مدونة متألقة Philosophy of Mind (2 زائر)

[The Darkness]

اشتقت لمدونتي الحلوة
حبيت أبدي الصفحة اليديدة للمدونة بتصميم هيدر يديد
والتصميم وصلني اهداء بدون مناسبة على قولة المصممة الخايسة والمبدعة @S U I S E N
الصدمة هي انها مصممة لي الهيدر من تاريخ 5/5/2020
يعني بعد شهرين تقريبا بيكمل التصميم سنتين وأنا توني أستخدمه
عموما يسلمو خيسونة ع التصميم الحلو ​

 

[The Darkness]

​

دخلت موضوع لعبة جينشن اللي بقسم الالعاب الالكترونية من باب الفضول
وانا ترا العبها بس من فترة لفترة يعني تقدرون تقولون آخر مرة لعبتها من شهر ونص أو شهرين
الحمد لله ما اوصل لمرحلة الادمان بالالعاب فمريح راسي ويوم بغيت العبها اليوم
شفت نقاشات المدمنين بموضوع اللعبة وانا اقرا كلامهم وجهي صاير جيه
مصطلحات غريبة واياء ما عمري سمعت فيها لدرجة قلت شو ها كله
اللعبة بسيطة بس يوم تشوف المدمنين يتكلمون عنها تقول انك من عالم وهم من عالم ثاني
ما شاء الله عليهم شكلهم ينامون ويصحون على اللعبة لدرجة عارفين أدق تفاصيلها
وأنا بس ادخلها واسوي المهمات ومن اخلص وامل اطلع واغير للعبة ثانية
بس تصدقون ترا العاب الاستراحة احلى واسهل ومو معقدة وما يبالها تعرف اشياء داخل اللعبة
يلا تعالوا كلكم نسير نلعب بالاستراحة ونقضي وقتنا هناك ​

 

[The Darkness]

​

أمس كان يوم حافل ومتعب لكن الحمد لله غيرت فيه جو
بالبداية طلعت لأبوظبي عشان أخلص كم من شغلة والحمد لله خلصتهم بقرابة ساعة
واختي كانت وياي > من عرفت اني بطلع قالت بطلع وياك حتى بدون ما تناقشني
فبعد ما خلصت الاشغال اللي علي رحت لكافيه اسمه Rain ها حسابهم على الانستا [ هنا ]
وطلبت لي ريوق من عندهم عبارة عن كابتشينو وكرواسون جبن
الكرواسون كان لذيذ صراحة بس اللي قهرني هو حجمه لانه كان وايد صغير وخاصة مقارنة مع سعره
أنا قبل ما كنت اتقبله بدون ما اضيف له سكر بس لاني صاير اشرب كوفي وايد
فخلاص تعودت على انواع الكوفي اللي ما يكون فيها سكر او شيء يضيف لها نكهة حلوة
وبعدها قلنا بناخذ لفة على اكسبو دبي 2020 قبل لا نكمل دربنا لراس الخيمة
وعلى اساس ان الظهر ما بيكون في زحمة لانه حر وشمس لكن مع الاسف وقعنا في الكمين
كان هدفنا كم من دولة كنا ناوين عليهم من زمان لكن من شفنا الطوابير كيف كانت غيرنا راينا
فقلنا دام وصلنا هنا خل ندخل كم من دولة نشوفها فاضية ولا اننا نرجع فاضين بدون شيء
وبالاخير يمكن دخلنا حوال 15 أو 20 دولة واغلبهم ما كان عليهم زحمة الحمد لله
وقبل المغرب بساعة تقريبا طلعنا وتوكلنا للبيت ويبنا لنا اكل بالطريق
ومن التعب اللي كان فيني من وصلت البيت تغسلت وغيرت ملابسي وعلى طول نوم
وجيه كان يومي امس وصح نسيت اقولكم اني مشيت تقريبا أكثر من 8 كم فكانت رياضة حلوة ​

 

[The Darkness]

#فعالية الاسبوع
كلمونا عن أهدافكم المستقبلية ، و ما هي خططكم عشان تحققوا هذي الأهداف ؟

أهدافي صراحة الحين هي اني أكوّن نفسي ماديا ومعنويا بحيث ما احتاج لمساعدة من احد
ترا خلاص كبرنا ولازم نكون نفسنا ما عدنا صغار مثل قبل
وحاليا ابي اركز على وظيفتي وشغلي وما اهمل وخاصة الوظايف ما صارت سهلة مثل قبل
الواحد يتعب لين يحصل وظيفة بهذا الزمن وخاصة من بعد ما شرفنا حضرة كورونا
والحين كل ما تقدم لمكان يقول عنده اكتفاء بالتخصص اللي انت دارسنه
على اساس قبل كانوا يوظفون الناس بتخصصاتهم
اعرف ناس درسوا تخصص وبالاخير اشتغلوا بوظيفة مالها دخل بتخصصهم
وان شاء الله نتوفق بهذي الوظيفة ولا تنسوني بدعواتكم

صح ومن أهم أهدافي اني ارضي امي وابوي واهلي بشكل عام
لانهم وقفوا معي بالفترة اللي طافت [ اقصد الفترة اللي كنت فيها بطالي وادور على شغل ]
فالحين يا دوري ارد لهم جميلهم علي قد ما اقدر
وان شاء الله ربي يقدرني على هالشيء

ترا الاهداف تتغير كل ما مر الوقت لان الواحد اكيد بتطلع له اهداف جديدة بالحياة
قبل كانت اهدافي اتخرج من الجامعة بمعدل حلو والحين الاهداف اللي فوق
ومع الايام ان شاء الله بتطلع اهداف ثانية ما دام بالعمر بقية ​

 

[The Darkness]

يوم الثلاثاء اللي طاف وتحداد تاريخ 12أبريل شفت اعلان بحساب احد المشاهير بالسناب
وكان الاعلان عن متجر ياباني وقعدت اشوف المنتجات واكثر شيء شدني هو البوكس الرمضاني
موفرين بوسك فيه منتجات يابانية الصنع من مختلف الانواع وكان السعر وايد عجيب
فقلت يلا نشتريه ونجرب ونشوف لو كان الطعم بحلاوة العرض ولا لا
طبعا هاي صورة البوكس وطلبت معاه 3 شبسات كل واحد بنكهة مختلفة وهم [ الجبن - الذرة - البهارات ]
[ هــنــا ]
أدري الصورة احترافية فلا داعي للمجاملة > طير بس
طبعا اول شيء جربته هي الشبسات لاني كنت متحمس لها [ يكفي ان عليها صورة عبقور ]
وصراحة كنت متحمس أكثر شيء لنكهة البهارات لاني أحب السبايسي
لكن مع الاسف من بين النكهات الثلاث اعطيه المرتبة الاخيرة
نكهته مو سبايسي بل بهارات عادية وفي نكهة مثل الحموضة الخفيفة او شيء من هالقبيل
صراحة ما عجبني لكن ان شاء الله يعجب احد اخواني
وبالمرتبة الثانية كانت نكهة الذرة كانت لا بأس بها صراحة بس ما اظن باكل الشبس مرة ثانية
اما اللي عجبني اكثر شيء وصاير اكله يوميا هو الشبس اللي بنكهة الجبن
طعكه عجييييييييييب واصلا هي النكهة الاصلية والحلو بالموضوع انه داخل البوكس الرمضاني
في شبس ثاني بنكهة الجبن يعني ان شاء الله باكله بدون ما افكر في انه بيخلص ولا لا
النكهات الثانية اكيد في ناس تحبها وطبعا مو لازم بما انه ما عجبني يعني خلاص ما بيعجب احد
صح نسيت اراويكم صورة المنتجات اللي داخل البوكس الرمضاني
[ هــنــا ]
داخل البوكس كان في شبس بنكهة الجبن + 4 علب قهوة مقطرة مختلفة عن بعض
وهم [ قهوة برازيلية - كولومبية - موكا - بيرو ] ولين الحين جربت البرازيلية وجربت الموكا
وريحة القوة بروحها تفتح النفس ما شاء الله
وفي 5 انواع من الشوكولاة المتنوعة وكنت متحمس لهم صراحة
^ لكن للاسف بنت اخوي شافت السناب وقالت عطني الحلويات فعطيتهم لها
وعصير عنب لكن اللي بيشوفها بيقول شيء ثاني
وهاي كانت محتويات البوكس الرمضاني وللعلم سعره = سعر علب القهوة الاربعة مع بعض
يعني متخيلين بقية المنتجات تعتبر كلها مجانية
^ سويت لهم دعاية فلازم يسوون لي خصم الحين ​

 

[The Darkness]

بداية راح اوضح لكم معنى كلمة بتتكرر معي بالايام الياية فعشان تفهمون معناها لازم اشرحها لكم
بتشوفوني مرات اقول كلمة نزولي أو النزول وهنا اقصد رجعتي من الدوام بالمختصر يعني اجازتي
لان دوامي انا ما عندي ادازة نهاية اسبوع بل نظام شفتات
أداوم 14 يوم متواصلين لمدة 8 ساعات يوميا عدا يوم الجمعة 4 ساعات ونص او 5 ساعات
وبعدها انزل اجازة لنفس المدة .. يعني 14 يوم اجازة

قبل نزولي الاخير واللي كان بتاريخ 02/06 صار كان اسبوع حافل بالتدريب
تقريبا 6 ايام كنا نروح للصحرا عشان نشوف المكاين والآلات اللي بالمصانع
طبعا انا بفترة تدرير فتدريبي منقسم بين النظري والعملي والمصيبة يوم بدينا العمل متأخر
لانه الحر وايد وخاصة بالصحرا ونقعر 3-4 ساعات مشي وشمس وبالاستراحة بس نسير للظلة
اذكر اخر طلعة من كثر التعب شربت لتر ونص او لترين ماي
فكنت احسب الايام واقول مت يجي تاريخ 2 وننزل اجازة من بعد هالتعب كله
وقبل النزول بيوم او يومين اشوف اختي الاصغر عني تكلمني بالسناب ومعصبة علي
انا عاد في حالة صدمة .. هاي شفيها الحين معصبة وانا بالدوام فما سويت لها شيء
بالاخير تقول لي ان امي تنازعها هي واختي الكبيرة والسبب [ عشان يدورون لي عروسة ]
انا هنا منصدم .. خير شو هاي المؤامرات اللي تصير من وراي وانا آخر من يعلم
تقول انها يوميا تكلمهم وتقول لهم دوروا له عروسة ابي اخطب له خلاص دام انه توظف
فسألتني لو انا ابا ولا لا وقلت لها اكيد ماااااااابييييييي > بالخط الكبير بعد
بعدني صغير ع الزواج وعوار الراس ومسؤولية حرمة وعيال .. خلني جيه مرتاح الحمد لله
قالت عيل من ترجع البيت كلم امك عشان نسكر هالموضوع لانه تعبنا بسببك
انزين انا شدخلني .. محد كلمني بالموضوع حتى فليش معصبة علي
المهم من رجعت كلمتني امي وقلت لها مابي وجان تعطيني النظرة اللي معناها قول ابا الحين ولا يا ويلك
بس قلت بعدني مو مستعد و و و .. والحمد لله انتهى الموضوع ورجعت الامور لطبيعتها
وقلت بإجازتي بشارك بالجم [ صالة العاب القوى والحديد ] واسوي اللي بخاطري
الا يطلع كل يوم مشوار لين رجعت اليوم للدوام .. حتى يتني الحالة اللي تقول ردوني الدوام مابي اجازة
مغقولة كل يوم مشوار إلا يوم واحد بس ما سرت فيه مكان وقضيته بالبيت
يعني من بين 14 يوم بس يوم واحد ارتحت فيه
المشكلة ما تقدر تقول لامك او اهلك لا ولا عاد منو بيسكتهم بعدين
في كذا مرة قلت لهم انتوا ماخذينها على هاي الآية شو [ خذوه فغلوه ]
أول مرة أشتاق للدوام كانت الاجازة هاي اللي خلصت امس من كثر المشاوير
النزول الياي بيكون إن شاء الله تاريخ 30 ومن الحين بقول لهم أغراض العيد خلصوها بروحكم
أنا هالاجازة برتاح فيها .. كفاية مشاوير وتعب لأن الواحد يرتاح بإجازته مو يتعب زيادة ​

 

[The Darkness]

كملت 6 اشهر من توظفت ولله الحمد وبعدني بفترة التدريب
وعددنا نحن المتدربين 23 متدرب ومن البداية فيه واحد ما حضر وقالوا بعدين بينضم لنا
وبالاخير استقال وصرنا 22 وبعدها بكم من شهر استقال واحد ثاني
واليوم واحد ثالث بعد استقال وصرنا 20 متدرب
وهالبرنامج اللي نحن ملتحقين فيه كان الاول من نوعه بالشركة وحاطين عليه آمال كبيرة
وبالاخير من بدايته 3 استقالات والله يستر من اللي جاي
صراحة مادري اذا السبب هو ان التدريب عبارة عن دراسة + تطبيق عملي
وكون الدراسة دسمة ما شاء الله وكمية المعلومات كبيرة
لدرجة قالوا لنا ان هاي المعلومات المفروض ندرسها على سنيتن أو ثلاث اقل شيء
لكن لانه يبون يخلصون برنامجنا بشكل اسرع وهو مختلف عن البقية فضغطونا بشكل كبير
والسبب الثاني اللي يمكن يجي ببالي هو انه طبيعة الدوام بحيث انه عبارة عن دوام شفتات
يعني تجي الدوام وتقعد فيه اسبوعين متواصلين بدون طلعة وموفرين لنا كل شيء
من اكل وسكن وملاعب وصالات لعب وقبل كم من يوم فتحوا صالة البولينغ
[ ودي اجرب البولينغ لكن وقتها ما يناسبني هالفترة ]
المهم ما علينا منهم وربي يوفقهم وين ما كانوا
اهم شيء دعواتكم لي ان اكمل البرنامج وتجاوز التقييم النهائي واتثبت بالوظيفة
لا تنسوني من دعواتكم الحلوة ​

 

[The Darkness]

يوه أحس زمان عن مدونتي لدرجة توني انتبه انه ابعاد الهيدر تغيرت
شكله ببداية الصفحة الثانية يبالي اغير الهيدر مع انه هالهيدر حلو والله وبيكمل وياي صفحة بس > مابي احسب السنين
موسم انميات الربيع بدأ واناللحين بادي بكذا انمي وللحين احس بدايتي موفقة صراحة
بس مب قارد اتابع اول بأول بسبب ضغط الدوام الفترة اللي طافت
لكن ان شاء الله بيخف الضغط الحين بعد ما تأجلت شغلة بالدوام كانت لازم تصير ع نهاية الشهر
ونقدر نقول ولكم باك يا أنا بنهاية التدوينة ​

 

[The Darkness]

اليوم بتكلم شوية عن طبيعة دوامي بس للي ما يعرفون عنه شيء
طبعا بتكلم بس بشكل مبسط عشان ما الحس مخكم في
طبعا أخوكم في الله توه مكمل سنتين من توظف والحمد لله وأول سنة كانت عبارة عن تدريب
ودوامي كان بس 8 ساعات في اليوم وكنت اداوم شفتات يعني بنظام المناوبات
لان القسم اللي انا فيه جيه يكون نظام الدوام فيه ومن بعد ما خلصت فترة التدريب تغير نظام دوامي
بدل لا يكون دوامي 8 ساعات باليوم وفقط نهار صار الحين 12 ساعة باليوم وعادي يكون ليل او نهار
فتخيلوا من بداية هالشهر بس اربع ايام داومت نهار ومن بعدها دوامي كله ليل
صح ان دوام الليل يكون مريح ومافي شغل بس تحس جدولك مخبوص ويوم تنزل اجازة تحتاج وقت عشان ترتب جدول نومك
باجر إن شاء الله راجع الدوام وبيكون دوام ليل من الساعة 5:30 بتوقيت السعودية لين 5:30 الفجر
وبرجع البيت يوم الجمعة وطبعا بفترة الدوام ممنوع انك ترجع بيتك حتى لو كان قريب الدوام
الدوام موفر سكن ومجبور انك تكون بالسكن طول فترة الدوام إلا لو عندك مواعيد او التزامات
يعني من الآخر أخوكم في الله نص يومه بس قاعد في الدوام والنص الثاني نوم وطار اليوم كله ​

 

[The Darkness]

الفترة اللي طافت كنت اتنقل بين العيادات عشان اشوف لو بيقولون لي نفس الكلام ولا لا
لانه مابي احذ لكلام عيادة وحدة بس وبالاخير طلع انهم كلهم اتفقوا على نفس الكلام
فان شاء الله خلال شهر 5 او 6 راح اسوي عمليتي البسيطة بإذن الله ودعواتكم لي
ما بقول لكم عن شو العملية لكن ان شاء الله بعد تعدي على خير ان شاء الله بقول لكم
وترقبوا تجديد طقم المدونة ابتداءًا من الصفحة التالية ​