الشي الوحيد اللي اعرفه و أفهمه ! انو مثل المؤمنين في توادهم و تراحمهم و تعاطفهم كمثل الجسد الواحد اذا اشتكى منه عضو تداعى له سائر الجسد بالسهر و الحمى .
انا كيف اكون مؤمنة مسلمة مصلية من أمة محمد أشوف اخواني ينذبحوا و ما ابكي !
البنت اللي انخطفت قدام ابوها بالعراق و انقتلت و تعذبت اشد تعذيب و هي عمرها ما تجاوز ال 19 سنة هذي ايش ذنبها ؟!
مو بس هي اللي انخطفت غيرها كثير انخطفوا و ربنا أعلم رجعوا لأهلهم و لا ما رجعوا !
مو بس هي انقتلت غيرها كثير ماتوا و راحوا فداء للوطن و لقضيتهم و لثورتهم
شو الاشي اللي جداً رائع بحرق قلب ام و اب و شعب كامل عايش ع القهر وو الجوع و الفقر .
ذول اللي ما ملاقية لهم أي وصف سيء لانهم تخطوا كل الأوصاف مفكرين الدنيا دايمة لهم للأبد ؟
مفكرين انه ما في عقاب او حساب او انهم مخلدين في الدنيا رح يحكموا للأبد و ياكلوا الفلوس ببطونهم !
دول مو بشر و لا حتى حيوانات الحيوانات اترقت و ارتفعت أعلى المراتب عن افعالكم حتى الوحوش ما سوت اللي تسووه
اي تجبر بالارض هذا ! حسبي الله و هو نعم الوكيل !
من زمان حابة أنزل هالتدوينة من الشهر الماضي لكن ما صار نصيب لأول مرة حابة أتكلم عن سنة من سنيني سنة 2019 ، هالسنة أول سنة أقضيها بالبيت بعيداً عن الحياة الدراسية و ما شاء الله هالسنة كانت زاخرة كثير بكل شي سيء بدايةً ، كنت كثير متحمسة لها لأنو أول سنة بدون دراسة لكن ظني خااب لأنو صار عندي اكتئاب بدأت السنة بالرسم بشغف شاركت بأول معرض بعد ما كنت مقاطعة المعارض لأول مرة أشارك بمعرض رسم على الزجاج المعرض كان فاشل جداً ، لكن السنة هذه كانت مليئة بالتقدم من ناحية الرسم على الزجاج ، لو أعد عدد المجات " الأكواب " اللي اشتغلتها هذه السنة فقط اتوقع بيطلع عددها أكثر من 70 مج تم الرسم عليها بيع أغلبها و الباقي كان هدايا تقريبا هذا الشي الوحيد اللي اعتبره جيد خلال هالسنة من الناحية العملية الفنية . لبيع هاي الأعمال عملت صفحة على الفيس بوك و الانستجرام أبيع من خلالهم عينة من الأشياء اللي أشتغلها ،،
من الناحية الشعورية هالسنة كانت مسوية سباق مين رح تكشف لي من الوجوه المزيفة بحياتي بالأول و الحمد لله انكشفت ثلاث وجوه و أسرار كثير مخبية عني طلعت و ظهرت للعلن هالشي أعتبر نفسي تخطيته بضعف و بصعوبة و في بعض الأمور ما تخطيتها لحد الآن لكن هالأمور اللي انكشفت خلتني أحاسب نفسي أكثر و أحط اللوم ع نفسي أكثر و أقلل من ثقتي بنفسي أكثر و تراكمات كثير جت فوق بعضها فجأة لقيت نفسي دخلت بحالة اكتئاب امتدت لشهر و نص تقريباً و خليني أقولكم اللي يعيش بفترة اكتئاب بعد التراكمات تفكيره ما يكون سوي نهائياً .
الحمد لله تخطيت هالمرحلة و حليتها بداخل نفسي لحد ما تخلصت من هالمرحلة تماماً وبدأت اتجه لمرحلة جديدة و ان كانت قصيرة لكن أعتبرها أكثر مرحلة مريحة في السنة .
بعدها دخلت بتحدي جديد بيني و بين نفسي من ناحية الرسم " تعليم نفسي الرسم بألوان الزيت " و لا زلت ما انهيت هالتعليم لكني مستمرة فيه لحد ما أرضى عن نفسي و فخورة بإنجازاتي رغم انها قليلة لكن انا اعتبرها كثير لانها كانت بمرحلة قصيرة جداً . للي حابب يشوف رسمي أكثر يتابعني انستجرام لأني أنزل ستورياتي و أنا ارسم هناك حسابي هون
Welcome back to Instagram. Sign in to check out what your friends, family & interests have been capturing & sharing around the world.
www.instagram.com
نهاية آخر شهور من السنة كان تحدي جديد و هو اشتراك بمسابقة و هالفرصة رغم اني ما فزت فيها لكن فتحت لي أبواب و نوافذ جديدة أنا ما كنت شايفتها من ناحية الرسامين بمدينتي و رغم الخسارة الا انه معرض اللوحات كان رائع جداً و ملهم جداً لآفاق جديدة قررت انتهجها بسنة 2020 و هون مشاركتي بالمسابقة لوحتي الحجم " 100×70" الألوان زيتي على كانفس
و الحمد لله نهاية السنة كانت جداً جميلة لأنو عيد ميلادي كان في آخر أيام هالسنة و الناس العزيزة على قلبي قدمت لي فرحة كبيرة و الأجمل من هيك انهم خلوا سنتي هي مسك الختام و الحمد لله الهدايا جتني بالتدريج من 26 ل 28 و عيد ميلادي كان يوم 27 \12
أهم شي بالهدية كان بوكيه الكابتشينو و هيك الناس اللي بيحبونا بيعرفوا كثير منيح شو بنحب ، آخر هدية وصلتني هون بلمنتدى من الحلوة @سَحابة أجمل تصميم ينهدى لي و فرحت من جوا قلبي عليه
و هيك بتكون انتهت سنتي بشي جميل و الحمد لله ، و بدأت السنة الجديدة بناس أحبها جداً ما أعتبر أول شهر بهالسنة بكامله جميل ، لكن اول كم يوم فيه كانوا حلوين مع انه الأحداث بعدها كثير تغيرت و كثير أمور تحطمت فيها توقعاتي لكن أتمنى من قلبي و متفائلة انه هالسنة رح تكون خير بإذن الله
لأول مرة يجي ببالي أكتب عن شغلة منتشرة كثير ع السوشيال ميديا و يا ريت كلامي يدخل شوي لعقول الناس اللي خليني اوصفها بناس ما تحس ابداً .
قبل فترة دخل لص ع بيت نانسي عجرم و حامل سلاح و يهدد و القصة انتهت بموت اللص بتقريبا 17 رصاصة و زوج نانسي عجرم هو اللي قتله .
هذا مو موضوعي و لا مهتمة للقصة كلها و الله انا لكن احس الناس اللي تدافع عن السارق ما عندها دين و لا حتى اخلاق
و قبل ما أكمل كلامي انا اكره نانسي عجرم كره العمى بس عشان تكونوا عارفين .
أول شي كل الدنيا قايمة ليش قال لص دخل بيتك ليش تقتلوا و المشكلة اصلا السارق داخل و حامل سلاح و رافعه بوجه اهل البيت و هالشي موضح بفيديو تم نشره على كل السوشيال ميديا
و السارق بعد ما اخد اللي بدو ياه من ذهب و فلوس رايح يدخل لغرفة أطفال ، اي انسان طبيعي رح يخاف على أولاده بكل بساطة راح اخذ مسدس و اطلق ع السارق .
هاد أكثر شي طبيعي ممكن اي انسان يسويه لانو بالاصل بهاد الموقغ اللي ربنا لا يحط حد فيه ما تكون عارف شو تسوي من الخوف و حالة الروع اللي انت فيها
أحكي عن تجربة سبق و نزل علينا حرامي و انا شفته و كان رح يصيى معي ازمة قلبية من الخوف و ساعة اتكلم اهلي مو فاهمين شو اتكلم و لا شو حالتي من كثر الخوف و بقيت بعدها سنين طويلة اعاني من هذا الموضوع خوف مرضي و لحتى الأن باقي ما راح و لو تكرر الامر رح يتوقف قلبي و اموت .
و هالشي مثبت علميا شدة الخوف ممكن تقتل اي انسان لهيك بالدين و بالاسلام ترويع المسلم محرم بأي حال من الاحوال محرم سواء دينياً او أخلاقياً أو انسانياً .
أي شخص له حق عند حد مهما كان ظالم أو غير ظالم ما بيدخل بيت الشخص هذا مسلح و مغطي وجهه بهدف السرقة ما حد ينتهج طريق السرقة لاخذ الحق و لو نعطيه حق و نقول رايح ياخذ حقه فما يحق له يتسلح و يرفع السلاح بوجه اهل البيت سواء كان السلاح حقيقي او كذب .
لو نيجي لعدد الرصاصات اللي انطلقت و اللي عددها كبير قمة الغباء عند الناس اللي شاكة انو في بلموضوع ان قال ليش لانو عدد الرصاصات اللي انطلقت كثيرة
غلط هالشي غلط تسألوا عن عدد الرصاص لواحد متمرس في السلاح و شكوا لو انطلقت رصاصة وحدة مو المشط كامل لانو اللي اطلق النار بحالة نفسية و خوف دفاع عن نفسه و اطفاله ضد واحد بالاصل مسلح ما في انسان طبيعي يكون بحالة نفسية سيئة اول مرة يطلق رصاص ما رح يطلق اكثر من رصاصة او ما يرفع اصبعه عن الزناد .
و غير هيك يطلع ناس متخلفين يقولوا ليش قتلتوه شو يناديه يضيفه قهوة يعني ؟ واحد مسلح داخل بيت ليسرق و عارف البيت منيح لانو كان عامل عندهم و عارف انه رايح لغرفة الاطفال لشو رايح لغرفة الاطفال و هو رافع السلاح !
قصة السرقة و اللصوص بشكل عام ان شاء الله ما حد يجربها ليش الكل قاعد بتفلسف قال عشانها مشهورة و بيستفاد من شهرة زوجته شو الفايدة ؟
القانون مهما كان يطبق و السارق ما عنده شي يعطيه لو شوية حق و المشكلة امه و زوجته و اهله بكل وقاحة طالعين يحكوا فوق ما ابنكم رايح يسرق و مبين بالفيديو منيح لسة في ناس عندها الجرأة انها تتكلم و تتفلسف قال شو في امور مخبية شو اللي مخبى ي محقق كونان
خفوا علينا بس .
الترويع بالاسلام و الاحاديث و رفع الاسلحة حتى لو كانت عصا فهي محرمة فما بالكم بسلاح حتى لو كان مزيف !
و خلينا نقول هم مو مسلمين مسيحيين لكن السارق مسلم ، و لو نطلع عن موضوع الديانة فهالشي كله على بعضه مو أخلاقي و لو علي انا لو حد بيسوي بعيلتي هيك شي لو مجرد تخويف رح اقطعه بأسناني
و للعلم يوم الحرامي اللي نزل على بيتنا عمي اصلا طلع له بالسلاح و كان ناوي يفضي السلاح فيه لكنه اختفى و يا ريته بقي و مات و ارتحنا .
وقد قال رسول الله صلى الله عليه وسلم: من أشار إلى أخيه بحديدة فإن الملائكة تلعنه حتى يدعه وإن كان أخاه لأبيه وأمه. رواه مسلم.
قال النووي: فِيهِ تَأْكِيد حُرْمَة الْمُسْلِم , وَالنَّهْي الشَّدِيد عَنْ تَرْوِيعه وَتَخْوِيفه وَالتَّعَرُّض لَهُ بِمَا قَدْ يُؤْذِيه. وَقَوْله صَلَّى اللَّه عَلَيْهِ وَسَلَّمَ : وَإِنْ كَانَ أَخَاهُ لِأَبِيهِ وَأُمّه. مُبَالَغَة فِي إِيضَاح عُمُوم النَّهْي فِي كُلّ أَحَد, سَوَاء مَنْ يُتَّهَم فِيهِ, وَمَنْ لَا يُتَّهَم, وَسَوَاء كَانَ هَذَا هَزْلًا وَلَعِبًا, أَمْ لَا، لِأَنَّ تَرْوِيع الْمُسْلِم حَرَام بِكُلِّ حَال. اهـ.
وعن عبد الرحمن بن أبي ليلى قال: حدثنا أصحاب محمد صلى الله عليه وسلم أنهم كانوا يسيرون مع النبي صلى الله عليه وسلم، فنام رجل منهم فانطلق بعضهم إلى حبل معه فأخذه ففزع، فقال رسول الله صلى الله عليه وسلم: لا يحل لمسلم أن يروع مسلما. رواه أبو داود وأحمد، وصححه الألباني.
وقال أيضا صلى الله عليه وسلم: لا يأخذ أحدكم عصا أخيه لاعبا أو جادا، فمن أخذ عصا أخيه فليردها إليه. رواه الترمذي وحسنه، وأبو داود وأحمد، وحسنه الألباني. وبوب عليه الترمذي: باب ما جاء لا يحل لمسلم أن يروع مسلما.
لم أكن يوماً أكثر حزناً مما أنا عليه هذه الأيام
أشعر بأنني هجرت الدنيا المشرقة و أصبحت أيامي جميعها رمادية
و حطت فوق مدخنتي الغربان تنتظر الانقضاض على جثتي !
كنت شخص ينسى آخر مرة هطلت بها الدموع من عينيه
كلما وجه لي هذا السؤال لم أتذكر اجابته ،
الأن أيضاً لا أستطيع الاجابة عنه الدموع لا تتوقف
محرم على الجميع رؤيتها لكنها لا تتوقف
أعلم جيداً أني أسير على الأرض و قد فقدت مرحي القديم ، روحي القديمة
لم يعد لأيامي رونق لم تعد زاهية كالسابق
الصعب حقاً أنني مضطرة أن أمررها و اعيشها بنفس الحزن يومياً
أعلم جيداً أنني لن أعود لما كنت عليه في السابق أعلم بأنني لن أستطيع أن أنقذ نفسي من هذه المآساة .
تظن انو مرضك راح و اختفى ، فجأة تلاقيه رجع
و كل اللي راح مجرد ظنون ، سرطان يتفشى بكل أنحاء جسدك
و يعلن عدم قبول جسدك أو عقلك أو قلبك لكل مقومات الحياة
تفكر كثير تنهي هالمعاناة و تتخلص من نفسك
لكنك للأسف مضطر تتعايش مع هالمرض و تتعود على الانتكاسات
تتعود ترجع للبداية !
الذكريات هي السبب ، فجأة تندفع لعقلك بقوة
ما في شي يبعد هذه الانتكاسات ، تفكر كثير انه في لك علاج
و العلاج خلاص بس رح ياخذ فترة ، و الفترات تمضي و تمضي و تمضي
و بكل مرة تقول فترة كمان و رح كل شي يروح كل شي رح يكون بخير ، أنا رح أكون بخير !
كل هالوجع رح يختفي ، تحكي كثير لمفكرتك كل شي كل شعور كل لحظة
تفكر هالشي تخفيف عن اللي بيحصل معك
يعطوك نصائح ابكي ، اكتب ، احكي لا تخلي شي بقلبك
و انت كل ما قلت كلمة كل شي يرجع من جديد يرجع من البدايية ترجع الشلالات تهطل من عيونك
ترجع من جديد لخط البداية اللي انت ما بدك ترجع لها أبداً !
تفكر مرت ايام ، اسابيع ، أشهر ، سنين ، كل شي رح يختفي كل هاد رح يروح خلص رح ترتاح خلص !
و فجأة تلاقي انه تراكم و تنفجر من جديد
تتمنى هالأمور ما صارت و هالسنين ما مرت
دعيت ربك كثير ، كثير كثير بكل صدق طول 6 سنين دعيته يعطيك اشارة وحدة
أو يمنحك القوة كل القوة لتبتعد عن أكبر سد بحياتك
لكن كل شي يصير معك يقربك أكثر من هذا السد
طول هالسنين تقترب من هالسد فجأة ينهار عليك و يملئ حياتك كلها ركام و حطام و يختفي
و انت لك سنين طويلة تسير لهذا السد ما عندك طريق للرجوع مهمادعيت ربك انك ترجع
مهما مرت سنين و أيام ما تقدر تستجمع هالحطام أو ترجع تبنيه من جديد
ليش هالشي يصير !
ليش هالشي صار ! ليش بدون مقدمات ! ليش فجأة كل شي اتحطم و انهار ! ليش كل هالأمور تصير بدون أي تمهيد !
أنا انسانة تحب أخواتها جداً ، بكل صدق اكتشف اني أتحول لوحش لو حد داس على طرف لأختي
بدون وعي اتاثر و ابكي لو شي جرح اختي او حسيت انها رح تبكي فابكي عنها و تصير هي تخفف عني بدل ما اخفف عنها
كل شي عندي بالدنيا كوم و خواتي كوم ثاني لو حد اذاهم ما اعرف لا احترام و لا ادب و لا اخلاق
امسك الشخص و اغسله و انفضه و انشره و أخلي عشيرته كلها تندم و لا حد يقدر يمسكني لما اعصابي تفور و عقلي يطلع
اي انا انسانة هادئة خجولة منطوية أحب عزلتي و وحدتي جداً لكن ما أخاف الاختلاط و الاندماج بلمجتمع
اي انا انسانة هبلة و القط ياكل عشاي و اي حد يغلط معي اسامحه لاني اسم على مسمى ما عندي للكره و الحقد و الانانية مكان
لكن لكن لكن خواااتي خط أحمر لو حد نزل دمعتهم لو حد اذاهم بكلمة أو حد استغل طيبتهم بكل جدية أتحول من عصفور لطيف لحيوان شرس لا يغفر و لا يسامح بس يمزق و يقتل !
#تدوينة تفريغ عن غضب
بعض الأمور تكون أكبر من طاقة احتمال الشخص لكن ربنا قال " لا يكلف الله نفسا الا وسعها " .
هالامر مو بس بالعبادات اللي ربنا امرنا فيها او اللي لازم نقوم فيها ، حتى بأمور حياتنا ، لو أنا قلت انو اللي يصير فوق طاقة احتمالي
لكن في شغلة تجبرني اكمل انه التفريط بنفسي حرام هذه الروح ملك لله متى اراد ياخذها فهو راح ياخذها
لهيك الايام جاية الايام اللي تجبرك تستمر و تعيشها ، متطلبات الحياة اللي تجبرك تطلع من وحدتك رغم انك عايش بكل احاسيسك فيها
هالايام كلها مجبر تعيشها و كلها رح تتعايش معها و رح تمر حتى لو كنت تعيس او حزين و حتى لو كان هالشي آخر شي من طاقة احتمالك
بعض الامور الصعبة جداً تلغي اهمية الأمور اللي استصعبتها بفترة ما من حياتك .
يعني في امور تيجي تقولك خذ و شوف انو في صعوبات رح تصير لك تخلي كل الصعوبات اللي كنت ما تتحملها قبل صفر ع اليسار
و مع ذلك لساتك عايش لساتك مجبر تتحمل لساتك مجبر تتعايش
لكن ربنا رح يلهمك صبر حتى لو جتك اوقات ضعف كبيرة و انهيار رح تكفكف دموعك و تخفي أثارها و تطلع من ظلمتك لترجع تستمر بهالعالم الصعب
القوة اللي تحتاجها لتجابه هذه الامور ربنا رح يخلقها بنفسك بس خلي عندك ثقة بالله انه بجد رح تقدر تعيش بقوة و تتجاوز .
لكن للاسف رح تتغير ، كل شي فيك رح يتغير دفئك السابق رح يتحول لجليد ، طيبتك القديمة رح تتحول لقسوة
مرحك القديم ما رح يرجع ، تركيزك و انتباهك لادق التفاصيل رح تتحول لنظرة ضبابية لكل شي بالعالم
و ثقتك بكل الناس رح تنخفض و مقدار تقبلك للناس حولك رح يصير صفر
هذه ضريبة انت مجبر تدفعها مجبر تعيش كجسد سائر ع الارض بدون روح
لأنو كل شي بكل بساطة ما عاد له معنى و الوان حياتك صارت من تدرجات الرمادي
كل شي غاب او اختفى للابد .
من الأمور اللي لي يومين افكر فيها " لأنو الذكريات ترجع " و اللي لأول مرة رح احكي عنها هون 《 حرب غزة 2014 》
الحرب بدت برمضان فجأة القصف بلش و ما وقف عشنا أيام مرعبة بكل ما للكلمة من معنى ، كل شخص كان متوقع انو رح يموت بأي وقت
من أكثر الامور اللي أثرت فيني بهالحرب هو عدم استعدادي للموت ..
كنت خايفة أموت و أواجه ربنا بهذه الفترة كانت أكبر همومي الموت و مواجهة ربنا ما كنت احس اني مسوية شي كبير اقابل ربنا فيه او يدخلني الجنة بسببه !
بيوم من الأيام فقت من النوم " طبعا النوم كان صعب القصف شغال طول الوقت " فلما جت فرصة اني انام جاني حلم او كابوس ما اعرف الحلم كان غريب كثير ، انو بيت جيرانا رح ينقصف و انه البيت محاط بكثير بلالين و فجأة هالبلالين حملت العمارة و طارت و اخذت العمارة معها " البيوت عنا عبارة عن عمارات فيها شقق سكنية " و عمارتنا جمبهم ع طول مستحيل انها ما تتاثر بالقصف و شفت أهلي مو خايفين و ما راضيين يهربوا مع انهم قريبين من النوافذ و اي شظايا ممكن توصل لهم و حتى الصواريخ رح تاخذهم هم كمان ، و لما شفتهم ما خايفين روحت انا هربت لابعد مكان حتى اهرب من تاثير الصواريخ .
ثاني يوم خبرت الحلم ل بابا كنت خايفة كثير و ادور بالتفسير للاحلام بابا دايما يريد يسمع احلامي و دايما كان يفسر لي هالمرة فسره لي اني رح اموت
انرعبت كثير رغم انه كان يحاول يهديني و انه كل شي رح يكون بخير و نحنا بشهر مبارك و ناويين نية الصوم و الجهاد و نحنا ببلاء عظيم و كلنا رح نموت بالنهاية
رغم هيك بقيت ميتة من الخوف ، بعد ما خبرت بابا حلمي خبرته لحد ثاني بقى يسألني عن موعد الحلم و يقنعني انتي ما رح تموتي ، انتي ما رح تموتي
بعد يومين من هالحلم فقت ع صوت صاروخ تحذير لبيت جيرانا و بعد شوي البيت انقصف ، لما تكون قريب جدا ما القصف رح تسمع الطائرة فوق راسك رح تضرب الصاروخ ما رح تسمع الصوت رح تسمع صفير قوي
و دخان ابيض متل الضباب رح يغرق فيه كل مكان يومها ما في شي ما اهتز او وقع او خرب لدرجة الخزانة وقع بابها و تفكفكت من كل الجهات بغرفتنا و الشظايا انتشرت ، طبعا مع القصف نشيل النوافذ الزجاج او نفتحها لانها اكيد رح تتكسر مع القصف
بعد ما تحقق هالحلم بدون موتي استغربت كثير شلون حلمت بشي و بعدها ع طول صار و خوفت كثير من نفسي
بعد هالقصف جمبنا مدري مين نشر بالحارة انو اتصلوا علينا اليهود انو اخلوا بيتكم رح ينقصف " يعني بيتنا "
طبعا العملاء بغزة كثار بس انو ينشروا خبر مغلوط و الجيران جات تدق بيتنا و تسأل جاكم تهديد او لاء نحنا انرعبنا و كلنا من اول الحرب مسويين شنط بالاوراق المهمة " مثل شهادات الميلاد و الهويات " و دايما لابسين أثواب الصلاة لو اضطرينا بأي وقت نخلي بيوتنا و نطلع
هاليوم من بدايتو كان مرعب و العملاء ما عندهم دين بس يسوا بلبلة
يومها لا كنا عارفين جاء تهديد و لا مين اللي نشر الخبر و لا نطلع او ما نطلع
ما عارفين لانو اليهود بكثير مرات يتصلوا ع الجيران ما يتصلوا ع اهل البيت اللي رح ينقصف بالاخلاء ليخبروهم يخلوا بيوتهم .
حقراء قد ما اقول حقراء فهم حقراء !
يومها ما طلعنا لانو ما علينا تهديد و اللي نشر الشائعة تحاسب
بعدها بيوم كتغيير جو قررنا انا و خواتي نروح ع جيرانا " بناتهم صديقاتنا "
و بما اننا رمضان فطلعنا عندهم بعد الفطور كسهرة لانو اصلا كا كنا ننام بالحرب بسبب القصف
ولما جينا نطلع من عندهم بالليل وقف لنا جارنا و قالنا لا تطلعوا جاي تبليغ اخلاء لجيرانكم و اهلكم طلعوا من البيت
و نحنا هون صرنا نبكي بدنا نروح لاهلنا مو عارفين اهلنا وين طلعوا او ما طلعوا و جارنا واقف ما راضي يطلعنا
بالعافية لما طلعنا لقيت تيتا " جدتي " بوجهي تقول تعالوا معي حنروح للمدارس " الكل لما كان يخلي بيته كانوا يهربوا لمدارس الانروا لانه اليهود ما تقصفها لانها تابعة منظمة عالمية "
و نحنا ما بدنا نروح مع تيتا بدنا نشوف وين اهلنا و تيتا تقول لنا خلوهم ما بدهم يطلعوا انا بأخذ احفادي و أبقى بالمدرسة و لا انتظر القصف
رسميا كل البيوت كانت مهددة و الكل ما عارف متى يقصفونا و متى نموت و تيتا كانت تنجن من برود اولادها رغم انهم راضيين لو ماتوا عندهم ما في احلى من موت الشهادة .
لحتى الأن اتذكر بعد السحور بابا يبقى ينتظر الفجر يأذن و ننتظر معاه سهرانين ع صوت الراديو ما في كهربا ما في ضوء و سهرانين طول الوقت نسمع اخبار و لما يأذن الفجر بابا يطلع ع المسجد و تيتا تنادي عليه تقوله وين رايح يقصفوك اليهود لو طلعت " لانو كان في اخلاء شوارع من بعد العشاء و التراويح " و بابا يرد عليها العمر ربنا كاتبه لو رح يقصفوني فهذا عمري .
و الايام كانت تمر و عدد الشهداء يزيد و الاصابات تزيد اكثر و جات اصعب ليالي كنا نجلس بالبرندة " حوش البيت " و السقف يكشف لنا السماء و نشوف اضواء القصف تلمع بالسماء و القصف ما يوقف بليلة من هالليالي كانت مرعبة بجد السماء من كثر القصف ما كانت توقف تلمع كل ثانية بضربة صاروخ او مدفعية جديدة بكل ثانية هالايام ما انساها ايام قصف الشجاعية و خزاعة ، مناطق قدروا يدخلوها اليهود بري كانت ايام دامية ما اقدر اوصف ثلاث ايام او اكثر لا اسعاف و لا هلال احمر و لا اي استغاثة كانت قادرة تدخل هالمناطق و تغيث الناس اللي تستنجد
بعد ثلاث ايام من هالمجزرة اللي ما قدر الاعلام يدخل و الاسعاف و الهلال الاحمر تخيلوا حتى الهلال الاحمر ما كان قادر يدخل رغم انه منظمة عالمية و رغم انه ممنوع ع اليهود تقصف سيارة او رجال الهلال الاحمر لانها تحاسب دوليا رغم هالشي كانوا مستعدين يقتلوهم .
بتذكر كثير منيح بعد هالثلاث ايام من المجزرة شغل بابا مولد الكهربا للتلفاز بس لحتى نشوف الاخبار ثلاث ايام ما عارفين شو صار بالشجاعية و يا ريت لا شفنا و لا عرفنا .
أرعب شي ممكن تشوف مناظر مر عليها سنين لكن لحتى الان مطبوعة بذاكرتي جثث الاطفال مرمية بالشوارع ، الغرفة اللي صار فيها الاعدام الجماعي للرجال بالرصاص جمعوا الرجال بغرفة وحدة و فتحوا عليهم الرصاص شي ما اعتقد عقل او عين بشرية رح تتحمل تشوفه كيف من كثر الرصاص و الدم ما في شي بالغرفة الا لونه احمر بركة دم تحتهم و الجدران كلها مصبوغة احمر و عدد الرجال اللي انعدمت و جثثهم متكومة فوق بعض بغرفة متر بمتر
و الجثث اللي طلعت ريحتها و هي ثلاث ايام مدفونة بالركام او مرمية بالارض بالشوارع بعد القصف شي مرعب مررررعب ?
بعد ما انتهى شهر رمضان كان اصعب عيد يمر " عيد الفطر " اول عيد يمر علينا ما نعيد ما في قلب او روح ممكن تفرح الكل حزين
و رغم انهم عملوا هدنة لكم ساعة و قلنا بنرتاح شوي و يا راحة ما تمت نمنا على اسم هدنة و فقنا من النوم على خبر قصف اربع أطفال يلعبوا بمراجيح العيد .
حتى الاطفال ما تهنوا بهالعيد و هم مالهم ذنب ، الفرحة الوحيدة اللي زارت قلوبنا لما اعلنت المقاومة انها أسرت جندي اسرئيلي من كثر الفرحة التكبير ملت الشوارع و المساجد و الكل يبكي من الفرحة
معاناة ايام و حزن كبير مر علينا و وجع عميق و اروح كثير راحت الكل فرح بخبر الاسر .
هالايام كلها راحت و مرت و صارت ذكرى و تاريخ ما حد بيتمنى انه ينعاد لكن بكل بيت بغزة صار في شهيد ، او جريح ، عائلات كثير تم قتلها جميعا و انمحت بكاملها من التاريخ البشري و انمسحت سلالتهم بسبب الموت
أشياء و اوجاع عميقة ما تكفي الحروف انها توصفها .
هالايام مرت علي و صارت ذكرى و هلقيت بقول ي ريت حلمي تحقق و متت بهالحرب و لا عشت ايامي الحالية .
في شغلة عقلي ما قادر يستوعبها و نفسي بصدق أعرف اجابتها
الناس اللي بتأذي الناس الثانية شو بتستفاد ؟ طيب اذا ما بتستفاد شي كيف بتنام بالليل ؟
كيف بتروح للمخدة و ضميرها مرتاح و في ناس انأذت بسببهم ؟
المشكلة الاذية ما جت بدون قصد جت و هم عارفين تماما انو هالشخص رح ينأذى و أيامه رح تتحول لجحيم
و يمكن ما يكون بخير بعد هيك بس بجد بدي أعرف كيف في حد بيقدر يأذي حد ما آذاه ؟
كيف بيتكلم عنه ؟ كيف بيطعن بإسمه ؟ كيف بيغلط عليه كيف يسبه ؟
كيف يذم فيه و بشخصيته ؟
و اذا الأذى ما كان لفظي كيف بيضرب شعوره ؟ كيف بيطعن الثقة اللي منحها له ؟ كيف بتهون عليه سنين عشرة و صداقة و محبة ؟
كيف كل شي بيتحول لضباب و بيكون عنده كل هالقدرة ليأذي و يجي بالاخر يقول ما كنت أقصد أأذي ؟
كيف بتأذوا و انتو عارفين انه هالناس ما رح تدعي و لا رح تطلب الدنيا تدور لتاخذ حقها لانها ما بدها حق ما بدها شي
بس بدها تفهم ايش سبب هالاذية و ايش سببت لكم !
.
شو فايدة الاعتذار أو الأسف أو كلمة ما كنت اقصد آذيك بعد ما وقع الأذى
كيف بتقدر انت كإنسان طبيعي انك تطعن انسان وثق فيك و بينكم عشرة سنين مو يوم أو يومين !
من وين هالجرأة بتجيبوها ؟ كيف بتناموا انتو ؟
في أمور كثيرة بتخلي أي إنسان يعبر باي شكل من الأشكال من هالأمور التفكير ، الوجع ، الحسرة ، الخسارة ، الفشل ، الفرح ، الضحك ، النجاح ، الانجاز ، الافادة ، و الأحلام و الطموح و الآمال . و في كتير أشكال للتعبير عن كل شي ، أغنية ، ضحكة ، مزحة ، لعبة ، رسمة ، خاطرة ، يومية ، عبارة ، مشاركة ، بكاء ، صراخ ، عصبية ، توتر .
هالأمور كلها بتخلينا ناس طبيعين عايشين الحياة ممكن نعيش هالحالات فعلياً بسبب تعبيرنا عنها و ممكن نكتمها جوانا بدون أي وضوح او معالم انو في شيء صار .
من هنا تبدأ مرحلة الجمود في اللاتعبير لتوضح انو الانسان فارق الحياة بآحزانها و مسراتها فعلياً .
ما في انسان على قيد الحياة بدون التعبير لو فقد قدرته او رغبته بالتعبير بكل اشكاله و لجميع أسبابه كأنه يحتضن الكآبة و البؤس و يبني الجدران حول نفسه لتظهر الشخصية اللامبالية و الميتة تجاه اي شي بالحياة .
عبروا بكل قوتكم عبروا بكل ضعفكم عبروا و بكل فرحكم عبروا لا تخلوا شي جواتكم !
.gif "at1 ق1")
.gif "At (209) ش2")
و هيك الناس اللي بيحبونا بيعرفوا كثير منيح شو بنحب
.gif "At (425) ب9")
