فخر المدونين كن قوياً ،، فالحياة تميت الضعيف قهراً (1 زائر)

[A S T E R]

عادة مجتمعية




هسا بدي أنتقل لموضوع اخر أحكيه معكم وبنشوف شو رأيكم فيه كمان

بالبداية بدي أشرحلكم عن هاي العادة المجتمعية الي عنا - يلي أنا شخصيا بكرهها -
ما بعرف كيف باقي الناس..
ببلدنا بشوفوها عادي بس بتوقع انتو يمكن تستغربو

هاد يا جماعة الخير ،،
عندنا النسوان لما الوحدة بدها تدور (يعني تبحث ) على عروس لابنها المصون
بتروح بتحمل حالها على بيوت الناس ..بدون اذن مسبق أو أخذ موعد
وبدون ما تكون تعرف العائلة معرفة مسبقة
عادي بفوتو على بيوت ناس ما يعرفوهم وبأي وقت !!
يعني بروحو وقت الصبح او وقت الظهر والله فيه عملوها
وفيه وقت اذان المغرب بالزبط
بتقصدو يروحو في احرج الاوقات
تعرفو ليش؟
قاااال شو عشان يشوفو اذا أهل هالبيت على استعداد في أي وقت يستقبلو ناس وانو كيف رح يكون بيتهم بس يطبو عليهم فجأة
وانو كيف تكون هيأة البنت او أمها ..الخ من الأمور السخيييييفة

ويلي انا بشوفها انو غلط كبير الناس تعملها وعيب ويمكن بدخل فيها حرام
لأنو ربنا قال في الايات انو الواحد يتجنب الأوقات الي الانسان يرتاح فيها
وهاي هي الاية

" مِنْ قَبْلِ صَلاةِ الْفَجْرِ وَحِينَ تَضَعُونَ ثِيَابَكُمْ مِنَ الظَّهِيرَةِ وَمِنْ بَعْدِ صَلاةِ الْعِشَاءِ ثَلاثُ عَوْرَاتٍ لَكُمْ لَيْسَ عَلَيْكُمْ وَلا عَلَيْهِمْ جُنَاحٌ بَعْدَهُنَّ طَوَّافُونَ عَلَيْكُمْ بَعْضُكُمْ عَلَى بَعْضٍ "[النور:58].

ومعنى الاية انو الناس في هاي الأوقات قد يكون لابس لبس كاشف لعورته لانها كلها أوقات نوم
فيعني انتو يا هالنسوان يلي بتروحو على بيوت الناس بهالاوقات شو بتفكروا بالزبط ؟!!
يعني ماشاالله عنكم انتو 24 ساعة مرتبات انتو واولادكم وبيوتكم وبدكم تجيبو كناين هيك ؟
شو يعني كاينين احنا الات..ولا روبوتات ؟!

ما أسخفكم والله
لا والي بجلط أخرى ..بيجو على البيت وبقولو بدنا نشوف بنتكم
وما بتعرّف عن نفسها..
يعني ما بتيجي بتفوت وبتقول ( انا فلانة مرت فلان وبدي ازوج ابني وجاي اشوف بنتكم ..الخ )

لا لا ..ما بيحكو هيك ..أخرى بدهم يفوتو بيوت الناس وما بدهم يحكو مين همي؟
طيب هاد ادب؟
هاد ذوق؟

الله وكيلكم الوحدة فيهن بدها تطوف على بيوت الناس وتتفرج على بنات وما تحكي عن حالها شي
شو يعني قايلينلك انو بنات الناس بضاعة في محل وجاي تتفرجي عليهن على الساكت وتروحي؟!!
هاد بمحل اواعي او أي محل بزبط تعملي هيك
بس انتي للأسف مو بمحل ..انت داخلى بيت ناس محترمين فبتتصرفي باحترام !

طبعا هي هالعادة لساتها موجودة للأسف
بس أخف من قبل
كانت قبل منتشرة اكثر

احنا زوجنا اخوتي .بس كانت امي عارفة على مين رايحة
وتتصل وتاخد موعد وتحكي سبب جيتها

اما مو هيك..بهالاسلوب الأهبل انا بشوفو ..وفيها وقاحة كمان صح اخوي كاربون ؟


هسا رح تحكولي مالك معصبة وشادة على حالك هههه لا مو معصبة كثير
بس هيك حابة احكي معكم وفضفضلكم
ولأنو يوم الجمعة صار موقف في بيت اهلي

عندي اخت صبية 20 سنة
كانت عندنا اختي المتزوجة ووالدة جديد وكانو يجو قرايبنا عند اهلي يباركولها لانها هي ساكنة ببلد ثانية

اجو ناس قريب المغرب..ركزو ..قريب المغرب ههههه
غريبين وبدون موعد

وكانو يحكو مع منار وهما واقفين ع الدرج وسامعين انو عندنا قرايبنا
انا رحت اشوف
الا هي صارت تحكيلي المرا خلص بدنا نروح شكلو عندكم ناس
قلتلها اه عندنا ناس
اذا بتحبي تفضلي ..
الا هي قالت لا احنا بس كنا جايين نشوف اختك ،، ناس دلونا عندكم بنت
الا انا سألتها بس انتو مين يا خالتو
صارت تقولي شو بدك احنا مين ؟!
صارت تقولي هاد هي اختك المستورة..؟
قلتلها اه هي
قالت خلص ماشي وكانت رح تروح
رجعت سألتها مهو انا حابة اعرف انتو مين ..ردت جاوبتني خلص شو بدك احنا مين
وسألتني انتو يعني بتجوزو ؟
صفنت فيها وانا مبتسمة ابتسامة صفرا
وبحكيلها والله مش انا ولا هي الي بنقرر..
بابا الي بقرر وفيه عدة أمور الواحد بدو يوقف عليها بالنسبة لبابا
انتو دار مين ؟
وكانت بدهاش تحكي..قلتلها - وانا برضو متضايقة -
احنا ما بنحب ما نعرف مين ييجي علينا وبفوت على بيتنا!

الا هي قالتلي احنا دار فلان فلان..
واجت بعدها وحدة من قريباتي بدها تروح..صارت توصف فيي مين هاي المرا

وقالتلها تفضلي..وهي تقول لقريبتي لا ما بدي افوت عندكم موسم
المهم بالاخير فااتت
وقعدت مع امي وحكت معها شوي ..وراحت بحال سبيلها

بس انو شوفو عليها..!!
بدهاش تقول مين همي حتى بعد ما سألتها
جلطتني

المهم بس روحت حكيت لخواتي وامي عن هاد الحوار وامي حكت لبابا ومعاذ - اخوي الكبير-
ماتو ضحك علي وانبسطو كثير بنفس الوقت وصار يحكي معاذ - طبعا تعليمي -
هاد البني ادم أي شي صح نعملو انا او أي حد من اخوتي بصير يقول..مني متعلمين ههههههه

وبابا انبسط اني ضليت وراها لعرفت مين هي
صار يقول عني .. - وصفية الثانية - هههههههه وصفية هي أمه الله يرحمها ..
كانت شخصيتها قوية وبحكي عني مثلها

لأنو بابا اكره شي عليه ناس تيجي عندو تشوف بنتو وما يعرف مين همي

بعصب..وبصير يقول لأمي الناس الي ما بعرفوك على حالهم..لا تفرجيهم منار!!
همي مش عارفين على مين جايين؟

ههههه طبعا بابا بهتم مين الي بفوت بيتو حتى لو مو جاي يطلب
بس مجرد يشوف
ما بحب أي حدا او مين ما كان

هسا ممكن تقولو فيها شوفة حال..بس لا..عنجد انا معاه
يعني هسا قيسوها على نفسكم بس يجيكم عريس لبناتكم او الكم انتو
اكيد بتصيرو تسالو عنو واذا عيلتو كويسين وبيئتو كويسة..الخ من الامور
ونفس الشي بس الواحد بدو يختار زوجة..بسأل عنها وعن أهلها قبل الارتباط فيها


لانو صار موقف برضو وانا عند اهلي واجو ناس
وامي الي قعدت معهم
انا ما شفتهم
وماما قالت لبابا عنهم بس ما كانت عارفة معلومات عنهم ومش سائلتهم
صار يعاتب فيها ..انو ليش بتسأليش؟
وليش هي المرا ما بتعرفك عحالها؟

قلتله يا بابا لو قعدت معهن انا كان سألتلك بس امي بترضاش اقعد وهي موجودة ههههههه

الا هو صار يقولي ثاني دور انت بتقعدي وبتسألي يابا

وعفكرة برضو قبل شي سنتين قعدت مع نسوان عند اهلي..امي كانت طالعة
برضو بالموت لعرفت مين همي
بس ضليت اسألهم ..وهي حضرة جنابها بدهاش تحكي قال

جد انا اشعر بالاستفزاز من هالفئة من النسوان

جد بحسسوك جايين يتفرجو على بضاعة ويروحو


انا بتمنى من كل قلبي تختفي هالعادة
وانو خلص الوحدة تتصل وتاخد موعد..انا مش ضد انها تروح على عائلات غريبة
بس انو تدبر الرقم وتاخد موعد وبس تروح على بيت الناس تحكي عن حالها وعن عيلتها
مش تحسسك وكأنك عملتي جريمة بس تسأليها مين انت

لانه الموقف الي صار يوم الجمعة..
المرا وبنتها امتعضوا مني ومن سؤالي


بعرف طولت وأنا احكي ..يمكن قسم منكم مل مني
بس مش مشكلة فداي
انتو شو رايكم بالموضوع كلو ؟

 

[A S T E R]

ارضَ بقضاء الله




ليش الناس بس تتلقى خبر ،، المعظم المعظم ما بتقبلو الخبر؟
وببلشو ،، انو ليش ؟ وليش؟

يا اخي كيف تسأل هالسؤال ؟
ما بتعرف انه حرام تقول حتى كلمة ليش لما تتلقى خبر سيء - بالنسبة الك -

لانه كثير مرات بكون الامر عادي جدا وما يستاهل الاعتراض

الي استحضرني اني اكتب هالتدوينة

انو قبل كم يوم ، وحدة من قريباتي بس قالت لزوجها خبر إنها حامل
تعرفو شو عمل زوجها ؟

أول شي انصدم .. زي وكأنو امر غريب
وعصّب وزعل
وصار يحكيلها انو احنا متفقين ما بدنا نجيب حالياً ، وانو بس يكبرو الأولاد
-همي عندهم طفلين ولساتهم صغار -

بس خلص صار الي صار وحملت
شو تعمل يعني يا أفندي يا زوجها

هي طبعا بس عرفت انها حامل عادي انبسطت وما زعلت وقالت الحمد لله
صح كانو مخططين يأجلو لحتى يكبرو أولادهم ..بس خلص حملت
وهي ما اعترضت على قضاء ربنا وعلى عطيتو إلها

أما هو حضرة جنابو اعترض وزعل وأخذها مشوار
وما كانت عارفة وين ماخذها
طلع ماخدها على دكتور نسائي ..ليش ؟
صار يقول للدكتور بدنا تخليها تنزل الجنين

انا انصدمت من عملتو هاي
وهي مرتو حكتلو مالك انجنيت أنا ما بدي انزل

وحرام الواحد ينزل حتى لو صغير الجنين
ورجعو عالبيت وهي تحكيلو مالك شو صار لعقلك حرام قتل الجنين

وهو يحكيلها...ومين حكالك؟ امبلا بجوز!
- لا وبفتي من عقله الاخ -

يعني من هالموقف انا انصدمت
هو بعدها راق وعادي ورجع لعقله

بس أنه شوفو كيف البداية
يعني مش خبر موت لا سمح الله ولا خبر فقد أموال
لشو الاعتراض على قضاء ربنا؟!!!

بيعترض على رزقة أجتو من ربنا

بالفعل لأنه الاطفال رزق من رب العالمين

لازم الواحد فيهم يسأل حاله هل انا بفرح لو اجاني فلوس هيك فجأة دون سابق انذار ولا بزعل؟!

طبعا رح يفرح ويستقبلها بحفاوة

إذن ليش لما الله يعطيك ولد تعترض اذا ما كنت مخططلو؟!

لازم الفرحة تكون نفس الشي

لأنه ربنا قال :

" المال والبنون زينة الحياة الدنيا "

فيا ابن آدم..

لا تعترض على قضاء الله سواء كان خيراً ام شراً
فالخيرة فيما اختاره الله

وما يميزنا نحن المسلمون عن بقية الناس بأننا نحمد الله سبحانه وتعالى في السراء والضراء ونحتسب الأمر عند الله وأننا سنثاب على ذلك بإذنه تعالى

إن كل أمر يحدث لك هو تدبير من الخالق
وهنالك الكثير من الحوادث التي ستتعرض لها..ستكون لك بمثابة اختبار من الله تعالى ليرى كيف ستتصرف
وكيف ستكون ردة فعلك

فلتكن دائما اخي واختي المسلم/ة
صابراً
مطمئناً
مرتاحاً
ولست جازعاً من أمر الله
فلتقل الحمد لله وليبق لسانك رطباً بذكره
وحاول قدر الإمكان عند تلقيك لأية صدمة أن تجاهد نفسك وتصبر،، فالثواب الذي ينتظرك عند الله عظيم ق8




فاللهم اجعلنا من الصابرين الراضين بقضاءك خيره وشره


واللهم اجعلنا ممن يستمعون القول فيتبعون أحسنه
ق9

​

 

[A S T E R]

حياتنا ليست وردية !




ليس كل ما نكتبه شرط أن يعبر عن كل حياتنا
عندما ترى شخص معظم ما يكتبه هو الإيجابية في كل شيء والتفاؤل
ويتحدث عن أي أمر يحدث معه بإيجابية


ولا يذكر - في الغالب - مساوئ حياته
هنا ،، لا تعتقد بأنه يعيش حياة وردية لا تشوبها شائبة
وبأن باله صافي
عندما تراه يضحك مع هذا وذاك
ويتكلم معك بابتسامة
لا تعتقد بأن لا يوجد شيء يهزّه أو شاغل عقله وقلبه

مثلاً بالنسبة لي ،،
هنا في مدونتي قليل لأكتب شيء سلبي
أو معاناتي في حياتي
أو ماذا يشغل بالي
أو أن أقوم بإظهار الجانب السيء في حياتي

او أنظر إلى مجتمعي بسلبية
أحب دائماً أن أكتب لكم كل شيء جميل ومفرح ومضحك
صحيح أنني انتقد ظواهر في مجتمعاتنا ،،
ولكنني أنتقد وكلي أمل بأن الحال سيتغير ولن ولم أيأس من أنه سيأتي يوم ويتغير فيه حالنا إلى الأفضل


فلا يغرّك يا من تعتقد بأن الهموم تحوم حولك فقط
أو أن الدنيا تسوّد في وجهك أنت فقط
أو أن الظلم يصيبك من قبل من هم حولك أنت وحدك فقط
فالذي تعتقده يعيش حياة ملونة ممكن أنه يعيش حياة ملؤها ظلم وهموم وغيره ضعف ما تعيشه أنت!
فلا تغرّك المظاهر !

ولا تقسى على من هم حولك بسبب أنك أنت المظلوم الوحيد في هذه الدنيا
وأن الجميع عليهم مساندتك والاهتمام بك

فإن كنت ممن لا يحتملون فكرة
أن الذين تحبهم لا يستطيعون الاهتمام بك 24 ساعة فأنصحك أن لا تُدخِل أحدا إلى حياتك أو أنت لا تتقرب من أحد حتى لا تؤذهم ولا يؤذونك لانهم لن يستطيعوا فعل ما تريد لك !

فهم يحتاجون إلى المساندة أكثر منك
فعندما تُؤذى ،، فلا تؤذي غيرك
الحياة ليست متمحورة حولك بالنسبة لهم
كن إيجابياً دائماً ، وانشر الكلام الحسن والطيب والرزين لمن هم حولك
لأنهم يستحقون ذلك منك ، ولا يستحقون سلاطة لسانك وقسوتك
لأن - الي فيهم مكفيهم -





يعني عنجد يا جماعة الخيرر ،،
أنا انسانة بحب دايما أكتب شغلات حلوة ومفرحة
وبحب أحكيلكم عن أمور حلوة بحياتي
او علاقاتي مع الاهل وعيلتي ..زوجي وبناتي

وبس احكي معكم ،
بحب أكون انسانة مرحة وانشر الكلمة الطيبة وارسم البسمة على وجوه من يستحقوها
لأنه بصراحة كل واحد فينا ، إلي فيه مكفيه
وقسم كبير منا همومه لفوق راسه
والقلق والارق وقلة النوم رفيقه - بحكي عن نفسي -
فإنه ليش ما نكون ايجابيين ومتفائلين ونظهر للناس جانبنا الحلو؟

ما بحكي نكون شخوص بوجهين ، لا طبعا
انا والله شخصيتي بالتون هي نفسها بالواقع
وببيت اهلي معروف عني انا اكثر وحدة بتمزح واكثر وحدة بتحكي - بالعة راديو -

بس مو معناها إني ما بعاني من مشاكل بحياتي
سواء صحية أو نفسية
وخصوصا الصحية ،، يلي اكيد ما بدي احكي عنها لأنها كثيرة

بفتح الانمي تون لأغير جو ،، تعرفو انه معظم المرات الي بفتح فيها المنتدى بكون منكدة حرفيا
دون مبالغة .. قلال المرات الي بكون فاتحة ورايقة وما في مشاكل
- زي ما بفكرو عني بعض الناس .. اني بفتح اطقطق مع الناس هون وبكون رايقة -

أصلا بس يكون الوضع طبيعي ورايقة وما في مشاكل بغيب عن المنتدى يومين
بس لما تلاقوني هون اعرفو اني منكدة وماكلة هوا
زي حاليا يعني منكدة وصارت معي مشاكل بالفترة الي قبل

يعني فيه ناس شغلتها وعملتها بس تجرح غيرها بالكلام وما بوزنو كلامهم قبل ليحكوه
انو فكر قبل لتحكي ،، هاد الي قدامك بستحق كل هالكلام ؟
او مثلا كيف هو وضعه سواء عندو مشاكل او لا
وسواء غلط معك من وجهة نظرك او ما غلط
ما بحقلك تجرحه بالكلام لأنه مثل ما انت شايف حالك انو الي فيك مكفيك
وهو الي فيه مكفيه !

عيشتي وعيشة ناس غيري كثير
لو شفتها من بعيد حلوة
او شايفو دايما رواق

لا تحسدو عليها لأنه همومه كبيرة
ولا تقسى بالكلام عليه لأنه مش ناقصه

ولو شفته مقصر تجاهك لا تقول بكرهني او ما بده اياني
بالعكس هو بس بكون تعبان من جوا كثير مش شوي

الحمد لله رب العالمين ربنا رازقني في ناس حواليي مثل الذهب
- اقصد الناس الي بحياتي الواقعية -

مستحيل أنا او همي نقسى على بعض بالكلام
او حتى نعاتب بعض على قلة التواصل
وبس نتواصل .. بنحكي مع بعض وعادي ولا كأنه واحد فينا أبعد فترة ومشغول
ليش؟
لانه مراعيين بعض وظروف بعض
ولأنه كلهم هدول الناس بحبهم كثير وبعشقهم
والله رازقني حبهم ودعاءهم المستمر الي
لهيك بحس انه ربنا مصبرني على كثير شغلات ..
لأنه عندي احباب كثير يدعولي بالخير ولو اني مقصرة معهم او همي مقصرين معي

شوفو نهاية هالمحادثة بيني وبين رفيقتي الغالية
هي نزلت الصورة عالفيس وكتبت هاي العبارة

"
Asma Abdo الصاحب الجنة ..
ذاك الذي اجتمعت به على درب الله، أحببته في الله
ولو قلّ الوصال يوماً فغرس المحبة بالدعاء يُروى

لا حُرمتك غاليتي "

صورة المحادثة

- بالله عليكم صح كلامها مثل الدوا ؟ لسا هاد نهاية المحادثة..كل كلامها بلسم وفاجأتني بمنشور الفيس وعبارتها ..
ما أجملك يا عبق هي لقبها عبق الجنان -

بس عشان فرجيكم ما فيه احلى من انه تكون العلاقة بين بعض هيك..ما فيه ارقى منها
- قليل لنحكي انا وياها بس بنموت على بعض -


وصدقاً إلي ألهمني أكتب هالتدوينة .. هي رفيقتي هاي الي بحكيلكم عنها
قلت بعقلي
أنا ليش أخلي مزاجي يتعكر وأزعل وأحرق دم حالي وأبكي على ناس ما تفهمني ولا تكون سند إلي
ولا ترضى فيي كما أنا

وهو فيه حواليي ناس حاسة بقيمتي وبقيمة صحبتي وبحبوني كثير
وللعلم يا جماعة عندي من هالنوع من الرفيقات كثير
يحفظلي إياهم الغاليات ..فقلت لحالي طول ما همي بحياتي رح ضل مبسوطة
ورح يضلو اكيد .. لأنه صحبتنا من سنيييييين


وهاي مثال اخر لأحد رفيقاتي
بعثتلها بس اني بحاجة لدعائها كنت بمر بفترة صعبة

شوفو شو ردت عليي مع انه كمان قليل لنحكي ق9

المحادثة الثانية

.
.
.

هاي أمور تافهة يلي بعض الناس تطلع عليها وتحطها قانون أساسي للعلاقات - كثرة الكلام -
وهو قانون بعمل مشاكل للعلاقات وبالنهاية الى انتهاءها
اعتبرو نفسكم دون مواقع تواصل واعطو للي حواليكم خصوصية ومساحة

ترا انا جربت أعيش دون مواقع تواصل مدة ست شهور
واقسم بالله كانت فترة حلوة وعادية جدا
وما عانيت ولا شي ..
وانبسطت اني هيك ،، لاني استنتجت اني تخلصت من تعلقي فيها

صح رجعتلها ،،
بس مش بهالقوة..لانه أصلا غلط كثرة الجلوس عليها والحكي مع الناس
حتى لو مقربين منك كثير لأنه الاهتمام مش بكثرة الرغي
- حسب كلام امي ونصيحتها -
الله يحفظلي إياها ..نصائحها دايما ذهب وسليمة مية بالمية ق9ق8


فيا احبابي في التون

انشروا المحبة والمودة بين بعضكم
ولا للسلبية تجاه الحياة

ومش غلط انك بس تبين للناس الجانب الحلو من حياتك

لأنهم بستحقوا هذا منك




ملاحظة :
الانسان الوحيد الي يستحق كل شي منك واهتمامك وكل جوارحك بكل حالاتك وكل انكساراتك هو نصفك الثاني ، الزوج أو الزوجة فقط لا غير ،، اجعله اقرب المقربين منك

 

[A S T E R]

أفرح قلوبهم


حابة أحكيلكم شغلة صارت معي من كم يوم

بالبداية بدي أحكيلكم عن الإنسانة الي بتعلق فيها الموضوع

طبعا الي متابعين المدونة من بدايتها بتعرفو انو زوجي هو ابن عمي
فقرايبنا واحد

وحتى أهل امه بقربولنا كمان
مرت عمي بتكون بنت خالة بابا

الشخص الي بدي احكي عنه هي بتكون ..خالة محمد
واسمها ختام
يعني أنا كنت اعرفها قبل زواجي معرفة سطحية جدا
وكل وين ووين لأشوفها

هي فيها نوع من الإعاقات بس لحد هسا أنا مش عارفة شو بالزبط
لأنه حماتي بتقولي إنها بتفهم كل شي وإنه مو مأثر على عقلها

بس هي بالشكل ،، راسها كبير
وقصيرة كثير
ومشيتها مو طبيعية كثير
ولسانها ثقيل بالحكي ،، بس عادي بفهملها
الي بشوفها ممكن يفكرها متلازمة داون بس هي مش هيك

وهي بتفهم الكلام الموجه إلها وكل شي
هي طبعا كبيرة بالعمر مو صغيرة
يمكن بالأربعينات

حماتي حكتلي انه انولدت وفيه مية كثير واجت على راسها
ومش عارفة شو كمان شرحتلي بس نسيت

وهي عايشة لحالها ببيت أهلها
كل اخوتها وخواتها متزوجين
بس طبعا فوقها واحد من اخوتها وفيه من أولاد او بنات اخوتها بنامو عندها بالليل

زي ما حكيتلكم قبل زواجي كانت علاقتي معها سطحية لأني بشوفهاش أصلا

بس بعدها لما تزوجت ،، بتيجي عند حماتي كل اسبوع
بنفس اليوم الي بيجو فيه خوات محمد
وأنا والله عادي بتصرف معها وبحكي معها

ومن اول مرة شفتها سلمت عليها وبوستها وبحكيلها كيف حالك يا خالتي شو اخبارك
وعادي بوجهلها كلام ..
وهيك دايما بعمل معها ،، دون تفكير الصراحة وبعفوية

لحد ما بيوم من الأيام بعثتلي عمتي - أخت بابا-
بتقولي ( وينك يا أسماء بدي احكيلك شغلة ، صبحنا انا وختام بنحكي عليك )
- طبعا عمتي اخت بابا ماخذها خال محمد -
يعني ختام بنت حماها

( ما عليكم بالانساب اذا ما فهمتو بس انا عفكرة محترفة بفهم الانساب لانه جدي أبو ابوي ألف كتاب عن الانساب بالعشائر القلقيلية وبابا كان دايما يشرحلنا عن الانساب ويعلمنا كيف نربط )



فالمهم عمتي صارت تحكيلي انه ختام ما خلّصت مدح فيي قدامها
وحاكيتلها انها بتحبني كثير كثير
لأني انا الوحيدة بين الكل الي بسلم عليها وببوسها وبحكي معها ! - تخيلو يا جماعة -

فهي بتضلها تمدح فيي بس تروح عند عمتي
وعمتي صارت تدعيلي وتحكيلي الله يرضى عليك ما احسنك يا عمتي
والله يجبر بخاطرك مثل ما بتجبري خاطرها
وما خلصت دعاء الي

تتصوروش انا شو تأثرت بكلامها
تعرفو جد انصدمت وتأثرت وانبسطت

بقدرش أوصفلكم شعوري وقتها

بس جد انا بعمل تصرفاتي كلها اقسم بالله دون ما انتبه وما بنتظر مقابل
انا هي هيك شخصيتي مع الكل لو شو كان الي قدامي

فبتفاجأ من حكي الناس انو تصرفاتي بالنسبة الهم كبيرة كثير
وما قصدي عن هاد الموقف
وكثير شغلات او كلام بحكيه
بتفاجأ انه الناس تمدحني وانا الصراحة بشوفو أقل من عادي الي بعملو

بس تعرفو هو بالفعل خالتي ختام ما في حدا بحكي معها او بوجهلها حكي كثير
تبقى قاعدة في حالها ساكتة ما بتحكي شي

ولا حدا بوجهلها حكي
لاحظت هالشي في كل قعدات قرايب محمد من تلا أمه

الي خلاني اكتب التدوينة انو قبل كم يوم
كانت بدها توصيلة خالتي على بيتها..كانت عند حماتي
وانا ومحمد كنا رح نطلع مشوار وحكتلي بدي تروحوني

فنزلت انا وياها
واحنا نستنى محمد ..الا هي بتحكيلي
( انت يا أسماء من اول مرة شفتك حبيتك كثير ودخلتي قلبي وما في احسن منك )

والله والله والله ما بتعرفو شو انصدمت من كلامها وتفاجأت
أول مرة بسمعو منها هي..

دايما اسمع مدحها من الناس
بس هو ظاهر عليها من تصرفاتها انها تحبني لانها كل ما افوت وهي تكون موجودة عند حماتي
تحكيلي ( نورت ) وتضحكلي وتضل تحكي معي وتسألني أسئلة

قلتلها وانا والله بحبك يا خالتي كثير الله يخليك
وصارت تحكيلي بدي اجي عندك
قلتلها اهلا وسهلا والله بتنوري
أي يوم رني وبخلي محمد يجيبك عندي

بعدها اجا محمد
وما رضيت تركب جنب محمد
صارت تقول مستحيل ..انت اركبي عندو
ودايما تعمل هيك ..اذا محمد بدو يوصلها ويوصلني..ترضاش تركب قدام عندو
تبقى تضحك وتقلي لا اركبي انت ق9

وركبت وصارت تقول لمحمد..بحبها مرتك يا محمد وبقولها بدي اجي عندكم وانت بدك تجيبني
حكالها اه تعالي بجيبك أي يوم انت بس قولي

وبس وصلناها وراحت
قلت لمحمد هيك هيك حكتلي خالتي واحنا نازلين
الا هو صار يضحك ويقول مهي دايما كل ما وصلها تحكيلي سلم عليها اسماء
دير بالك عليها وتزعلهاش
دايما توصيني عليك
قلتله عنجد؟

حكالي اه دايما تمدح فيك قدامي بتموت عليك وعليي خ22


احلى شي قطعتو من كلامه وقلتله هي صارت تحبك كثير بعد ما اخذتني
قبلها كانت عادي يمكن معك صح ؟

حكالي بدك الصراحة ..اه
بعد ما تجوزت ما بتخلص مدح فيك ِ وفيي

صرت اقولو بس عشان تعرف كيف مبيضة وجهك وين ما تروح ق8ق8


عنجد هالانسانة انا بحبها كثير
وما بظهرلها شفقة او تمييز
او اني ما أعبرها بالحكي

عندها ولاد وبنات اخوة وخوات كثار
بس بعمرو ما حدا عاملها مثل ما بعاملها انا

مش انهم بكرهوها .. خلص لانه وضعها خاص يمكن وعقلها صعب شوي بقولو
بس حتى لو هاد مش مبرر

ما فيه أحلى من انك تعامل الناس المختلفة بطريقة تحسسهم انهم هم مش غير

وانهم هم جزء لا يتجزأ من هالمجتمع

الهم كيانهم الخاص

وانه فيه قسم منهم ممكن انه يصير شي كبير بمساعدة اهله

وعدم تهميشهم لدورهم

او معاملتهم وكأنهم شفافين

فرّح قلوبهم بكلمة ،،

بدعوة تحكيها قدامه

بابتسامة

بالسؤال عنهم

بإشراكهم الحديث

بأي شيء حتى ولو كان بسيطاً

لم أكن أعلم أن هنالك بعض من تصرفاتي التي أراها بسيطة

لها وقع وأثر عظيم وكبير في نفوس الكثيرين حولي

لذلك أقولها لكم بأن كل شيء تفعله حتى لو كان بسيطاً

افعله ،،

فقد تكون جبرت خاطراً لأحد ما وأنت لا تعلم !




+



بتوقع الشي الي صقل شخصيتي وخلاني هيك أكون مع مثل هالشريحة من المجتمع هو انو عندي اخت متلازمة داون وتعلمت كثير ولساتني بتعلم في كيفية التعامل معها ، لأنها كل ما تكبر بكتشف شي ،، ولو تزوجت بس هي لساتها بتيجي عندي يوميا عفكرة وهاي رابط الموضوع الي مرة حكيت فيه عنها بالتفصيل ،، للي بحب يتعرف عليها

رابط الموضوع

​

 

[A S T E R]

{{ لغتنا الجميلة }}

- تعليق على مدونة اخوي @MR.HERO -




بعد ما قرأت تدوينات كثيرة من باقي الأعضاء لفتوني كم تدوينة ،
وبضل أقول بدي افتح من الجهاز عشان أكتب وأعلق عليهم وخلص بالمرة مو فاضية أقعد قعدة رواق على الكمبيوتر
لحد هيني واخيراً لقيت وقت ومزاج كمان إني أكتب ،

حبيت أحكي بالبداية عن كلام عمو هيروو @MR.HERO
بخصوص التحدث بلغات أخرى خلال الحديث

اول اشي هيرو انبسطت وأنا اقرأ كل كلمة وضحكت كثير على أسلوبك
نغش من يومك بس لا توخد بحالك مقلب

المهم نيجي لموضوعنا الأساسي الي تطرقلو باخر تدوينة كتبها ،
انا الصراحة تقريبا معاه قلباً وقالباً
وأنا وجهة نظري مو لأني في بعض المرات ما بفهم الكلمة ..وعادي ما بخجل بسأل شو الكلمة الي حكيتها ؟
مو لهاد السبب

أنا السبب هو إنو ليه يعني ندخل هاي الكلمات في كلامنا حتى وان كانت بطريقة عفوية
وهو لو نيجي لأي دولة بأي مكان ولا حد بحكي بلغة الثاني، وهاي الفكرة بحطوها بأفلامهم ومسلسلاتهم
انه بس الواحد يروح لبلد ثاني مو مستعد يحكي لغتهم وبصير يدور على حد يحكي بلغته


انو اوك نتعلمها وحلو كثير ولازم نفهمها صح عشان نعرف نتواصل مع الناس لأنها لغة العصر ولغة العالم
بس ليش هاد التدخيلات خلال كلامنا ؟
هي عنجد ما تزبط وبتحسها هيك جاي بطريقة غلط
خصوصاً لما الواحد يذكرها امام حد ما بفهم أي كلمة بالإنجليزي
فلشو هالاحراجات
انا عادي ما بخجل وبسأل الي قبالي شو هي الكلمة..بس مثلا غيري بيخجل
فلشو نحط بعض بهالموقف

وخصوصا بالكتابة لما نكتب انجليزي بس بأحرف عربية ..بنطبش الكلمة
او العكس عربي بس بأحرف انجليزية
هاد اكثر ظاهرة منتشرة عند بعض الناس تستفزني..قال عربي بأحرف انجليزي ..اما إعاقة


انا ما بنكر نهائياً إنه تأثير الشعب الي بيجي يحتل او يستعمر بلد ثاني
إنو الشعب تلقائي يصير يفهم لغة المحتل وانو تدخل بعض المصطلحات خلال حديثه بحياته من لغة المحتل..
خاصة اذا استمرت فترة الاحتلال لسنين طويلة

يعني احنا مثلا بنستخدم خلال حديثنا بحياتنا كثييير كلمات عبرية..ومنستعملش الكلمة العربية

مثل كلمة ( مزجان ) معناها مكيف ..انا بالنسبة الي شخصياً بحكيها مكيف ..
بس مرات تيجي على لساني الكلمة العبرية
بس كل الناس تحكيلو مزجان

أو كلمة ( مرتيف ) معناها بالعربي القبو الي تحت البيوت بكون

وصرلي ساعة بعصر مخي شو فيه كمان كلمات بس نسيت

مع اني بفهم اللغة العبرية..ما بعرف اقرأ او أكتب بس بفهمها لما اسمعها كثير كويس
بس خلص راحو عن بالي الكلمات الشائعة الي نستعملها بحياتنا هههههه

المهم مقصدي هاد شي طبيعي
بس برضو بنفس الوقت انا بفضل انه نتخلص من هاد الكلمات الدخيلة خلال حديثنا بين بعض بكون افضل للجميع بحسو أحلى وأرقى للغتنا الراقية

والي هي عنجد أروع وأحلى وأجمل لغة بالعالم لو بس نتعلمها أكثر ونتعمق فيها..
بنلاقي حالنا صفر بمعرفتنا فيها لأنه العامية طغت على الساحة
فإنو ليش أخرى فوق ما بنحكي عامية ..ندخّل كلمات انجليزية او عبرية او فرنسية او أي شي
ليش ما يكون كل كلامنا عربي وندخل فيه كلمات فصحى كمان
وين الغلط بالموضوع ؟

قبل فترة نزلت منشور عالفيسبوك بنتقد فيه الناس الي تتمسخر على الطفل الي بحكي بالفصحى
- لأنه بتفرج على سبيستون مثلا -
او حتى فيه بعض الكبار بدخلو لكلامهم فصحى وانا منهم والله
وانا تعرضت لبعض هاد المواقف ، إنه يحكولي ليه بتحكي فصحى خلال كلامك وإنه باستهجان

طب بالله عليكم هو احنا عرب ولا أكراد ولا أتراك ولا انجليز ؟
محنا عرب وطبيعي نحكي عربي ويكون في كلام فصحى

ليه بس حد يكون يحكي انجليزي خلال كلامه ما نستهجن وما نقولو لا تحكي هيك
او حتى الاطفال بشوف أهاليهم بكونو مكيفين على ولادهم بس يحكو بالانجليزي
اما اذا الولد صار يقلد الي بسمعو ويحكي فصحى مع الناس
بستحو من بقية الناس..لهالدرجة صرنا نخجل بلغتنا ؟!!!!

انا سمعتها بداني انه فيه اهل لطفل ما بحبو ابنهم يحكي فصحى قال ليش؟
عشان الناس ما تحكي عنو اهبل
شفتو الاستفزاز ؟
وهو عنجد صح مزبوط بصير مضحكة للكل ومسخرة

طب ليه عنجد ليه ؟
انا والله احب ما علي بناتي بس يكبرو وانو يحكو فصحى ما رح أمنعهم
مع اني عارفة رح يتعرضو لمسخرة وكذا ..بس ليش هيك مجتمعنا

لغتنا جميلة جداً بس لو نرجع نهتم فيها مثل قبل
بس هي خلص العامية طغت واندثر الاهتمام باللغة العربية
وهو هاد الي بدو إياه الغرب وأذنابه ، رح تسألو ليش
لأنهم بعرفو انها لغة القران
وإنو اذا فهمنا العربي صح رح نفهم ديننا صح ورح نرجع خير امة أخرجت للناس وهم ما بدهم تقوم للمسلمين قائمة

طبعاً يا جماعة لا تفهمو تدوينتي إنها انتقاد إلكم
أصلا بنتقد حالي أولاً ، لاني أحياناً بستعمل كلمات عبرية او كلمات انجليزية
بس صدقاً قليل استعمالي إلها وبحاول أخفيها

وما بذمّ الي يتعلم اللغات أكيد
بالعكس شي حلو كثير ورائع
ولازم نعرف لغات غيرنا لأنه حياتنا فرضت علينا هالشي
بس بالمقابل فكرتي إنو ما نهمّش لغتنا ونكون فخورين فيها
ويارب ترجع لحياتنا مثل سابق عهدها

​

 

[A S T E R]

تابع لفعالية الشهر

# شعورك لإنتهاء آخر شهر من العام و شعورك للعام القادم



بدكم الصراحة؟

ما فيه شعور معين بسبب نهاية سنة وبداية سنة جديدة غير إنها خلص راحت من عمرنا سنة
وفايتين على سنة جديدة
فما فيه هالشعور المليء بالحماس مثلاً
أو حتى شعور سلبي
ما في أي شعور

كلها أيام بالنسبة إلي مثل بعضها

الأيام إلي بعدّها وبحس بشعور تجاهها
هي الأيام الي بحس حالي فيها مقصرة في شيء معين
مثلاً أقصر في عباداتي ..مو الصلاة والصيام

بل قصدي النوافل
لما أبعد عنها فترة ،، الصراحة بنخنق
وبحس باكتئاب
وبعتبرها أسوء أيام حياتي ليش؟
لأني ما استغليتها صح بالعبادة والتقرب من الله وأنا قوية وشابة
لأنه كلنا منعرف انه احنا رح ننسأل عن الوقت الي أفنيناه بهالعمر

المسألة مش مسألة سنين بتمر
سنة راحت وسنة اجت
بل المسألة هي مسألة الوقت بحد ذاته كيف أستغله أفضل استغلال
لحتى يعود علي أنا بالنفع أو أنفع غيري ومن هم حولي
وأرضي رب العالمين بأعمالي هاي

فشعوري أحيانا بكون أروع في أيام ثانية
غير نهاية سنة وبداية سنة
لأنه تفكيري تجاه هاي الأمور يختلف

وبكل يوم لازم احنا نفكر بحالنا وبأهدافنا وشو حققنا وشو بدنا نحقق
وشو عملنا أشياء غلط
وكيف نرجع للمسار الصح اذا خرجنا عن الطريق أو ضلينا

أو مثلاً عندي الايام إلي بسمح للمشاعر السلبية تسيطر علي، هاي الايام بكرهها كثير
وبتمر علي ببطىء كبير بس الحمد لله إني بطلع منها بالنهاية

بس مثلا رأس السنة الهجرية
هداك اليوم بتذكر رسولنا عليه الصلاة والسلام
كيف كان مضطهد سنوات بين أهله ولم تتم نصرة دعوته

ولكنه هاجر هو وكل المسلمين لما وجدوا النصرة بالمدينة
وكيف طبعا لاقى صعاب أثناء هجرته
ولكنه بالنهاية ايش صار
وصل وتم استقباله بحفاوة وكأنهم بعرفوه من سنين !
تخيلوا انتو بس شعور البني ادم بس يروح من بلد لبلد واستقبلوه هالاستقبال
اكيد كان شعوره رائع ومبسوط كثير انها دعوته تمت نصرتها

وأقام الدولة الإسلامية فيها ومن هناك كانت نقطة انطلاقة الاسلام
الي صار في كل أنحاء العالم
فشعوري تجاه رأس السنة الهجرية ، بكون كثير مبسوطة لما اتذكر الاحداث الي مر فيها رسولنا

وأدعي من كل قلبي أنه يرجع حال المسلمين ونرجع لعزنا وكلنا تحت راية قائد واحد

المهم ،، الواحد فينا لازم مع مرور كل سنة
ومش بس السنة
الايام والشهور والأسابيع
نسأل حالنا أنه شو عملنا فيها
في ايش ضيعنا هالوقت الثمين
هل انت مقصر في واجباتك
هل انت مقصر في عملك ..تجاه من هم حولي..تجاه ربي؟!

فإن وجدت نفسك مقصرا
فلتعمل على استثمار هذا الوقت الذي تمتلكه الان
وتحاول التعويض عما فاتك في الأيام التي أهدرتها بلا فائدة

اكثر دعاء بدعيه واكثر أمنية بتمناها مع بداية كل سنة
سواء هجرية أو ميلادية

أنه الله يحرر بلاد المسلمين كلها
والله يحسن الأحوال فيها
لانها من سيء لأسوء
ولكننا مسلمون وعلينا أن نتمسك بثقتنا بالله تعالى بأنه سينصرنا
إن لم يكن في زماننا ..فإن النصر والغد الافضل سيكون في زمن من هم بعدنا

فلتترك بصمتك خلفك حتى وإن كانت بسيطةق9

​

 

[A S T E R]

الاكتئاب ،، أسبابه وعلاجه

تعليق على تدوينة ريلو @RELENA
- تحذير التدوينة طويلة -



من زمان وأنا بدي علق على كلامك وأحكي عن الاكتئاب إلي قالت عنه ريلو بمدونتها

أنا معاك الصراحة في كل الي حكتيه
وإنه المفروض احنا لما نشوف أشخاص حوالينا عم بتغيرو نوقف معهم مش ضدهم
وإذا ما بدنا نوقف معهم لازم نلتمسلهم عذر ،،
هاد أقل شي ممكن نعمله وما نغلط عليهم ونتهمهم بأسباب مش بمحلها لو شفناهم تغيرو!

بالنسبة إلي بشوف الواحد ممكن يصاب باكتئاب ويحب يبعد عن الناس ويتغير تجاههم
هو فقد عزيز وغالي على القلب
مثل الام أو الاب او الأخت او الزوج او الابن
أو أي شخص مقرب من الدرجة الأولى

بتلاقيه انعزل عن العالم وبطل يحب يحكي مع أي حدا
وتغير تجاه الكل

شفت وحدة هيك صار معها
هي كانت صديقة..مش مقربة ولكنها انسانة رائعة جداً وحبيتها واحترمتها كثير
وهي نفس الشي والله
وكانت مرحة واجتماعية
لحد ما توفت أمها الله يرحمها - طبعا هالانسانة متزوجة وعندها أولاد -
فهي تأثرت كثييييير بوفاة أمها
وانعزلت عن الكل وقتها وبطلت تحاكيني او تحاكي غيري حتى
إذا الواحد حكى معها ما بتكون على سجيتها
وأنا والله حاولت قد ما أقدر وقف جنبها وهيك ،، بس خلص هي تغيرت كثير
وانا والله ما لمتها ولا زعلت منها بالمرة
بل على العكس راعيتها وبضل ادعيلها بالخير

بس إنه بحكيلكم شو الي ممكن يغير الشخص او يخليه يكتئب ويتقوقع على نفسه وينعزل عن العالم
صح المفروض هاد الشخص ما نتركه بس أحياناً للأسف ما بعطوك مساحة
فبتضطر تعطيهم مساحتهم الخاصة فيهم

وطبعاً مش أي شخص بتوفى حد غالي عليه هيك بصير فيه ،
الناس تختلف في طباعها وقدرة تحملها وردات فعلها تجاه المواقف زي اختلافهم في اشكالهم وألوانهم
كذلك بختلفو بنفسياتهم وعقلياتهم وقدرة التحمل او تقبلهم للي حواليهم أثناء زعلهم

مثلا بالمقابل صديقة ثانية بحبها وبحترمها
لما توفى أبوها مش زمان .. وانا حكيت عنه بالمدونة
تأثرت كثير كثير واكتئبت فترة طويلة وتغيرت
بس ضليت برضو واقفة معها ورحتلها زيارات عالبيت اواسيها
وهي كانت تتقبل هالشي وتحب تحكي،، وطبعا رجعت لطبيعتها بعد فترة

فما كانت ردة فعلها نفس ردة فعل الاولى
هو طبعا الموت مصيبة مثل ما قال ربنا بالقران وشي عظيم على النفس
ومش كل الناس تتحمل فقد الاحباب وفيه منهم بتأثروا وبكتئبو وبتلاقيهم أبعدو وفيه منهم لا !


سبب اخر للاكتئاب والانعزال
هو للطلاب سواء بالمدارس او الجامعات وغيرو

لما الواحد فيهم ما يزبط بامتحاناته بعد ما كان دارس كثير واجتهد ..
- ما ضلو نايم وبعدها سقط وصار يندم -
خاصة طلاب الثانوية العامة..
يلي الواحد فيهم بدرس كثير وبجتهد لحتى يوصل المعدل الي بدو ياه عشان يدرس التخصص الي بحبه

وبالاخير يسقط مثلا ..أكيد طبعا بدو يمر بحالة سيئة جدا ويكتئب ويبطل يحكي مع حدا
بس طبعا ولا مرة بأيد الي بنتحرو.. هاد ما بكون عندو الوازع الديني قوي
بالنهاية هاد دنيا واحنا محاسبين على كل تصرفاتنا من أول ما نبلغ سن الرشد

لأنه برضو الصيف الماضي كانت نتائج الثانوية وفيه وحدة من صديقاتي
هي بالثانوية العامة
ما نجحت.. تغيرت كثير
بعد ما كانت مرحة كمان وحبابة ونحكي ونضحك كل فترة
وتحب تستشيرني كثير وتشكيلي همومها
كل هاد راح لما طلعو نتائجها وطلعت مو ناجحة ..
ما تتصوروا شو زعلت عليها وانقهرت ،،، وكثير كثير كثير حاولت معها
ابعتلها رسايل واحكي معها
وأحاول أهون عليها .. وهي تشوف وما ترد

بالنهاية تركتها براحتها ودعيتلها من قلبي
لحد قبل شي شهر..علقتلها على حالتها الا هي ردت عليي
واعتذرت مني وقالتلي من بعد النتائج وانا مريت بحالة سيئة وصارت تشرحلي
وانا ما خليتها تشرحلي قلتلها عادي انت ما غلطتي
وما فيها اشي تعملي هيك خاصة انك درستي كويس

ورجعنا نحكي مثل قبل وعادي

بس انه حبيت احكيلكم هاي المواقف لحتى تشوفو اختلاف الناس في ردات فعلها
وشو الواجب علينا احنا نعملو
صح لازم ما نتركهم بحالهم بس اذا ما قبلو خلص نتركهم فترة ونرد نرجع نسأل عنهم
بتلاقيهم خلص عادي برجعو معك طبيعي

فهو أحيانا بكون علاجهم بالنسبة للبعض انه تتركهم بحالهم فترة

وفيه ناس بالمقابل لا ..بتحب يكون الكل موجود حواليها وبتحب الناس تواسيها

انا من الناس الي بحب الناس تواسيني بفترات ضعفي واكتئابي
مع اني من الناس الي بتصد الي حواليها بس مع هيك بستأنس بس يواسوني
مثل زوجي او امي او اختي ..هدول المفضلين عندي لأنهم بعرفوني اكثر شي


واسباب ثانية للاكتئاب ..التعرض لمرض سواء كان خطير او مش خطير
انتكاسة مرضية بشكل عام
ناس تستقبلها بقوة وعزيمة عالية وناس تنحبط وتخلي المرض يسيطر عليها وعلى تفكيرها

اعطيكم كمان مثال ..حيلا كل سبب وعندي مثال من حياتي الواقعية

عم بابا الله يرحمه ..اسمه عادل
توفى بمرض السرطان

لما انصاب بالمرض..عادي استقبله بقوة وإرادة وثبات عمري ما شفتهم في أي حد ثاني
كان بقولو يروح عالشغل بالأرض وما يهمو شي
وهو يتوجع كثير
كان يوخد جلسات كيماوي وبعدها يرد يرجع عالشغل ويحكي ويضحك مع الناس
كان عايش حياته طبيعي جداً
وحتى بالبداية حكولي أهلي انه ما كان قابل يوخد كيماوي
وانه هيك هيك هو ميت
لانه كان واصل لمرحلة خلص رح يموت
بس رغم الألم كان عايش طبيعي لحد ما توفى
مع انه ما كانت علاقتي فيه قوية وما كنت اعرفه كويس..شفتو كم مرة وسلمت عليه
بس كثير زعلت عليه وما بنسى لما توفى

ناس ثانية بالمقابل تزعل كثير وبعز عليها مرضها وتكتئب وبضلهم بالبيت ما بتزحزحو وبخلو المرض يستحوذ عليهم

خالتي هيك صار فيها ،، بس قالولها معاك سل في العظم
صح كانت تتعب وتتألم كثير بس ما تتصوروا شو صار فيها وبنفسيتها وكيف تغيرت كثير
الحمد لله حاليا تحسنت صحتها مع الدواء

بس إنه سبحان الله كيف كل شخص بتختلف درجة تحمله للمصايب وكيف بتأثر عليه وبتخليه يتغير

سبب اخر للتغير والاكتئاب انك تتعرض للعنف والذل
مثل الأسرى والمساجين..سواء أسرى عند يهود او حتى مساجين عاديين عند الدولة

- طبعا كلامي للمظلومين والي مو عاملين شي غلط بخصوص المحبوسين عند الدولة اما القاتل والسارق والمعتدي على شرف ..خرجو الله لا يقيمو -

مثل هدول الصراحة كل الاحترام للي بضل مثل ما هو وبتحمل الأذى النفسي والجسدي الي بسببولهم إياه
العذاب الي بتم في السجون فظيع وغير محتمل لكثير فئات من الناس

وممكن الأسير بس يرجع لأهله من عند اليهود ما يرجع طبيعي
أو يرجع لطبيعته بس بعد فترة من الزمن
مثل هالأشخاص ما تلوموهم ..بل همي أكثر الأشخاص الي بحاجة للناس حواليها لحتى ما يطق عقله الواحد

مثال ثاني على هاد الجزء من الناس وهو أخوي الكبير
لما حبسوه السلطة بسنة 2010 ..
صح مدة حبستو مو طويلة بس كانت كافية انها تأثر عليه كثير بسبب أساليبهم الحقيرة
طبعا اخوي ما كان عامل شي..هو مثال التقوى والورع وما خرق أي قانون
بس لأنه حامل دعوة وبقول لا اله الا الله وما بخاف من قول كلمة الحق..فالسلطة ما بهمها وبتحبس أي شخص بوقف بوجههم أو يناقض الأفكار الي بنشرولها
فهو لما طلع من الحبس كثير كان متغير ونفسيته منقلبة
وبحاله وما بحكي مع حدا
وفات بحالة اكتئاب وقرف بسبب الي تعرضلو عندهم..الله يخزيهم بس

(طبعا هم ما في اشطر منهم في حبس الناس الي تنشر كلمة الحق ولو عليهم كان بحبسونا احنا النساء بس لولا انه فيه ورانا رجال ما بسترجي حد فيهم يقرب علينا )

وناس ثانية بطلعو من الحبس ولا كأنهم محبوسين حتى لو كانوا عند يهود
جد النفسيات تختلف وقدرات التحمل تختلف

بس الصح انه كيف نعالج هاد الاكتئاب وما نخليه يسيطر علينا؟

الطريقة سهلة جداً

البداية ما أسمح للأفكار السوداوية تسيطر عليي ..
صح رح تضل تيجي ببالك بس حاول قد ما تقدر انك تلغيها
كيف؟
انك تعمل الشي الي بتحب تعملو بحياتك
ان شاالله تقوم ترقص..تقوم تفتح على اصخب اغنية وتغني معها بجنون ههههههه
تطلع برا البيت
تروح ملاهي تلعب
تروح على مكان فيه طبيعة وخضار..هاد عن تجربة عنجد بزيل الاكتئاب

والأهم من كل هاد انك تدااااوم على قراءة القران والدعاء أيضا في الثلث الأخير من الليل
تحط بعقلك انك بدك تصحى بالثلث الأخير من الليل وتدعي لنفسك من كل قلبك
وتقرأ قران
رح تلاقي راحة نفسية كبيرة

تروح تشكي وتفضفض لأقرب شخص ممكن يتحمل هاي الأفكار..
لأنه ما أخفيكم أحيانا بتكون الأفكار جدا سوداوية
وبدك حد يسمعك ويفهمك وما بتمسخر او ياخد الامر بمهزلة
ويعطيك نصائح ويهون عليك

انك توكل اكثر شي بتحبو

بالنسبة الي انا الاكل بزيل الاكتئاب
الي بسمعني بقول عني دبة..بس لا والله وزني 54 بس
بس بنصحش من كثر ما بركض ورا البنات ههههههههههه
بحب اكل الاكل الحلو..او أي اكل جاهز مو انا عاملتو

لاني أم وأي شي انا الي بعملو
بحب لما اتدلل اني اكل اكل مو من صنعي..سواء من امي ..او من برا ..او سلفتي وهي مثل اختي
المهم اكل اكل غير اكلي ههههههههه

وكثير شغلات ممكن نساويها لحتى نطلع حالنا من هالحالة بس المهم لا تخلوها تسيطر عليكم
وبس تشوفو حد واقع فيها هونوا عليه
ولا تظلموه ولا تقسوا عليه
ولو بدو خصوصية أعطوه هالخصوصية بس لا تهجروه

​

 

[A S T E R]

جشع الإنسان ،، وطمعه



سبحان الله الإنسان مجبول بفطرته على شيء معين
والله تعالى يعلم بهذه الفطرة

لذلك دائماً ما نقول بأن من خلقنا هو أولى من الإنسان بوضع الأحكام والتشريعات والقوانين لتنظيم حياة هذا الإنسان الذي هو فطره وجبله على هذه الهيئة ،
فحكم الله وحكم الإسلام أولى بأن يطبق من حكم الرأسمالية والديموقراطية العفنة

فوضع الله في هذا الانسان الغرائز ( غريزة تدين وغريزة التملك وغريزة النوع )
والحاجات العضوية (الحاجة للأكل والشرب والحاجة للنوم والحاجة للذهاب الى بيت الراحة)

وهناك ما ينشق عن الغرائز التي ذكرتها فوق ..وتسمى ظاهرة تدل على هذه الغريزة
مثل الأبوة والأمومة تنشق عن غريزة النوع .. حب السيطرة والبقاء للاقوى تابعة عن غريزة التملك ، والحاجة الى الخالق والعبادات تنشق من غريزة التدين

في معرضي هنا أحببت أن أتحدث عن أحد مظاهر غريزة التملك وهو الجشع عند الانسان وطمعه
وحبه بأنه يتملك كل شيء يقع تحت يده
أو إذا لاحت له فرصة بأن يتملك الكثير على حساب نفسه وصحته
فإنه لا يقصّر في ذلك
بل تراه يحاول بأقصى طاقاته ليمتلك أكبر قدر ممكن من المال مثلا
فالجشع لا يكون بالمال

أحياناً يكون الجشع في محبتك للسيطرة على الاخرين وطمعك لأن تتدخل في شؤون غيرك وأن تطبق سيطرتك عليهم
سواء عن طريق مركزك الهام ان كنت صاحب مركز رفيع
أو كنت مجرد شخص في عائلة ولكنك تحب وتطمع بأن تكون الكلمة الأولى والأخيرة لك في كل شاردة وواردة في أي منزل !

أمقت الجشع والطمع وبشدة
لا ضير أن نحب أن نمتلك الأموال ونكسبها
أو نتملك الأراضي
أو أن أوسع من نشاطاتي في شركاتي مثلا
لا ضير في ذلك أبداً
ولكن الضرر يقع في النفس ان كنت ممن لا يرضون بقضاء الله ولم ترض بما قسمه الله لك مع انك لست بمحتاج
ولكن جشعك وطمعك أعماك
فأصبحت تسير في طرق محرمة لماذا ؟
حتى تصل لهدفك وتوسع من أعمالك وتكسب الأموال أكثر
حتى وان كانت على حساب الغير
إن عاقبة الجشع والطمع وخيمة فهي تودي بصاحبها الى الهلاك في الدنيا قبل الاخرة
وغير ذلك سينال غضب الله سبحانه وتعالى
فلماذا لا أرض بقسمتي ونصيبي في هذه الحياة ؟

وأود التذكير هنا بأن هنالك فرقاً بين الشخص الطماع وبين الشخص الطموح
فالطموح يمتلك هدفاً محدداً واضحاً
ويحاول أن يصل إليه بكافة الطرق
ويتوكل على الله ويأخذ بأسبابه
فإذا نجح حمد الله وشكره وإن لم ينجح يرض بقضاء الله ونصيبه
ويحاول أن يعيد الكرة بالتوكل عليه
أما الطماع فهو لا يتوكل على الله
وإذا نجح يقول بأن هذا من فضله هو
وإن رأى بأن عليه ان يتقدم أكثر حتى على حساب اخرين فلا يتردد في ذلك..كل ذلك من أجل إرضاء طمعه وجشعه الأعمى

” يَا أَيُّهَا الَّذِينَ آمَنُوا لا تَأكُلُوا أَموَالَكُم بَينَكُم بِالبَاطِلِ إِلاَّ أَن تَكُونَ تِجَارَةً عَن تَرَاضٍ مِنكُم وَلا تَقتُلُوا أَنفُسَكُم إِنَّ اللهَ كَانَ بِكُم رَحِيمًا* وَمَن يَفعَلْ ذَلِكَ عُدوَانًا وَظُلمًا فَسَوفَ نُصلِيهِ نَارًا وَكَانَ ذَلِكَ عَلَى اللهِ يَسِيرًا ” .


قال صلَّى اللهُ عليهِ وسلَّمَ في حديث أَبِي هُرَيْرَةَ عند البخاري وغيره ” تَعِسَ عَبْدُ الدِّينَارِ، وَعَبْدُ الدِّرْهَمِ، وَعَبْدُ الخَمِيصَةِ، إِنْ أُعْطِيَ رَضِيَ، وَإِنْ لَمْ يُعْطَ سَخِطَ، تَعِسَ وَانْتَكَسَ، وَإِذَا شِيكَ فَلاَ انْتَقَشَ “


فكما رأيتم الرسول عليه السلام ذم الذين يلهثون وراء الأموال ولا يشبعون
فارض بقسمة الله وقل الحمد لله



الي خلاني اكتب هالتدوينة شفت مقطع من مسلسل قديم لياسر العظمة
اسمه مرايا..اكيد تعرفوه
الحلقة تحكي عن شب ما رضي بالفقر عند اهله وتركهم
وبس راح لضيعة ثانية بدو يحاول يأسس حاله
حكاله المختار بعطيك ارض وانت عمرها وبتصير ملكك مجرد ما تصير عامرة وتعطي ثمر
وصار يحكيلو المساحة وهو مو عاجبه ويضل يقول بدي كمان
عرفلو المختار انه هو طماع
حكالو ثاني يوم هاي الأراضي الواسعة ..تقدر تحمل هالخنجر وتضلك تركض بهالاراضي وقد ما توصل ..هاي الأرض بتكون الك
بس معاك للمغرب انه ترجعلي
وضل الشب يركض يركض يركض يركض وما خلص ركض
ومات تعب وهو يركض ويقول بدي كمان وبدي اكثر
لحتى صارت مغرب وما قدر يكمل ركض ومات محل ما وقف

بهالحلقة بحاولو يجسدوا الشخصيات الطماعة والجشعة بهالدنيا وينبهوا الناس انه الطمع عنجد بأدي للهلاك
ومو شرط هلاك جسدي ..هلاك في الروح نفسها وغضب وسخط من رب العالمين







ومثل ما بحكي المثل ..مال الدنيا في الدنيا
فلشو نضل نركض ونلهث وراها ؟
خاصة اذا الواحد ما كان عامل الي عليه بالشكل السليم تجاه ربه؟!
برجع وبأكد على نقطة انه ما بقول نضل قاعدين وما نكون طموحين
ونحقق أهدافنا
بس كلو يكون جنباً إلى جنب التوكل على الله وبالحلال
وحمده وشكره على الدوام لحتى ربنا يوفقنا

​

 

[A S T E R]

من عمق المعاناة ،، تزهر الموهبة





ما تتصوروا شو بحترم الناس سواء كبار أو صغار إلي بكونو يمرّوا بأوقات صعبة كثير بحياتهم
بس ما بيئسوا أو بستسلمو بسهولة !
نفسي ألتقي بهيك ناس وخاصة الأطفال منهم
إلي الواحد فيهم بكون ماكل هوا بعيشته
طالع من مدرسته وبيشتغل لحتى يساعد أهله المساكين

وبتلاقيه بيضحك ومبسوط في الي بعملو
ولا مش بس هيك !
بنجح لحتى يوصل لهدفه بالمثابرة والعمل الدؤوب
بتحس إحساسهم عالي في إلي بصير حواليهم
وعندهم انتماء لشعبهم أكثر من غيرهم ..ليش يا ترى؟
لأنه ببساطة هو انحرم من أبسط الأمور الي ممكن يطلبها أي طفل
لهيك بتحسو بشتغل على حاله كثيييير
لحتى يوصل لهدفه ويساعد الناس الي مثله وبعانو في حياتهم

ذكائهم وموهبتهم وكلامهم بخلي عيونك تدمع وانت تسمعلهم
وأحياناً انا بالنسبة إلي بحتقر نفسي لما أشوف مثل هيك طاقات جبارة قادرة على إنها تتكيف بمحيطها السيء ..ويكون عندها حلم وبتوصلو بالنهاية

صح سبق وحكيت قبل شوي انه الناس قدرات وتختلف عن بعض في كل شي
بس الصراحة وضعهم بخليك تقول بحالك أنا عايش حياتي تمام ومع هيك ما بعجبني العجب مرات او اتأفف وأتذمر من أمور تافهة

بستصغر حاله الواحد قدام هالأطفال أصحاب القدرات العالية على التحمل
أنا عمداً وضعت هاد التدوينة بعد كلامي فوق لحتى أذكر نفسي وإياكم
بأنه في ناس وأطفال ..ركزولي على أطفال عايشين في ظروف قاهرة جداً
ومع هيك متحملين وصابرين ومتوكلين على الله
وبسعوا نحو أهدافهم وبقوة وبعزيمة أكبر من قوتنا وعزيمتنا احنا يلي عايشين هنيين

ممكن قسم من الناس ما يأيدني بكلامي
بس عنجد هيك الأصل فينا احنا المسلمين
نضل متذكرين وحاسين ببعض
ومجرد انه نفكر ببعض وبحال بعض انه هالشي يهون علينا ويخلينا ندعي لغيرنا من كل قلبنا
- وكمان يزيل الاكتئاب الي حكينا عنه فوق -

يعني الصراحة أنا تذكرت جملة سكاي @SKY NET في احد تدويناته
لما قال عن جيل الألفينات
وإنه تفاجأ فيهم وفي طاقاتهم بعد ما قامت الثورة عندهم
وإنه كان ماخذ فكرة غلط عنهم

ومثل شبابنا الفسطينيين لما قامت انتفاضة السكاكين
كل الي ماتو وقتها كلهم صغار كثير
بس طاقتهم جبارة عنجد وبدهم يغيروا

وأنا من زمان بدي احكي إنه بضم صوتي لصوته وبقول إنه هالجيل فعلاً عظيم
ومثل ما فينا السيء والحسن وكمان همي نفس الشي
فيهم الصالح والطالح
وفيهم الطموحين والجبارين والقادرين على تغيير الواقع دون خوف
وفيهم الموهوبين المخبيين بين ثنايا البيوت والمخيمات الفقيرة
بس مش قادرين يوصلو لضعف الأمكانات
وفيه منهم وصلو بعزيمتهم وإصرارهم وثباتهم وحسّهم المرهف في أمتهم


في برنامج تحدي القراءة العربي ،، شفت هاد الشي الي بحكي عنه
تابعتو من فترة قصيرة ولأول مرة بسمع فيه
للأسف دايما الاعلام بركز عالبرامج الساقطة المقرفة وبشجعو أطفالنا عليها وبروجولها في إعلامهم

فبتغطي عالبرامج الهادفة والمفيدة والي بتخلي الناس تفكر لحتى تنهض بنفسها عن طريق هاد الجيل العظيم

كلهم يا جماعة أطفال بعمر الورود
ما بتجاوز عمر الواحد فيهم 15 سنة
كلهم اقل من هيك
وطبعاً كلامهم كله فصحى في فصحى
والتحديات الي بطلبوها منهم ما فيه أروع منها
بطلع منهم أروع وأجمل شي ممكن تسمعو
بكفي لما تسمع كل واحد فيهم لما يحكي عن هدفه
كل أهدافهم سامية وملهمة ومعبرة وبتفيد المجتمع
تفكيرهم بتحسه يفوق أعمارهم بسبب الكم الهائل من الكتب الي بقرأوه قبل اشتراكهم بالبرنامج وهو خمسين كتاب

بالنسبة إلي هاد هي الموهبة
كلهم صغار موهوبين بطريقة ساحرة وكثير منهم مثل ما قلتلكم أوضاعهم صعبة جداً
بس مع هيك ثابروا واستمروا لحتى وصلو لهالبرنامج وشاركو فيه ووصلو صوتهم

كل الاحترام والتقدير لمثل هيك مواهب عظيمة
وكل الاحترام لهالاطفال في كل العالم
لكل طفل حاول وما نجح ولكل طفل حاول ونجح ووصل
وكل الاحترام للي بحس في إخوانه وبفكر فيهم عنجد وبدعيلهم من قلبه


الجيل هاد عنده طاقة
الجيل هاد عنده موهبة وطموح
الجيل هاد بدو بوصلة لتوجيهو بس
ورح تشوف شو رح يعطيك
الجيل هاد بس بدو شرارة وبعدها لحاله بيتحرك وتلاقيه حقق الي ما حققوه الكبار


الجيل هاد رح يشهد نهضة الامة الإسلامية بإذن الله من جديد
ورح تكون على إيده

​

 

[A S T E R]

تعليقي على مسلسل The Last Kingdom



زمان ما حكيت شي عن اخر المسلسلات والأفلام الي شفتها ورأيي فيها

مع إني شفت باخر فترة كثير بس بتعاجز افتح واكتب

اليوم فتحت المنتدى بس لأكتب بالمدونة وقلت بدي أكتب فيها لأزهق

فحبيت هسا أحكيلكم عن هاد المسلسل الرااائع

المسلسل مكون من ثلاث مواسم
وشكله فيه كمان أجزاء

لحد هسا خلصت جزئين وبلشت في الثالث امبارح
الجزء الأول والثاني كل واحد فيهم من ثمان حلقات والثالث من 10 حلقات


قصة المسلسل تحكي عن الحقبة الي كانت فيها إنجلترا مقسمة ومليان فيه ملوك
الحقبة الي فيها الفايكنج -الدنماركينن - كانو يحتلوهم كثير ويقتلو ويسرحو ويمرحو في هالبلاد
كانو همج بكل ما تحمل هالكلمة من معنى ومقرفين

المسلسل سلط الضوء على قصة محارب ومقاتل..هو ابن احد الملوك
ولكن بحتلوهم الدنماركيين وهو صغير
وبخطفوه وواحد منهم بقرر انه يربيه ويخليه مثل ابنه
بعد ما عرف الولد انه عمه اخو ابوه بدو يرجعو بس عشان يقتلو لحتى يوخد الملك والحكم في مقاطعتهم

بكبر هالشب وبصير مقاتل قوي مثلهم
ولكنه ابوه الدنماركي وكل عيلتو بموتو
فبروح يوهب نفسه للملك ألفريد ويقاتل عشانه وبهزم الدنماركيين
يعني بعد ما تربى وعاش كفايكنغ ..بصير بالاخير يقاتل في صفوف الملك ألفريد يلي بدو يوحد البلاد ويخليها إنجلترا واحدة ..لحتى يقدر بالنهاية يرجع لبلده وينتقم من عمه الي اخذ حقه الشرعي في الملك
بس هو تصرفاته مثل الدنماركيين ومش مسيحي..وثني مثلهم
ولكنه بقاتل مع الملك..تناقض صح


وبتصير أحداث كثييييرة حلللوة ورائعة جداً

التمثيل لكل الأبطال خورافي بصراحة..ما بعرف أساميهم الممثلين
من البطل نفسه أوتريد اسمه بالمسلسل..
للملك ألفريد ومرته الصارمة
والراهب ..والمقاتلين أصحاب اوتريد..كل واحد الو نكهة خاصة بالمسلسل وتمثيله بجنن

القصة والحبكة ككل عجبتني
والاحداث ما بتحسها خيالية او مبالغ فيها لهيك رح تستمتع فيه
التصوير والإخراج كان رائع جدا
الحلقات مو كثيرة لهيك كل حلقة بكون فيها كمية احداث كثير

لقطات الحروب والقتل حبيتها الصراحة هههه
انا بشكل عام من محبي هالنوع من الأفلام والمسلسلات سواء كانت تحكي عن احداث خيالية او لا
المهم انه هاي الحقبة من الزمن بحبها

باختصار المسلسل يستحق المشاهدة ان كنت من محبي هالنوع من المسلسلات وان كنت مثلي من محبي المسلسلات القصيرة
فأنصحك بمشاهدته



عالهامش : رأيكم بالطقم الجديد؟
كل صفحة بحب أبداها بطقم جديد
مرة ميلي ومرة تولاي ومرة كارين وهالمرة من بيبي طلبت
وكل تصميم احلى من الثاني ، مبدعات كلهم ماشاء الله عليهم

@B E B E
يسلمو يا قلبي ع الطقم الحلو كثير حبيتو ..مذوقة