مو عارفة ليه لما سمعت هالاغنية حسيتها تشبه اغنية عربية أنا سامعتها ..
طبعا الأغنية حلوة حبيتها كلماتها عميقة و حزني و جوي
المهم بقيت استرجع الألحان بعقلي و مدري حسيتها شوي قريبة لهاي الأغنية مو عارفة نفس اللحن او لا حاسة صار عندي تشوه سمعي
حكايتي مع هالأغنية
هالاغنية اول أغنية اجنبية اسمعها بحياتي و انزلها فيديو على موبايلي
طبعا وقتها ما كان في موبايلات متطورة متل هلئ
بس هي الفيديو الوحيد اللي كانت ذاكرة جوالي تسمح بوجوده
المهم كنت لما اسمعها اتأثر كثير رغم اني كنت لسة ما أفهم المعاني منيح
بس لحنها كان يعجبني و الطريقة اللي تغني فيها المغنية هادية و حزينة و عميقة
فهالشي كان يدخل احساسي من جوا
و لو ارجع لدفاتر سكتشات الدراسة و المذكرات حتكون هالأغنية مدونة بكل مكان من كثر ما كنت أحبها ...
بعدها تعرفت على أغنية broken angel
و طبعا كنت افهم بس شو تقول المغنية الاجنبية أما الثاني شو يغني أبدا أبدا ما أفهم
كنت متعلقة فيهم كتير و وقتها بدا حبي للأجنبي و سرت أسمع لغير أغاني بس طبعا ما أعرف مين المغنيين اكيد
ما عدا سيلينا و جاستن بيبر هوووس المراهقين كانوا بهديك الفترة اغانيهم who says و كمان Baby
هالفترة عدا عليها أكثر من عشر سنين لكن كانت أيام بسيطة و جميلة
تكتفي بأغنية تدور عن معانيها و ما كان النت ماخذ اولوياتنا ... كله صار ذكريات .. و يمكن جاء وقت الوداع لعالم الانترنت .
من أكتر الأغنيات اللي خلتني اتجه للفن الفرنسي
بس بصراحة ما حبيت الا أغاني هالانسانة
تغني بعمق و بساطة و طبيعية بكل فيديوهاتها و أغانيها كلها لها طابع جميل
لكن هالأغنية تبقى المفضلة لي .. تقريبا لي سنة ما سمعتها رغم اني قبل كنت اسمعها كتير
حاليا حسيت بإحساس الا٦نية و معانيها أكثر و تمنيت اني مكانها ..
هالأغنية كمان احبها كتير لسبب واحد انها تشرح الاكتئاب بشكل مزبوط و تحاول تبعدك عنه
أكتر اغنية بالنسبة لي شرحت الاكتئاب و جسدته و حذرت منه
الوصف جميل و الأغنية جميلة و الاحساس اجمل حطيتها مع الترجمة للشرح
كيف ممكن نقول عن انسان انه شجاع .. لو كان هذا الانسان بيملك حياته فعلاً أكيد كل شخص فينا له قصته و معاناته الشخصية و حياته اللي يفيق كل يوم يحارب فيها
و لنا احلامنا و طموحنا و انهزاماتنا و انكسراتنا و مشاكلنا
لكن متى تقدر تقول عن نفسك شجاع و انك قد الحياة هذه فعليا ؟
هالشي يصير بشكل واحد بس لما تملك القدرة على تغيير حياتك و نفسك للأفضل بدون ما يتأثر قلبك أو يقسى ..
أكيد كل شخص مر او عم يمر بفترة صععبة من حياته .. هالصعوبة ممكن تكون دراسة او حلم لا يملك تحقيقه او خيار مجبر عليه او هدف ما قادر يوصله او مشكلة وقع فيها
او حتى عقبات تواجه حياته بدون القدرة على تخطيها ..
أنا مو شخص له تجربة كبيرة بلحياة كونني شخص منطوي و جديد بديت أصير شخص اجتماعي بشكل كبير و سرت جريئة لدرجة أهلي عم ينصدموا انه طابع الخجل الزائد عن حده توقف عندي
ما حقول شخصيتي عاجبتني او اني راضية عن نفسي انا شخص كره نفسه جدا لحد ما شفت انه كرهي لنفسي بالاساس كان بسبب اخطاء يومية ارتكبها
و لما نظرت من نظرة ثانية اكتشفت اني انسانة عندي ضمير لدرجة اني احاسب نفسي كل يوم قبل النوم و بعمري ما كنت شخص مو عفوي او ما يقول رأيه بصراحة و لو جرحت شخص اعتذر له لكن ما اتراجع عن صراحتي
شخصية النت مبتعدة جدا عن الواقع الانسان مهما يوصف نفسه مو متل ما الواقع يوصفه
مثلا اوصف نفسي اني شخصية جامدة و جدية و صريحة بينما اللي يعرفوني يشوفوا اني انسانة كيوت و القط ماكل عشاها
مع اني جدا قوية و ما اخلي حد يدوس لي على طرف حتى لو كنت سريعة التأثر
المهم الانسان من مواقف الحياة اللي يمر فيها سواء اوجعته او اسعدته يتعلم كتير أمور و أولها الصبر و ثانيا انه الشخص ماله بهالوجود غير عائلته
بما اني شخص دخل بفترة من حياته .. فترة الاكتئاب و خليني اقول كانت فترة طويلة و متعبة و مرهقة نفسيا و شعوريا و جسديا
الانسان اللي يتخطى هالفترة يقدر يتخطى اي شي بلحياة ..
لهيك لأول مرة بعترف بيني و بين نفسي اني انا راضية عن نفسي عن صفاتي عن احلامي عن طموحي و عن افكاري و عن شخصيتي و حتى عن اخطائي ..
الدنيا كثير فانية
القهر اللي بالقلب ربنا بيعلم فيه و هو القادر ع حله
المهم القلب يكون صافي
ربنا عنده حل الأمور كلها من صغيرها لكبيرها لهيك الانسان ينام مرتاح
لا يخاف على حقه و لا يحمل هم بهالدنيا لانها فانية فانية ...
أنا شخص غير معروف لك .. بكتب جانب مني هنا للتفريغ مو أكثر
مو عشان تقرأه و تاخذ أفكار عن شخصيتي و تحللني حسب آرائك
هذا جانب يكاد لا يذكر من ايامي من شخصيتي من احلامي و من شعوري
وضعته هنا لأنه هذه المدونة ملاذ لي مو لتسليتك الشخصية
لهيك رجاءاً طالما انت ما تعرفني عن قرب فإعفيني من سوء ظنك أو سوء أفكارك أو سوء آرائك
اللي لا رح تقدم و لا تأخر غير انك تأذي شخص ما استحب كلامك أو أسلوبك الشبه ساخر
و كل انسان حر بشو يتقبل او شو ما يتقبل
و كل انسان مسؤول عن كلامه الجارح أو اللبق
بس لازم تتعلم درس كتير منيح انه الناس بغنى عن آرائك .
احم احم بما انه بكرة اجازة و الحمد لله أقدر أخذ نفسي من الشغل
حابة أتكلم عن رأيي بمسلسل تابعته الأسبوع الماضي طبعا كل العالم تتكلم عن هالمسلسل كأنه شي واو
و انا قلت نركب الموجة و نتابع هالواو اللي يتكلموا عنه الناس و طوشوا عقولنا فيه بالسوشيال ميديا و انا بس جالسة أهرب من تطبيق لتطبيق حتى ما احرق أي لقطة من المسلسل عشان ناوية نية صادقة اني اتابعه
و بهالمناسبة اقول لنفسي
المهم المسلسل اللي رح اتكلم عنه " لعبة الحبار "
انا عن نفسي احب تمثيل الكوريين جداً و أحس لهم شخصيتهم الخاصة بلتمثيل مميزة ما حد يشبههم
حبيت الشخصيات كلها جداً و كلهم أدوارهم مناسبة لهم و كلهم ابدعوا جداً
المسلسل كان حماسي بكل حلقة كنت اتشوق شو اللعبة القادمة .. فعنصر التشويق بالنسبة لي كان موجود
اممم قرأت آراء كتير للناس في ناس كتير كانت متعاطفة بمواقف كثير .. بس انا الصراحة ما تعاطفت و لا بأي موقف صار من اللي الناس تعاطفوا فيها مدري ما حسيت بحزن او تعاطف بأي مشهد و كان كل شي يصير متوقعته مسبقا
حبيت شخصية الرجل العجوز رقم واحد لكن لما كان رح يموت باللعبة و من قبلها كنت حاسة انه هو وراء كل شي لهيك ما انصدمت ابدا فيه و لا انصدمت انه لسة عايش
ما حبيت مشاهد العنف أبداً ابداً و اطلاق النار بالنسبة لي ما كانت مشاهد عنف لاني كنت اضحك ع منظر الدم الغير واقعي و المبالغ فيه
مشاهد العنف متل اجبار البطل ع توقيع بيع الاعضاء و الضرب و هذه الأمور انا ما حبيتها
ما عجبتني الايحاءات و المشاهد المقرفة اللي صارت بلمسلسل و غير هيك ما كان لها داعي ابدا و كأنه هالشي صار موضة فقط لينشهر المسلسل لا اكثر و لا أقل
بس خليني اعترف انه كل ممثلة كانت موجودة اتقنت دورها بجدارة
ما حبيت مقاطع تشريح الجثث و بيع الأعضاء و نشرهم لهالمشاهدة المقرفة بالتفصيل هذه اشياء بجد قلبت لي معدتي و ما كنت اقدر اشوف او اسمع الصوت .. غير هيك جابوا المشهد على انه خرق لأخلاقيات اللعبة رغم انهم خرقوا اخلاقيات ثانية هم نفسهم و ما شفت هالشي الا تناقض لا أكثر و لا أقل
هذه بس امور ما عجبتني بالمشاهد
خليني احكي عن القصة ككل .. ما حسيت القصة لها هدف من البداية الى النهاية ما في هدف نهائي و المسلسل بكل مواقفه كان كله تناقض بتناقض
ما تحقق اي شي يذكر له فائدة و لا شفت قصة اي شخص دخل هاللعبة و ما تعاطفت مع حد فيهم و لا شفت دخولهم للعبة سبب نهائي للبحث عن المال
مدري حسيت كل شي ما راكب على بعضه و لا متطابق و كأنهم ركزوا على مراحل اللعبة اكثر من تركيزهم على باقي الأمور
حسيت انتهى المسلسل و في أمور كتير ما انشرحت او تكلموا عنها بإقتضاب و كان الدور الأكبر لمراحل الألعاب و للأمور غير الضرورية و كانوا بيقدروا يستغلوها بشرح امور ثانية ما واضحة او مالها نهاية
بالنهاية بالنسبة لي حبكة القصة ما مترابطة و ما وصلت لي و لا فاهمة ليش المسلسل بدا و لا ليش انتهى كأنه ما في هدف و لا في قصة
اوك المسلسل اخذ ترند و حبيت الممثلين جدا و جد يستحقوا و كان ادائهم رائع لكني ما حبيت المسلسل
يمكن لووصار منه جزء ثاني و أكملوا بعض الأمور او عدلوا او احرزوا نقطة ممكن احبه او اتقبله
لكن حاليا هو بالنسبة لي اخذ ضجة كبيرة على لا شيء
أنا من الناس اللي دمعتهم قريبة .. ممكن اي موقف يصير قدامي يأثر فيني انفجر من البكاء اي موقف كان او ممكن يحصل لو أثر فيني اصير ابكي .. هذا بالمواقف اللي تثير مشاعر الحزن او التأثر فقط
لكن لو زعلت من حد اتخذ وضعية الصمت ممكن هالشي يستمر لايام و مصيبة لو حد جاء كلمني لاني بكل بساطة اكون حابسة دموعي يعني اول ما انطق حرف رح يصيروا شلال
و الأهم اني ما احب و مستحيل ابكي قدام شخص مهما كان و طبعي كتوم جدا لو زعلت اكتم زعلي و اتخذ وضعية الصمت فلو جاء اي حد يكلمني و بقيت ساكتة حيتخذ فكرة غلط عني اني مطنشته او ما معطيته وجه
و انا من الناس الكتومة جداً ممكن اتلقى اي اذى من اي شخص بدون مواجهة و ممكن اتعرض لمواقف تضرني نفسيا و جسديا بدون ما اعارض او اسوي مشاكل اتقبل و اتحمل و أصبر بصمت لحد ما كل شي ينتهي
كل شخص بهالحياة لو عرفني سنين يفكر نفسه فاهمني و عارفني كأني كتاب مفتوح و الشاطر اللي رح يتفلسف او ياخد افكار و توصل فيهم الدرجة يقرروا عني
و انا اهز لهم راسي و أمشي معاهم و أخذ كل انسان على قد عقله ..
صفة البكاء السريع و الكتم جواتي اسوأ شيئين بشخصيتي لكن كل سوء بشخصيتي قررت من جديد اتقبله
و شي جميل تتقبل شخصيتك بكل عيوبها و مميزاتها و تكون عارف عن نفسك و مقتنع فيها بغض النظر عن الناس العمياء اللي بس تريد تقرر عنك حياتك و شخصيتك و نفسيتك
و هالناس اقابلهم بشكل يومي و أكبر همومهم هي نفسهم فقط .
أعتقد الانسان بتيجيه فترة يتعب من الناس حوله
بيكون موجود بين الجميع لكنه بالحقيقة عقله غائب عنهم
في ناس للأسف ترفض انها تخلي هالانسان غائب عنهم
طبعا مو حبا فيه ابدا .. فقط لمجرد الفضول و التطفل على حياته
هالأشكال مدري شلون نقدر نتخلص منها و من تطفلها و نحنا للأسف مضطرين بشكل يومي نتعامل معاها ...
حتى التجاهل ما عاد حل معاهم
.gif "At (138) ه1")
.gif "At (102) ض1")
.gif "At (209) ش2")
.gif "At (149) و2")
.gif "At (425) ب9")
.png "At (71) و1")