـ ردها : " طيب عادي سوي لي حل ثاني وارسليه ، بليز مرة ما لي حيل "
وات ؟؟؟؟؟؟؟!؟!؟!؟!!؟ انتِ ما لك حيل وأنا مخزن حيل بالدُنيا؟
وأنا ما عندي شغلة بالحياة غير أنفذ طلباتك ؟
يا الله على كمية البجاحة ! صدق زعللللت ! كان باقي شوية وأبكي من رسالتها
وقتها كنت أذاكر مادة وأسوي مشروع جماعي لمادة ثانية بنفس الوقت
مرررة مضغوطة ويجوني ناس قليلن ذوق زي كذا ! يا الله ):
مع إنو حاولت أخذها بحسن نية وإنها تمون عليا أو تعتبرني قريبة لها وهكذا
رغم إن علاقتنا سطحية وحتى لو .. ما فيه مبرر لأنها تتبجح >< !

المهم مععلللش عدا ~

 

[M O O N]

-

ولو إنها متأخرة بس مَعلّش..
كُل رَمضان وأنتوا طيبين ولربنا أقرّب .

هالتدوينة تابعة لـ فعالية الشهر
اللي هيَ :
" كيف سيكون روتينك الرمضاني هذه السنه في ظل ما يشهده العالم الآن خلال أزمة كورونا؟ "

ما أعتقد حيكون لرمضان روتين ،
للأسف الوضع فوضى ولخبطة وعدم إستقرار مُحزِن ):
السبب : الإختبارات .

تقريبًا آخر سنة اختبرنا فيها برمضان كنت بالإبتدائي وما ورايا شيء
فـ فعليًا جالسين نعاني هالسنة ):

مو قاعدة أسوي أي شيء مفيد بالحياة غير إني أذاكر
وأكمل مشاريع وأحل واجبات ! يعني برضو لاحظوا مو فترة تركيز عالفاينل بس
لا بعد فيه 70 مشروع و 70 واجب ينتظروننا نسويهم !

وقتي كُله يا للجامعة يا نايمة .. ولا مرة ساعدت بالمطبخ،
ولا مرة خرجت مع أهلي، ولا مرة جلست معاهم بأوقات تجمعهم
لهالدرجة مو قادرة أتنفس .. وأحس يمكن يمديني شوية
بس لأني مو مرتاحة نفسيًا وفيه كذا شيء شاغلني : مو قادرة غير أبقى لحالي
^ يمكن دلع ، بس شعور لزيز إنو أهلك حواليكِ ويساندونك
ويحاولون ييسرون كل شيء بحسب اللي يريحك ويناسبك ): .

++ أتمنى أخذ عُمرة .. لو تيسرت ليا حأصير أسعد وحدة بالدُنيا .
بس لسا أحاول ألاقي حجز ):

+++ إختباراتي تنتهي يوم 22 رمضان !
مبسوطة إنو ما حيكون فيه ضغط اختبارات ورا بعض
وزعلانة عشان رمضان حينخطف منا كطلاب مساكين ):

^ نستنتج عزيزي القارئ إنو ما عندي حياة غير الجامعة .

+ بسؤال الفعالية فيه طاري كورونا ..
بس ما أحس إنها مأثرة على رمضاننا ~
غير إنو الناس مشغولة تأخذ اللقاح !
ويارب ما يتكرر الحظر أبدًا ويرفع عنا هالبلاء ويعافي مرضى المسلمين أجمعين .

#فعالية الشهر ~

 

[M O O N]

-

لما دخلت المدونة ما كان ببالي أكتب عن هالشيء
بس لفتتني تدويناتي اللي قبل وكيف كنت شايلة هم هالترم ونهايته
والآن إنتهى، حمدلله، كُله عدا بالخير وعليه يارب .
^ حأترك هالجزء لتدوينة كاملة أحتفل بها بالنهاية الرائعة -إن شاء الله- ~

______________________

فيه جملة سمعتها بمسلسل .. تتكرر ببالي بشكل مو طبيعي
رغم إني أعرفها ويقيني بها كبير، لكن الآن متربعة في عقلي أكثر .

القصة إنو فيه عائلة حُلوة صغيرة عايشين بحُب ووئام وأمورهم عسل
بس فجأة الأم تخون الأب ويطردونها من البيت ويزاعلونها الأب والأبناء
ويكرهونها لأنها ما اهتمت بأسرتها ولا قدرت قيمتها ودمرتها ببساطة،
فـ بيوم من الأيام يجي أحد أصدقاء الأب وينصحه بـ " شعور الغضب اللي تحسه تجاه
زوجتك ما حيستمر للأبد، بس كونها أم هالأطفال حيستمر للأبد فلا تبعدهم عنها "

شيء صعب أو معقد كون الإنسان يتغير، يتغير بقوة وكل شوية وبشكل ما يتخيله ولا يعتقده
أشياء تزعلنا اليوم.. ممكن تصير بكرا غير مهمة وما تأثر فينا ولا 1%
أخاف مثلًا أزعل اليوم بقوة جدًا جدًا وأقلب الدنيا وأتخذ قرارات مو كويسة
وبكرا أكتشف إن السبب ما يسوى وليتني هاجدة أفضل .
- بس إحنا باليوم وعايشين فيه، ما نقدر نعيش بكرا وبشعور بكرا قبل لا يجي -
بس مرة أحاول أهدأ ، ومع ذلك ومع إيماني فعلًا بإن شعور الغضب ما يستمر
إلا أن المشاعر الجارحة واللي تحز بالخاطر وإستثناءات ثانية .. تستمر ، أو عالأقل ما نقدر نعديها
وتبقى بالذاكرة، تبقى كأنها ندبة، كأنها حاجز، تفسد كُل وقت حُلو، كأنها كسر ما يُجبّر بس نعيش به راضين أو مجبرين!

 

[M O O N]

-

مرحباا بعد إنتهاء أصعب يوم ليّا وأنا أم ~
هاليومين ماما وخالتو مو موجودين بالبيت وصايرة مسؤولية بيتين كاملة عليا أنا
وللأسف كل شيء صار فجأة! للحين مو مستوعبة
أصلًا وماما خارجة من البيت وتوصيني على أطفالنا.. أقولها طيب حاضر بس افتحي لي جالون اللبن أول
والله وقتها صممممت ، متأكدة إن ماما إنهارت داخليًا لأن شلون تحملني مسؤولية بيت وأنا مو عارفة أشرب لبن لحالي ؟
بس مرة فخورة فيّاا وأحبني وأحب أهلي كلهم وأحب إنهم أهلي ، الحمدلله ~

كل الأيام تهون بس اليوم كان أصععععب ..
رغم إن كالعادة بابا شال الفطور عننا وراح جاب من برا،
بس فوق كل المهام الطبيعية.. كلمونا مكتب الخادمات وقالوا إن حجزنا بيصير اليوم بدل بكرا !
كنت حبكي لأسباب عديدة ! 1/ ما فيا حيل أنتبه عليهم وأكون معاهم وأشوف لو يبون شيء وهكذا لأن يا دوب ألحق عيالنا ، 2/ كنت أبيهم يتأخرون قد ما يقدرون لأن عارفة بينظفون وينعدم البيت والعيد لسا ما جاء بسبب قوة أطفالنا في إحداث الفوضى والتخريب !
بس عاد قلنا اللهم لا إعتراض وشِلت كُل هالمهام وأشواا إنه عدا هاليوم ..
ومبسوطة عشان خلاص إنتهى هم تنظيف العيد وصار البيت جاهز تقريبًا ~
إنتهى التنظيف العميق القوي ويبقى نسوي جولة تنظيف بسيط بليلته إن شاء الله ~
< مرة متحمسة للعيد وللفرحة اللي يروي بها قلوبنا ويجبر خواطرنا
الله يبلغنا إياه على خير إحنا ومن نحب بأحسن حال .

فعليًا من أول اليوم لآخره وأنا واااااقفة ! ما لحقت أقعد ولا شوي !
^ لما أفكر بقد ايش تعبت.. يصير بخاطري أبكي

++ دايمًا أنتظر نهاية اليوم عشان أسهر لوحدي وأسوي شيء أحبه وأروق ..
إلا اليوم.. جالسة أنتظر النهاية عشان بس أبا أرتاح وأنام ):
تخيلوا ! أنا اللي يسموني ملكة الأرق .. أول ما سدحت الأطفال عشان أبا أنومهم
نمت قبلهم !! بس صحوني لأنهم خايفين وطار النوم شكله !
^ ملكة الأرق عادي ما استغربت

المهم صدق حياة الأمهات صعبة وتقييمي لها -13 من 100 ~

 

[M O O N]

مشاهدة المرفق 7878​

-

وحشششني أجي أكتب تدوينة.. مرة وحشني ..
وبمناسبة هالوحشة أحب أشكر أصحاب المدونات اللي دايمًا يشاركونا تدويناتهم ~
مرة مرة مرة أحب أقرأ يوميات الناس العفوية، أستمتع لسببٍ ما.. لسا ما اكتشفته .
++ عالطاري .. أحس هالقسم مرة مظلوم !
بس ليش ما فيه كثير ناس تحب تقرأ هنا ؟

المهم.. أحس الآن بالضبط تبدأ إجازتي < يارب يعني
رغم إنها فعليًا بدأت من يوم 22 رمضان تقريبًا
بس من هذاك الوقت للآن أحس إني كُنت اجري بالحياة وفيه كثير أشياء تحصل ورا بعض وفجأة
غير تعطل اللاب اللي وقف لي حياتي مو بس إجازتي
بس المهم الآن إني مرة متحمسة للأيام الجاية وعساها تكون زي ما نتمنى .. عساهاا ~

جالسة أتابع مسلسلين بنفس الوقت.. كأنهم أولادي وأحاول أعدل بينهم بس مو عارفة
واحد سوري والثاني أمريكي، والمشكلة فيه مسلسل ثالث بالطريق متحمسة له
مو قادرة أصبر لين أخلص واحد من الإثنين عشان أشوف الثالث
-خايفة من نفسي لا أصير أتابع 3 مسلسلات بوقت واحد
^ هذي الزحمة والمشاكل اللذيذة اللي نتمناها

قبل شوية كنت أتفرج مقطع تيك توك أجنبي لوحدة تسوي أعمال فنية
وما أعرف ليش لفتني مرة شغلها وتحمست أجرب أسوي زيها !
وقررت إنو فعلًا أجرب ويارب أصير حلوة صدق وفنانة ..
حروح بكرا الصباح ان شاء الله أشتري الأغراض من المكتبة
ولو نفذتها وكنت حلوة.. حوري سكان الكوكب كلهمممم - ترقبوووني

آخر حاجة : حمدلله على نعمة الأيام اللي تغمرنا بشعور السعة
اللي تعدي بِخفة، هينة، لينة، الحمدلله الحمدلله ~

 

[M O O N]

-


هالمرة صدق صدق وحشني أكتب تدوينة ~
طووووولت ! ):

أحب التدوين وأحب إنه أمر مناسب لكل حال
يكون فكرة جيدة في الأيام السعيدة والحزينة كمان
الهادئة والمزدحمة ، المرتبة والفوضوية ، دائمًا التدوين لذيذ !
++ أعتقد إنه يخلينا نتأمل كفاية عشان نبصر الجمال
والنِعم اللي فوتناها وفوتنا شكرها .


حاليًا.. أعيش أيام هادئة تقريبًا -بغض النظر عن الفوضى الداخلية -
وهالهدوء رائع الحمدلله ، أتمنى يستمر بأحسن ما يكون ~
+ برضو اتمنى تعدي كُل هالأيام بسرعة على خير ..
لإعتقادي بأن كُل حاجة حتكون أفضل بالفترة القادمة !
و يارب يكرمنا بأفضل مما تمنينا ولا تخيب ظنوننا ، آميييين *


**

اليوم وفجأة نزلت جداولنا بالجامعة . . وأنا والله محتارة على ايش أزعل ؟
هل عالتوقيت الغريب المفاجئ ! ليش ينزلونها بإجازة ولسا باقي عالدوام شهرين !!
ولا على إنو الجدول سيء وما أحس ينفع يتضبط بأي طريقة *
بس معليه حتفاءل دائمًا بإنو كل شيء حيكون كويس
وخيرة الله غالبة على كل أمر أكيييد . .
++ أتمنى مرة مرة إنو تتيسر لي إضافة مواد من خارج الخطة
ياااا رب - الجميع يقول آمييين بليز

الشيء الرائع أو اللذيذ هنا . . وسط أحزاني على جدولي
فيه كذا بنت من الدفعة الأصغر مني جو ليا يسألوني عن جداولهم
ويستشيروني كيف يرتبوها وكيف ممكن يعدلوا عليها ؟
مرررة انبسطت بيهم ، انبسطت بشعور إني مفيدة وكمان بشعور الكلام عن الجامعة
لأن شكلها مرة وحشتني - فالحمدلله