فخر المدونين Make Some NOISE (3 زائر)

[Selene]

نبتدي اول تدوينة بالصفحة الجديد بـ :
ميييييين قددييي باااندا صممتلي احلا طقم لمدونتي شكرا كتير يا جميلةة
بما انها صفحة جديدةة قلت احكي شوي عن حالي . .

فكرت من فترة اني اكتب هالتدوينة و اليوم اجا وقتها . . مرات بحس اني مابقدر اني عبر
عن مشاعري للشخص الي قدامي هيك بحس بخوف و تردد مع اني عارفة لو قلت الي بقلبي و الشي
ايجابي يعني مو سلبي بحس بتردد و مابعرف هالتردد ليه بيجيني و هل خوف ؟ يمكن هالشي اجا
من طفولتي بحكم اني كنت مخفية عن العالم ومحدا شايفني ف تعودت اني ما عبر عن الي بقلبي
للأشخاص الي بحبهم . . و كنت خاف من ردة فعلهم يمكن يتضحكوا او يقلبوها بمسخرة
بتعرفوا كنا صغار و كل شي بيطلع منهم و كتير مرات صداقات انقطعت بسبب هالشي
و كان السبب مني ! انا مابعرف عبر عن حبي للأشخاص !! و مرات لما بدي عبر مثلا بحس بجيب العيد
و المشكلة اني بعد ما احكي لهل الشخص الي بقلبي بندم مو بالضرورة يكون اعتراف صريح ممكن اني احكي
معو بشكل دائم او اني تابع منشوراتو او اني بكل حديث جيب اسمو مشان يجي يشاركني و هيك
طبعا كل هاد انا عم بحكي و نحن اصدقاء يعني علاقات الصداقة !! و مرة لما كنت بالكورس الألماني
كانوا اساتذتي كتييير حبابين جد و بيدخلوا للقلب و ماقدرت اني عبرلهم عن حبي و اعجابي فيهم بسبب
خوفي و خجلي ! ياخي بكره هالصفة الي فيني لأنو لو ماعندي ياها كانوا كتير ناس عرفوا
اديش هم غالين علي و اديش بحبهم و بحترمهم . . و بس هيك !! ومابعرف عبر عن الي بقلبي
بشكل عام . . هي تاني مشكلة عندي ياها !! يعني شي ماعجبني مابحكي و بنفذ الموضوع و التم ساكت
حق من حقوقي راح . . بسكت و بمشي . . ومابعرف ليه انا هيك . . و كل هاد بسبب طفولتي و لما يصير
اي شي لساني بينربط ! انا مارح مثل دور الضحية ! لا انا الحق علي كمان . . كان المفروض قوم و اوقف
و احكي بصوت عالي عن كل شي بفكر فيه و ماخاف من ردة الناس الي حولي !! ف بهل السنة انا خلص قررت
و حززمت الموضوع !! اني من يوم و رايح رح بلش عبر عن كل شي بقلبي ! احكي لكل حدا حبيتو . . ترا
انت تنحب ! و كل حدا زعجني احكيها بوشو ما عاد جامل و مشي امور على حساب مشاعري !!
رح اوقف و قول للكل الي بقلبي و بدون خوف او تردد لاني كبرت و عرفت انو محدا كامل و من حق
كل انسان عايش يعبر عن مشاعرو !

سؤال لكم : هل انتوا عندكم هالخوف و التردد انكم تخبروا الناس/اصدقائكم بحبكم الهم ؟


​

 

[Selene]

-27.3.2020
عصر الخير، أتمنى لكُم يوم سعيد ...
فكرة الحياة صعبة، صعبة كتير ..
انك كل يوم تصحى من عز نومك، تواجه الناس، تواجه الكائنات البغيضة
وتسمع كلام سيء، ويهزوا ثقتك بنفسك، يقللوا من اهتماماتك، ويلزموك تتنازل عن امور كتيرة
يحكموا عليك بكل تصرف، يجبروك تتصنع، على الرغم من انهم مو كاملين وتافهين
يعصبوا لما يشوفوك مبسوط، يتضايقوا لما يشوفوك على طبيعتك بعفويتك
حتى الاشخاص الي بتحبهم وبحبوك، احيانا نفسك تقطع علاقتك فيهم
يضايقوك الناس بأشياء كتيرة، لدرجة تفكر كل يوم لما تصحى، مابصير ارجع نام؟

انك تواجه الحياة والاشخاص، تحتاج شجاعة كبيرة شجاعة فعلا كبيرة
انت قوي وانا بحكيلك شكرا لك على قوتك وصلابتك، شكرا على تماسكك ضد التيارات المتجهة نحوك
شكرا حتى على قدرتك على جذب نفسك بعيدا عن المستنقع، وعن الغرق
يكفيك شرف الحياة، ماتحتاج تكون لك سيرة ذاتية من 100 صفحة مشان تثبت للناس أنك شخص مثابر
بكفي إنك كل يوم تحاول تبتسم وتخبي غيظك، تحاول تتجاهل، وتعيش بسلام
ماتحاول تنشب ، ماتحاول تتنصت ، ماتحاول تغدر وماتحاول تسب بإسم مستعار
ما بعطيك اسباب انك تتكاسل، بس أشكرك على صمودك وعزيمتك إنك تعيش بالرغم من كل الصعوبات
وبالرغم من كل الصعوبات الي تواجهك، والي ماتقدر تحكيها لحدا، لإنهم يقلللون من صعوباتك
ويحسسوك إنك ماشفت الحياة وإن كل معاناتك هباء ولا تسوى شيء!!
وحتى بالرغم إنك بتحب دائما تكون مبسوط، وتحاول دائما إنك تبتسم وتضحك وتسخر من الوقائع
وقاعد تحاول جاهد تبني عالمك وتحاول تجتهد في الحياة، لكن ما راودتك فكرة انك تتخلص من حياتك
لإنك تقدر حياتك، حتى لو مكانك لا يناسب طموحك وخيالاتك وأحلامك، بس بتضل متماسك
بعيدًأ عن الناحية الدينية، أنت شخص قوي وثابت أصلك كالجذور للأشجار المعمرة، ثابتة وراسخة
حتى وإن كسروا اجزاء منك، تنمو، وتزهر، لإنك وبالرغم من صعوبة حياتك الان لاتزال صامد
لا تعطي الناس الفرصة انهم يحطموك ويهشموك، محدا رح يسأل عن شو بصير بقلبك
محدا بيهتم كتير بالكلام الي بيحكيه، لاتخلي كلامهم يكسرك، أنت قوي، يكفي إنك متقبل وجودك
يكفي إنك تحارب أشياء كثيرة داخل رأسك، ولازلت متماسك ولا زال تفكيرك شريف وانساني
شكرًا على قوتك

-إلى: كل شخص مالقى حدا يقول له - ولنفسي في وقت ضعفي.


​

 

[Selene]

انا تربيت على القسوة واخترت اني استفيد منها و أنت ؟

انا نفسك و اعتقد كل شخص عربي تربى على القسوة طبعا اذا كان بزمان الطيبين ! هلأ ما اعتقد انو في
عنف حتى لو كانت بالتربية .. المهم اني نفسك تربيت ع القسوة و اذا اي شي ما عجب ابوي اتكفخ لين
مايقول الرحمن بس .. طبعا انا كنت ضد هالشي .. مابعرف يعني انا كنت ضد هالتعنيف و كنت
مرات اتنمر على اهلي و اذا حد ضربني اردها وكنت معروفة بصغري بعنادي و اني مابسكت عن حقي ..
فما كنت حس انو القسوة ممكن انها تقوي من حدا شي ! بالعكس حسيتها بتضعفني ! بتعرفي ليه ؟ لاني
كلما اتذكر لما ابوي كان يضربني بحس بحرقة بقلبي و كلما حس هيك بضعف و بحاول اني ما فكر !
اما اذا كانت الذكريات حلوة هي هية الي بتقويني مو واحد كان يضربني من باب الترباية او من اي باب
كان وبدي اخدها من الناحية القوية !

بدك الصراحة؟ انا امي الي قوتني ! لانها هي الوحيدة الي كانت واقفة معي وما كانت تضربني ابدا و كانت
تعرف كيف تعاقب بدون ضرب! و انا هلأ بنت امي مو بنت ابوي . . للأسف هاد الواقع . . انا مو بنت
تاخد العبرة من القوي و بس عندو * ايدو و الكف * انا باخد العبرة من الشخص الذكي الي يعرف كيف
يعاقب بدون لا يمد يده .. و كيف يقوي اولاده بدون التعنيف و بدون القسوة .. ف أمي كان افضل قدوة
لي و للحين انا بقتدي فيهها و بحاول كتير مرات اني ارفع راسها و كون قوية لأجلها * مو لأجلي * ومو
لأجل ابوي الي كل الي كان بقلبه قسوة تجاهنا؟

طبعا انا احب ابوي كمحبة فطرية ومستحيل اكرهه و للحين احترمه حتى لو شو ما سوى ! بتم ابوي
بس هذا جوابي بعد ما كبرت وذقت الامرين وممكن انو نحن نتحايل على الوضع و نضحك على حالنا
ونحكي اني انا بدي اخد هالشي من الناحية الايجابية ! مو خطأ طبعا .. و اكيد الحياة الصعبة والقاسية
هية الي بتعلمنا كيف نكون اقوياء لما نكبر ! بس كل تعليقي كان على المبدأ نفسه ! انو ممكن كون اقوياء
بدون مايكون في قسوة بالتربية !

نفس الاجانب مثلا ماعندهم قسوة طبعا مو كلهم بس هم مشهورين بهذا الشي ! و عندهم كتير
قوانين تحمي الطفل ضد التعنيف الاسري ! و لو الاجانب اجوا عنا لكان اجاهم انفصام بالشخصية !
لانو الي يعتبر عنا عادي عندهم ابدا مو عادي ! و شوفي كيف اولادهم بيطلعوا اقوياء و ناجحين؟
التعنيف مانو حل لحتى يخلي الطفل ناجح و قوي بالمستقبل . .

#رأيي_الشخصي

​

 

[Selene]

-




مرحبا يا حلوين . . رجعتلكم مرة اخرى بتدوينةة عن اللغة الالمانيةة
الدرس السابق تجدونه ( هنا ) و درس اليوم رح يحكي على الارتيكلز باللغة العربية
( ال التعريف ) = Der . Die & Das

درس اليوم كتير سهل ولكن رغم سهولته الا ان اللغة الالمانية كاملتاَ
متوقفة على هذا الدرس . . اي انك اذا لم تحفظ ال التعريف الخاصة بالكلمات
لن تستطيع تصريف ارتيكل الكلمة بالشكل الصحيح و انا اقصد هنا ( قواعدياَ )

رح اشرحلكم اكتر . . انا لسا ما عطيت دروس عن قواعد اللغة الي هن :

Nominativ = حالة الرفع
akkusativ = المفعول به
Dativ = كلمة واقعة في حال النصب
Genitiv = مضاف اليه

طبعا هي كل قواعد اللغة ( النحوية ) و الي هن 4 قواعد فقط ( بس بشيبوا الراس )

فهل الارتيكيلز الهم دخل بهل القواعد ولحتى تطبقوا القواعد بالشكل الصحيح
لازم تعرفوا ارتيكل الكلمة لحتى تصرفوا الارتيكل على حسب القاعدة . .

هلأ مارح صعبلكم الموضوع اول شي رح اشرحلكم عن الارتيكلز بشكل عام
و اعطيكم فكرة عامة عنهم و ركزوا بهل الدرس لأنو هو اساس اللغة :

عنا 3 ارتيكيلات ولكل ارتيكل بمثل شي :

Die = للمؤنث = Die Frau = المرأة
Der = للمذكر = Der Man = الرجل
Das = للجماد او الأشياء = Das Kind = الطفل

^ الطفل هون يعتبر الارتيكل تبعو من الجماد

و للأسف اللغة الالمانية فيها كتير قواعد شاذة و منها تنطبق على الارتيكيلز
و في جزء كبيير من ال التعريفات بالكلمات مالها دخل بالقاعدةة نفس:

. . .

كلمة Rock = تنورة . . مع انو الكلمة تعود للبنت يعني المفروض تكون
مؤنث ولكن كلمة ROCK تأخذ ارتيكل Der و عنا كلمة Krawatte
معناها ربطة العنق ( قرافة الي بيلبسا الرجل على البدلات الرسمية )
و مع انها تخص الشباب و مع هيك الارتيكل تبعها Die يعني مابخصها باللياقة
كل شي بالعكس ؟!! و مرة الاستاذ قال انو قاعدة الارتيكيلز مرات تنبطق عليها
قاعدة مين بيستخدمها او بيعملها؟ يعني مثلا القرافة ( ربطة العنق )
بألمانيا البنت هية الي بتربطها للشب ف اجا الارتيكل تبعها Die بناءا على هالشي !
* طيب التنورة شو ؟ ههههههههههههههههههههههههه *

الارتيكلز يفضل تنحفظ حفظ و في بعض النهايات بتعرفلنا اي ارتيكل بتنتمي ؟
بس طبعا مو دائما بتكون هالقاعدة ثابتة . .

. . .

مثلا عنا ارتيكل Die النهايات الي تنتمي لهل الأرتيكل :

محتوى مخفي

- age
- ei
- enz
- esse
- euse
- heit
- ie
- ion
- itis
- keit
- schaft
- tät
- ung
- ur

كل هالنهايات تنتمي لهل الأرتيكل اي اذا لقيتو كلمة تنتهي بأحد هالنهايات
ف هي على الغالب Die

ارتيكل Der :

محتوى مخفي

- ant
- ar
- är
- ent
- eur
- ismur
- ist
- or
- ör

ارتيكل Das :

محتوى مخفي

- chen
- ett
- lein
- ment
- nis
- sel
- um

هي مجموعة بسيطة من النهايات و طبعا هدول مو كلهم هدول الي الاستاذ
عطانا ياهن و حكالنا انو بالمستويات الاعلى رح تاخدوا لستات اطول
هدول بينحفظوا حفظ و مرات في كلمات لا تنطبق على اللستة الي فوق

مثال على حرف e على الأغلب نسبة 95% الكلمة رح تكون Die
بس عنا كلمة käse = جبن . . هي بتاخذ ارتيكل Der

ف انا لقيت حل لهل الارتيكيلز انو تنحفظ بالكلمة مو بالقاعدة ممكن
القاعدة تنفع بس مابعتمد عليها 100% . . انا بحفظ الارتيكل مع الكلمة
و بحاول مارسها كتير لحتى احفظها . .

و على فكرة موضوع الارتيكيلز الشعب الالماني نفسو عم بعاني منو !
يعني مو بس نحن الي منعاني منو و في كتير المان لما يحكوا بلغة الشارع
ما بطبقوا تصريف الارتيكلز الصحيح بسبب انهم في بعض الكلمات مابيعرفوا
الارتيكل تبعها = نفس مانحكي باللغة الفصحى على سبيل المثال = لانو ال التعريف
للكلمات ما بينتهي انتوا متخيلين كمية الكلمات الي فيها ال تعريف ؟
ف اذا تخربطتوا شي يوم فيهم مو عيب لانو صاحبين اللغة بيتخربطوا فيهم

و هيك بكون خلصت درس اليوم . .
الدرس القادم رح يكون اول درس عن قواعد اللغة ابقوا معي . .


​

 

[Selene]

مرحبا يا حلوين هالتدوينة رح تكون عن الوزن و المفهوم الخاطىء لها . .
لما كنت بالجم ايام 2016 لما بلشت و بلش جسمي يتغير بس الوزن كان نفسو
و لما كان اي حدا يسالني عن وزني و احكيلو 75 و ينصدم طبعا " انا بحب احكي
بصيغة المذكر بس هون انا قصدي بشكل عام " لانو شكل جسمي مقارنة بوزني
انحف بكتييير و يعني الي يتخيل الوزن هاد بمخو رح يتخيل جسم مليان خاصتا
مقارنة مع طولي لأن طولي 166 . . ف شو بيحكوا . . كيف 75 ؟ و مايصدقون
و بفكروني اني عم اكذب مشان الفت نظر . . و كتير بتنرفزني هالنوعية من الناس . .
خاصتا جسمي هلأ مقارنة بوزني كمان مافي مقارنةة لان كل الي شافني بيحكي وزني
75 مقارنة بجسمي بس بالحقيقة وزنني اعلى اي بحكيها بصراحة وزني اعلى . .
المهم رح احكيلكم كيف الوزن بينقاس . . متل مامبين بالصورة الي حطيتها فوق . .
جابوا كتلتين كتلة عضل و كتلة دهون و كلاهما يحملان نفس الوزن . . بس شوفوا
الفرق بينهم ؟ كتلة العضل اصغر من الكتلة الدهنية . . فهل السبب يا شباب رجائا لما
تسئلوا حدا عن وزنو ياريت تذكروا هل هو بروح ع الجم او لا لان حساب
الوزن مو بس بالدهون هاد اكبر خطأ ! ترا الوزن له عدة نقاط لحتى ينقاس منها . .
منها الطول و نسبة الدهون و نسبة العضل و نسبة المي و الاهم من هاد كلو و حطوا
تحتها عشرين خط لان هالشي بيتجاهلوه الاغلب او مابيخطر ببالهم . . وزن العظم !!
لان من شخص لشخص يختلف وزن العظم . . عادي تلاقي بنتين نفس الوزن بس وحدة
سمينة ووحدة نحيفة و السبب هو وزن العظم و وزن العظم بيختلف من شخص لتاني حتى
في ناس هن بيعرفوا ان عظمهم ثقيل و كبير و انا من هالناس فهل المعلومة ضيفوها
لمعلوماتكم عشان تفرقون بين الاثنين . . لما بلش جسمي يتغير و نحفت 12 كيلو بس قبل
ما انحف 12 كيلو كان وزني ثابت و جسمي هو الي يتغير و هالشي بسبب ان الدهون عم
تتحول للعضلات ولان العضلات شكلها اصغر مقارنة بالدهون ف ببين الجسم معنا انو عم
ينحف بس الوزن متل ماهو . . ف الي بروح ع الجم و بدو ينحف لا يركز كتير بالوزن
لان بتكون الدهون عم تتحول لعضل بنفس الوزن و فرق الوزن ( الرقم ع الميزان )
بيجي مع الوقت . .

* شطحة *

مشان هيك الي فيهم متنة و بدهم ينحفوا او يبنوا عضل اسهل بكتير من انو يكون الواحد نحيف
و يسمن لان لما الدهون تتحول للعضلات اسهل من انك تبني عضلات من لا شيء . .

وبس والله ان شاء الله تكونوا استفدتوا معي بهل المعلومة الصغنونةة . .

​

 

[Selene]

مرحبا يا حلوين رجعتلكم مرة تانيةة و بهالتدوينةة رح احكي فيها عن ذكرياتي
القديمةة و بعض من الصور رح شاركها معكم و من هلأ بحكيلكم ان الصور قديمة
يعني التصوير مش ولا بد لان كنت صور ب بلاكبيري كيرف . .

مرة اجاني سؤال بكرسي الاعتراف انو هل انا بلبس كعوبة اكتر ولا احذية رياضية ؟
و وقتها جاوبت انو عندي احذية ليميتد ايديشن و كنت حب كتير جمع الاحذية و خليها
عندي حتى لو مارح البسها بس هيك ادمان . . و رح اعرضلكم كم من صورة
لقيتهم بمعرض الصور عندي . . و هدول مجموعة من الي كانوا عندي



^ هاد الشوز قصتو قصةة . . بس قبل ما احكيلكم القصةة هاد الشوز من ماركة بوما و حامل شعار الفراري
بسموه فراري ايديشن و هاد كان اخر قطعة كان و اخدو بوقت السيل لا و كمان مو قياسي انا قياس رجلي
39 و هاد قياسو 37 وكنت مارح اخدو بس قلت خليني جرب شو خسرانة ؟ و لما جربتو اجا ع رجلي فت !!
و متت فرحةة و كانت معي اخر 100 و صرفتها على هالشوز و كلما البسو كنت دائما اسمع مجاملات و حكي
حلو . . لان كان لونو ابيض ناااااااصع و مخطط بالأحمر . .



اما هاد كان المفضل عندي لاني شتريتو من مصروفي و هاد ما كان عليه سيل اخدتو وقتها ب 350
و مصروفي كان ع قد حالو حبيتو كتير لان الباترن تبعو كان غريب و كان في كولكشن بأديداس
بلوزة ع نفس الباترن و شتريتها كمان مع اني ما بشتري بلوز من هنيك بس حبيت شكلهم مع بعض



و هون لما كملت المجموعة كلها و هي كانت اول مرة يعني بجيب لبس ع العيد بهل شكل
كانت هابة عندي موضة السبورت و كان وقتها جسمي حلو و كنت مداومة ع الجم ف حسيت
انو بيلبق على الي بعملو كل يوم



اما هاد قصتو قصة !! والله كل شوز انا بشتريه لازم يكون الو قصة مع اني ماكتير
بحب ماركة نايكي بس و مع هيك انا بتجذبني الاحذية الغريبة شو ما كانت ! شايفين
اللون الرمادي الي عليه ؟ هاد لما تمشوا بيعكس الضو و لما تصوروا بفلاش كل الشوز
بيختفي و ببين بس الرمادي و لما تروحوا على حفلة مثلا و في ضو ازرق كل الشوز بيختفي
و الفسفوري بيبرز حذاء عنجد فريد من نوعه . . هاد الشوز ضاين معي عمر
صدق من قال انو كل شي بحقو . . المهم هاد شفتو بمردف مول بدبي و انا ساكنة
بالشارقة . . و كنت وقتها كل ما خلص تمرين من الجم لان الجم كان بالمول كنت روح اتمشى
بالمول و شوف شو في جديد بس ما اشتري بس هيك القي نظرة و اذ اني انا بفوت ع محل مسوي
دسكاونت بيوصل لل 80% و شفت هالشوز ! و كان هاد كمان اخر قطعةة ( انا مابعرف ليه حظي حلو
بموضوع الاحذية ) و كان القياس اكبر من رجلي كان 41 هيك شي !! و مع هيك قلت قيسو
مارح اخسر شي ؟ و قستو و اجا ع قد رجلي فت !!! و قلت لازم اخدو لان كان سعرو رخييص
بس وقتها ما كان معي حقو !! قمت اخدت الشوز و رحت لعند الكاشيير و حكيتلو يحجزو عندو ساعتين
لحتى ارجع و حكالي اوكي . . و رحت ركض للشارقة تخيلوا المسافة مشان روح للبيت و اخد من اهلي
مصاري مشان اشتريه و رجعت مرة تانية ع المول و اشتريتو
مشان هيك هاد الشوز كتييييييييييييييير غالي علي . .



للأمانة هدول مو اصليين هدول نسخة 1 . . و كانت هي اول مرة بجرب التقلييد و كنت دائما
ضد التقليد خاصتا لو كان شي بينلبس بالرجل لاني الرجل عادي تتأذى من ورا او من قدام من
عند الاصابع اذا الشوز ما كان مريح ! . . بس من بعد ما جربت النسخة رقم 1 صرت دائما جيب
منهم و اسحب ع الماركة الا اذا في شي عنجد واو ياخي بسعر التقليد كنت اشتري 4 احذية
بسعر واحد تتخيلوا الموضوع ؟ بسوق الصيني بعجمان لقيت نفسهم ب 50 درهم و الاصلي منهم
مو اقل من 350 بالسوق ! يعني فعليا! بقدر اشتري 6 احذية بسعر الاصلي !!!
و في عندي كمان اثنين اديداس شتريتهم بس ماعندي غير فديو الهم ومو متفيقة حول الفديو
لصورة سالفة طويلة المهم ان هالاحذية الي بالصورة كانت طالعة موضتهم وقتها
و اعتقد لحد هلأ طالعةة . . و خاصتا الوردي كان كتيير يلفت نظر . .



و هون كانت اول مرة بجرب سباق السيارات الي بالبترول !! و كانت ربع ساعة بس يخربيتها
كانت غالية !! لا وكمان طوييييلة و ربي ماتوقعت انو ممكن الربع ساعة تكون طويلة هيك
لدرجة كل جسمي تكسر ! عنجد قبل ما جربها كنت اضحك على الي بسمي رياضة السيارات رياضة !
بس من بعد ما جربتها فعلا تسمى رياضة لانو جسمك كلو بشد و خاصتا الرجل و الفخد !!

المهم شوفوا انا طلعت المركز التالت طبعا بعدد القات و الصورة الي ع اليمين هاد هو المظمار <
هيك بتنكتب صح ههههههههههههههههههه نسيت والله كيف بتنكتب المهم فهمتوها



و هون لما طلعت على قمة برج خليفة و كانت اول مرة و هدول كانوا التذاكر و حبيت الجملة
الي كتبوها Get ready to enter the record books
منيح انو تاريخ الدحول مكتوب ع التذكرة لانو نسيت و هالشي كان زمااان
3 . ديسمبر . 2013 < خييييبة عنجد زمان كيف مر الوقت بسرعة



و هون اول ما تدخلوا على مدخل البرج مشان تتجمعوا مع المجموعة الي انتوا فيها
لانو رح يكون في متل مرشد سياحي بكون معكم . . هاد تمثال كامل لشكل البرج وعلى فكرة
شكلو بالواقع اكبر بكتير مابعرف ليه طالع هون صغير



^ هالصورة موجودة داخل البرج بالطابق الارضي قبل ما نطلع لفوق . . هالصورة
تجمع كل مين حط ايدو بهل البرج و مكتوب فوق كل صورة اسم الشخص و شو كانت
شغلتو



و هون لما تروحوا للمصعد رح تلاقوا هاللوحة و ركزا على رسمة الوردة
لاني رح اشرحها بعد هالصورة



هون جمب المصعد و لو شفتو اللوقو الي عبارة عن وردة ثلاثية . . هي تعتبر
اشهر وردة بصحراء الامارات و اجا تصميم البرج منها ك دليل على ثقافة الامارات
و لو انتبهتوا البرج جاي ثلاثي القواعد و من هالقواعد الثلاثة طالع لفوق و لو شفتو
صورة البرج من فوق لتحت يعني صورة علوية رح يكون التصميم واضح



^ و هون على اساس انها اعلى قمة بالعالم و للأسف ما حبيت كتير فكرت رح يطلعونا لآخر طابق !
بس اتضح انو هاد طابق 124 و هاد يعتبر اعلى نقطة بالعالم < قال بدهم يضحكوا علينا بهل الشي
و فوق هاد فكرت في بلكونة الواحد يشوف المنظر واقعي طلع كل شي مسيج بالقزاز و كلو مسكر و هون بلكونة
صح بس بعيدة عن تحت يعني مافيني شوف تحت و حبيت صور البرج من هالنقطة . .



و هي صورة لدبي من اعلى نقطة و كانت بليل اعتقد لو كانت الصبح كانت رح تكون احلى
بس شو سوي حظي و بعرفو و على فكرة حجز التذاكر مو تروح تحجز اي وقت و يلا هاد هو ؟
لا . . بشوفو مجموعة اذا ما تملت بأخروها يعني حجزي للطلعة هي كانت بعد اسبوع من موعد
الحجز ! و هاد لان حظي حلو في ناس بيستنوا شهر ؟ لانو انا اجيت بوقت فيه السياحة كتيرة



و هون لما تخلص جولتكم و تروحوا رح تشوفوا هاللافتة مكتوب فيها مع السلامة بأغلب اللغات

و نسيت احكيلكم انو فوق بالرج في الة بتحطوا 10 دراهم و بتضلوا تلفوا الحديدة لحتى تطبع
عملة معدنية مختوم عليها شعار برج خليفة و هي نفس ذكرى رمزية بياخدوها الزوار مشان
يخلوها عندهم كذكرى و انا اخدت وحدة و حطيتها بصندوق الذكريات تبعي و اختي بكل بساطة
كبت الصندوق باللي فيه . . !!!

و االمصعد تبع البرج حكولي هنيك انو بيطلع مدري 10 طوابق ب ثانية و كنت لما شوف
رقم الطابق على الشاشة كنت شوف عم بيطلع مجموعة ارقام ورا بعض لدرجة فكرت الكمبيوتر خربان
و طلع لطابق 124 ب 3 دقايق تقريبا مَ شاء الله عليه و صنفوه من اسرع المصاعد بالعالم

تجربتي: حبيتها نوعا ما بس اول شي ما اخدونا لآخر طابق و تاني شي كل شي مسكر
يعني شو استفدت اطلع لطابق عالي و كلو محصن بالزجاج ؟ هاد اكتر شي الي ما حبيتو
و بالنسبة الي حبيت تصميم البرج بالطابق الارضي اكتر من فوق حسيتهم اهتموا بالمدخل
اكتر



و هي الصورة كانت بنفس اليوم لما دبي اخدت الاكسبو و خلوا البرج كلو ازرق لعدة ايام ووقتها انا و اهلي كنا بكافيه
جمب البرج و صورتها للذكرى هي صورة منفصلة عن الي فوق



هالصورة لما صبغت شعري ازرق و وقتها ماكان في كفوف بالبيت قلت مافي وقت للكفوف
و كانت اول مرة بصبغ شعري هاللون و عنجد طلع رهيييب لدرجة في منهم فكروا شعري باروكة



هالصورة اخدتها لما صفيت السيارة جمب سيارة جارنا ( بالصدفة طبعا ) الي ع اليمين bmw z4
الي ع اليسار bmw z3 و سميت الصورة الام و بنتها بس بصراحة الصورة
طلعت فنانة . .



اما هي لما كنت بالمقهى و كان هالمقهى مداومة فيه تقريبا لاني كنت كل يوم روح لهنيك
ف مرة من المرات اجيت الظهر و كان المقهى فاضي . . و اجت القطة جمبي و انصدمت انها
ما كانت خايفةة و ضليت المسها و دلك جسمها و هية من كتر ماكانت مبسوطة نامت
و صورتها و هي نايمة ياعمري شو كيووووت . .


رح كمللكم الصور لانو لسا في كتير بس خلوها بتدوينة تانيةة مشان ما طول عليكم



​

 

[Selene]

تعليق على تدوينة @HIKAYAMI تجدونها هنا

بس هو اكو شي بالعالم يخلي من حقك تتمنى الشر لانسان ؟
شتكولون ؟

هلأ شوفي انا معك بالكلام الي قلتيه 100% و مو منيح انو الواحد يدعي على حدا
اذاه بس بالحياة و بالدين في شي اسمو حق خاص و حق عام . . حق الخاص هون
هو حق البني ادم نفسو اذا بسامح او لا و حق عام و هو حساب الله لانو حتى
لو انتي سامحتي الشخص الي اذاكي في حق عام فيكي تقولي انك تنازلتي على نص
العقوبة بس النص الثاني عند الله بيوم القيامة !! مشان هيك لازم الشخص الي اذى حدا
يعرف انو حتى لو سامحه الشخص في حق بيوم القيامة مابضيع !! ف هل الشي مافيه اي
استهتار . . ممكن اذا حدى اذاني اكرهو و نفسي تنشق الارض و تبلعو و ممكن اتمنالو الموت
بس اكتشفت اخر شي من بعد كتييير تجارب مريت فيها و انا المتأذية ( مارح احكي اني انا الضحية
لاني كنت كتير اكره اني مثل هالدور ) وفي ناس وربي لحد هلأ ماني مسامحتهم بس ماتمنيتلهم
الاذية . . انا بخلي حسابي عند الله . . الله بيعرف كيف يخلي هالشخص يذوق نفس الالم الي
حسيته بهداك الوقت . . وصلت لمرحلة ما عدت سب او اشتم او ادعي لحد بالموت . .
لأي درجة انا بخاف اني ادعي لحدا بالموت او بشي جدا سيء . . انا اصلا بخاف هالشخص
الي اذاني يتأذى تخيلي لأي درجة انا رحيمة و قلبي طيب بالرغم انو مرات كنت ارجع ع
البيت ابكيييي من القهر ؟

مرة صرلي موقف مع واحد مارح احكي شو المشكلة بالضبط بس المشكلة فيها اعراض
يعني متخيلة قديشها بتأذي ؟ و هالشخص كان من اقرب الاشخاص عندي و هو بيعرفني
كتييير منيح يعني كنت قضي يومي كلللوووو معو هو عارف مضموني و شخصيتي
و اسلوبي و افكاري كلها !!! و هو الي غدر فيني !!!! طبعا انا ماكنت عارفة القصة لو ما
واحد كنت اعرفه هو الي اجا و حكالي كل القصة ولا انا ماكنت عرفت شو القصة و لا هو كان حكالي ؟
و بالاخر رحت لعند هالشخص الي اذاني و تكلم بشرفي و حكيتلو ماني مسامحتك ليوم الدين و ان
شاء الله يصير بأخواتك نفس ما سويت فيني ! و هالكلام كان طالع عن حرقة بقلبي ! و ماتمنيتله
الموت ابداَ بس اختصرت دعوتي وولكت امرو ل الله . . و مرت شهور و نسيت القصة
كلها . . و اذ هو بيتصلي و بيحكيلي تذكرتيني . . طبعا انا متذكرتو و مستحيل انسى صوتو . .
و انا عاملة حالي غبية مشان مايكمل بالكلام و يسكر بسرعةة حكيتلو لا ما تذكرتك . . صار
يحاول يذكرني كذا كذا و انا مليت و قلتلو شو بدك من الاخر ؟ حكالي زينة سامحيني وربي من
وقت ماحكيتي هداك الكلام ( قصدي عن الدعوة ) من وقتها و انا مو متوفق بحياتي . . قال
دخل بسجن و اجتتو ديون و كلما يحاول يبدا بشي يفشل و قال كل هاد بسبب دعوتك و قلي بترجاكي
سامحيني و كان شوي و بيبكي ع الموبايل !! و انا قلبي ضعيف وربي ماقدرت و خاصتا لما قال
سامحيني ! انتوا متخيلين بهل الزمن واحد بيطلب من حدا يسامحه على شي قديم و يترجاه ؟ قالي
ماعاد ارجع عيدها و نفسي نرجع اصدقاء نفس قبل حكيتلو انا مسامحتك بس مارح نرجع اصدقاء نفس
قبل و امسح رقمي و قالي هالشي من قلبك ؟ حكيتلو اي من قلبي مسامحتك و لا عاد ترجع تتصلي
و من وقتها ماسمعت عنه شي . . مشان هيك من بعد هالموقف عرفت كل القصة القصة مو اني ادعي عليه بالموت
او بأي نوع من انواع الامراص بس اني وكل امرو ل الله . . انا من حقي اني ادعي عليه لانو الله بيعرف
كيف يخلي الشخص يتعذب اكتر من ما انا عذبو و الله بيعرف بالشعور و الله عليم بكل شيء !!
و قسما بالله في عندي مواقف ما بتنعد ع الاصابع !! اذا كل شخص اذاني بدي ادعيلو يموت مارح اخلص
و اساسا مارح يموت بس كبرت و تعلمت و تقربت من ربي و عرفت انو عقاب ربي افضل لاني هو
الي بسوي الاعمال !! كل تعليقي كان عن انو الواحد مو خطأ يدعي على الي اذاه بس بتوكيل همومه
و امره لربو مو اني ادعيه على الشخص بالموت او المرض و الخ . . مشان هيك الاشخاص الي باذوا
اشخاص تانيين بشو ما كان اسلوب التأذية و حتى لو سامحه الشخص . . في حساب بالآخرة و هالشي
الي خلاني ما اهتم بالدعوات و الاشياء السلبية ضد هالاشخاص ! لان الله شايف و عالم بكل شي

​

 

[Selene]

التدوينةة الشهريةة

تحدث عن :
خمسة أفلام مفضلة لديك ؟

Iron man

كنت كتيييييير مغرمة بشخصية داوني بالفلم و حبيتو من ورا هالفلم و حتى قصة
الفلم كتييير عبقرية و حلوة . . و حتى بيوم من الايام سميت حالي Miss stark
على اسمهه جد هالفلم لا يمل منه و شخصية داوني كمان

fast 5

بالذات هالجزء ! بدا حبي و عشقي للبرازيل من هالجزء بالذات !! شو سوا فيني هالجزء
من كتر ما تحمسسست عليه و على كيف سرقوا الخزنةة و اغنية دانز كودورو الي طلعت من
هالفلم ! خلتني اعششششق البرازيل من سنة 2011 لحد هلأ رفقاتي بنادوني يالبرازيلية
لانو كل شي كان الو علاقة فيها من ورا هالفلم و لو انتبهتوا حكيتلكم عن قصة عشقي
للبرازيل من الفلم بأول تدويناتي هالفلم مسسستحيل اني مل منو على اد ما بعيدو
خاصتا اني بحب الحياة البرازيلية و كيف دوم حكا THIS IS BRASIL !!الللههههههههههههههههه
و مرت فترة على اد ما عدت الفلم صرت انا احكي الديالوق اللاتيني حفظتو ع الغايب

step up revolution

هالجزء بالتحديد رهييييييييييييييييييييييييييييييييييييييييييييييييييييييييييييييييييييييييب
بكل ما تعنيه الكلمة من معنى !! مع ان الفلم قديييم بس كلما احضرو بحس كأني
بحضرو اول مرة الاشياء الي حببتني بالفلم انهم مصورينو بمدينة ميامي و على البحر
ياعشقي للافلام الي بتكون ع البحر و هيك استوائية !! و كمان فكرة الفلم بحد ذاتها
رهيييييييييييبة !! انو حولوا الرقص لنوع من انواع الفن ! و صاروا يبتكروا الرقصات و اماكن الرقصات
و حتى كيف يرسموا لوقو الفرقة بشكل مبتكر . . و رقصة النهاية ياويل قلبي بتججننن
من اجمل و افضل الرقصات بكل اجزاء هالسلسل

real steel

شو احكي عن هالفلم * تصييييييييييييح * رهييييب و الله ببكي على اد مانو رهيييب
يعني شو ما احكي بحق هالفلم رح يكون قليل فيه !!!! اولا البطل حليييوة و انا بتشدني
الافلام الي ابطالها حلوين ( اول سبب الواحد بحطو بعين الاعتبار ) تاني شي هالاب فاشل
و مستهتر و بآخر الفلم بصير بطل ابنو ( انا حرقت الفلم بعرف بس ماقدرت قاوم ) و بحب
الافلام الي فيها هالتحول من سيء للأفضل و تالت شي قصة الفلم نفسها مبتكرة و غريبةة
و النهاية ماكانت متوقعة ابدا !!! ماخطر ببالي هيك نهايات ابدا! في افلام انا بحط ببالي
نهاية معينةة و يطلع تخميني صح اما هاد الفلم ف لا !!! هالشي الي حببني بالفلم كتير
و اخر سبب حاطين اغلب اغاني ايمينيم و تمبرلاند فيه و هالشي رجعلي ذكريات الزمن الجميل
انننننننصصصصصصحححح اللكككككككككككللل يحضرووووووووااااا

The Expendables 3

و بالذات الجزء التالت . . طبعا كل اجزاء هالفلم راااائعة بما انها خليط بين اقوى و اشهر الممثلين !
بس هالجزء بالذات حبيته لانو الفرقة تفككت و رجعت مرة تانيةة و بهل الجزء بينت قوة علاقة اعضاء
الفرقة مع بعض و انهم مستحيل يتركوا عضو من فرقتهم يعاني لحالو لا بساعدوه
و هن صح متلا مأجورين بس كمان طيبين لانهم ساعدوا اعضاء فرقتهم الثانية ( محدا رح يفهم
الي عم بحكيه الا ليحضر الفلم ) من الموت . . و النهايةة كانت مرضيةة و انا اهم شي
عندي النهايات تكون مرضيةة . . و ماننسى جيسون ستاثام حبيب قلبي موجود بالفلم


أفضل ذكريات طفولتك ؟

لما كنت روح زيارة ع سوريا بعمر حتى ماني متذكرة اي عمر بالضبط بس اعتقد 13 او 14 سنة !
كنت روح مع خالي ع البحر باللاذقية و كان اسم البحر افاميا و كان مشهور انو هو موسخ كتير
خاصتا ع الشط عادي الواحد يلاقي صراصير ميتة و بتذكر مرة صرصور قرص بنت خالي
ههههههههههههههههههههههه و مع هيك كنا نروح عليه لانو كان مشهور و كل الناس
كانت فيه و لهلأ بتذكر سندويشة الزعتر و الخيارة الي كنت اكلا ع البحر و كون جوووووووعانة !!
و ما بنسى لما خالي كان يطلعني ع كتافو مشان ينططني من احلى الذكريات و الله

و كمان بتذكر مرة رحنا على بحر اسمو وادي قنديل باللاذقية هالبحر مشهور انو مافيه كواسر امواج
ف الموج تبعوا عااااااالي و البحر تبعو نضيييف و ستأجرنا بهل اليوم يخت صغير و صرنا نلفلف
فيه

و مرة رحنا رحلة مع اهلي و خوالي وولادهم على محل تصوير ضيعة ضايعة و رحنا ع البيت تبع جودة
و كنت بدي اتصور عندو لحتى اجا واحد قال هاتي 200 ليرة ههههههههههههههههههههه
النصب بدمنا مامنقدر حكيتلو شو 200؟ قلي هاد معلم سياحي التصوير مو ببلاش
اخر شي زحلقتلو وما تصورت و كملناها لتحت عند البحر الي هن صوروا فيه المسلسل
هاد البحر بيفصل بين الحدود التركية السورية و ما تخيلت انو نسبح لانو نحن ماكنا حاسبين
حسابنا انو نسبح و ماجايبين تياب ولا شي بس من كتر ما كنا متحمسين نطينا بالبحر
و طبعا لا تنسوا طبيعة سوريا الي بتاخد العقل خاصتا عند السمرة الي صوروا ضيعة ضايعة
كلها طبيعة و الطريق كلو ناازل كأني نحن ع الجبل . .

بصراحة عندي ذكريات طفولة كتييير . . عندي ذكرة بدرعا كنا ببيت جدي و عند بيت جدي قدامو في
نهر هاد بالصيف بجف و بالشتا بصير جاري ! ف ماما وقتها جابتلي انا و اختي جزمة طويلة جلد مشان
نروح نلعب بالنهر بدون ما نبلل تيابنا و الله كانت من احلى ايام حياتي هنيك و بتذكر كمان
كنت انا وولاد عمتي كانوا وقتها 9 على ما اظن كتااار بعرف ما شاء الله ف كنا صغاار وقتها
كنا نستنى لحتى يطلع ماوكلي ع التلفزيون الي كان اصغر من عيني وقتها و كلنا نتجمع حوالي التلفزيون
و بس يخلص ننام بالصالون مع انو البيت كبير بس ما بتذكر ليه كنا ننام بالصالون
تخيلوا يمكن 13 نفر نايمين بالصالون ههههههههههههههههههههههههههه و ربي من احلا
الذكريات و ما بنسى لما جابولنا فتيش ( شلق او العاب نارية ) و صرنا نولع فيه قدام البيت
لانو بالامارات وقتها كان ممنوع ف لما شفتو متتتتت عليه

و بتذكر كمان لما كنا ننام ع السطح لانو بيوت درعا جاية متل فيلة اكتر من ما تكون بناية اصلا مافي بنايات
الا بالبلد اما بالقرى كلو فلل ف نمنا ع السطح و كنا نشوف النجوم من فوق . . و مرات نسوي
حفلات فوق كمان

بتذكر مرة ولد صغير ضرب اختي بالحجر و لما شفت الدم ع وشا حسيت صرت قراندايزر و ماقدرت
ما دافع عنها مع انو نحن كنا صغار يعني كان عمري 6 و 7 سنوات ؟ رحت ركضت لعند الولد و ضربتو
و هربت لعند بيت جدي و اجا اخي حكالي انتي ضربتيه صح ؟ لانو اهلو كانوا برا البيت و انا كنت خايفة
حكيتلو اي هو ضرب اختي و طلع من راسا دم قام حكالي برافو عليكي
شفتو من وانا صغيرة قراندايزر

و الله ريلينا من احلى الاسئلة الي اجتني لاني انا نفسي كنت شبه ناسية هالذكريات !!
بس شكرا الك انك ذكرتيني فيها * تصيييح * طبعا عندي كتييير ذكريات بسوريا و حتى بالامارات
بس حبيت اني احكي عن سوريا بس بما ان ذكرياتها محدودة . .


​

 

[Selene]

-



مرحبا يا حلوين رجعتلكم بتدوينة عن اللغة الالمانيةة
التدوينةة السابقة تجدونها ( هنا ) . .

هالدرس صعب و كتير ناس عم بعانوا من هالحالات . . بسبب انها بتلخبط
بالنسبة الي انا بواجه صعوبة بتحويل الارتيكلز و كتير مرات بتلخبط و الحل
الوحيد هو الممارسة الدائمة لهل القواعد مشان تلزق بالمخ و ماتتنسى

سويت الدرس على شكل ديالوق مشان يكون اسهل للشرح و يكون
مبسط الكم و رح نزللكم جدول بيختصر كل هالحالات بس هالتدوينة
رح تكون بس شرح لهل الحالات . .

يلا نبدا ؟



Akkusativ

حالة النصب Der Akkusativ متى تأتي ؟
تأتي عندما يقع الاسم مفعولاً لفعل غير الفعل Sein
ولماذا غير الفعل Sein ؟
لأن Sein فعل ناقص لا يؤثر فيما يليه
ممكن توضيح ؟
لو قلنا مثلا : Ich bin der Lehrer ( أنا - أكون - المعلم ) ،
نلاحظ أن أداة التعريف der لم تتغير ، لأن bin هو تصريف للفعل Sein
هذا يعني أن حالة النصب لا تغيير سوى الأداة ؟
الحالات الإعرابية سواء النصب وغيره من الحالات ، لا تؤثر في الاسم ، وإنما تؤثر في الأداة سواء كانت أداة تعريف أو تنكير
وكيف تؤثر حالة النصب الـ Der Akkusativ في الأدوات ؟
هي لا تؤثر في المحايد das والمؤنث die ، ولكنها تؤثر في المذكر der
وكيف تؤثر في المذكر ؟
تُغيِّر أداة التعريف للمذكر من der إلى den ، وتُغيِِّر أداة التنكير للمذكر من ein إلى einen
هل من مثال على أداة التعريف وأداة التنكير للمذكر في حالة النصب Der Akkusativ ؟
مثال لأداة التعريف :
Ich besuche heute den Lehrer ( أنا اليوم زرت المعلم )
ومثال لأداة التنكير :
Er schreib einen Brief ( هو كتب الرسالة )

Dativ

ما هي حالة الجر المعروفة باسم الداتيف ( Der Dativ ) ؟
حالة Der Dativ هي نوع مخصوص من المفعول
لم أفهم ، ممكن توضيح ؟
القصد هو أن " الداتيف " مفعول لفعل ، ولكن هذا الفعل خاص بهذه الحالة
وكيف السبيل لمعرفة الأفعال الخاصة بحالة " الداتيف " ؟
لا سبيل لذلك إلا الحفظ ، هناك أفعال تأخذ حالة النصب " الأكوزاتيف "
( Der Akkusativ ) ، وهناك أفعال تأخذ حالة الجر " الداتيف " ( Der Dativ )
وكيف تؤثر حالة Der Dativ على الأدوات ؟
تؤثر بشكل كبير ، فتأثيرها ليس محدوداً كما هو الحال مع حالة Der Akkusativ ،
كيف تكون أدوات التعريف والتنكير في حالة Der Dativ ؟
تكون على النحو التالي :
1 - أدوات التعريف :
أداة تعريف المذكر : der تنقلب إلى : dem
أداة تعريف المحايد : das تنقلب إلى : dem
أداة تعريف المؤنث : die تنقلب إلى : der
أداة تعريف الجمع : Die تنقلب إلى : den + n
2 - أدوات التنكير :
أداة تنكير المذكر : ein تنقلب إلى : einem
أداة تنكير المحايد : ein تنقلب إلى : einem
أداة تنكير المؤنث : eine تنقلب إلى : einer
لا توجد أداة تنكير للجمع كما تعلمنا سابقاً
ما تعني بـ den + n ؟
عند الجمع في حالة الداتيف ، تتحول أداة تعريف الجمع die إلى den وهنا نضيف الحرف n إلى نهاية الكلمة .
ممكن مثال للتوضيح ؟
كلمة die Kinder ( أطفال ) ، وهي جمع لكلمة Kind ( طفل ) ، في حالة الداتيف تصبح den Kindern
وماذا لو كانت الكلمة تنتهي بالحرف n ؟
هنا نكتفي بـ n الأصلية كما هو الحال في الكلمة Frauen ( سيدات )
كيف أعرف الحالة إن كانت " داتيف " أو " أكوزاتيف " ؟
لمعرفة dativ من akkusativ لا بد من حفظ الأفعال الخاصة بكل حالة
لكن الأفعال كثيرة جداً ؟
هذا صحيح ، لكن معظم الأفعال تأخذ حالة akkusativ ،
أما أفعال dativ فهي قليلة مقارنة مع حالة akkusativ
إذاً أحفظ أفعال الداتيف والباقي أكوزاتيف ؟
باستثناء فعل الكينونة sein فانه لا يأخذ أي من الحالتين
لكن هل هناك أفعال مشتركة ، تأخذ الحالتين معاً ؟
نعم هناك أفعال تأخذ مفعولين أحدهما AKK والآخر Dat
قبل الدخول في تفاصيل حالتي AKK و Dat لا بد أن نعرف

Nominativ

ما هي الحالة التي تأخذ فيها الأسماء أدواتها الأصلية ؟
أقصد متى يكون أداة التعريف :
der = مذكر
das = محايد
die = مؤنث
die = جمع
و النكرة :
ein = مذكر
ein = محايد
eine = مؤنث
هذا ما أعنيه ؟
هذه تسمى حالة الرفع die Nominativ ( نومِن أتيف ) ،
وفي هذه الحالة تكون الأسماء غير منصوبة ولا مجرورة
تكون أسماؤها غير منصوبة ولا مجرورة ! فماذا تكون إذن ؟
تكون مبتدأ أو خبر أو فاعل

Genitiv

ما هي الحالة الإعرابية المعروفة باسم Der Genitiv ( جينتيف ) ؟
هذه تسمى حالة الإضافة Der Genitiv ، مثل قولنا : قلم المعلم ، أو قولنا : طاولة التلميذ
وهل لهذه الحالة أدوات تعريف خاصة ؟
أجل ، هناك أداتان لـ حالة Gen ، وهما : der و des
وكيف نستخدم هاتين الأداتين ؟
كل أداة منهما سواء der أو des تستخدم بحسب أداة الاسم الثاني ، أي الاسم المضاف اليه ،
فإن كان الاسم المضاف اليه مذكر أو محايد استخدمنا الاداة des
وإن كان الاسم المضاف اليه مونث أو جمع استخدمنا الاداة der
لا بد من مثال للتوضيح ؟
كلمة der Lehrer ( المعلم أو المدرس ) مذكر ، لذى نستخدم معها في حال الاضافة الأداة des مثل :
Das ist der kuli des Lehrers = هذا قلم المدرس
نلاحظ أن كلمة Lehrer أضيف لها حرف s في النهاية ، لماذا ؟
في حال استخدمنا الأداة des - وهي تأتي بين المضاف والمضاف اليه -
فإننا نضيف حرف s في نهاية الاسم المضاف اليه كما هو مبين في المثال أعلاه
يعني إذا كان المضاف اليه مذكرا أو محايداً نضيف الحرف s ؟
هذا بشرط
وما هو الشرط ؟
أن يكون المضاف إليه المذكر أو المحايد فيه أكثر من مقطع مثل كلمة Lehrer ،
ومثل كلمة Vater ، ففيهما متحركين وهنا نضيف الحرف s
وماذا نضيف إذا كان في الكلمة متحرك واحد ، أي أن الكلمة مكونة من مقطع واحد مثل كلمة Kind ( طفل ) ؟
في هذه الحالة لا نتكفي باضافة الحرف s ، بل نضيف الحرفين es معاً ، فيتحول الاسم في حالة Gen إلى Kindes مثل :
Das ist das Spielzeug des Kindes = هذه لعبة الطفل
وماذا عن أدوات التنكير في حالة Gen ؟
سبق أن ذكرنا أن أداة التعريف des في حالة الاضافة Gen تستخدم للمذكر والمحايد ،
و ذكرنا أيضاً أن أداة التعريف der في حالة Gen تستخدم للمؤنث والجمع ؟
بالفعل ، عندما يكون الاسم المضاف اليه مذكر أو محايد - أي أن أداة تعريفه der أو das -
فإن أداة تعريفه في حالة Gen تكون des ، أما عندما يكون الاسم المضاف اليه مؤنث أو جمع -
أي أن أداة تعريف die - فإن أداة تعريفه في حالة Gen تكون der
وكنا قد ضربنا أمثلة على الأداة des ، ولم نذكر أمثلة على الأداة der
وهذه أمثلة على الأداة der في حالة Gen :
إذا كان المضاف اليه مؤنثاً :
Das ist das Haus der Nachbarin = هذا منزل الجارة
إذا كان المضاف اليه جمعاً :
Das sind die Büsse der Mannschaften = هذه حافلات الفِرَق
لا يوجد في آخر الاسم المضاف اليه الحرف s أو الحرفين es ؟
عندما يكون المضاف اليه مؤنثاً أو جمعاً فإننا نستخدم الأداة der وحدها ، فلا نضيف للاسم المضاف اليه أي حرف زيادة في آخره
أدوات التنكير في حالة Gen هي كالتالي :
أداة التنكير للمذكر ein تنقلب إلى eines
أداة التنكير للمحايد ein تنقلب إلى eines
أداة التنكير للمؤنث eine تنقلب إلى einer
لا يوجد أداة تنكير للجمع كما سبق ذكره
إذن نضيف لأداة تنكير المذكر والمحايد الحرفين es ولأداة تنكير المؤنث الحرف r ، لكن هل من أمثلة ؟
Das ist der Stab eines Mannes = هذه عصا رجل
Das ist die Bluse einer Frau = هذه بلوزة إمرأة
في كلمة Mann أضفنا الحرفين es على اعتبار أن كلمة Mann مكونة من مقطع واحد ،
فليس في الكلمة سوى حرف متحرك واحد ، أليس كذلك ؟
هو كذلك ، لكن هناك بعض الكلمات تكون نهايتها es بعض النظر إن كانت مكونة من مقطع أو أكثر
كيف ؟
عندما تكون نهاية الكلمة بالأحرف التالية :
s - ss - x - z - tz
إذا كان اليه واقعاً مع ضمير ملكية ، أي أن يكون المضاف اليه متملكاً ، فكيف يكون المضاف اليه ؟
إذا جاء مع المضاف اليه ضمير ملكية ، فإننا نتعامل مع المضاف اليه كما هو الحال عندما يأتي مع النكرة
ممكن توضيح أكثر ؟
أي أننا نضيف es إلى ضمير الملكية إذا كان المتملِك مذكراً أو محايداً ،
ونضيف er إلى ضمير الملكية إذا كان المتملِك مؤنثاً أو جمعاً
أمثلة
Das ist der Burg meines Großvaters = هذه قلعة جدي
Das ist der Wagen deines Onkels = هذه عربة عمك
Das ist die Schule siener Mutter = هذه مدرسة أمه
Ich höre die Stimmen eurer Söhne = أسمع أصوات أبناءكم
لكن ماذا لو أردنا أن نسأل عن الـ Genitiv ؟
للسؤال عن الـ Gen نستخدم أداة الاستفهام Wessen
السؤال :
Wessen Buch ist das ? = كتاب من هذا
الجواب :
Das ist das Buch des Lehrers = هذا كتاب المعلمة


الأفعال التي تأخذ مفعول Akk هي أغلب الأفعال في الالمانية ، أما الأفعال التي تأخذ مفعول Dat فهي قليلة ،
إذاً احفظ أفعال Dat والباقي يكون Akk باستثناء الفعل sein الذي لا يأخذ أي حالة مما سبق

نماذج من الأفعال التي تأخذ مفعول Dat
Antworten = يجيب
danken = يشكر
gefallen = يُعجب
gehören = يخص
gratulieren = يهنيء
helfen = يساعد
nützen = ينفع
schaden = يضر ، يؤذي
raten = ينصح
trotzen = يعاند ، يتحدى
ونماذج من الأفعال التي تأخذ مفعول الـ Akk ؟
أفعال الـ Akk كثيرة جداً ، منها :
stören / يزعج probieren / يجرب hören / يسمع anrufen / يتلفن ( يتصل هاتفياً )
studieren / يدرس في الجامعة putzen / يمسح ، ينظف kaufen / يشتري bestellen / يطلب
trinken / يشرب rauchen / يدخن kennen / يعرف bleiben / يظل ، يبقى
überlegen / يفكر ، ينظر في الأمر recherchieren / يجمع معلومات kosten / يساوي ، يُكلِف brauchen / يحتاج
verkaufen / يبيع sagen / يقول lesen / يقرأ einladen / يدعو
verstehen / يفهم sehen / يرى lieben / يحب essen / يأكل
zeigen / يُظهر ، يُرِي singen / يغني machen / يعمل finden / يجد ( من الايجاد )
suchen / يبحث meinen / يعني ، يرى fragen / يسأل
schreiben / يكتب mögen / يريد ، يرغب glauben / يعتقد ، يظن
spielen / يلعب nehmen / يأخذ haben / يملك ، يحوز ، عندهُ
بعضاً من الأفعال التي لها مفعولين أحدهما Dat والآخر Akk ؟
من هذه الأفعال ما يلي :
Antbieten = يُقدِّم
geben = يُعطي
leihen = يُسَلِّف
empfehlen = يوصي بـ
sagen = يقول
verkaufen = يبيع
schreiben = يكتب
schenken = يُهدي
wünschen = يتمنَّى
zeigen = يُري ، يُظهِر
وهل هناك أفعال خاصة بحالة الإضافة Genitiv ؟
أجل ، هناك أفعال تطلب دائماً وجه الإضافة Genitiv
خذ على سبيل المثال :
achten = احترم ، اعتبر ، انتبه
bedürfen = أعْوَزَ ، احتاج إلى
erwähnen = ذكرَ ، أشارَ ، أوْرَدَ
gedenken = فكَّرَ بـ ، ذكرَ ، تذكَّرَ
harren = ثابَرَ على ، استمَّرَ على ، صمَّمَ على
leben = عاشَ
pflegen = اعتنى بـ ، اهتمَّ ، تعهدَّ المريض ، طبَّبَ
sein = فعل الكون ( يكون )
spotten = سَخِرَ من ، تهكَّمَ على ، ضَحِكَ عليه
sterben = ماتَ ، هلكَ
vergessen = نسَى ، أغفلَ
warten = انتظرَ ، ترَيَّثَ
wahrnehmen = أدركَ ، لاحَظ ، فهَمَ


و هيك بنكون خلصنا من درس القواعد و اختصرتو برد واحد مشان يكون
كل شي واضح و بسيط و تعدد التدوينات لهل القواعد رح تلخبطكم فحبيت خليها
بتدوينة وحدة مشان تقارنوهم و تشوفوا الفرق . .

انتظروني في التدوينة القادمةة . .

​

 

[Selene]

عجبتني فكرة تحدي العجز بتخليني رتب اموري و اعرف شو الي باقيلي
و رح جدد التحدي لشهر 4 الفكرة تابعة للجميلة @SAIRYU

تحدي العجز خلال الشهر:

1- ادخل تكريم الدرجة الأولى لفريق الابداع
2- كمل جميع المطلوب مني بمسابقة الكتب
3- سلم كل طلبات التصميم الخاصة بأعضاء معينين
4- نزل موضوع يٌختم بإداري
5- تابع الاقسام الي مشرفة عليها هالشهر
6- كمل مواضيعي الي وقفتهم الشهر الماضي
7- اقرا كتاب كامل

تحدي العجز خلال الأسبوع الأول:

1- صمم مجموعة تصاميم إعلانية لأخي
2- نزل موضوع بقسم الكتب
3- رد على 10 مواضيع على الأقل
4- اكتب تدوينة عن اللغة الألمانية
5- قيم التصاميم بمسابقة التصميم
6- تابع المسلسل الي رح ينعرض بموضوع تونفلكس

اذا طلع شي بمخي رح ضيفه و ان شاء الله اقدر اني كمل
كل الي علي قبل نهاية الشهر


​