فخر المدونين كن قوياً ،، فالحياة تميت الضعيف قهراً (1 زائر)

[A S T E R]

قانون الضمان الاجتماعي

حاليا قايمة القيامة عنا بالضفة
بسبب قانون بدها سلطتنا العظيمة تفرضو على هالشعب - الكحيان- الي عرف شو يعني هالمصطلح يحطب بالتعليقات

طبعا ما حد قبلان فيه..لأنو قانون ظالم جدا
وهو قائم على الحرمنة..يعني السرقة ..لجيابهم

يعني والله الواحد من وين بدو يلقاها ولا من وين

فش رحمة عند هالحكومات الظالمة
وبتقولو الواحد ممنوع يحكي
لا بدنا نحكي لأنو الوضع كل مالو لورا وزفت

فوق ما انو محتلين والاحتلال مخبط على روسنا
وبعمل الي بدو إياه
كمان السلطة بتزيدها على الشعب
هو احنا عارفين انهم همي أدوات في ايدين اليهود
وبس بدهم شي مباشرة بخدموهم

انتو بس تعالو وتفرجو بس يدخلو اليهود عالبلد كيف ما بتلاقي ولا جندي او شرطي فلسطيني بالشارع
الله وكيلكم متل الفيران بتخبو

طبعا مهمي لو شافوهم بطخوهم ههههه

بس فاضيين يفردو عضلاتهم علينا ويضربو أي حد بحكي أي شي ويعتقلو
ويضربو مشايخ
ولسا قبل شوي..شفت فيديو بحكي عن صبية اعتقلتها السلطة بتهمة هي مش عاملتها
وبعذبوها بكل الطرق..بتركلكم تفهمو شو يعني بكل الطرق

اما عند اليهود ببطلو أقوياء وببطل يكون معهم سلاح يواجهوهم

بس مهمي همي أتباع لإلهم

لهيك هالقانون بدهم يفرضوه على هالشعب المسكين الماعط (الكلمتين نفس المعنى احزرو شو يعني)

لحتى يفقرونا بزيادة
لحتى يهججونا من بلادنا
عشان تخلى لليهود
والله هيك هدفهم
ولو بدي اشرحلكم عن الضمان ما بخلص
بس مبين انو عينك عينك سرقة
وما في من وره خير
لهيك كل الناس منتفضة عليهم وما حد راضي فيه
وان شاالله انو ما يتطبق

باختصار بشرحلكم إياه
انو بدهم يفرضو قيمة معينة يقتطعوها من راتب الموظف..ويوخدوها لالهم
-وهالقيمة موقليلة-
والراتب دوبو مكفي والله
وبرجعولو إياها بس يخلص خدمتو..عالستين سنة
طبعا اذا استقال عالخمسين ..ما الو ضمان
اذا مات..ما في لأهلو ضمان
اذا هو ومرتو دفعوا ضمان..بس الزلمة بوخد..المرا لا

يعني شايفين..مبينة انها سرقة وظلم


قال مسؤول فلسطيني بقول
بدل ما تصرفهم على مرتك وولادك احنا بنخبيلك إياهم
بالله عليك

عفوا منك اذا الواحد ما صرف على عيلتو..على مين بدو يصرف
ولكم منيح انو الراتب بطير من اول الشهر خصوصي للي عندو عيلة الله يعينو

ولكم شو بدكم في الناس

الله يخزيهم هالظالمين ومن قبلهم اليهود

وان شاالله ما بصير شي من الي بدهم إياه

ورح نضل قاعدين على قلوبكم وما رح نهرب من هالبلد



يلا..سلامات ي جماعة طولت عليكم

بس والله الواحد مقهور

 

[A S T E R]

الله يرحمكم يا شهدائنا الأبرار

الله يتقبل كم ويجعل مثواكم الجنة

والله ينتقم من الظالمين

الله يستر من الي جاي


بحكيلكم التفاصيل بالتدوينة الجاي بالليل

 

[A S T E R]

تدوينة ع السريع وقبل ما يخلص اليوم

لأنو ما نسينا
14\12 \2008

هالذكرى حلوة كثير
قد ما عيدها ما بشبع منها

وعقبال ما تلحق أبوك يا رب


كل الاحترام للصحفي ولكل اهل العراق


وان شاالله هيك بس كون رايقةة

مع انو الوضع بالبلد ما بطمن

بنزل تدوينة عن شهدائنا الأبرار

 

[A S T E R]

السلام عليكم ورحمة الله وبركاته

تدوينة اليوم بعنوان :
مِّنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ ۖ فَمِنْهُم مَّن قَضَىٰ نَحْبَهُ وَمِنْهُم مَّن يَنتَظِرُ ۖ وَمَا بَدَّلُوا تَبْدِيلًا (23)



ماذا فعلت يا أبا سعيد لتمت هذه الميتة العظيمة
لقد ارتقت روحك للأعلى وأنت ممسك بكتاب الله
وكنت قبلها قد صليت ركعتين تقربا لله تعالى

فما أحسنها من خاتمة ،،تختتم بها حياتك الدنيا وتنتقل للقاء ربك وتقف بين يديه
اللهم أحسن خاتمتنا واجعلنا من الصالحين العابدين كأبي سعيد رحمه الله

لقد كان أبا سعيد رجل صالح جدا
لم يذكره انسان بسوء قط !
لم يؤذي أحدا لا بفعل ولا بقول
كان يساعد المحتاجين للمساعدة سواء رجلا كان أو امراة
أحسن تربيته لأبنائه وبناته ،،
مهما تحدثت عن هذا الرجل العظيم لن أوفيه حقه
كلما سمعت من أحد عنه يقشعر بدني
قبل وفاته بليلة كان قد رأى وذهب عند أناس كثيرين
وفي الليل شعر بقلق وأرق فقام ليصلي ويقرأ القران
فإذا به يتوفى وتجده زوجته قد توفي وهو حاملا لكتاب الله

لقد تأثرت جدا بوفاته
مع أنه لا يقرب لي من بعيد أو من قريب
وليس وحدي
كل أهالي البلدة تأثروا بوفاته وبكوا بكاء شديدا
حتى أن الرجال بكت عليه
وكان احد الرجال يقول لاخر وهو يبكي بحرقة أثناء جنازته
" راح أبو السعيد يا فلان،، من أربعين سنة بنشوفو بالمسجد،،راح أبو السعيد "
وكان يقول هاته الكلمات وهو يبكي بحرقة
وأنا بكيت اكثر عندما سمعت هذه الكلمات
وامرأة كبيرة في السن تقول وهي في عزاءه وأيضا تبكي بحرقة وتقول
"لقد كان دائما كلما يراني يحمل عني الأغراض ويساعدني "

وغيرها الكثير من العبارات والمواقف المؤثرة التي سمعتها عنه بعد وفاته
والجميع كان يقول لقد رأيته ،، لقد رأيته قبلها بليلة

واليوم،،، عندما ذهبت لأعزي
ورأيت ابنته
"وهي صديقتي وأختي في الله وفي حمل الدعوة "

لم أستطع أن أمسك نفسي واحتضنتها وهي أجهشت بالبكاء
لقد رأيت الحزن وعدم استيعاب الامر في عينيها
هي صابرة ولكنها لا تستطيع أن تكتم بكاءها


رحمك الله يا أبا سعيد
وجعل مثواك الجنة مع الأنبياء والصالحين
لقد كان حاملا للدعوة الى الله معروفا بخصاله الطيبة التي لم ولن ينساه أهالي بلدتنا
يكفي جنازته التي كانت مثل جنازات الشهداء




لقد تحدثت في السابق عن الموت
وقلت أن على المسلم أن يضع الموت أمام عينيه كل الوقت
ولا يستبعده عن نفسه
فها هو توفي هذا الرجل فجأة وبدون سابق انذار وهنو بكامل صحته
والكل استغرب وفاته لانهم كانوا قد رأوه قبلها بليلة

(الصراحة يا جماعة الخير يمكن تستغربو اني بكتب عن زلمة غريب بالنسبة الي،،
بس عنجد انا كثير متأثرة بوفاته
هو امبارح توفى بالليل
وحاليا بكتب عنو ودمعتي على خدي
ماشاءالله عنه كان من خيرة الرجال والله ،،واحنا عنا في بلدنا مثل ما حكيتلكم قبل
مو كبيرة وكل الناس بتعرف بعضها والافراح والاحزان بنوقف لبعض وبنكون ايد وحدة والكل بروح يعزي او يهني بالافراح
فلا تستغربو اني بكتب عن هالانسان العظيم لانو هو بيستحق اني اكتب عنو واخلد ذكراه
وبرضو عشان نتعلم منولحتى ربنا يحسن خاتمتنا كما احسن خاتمته )


انتهى

 

[A S T E R]

عم اسمعها وأبكي ،، اسمعوها

الله يرحمكم يا شهدائنا السابقين والحاليين

لقد كنتم أبطالا ولن ننساكم مهما حيينا

وها هم لحقوا بكم شهداء اخرون
رحمكما الله صالح واشرف
واسكنكم فسيح جنته مع الأنبياء والصديقين والشهداء

الي اسمو اشرف عمل عملية قبل كم شهر
ودوخ اليهود عليه
كان متخبي عند وحدة اسمها ام محمد
بس بالاخير شكلو حد عرف بمكانو من الخايسين
وحكى عنو واجو واغتالوه الأسبوع الي فات
-طبعا قصدي انو الي دس عليه هو احد رجالات السلطة الحقيرة-
لانو تاني يوم من الاحداث طلع عباس وحكاها بالخط العريض
التنسيق الأمني مقدس
واحنا مع الجهات الإسرائيلية رح نعمل مع بعض لحتى نوقف هؤلاء المخربين
-ولك يا خايس يا حقير يا تافه -
وبنفس الليلة صالح كان عامل عملية ثانية واغتالوه
وفيه شب اسد نسيت اسمو
هجم على جنود ي جماعة - والله قلبو قوي-
وقتل منهم وجرح حد فيهم
واخد من التالت سلاحو وهرب
ولهسا هربان
ان شاالله ما بمسكوه
وصارت تصعيدات واحداث كثيرة
واليهود انجنو ولهسا منجنين
خصوصي المستوطنين..وبهجموا عالناس الي رايحة والي جاي وبعتدوا عليهم

شايفين كيف كيانهم هش يا جماعة
اذا سكينة او حجر بخوفهم وهم جيش وحاملين اسلحة
فما بالكم اذا تحركت احد هالجيوش العربية الي حوالينا؟؟؟
مثل الأردن
سوريا
مصر
العراق
تركيا..بما انو فيه ناس بتحكي عن اردوغان خليفة وكويس
وينو؟؟
وين جيشو عنا؟
وعن اهل اليمن
وعن اهل الايغور في الصين
وعن مسلمي الروهينغا
- بتعذبوا ويتم تطهير عرقي لهم هناك فقط لانهم مسلمين -

طبعا ما حد بتحرك بدون ما الboss العالي تبعو يأمرو
بستنو اهل فلسطين وباقي البلاد يحرروا حالهم منهم لحالهم


الله ينتقم من كل حد ساكت
-قصدي الحكام -
ومن كل حد بدافع عن كل حد ساكت
-يعني من أي حد بدافع عن الحكام -
ومن كل حد ما بتحمل يسمع كلمة الحق كمان
- يعني يلي بطبلولهم وبسحجولهم وهمي عارفين انهم خطأ بس لانهم خايفين -


وبس هيك

دمتم بخير

ملاحظة مهمة :
طبعا أنا ما بوجه كلامي للشعوب العربية والمسلمة
لا طبعا،، بحب كل المسلمين شو ما كانت جنسيته صدقا
لأني بعرف انو المسلمين في كل انحاء العالم
لو حكامهم بسمحولهم كان ما بقصروا ومستعدين ييجو للجهاد
كل انتقادي وكلامي وغضبي على حكامنا الي باعو الاخرة
واشتروا الدنيا من اجل الحفاظ على الكراسي
تنشوف شو رح تنفعهم عند ربنا

ما بنقول غير حسبي الله ونعم الوكيل
والله يهديهم

 

[A S T E R]

صباح الخير

قبل شوي سمعت فيديو رائع جداً
والكلام فوق الوصف

فيديوهات الزلمة هاد أكثر من رائعة
بنصحكم تسمعوها لأنها كثير بتذكرنا بشغلات حلوة
وبتوصف أمور بسيطة بطريقة رائعة
معظمها تأليف ناس غيرو
هو بس بقرأ
طريقة طرحو جميلة جدا

اسمعو هاد الي سمعتو قبل شوي

وهاد

بنصحكم بسماعهم ومتابعة قناته
لو بدي حط الي عجبني ما بخلص
لأنو كلهم حلوين وبحزنو كمان

 

[A S T E R]

السلام عليكم ورحمة الله وبركاته

هيك قلت ادخل واكتب ع السريع

حاسة بالغربة لانو زمان مافتحتها وما كتبت شي



ان شاءالله قريبا رح ارجع واكتب هون
وحابة شارك في الفعاليات الحلوة الي عاملينها بالقسم

اشتقتلكم والله
واشتقت للمنتدى..
بس ظروف

في امان الله ي حلوين

بس قلت اسلم

 

[A S T E R]

يسعد مساكم غوالي

كيف حالكم جميعا؟؟

شفت فيه ناس جديدة نورت مدونتي

أهلا وسهلا في أي حد بقرأ وبتابع
هالشي بسعدني


حاسة انه صرلي دهر ما فتت مع انو مش هالفترة الطويلة
بس هيك هالفترة مضغوطة شوي وعندي انشغالات كثيرة جدا

وأنا بحب بس ادخل المنتدى هيك
أكون رواق

وصرلي فترة مش رواق نهائيا هههه

رجعلي مرضي قبل شي شهر ورحت المشفى وحالتي حالة
- طبعا الحق علي لأني كنت انسى حبة الدوا أحيانا -
لأنه لازم اشرب حبة يوم يوم على طول

وما لحقت أتعافى الا انا صابني رشح قوي كثير
وما حسيت حالي خفيت الا هما ذنيي التهبوا وحالتهم حالة وبطلت اسمع والله

بعدها صابني اكتئاب رسمي وصرت اعيط بس أكون مع حالي
لاني هيك صرت اقصر ومش طايقة حالي ولا بناتي
وانا بحبش اقصر..مع اني طبعا كنت اضغط عحالي واعمل كثير
بس هيك مريت بفترة انهارت تماما وما عدت أتحمل بسبب انو علي مسءوليات كثيرة
ومريضة ومش قادرة

بس الحمد لله فترة وعدت وراحت ..
بالصبر والتوكل على الله والدعاء وبمساعدة الغالي الله يرضى عليه

بس ما بعرف ليش بحس حالي أحيانا اني قلبت نفسية
قدام الناس بكون مرحة ومنداري شو وبضحك
بس وانا مع حالي ببقى عايفة الدنيا وحالي

بحس انو شخصيتي متغيرة من جوا
بس ما حدا بعرف
لأني ما بظهر هالشي
مش عارفة ليش هيك صايرة
وحابة ارجع مثل قبل ومش عاجبني وضعي
وصايرة ياخي حساسة زيادة عن اللزوم
انا كل الصفات فيي الا الحساسية من المواقف او من رمي الحكي
كنت ما اهتم نهائيا
صايرة حساسة واتأثر بالحكي كثير وبس اقعد مع حالي برضو اعيط

امبارح مثلا انفتحت السيرة عن شغلة وانا عند اهلي
وقعدت اعيط لخواتي ونسوان اخوتي

طبعا همي كانوا رح يطخوني..ي هبلة تهتميش وعادي
الناس بتحكي على جميع الأصعدة
وهم معهم حق
بس بقولكم انا مش طبيعية اخر فترة ومتغيرة

.
.
.
فعشان هيك ما بحب اكتب عن حالي شغلات هي بطلت تكون فيي

بس بعدين قلت لا بدي افتح واكتب الأشياء الي صايرة معي

.
.
.

برضو امبارح كان عنا سهرة بنت عمي رح تتزوج بكرة
نوعا ما حسنت نفسيتي
بحب الاعراس وبتحسن نفسيتي كثير بسبب جنونا احنا البنات

.
.
.

المهم شو صاير بالاعضاء

ليش مغيرين اساميكم يا جماعة مش عارفة حدا

احلى شي اني طلبت طقم لتقرير وعملتلي إياه ..وانا رحت ومرجعتش ولهسا بعمل فيه

مش عارفة ايمتا رح اعملو

انا أصلا لهيك ما بقبل صير شي بالمنتدى
لاني عارفة حالي..بتمر علي فترات نشيطة
وفترات خاملة ..عنصر نبيل ..قلبتها كيميا



اه وصحيح ..أسعدتني أخي حسن بما انك تستمتع بمدونتي
بتنور
وانا بستمتع في مدونتك @7sN


لي عودة في تدوينة أخرى

وبإذن الله ما بنقطع

اشتقت للجميع

 

[A S T E R]

السلام عليكم ورحمة الله وبركاته

ياالله زمااان ما كتبت هون اشي

تعرفو التطوير عجبني فيه كل اشي الا شغلة أنه راح الطقم الي لمدونتي هههه
وخربو شكل كل مواضيعي هههه

بس يلا مش مشكلة ما علينا ..بس هو بالفعل كل اشي حلو ومرتب فيه

انتو كيفكم جميعا شو اخباركم وشو جديدكم
انا عادي تعودو عليي اني اغيب فترة وارجع اكتب

مشاغلي كثيرة ..وشغف الكتابة مو مثل زمان ههههه

بس المهم اني مستحيل أغيب على طول
خلص اخدتو هاد القرار هههه

صارت معي كثييير شغلات اشي بقهر واشي بضحك كثير
وكنت بدي افوت واكتب وببطل ..ليش بعرفش

بس تعرفو شو احلى شي صار معي بهالفترة ؟
اني رحت عالقدس بدل المرة مرتين

وتتصوروش فرحتي شو كانت كبيرة بس زرتها بعد غياب طويل
رح اكتب تفاصيل الرحلتين بتدوينة ثانية أن شاءالله


بس اكثر شي قهرني أنو بعد ما رجعت من القدس نسيت اعمل صورة للمنتدى ..انو اكتب الى اعضاء انمي تون القدس تشتاق لكم ههه
تعرفو والله جيتو ببالي بس لانو في كثير من صاحباتي وقراببي طلبو مني اعملهم هيك..عملتلهم
وبعدين نسيت اكتب للمنتدى

تذكرت بعد ما روحت ..بس عادي مش مشكلة...أن شاءالله قريبا رح ارجع اروح هناك ..بس ادعو تتيسر معي

المهم ..كيف عنوان المدونة الجديد ؟
عجبكم ؟
بعرفش ليش حاسستو مو لابقلي لأني كثير مرات بحس حالي ضعيفة ..لو تسمعني اختي بحكي عن حالي اني مو قوية الشخصية ههههه
لتنتحر

عاد اليوم كثير حابة اكتب بالمدونة وانزل موضوع جديد
رح اكتب جزء جديد كنوز لا تفنى
بس هيني مشغولة حاليا رح نطلع رحلة الظهر ونطول

ادعولي...يلا في امان الله​

 

[A S T E R]

هلا بالربع

شو اخباركم جميعا؟

اليوم هيك حابة أحكي عن شغلة ، ونتناقش فيها
هي دايما ببالي وأسأل حالي هالسؤال
بس تذكرتها أكثر لما كنت مرة قبل شي كم يوم فاتحة المنتدى وبتصفح وكنت أكتب ،
فأجا محمد - يعني زوجي للي ما قرأ اول مدونتي -

وقلي مالك مركزة كثير بالتلفون وصرلك ساعة بتكتبي
فحكيتلو فاتحة المنتدى وبقرأ وبكتب ردود
حكالي اه الي قلتيلو عنو أول ما عرفنا بعض؟ فبحكيلو اه هو ..
وقلتلو إني من زمان فيه هاد المنتدى مش من وقت ما عرفنا بعض ، من صف أول ثانوي
وما شاركت غير فيه وانقطعت عنو وكنت أفتح كل وين ووين وهيني جديد رجعتلو زي زمان

فأنا كملت وبحكيلو مستغربة كيف الناس بطلت خلص عالمنتديات وما فيه إقبال زي زمان
فصار يقول خلص طلعت برامج تواصل كثير والناس عليها

فبسألو وانت مالك بطلت عن المنتدى إلي كنت فيه
حكالي منتي عارفة فش عندي وقت ههه
واه هو فعلا فش وقت ، وأنا كمان نفس السبب
واحنا الثنين مش مدمنين على هديك المواقع بالمرة ،، صح بنستعملها
بس هو بالفعل خلص الواحد بعقلو انشغالات كثيرة ومسؤولية أكبر والتزامات فببطل الواحد يدخل عالمنتدى وهيك
لأنو هو كمان كان مشارك ونشيط بإحدى المنتديات وانقطع من وقت ما خطبنا

وقعدنا نتذكر في هبلنا كل واحد في المنتدى الي كان فيه،
انا صرت أتمسخر على اللقب إلي كان مسميه لحالو
" الفارس الحزين " ..بحكيلو وليش مين محزنك وما خلصت تخويث عليه ههههه

وسألتو هسا شو صرت لساتك حزين ولا سعيد ولا شو ؟ قلي خليني ساكت قصفني ضت1

أنا كل ما أتذكر لقبي المعاق بقول بشو كنت أفكر هههههههه
كانت موضة فيلم هاري بوتر وحبيت شخصية هاري بوتر
فكنت مسمية حالي بالتون القديم ( Daniel Lover ) ههههه
حتى لا اول اسم سميتو حالي ميانو شيهو (اسم هايبرا ههه ) بس فترة قصيرة وغيرتو لدانييل لوفر
ومرة غيرتو ل (Kristine ) , ومرة ( Anne ) ..بعدها رجعت لدانييل لوفر لأنو الكل قلي ارجعي للقديم ههههه

قال عاشقة دانييل ضت1


بس جد نرجع إنو ليه لهالدرجة بطل يكون فيه تفاعل مثل قبل
بتذكر التون القديم كثير كان فيه إقبال مو طبيعي
ونشاط وردود عالمواضيع
يعني بعمري ما نشرت موضوع ليردو عليه الناس
وكثير كان يجي ردود على مواضيعي
وفي كل الأقسام كمان
اليوم هيني ما نشرت مواضيعي ..ما حدا معبرها
وبرضو كل الأقسام مش هالنشاط
مع إنو من رأيي المنتديات أحلى بكثير من مواقع التواصل الاجتماعي
ومفيدة ..يعني منوعة فيها تسلية وفيها أصدقاء وفيها أخرى شغلات مفيدة والواحد بنمي قدراتو فيها
يعني والله والله قدرتي على الكتابة نميتها بالتون وبس ومش بأي مكان ثاني

وبرضو بحس هون الناس جد بكونو يتعاملو مع بعض كأصدقاء وأخوان عنجد وما فيه أي نوايا ثانية ، والكل بحب الكل ،، بمواقع التواصل بتخزي والنوايا بتكون مقرفة وبس للسقاعة والبياخة

أنا من بعيد وبدون ما أتعرف ، وولا عمري عرفت حدا غريب سواء شب او بنت على مواقع التواصل

بس هون بالتون القديم تعرفت على كثير صبايا وشباب وكلهم ماشاالله عنهم شو طيبين وكويسين
وهون بالتون الجديد لساتني بحس حالي جديدة عالساحة ولسا ما تعرفت مزبوط
بس هيني بتعرف ،،
وعرفت بنات كثييير حبيتهم والله مع انو ما حكينا كثير بس واضحة طيبتهم ، وفيه من الاخوة برضو ماشاالله عنهم

مثلكم ..
@كَـآإرِينـﮪﮧََ ❖
@April @Queen Eva @RELENA @Dr.Nadine
@Dark_Angel @Daffodil @Milli @UNIQUE @WiSHES @Roro sama
وبوراهي وباندا وألما و @شوشـاآيةة. و @JELLO انت يا غزل هيك من الله بحبك كثير
وانت كارينة كثير حبيتك والله وبعشق ردودك على مواضيعي ..راقية انت ..يسعد روحك ..
وألموشتي اول من عرفتها هون لما رجعت
وشوشاية و نادين ونونو وفيه كثير منكم قرأت من تدويناتكم وحبيتكم من قلبي مثل بيلا مع اني عمري ما حاكيتها بس ماشاالله عنها @Bella Manaka


وكثير صبايا ماشاالله عنكم الله يسعدكم جميعا
وفيه من الاخوة عرفتهم عن طريق تدويناتهم جميلة جدا مثل حسن وماجيكال ونيرو وناسية مين كان هههه @NERO @7sN @MaGicaL Boy
الله يوفقكم جميعا اخوتي واخواتي

انتو احكو شو رايكم بهاد الشي وانو ليه هيك الكل - مخيسين - على تويتر وفيس وغيرو
(على قولة احمد @SKY NET )
كلمة مخيس بضحكني ..ما بستعملها غير هون بالمنتدى ..من هون تعلمتها ههههه


المهم اخر شي بدي أحكيه
إنو فعلا بالنسبة الي قد ما أغيب مستحيل أنقطع نهائيا وغيابي بكون لظروف
بس لازم ارجع ما بقدر ..أكسجيني هالمنتدى هههههههههههه
هو المنتدى الوحيد الي سجلت فيه بحياتي كلها
ورح ضل موجودة فيه ان شاالله ..اذا ما متت ههههه يعني اعرفو اذا طولت كثير خلص يعني متت

ويعطيك الف عافية أحمد ،، شغلك فيه بجنن وكل اشي بتعملو فيه روعة ومناسب
ما بقدر اوصف قديه انك انسان فهمان وواعي وشغلك حلو بالمنتدى ، اخ غالي
الله يوفقك بحياتك الواقعية والانترنتية من وين جبتها بدراش هههههههههه


اسعدكم الله جميعا ووفقكم في حياتكم
أحبكم في الله جميعا دون استثناء ..للي بعرفني والي ما بعرفني ق8ق9