فخر المدونين الريفُ صوتك و المدائن صوتهم ، أنت الهدوء و كلهم إزعاج ! (22 زائر)

[RELENA]

 

[RELENA]

الأشياء اللي بحبها كتير بحب اوثقها برسمة
و فعليا في كتير أفلام او روايات بقرأها لحظات معينة منها لقطات معينة منها بشوف انو شي جميل تتوثق برسمة
لهيك أغلب الروايات اللي بحبها لازم ارسم منها رسمة

و أكثر رواية جدا جدا بحبها هي رواية " كبرياء و انحياز " " او كبرياء و هوى "
هالرواية من اجمل ما قرأت من أجمل الأفلام اللي تابعتها و فعليا ما أمل أبداً من قرأتها او متابعتها و ارجع دائماً أحس نفس الشعور كأني أتابعها أول مرة

غير عن أجواء الرواية الكلاسيكية و الزمن القديم و اني بعشق هالأجواء .. أنا بحب الروايات و الأفلام اللي فيها طبيعة خلابة هالشي بيشدني و يأسرني و هالفيلم بالذات الطبيعة فيه قوية
و البطلة محبة جداً للطبيعة و السير بالطبيعة و الوحدة و القراءة

المشاعر في الرواية مش مبالغ فيها و الأهم انه مشاعر البطلين كانت بينهم بدون ما يحس حد عليهم و هالشي خلى العلاقة تنجح بدون اي تدخلات خارجية متل ما حصل مع أختها " اللي تابع الفيلم او قرأ الرواية رح يفهم علي "

المهم و لانها هالرواية مميزة و محببة لقلبي حبيت اوثقها برسمة و اي رواية احبها او فيلم يعجبني رح اوثقه برسمة




المقطع الحقيقي من الفيلم





ان شاء الله حسب المزاج الكتابي ببقى انزل رسومات ثانية رسمتها عن أفلام او روايات
​

 

[RELENA]

فعالية شهر سبتمبر


من ناحية تطوير المهارات، لا بد ان لديك خطة، صحيح؟ ما نوع هذا الهدف الذي تسعى لتحقيقه؟
مثال للأهداف تعلم لغة، او مصلحة ما كالوافير الخياط المبرمج، تعلم ع برنامج ووووو...
عدد لا نهائي من الاهداف تختلف من شخص لآخر! ألقي لنا الضوء على أهدافك​

حبيت هالفعالية .. وفعليا كنت حابة اكتب عن هيك امور و لقيت السؤال كأنه عم يرتب أفكاري
اوك حبدأ بأقل شي من ناحية التطوير و هو مو شي اساسي اعتبر نفسي تطورت فيه بسبب اهتمام مو أكثر
طورت نفسي باللغة التركية
.. الموضوع بدأ من ناحية متابعة افلام و أغاني و انا بالاصل من النوعية اللي تحب تترجم اي اغنية لمعناها و اتعرف ع الكلمات أكتر من اللحن نفسه لهيك كنت دايما أبحث عن الترجمات
و فجأة لقيت نفسي سجلت بكورس للغة التركية و تعلمت أساسيات الأساسيات فيها و من تعلمي للأساسيات اكتشفت انها تقريبا اقرب لغة للغة العربية
و انه تعابيرها و طريقة الكلام فيها حتى اللهجة العامية فيها و لهجة القرى و اختلاف المدن تشبه كتير الاختلافات بالدول العربية بالنسبة للكلام و أسلوب الكلام و التعابير
لهيك كانت اكثر شي طورت نفسي فيه على مدار السنين و هالشي فخورة فيه جدا اني افهم تركي و أتكلم تركي .. باقي اتعلم الكتابة و هو فعليا في كتير اعرف اكتبها لانو كتابتها تشبه الانجلش لكن بحروف تركية
في حروف تركية تكون بالانجلش حرف و بالتركي حرف ثاني خالص
المهم المشكلة الوحيدة اللي اعاني منها هو انه كتير سرت أتلخبط بينها و بين الانجلش و كتير اللغتين يدخلوا ع بعض و كتير مرات اكون اريد احكي كلمات انجلش احكيها تركي .. هذا و انا ما اعرف لغات كتير و لا متمكنة منهم تمام .. كيف الناس اللي تعرف اكثر من ثلاث لغات

ثاني شي طورت نفسي فيه أكيد هو الرسم
و سبب التطوير انه موهبتي هي الرسم و الهدف من التطوير .. بصراحة انه مالي هدف معين .. كل تطوري بالرسم لسبب واحد و هو انه الشي الوحيد اللي استمتع فيه كل الاستمتاع .. و حرفيا الشي الوحيد اللي يسرقني من كل البشر .. و هو الشي الوحيد اللي اسويه لساعات و انسى نفسي فيه بدون كلل او ملل .. خطة التطوير كانت اني اتعرف على كل خامات الألوان و أجربها و ابقى اجرب فيها لحد ما اوصل لمرحلة اني اعرف كل اساسياتها لانو لما تعرف اساسيات الادوات و الألوان تقدر ترسم لوحات بأكثر من خامة و تطلع النتيجة قمة بالروعة و الهدف الاساسي كان اني ألاقي نفسي و أسلوبي بالرسم
و بعد رحلة سنوات من الرسم اكتشفت اني اعبر عن روحي برسومات احبها و اشوفها جميلة .. و كل رسمة رسمتها تعبر عني بشكل او بآخر .. و خلال هالرحلة اكتشفت انو انا كتير احب كل خامات الالوان و كل الادوات لكن اكثر خامتين بفضلهم و بفضل اني اتطور فيهم هم الألوان المائية .. و الألوان الزيتية

ثالث شي و هو أهم أهم أهم شي تطوري بصنع الكيك .. او التزيين بعجينة السكر
اول سبب و هدف للتطوير انه هذا هو مجال شغلي .. و اي مجال شغل لينجح و يتصدر اسمك فلازم تكوني على تطور دائم بعملك و هالشي الحمد لله اسويه عن حب و من كل قلبي
لانو مجال شغلي كمان يتعلق بموهبتي .. و بجد كتير كتير كتير تعبت لوصلت لهالمرحلة
و الحمد لله بشكر ربنا انه المرحلة اللي وصلت فيها بشغلي من بحث و تطور اعطاني القدرة اني أعلم اشخاص مو بس أتعلم
و انه عندي خبرة بتخليني شخص له اسمه بهالمجال .. انه وقت ينذكر كيك السكر بمدينتي يكون اسمي بمقدمة الاشخاص المحترفين بمجالهم
الحمد لله اني اعرف بهالمجال أكتر من غيري .. و الحمد لله اني عم اشتغل شي بعشقه اعمله بإستمتاع و روح حلوة و نطلع بنتائج خرافية
هدفي من هالشغل مش اني أكون التوب بصراحة .. بس كوني أشتغل شي احبه هالشي يدفعني اطور نفسي فيه و ابحث عنه
و اخترع و اجرب بدون تعب بدون كلل او ملل و اني اكون جريئة و أقول أنا اقدر اسوي هالشي و ما اشكك بقدراتي
و فعليا يمكن الناس تشوفه مجال شغل عادي
لكنه للأمانة بحرررر كبييييير من الاسرار متله متل اي شغل

للي حابب يتطلع عليه بصفحتي هون

طبعا أي شي كتبت اني اعرف فيه فمعرفتي و قدرتي بحدود المعقول
و أنا انسانة مؤمنة انه مهما الانسان كان موهوب او يعرف الا انه يبقى بسلم قابل للصعود طول ما هو على وجه الدنيا
و أنا كتير مؤمنة بمقولة " كلما أدبني الدهر أراني نقص عقلي و اذا ما ازددت علما زادني علما بجهلي "

شو ما كانت قدراتي و معرفتي فهي لساتها قابلة للتطور لساتها قابلة للزيادة
و يمكن قابلة للتغيير

يمكن كل هالأمور اللي أسعى لها من سنوات تختفي بومضة عين بسبب قرارات ممكن الانسان يتخذها بحياته
و يرجع لورا خطوات كبيرة و يرجع يتطور أكثر و أكثر لو يحب الشي الي يسويه
التطور طريق ما ينتهي و ما حد يوصل للكمال بأي مجال مهما كان ​

 

[RELENA]

وكيف يصف الإنسان خيبة أمله في الأشياء كلها دون أن يبكي؟

 

[RELENA]

فعالية الإسبوع


لنفترض انك صانع محتوى ع السوشيل ميديا كـ يوتيوب مثلاً، ما نوع محتواك سيكون؟
وماهي الفئة التي تستهدفها؟ حدثنا عن فكرتك او نظرتك بهذا المجال

لو كنت صانعة محتوى و هو شي أفكر فيه كتير بس مو بغرض اني أكون صانعة محتوى
الغرض فقط عمل و افادة .. أول شي رح يكون عن تعليم صناعة الكيك من الصفر هذه اول فكرة و طبعا في كتير يسوون هالشي فراح يكون الأمر تعليمي مو عرض عمل تم صناعته

و السبب انه هالشغل في اسرار كتير و تكينيكات معينة اي صانع كيك يقوم فيها و اسرار و خفايا مو الكل يعتمدها
و أسلوب أسرع من اسلوب و أفكار تختلف من شيف للثاني

هاد من ناحية صنع الكيك و الكريمة ..

الجزء التاني عن أشكال السكر و المجسمات و القوالب و كيفية استخدام الأدوات و هالشي هو الأكثر صعوبة
لأنه ادوات هالمجال كتييييرة و كل يوم اداة مختلفة
و آلات مختلفة لصنع هالادوات و كيفية استخدام الادوات و طريقة شرائها و شو اللازم و غير اللازم و كتيييير أمور و اسرار شغل ما حد يقدر يكتشفها الا اللي يدور
و هالشي يعاني منه كتير من صانعين الكيك و المصممين المبتدئين

الشي الوحيد اللي ما رح اشرحه هو صنع المجسمات لانها تحتاج شخص فنان و تحتاج دورات واقعية مو مجانية .​

 

[RELENA]

"خلافًا لكل الأصوات الصادقة التي تنصحك أن تتناسى وتتجاوز، أوصيك بالحُزنِ لا أوصيك بالجَلَدِ،
أقول : ابكِ قدر إحساسك بالخسارة، قدر إحساسك بالألم والحسرة، ابكِ قدر صعوبة العودة من طريق بذلتَ فيه قلبك وعُدتَ منه ناقصًا، قدر صعوبة البدء من جديد بقلبٍ معطوب.

ستبكي كثيرًا، ستكون غير قادر على النهوض كل صباح لمواجهة الحياة لأنك تواجه مشاعرك الثكلى كل ثانية، لكن عليك أن تسير مع الأيام، دع للوقت مهمة شفاء الجروح، هذِّب قلبك بالرضا والتسليم، لن تكون الدنيا على مِزاج أحلامك، ككل المعارك السابقة تبقى الندوب تذكّرك أنك لم تخرج منها كما دخلتها، وأنك غير مسئول عن نتائجها لكنك الوحيد المسئول عن أدائك فيها.

ربما تنسى يومًا ما وتنظر إلى الوراء بلا ندم، أو حتى ربما تنظر مغتبطًا لأنك مررتَ بأوقات صعبة وتجاوزتها، وربما تُساق إليك الحكمة من الخسارة، وربما لا تُساق، على كلٍ هذا ألمك الخاص وتجربتك الفردية تمامًا، استعن بالله ولا تعجزْ"!.

#مقتبس​

 

[RELENA]

هالتدوينة عشان ما انسى ..

الأيام الماضية أعتقد من أسوأ الايام اللي عشتها
كانت كوارث وراء بعض زلزل المغرب فيضان ليبيا .. و شهداء عنا
انا أعتبر انو لانو نحنا بلد منكوبة تعودنا كتير ع الموت و الضحايا
بس الشي الوحيد اللي ما تغودنا عليه هو الحزن .. ما اعرف اوصف حرقة القلب و الغصة
و انو نبكي من مشهد او على حياة انسان بقلب موجوع
كلنا رح نموت كلنا لها
ليلة يوم الأربعاء ما عرفت أنام كانت تكملة اعصار دانيال جاية عنا
حرفيا مطرت عنا مطر ما نزل بأشد أيام الشتاء مطر
و مطر مليان غبار و طين و ريحة الجو كان كلها طين
وين اروح بمواقع التواصل كله يتكلم عن ضحايا الزلزال و عن ضحايا درن اللي لسة تخرج من البحر
و عادي أشوف ناس ثانية لاهية بحياتها و ما اقدر ألوم حد فعليا
و بنفس الوقت مو قادرة اوقف وجع قلبي عليهم كل يوم ابكي
ليلة الاربعا خفت كتير أنام كل تفكيري اني رح افيق ألاقي بيتنا نصه غرقان
و فعليا فقت يومها على اول قطرة مطر نزلت المطر كان قوي و كان مخيف و كله اتربة ..


بعدها تأملت فعليا بالدنيا و كنت أحاول اقرأ كل الوقت شو حافظة من القرآن و أنا ببالي انو لو قامت القيامة القرآن كله رح يروح من المصاحف لازم احفظ لازم ما ألاحق الدنيا ألاحق الآخرة
و انا ما اقدر اوصف نفسي اني لاهية صح وقتي مشغول لكن حتى خلال شغلي افتح قرآن اسمع و اقرأ

قديش الدنيا ماخدتنا قديش الهموم شاغلة تفكيرنا
و قديش عم يصير علامات لتصحينا بس نحنا ما نشوف ..

يا رب أحسن خاتمتنا
يا رب ارحم موتى ليبيا و المغرب .

​

 

[RELENA]

أناجيك ولستُ ببطن الحوت لكنّني، في جوف الليل
أُصارعُ وحشةَ أيامي
لا إله إلا أنت دُلّني.​

 

[RELENA]

الفترة هذه عم افتقد الرسم كتير ..
ما بقدر اقول اني مفرغة له وقت كبير لكني عم ادرب يدي شوي شوي عشان ما اقطعه نهائيا
بس أحس لازم اخلص لوحاتي و رسماتي و ابدأ برسم لوحات كبيرة جدا لأنو احس انو بس فيها أفرغ طاقتي
بس هو الشغف موجود لكن الحماس للرسم ما موجود
و حتى لو رسمت شي معين ما احس بداخلي رضا تام على رسمتي و هالحالة حرفيا مو عارفة شو أقدر أسميها

كيف انو الشي اللي اهرب له من كل العالم ما أحسه يرحب فيني او يفرغ طاقتي
اجلس ساعات امام الورقة اريد ارسم بس مو عارفة من وين ابدأ

حاليا عم أكمل رسمتين على أمل يخلصوا بعدها حنطلق لرسم اللوحات بالزيتي رح انسى الورق شوي

​

 

[RELENA]

عمرك حسيت انه الحمل عليك كبير و انك تعبت بس ما ينفع توقف ركض ؟
يا ربي ما أصعب هالشعور .. عم اتمنى لو احط الحمل اللي ع ظهري على جنب
و أجلس استراحة لوقت معين مو طويل .. بس وقت معين
ما اريد ابكي أو أفرح او أحس بأي شعور بالدنيا
بدي بس السكون يحيطني من كل مكان و عقلي يصير فراااااغ مساااحات من الفراغ

للأسف ما ينفع ..
كل ما يجيني هذا الشعور برجع بعدها بقول الحمد لله على نعمة الانشغال لآخر رمقق
الوقت الوحيد اللي ينتهي فيه كل شي هو وقت تغمض عيني و أسبح في بحر النوم الا لو زارتني أمور حياتي بالأحلام ..

يا رب ​