فخر المدونين Make Some NOISE (2 زائر)

[خَوْد]

-









اجاني اليوم كلام ببالي و لأول مرة بدونو على الموبايل لحتى ما يروح من بالي

-

واقعيتي أبداَ ما اذتني يمكن بأول أيامي لما كنت هشة و ضعيفة و لسا عم ابني حالي !
و لما ما كنت إستحمل الواقع المٌر ! و أنو ما كنت صدق اديش هالعالم شنيع و بشع !
بس اليوم صار العكس تماماَ ! لأول مرة بوصل للقناعة التامة !!

حاسة أنو الأيام المريرة الي مريت فيها و انا عم حاول اتقبل الواقع خلتني اليوم كتير
قوية ! قوية لدرجة اني اقتنع اني مو وحدة من المليون ! و إني مو الشخص الي ممكن
يدخل حياة حدا و يغيرها أو يكون سبب جذري بتغييرها ! لطالما كنت احلم اني غير حياة
حدا او كون سبب بأنو انسان صار منيح بسببي !! بس الحمد الله اني تخليت عن هالحلم
او بمعنى اخر عن الوهم ! او حتى كون مختلفة عن هالعالم ..

الواقعية حلوة كتير لما نقتنع فيها و نعرف انو وجودنا او عدمه هو واحد بحياة بعض الأشخاص !
و أنو زعلنا ما رح يوقف الكرة الأرضية حتى لو لجزء من الثانية ! نحن لهل الدرجة مو مهمين !

انا آسفة كتير و آسفة من كل قلبي . . بس نحن ابدا مو مهمين . . لدرجة اذا متنا مارح يسأل
علينا . . اساسا ما رح يعرف انو نحن متنا . . يمكن اذا مر بالصدفة لمكان عملنا و صار موضوع
بالصدفة و عرف ووقتها رح يعرف ( بالصدفة ) انو متنا . . ممكن يزعل لثانية بعدين رح يفتح
موبايلو و يحكي حبيبتو رقم 2 !

متخيلين اديشنا نحن ع الهامش ؟ شخص نحن اعتبرناه العالم هو اعتبرنا مجرد رقم .

نحن مو مميزين للأسف . . الي عندنا عند غيرنا و متوفر و بوفرة و ببلاش و بكميات كبيرة
و بمختلف الأنواع و الألوان و الروائح و الأشكال و و و . .

الواقعية حمت قلبي و حمتني الي لأني ما توقعت اكتر من اللازم , وما حطيت نفسي بدائرة
ال ( الوحدة من مليون ) ! أيام و راحت حتى ما صارت ذكريات لأن مسمى الذكريات أسمى
من انو نسمي هالأيام الي مع هالشخص فيها .

أنا كسرت نفسي لحتى استوعت شناعة واقع الحياة . و كم من شخص مستعد يكسر حالو
كرمال يستوعبها ؟ أغلبنا عايش بوهم ! كتير منا مو مستعد يتخيل حالو انه مجرد نقطة ع
الهامش !

انو اديش هالموضوع صعب علينا ؟ مع كل هالكبرياء و الغرور الي فينا بس نتخيل حالنا
بهل الطريقة ! اديش محتاجة كسرة نفس لحتى نتخيل حالنا هيك !

كتير رح نرتاح لما نترك هالكبرياء و نتقبل فكرة انو نحن مجرد ( نقطة ع الهامش ) و يمكن
أقل منها كمان ! وقتها بس . . ما رح ننصاب بأي خيبة أمل . . !

يمكن كلامي كلو خطأ لأني كنت مع الشخص الخطأ ؟ - مو يمكن رح احكي اكيد -
و ما بعرف لو في حدا منكم فكر بنفس تفكيري حالياَ . بس وقتها بس لما كون مع الشخص
الصح رح امسح هالكلام و اكتب اني فعلاَ وحدة من مليون . . و اني فعلأ كنت مؤثرة
و غيرت ناس للأفضل . . يمكن سلبية هالشخص علي عمت عيوني عن الحقيقة بس
بالنهاية انا اقتنعت انو هالكلام ما رح يغير واقعية الدنيا انها سيئة مع اشخاص ما عملوا
معها الا كل خير . او بالاحرى , الدنيا ما قست الا على الي قلبو لين و طيب . !

الدنيا حلوة فعلاَ و مع كل شي بتعملو فينا بحبها , بحبها لأنها قوتني ! نفس أمي بالضبط
كانت تضربني و تبكي من جوا لأنها ما بدها هيك بس بدا ياني اتعلم ! الدنيا حنونة و انا عارفة
نفس امي بالضبط ! هالمواقف المريرة الي بمر فيها ما اجت عن عبث أبدا !

لما شخص يمدح ذكائي و قوة شخصيتي و ارادتي بالمواقف مو عن عبث ! جوابي الو واحد
( انا ما انولدت مبارح )

لازم نتخبط بالموج لحتى نصير قبطان للسفينة . كيف رح نكون قبطان و نحن منخاف الموج ؟

انا من بعد هالمواقف كل مرة عم تثبتلي ماحدا رح يفيدني غير مستقبلي . . مستقبلي
الي رح يخلي الكل يركع تحت رجلي لأن بكل بساطة وقتها مارح كون بحاجة حدا !
لما كون ناجحة بحياتي مو محتاجة حدا ! حالياَ متمسكة بمستقبلي اكتر من ما الغريق
بيتمسك بقشة !! متخيلين شناعة الحياة كيف ؟ الي عم يقرأ هالتدوينة يتعلم و يعرف
انو مافي شي رح يفيد غير مستقبلك و اهلك و مرات اهلك لأ اذا كانوا مو مناح بس
الحمد الله انو عندي اكبر نعمة بالدنيا و هن اهلي فالحمد الله ع كل شي لولاهم انا
حرفيا . . ولا . . شي . . !

نقطة​

 

[خَوْد]

-






^ مو اجا الوقت انو نعطي دروس مو نشتكي ؟​

 

[خَوْد]

-






اليوم عملت تصوير اشعة لضهري و هالمرة كانت تجربة جديدة علي
كانت تصوير اشعة العروق لضهري مو تصوير العظم

و دخلوني بهاد الشي الي بكون متل التابوت بربي حسيت لثانية
اني معي فوبيا الاماكن المغلقة بس الحمد الله كان لونو ابيض مو
اسود ههههههههههههههههه



^ هاد هو

المهم , انو حكتلي الممرضة انو صوتو عالي و انا ما تخيلت اديش
ممكن يكون عالي بس انو عادت الكلمة مرتين حسيتها عم تهددني
هههههههههههههه

حطت ع اذني سماعات و بإيدي زر للطوارىء و دخلت , طبعاَ بطول
تصويره شي 15 دقيقة و اصوات غريبة عجيبة بتطلع نفس بالضبط
موسيقى التيكنو هههههههههههههههههههه هيك تن تن تن تن تن
و كان يتغير و يصير تن طج تن طج و انا راسي عم يهز مفكرة حالي
بحفلة تيكنو هههههههههههههههههههههههههههه لا و لما تتغير
النغمة احكي ببالي , يييييييييي و ريميكس كمان هههههههههههههه

المهم ما علينا , حدا منكم شاف صورة عاموده الفقري ؟ بربي شكلو
غريييييييييب , اول مرة بشوف عامودي الفقري لا و شكلو بالضبط
نفس القريدس تبع البحر نفس الشكل بالضبط

كل الي بدي منكم انكن تدعولي بالسلامة , طلعت اخر فقرة من عمودي
الفقري طالعة من مكانها , بربي ما بعرف كيف هيك صاير الموضوع
و ضاغطة على العروق و هالشي الي مسببلي وجع , و انا مفكرة عندي
تشنج عضلي ! صرلي اسبوعين مع هالوجع و موقفة جم و رياضة و حالتي
حالة !!

و بكرا عندي موعد عند دكتور عظمية , ان شاء الله ما يكون
الموضوع خطير و ينحمل بعلاج فيزيائي او ما يكون عندي
انزلاق غضروفي او اي مرض دائم يخليني اترك الجم !​

 

[خَوْد]

-







حدا صار معو انزلاق غضروفي من قبل ؟

ينورني و يعطيني نصايح كيف ممكن

خلي الفقرة الضايعة ترجع لمكانها بأسرع

وقت

في تمارين معينة ؟ حركات معينة ؟

نوروني ​

 

[خَوْد]

-





رجعنالكن من جديد

ابديت جديد عن حالتي الصحية هلأ فوق الممتازة

من بعد اخر تدوينة اني رح روح عند دكتور عظمية بصراحة فكرت رح يحكيلي

شربي مي كتير بتطيبي !

بس رحت لعندو قام عطاني ابرة كورتيزن اما شو ابرة يخربيتو كيف لفها

بضهري لدرجة الوجع وصل لروس اصابعي و صرت ابكي من شدة الوجع

مافي والله العظيم اسبوعين الا و رجع ضهري طبيعي ! استغربت معقول

بهل السرعة طبت ؟ لان لو تشوفوا الوجع الي كنت فيه قلت هي مستحيل

تخف قبل 3 اشهر ل 6 ! بس سبحان الله الله ما بدو يعذبني اكتر و الله ما مرق

اسبوعين الا و رجعت متل الحصان ولا كأني فيني شي ! صرت ابكي من الفرحة

هالموقف الي صار معي مستحيل انساه ! بتعرفوا انو مرقت بأزمات بعدو و قلت

ببالي شو ما مرق علي شي سيئ ما رح يكون اسوأ من تدهور الصحة ! الحمد الله

ع كل شي ! و لما رحت ع المراجعة التانية للدكتور , قلي كيف صرتي ؟ حكيتلو كتير

ممتاز و لا كأني صار معي انزلاق , قام هو فرح كتير , وقتها كنت لابسة تياب الرياضة

كنت رايحة ع الجم بعد المراجعة فوراَ , قام قلي شو رايحة ترفعي حديد و تضحك

هو عارف انو الاصابة من الحديد , قلتلو لا غيرت تماريني و اختي حكتلو انو هي بتحب

كتير الجم , قلي وين بتتمرني بالمدينة هون ؟ قلتلو لا بمدينة بتبعد 45 دقيقة , قلي اوف !

بتروحي و بتجي عليها يومياَ ! حكيتلو اي قام قلي حظاَ موفقاَ و هو كان كتير مبسوط

انو انا تحسنت ! فعلاَ دكتور ممتاز ما توقعت ابداَ اني اتحسن من مراجعة وحدة !

هون فعلاَ لما الشهادة تنعطى لناس بتستاهل !


-

المهم اني بعد ما مرق شهر راحة من الجم رجعتلو بنص شهر الخامس , و لما رجعت

ما رجعت ع الحديد دايركت لا بلشت بالكارديو اسبوع بعد الاسبوع رجعت للحديد خفيييف

يعني تلت ارباع الاوزان قللتها و قبل ما شيل كامل كنت جيس نبض ع ضهري اذا بأثر عليه

او لا و عرفت من وين اجتني الاصابة و السبب لغيتو كامل للوقت الحالي و هن كانوا تمارين

البطن , كانوا ضاغطين كتير على ضهري ! حالياَ عم العب بطن بس خفيف و التمارين الي فيها

لف الخواصر و ضغط ع الضهر ما عدت اعملها .

و هلأ وصلت للمرحلة التانية من التمارين و الحمد الله انو الله ما حرمني لا صحتي

ولا هوايتي الي بحبها ​

 

[خَوْد]

​

-​

​

​

​

​

بتصدقوا ان العين حَقْ ؟​

​

انا قبل ما كنت آمن بهل الشي , كنت شوف اي حدا بيحكي انو حدا صابني عين​

انو شايف حالو و مو مصدق بس والله العظيم الواحد ما بصدق لتصير معو​

هو شخصياَ ! مو قصة شوفة حال او انو الشخص نفسو هو عامل انجاز لأن العين​

لما تصيب الشخص مو بالضرورة يكون عندو شي واو , ممكن يكون بحب شي كتير​

غيرو ما قادر يحبو او هالشخص نشيط و مواظب ع شي معين او عندو عيلة بتجنن​

او اخواتو بحبوا بعض كتير او انو هالشخص كتير سعيد و متصالح مع حالو الخ . .​

هالاشياء البعض بشوفها عادية و هي فعلاَ عادية بس والله ممكن الواحد يصيب​

بالعين ع هيك اشياء مو بالضرورة تكون اشياء مادية !​

​

في ناس الله وكيلكم بتصيب بالعين بطريقة غير مباشرة حتى لو حكت مَ شاء​

الله هي يعني فينكن تحكوا اني عاذرتهم لأن في عيون حامية بس في ناس​

هن مو متعودين يحكوا ما شاء الله لازم الواحد يتعود و الله عادي يعني شو فيها​

لو الواحد حكا ؟ بينقص منو شي ؟ ليكون كبريائو بروح لما يحكي لحدا ما شاء الله​

من قلبو ؟​

​

ع فكرة من و انا و صغيرة تعلمت احكي ما شاء الله على أبسط الأشياء لسبب مهم​

و هو اني انا لما خاف اني صيب فلان بعيني - بالرغم من انو عيني مليانة - بس​

الإحتياط واجب , انو الله رح يبعتلي شخص يحكي مَ شاء الله لما يشوفني بمعنى​

لما انشر الخير للناس الله رح يبعتلي ناس تعطيني الخير مو تردلي الشر​

​

لما شوف سيارة واو قدامي انا لا ارادياَ بحكي ما شاء الله قبل ما احكي حلوة​

بحكي ما شاء الله حلوة ما بحكي حلوة ما شاء الله متخيلين ؟ لان العين​

سريعة عادي تكون ضربتا قبل ما احكي ما شاء الله . . ​

​

ف لما يصير عندي سيارة واو و بإذن الله انا واثقة رح يصير عندي هيك سيارة​

متأكدة انو رح يجوني ناس يحمولي ياها و يحكوا ما شاء الله لأن الدنيا دوارة . . ​

​

لما بتعطي خير الدنيا رح تردلك الخير هي قاعدة ثابتة !​

​

بتعرفوا ليه حكيت كل هالمحاضرة عن العين ؟ لأن صدقاَ صدقاَ الي صار معي​

مو طبيعي ابداَ !!!​

​

بدايتاَ بالمتلازمة الي اجتني و انا طول عمري بتحرك و وزني مو هالوزن بعدين​

اجاني انزلاق غضروفي و الله العظيم انو الانزلاق اجاني بشهر التالت بالرغم من​

اني استغربت كيف اجاني و انا كتير منتبهة بتماريني و اساساَ جدولي مو مطلوب​

مني شيل اوزان عالية ابداَ ! و الطريقة الي صار فيها اساسا مو بالجم لا تاني يوم​

و انا قاعدة على سفرة الأكل لما قمت مسك ضهري و ليومكن هاد . . ​

​

و يوم الأحد طلع معي التهاب مرارة شديد يعني لولا لطف الله كانت انفجرت​

فيني بالبيت و الالتهاب طلع معي بشهر السادس يعني فرق 3 شهور . . ​

​

شايفين هالشي طبيعي ؟ لا و مو اصابات عادية لا اصابات ابدية !​

المتلازمة ابدية , الانزلاق ابدي , آثار العملية و الاستئصال ابدي .​

​

الي صار بالضبط لو تعرفوا كيف الله بحبني , اجاني وجع بداية الاسبوع الماضي​

كان يجيني كل يوم لمدة 4 ايام بس كان يجيني خفيف و نفس اعراض المتلازمة​

وجع بالظهر و ضيق تنفس من الصدر و هيك , و كنت اسحب ع الوجع لأن المسكنات​

ما بيمشي معها . . بس يوم السبت بليل كانت القاضية فعلاَ ! حسيت من كتر الوجع​

و ضيق التنفس الي فيني كأنيني بتابوت و فوقي تراب لهل الدرجة ! ما قدرت استحمل​

الوجع ! و ما قدرت اتصل بالاسعاف لأنها متلامة قلت مو مستاهلة , استفرغت 3 مرات​

بهل اليوم و ما بعرف كيف طلع الصبح ! عنجد اخدت مني طاقة هائلة اني استحمل هالوجع !​

لما اجا الصبح حكيتلا لماما بدي روح المستشفى ماعم بقدر و كان يوم أحد و بتعرفوا يوم الاحد​

بألمانيا بتكون مسكرة كلها و مافي تكاسي ولا مواصلات للمستشفى اضطرينا نحكي مع جارتنا​

توصلني بسيارتها مع انها كبيرة بالعمر بس والله ما حكت لا ووصلتني !​

​

و بألمانيا كتير نادر هالشي انو الواحد يروح للمستشفى و تاني يوم بيعملولو​

عملية استئصال مرارة ! دايما بروحوا للحلول البديلة غير الجراحية ! بس انا​

دخلت المستشفى الأحد و رايحة قسم العظمية و كل فكري معي اعراض المتلازمة !​

ولا الدكتور شك انو معي التهاب مرارة من الأعراض الي عم اوصفلو ياها و حولني​

فوراَ لقسم الباطنية . . و تاني يوم كانت عمليتي !​

​

المشكلة مو هون المشكلة لما فكر فيها انها مو عين , طيب كيف اجاني التهاب​

مرارة و انا اكلي منتظم و صحي و بشرب 3 لتر باليوم و مداومة ع الرياضة ؟ ​

اكلي مانو اكل سوق و لا فيه دهون كتير . انا انصدمت من الدكتور لما قلي​

انو فيني معمل حصى !! والله انصدمت !! و شفتهم بعيني بالتصوير الايكو​

يعني لايف مو صورة مصورة !​

​

و لو تشوفوا كيف كانت ملتهبة ؟ تقولوا لو واحد قاتل القتيل وماشي بجنازتو​

مو هيك !! بعتذر بس رح ورجيكن صورة ​

​

هنا​

​

شوفوا كيف منفوخة و هاد غير الحصى الي واصل لصرتي ههههههه < ضحكة​

استهزاء مو اكتر . . ​

​

انا بكيت من قلبي و الله لما سويتها لأن انا عارفة ما عملت شي خطأ و لا اكلت​

شي خطأ و حياتي صحية جداَ و كنت عارفة انها عين . . ​

​

​

و هاد غير احساس الوحدة بالمستشفى بالرغم من انو اهلي​

بطلوا علي باوقات الزيارات بس كنت حس بالوحدة لما يروحوا​

و كنت قضيا كل الوقت نوم بالرغم من اني مو من محبين النوم ابدا​

لدرجة اجا الممرض حكالي كل شي تمام ؟ فكرني تعبانة ولا شي​

بس على شو بدي اصحى ؟ على الهنا الي انا فيه ؟ ولا على السجن​

الي انا فيه ؟ و الألم و الوجع الي لا يٌحتمل و تشوه جسمي عملولي​

4 فتحات ببطني صحيح انها صغيرة بس رح تبين بالاخير و هي انا بهتم بجسمي ​

​

هاد الاحساس لما تكونوا لحالكن و تطلعوا بالمراية و تشوفوا تشوه​

بطنكن كيف صار بعد العملية بخلي الواحد يبكي . . ! حاولت قد ما اقدر​

شجع حالي و اتفائل و قول يلا ان شاء الله ما بعلموا بس لأيمت بدي اضحك​

ع حالي ؟ و رح تضل كل العمر معلمة الا اذا قررت اعمل عملية تجميلية . .​

و اني شوف ماما قدامي عم تبكي قدامي هالشي ما رح اسمح فيه مرة تانية !​

​

ف اليوم شلت كل صوري من العام لأن والله بحب اني انشر تطوراتي​

للناس الي بحبن و شارك الأشياء الي بحبا مع الناس عل و عسى الناس​

تبادلني هالطاقة الايجابية ! بس اذا الي بحبن ما بيحكوا ما شاء الله انا​

شو اعمل ؟​

​

انا ماني مثالية ابدا بس يعني عطوني كذا اشارة و ما صدقت و لما​

اجت العملية قلت خلص نقطة انتهى . . ​

​

ف يا حلوين امانة هالتدوينة مو عني انا لأن نفس ما بيحكوا​

الي ضرب ضرب و الي هرب هرب . . ​

​

بس مشان الناس الي بتحبوهن , احكوا ما شاء الله​

حتى للناس الي ما بتعرفوهن احكوا ما شاء الله ​

و الله ما بتعرفوا شو ممكن تعمل هالعين بالبني آدم !​

ممكن تحول حياتو لجحيم !​

​

هلأ رح تتغير حياتي كلها بعد هالعملية هلأ ما عاد فيني​

اكل كميات كتيرة من الدهون و السكريات و في اشياء​

لازم اتجنبها . . انا بتمنى انو هالتغيير يكون مؤقت لبين​

ما يتعود جسمي بدونها ! لأن تخيلوا مثلا اكلة المحاشي​

و الورق عنب رح كون محرومة منها بسبب بعض الاشخاص​

الي ما ذكروا الله . . ​

​

رح تشوفوا موضوع الأكل سخيف . شيلكم من الأكل​

تخيلوا يتم استئصال عضو من جسمكم بالرغم من انكم​

ما عملتوا شي خطأ ؟​

​

هالشي محدا رح يحس فيه الا الي مارر فيه . . ​

​

لما استئصلت الزائدة الدودية انا ما زعلت ابدا​

لان استهالت هالشي لأن قبل بيوم كنت عم اكل​

بزر و انا مايلة . . ​

​

بس الا هي . . ​

​

بعتذر ع الاطالة , دمتم بخير ​

 

[خَوْد]

-






بتحبوني ولا بتحبوا الصراصير ؟

خلونا نشوف

انا = تفاعل فديت
الصراصير = تفاعل خشمك

ياويلكم لو الصراصير بتفوز هههههههههههههههههههههههههههههههههههه

شطحة :

كلما اتذكر انو توسين ( شخصية ببليتش )
بعد ما صار من الأرانكار و عرفت انو اطلاق الزانباكتو تبعو كان
على شكل صرصور حسيت بدي استفرغ يعني فوق شناعة التحول
انو على شكل صرصور
خلصوا الحيوانات شو هههههههههههههههههههههههه
كان ممكن الكاتب يحولو لخفاش مثلا لابق اكتر دامو ما بشوف

كلو من قروبات الانمي بالفيس لو مو مشتركة فيها كان الجهل
يا محلاه ههههههههههههههههههههه ​

 

[خَوْد]

-





على اد ما هالمدونة فيها فضايح على اد ماني متمسكة فيها
و مٌصرة كمل عليها

كذا مرة بقول لحالي بدي احذف كذا تدوينة بس انا مسمية المدونة

( بيت النار ) الكلام الي بينكتب ممنوع ينمسح

تاني شغلة يعني مين ما عندو مشاكل بالحياة حلاوتها

انو تدوينة بتشوفها سوداوية و الي بعدها مليانة ضحك

في انفصام بالشخصية اكتر من هيك ؟

هههههههههههههههههههههههههههههههههه

المهم الي سحب ع التصويت الي فوق يطلع و يصوت

بدي شوف يا انا يا الصراصير ​

 

[خَوْد]

للذكرى ​

 

[خَوْد]

انا هالفترة مارة بمرحلة ترميم لكل شي انهدم فيني و انا كنت غافلة عنو
او بالاحرى كنت اتناسى وجود حطام من كل حرب طلعت منها شبه حية !

هاد الخطأ الي عمري ما رح انساه او اني كررو ! اني انسى الحطام الي
خلفتو اخر حرب دخلتها ! لان حطام ورا حطام رح يتعب روحي و يخليها
منعدمة الاحساس و اسباب الحياة !

و كمان لما اتخلص من علاقة Toxic كانت كابوس بالنسبة الي !
لدرجة ما عدت اعرف كيف اتخلص منها ! تفرعت بحياتي نفس
ما الحشائش الضارة بتاكل البناتات لحتى تموت !

بس تخلصت منها و اول فترة كانت كتيييير صعبة علي !
و التفكير كان آكل راسي اكل ! تخيلوا لدرجة و انا بتحمم
كمية شعر مو طبيعية كانت تنزل ! لدرجة والله خفت لان
انا عمري ما نزل من راسي شعر نفس هالايام ! مع انو
غذائي فل و فيتامينات فل بس التفكير !! الله ياخد التفكير !

حسيت بهل الفترة كأني بنت بعمر العشرينات بس تفكيرها
بعمر التسعينات !!

قلت ببالي فجأة ليه حاملة هالسلم بالعرض ؟ ليه كارهة الحياة ؟
ليه كارهة الحياة بالرغم من وجود كتير اشياء تخليني افرح وانبسط
اشياء كنت اعملها و ما عدت اعملها !

صارت الاسباب لحالها تطلع و لما عرفت الاسباب عرفت حل مشكلتي !

مين هالبني ادم الي بيستاهل اتمنى الموت مشانو ؟
او بسببو ! او بسبب الي الاشياء الي مو منيحة الي سواها فيني !

بس طلعت من هالحرب بفضل الله ثم اهلي طلعت منها عايشة
ولا بيني و بينكم بالفترة الي مرت ما كان عندي اي سبب للحياة .

مشان هيك انا اليوم مبسوطة كتير لأني حسيت اليوم اني
طلعت فعلياَ من الدوامة الي كنت تسحبني لتحت !

و هلأ تخسي اي حدا يخليني ارجعلها ! لأني انا صحيح ما بتعلم
من اول مرة ولا تاني مرة و لا عاشر مرة لان مخي سميك
و دائما بآمن بالاحتمالات الضيئلة ! , بس صدقوني
لما وصلت للمرة الالف قلبي انعمل عليه مليون حاجز و قفل
و غير ربك ما رح يفتح لا للشخص الخطأ ولا للصح .

عفت كل شي بإرادتي و هلأ رح كرس كل وقتي
للأشياء المفيدة و لمستقبلي !

و انا كتبت هالكلام مشان غيري ياخد مني عبرة
لحتى ما يوقع بنفس الخطأ الي وقعت فيه !

و لو اني عارفة , حياة الانسان مبنية على التجارب
اي محدا رح يسمع من حدا الا لما يجرب بنفسو و يشوف !
كيف لما الواحد يكون بعلاقة توكسك او لما يكون رابط
فرحتو و مستقبلو بشخص تاني !

بس اقروا الكلام و خدوا هالكلام بعين الاعتبار
عل و عسى تكون عندكم خلفية اذا واجهتكم هيك شي

و ان شاء الله ما بتواجهوه لانو احساس مرير
احساس انك تكون وحيد و بعيد عن الكل بالرغم من انو الكل جمبك

شكرا لربي الف مرة لطفها فيني للمرة المليون
ما تتخيلوا انو اديشني فرحانة لأن صدقاَ ما عدت رابطة سعادتي
بأي شخص ان كان صديق او حبيب !

و الله يخليلي اهلي الي استحملوني بهل الفترة

و شكراَ للتون الي خلاني اهرب من العالم الواقعي بهل الفترة

​

اكتر شي بريح بالحياة
هو نعمة النسيان

انا نسيت مين كنت قاصدة هون
هههههههههههههههههههههههههههههههههههههههههههههههههههههههههه
​