يمكن الشي الوحيد بلعالم اللي يريحني و بجد احس بسعادة و تغيير بنفسيتي لما أسويه هو الرسم
حرفيا كأني أكون بعالم سيء فجأة انتقل لعالم مختلف تماما ...
كنت اتمنى أنه وقتي كله أوهبه فقط للرسم لكن خططي دايما تفشل .. و حاليا لو رسمت ارسم بشوق لاني انقطع فترات ..
الفترة الأخيرة رسوماتي كانت دايما تعبر عن نفسيتي و عني .. و بتذكر هالرسمة
رسمتها لما بدا الشتاء و كنت وحيدة و حزينة جدا و بمرحلة اكتئاب
هالمرحلة الحمد لله راحت و انقضت لكن الرسمة فقط رجعت الذكريات ..
بوقت ماضي .. كان كل همي بالنسبة لموهبتي اني ألاقي نفسي و أسلوبي بالرسم و بعد تجربة لأكتر من نوع من الفن و الألوان
اكتشفت اني فقط برتاح و أنا برسم بالمائي و الزيتي " انسانة تنتمي لعالم فرش الرسم "
و انه أكثر شي يجذبني بأدوات الرسم هم الفرش و لوحات الكانفاس و دفاتر المائي
و اني من ناحية الرسم استمتع بأي شي له علاقة بالفن و بالرسم
سواء كان رصاص او زيتي او أكريلك أو ألوان باستل أو الوان خشب ..
و اني على الأكيد بميل للرسم الهادئ الرايق اللي بحس اني بحط روحي فيه
يعني كأني أرسم نفسي و كأني اصب مشاعري كلها بالرسمة
فقط رسم المائي بصب روحي فييييه
رسمة بحبها
و من سنتين تقريبا اكتشفت ميولي لتشكل عجينة الصلصال بأنواعها
و حاليا عم اشتغل بتشكيل كيك السكر و تزيينه فأخذت خبرة بصنع الكيك و اكتشفت ميول ثانية لي ما كنت مكتشفتها بحياتي
فالسنة الماضية كانت انتقال كبير بحياتي و نقدر نقول جميل و متعب و منهك و مهلك
لكنه يحمل راحة كبير لأني حسيت نفسي انسانة منجزة بهذه الحياة
ان شاء الله لو صار لي وقت رح اسوي غزو لقسم البنات و الرسم و احط وصفاتي و تزيناتي و رسوماتي
الانسان بكل منعطف بحياته رح يكتشف جوانب كثير بنفسه
عيش و اكتشف نفسك و طوووورهااا طورها
من الغباء انك تكون ساذج زيادة عن اللازم .. ما حقول طيبة لانه كثر الطيبة سذاجة !
الحياة تجارب .. لو الحياة أعطتك فرصة لتروح بطريق جديد
لازم تمضي فيه و تغير الروتين اللي كانت مبنية عليه حياتك
ما تتراجع عن هالمنعطف الجديد بحجة الراحة أو عدم الرغبة بالتغيير
ممكن الروتين اللي تسير عليه حياتك مو هو الطريق الصح لك و يكون بيدك التغيير لكن عقلك رافض هالشي ..
أحيانا الناس و الظروف بتخليك تتعود على أمور انت مالك رغبة فيها
لحد ما توصل هذه الامور لكونها روتين معتاد و شي مقبول رغم انه مرفوض
الفكرة فقط بإنك اعتدت
و قديش هالشي صعب و مزعج
انك تكون تعودت على تعب او شي غلط المفروض انك تقاومه و ترفضه من البداية
الحياة تحتاج شجاعة و قوة ما تحتاج طيبة و سذاجة
تحتاج عقل و قلب مع بعض
القلب لوحده ما ينفع
هالسنة كنت مفكرتها قصيرة و مرت بسررعة بس لما أرجع بذاكرتي و أشوف شو مر بهالسنة أمور نفسيتي بجد تتعب و بس مجرد تذكر لاحداث السنة الماضية و تطورات حياتي الرتيبة ..
- بداية السنة كانت تثبيتي بالشغل بعد افتتاح المحل و تذبذب الشغل ما بين حجر صحي وقت الكورونا كانت داخلة جديدة و منتشرة عنا بغزة . - توقيف شغل المجات بشكل نهائي بعد اخر مرض مرضته بسبب مادة التنر . - بداية مرحلة جديدة بحياتي و كانت صعبة لحد ما للأسف بس كلو صار ذكرى ماضية . - قراري انهي رسوماتي القديمة لسنة 2020 و رسمت رسمات جديدة و لا كملت رسمة وحدة منهم " يعني ابتعادي عن عالم الرسم بشكل خطير " - سرت من محبين تصوير السماء بدل الرسومات و سرت انسانة صباحية بإمتياز بعد شهور من الأرق . - فجأة ظهر عندي شغف التسوق للبيت و صرت اروح للمول اتسوق حاجيات البيت . - زيادة ايام الحجر المنزلي و تسكير حينا كاملا و تصنيفه كأخطر حي بحالات الاصابة . - جاء رمضان و كانت احداث حي الشيخ جراح كتير متطورة و على نهاية رمضان تطورت المواضيع لتوصل لحرب على غزة كانت ارعب ايام اعيشها بحياتي و عدت بعد ما اخذت كتير ارواح و من ببين الارواح كان اكثر مكان تدمر بغزة هو الشارع اللي فيه محل شغلي و الاضرار كانت كبيرة جدا لدرجة الشارع بقى مقفل فترة طويلة و لحتى الأن عمليات الهدم و البناء شغالة فيه فأكثر روحتي للشغل و وصولي له كانت معاناااااة .. ربنا يرحم جميع امواتنا . - بعد الحرب كانت بداية جديدة بحياتي و حياة الكل لكنها كانت بداية فاشلة و رجعنا لحالة الاكتئاب من جديد . - تحولت من انسانة تكره الطلعات و الخروج برا البيت لانسانة تحبها و تحب تطلع مع ناس تيجي على مزاجها . - زواج اقرب صديقة لقلبي و عشت شعور صديقة العروسة و حضرت معها تفاصيل تجهيزها . - حضرت حفلة لاغاني سبيستون و كان هالشي من اكتر الاشياء اللي كنت اتمنى اني احضرها و كان الشي حمماااسي بشكل رهيب . - أخذت تطعيم كورونا التطعيم الروسي و عانيت معاناة و كوابيس و سخونة و ألم شديد ربنا لا يعيده . - اشتغلت مع الانروا بالاضافة ةوظيفتي الاصلية و تعرفت ع اجمل ناس ممكن اتعرف عليهم بحياتي و كان هذا اجمل شي يصير لي خلال السنة . - خلصت عقدي مع الانروا و انصبت بلكورونا و ألمها جدا متعب . - بديت مرحلة تفاؤل جديدة بحياتي على أمل التغيير الجذري و حطيت خطة لمستقبلي على امل تحقيقها خلال السنة الجديدة . - سويت دايت لاول مرة بحياتي . - سرت خبيرة صنع كيك و حلويات و عم افكر افتتح مشروعي الجديد .
في علم النفس : خمس أمور يجب أن تصمت عنها : 1- خطتك الكبيرة 2- حياتك العاطفية 3- مدخولك الشهري 4- خطواتك التالية 5- مشاكلك العائلية في علم الحياة هالكلام صحيح 100%
من أكتر الأشياء اللي كنت حابة اقتنيها
هي الروايات اللي بحبها .. فكل رواية تعجبني حتى لو قرأتها انترنت بحب يكون عندي كتاب منها
مو عارفة ليش بس انا الأمور اللي بحبها عادي ممكن ارجع أقرأها مرة تانية و ممكن ارجع اتابعها مرة تانية ما عندي مشكلة
المهم ميلادي كان 27/12 ما صار لي فرصة أكتب عنه بسبب الانشغال
لكنه كان حافل جدا بشكل كبير و أنا فعلياً ما متعودة على هالشي
كل اللي بحبهم و بحبوني جابولي هدايا خلتني استغرب
انه معقول الشخص لما يحب حد و يكون قريب منه ينتبه على تفاصيله لهالدرجة ؟
يعني ادق التفاصيل يفهمه شو بحب و شو بكره و شو بيفضل و شو ما يفضل
من أكتر أكتر الهدايا اللي بجد من قلبي استغربتها هي هالهدية
سلسلة روايات هاري بوتر .. طبعا بدون مناقشة الكل يعرف الكتب غالية
بس هالهدية غالية بسبب قيمتها المعنوية
و بجد لحتى الأن مستغربة انه حد يحبني و يفهمني لدرجة انه يعرف اني احب هالشي بدون ما أتكلم عنه امامه
بس اكتشف هالشي من قوة ملاحظته !
في أمور صعب الانسان يتجاوزها خلال يومه ..
خصوصا لو كانت مؤلمة لدرجة انه العقل ما يوقف تفكير فيها
أنا الفترة هذه بعيدة كل البعد عن السوشيال ميديا
لكن الاخبار بتوصلني بطريقة ما ..
محزن جداً انه توصلني ترند اغنية أو رقصة او فيلم او مسلسل
و أكون ما قارئة عنهم شي بالنت بس من كتر انتشارهم الا ما يوصل لاذنك شي عنهم
العالم كتير يتطور بس الانسانية تتراجع
صعب كتير علي اسمع انه في اطفال ماتت من البرد
مو طفل او طفلين اكتر من عشر اطفال مرة وحدة يموتوا من البرد
كل ما احاول اتجاوز هالموضوع عقلي و قلبي يقولولي هاد موضوع لا يمكن تجاوزه
بالنهاية جاء لعقلي المشاريع الخيرية الاخيرة اللي طلعت بهدف المساهمة بمساعدة هالفقراء و اللاجئين
و ع اساس نصف هالاموال تروح للناس اللي رح تساهم بتوزيعها !
هو الفقر ليه لسة منتشر ؟
مو بسبب أكل مال المحتاج ؟
قديش حياتنا و تطورنا تافه قديش في عمارة بس بدون اعمار
قديش في بشر بس فش انسانية
قديش هالحياة فانية .
الشي اللي شاغل بالي من يومين و بال العالم كلو اكيد الطفل ريان بكل حوادث الابار اللي صارت على فترات سابقة كان قلبي ينقهر ع الاطفال اللي ماتت بهيك حوادث و اي حادثة مشابهة اهرب من مواقع السوشيال ميديا لأني أخاف قلبي ينقهر على حد
الطفل ريان من لما عرفت الخبر و انا عم استنا .. ما عندي الجرأة ادخل ع البث لكن قلبي ما وقف دعاء له و لأهله و قلبي و الله كله أمل يا رب لا تقهر قلبي عليه .
اللهُـم فرحةً كفرحة يعقوب بيوسف .. و الله مو بس أهله قلوبنا كلنا حتقر بشوفته طالع سالم .. يا رب معجزة من عندك
دائما غادر المكان اللي يخليك ترهق طاقتك و نفسيتك ما في شي بالدنيا أغلى عليك من نفسك من جسدك و من صحتك .. دائما مهما تخليت عن قناعة ربنا رح يرزقك بدايات رزق و سعادة تجبر قلبك و تعوض تعبك و وجعك و صبرك .
اقدر اقول انه كل سنة ادخل بمرحلة جديدة حاسة نفسي جديد داخلة ع الحياة و عم اتجاوز لفل ورا الثاني
.gif "at1 ق1")
.gif "At (209) ش2")
..gif "At (138) ه1")
.
. 
...gif "At (425) ب9")
