مدونة راقية Like a collection of paradoxes (5 زائر)

[الزمـردة]

ع قدر حبي للأطفال ، بس ياخي اخاف منهم
ايوة اخاف منهم .. ياخي احسهم عفاريت وما عندي بال واسع لهم وما اعرف حتى اتعامل معاهم
هذا سبب
والسبب الثاني هو انو الاطفال ما يعرفون شي اسمه كذب ، لو شافو شي ماب زين فيك رح يفجرونها ف وجهك ويخلونك تعيش ب insecurity و trauma لبقية حياتك
بس هالمرة براءة الاطفال وصراحتهم كانو سبب سعادتي بصراحة
امس كان في عندنا عزومة ف بيت عمي .
ولما وصلت لقيت بنت صغيرة هناك اسمها زينب.
صراحة البنت كانت خجولة بالاول .. ف انا قمت بسأل عن عمرها والخبلة قالتلي .. عمري كان 6 بس الحين صرت 8
شكلها اصغر من عمرها .. لانو بجد كنت فاكرة عمرها 5 او 6 سنين.
وانا كنت اساعد فالمطبخ جت وقفت جنبي تراقبني .. وانا بعفوية عطيتها قطعة خيار من اللي كنت اقطعه لان فكرتها جوعانة .
خذت القطعة مني وهي فرحانة وشكرتني ومن ذاك الوقت وهي كل شوي تجي وتبوسني وتسلم عليا
ومو بس كدا ، لما شلت نظارتي عشان افرك عيني هي قالتلي " ما احلاكي من غير نظارة " 《 البنت مشروع خفيفة
وفاللحظة هذيك قلت خلاص لازم اتزوج عشان اجيب بنت زيها
والله المخلوقات ذي هي اللي تشجع الواحد على الزواج
بس بجد مزاجي مو تمام هالكم يوم وبصراحة عفوية البنت جبرت بخاطري نوعا ما
لا ولما جيت بروح السيارة جت لي وروشتني بالقبل والاحضان 🥹
الله يسعدها البنت ويوفقها.
​

 

[الزمـردة]

​

فعالية الاسبوع



أي شخصية خارقة كنت تتمنى أن تصبح مثلها عندما كنت صغيراً؟ وما سبب حبك لها او امنيتك هذه؟ حدثنا عنها
لأجعل السؤال بنطاق أوسع يمكنك اعتبار الشخصية من كرتون او انمي او فيلم او شخص واقعي تمنيت من صغرك ان تكون مثله​

_
انا من جيل التسعينات يعني اتوقع كلنا كبرنا ونحنا نتابع برامج كثيرة فيها ابطال خارقين وكلنا كنا نتأثر بهذي البرامج. 《 عشان كذا انا مقتنعة انو جيل التسعينات عاش افضل طفولة لانو في وقتنا كان في برامج حلوة مو مثل جيل الحين كبر مع غامبول وسبونج بوب
وانا كنت طفلة تتأثر بسرعة بالانميات والكرتونات والافلام
اذكر كنت اربط ريبن على راسي واتخيل اني اقاتل مع اكيرا واصحابه وكنت انزل العب فالشارع وانا اتكلم بالفصحى 》 عرقت وانا اتذكر الماضي اللي يفشل
ف كنت بختار المقاتل النبيل .. بس للأسف ذكرياتي بخصوصه مشوشة.
او ربما ك طفلة ما كانت عندي سبب عميق لاختياري هذي الشخصية
يب عشان كذا ما اقدر اختار اكيرا للفعالية.
بس في شخصية ثانية ابهرتني من اول ظهور لها واللي هو روك لي من انمي ناروتو.
تابعت ناروتو وانا كبيرة وواعية ف اعرف كويس ليش اخترت هذي الشخصية بالضبط. وكان في سبب اني اعجب فيه ولحد الان اعتبره قدوة مع انو شخصية خيالية.
بس في عالم كل الشخصيات تتمتع بقدرات خارقة وخاصة اترابه كل حد منهم تفنن في اسلوب من اساليب النونجتسو وبرعو في السيطرة على التشاكرا خاصتهم.
روك لي فالجانب الأخر كان انسان لا يتمتع بأي قدرة خارقة.
وكان محط سخرية بين اترابه لانو ما يقدر يستخدم النونجتسو او الغينجتسو.
بس رغم كل السخرية اللي تعرض لها ما استسلم للفشل.
واختار طريق مختلف جدا في فن النينجا وتدرب ليل ونهار حتى برع فالتايجتسو او القتال اليدوي وصار من اقوى الشخصيات فالانمي حتى ولو ان الانمي ظلمه نوعا ما وما خلانا نشوف عظمته الكاملة. بس ما اظن انو في متابع لناروتو بيكره هذي الشخصية!
يعني نقدر نقول انو روك لي مثال للاصرار. وما يستسلم مهما تعرض للفشل. وكل انتقاد سلبي ينرمى عليه بيكون محفز له حتى يبذل جهد اكبر .
كان قادر يختار طريق الشر بسبب ماضيه الصعب بس هو حافظ على نقائه وطيبة قلبه .. ياخي فديته ابو حواجب عريضة ذا
ف عشان كذا احب شخصيته ودايما اتمنى لو اكون مثله استعمل التعليقات السلبية ك حافز لي.
بس للاسف انا كلمة تقدر ترفعني للسما وكلمة تقدر تخرب ابو مزاجي وعزيمتي
هو انا بالاخير رح اثبت منتقدي انه غلط بس طبعا بعد ما احبط حتة احتباطة كدا.

وهذي كانت مشاركتي فالفعالية الاسبوعية حق قسم المدونين
لاتنسو لايك وتقييم 》 حسيت نفسي يوتوبر وانا اقول المقطع ذا ​

 

[الزمـردة]

فعالية الاسبوع
ممكن تشوفه سؤال عفوي لكن رح يوضح طريقة تفكيرك وطموحاتك
اذا ربحت جائزة اليانصيب، ماذا ستفعل بالأموال؟


-
السلام عليكم ورحمة الله وبركاته
صراحة صرت ما القى مواضيع اتكلم فيها بالمدونة ..
بس مع ذلك احسني صرت اتحمس للفعاليات الاسبوعية لقسم المدونين
سلوى ما شاء الله عليها عندها افكار مميزة وملهمة .
فعالياتها كلها حماسية وتخليني اخذ راحتي فالتدوين.
وكمان ما اتوقع كنت بحب الفعاليات بدون تشجيعها.
كل اسبوع تقرا مشاركتي وتقيمها لي
الله يسعدها ي رب
مع اني عادة اكتب عشان افضفض ، بس ما انكر اني اسعد فعلا لما القى تشجيع وتقييمات تفتح النفس
ف شكرا خاص لكل من يتفاعل معي هنا ويترك اثر طيب من تعليق ورياكشن
-
نجي للفعالية واللي للحظة نسيت انو مجرد خيال وخلتني اتحمس واكتب مخططات واقسم الفلوس وكل قسم خصصته لشغلة
لين صحيت على ارض الواقع وتحسست جيبي المثقوب اللي مافيه ولا فلس
ورجعتلي الكتمة 《 ستيلا لو متعملش دراما ما ندري وش بيصير لها
بس فعلا ايش بسوي لو فزت فاليناصيب ؟
طبعا لازم اني احمد ربنا واول شي بسويه هو اني اسعد حد محتاج مثل سعادتي بالفلوس.
حتى ربنا يبارك فيها
وحسب المبلغ ، لو هو مبلغ كبير بشتري بيت كبير لي ولعائلتي بيكون في منطقة ريفية وفيه حديقة كبيرة .
ك انسان عاش وترعرع ف شقة ذا هو اول اهدافي اللي بحاول احققها يوم القى شغل دائم.
ولو تبقى فلوس استثمرها في مشروع حتى يبقى الربح دايم.
ولو المبلغ حق اليناصيب يا دوبك يجي حق مشروع ف اكيد بسوي مشروع اول ومن الربح حق المشروع بسوي مشروع ثاني.
مثلا لو فتحت محل بعمل له فرع ثاني في منطقة ثانية
ولما اعمل ثروة بشتري بيت واسع وبخصص اول طابق فيه للكراء
يعني imma rent اول طابق لاصحاب المشاريع. 《 معرفتش احكيها بالعربي
وكذا اكون عندي محلين حقي + محل للكراء او محلين حسب مساحة الطابق السفلي
^
مع البزنس معنديش يما ارحميني

بس انا اعرف حظي زفت ومنيل بستين نيلة ع قولة اخواننا المصريين ف احس اني مستحيل اربح شي ، ناهيك عن اليناصيب
انا حتى لما تكون فيه مسابقة عن اشياء كيبوب ما يكون لي حظ فيها
هو الصراحة فزت في مسابقتين من سنة
ومن وقتها لازمني النحس ليومك ذا
اتوقع انو استنزفت حظي كله فالمسابقتين هذوك
والا ماف تفسير منطقي للوضع اللي انا فيه
من اسبوع شاركت في ثلاثة مدري اربع مسابقات وكان فيه فرصة افوز ب فوتو كاردز حق بانغتشان اصليات بس ما كان لي حظ معاهم
^
والحين ذي وش فيها مشخصنة القصة وهو الموضوع كله على بعض مجرد فرضية ؟
الزبدة اخلص التدوينة هنا لا اجيب العيد
​

 

[الزمـردة]

السلام عليكم ورحمة الله وبركاته.
توني جاية من مدونة @Hudα عشان بصراحة جابتلي الهام عشان اتكلم عن نفسي شوي
طبعا حبيت كيف هالبنت جالسة تحسن من نفسها وتتخطى مخاوفها ، واصرارها على التغيير خلاها تاخذ كورسات .
الناس اللي كذا تعجبني ، اللي تكون واعية على نفسها ، وايش التغيرات اللي تلزم عشان تخليها اسعد في حياتها ، وهالشي ما رح يرجع بالايجاب عليها بس ، انما على المحيطين بيها بعد.
انا بعد احب اغير من نفسي بس ما خذيت كورسات ولا استشرت حد ، بالعكس كنت عارفة المشكلة وين واحاول اعمل عكسها وفعلا لقيتني اغير كثير عادات ف حياتي ، واغير روتيني والحمد لله نفسيتي صارت افضل.
_
طول حياتي ترعبني المرة الاولى ، اول يوم لي بالمتوسط كان مرعب لان مو بس المكان اللي تغير علي ، وجوه جديدة ، نظام جديد .. نفس الشي بالثانوي ، والجامعة.
اول مرة لي خلف عجلة القيادة كانت مرعبة
والشي المشترك فالمواقف ذي كلها هو اني كنت مستعدة انسحب .. انسحب من الدراسة ، انسحب من اختبار القيادة وانسحب من كل شي.
بصراحة ما اعرف ايش سبب خوفي من المراة الاولى ، بس الخطوة الاولى دايما تكون ثقيلة علي الين اتعود ويصير الوضع روتين.
عشان كذا لقيتني مع الوقت اتهرب من تجربة اشياء جديدة.
_
تقريبا كل صحباتي عندهم مشاريع صغيرة ، منهم مصروف يومي ومنهم ممارسة لهواياتهم المفضلة.
وع قد ما كنت ابي اعمل مشروعي الخاص ، ع قد ما كانت الفكرة مسببالي رعب كبير.
بس هالمرة كان خوفي من الفشل، انو مشروعي ما ينجح ، وما القى زباين ، او يمكن شغلي ما يعجب الناس والاقي انتقاد.
اتوقع انو اغلبكم متذكرين ترند ال glass paintings اللي انشهرت بين محبين الانمي ؟
كنت اعملهم بس كنت اخبيهم او اهديهم للاصحاب ، مع انو الترند كان جديد والشي ذا كان مطلوب في منطقتي وجتني عروض اني ارسم وكانو الطلاب مستعدين يدفعون بس ما حبيت اجازف
ك انسان يفكر كثير ، و ك انسان تجرحه ابسط الانتقادات ، كنت رافضة فكرة المشروع 《 شف التناقض شلون
لان كنت خايفة انو شغلي رح يلاقي انتقاد وكذا
ف نسيت الفكرة واهملتها رغم تشجيع كل اللي شافو شغلي ، بس اللي ما يعرفني خله الحين يعرف انو راسي يابس اكثر من راس تانجيرو
وما اقتنع الا بالشي اللي ترضى عليه نفسي 《 ايوة واغلب قراراتي تكون غلط للاسف
بس مؤخرا كانت في بالي فكرة ، والصراحة جت ك مزحة
الين صحيت امس وطبقتها
وفعلا لقيت دعم من اصحابي
واليوم جالي اول زبون 🥹 وفي ناس عاجبها الستور حقي ومستعدين يصيرون زباين .
انا امس لما فتحت الصفحة ما كنت متحمسة لها وقلت عادي اذا ما نجحت ماهي بفارقة عندي
بس اليوم صحيت وانا عندي احساس كويس بخصوص المشروع
عشاني جالسة اسوي شي احبه واكيد رح ابذل مجهودي حتى اخليه ينجح .
وان شاء الله يوفقني فيه.
بس اكثر شي فرحني هو اني استجمعت الشجاعة وقررت اخطي اول خطوة بدون ما افكر فالاحتمالات السلبية.
عادي حنا نجرب ونتعلم من التجربة.
بس ما رح افكر فالفشل عشان ما افشل ، بالعكس انا اشوف صفحتي فيها الاف المشتركين والزباين ان شاء الله 《 فديت ستيلا وتفكيرها الايجابي ​

 

[الزمـردة]

الطريق للسعادة اسهل مما تتوقعون.
عشان تكون مرتاح في حياتك لازم تغير your mindset

1- اسحب نفسك من البيئة السلبية المحيطة فيك واحط نفسك بكل ماهو ايجابي.
اذا شي يخليك على اعصابك ابتعد عنه ، السلبية تولّد السلبية وانا اتكلم عن تجربة .
2-اعرف تنتقي اصحابك لانو مودك رح يعتمد 90% على رفقتك. اذا ماقبلو اختلافك وضحكو عليك ف ماهم بالاشخاص الحقيقيين.
الاصحاب الاحقيقيين بيتقبلون اختلافك ويشجعونك دايما على انك تكون مميز .
اذا ما خذو وقت وجهد عشان يفهمو شخصيتك ف صدقني ماهم بالاشخاص اللي تحتاجهم ف حياتك.
3- حدد اهداف ف حياتك ، وخلي حولك ناس تدعمك ولو بالكلمة الطيبة عشان توصل اهدافك وتحقق احلامك.
او حاول تشغل نفسك بشغلة تحبها خاصة اذا كنت من الناس اللي عندها تفكير زايد. نص المصايب والازمات النفسية تجي من ال over thinking ف حاول تحد من العادة السيئة ذي ، وكل رح يلقى طرق عشان يتخلص منها
4- تابع ستراي كيدز وكرش على بانق تشان

Instagram

www.instagram.com

كنتو مركزين عالاخر صح ؟ الين اخر نقطة جحفلتكم فيها

بس بجد ذي العادات الجديدة اللي معتمدتها في حياتي حاليا والحمد لله حاسة نفسي صرت اسعد وتفكيري صار ايجابي اكثر .
​

 

[الزمـردة]

ما هو أهم درس تعلمته في حياتك أو من خلال تجاربك الشخصية؟​

تعلمت كثير دروس من الحياة واتوقع فالتدوينة السابقة تكلمت عن اهم الدروس اللي تعلمتها من التجارب اللي عشتها .
بس في بضعة اشياء ودي اضيفها بعد وهو انو تعلمت ما اتغر بالضحكات والكلام ،ف حياتي ناس كثيرة تريحني بالكلام بس فالمواقف ما القاهم جنبي . والناس اللي توقف معايا تكون تنعد عالاصابع .
تعلمت اهتم للتفاصيل ، مثل مين اللي يفرح معاي ومين اللي يواسيني وقت حزني ومين اللي يحب لي الخير مثل ما يحب الخير لنفسه ، ومين يهتم لابسط تفاصيلي ومين يسمع لصوتي ورأيي بيفرقف حياة مين .. الخ
يعني صرت احط شروط لنفسي تخص الناس اللي ابيهم جنبي ، او ربما القول الانسب هو اني كنت اضحي بالكثير بس لاني ماحب اكون لوحدي من غير اصحاب او ناس جنبي. لو هم مو سند لي في السراء والضراء ف مابيهم بحياتي .

تعلمت انو اغلب المشاكل اللي تجيني يكون سببها انفعالي الزايد ، ومنه جالسة اشتغل على ال bad temper حقي ، مرات انجح وما انفعل واتعامل ببرود مع الموقف اللي انا فيه ومرات اثور مثل البركان ، بس انا واعية على انو الانفعال ذا نقطة سلبية فيني ولازم اتخلص منها ، لانه دايما يضيع حقي مني ومن مظلومة اصير زالمة بسبب ردات فعلي العنيفة ، بس ياخي مرات ما اقدر امسك نفسي لان احس ربنا يبعثلي ناس تنرفز عشان يختبر صبري عن طريقهم بس انا صبري يا دوبك

تعلمت اعتمد على نفسي في كل حاجة اسويها ، لانو حياتي كلها كان انتظار المساعدة او طلبها يجيبلي خيبة امل .

وطبعا كثير دروس غير دي ، بس دول اللي جايين على بالي فالوقت الحالي.​

 

[الزمـردة]

كل العالم عمل حملة كره ضد تشاني لما تكلم في بث بعفوية وقال انو شي يحزن لما تشوف فرق قديمة تنحني لفرق جديدة اعضائها صغار ، بس الجيل الجديد ما ينحني ويرد التحية... وذا من باب الاحترام حتى ديننا حث على احترام الصغير للكبير والعكس .. مع انه ما تكلم عن فرقة محددة ، وفيه عرب بعد انتقدوه ورمو عليه كره كبير حتى بعد ما نزل اعتذار باقي متعرض لحملة الكره ، مع انه تكلم بكل احترام وما اساء ف الفاظه ، بس نزل اعتذار وذا شي خلاه يكبر ف عيني ... وانا ادري انه تكلم بكل عفوية وكلامه كله صح وانا داعمته وماشوف انو كان يستاهل اعتذار منه.
_
قبل كم يوم انصدمت بنامجون حق ب bts , منزل ستوري انستا يروج فيه لاغنية فيها كره علني للاسلام ، بعيدا عن ان المغني بذات نفسه islamophobic او كاره للاسلام زالمسلمين ... واللي يقهر اكثر هو انو في عرب مسلمين يدافعون عن نامجون ويبررون فعله .. انا ماني ب ارمي انما اتابع اخبار الفرقة يعني ماني بكاره لهم وما ادور لهم الزلة ، بس ديني يبقى خط احمر ، لو تشان او غيره عمل تصرف يسيء للاسلام بقاطعه لابد ، هو كذا ما داس على الدين بس ، هو كذا داس على فانزه العرب المسلمين وهو واثق انهم من غير كرامة لان فعلا جلسو يبررون له .
والله لو هو حد ف كامل قواه العقلية ما يبرر لشخص مثله
الله يهديهم بس
لدرجة صديقة لي جت المسا منصدمة ودمها يغلي على التصرف ، وفنفس الوقت ضحكني خوفها لما قالتلي ان شاء الله ما يصدمنا تشاني ويسوي كدا
وانا قمت اهديها وبقولها انو تشان عاش فترة كويسة ف استراليا ، واستراليا فيها ناس من كل الثقافات وادري انو كان عنده اختلاط مع العرب المسلمين .
حتى انه مرة في مقابلة تكلم عن صاحبه اللبناني وشلون عزمه على اكل عربي ، وقال ان اكثر شي عجبه هو البقلاوة
ياخي فديته وهو ناطقها صح ، مش ' باكلافا ' زي ما ينطقونها الاجانب الهطفين
بس بجد تشاني وفيليكس عندي امل فيهم وفي اخلاقهم ، وما اظن انو عندهم كره للعرب ، عشان ثقافتهم تختلف عن ثقافة الكوريين اللي تكون منغلقة على العالم الخارجي ، وما يتقبلون ثقافات غيرهم وخاصة العرب المسلمين ..
مدري ليش اتكلم عن الموضوع بالمدونة بس حسيت انو شي لازم ينقال.
صح لك حق تحب فنان ، وتحترم ثقافته ، وميوله وديانته وتدعمه في اي شي يسويه ، ذا حقك بس لا وصل الامر بيهم انهم يهينون ثقافتك او دينك ف لازم تقاطعهم ومالك حق تدور لهم مبررات .​

 

[الزمـردة]

توني باعثة طلب صداقة لادمينة في مجموعة بالفيس ، لان مكتوب فالشروط ان لازم نضيف الادمينز .
الا واتفاجئ بيها ناشبتلي خاص تشتمني
ورسالتها : (لو بعثتك لي ال طيط هذيك ، روحي طيط انتي وهي )
عيوني توسعت وقريت الرسالة كم مرة لدرجة مخي علق ما فهمت شي ، مالصدمة ما لقيت وقت اعصب حتى
قمت باعثه لها علامة استفهام الا وتسألني ليش باعثة لها ، ف انا قلتلها بعثت عشانه من الشروط نضيف الادمينز .
قامت تعتذر وتقول انو قفطت زوجها يخونها مع بنت والبنت قامت تبعث لها بنات وفكرتني منهم.
قمت ادعي على البنت ذي اللي بسببها اتبهدلت وانا مااي دخل حتى
عموما ماحبيت اكبرها ، وقدرت وضعها .. صح تصرفها عصبني بس مالوم فيوزات مخها اللي طقت بسبب زوجها.
كنت دايما اتكلم عن خيانة الازواج ف مدونتي شلون ذي وحدة من الاسباب اللي مخليتني اعوف موضوع الزواج. بس ياخي كيف الواحد تنفتح نفسه لتكوين عيلة بينما الحوادث اللي كذا تتكرر على مسامعي كل يوم تقريبا .. لما الواحد يشوف مصايب المتزوجين يحمد ربه على نعمة العنوسة.
هي الله يعوضها بالافضل ، والله يهديها هي بعد .

بس فاهمين ايش قصدت فالتدوينة اللي قبل لما قلت ان ربنا احسه يختبرني لما يرسلي ناس كدا ؟
الحمد لله كنت مروقة وما استلمتها جلد
​

 

[الزمـردة]

السلام عليكم
اليوم جاية احكي عن خضة حياتي ، واللي هي خضة اتخضيتها امس فالليل ..
سألت صديقتي من فين تشتري فساتينها عشان عجبني ستايلهم ، وانا اصلا في فترة ابغى اغير فيه ستايلي.
هي ما قصرت وعطتني الصفحة عالانستا.
وللامانة كلش فيها كان وااااو .عارفين الستايل الكوري ذاك الكيوت والسوبر كاوايي ؟ ايوة ذااك
انا قلت مستحيل الشغل يكون كدا عالحقيقة ورحت اشيك الريفيوز حق الزباين 《 الثقة فالوثيقة زي ما بقلك v.v
وانا اقلب لقيت صورة بنت وربي نسخة طبقة الأصل عليا !
لدرجة قلبي نط من مكانه فكرت حد سارق صورتي ومنزلها
الين انتبهت انو اللبس ماف عندي منه ، والغرفة تختلف كليا عن بيتنا
سبحان الله فعلا ، بقيت اقولها ف عدم تصديق.
البنت نسخة علي بس ناقصها شاماتي.
قررت فالليل امقلب صحباتي عشان اعرف من منهم حافظة ملامحي عدل
ورستلهم صورة البنت ع اساس انها انا وقلتلهم ايش رايكم فاللبس اشتريته جديد.
والسدماااااه ، انو وحدة منهم ما انتبهت انو مش انا اللي فالصورة
قامو يمدحون اللبس ويسألون من فين اشتريته عشان يشترون زيه
يعني ما بيكفيني اتخضيت وقلببي طاح من مكانه ولا جتني خيبة امل فاللي اسميهم واللي مفروض يكونون رفيقات عمري 《 اهي الدراما الستلتولية الزايدة
لما خبرتهم اني مش انا ، طبعا بعد شلال من البهادل
اثنين منهم قالو انهم استغربو شلون ثخنت كدة
بس الملامح بقو يحلفون كانها توأمي ، وللامانة مالومهم
حتى اخوي الكبير انصدم لما بعثت الصورة له ، جلس بيقولي وربي تشبهك صح
حتى اني رحت لأبويا اسأله يمكن خلقنا اثنين توأم وهي سرقوها من المستشفى وزانت لها الدنيا 《 طبعا عطاني نظرة ال "اللهم طولك يا روح "
-
خبروني فالتقييمات هل قد حصلت معاكو وشفتو حد يشبهكم لدرجة تفكرون انهم توأمكم ؟​

 

[الزمـردة]

قبل فترة بعثتلي صديقتي فيديو للوحة "a starry night " للرسام فينسنت فانغوغ ، وكان عندها فضول اذا اقدر انسخها ولالا .
واجابتي كانت نعم ، لانو فعلا هاللوحة احبها من صغري ، وكنت مقررة ارسمها لما اكون فالمزاج لها.
طبعا مرت اسابيع وانشغلت مع الستور حقي ، وكمان انشغلت ف حياتي ونسيت امر اللوحة كليا.
وفجأة يطلعلي ريل لبنت رسامة اعرفها ، كانت رسمت هاللوحة.
انا وهي تكلمنا قبل اسبوع ومدحت شغلها بقلم الرصاص ، ما شاء الله ولا غلطة .. اللي ضحكني هو اننا متعاكسين ، هي تحب الرسم بقلم الرصاص وما تحب الرسم بالالوان المائية ، وانا عكسها ..
اتمنى لو كنت موهوبة فالرسم بالرصاص بس ما اقققددرر .
وهالسبب اللي خلاني ابلش رسم بالالوان المائية من سنة. بديت من الصفر ، كان كل شي صعب عليا ، من دمج الالوان ، التحكم فالتفاصيل بالريشة ، التدرج بالالوان ... الخ. مع الممارسة تحسنت كثير. مع انو ما ارسم بشكل دايما ، بالعكس يمكن ارسم مرة وانقطع شهور ، بس كل مرة احب النتيجة اكثر من السابقة.
في كم سبب خلاني اختار هذي اللوحة . اولها انو اشوفها مليانة تفاصيل ، وبحكم انو عندي ADHD اكثر يتعبني هو النظر للوحة او صورة مليانة ديتيلز ، يمسكني حول ف عيوني ، ف اخترتها ك تحدي لنفسي حتى اركز معاها ، واشوف نسبة تقاربها مع الاصلية ،وللامانة نسيت احط اللون الابيض حول النجوم بالاخير ، وما انتبهت الا بعد ما صورت وخبيت الالوان
ثاني سبب خلاني اختار اللوحة ذي وهو لانو يطغى عليها اللون الازرق ، وذا لوني المفضل لانو يحسسني بالراحة وكمان احب استخدمه كثير.

الحين لو اتكلم عن النتيجة ، وماني امدحها بس عشان شغل ايدي.
بس هذي اجمل لوحة رسمتها طول هالسنة . كانت اخر صفحة من السكتش بوك حقي ، واقدر بفخر اقول انو ختامها مسك.
فتحت حساب تيكتوك بس عشان اشارك النتيجة معاكم.
يا ريت تعطوني رأيكم في تقييم.
اتقبل الانتقادات بس يا ريت تخلونها لطيفة عشان انا زول حساس ويبكي بسرعة 》 احمم صدقناك يا ستيلا v.v

TikTok - Make Your Day

​