فخر المدونين كن قوياً ،، فالحياة تميت الضعيف قهراً (2 زائر)

[A S T E R]

المؤنسات الغاليات ،،،



أتفاجأ حينما أسمع الجمل مثل :
( الله يعوضك بالصبي ،، ان شاء الله بتزينيهم بالصبيان ،، الله يعطيك صبي ..الخ)

أنا لا اتضايق كثيراً وأردها بكلمة امين
ولكنني في نفس الوقت أستغرب بأن هذه العقلية موجودة إلى اليوم عند بعض العقول
وتتحدث وكأنها تشفق علي !

صحيح إنني لا أنكر بأنني أحب الصبيان وطبيعي جداً أن أتمنى أن يكون لي ولد
ولكن في مجتمعنا من لم ترزق بصبي من البداية وكأنها عقيما
وكأنها لم تنجب اذا انجبت فتيات
وكأنه واجب أن يكون الصبيان بالبداية
لا يعرفون ان الذي ينجب البنات ..سيعطيه الله الأولاد ..سواء بعد بنت أو بنتين او ثلاثة
واحتمال أن لا يرزق أصلا ببنات أو صبيان

" يَهَبُ لِمَنْ يَشَاء إِنَاثًا وَيَهَبُ لِمَن يَشَاء الذُّكُورَ * أَوْ يُزَوِّجُهُمْ ذُكْرَانًا وَإِنَاثًا وَيَجْعَلُ مَن يَشَاء عَقِيمًا إِنَّهُ عَلِيمٌ قَدِيرٌ"

فكلها بالنهاية هي أرزاق من الله سبحانه وتعالى
سواء كانوا ذكوراً أو إناثاً ، وان لم يرزق الانسان فليصبر وليدعو الله وليستغفر
وأعجبني كلام زوج اختي بأن على الانسان أن يفرح إذا زوجته حملت بشكل عام
أو اذا بشّر ببنت ،، كفرحته عندما يرزق بمال
لأن الأطفال رزق من الله سبحانه وتعالى وعلينا ان نستقبله بفرحة تامة كفرحتنا لأي رزق يأتينا

وفعلا كما قال حبيبنا عليه الصلاة والسلام .. هن المؤنسات الغاليات
أعشق هذا الوصف في البنات

وقيل أيضا في حب البنات
"حُكي أن عمرو بن العاص دخل على معاوية وعنده ابنته فقال: من هذه يا معاوية؟ فقال: تفاحة القلب وريحانة العين". ق8

فعلا ابنتاي هما تفاحة قلبي وريحانة عيني وهما المؤنسات الغاليات
ولا أخاف من الموت سوى بسبب أنني لا أريد أن يأخذني الموت بعيداً عنهن


رواء ... نسختي المصغرة مني

كلما نظرت إليها وهي تحدثني وأنا أقوم بواجبي في المنزل وهي لا تنفك تسألني أسئلة لا معنى لها
وأحيانا تقوم بتصرفات غبية
ولكنني أقابلها بابتسامة واحس بأنني أنا من أتكلم وليست هي
أحسها تشبهني كثيراً سواء في الشكل أو بالتصرفات..وبالتصرفات وطريقة الكلام تشبهني اكثر
حتى مرة قرأت جملة ( لن تدرك مدى غرابة اطوارك إلا عندما ترزق بنسخة مصغرة منك )

وفعلاً المقولة 100% سليمة ، هي مراتي باختصار ، أرى نفسي فيها
وأعشق كل شيء فيها
ليس لأنها تشبهني في كل شيء ، فقط لانها ابنتي وتربعت على عرش قلبي

مسك،، تفاحة قلبي الثانية

لن أستطيع أن أكتب عنها، ممكن أن تعتقدوا أنني أفضل الكبيرة عليها
لا والله ، ولكني من فائض مشاعري نحوها أعجز عن وصف مشاعري
هي تختلف تمام الاختلاف عن أختها سواء في الشكل أو بالتصرفات
ولكنني دائماً أشعر بالشفقة عليها ،
( على قولة زوجي هالبنت بتشفق نظرات عيونها حزينة وهي بالفعل هيك هههه عيونها قصة )
مع أن شخصيتها أقوى بكثير من أختها الأكبر ، وأختها أعقل منها ، ( مجنونة ومجننتني معها )
ولكنها جوهرة، وأعشقها كثيراً ، طريقة كلامها ،، ويكفي غمازاتها

يضعف قلبي أمامهما عندما تخطأ أحدهما وأريد عقابهما ، أحيانا لا أ اقدر ، بسبب نظراتهما وكلامهما هههه

فاللهم اعني على تربيتهما تربية صالحة وارزقني برهما ،
وارزقني بأخوة لهما ليس لشيء ولكنني أعرف معنى كلمة أخ
وأحب أن يكون لهما أخوة ويجربان شعور ذلك
- يعني عشان الي بقرأو من الذكور لا يقولو واحنا وين رحنا وليه ما مدحتي الأولاد ? -

وانتو يا صبايا ضلكم هيك بالنسبة لأهاليكم المؤنسات الغاليات هههه
فعلاً ما كنت متوقعة شو يعني أمومة وشو يعني مشاعر أمومة غير لما جربت
مو طبيعي جياشة هالمشاعر ، وأبوهم مثلي والله


فيه فيديو اعجبني بحكي فيه عن البنات وهيك وكلمات رائعة بس ما لقيتو
بس لقيت هاد

https://www.youtube.com/watch?v=MUncdszcd1g

​

 

[A S T E R]

ظواهر مقيتة منتشرة ،،

* أكل الحقوق بين الناس



من خلال نظرتي للمجتمع حالياً وما وصل إليه من سوء
فإنني أرى ظواهر وتصرفات منتشرة بين الناس يفعلونها تجاه بعضهم البعض متغافلين عن عظم العقاب المترتب عليها
فأنا هنا بصدد التحدث عن ظاهر انتشرت وبكثرة بين الناس هذه الأيام وسأبدأ بالحديث عن ظاهرة أكل الحقوق
سواء بين الأخوة والأخوات بعد وفاة الوالد
أو بين الزوج لزوجته أو الشركاء فيما بينهم
لا أدري كيف يفكر بعض البشر ؟!!
ألا يتدبرون ما في القران من ايات تحكي عن أن ظلم الناس عظيم عند الله
وأن الانسان إذا أذنب تجاه الله فإن الله يغفر له اذا استغفر ولكن ،، اذا ظلم أو أكل حق شخص فإن الله لن يغفر له إلا إذا الشخص الذي ظلمه سامحه!

أين عقولهم لا أدري
الذي استحضرني للكتابة ومشاركتكم هذا الكلام هو قصة ابنة عمي
تزوجت مدة سنتين وطول فترة زواجها وزوجها لم يسعدها !
لأنها أنجبت طفلين والطفلين معاقين نفس الإعاقة والإعاقة مميتة
مات لها الطفل الأول ، وحملت بعده مباشرة بسبب كلام أهل زوجها المقرف ، لا يوجد قلب أو رحمة
فحملت وأنجبت وأيضا نفس الإعاقة
المطلوب منه كزوج أن يقف معها وأن يهون عليها - خاصة وأنها تلد قيصرية -
وأن يقوما بالفحوصات اللازمة حتى يعرفا ما سبب تلك الإعاقة
ولكنه بدل من ذلك إهانات ولا اريد ان اخوض في التفاصيل
( باختصار بدو يهججها يعني يطفشها عشان تطلب الطلاق ويتزوج غيرها )

وبالفعل وهذا ما حصل ،، وحاليا قضيتها معلقة بالمحاكم وهو - الخايس - هههه نرجع لهالكلمة

وهي طبعا عند أهلها وابنها مع زوجها
طبعا لو أتكلم أكثر عن ماذا فعل بها زوجها لن أنتهي
ولكن يكفي أنه إلى الان لم يقدم لها حقوقها وحسب ما فهمت أنه لا يريد
فوالدها وكل لها محاميا يقوم بذلك حتى يرجع لها حقها

ولكن فعلا فعلا هذا الامر يحزنني ، لماذا لا يضع أخته بمثل هذا الموقف؟
هل يرضى لأخته أن يتم سلب حقوقها ويتم ظلمها؟
خصوصا أن ابنة عمي لم تكن سيئة معه ، فقط لأنها أنجبت له أطفالا معاقين !!

وكثيراً ما نسمع عن مثل هذه الأحداث وأكل حقوق بين الناس أفظع

وعلى سبيل المثال أيضا ، إحدى قريبات والدتي توفى زوجها ولم تنجب منه
فظلمها أبناؤه ولم يعطوها حقوقها كاملة !
لا أدري أين دينهم وأين عقولهم مثل هؤلاء البشر !

لا يعلمون عظم ما ينتظرهم عند الله سبحانه وتعالى فلقد قال سبحانه

﴿ وَلَا تَأْكُلُوا أَمْوَالَكُمْ بَيْنَكُمْ بِالْبَاطِلِ وَتُدْلُوا بِهَا إِلَى الْحُكَّامِ لِتَأْكُلُوا فَرِيقًا مِنْ أَمْوَالِ النَّاسِ بِالْإِثْمِ وَأَنْتُمْ تَعْلَمُونَ ﴾

ونحن في غنى عن التحدث عن الذين يأكلون أموال اليتامى !!

﴿ وَآتُوا الْيَتَامَى أَمْوَالَهُمْ وَلَا تَتَبَدَّلُوا الْخَبِيثَ بِالطَّيِّبِ وَلَا تَأْكُلُوا أَمْوَالَهُمْ إِلَى أَمْوَالِكُمْ إِنَّهُ كَانَ حُوبًا كَبِيرًا ﴾

حسبي الله ونعم الوكيل في كل ظالم يظلم النساء خصوصا لأنه يعلم بأنه لا حيلة لها



انعدام الحياء عند النساء والدياثة عند الرجال !

من أكثر الأمور الي برضو تدهشني وتخليني هيك أصفن صفنات طويلة ههه
انو بس اشوف سواء على النت وغيرو او عالواقع
انو فيه البعض من الرجال او الشباب ما فيه غيرة عندهم بالمرة
ياخي ليش هيك ؟!!
ايش فيه بهالدنيا؟!
يعني نفسي افهم او اعرف شو الهدف الجوهري من انك تطلب من مرتك او بنتك او أي حد من محارمك
انها لا تلبس لبس شرعي ..
انا ما كنت اصدق انو فيه زلام تطلب من نسائهم يعملو هيك غير لما اسمع من حد قريب مني

هداك اليوم وحدة بتقلي انو خطيبها السابق كان يطلب منها تشيل حواجبها وتعمل تاتو
وانها تحط ميك اب وتلبس لبس فياعة وهيك
طبعا ربنا ريحها منو وحاليا خاطبة على شب احسن
بس انو هيك بصفن من طلباتهم بعض الزلام من نسائهم
شو هي معرض وبدك تعرضها؟
الأجانب فيه عندهم شوية غيرة ..بس بنتو تكبر وتبلش تلبس قصير، فيه منهم ما بحبو ههه
احنا عنا ماشاالله عنهم الشاطر الي بيعرض مين مرتو احلى

بستغرب جد بستغرب كثير مو شوي
يعني هو فيه أمور مو بس من ناحية الدين غلط ،
وبرضو من ناحية العقل ،
يعني وقف ياخي استنى شوي واصفن بحالك
واحكي لحالك " هو انا شو بتهبل "

والحياء معدوم عند فئة كبيرة من البنات ، وفيه منهم ما بصدقو على هالعقليات للأسف الشديد
برضو لازم يكون فيه غيرة على نفسها الوحدة ..مو بس تستنى الشخص الي بحبها يغار عليها

والله جد يعني الامر صار مستفز صراحة وبالشوارع الزلمة طول بعرض وماشاالله عنه
ونساؤه للأسف اللبس فاضح جدا !!
دياثة عند الرجال وانعدام حياء عند النساء !!
لهالدرجة خلص الناس تخلت عن قيمها ومبادئها ودينها في سبيل الانفتاح الي وصلو زمننا اليوم؟!!!
شيء مؤسف والله

وبتمنى وبدعي من قلبي إنو الناس ترجع مثل قبل واحسن
بتفكيرها وعقليتها الصح الي تكون أساسها الدين بحيث ما يكون فيه هناك ظلم واكل حقوق
ولا أي مظهر من هاي المظاهر الي لا تليق فينا كمسلمين


دمتم بود يا غوالي ..ما عرفت اكمل حكي بالفصحى ،، قلبت عامية لأنو الشي مستفز ههههههه

​

 

[A S T E R]

من أكثر الشغلات الي بتزعلني كثير
هو انو وحدة من بناتي يمرضو
قبل شوي رحت أطل عليهم كانو نايمين
الكبيرة رواء ، هيك كنت رح أبوسها الا هي طلعت سااخنة بتغلى غلي يا قلبي عليها

جد انا يصير أي اشي في هالدنيا ولا وحدة فيهم تمرض
تتصوروش شو بشفقو بس يمرضو

حتى بس امرض انا واتعب ، ولأنو مرت علي فترة انام بالمشفى كمان
وأضل والله بس افكر فيهم واشفق عليهم لاني بعيدة عنهم
ما افكر بحالي او وجعي مع اني بكون ميتة
وهمي بكونو عادي واهلي واهل زوجي بديروا بالهم عليهم منيح
بس انو عقلي معهم وبحس بالذنب انو ليه امرض وابعد عنهم واقصر فيهم
بعرفش ليش هيك بفكر، بس جد هيك بفكر حتى وانا لما أكون مريضة
زوجي طبعا بعصب مني
وبحكيلي المهم تقومي سالمة البنات كويسات

فأنا بعمل هيك وانا مريضة وبشفق عليهم ، فما بالكم بس همي يمرضو
والله بخف عقلي
هيني قلقت كثير هسا ، اعطيتها خافض للحرارة ،
وانا هيك بعمل دايما واذا ما نزلت الحرارة بالليل بصبح باخدها على دكتور
والحمد لله بتتحسن ، وهو امر طبيعي مرض الأطفال
بس انا بعرفش ليش قلبي الصغير لا يتحمل بالمرة حبيبة قلبي الله يشفيها

​

 

[A S T E R]

تدوينة اليوم

تعيش هذه الحياة الدنيا ..
وتحاول أن تكون مسالما وصادقا ووفيا ومخلصا ...
وغيرها من الصفات الرائعة ..ومع من؟؟
مع أقرب الناس وأعزهم على قلبك
جميعنا في هذه الحياة لدينا أصدقاء وأقارب
نحبهم كثيرا ونحترمهم كثيرا ونثق بهم..
ونعطيهم كل الذي نستطيع أن نقدمه...
فحياتي ...حياتك...حياتها وحياة كل البشر ..
مليئة بالمفاجآت من قبل أعز الأشخاص على القلب ..
أو لنقل مليئة بالجراح والآلام منهم ..
سواء أكان ذلك قضاء من الله (موت أو ابتعاد بإجبار)
أو إن كان جرح منهم

فتسأل نفسك : لماذا يحدث هذا معي؟
ماذا فعلت لهم حتى يفعلو هذا بي؟
ما هذه القسوة؟
ماذا يوجد بداخل قلوبهم؟؟
أيعقل أن الخلل مني؟؟

تبقى هكذا تطرح على نفسك وابل من الاسئلة المحيرة ولكن...
دون إجابة...!!!

فأنت تتلقى الجرح من أقرب الناس على قلبك
يجرحك بإهانتك ..بسوء الظن بك...
بتقليل احترامك..
أو بأي طريقة كانت تحت يديه...

فتتألم وبشدة على هذه القسوة
لماذا برأيكم؟
لأنه وكأنك تلقيت ضربة على رأسك...
أحيانا تفقدك عقلك من الحيرة...
وأحيانا أخرى تجعلك تصحو من غفلتك ..
تصحو من تأثير مخدره القوي...
وتخرج بنتيجة أنك تحمد الله على كشف نفسه...

ولكن....ولا بد من أن يحصل معك أمر آخر ...
وهو أن تدمع عيناك ..
نعم...تبكي من شدة الألم الذي لحقك بسبب جرحه لك..
تبكي بمرارة وحسرة على الذي كان بينك وبينه..
تبكي وتتذكر أيامك الحلوة معه...
تتذكر طيبته معك وطيبتك معه..
تبكي بحرقة وأسى على نفسك ...أتدرون لماذا؟؟
لأنك أضعت أياما ووقتا على شخصا لا يستحقك ...
ولا يستحق مشاعرك...
هناك أناس يبقون على هذه الحال ويظلون يذرفون الدموع ...
وهناك آخرون يتوقفون ويقولون :
الحياة لن تقف عليه...
ولكن .... لا بد من الدموع...

فتدير ظهرك له ...وترمي ماضيك معه وراءك ...
وهنا تحين لحظة الفراق ...
تفارق أعز الناس على قلبك ...
تفارقه وقلبك يشدك إليه ولكن ...
عقلك يقول لك : اذهب ولا تنظر خلفك ...
تفارقه بكل سهولة ...!!!

فتأتي النهاية...نهاية لفترة جميلة في حياتك
النهاية مع أغلى الناس ..
تنجرح...فتتألم...فتذرف الدموع...فتفترق عن الذي تعلقت به ...فنهاية...!!

ولكن يا إخوتي غالبا ما تكون هذه النهاية بداية لشيء جديد..
بداية غد مشرق ..
بداية السعادة ورجوع البسمة إليك...
بداية كل شيء فقدته في تلك الفترة
ولكن وللأسف هناك بشر يظلون غارقين في ظلام الماضي..
ولا يستطيعون الخروج منه ..

ولكن يجب على الإنسان ان يخرج من هذا الظلام...
ويفتح صفحة جديدة ..
ويمزق الصفحات الماضية ويرميها
وينساها ..


بعض الكلمات التي راقت لي
لا تغرق في الماضي واجعله وقود المستقبل ...
للماضي فائدة كبرى حيث إنه التاريخ ...
ومنه تستلهم العبر والخبرات والتجارب...
ولكن ..هناك من يخطئ فيغرق فيه دون عبرة...
ينسى حاضره ومستقبله ...
والصواب : الماضي طريق المستقبل...
خصص وقتا للتفكير
حقا المتأملون وحدهم هم من يقرأ المستقبل
فيهتبلون الفرص ..المهم فكر وتأمل قبل أن تبدأ
وقف مع عملك وقفات مراجعة ..حينها فقط أنت ..
في الطريق الصحيح...


فما عليك عزيزي القارئ
إلا أن تكون قوياً في هذه الحياة في وجه الصعاب التي تواجهها
سواء صدمات عاطفية أو انكسارات في وظيفة
أو عمل أو مشروع أو دراسة
أو في أحد المقربين منك ،، مرض أو موت
كل هذه الصعاب عليك أن تواجهها بصدر رحب وبعزيمة قوية
ولا تدع اليأس يتسلل إلى داخلك من هذه الحياة القاسية
بل نفض الغبار عنك وقم وامضي في طريقك
فيما يرضي الله وتوكل عليه الحي الذي لا يموت
ولتستعن به دائما
وجاهد نفسك حتى لا تقع في الأخطاء حتى يوفقك الله
وإن لم يوفقك الله أو لم تتحقق اهدافك فهذه ليست النهاية
ما عليك إلا أن تبقى ثابتاً راسخاً مثل الجبال
صحيح أن للإنسان قدرات تحمل محدودة وأحياناً تصل إلى مرحلة لا تستطيع أن تتحمل
ولكن ابذل وسعك وأنت تعمل على نفسك من أجل ان تخرج من حالات الانكسار التي ممكن أو تواجهها
ورح أختم بعنوان مدونتي ، كن قوياً فالحياة تميت الضعيف قهراً ?


الي فوق خربشات قديمة لي ،
حبيت اكتبها وأضيف عليها ، الإضافة تبدأ من عند عزيزي القارئ

​

 

[A S T E R]

حابة أحكي عن شغلة وهي إني ياالله شو بحب محبة الناس لبعض

تعرفو انا مثلا بالنسبة الي بحب كل الناس من أي دولة
واجتماعية كثير
وأول ما سجلت بالتون القديم كثير كنت اتحمس بس اعرف ناس من بلدان ثانية
وجد احب هالشي ، وبحب أتعرف
طبعا حاليا خفيت مو مثل قبل
بس مو اني بطلت احب ..لا..بس لأنو فش وقت

الي ذكرني بهالشي ،
انو اليوم صديقتي الي تعرفت عليها بالعمرة سنة 2015
بعتتلي حكت معي اليوم
هي باكستانية ..وبنحكي بالانجليزي مع بعض ..ما بتفهم عربي

فبلشت أتذكر اول ما تعرفنا على بعض كنت ماشية بالحرم المدني
وهي ماشية جنبي
وانا احلى اشي فيي
أي حد اقعد جنبو ،،
او امشي جنبو أسألو انت من وين اذا هو عربي واذا لا احكي بالانجليزي
طبعا بنت عمي الي معي كانت فارطة ضحك علي اني بحب اتعرف على الناس
والله يا جماعة حلو،،
ما بضرب صحبة معهم بس انو بكون عندي فضول من أي بلد همي وبسأل كيف حالكم وكذا
ومعظم الي بحكيلهم اني من فلسطين..بس يعرفو اني من فلسطين
وكأني جاي من السما..او ابصر من وين جاي
ينفعلو كثير يا جماعة وينبسطوا طبعا هههه كثير بنبسطو
فهاد الموضوع الي تذكرتو
ياالله على كمية المحبة الي حسيتها وانا هناك من أي حدا
حتى فيه أصحاب محلات بس نمر مرور من قدامهم يعرفو انو احنا من فلسطين ويصيروا يحيو فينا ويحكو هلا والله بأهل فلسطين ومن هالحكي

وهاد صاحبتي الباكستانية لو أوصفلكم كمية الحب والانفعال بس عرفت اني من فلسطين
وما خلصت حكي انها بتدعيلنا وانو أمها دايما تدعيلنا وانهم بحبونا كثير
ومن هالحكي
وسألت اذا منقدر نضل عتواصل واعطينا لبعض ايميلاتنا ،، وحكينا شوي وافترقنا
ومن يومها كل فترة وفترة انا ببعتلها او هي تبعتلي فيس او واتس ومنحكي
تتصوروش شو هي انسانة بسيطة جدا وبحبها كثير والله
الله يحميها ويحفظها

هاد غير برضو باقي الناس اشي من تركيا
اشي من مصر او الأردن ..واهل السعودية
اه ومن الجزائر ...ياالله شو اهل الجزائر بحبو اهل فلسطين ههه جد وهالشي ملموس
عمري ما عرفت حدا من الجزائر هون بالتون سواء القديم او الجديد
بس جد كمان همي مو طبيعي محبتهم
وكل البلاد والله نفس الشي
وانا بالنسبة الي برضو نفس الشي..
بس اعرف الشخص الي قدامي من أي بلد..شو ما كانت البلد بنبسط ومن قلبي
بعرفش يمكن هاد حماس زيادة هههههههه
بس انا هيك انسانة اجتماعية جدا وبحب الناس كلها ق9ق8

​

 

[A S T E R]

رح حط كم عبارة راقوا لي عن التغيير
ونعلق عليهم واذا بتحبو تحكو ارائكم بالتعليقات

* ابدأ التغيير الإيجابي من داخلك، ثم اجعله كدائرة تتسع مع الوقت لتشمل جميع من حولك

* التغيير، مثل الشفاء، يستغرق وقتاً.

* أكثر الناس ينتظرون شيئاً ما ليتغيروا،
وآخرون يتغيرون عندما تحدث لهم صدمة، أو تتغير أدوارهم في الحياة،
لكن أعظم التغير هو التغير المقصود الواعي النابع من التأمل و الإرادة و الشعور بالمسؤولية.


وكثير من العبارات الي بتحث على تغيير النفس ، خصوصا طريقة التفكير
بتعرفو شغلة؟
أنا أكره جملة عليي اسمعها هي انت متغيرة !
انو ليش بحكوها لبعض الناس؟
عمري ما حكيتها لحدا
مهو بالفعل وحقيقة طبيييييعي جدا الواحد يتغير سنة عن سنة
بشخصيتو بعقليتو بفكرو ..وبكل شي
وما حد يقول انو شي مو طبيعي ، لا طبيعي وكثير

وفيه كمان شغلة تستفزني كثير ومنشورات بايخة كمان عن هالشي
انو انتقاد للبنات بس يتغيرن مع صاحباتهن بعد الزواج
او انتقاد للشباب بس يتغير مع صحابو بعد الزواج !!
انو ليش يعني ؟!! ياخي شو هالبياخة عند بعض الناس ؟
ليش الواحد فيهم بفكر انو الانسان تغير لأنو شايف حالو؟
أو انو بطلو يكونو من مستواه ؟
شو سوء هالظن بين الناس؟!!
أنا بعرف ممكن يكون هاد الشي في بعض نفوس الناس الي تتزوج وتتغير
بس انو هو حقيقة عادي وطبيعي جداً الواحد يتغير بعد ما يتزوج
مش كرهاً في الي حواليه ولا شي ولا تكبر ولا تعالي
خلص عنجد الواحد بتغير تفكيرو وعقليتو سنة عن سنة سواء تزوج او ما تزوج
وبس يتزوج التغيير وارد بشكل أكبر
لأنو هو اختار هاد الطريق ولازم يتغير
بما يتناسب مع الطريق الي هو اختاره وهو بناء اسرة وتربية أطفال
فلازم يكون فيه استقرار ووعي واطلاع على كيفية التعامل مع اهل بيتي
لحتى الله يوفقني،، فالاهتمامات تتغير والعقلية تتغير
والمسؤولية تكبر والعقل مشغول اكثر كمان

فإنه ليش الناس لا بتراعي هاد الشي ولا بتقدر؟
انا بالنسبة الي ما تغيرت هالتغير الكبير ،
بس ما بنكر انها اختلفت عقليتي واهتماماتي كثير ،
والي حولي عادي ما بحكولي متغيرة
وانا بحكيش لحد هاد الجملة
خلص كل واحد بحالو وبحياتو ،
لأنو الحمد لله كل الناس الي حواليي ناس فهمانة جدا وواعية
بس انا بحكي عن هاد الموضوع لأنو موجود بين الشباب والصبايا

الاختلاف والتغير في الشخصية مش سيء ومش غلط
بالعكس لازم نغير من أنفسنا تغيير إيجابي طبعاً
ومش عشان إرضاء للناس ، لا طبعاً
خلص هو الواحد بتغير لحالو بدون ما يحس أصلاً ..أنا هيك حاسة حالي
مع انو اهلي بحكولي انت ما تغيرتي ولا رح تتغيري ..مجنونة رح تضلك
بحكيلهم أكيد ما رح تلمسو التغيير لأني مستحيل أتغير قدامكم ههههه

بس لا شيلونا من الشخصية بشكل عام وكذا ،
يعني مستحيل أبطل أمزح وأتهبل واضحك وهيك معهم
قصدي عن طريقة التفكير والاهتمامات والشخصية من جوا اكثر

مثلا كنت زمان أهتم كثييير للمسلسلات والأفلام والاغاني
ومتابعة اول بأول
اليوم بطلت ?
كل ووين ووين تااشوف فيلم او مسلسل او اسمع أغاني
كنت اهتم للكتابة واحبها
اليوم بطلت برضو ههههههه بس لا الكتابة عشقي ورح ضل اهتم فيها
بس إنو سبب انقطاعي عن الكتابة عقلي المشغول
جد بدها صفاء ذهن
وقررت ارجع وأقضي وقت أطول بالمنتدى لأجل هاي الشغلة

كنت أحب أحكي كثير مع الناس، اليوم بطلت
شفت انو الحكي القليل بكون أحسن ? طبعا قصدي مع الناس إلي بالواقع
بحكي اذا بدي احكي شي مفيد او أنصح اذا الي قبالي غلط
غير هيك مو كثير
بحاول اخفف ههههه لأني أنا كثيرة الكلام
أما برضو بالمنتدى غير ، بحب احكي مع الناس هون كثير هههه
مش هروب من الواقع .. لا ?
خلص هيك لأني بحب المنتدى

يعني أنا بالنسبة الي هون بالمنتدى شوية غير عن الواقع
مش اني متقمصة شخصية ثانية
بس اني بختلف شوية عن شخصيتي بالواقع
بحب أبين كل شي حلو مني هون
وكثير شغلات تغيرت فيي وطريقة تفكيري تجاه الأمور اختلفت


انتو شو رايكم في التغيير ؟
وكل حد فيكم يحكي عن حالو في ايش تغير
وهل كان التغيير سلبي ولا إيجابي ؟
وهل بتشتغل على حالك لحتى تتغير أكثر ؟

 

[A S T E R]

ذكريات ..



يسعد مساكم وكل أوقاتكم يا غوالي

كيف الحال؟
كيف اليوم مر معكم؟

حبيت أصير أحط كل فترة جزء من ذكرياتي
سواء وأنا طفلة ، او وانا أكبر شوي

اليوم شو تذكرت
تذكرت حالي وانا صغيرة كثييير ،
انا طبعا مو متذكرة امي واختي واخوي حكولي،، بس تذكرت القصة ههههه

كنت قاعدة برا اليوم العصر على باب بيتي ، مهو ما بطل على الشارع
والبنات بلعبو
الا انا شفت فراشة قريبة مني ، وهيك قرفت منها وبعدتها عني
ومتت ضحك بعدها عحالي

كيف كنت أخاف من الفراشات
وقتها أمي قالت لأخوي الكبير يروح يشتريلي أنا وأختي الي أكبر مني شباشب أو حفايات ..
ما بعرف شو بتسموهم عندكم هههههههه حذاء باختصار
الا هو جايبهن عليهن فراشات
انو يعني لأنو احنا بنات وألوانهم حلوة
أنا شو عملت ..عملت مناحة وانجنيت بدييييش ألبس الحفاية
ليش ..لأني خايفة من ( الوراشة ) بحكي عن الفراشة وراشة
وامي كل ما تشوف فراشة لحد هسا
بتحكي عنها وراشة ..انو تتمسخر علي وتقلدني كيف كنت احكي
(بديييس ألبسها عليها وراشة )
وأختي تمسكني ..مجنونة انت وعاهة من يومك
واخوي ينط يقولي تسببتيلي بقتلة من تحت راسك ههههههههههه
بحكيلو ليش
قلي لأنها امي عصبت منك وراحت بهدلتني وضربتني ليش اجيبها عليها وراشة على قولتك هههههههههه

ولكم يا جماعة الخير لهسا بعايروني بهالموقف وبس تيجي سيرة الفراشات يحكي عنها وراشة
ويصيرو يقلدو فيي وانا صغيرة
انا من بعيد محششة على حالي ..انا مو متذكرة شي كنت صغيرة كثير

فأنا ما بعرف ليش لحد هسا عنجد بحبش الفراشات هههه بكرههم
وبحبش ييجو علي
اختي بتحكي عني معاقة

وانتو شو رايكم معاقة ولا شو ههههههههه

​

 

[A S T E R]

مساءا الأنواااار

شلونكم

بدي أحكي عن فيلم
Annabelle Comes Home 2019

@SKY NET @RELENA
الليلة الي فاتت قررت أشوفو بس عشانك يا ريلو لأشوف اذا هو جد بخوف ولا لا
يا بنت الحلال وين الي بخوف بالموضوع؟
والله ما خلصت تثاؤب وانا أتفرج
عجبتني الموسيقى التصويرية ههههههههه

عفكرة انا طلعت شايفة منو يا الجزء الأول يا الجزء الثاني..ناسية بالزبط
وهاي شفت الثالث ..ما بحبو ..مش حلوة كل القصة أصلا ههههههه
وبليش انو هو ابطالو تبعون الشعوذة ..عائلة وارن المجنونة..
والشعوذة شايفة جزأين يمكن

مش عارفة ليش بكيفو على هالافلام الأجانب وبتنجح كثير اول ما تنزل
وشكلهم مصدقين قصتهم هدول التنين هههه
أكيد السبب لأنو احنا مسلمين وعنا قران وهمي بحبو يتخيلو هاي التخيلات عن الأموات والاشباح والشياطين ..الخ
ويصوروها بأفلامهم ..لأنهم ما عندهم الفكرة الصح
فبتنشهر وبتنجح هاي الأفلام لأنو بتحس انو بصدقوها الناس عندهم عنجد لهيك فيه توجه عليها
هيك بحس ..هيك رأيي

بس بشكل عام انا بالنسبة الي بحبهمش هاي النوعية من الأفلام.
وما تستهويني بالمرة وما بستمتع بس بكملها للاخر .
مو عشان اشي
انداري مش قصة الصراحة..هو صحيح كل الأفلام خيالية
بس خيال عن خيال بفرق ..ورعب عن رعب بفرق هههه
فيه رعب جد حلو ...وفيه بتحس انو فيه قصة ..وجد بخوف ..

وبعدين طريقة أداء الممثلين تلعب دور
انا شفت أفلام رعب كثييييييييييرة خصوصا وانا بنت قبل زواجي ..
حتى امي كانت تنجلط بس تشوفني اشوفها وتقعد تحكيلي انو انت نفسيتك فيها اشي وفيك خلل
لانك تتحملي تشوفي هاد الرعب وهالخوف وهالمناظر المقرفة طبعا ريلو رح تكيف على حكي امي هههههه
بحكيلها والله عادي تمثيل يما هههههههه

انا كنت احبها أفلام الرعب واستمتع بس بعدين لا بطلت ..
كل وين ووين لاشوف رعب وازهق وانا اتفرج

بس مثلا أفلام الاثارة النفسية..اه هاي أفلام تنشاف يا اخي ههههه
جد الواحد يخاف هههههه

مثل الفيلم الرائع انفصام للرائع مكافوي وفيه الو كمان جزأين ..الجزء الجديد ما شفتو لسا
اذا مش شايفينهم ..شوفوهم
حبيتو كثير هالفيلم..والممثل هاد أدائه رائع كان فيه ..بس انت ريلينا اوعي تشوفيه

اما هاد الشعوذة وانابيل ..
لا أداء ممثلين حلو ولا قصة ومش عارفة حاسة انو فيه اشي غلط وانا اتفرج ومش عارفة شو هو هههههه
لاني مش ناقدة ما عندي خبرة ..
بس بميز الاشي الحلو والي ينشاف من الاشي يلي مو زابط بالمرة ههههههه


احلى اشي أفلام الاكشن او الدراما او الكوميديا بعشقو ..
برضو مش لأي حدا بشوف كوميدي
واه رومنسي بشوف بس برضو مو كثير ..بس فيه كثير حلوين
مستحضرني فيلم حبيتو كثير .. Me Befor You
حبيتو كثير هالفيلم ..اكثر من رائع
وفيه برضو غيرو رومانس حلو ..
بس هاد الي جاي ببالي لاني مو زمان شفتو للمرة الثانية ههههه

وانتو يا ناس شو بتفضلو تشوفو أي نوع من الأفلام؟
وفيلم مفضل عندكم؟
وهاتو فيلم حلو كثير جاي عبالي اشوف فيلم الليلة

وسؤال..مالكم بتحكوش ولا بتعلقو بالتعليقات
ههههههه بتعب وانا اكتب على امل تعلقو ونحكي وانتو فش ولا حدا بعلق هههههههه
نايمين
مع انو فكرة المجتمع كثير عجبتني يا احمد وريلو ..
وشغلة التعليقات بين المدونين وكذا كثير حلوة
بس هو ما فيه حدا متفاعل مع هالفكرة الحلوة

يلا دمتم بود يا غوالي

​

 

[A S T E R]

الله يسامحك يا @S T E L L A
من يوم مرة واحنا بالاستراحة وقلتي انك بتسمعي اغنية
the climb
فتحت عليها وذكرتني بكلللل الأغاني القديييمة الي كنت اسمعها زمان هههههههه
والمشكلة بس افتح وحدة تجيني الي كنت احبها زمان
مش عارفة هو اليوتيوب بعرف ذوقي؟
خصوصي انو كلهم كنت اسمعهم زمااااان قبل ما اتزوج

جد مووو طبيعي كنت اسمع أغاني زمان ..عربي اجنبي ..حتى عبري
وكنت اتابع اول بأول
ودايما دايما اسمع
هههههههههه وانا عمري 19 و 20 ..هدول السنتين اكثر شي
ادمان أغاني كنت هههههههه
وبس خطبت ما بعرف مني لحالي بطلت اسمع اشي..تصدقو؟
مع انو الواحد بس يرتبط بصير يسمع أغاني اكثر
انو حب وغرام وهيك قال يعني خ22خ22
بس انا عكس البشر ههههههههه
والله بطلت ..ما بعرف ليش
وضليت هيك سنين ..هيني طول ما انا متزوجة ..خمس سنين بسمعش أغاني وبتابعش وبهتمش
بسمع....بس انو مو مثل زمان ..ومش بهالتركيز
ومبسوطة عحالي اني بطلت الحمد لله ..نخفف ذنوب

صرلي فترة من كم شهر رجعت اسمع ههه
ومن كم يوم لما ستيلا حكت عن هاي الاغنية وفتحتها وبلشت أتذكر في الأغاني الي كنت اعشقها هههههه
هيني فاتحة وبعيد وبزيد فيهم ما احلاهم ​

https://www.youtube.com/watch?v=Xn676-fLq7I

هاي الاغنية كاننت عششششقي ...وكنت اعيد وازيد فيها ،
وهيني حاليا صرلي ساعة بعيد فيها واتفرج عالفيديو وعبالي ارقص معهم
بحبها هالمغنية بجننو اغانيها..صوتها فخامة

وهدول الاغنيتين كنت احبهم ​

https://www.youtube.com/watch?v=f0T3WAbU6tg


https://www.youtube.com/watch?v=Ra-Om7UMSJc

حتى Already Gone من كثر ما بحبها ..كتبت موضوع في التون القديم عنوانو نفس اسم الاغنية هههه
كنت مكتئبة وقت ما كتبت الموضوع

وهاي العشق ​

https://www.youtube.com/watch?v=HEValZuFYRU

وهاد كمان كنت احبهاا​

https://www.youtube.com/watch?v=eZku7yyALbc

وهاي كمان كنت كثير احبها ​

https://www.youtube.com/watch?v=ccFAdmLv9dg

حتى الصراحة ذكرتني هاي الاغنية في بنت كنت صحبة معها وتقاتلنا انا وياها وبطلنا نحكي مع بعض لحد هسا ..
وهي اول من حكالي عن هاي الاغنية ..فلما سمعتها تذكرتها هههه
الصراحة حاسة بالذنب انو تقاتلنا
مع انو بداية الغلط كانت منها اقسم بالله ..
بس انا قسيت عليها
( تذكرت كلامك عن حالك يا احمد @SKY NET عن حالك انك مرات تنفجر بوجه الأشخاص وهيك، وانا فيي هالصفة بس مو تجاه الكل ، هي كنت احبها وانفجرت فيها يومها )
وهي طبعا زعلت وخلص بطلنا نحكي ههههه
بس هي مش انها كانت بيست فريند
كانت احدى الصديقات ..وخلص الله يوفقها ..بالاردن هي ،
وفيه قرابة بيننا ..المصيبة خطبت على ابن عمتي
مش عارفة كيف رح ارجع اقابلها او احكي معها بس تيجي هون تخطب رسمي وتتزوج ههههههههه
لو انحطيتو بهيك موقف شو بتعملو ؟ هههه
وهاي عمتي قريبة العلاقة معها ولازم طبعا اروح فش مجال للتهرب هههههه
انا عادي مو كرهانتها ..بالبداية كرهتها ومو طايقتها بس بعدين عادي
جد مثل ما قلتلكم الواحد بس يكبر وسنة عن سنة بختلف عقلو
وبضل يصفن بحالو وبالمواقف الي عملها..انو ليه انا هيك كنت اعمل؟


وهاي يا جماعة رائعة..بحب الأصوات القوية مثل صوتها سيلين ، كل اغانيها بتجنن​

https://www.youtube.com/watch?v=QV_ckC4LGj4

وهاد كمان صوتها روعة​

https://www.youtube.com/watch?v=zochPeuCI5Q

بتوقع كل الأغاني الي حطيتهم تعرفوهن ههه قديمات بس روائع
انا ما بتطلع قديم وجديد ..لانو في أغاني ما بروح جمالهن وجمال سماعهن ق8

مثل برضو أغاني وصوت Adele ​

https://www.youtube.com/watch?v=rYEDA3JcQqw

هاي الاغنية كنت اعيدها باليوم عشر مرات ههههههه وفيه لبرونو مارس كنت اسمعلو كثيييييير
ولفرقة ويست لايف كنت احبها كثير، ولكثير فرق كنت اسمع
الله وكيلكم ما كنت ملحقة، هيني وانا اكتب شوي شوي اتذكر، هههه

ومليااااااان ..ما بلحق احط كل اشي
بتذكر حالي ..مو طبيعي كنت اسمع هههه


بس لا خلص رح ارجع اخفف ههههه هسا رح اسمع فترة وارجع انقطع
بس لأني تذكرتهم والي ذكريات مع هالاغاني اشي حلو واشي مش حلو


أي اغنية حبيتوها اكثر اشي من الي حطيتهم هههه

ياالله شو حكيت ..بس لأني فاضية اليوم وبسمع وبكتبلكم
سلامات

​

 

[A S T E R]

السلام عليكم

كيفكم؟

امبارح كنت طالعة مشوار مع امي وأختي
فصار موقف قدامي انو فيه بنت ..صبية مو بنت صغيرة
خافت من بسة - يعني قطة -

هو ليش البنات بخافو من البسس ؟ هههههههههههه
يعني عنجد مالكم عليهن
أكيد فيه منكم يلي تقرأو بتكرهو البسس

والله يا بنات حلوين البسس ..بجننو وكيوت وصوتهم بشفق بس يماوو هههههههههههههه
وبعدين وهمي صغار وامهم ترضعهم ي ويلي عالزكاوة

عفكرة انا جد بحكي مو كذب
انا بحبهم..بس انو ما بحب ألمسهم بسبب انو البسس الي بشوفهم بسس شوارع وعشان جراثيم وكذا
بس لو تنحط بسة نظيفة وبيتية قدامي
عادي بلمسها..ما بحضنها بس انو بحسس عليها هههه

انا بالبداية كنت مفكرة انو البنات الي حواليي بتهبلو بس يخافو من البسس لما نروح على ارض
ينجنننننو رسمي..سواء بنات عمامي او بنات خوالي
او فيه من صاحباتي
يعني بس نكون بقعدة ويجو بسس عندنا ..خصوصا واحنا في ارض
ينجنننو ..كنت افكر بتخوثو..وانو دلع
بس طلع لا
طلعت ظاهرة منتشرة بين كل البنات تقريبا
الحلو بالموضوع كلو انو انا بكون بالنسبة الهم زي منقذتهم البطلة..
اسماااء ابعديها عنا
يطلعن على كراسي ويرفعن رجليهن
أسماء ابعديها عنا هههههههههه
مشطوبات رسمي..وانا ما اخلص ضحك وتخويث عليهن

حتى من بعيد بتحملوش تكون موجودة ..لازم ابعدها كثير ههههههه
وانا اقعد ابسبسلها..مش عارفة شو بتهيألي وانا ابسبسلها ههههه
بحسها والله بتصفن فيي وبتقلي شو بتتهبلي انت وبتذكر افلام الانميشين الي فيها حيوانات بتحكي

فيعني جد الأمر مضحك بالنسبة الي هههه
مع اني ما بحب اقتني اي نوع من الحيوانات
بس اني الحيوانات بشكل عام بحبها..وبقرب عليها وبلمسها ما عندي مشكلة
مرة قربت على حصان وحسست عليه..استغربت انو خلاني احسس عليه
ومرة حاولت مع الغنم بس هني بهربن هههههه

ومرة احزروا شو لمست ...كنت بالمشتل ( بيت بلاستيكي للزرع)
مهو الوالد عندو مشاتل وبنروح مرات هناك نطش..بكون فيه قعدة برا بيت الحماموت ..
فالمهم اخوي كان بيشتغل فرحت عندو..
الا هو بحكيلي تعالي شوفي شو لقيت ..
بحكيلو شو لقيت
قلي لقيت ضفدع..وكان ماااسكو
بحكيلو ياالله القررف ..ولك مقزز الضفدع
الا هو صار يقنع فيي ولك لا مش مقرف بالعكس ملمسو شلبي (شلبي يعني حلو هههه )
بحكيلو من وينلو الحلاوة
حكالي تعالي جربي المسيه
واقنعني وانا لمستو شوي هههههههه ..
وعنجد طلع ملمسو عادي وحلو
ما حملتو..بس هيك حسست عليه في اصابعي هههههه
حاسة انو فيه بنات رح يحكو عني مقرفة هههههههه
بس والله جد عادي
طبعا هالحكي زمااان..قبل ما اتزوج

فالمهم..الحيوانات بالعكس مخلوقات لطيفة جدددا وانا بحبها..وبتمنى اني اكون هيك بمنطقة مفتوحة برفقة مرشد طبعا واشوف الحيوانات

وانتو شو رايكم ..بتحبو الحيوانات ولا لا ؟
مو شرط تربوهن..بس انو تحبوهن ولا لا

​