مدونة متألقة Philosophy of Mind (1 زائر)

[The Darkness]

خلصت انمي وصراحة انصدمت من تصنيفه لاني نزلته اعتمادا على البوستر
كان على بالي بيكون خيالي وقوى وجيه اكشن من لبس البنت الازرق
بس الصدمة طلع عكس توقعاتي وهاي اول مرة اظن اتابع انمي بس من البوستر
واسم الانمي هو : Runway de Waratte

صراحة الأبيض والأسود اللي بلبس البنت اللي بالوسط عبالي انها اسلحة صراحة
بس الصدمة ان الانمي طلع عكس كل توقعاتي وطلع ان تصنيفه هو :
دراما - مدرسي - شونين - شريحة من الحياة
بس صراحة استمتعت فيه لانه اظن أول مرة اتابع انمي من هالنوع تقريبا
الانمي يركز على بطلين [ بنت وولد ] حيث ان البنت مع انها قصيرة لكنها تبا تصير عارضة أزياء
والولد يبا يصير مصمم أزياء مع ان الولد حياته المادية صعبة وأبوه متوفي وامه بالمستشفى
وعنده 3 أخوات أصغر منه ولازم يعتني فيهم وكل وحدة منهم عندها طموح وهدف
لكنهم متخلين عن أهدافهم بسبب حياتهم المادية وبنشوف تطورات حلوة بالانمي
في حلقات بخلي الواحد يعصب صراحة وخاصة يوم يستغلون حاجتك المادية وظروفك ضدك
هالناس كرهتها بسبب استغلالهم لظروف الولد وحاجته للمال عشان يدفع نفقات العلاج ومصاريف البيت
الدراما بالانمي حلوة وخفيفة ولها معاني عميقة وحبيت اصرار البطلين على حلمهم
وانهم ما تراجعوا عن أحلامهم رغم الظروف اللي مرت عليهم
الانمي حماسي صراحة لكن انقهرت انهم للحين ما أعلنوا عن تكملة له
ياخي الانمي عجيب والمانغا يمدحونها كملوه انزين وريحونا .. لازم تخلونا ننسي الاحداث يعني
بالنهاية تققيمي للانمي كان 7/10 بسبب الاحداث وان الانمي محتاج تكملة فمستحيل اعطي تقييم 8 وفوق
لأنمي ناقص وخاصة ان قصة الانمي ما وصلت حتى للنصف لكن الانمي جميل فأنصحكم فيه

​

 

[The Darkness]

أمس الاثنين 4 رمضان قررت أطلع أغير جو لأنه صارلي 5 ايام ما طلعت مكان من رجعت من الدوام
فقلت خلني أطلع راس الخيمة [ المدينة اللي تابعة لها قريتي ]
عاد دام ان الحجر صار من الساعة 10 المسا والفطور الساعة 6:47 تقريبا
فلازم من تخلص فطور تقوم تصلي المغرب عشان يمديك على الاقل تاخذ لفة محترمة
لأن المسافة من قريتي لرأس الخيمة قرابة 20-30 دقيقةوعلى حسب الزحمة وإشارات المرور
انا من اطلع مستحيل أطلع لحالي .. لازم اختي تطلع معي > صمغ اوهو
المهم طلعنا والصدمة انه مافي سيارات وايدة شرات المعتاد لدرجة أقول لاختي
لا يكون قصوا علينا بوقت الحظر ونحن على بالنا انه الساعة 10 .. قلتها من الصدمة حتى
بالعادة حتى لو باجي على الحجر ساعة السيارات ما تخلص اللي بالشارع
يستغلون الوقت لآخر دقيقة بس اليوم انصدمت صراحة وقلت خل آخذ راحتي عيل
طلعتي معروفة انا وهي اني اسير آخذ لي كوب كرك وبعدها أخذ لفة بالسيارة من مكان لمكان
عاد اللي معي بالسناب أو الانستا شافوا الكرك اللي خذيته وخاصة هالمرة حاط معه صورة خطيرة
وهاي تصويري لكرك الأمس للي ما شافوه معي على الانستا او السناب
[ هــــنــــا ]
طبعا الشخصية اللي على الكاب أكيد الأغلبية عارفنها وهي شخصية تاز المشاكس
وهاي اغنية الكرتون للي ما يعرفه

صراحة هالكرتون كوميدي لدرجة مو طبيعية خاصة تاز الاهبل
شرايكم اغير اسمي لـ تاز المشاكس Cc: @NONASHA
^ أحسها بتذبحني هالبنت
بعد ما خلصت جولتي عاد قلت لازم أييب لي سويت أو أكل فقررنا انا واختي نجيب لنا ديناميت دجاج
عبارة عن قطع دجاج مقلية وعليها بهارات وخلطة سبايسي من مكان نحبه
للأسف نسيت أصوره بس يلا ما علينا المرات الياية إن شاء الله
وكنت بجيب سويت بعد [ حلا ] بس تذكرت ان امي مسويه لقيمات واختي مسوية حلا نسيت اسمه
فقلت لا خلاص ما يحتاج أييب سويت من برا لأن اللي بالبيت يكفي ويوفي
وطبعا تذكرت اني قايل بصور اللقيمات حق ستارو فقلت مرة وحدة بنزل الصورة بالمدونة
فهاي صورة اللقيمات اللي قلت لج عنه @StarLight وفي أنواع ثانية من نسويها بصورها لج
[ هــــنــــا ]
وهاي صورة الحلا اللي سوته اختي واللي ماعرف شو اسمه
[ هــــنــــا ]
وطبعا بعد ما رجعنا قعدت شوية على اللاب أطالع انمي وبعدها سرت أشوف ولد أخوي علاوي
وندمت اني سرت له .. كان معي قوب بيبسي مع ثلج وهو عينه عليه والمشكلة انه على سريره
بس واقف ومتمسك بالسرير والكوب كان على الطاولة ومن شلته عشان أشرب منه
تخيلوا عاد شو صار هنا .. الشيطان الصغير ربي يحفظه كفخ الكوب وطاح ع الارض وخيس الدنيا رو
حتى اني ما تهنيت فيه والمشكلة اني كنت اصور وبالصدفة توثقت هاي اللحظة بالتصوير
من يكبر براويه وبقوله تعالي اعطيك كف مثل ما عطيت كوب البيبسي مالي
وبعدها طلعت الحوش مع امي واختي
وقعدت ألعب مع اختي اونو وفزت مرة وانغلبت مرتين
لعبة حظ أصلا فعادي ما تفرق معي .. أهم شيء المتعة والأخلاق > يقنع نفسه
وبس ها اللي صار معي الاثنين وقبل ما أنسى فالأربعاء عندي دوام وبرجع الخميس إن شاء الله
أحس مالي خلق أسير ياخي وخاصة اني تعودت على السهر الحين بسبب اللي يخربوني بالبيت
اليوم بحاول أنام من وقت لأنه لازم أحرك من البيت الساعة 6:30 الصبح لأن دوامي يبدأ 9
والمشزار لين الدوام قرابة ساعتين فما فينا نتأخر ويتفلسفون على راسي بعد

​

 

[The Darkness]

#فعالية الشهر

في وايد أفلام حبيتها صراحة ومنها يخص الانمي ومنها أفلان أجنبية ومنها هندية
ومن بين هالأفلام حبيت سلسلة أفلام Fast & Furious
جو الآكشن مع السباقات والرومانسية شيء عجيب وخاصة السباقات اللي يسووها
والأهم المؤثرات الصوتية والاغاني الحلوة وقت القيادة
وبالذات الأغنية بجزء طوكيو هاي يوم أشغلها وأنا أسوق أحس بحماس لدرجة ودي أتهور بالقيادة
وفي بعد اغنية بالجزء اللي مثل فيه أحد الأبطال قبل لا يموت يوم شغلوها بنهاية الفيلم
حزنت عليه والأغنية مؤثرة صراحة لدرجة خلتني أدمع وخاصة مع الكليب اللي مسوينه لها

وعندكم بعد فيلم هندي عجيب رومانسي هو ومن بطولة شاروخان
صح انه جديم بس بعده عجيب واللي ما شافه أنصحه يشوفه
وها اسم الفيلم Kuch Kuch Hota Hai
اللي ما يعرف شاروخان فشكله ما يفقه بالأفلام الهندية
صح وفي اغنية حلوة بالفيلم وها اسمها Ladki Badi Anjani Hai
أصلا الأغاني الهندية حماسها يكون وقت متابعة الفيلم
لاحظت هالشيء يوم كنت أحضر الأفلام بالسينما لأنه وقتها حتى لو الاغنية مريضة وقتها تحسها واو
مادري من المؤثرات اللي بالسينما ولا لانها أول مرة تسمع فيها الاغنية ولا شو بالضبط

وفي بعد فيلم هندي ثاني كوميدي مرررررة وعجيب وكله ضحك
هي سلسلة أفلام واسمها Housefull بس صراحة تموت ضحك
يكفي ان البطل فيها هو آكشي كومار والجزء الرابع من السلسلة نزل السنة اللي طافت وللحين ما شفته
بس لانه طويل فيباله وقت مناسب لأني ماحب أتابع فيلم وما أخلصه بنفس اليوم
عاد الأفلام الهندية عارفين مدتها ومستحيل تيي أقل من ساعتين
بس جوها عجيب وتستاهل أحد يتابعها صراحة

والحين نرجع للانمي ومن أحلى الأفلام الدرامية بالانمي هو هالفيلم وعاطنه 9 كتقييم
Ano Hi Mita Hana no Namae wo Bokutachi wa Mada Shiranai. Movie
طبعا الفيلم مليء بالدراما وحلو وجوه حلو بعد بس لا تنسون المنديل معكم وانتوا تتابعونه
للعلم ترا الفيلم تكملة لأحداث الانمي فلا تتهوروا وتتابعونه إذا ما كنتوا تابعتوا الانمي

وللي يبون فيلم رومانسي ودرامي بنفس الوقت فعندكم هالفيلم العجيب
Byousoku 5 Centimeter
يحكي قصة اثنين وحياتهم كيف تتغير من حبوا بعض وهم أطفال ولين كبروا
وللعلم تراه درامي بعد فلا تنسون المناديل معكم وكيف صعوبة الحب عن بعد
أظن هالفيلم شفته مرتين أو 3 وأنتجت اغنية النهاية بشكل منفصل عن الفيلم من كثر ما حبيتها



ومن أفضل ذكريات طفولتي هي يوم كنا نلعب مع عيال خالي اللي بيتهم جنب بيتنا
كنا نسوي مغامرات ونبتكر ألعاب حتى من مخنا وكنا نبني بيوت من الخشب
وكانت في أشجار كبيرة قريب بيتنا وكنا نتسلق عليها ونقلد طرزان
وأقول لهم انا طرزان وانتوا الغوريلات لأني الأكبر
وقتها مافي فرق بين الأولاد والبنات وكلنا شقيين وما همنا بنت ولا ولد وكنا نلعب كرة قدم بعد بالحوش
مرات في بيتنا ومرات في بيت خالي ومن أهم القوانين اللي كنا نسويها انه محد يشوت فوق
ومحد يشوت الكرة بقوة أو من بعيد لأنه ما نبا أحد يتعور ونتوهق وقتها
وطبعا في ذكريات عن حب الطفولة وهاي خط أحمر ما راح أتكلم عنها > استروا علينا عاد
ومن أهم الذكريات بعد انه كنا نتهرب من صلاة التراويح ونحن صغار
تخيلوا معي نقول لامي بنسير نصلي بالمسجد ونسير ونصلي العشاء وبعدها نرجع لبيت جدتي
في هناك بلاي ستيشن 2 أظن مادري 1 المهم كنا نسير هناك ونلعب ومن تخلص الصلاة ويسلم الامام
نرجع بيتنا عشان ما يشكون فينا وقتها واننا ما كنا نصلي التراويح
ومستغلين ان الوالد يصلي بمسجد ثاني غير المسجد اللي بمنطقتنا فكانت أمورنا تمام
يوه كيف كنا شياطين يوم صغار بس .. اللي يرحم هذيك الأيام بس
صراحة كانت من أحلى الأيام وأروعها والحين تشوف الأطفال كل واحد عند أيباد وجوال
يلا ما علينا بنقنع نفسنا ان الأزمان والاجيال تغيرت والتكنلوجيا غيرت الكل
هاي كانت بعض من ذكريات طفولتي الجميلة .. إن شاء الله عيبتكم

​

 

[The Darkness]

احم احم هاي التدوينة كان المفروض اكتبها من زمان بس ما جهزت الا من كم يوم
قبل شهرين تقريبا كان يوم ميلادي وطبعا وقتها كنت طالع دورية بالبحر > حظي حلو ولله الحمد
وصلتني تهاني من الأغلبية وصراحة اسعدني هالشيء وكلكم ع راسي وربي يحفظكم
ووصلتني رسالة بالخاص محتواها بس خلاني حتى ما أقدر أبلع ريجي من قريت الكلام
قلت بنفسي هاي شو سامعة عني .. ماحدني سويت شيء لاحد أو أذيت وغلطت ع احد
وقتها توترت صراحة وما عرفت شو أقول أو شو اسوي بس تعرفون وين المشكلة الكبيرة ؟
ان الخايسة اللي راسلة الرسالة كانت قايلة لي عن هالشيء وانها مفاجأة وخربتها على نفسها
بس ذاكرتي الزق خانتني وقتها وبعد ما كملت الرسالة وشفت الاهداء الحلو وانه بمناسبة يوم ميلادي
عيني شوية وبتدمع والله من الفرحة يعني من بعد الصدمة والخوف والتوتر يطلع بالاخير مقلب
وبالنهاية تكون افتتاحية لهدية حلوة بمناسبة يوم ميلادي .. ياخي قلبي الصغير لا يتحمل
طبعا ما راح أحط الهدية اللي وصلتني الحين .. بحطها من أقرر أرجع لاسمي
بس صج صج صج فرحت لأنها الهدية الوحيدة اللي وصلتني يمكن وأسعدتني والله
وقلت لازم أشكر الخايسة الحلوة اللي اسعدتني براسلتها وهديتها [ طبعا مع تجاهل بداية الرسالة ]
فطلبت من وحدة مبدعة تصمم لها تصاميم وما قصرت وسوتها وطلعوا حلوين وهي @HAROLDs
أشكرج من كل قلبي على مساعدتج لي وتصميمج للرمزية والتوقيعين الحلوين
وطبعا تدوينتي هاي كلها تتكلم عن الخايسة اللي اسعدتني هذاك اليوم وهي الباكا @WATERMELON
ربي يحفظج ويخليج لأهلج ويسعدج دنيا وآخرة مثل ما أسعدتيني صراحة
وهاي هديتي لج طبعا ذكرت لج اسم المصممة فوق والرندر من اختياري
[ كانوا 4 أظن والمصممة اختارت الانسب من بينهم عشان التصميم ]
تفضلي

صح وبالنسبة للطلب الخاص واللي ماله تاريخ صلاحية فراح أفكر بشيء نذل وحلو بس عشان خاطرج
وأتمنى تعيبج الهدية البسيطة وشكرا من القلب مرة ثانية

​

 

[The Darkness]

ونقول الحمد لله خلصنا الخدمة اللي علينا وخذينا فترة راحة من كل شيء عدا الانمي
والحين بدأن مشوار البحث عن عمل والله ولي التوفيق
أحس زمان عن مدونتي الحلوة .. اشتقت لها حتى

​

 

[The Darkness]

من يومين الحين رجعت ألعب سوني وبالذات لعبة فاينال فانتزي بتوصية من الخايسة @Bella Manaka
رفعت ضغطي والله كثر ما يذبحوني
المشكلة اني للحين مو متعود على الازرار بالقتال يعني عادي تلقوني مجابل الخصم وقاعد أضرب وبس
والاخ أكيد يضربني وينقصني أكثر من أنا أنقصه وما أستوعب إلا من تحمر الشاشة عندي
شسوي بالله وأنا مو متعود على الأزرار من بعد فترة طويلة عن اللعب
المشكلة مرات يذبحوني بضربة وحدة .. عاد هنا عادي أرمي الجهاز من العصبية
الحمد لله مافي لعبة تهديني غير Hay Day .. روقان ياخي ومافي ذبح وغيره

​

 

[The Darkness]

لأول مرة بعد رمضان سهرت للفجر والسبب لأني من فترة ناوي أتابع فيلم Kimi no Na wa.
لكن مو محصل وقت من المشاوير وأشغال البيت فقررت أسهر يوم ع الاقل واشوف فيه الفيلم
المشكلة اني منتج الفيلم بالتون وكان مشروع لنا من كم سنة وجاهز عندي بس ما كان في وقت اشوفه
المهم اني تابعته اخيرا وبقولكم عن رايي فيه

الفيلم رسمه لا تعليق عليه .. إبداع كما هو معروف من هالاستوديو اللي أبدع بالرسم
مو بس بهذا الفيلم حتى بأفلامه السابقة وأعتبره صراحة متعة بصرية
الأحداث حلوة وسير الأمور كان جميل بس الصدمة يوم عرفت ان تبادل الاجسام كان بين اثنين بأوقات مختلفة
هنا انصدمت لانه عبالي الاثنين بنفس الزمان والتاريخ بس طلع الفرق بينهم 3 سنين
التحريك كان حلو ولأغاني جميلة وهادية ومناسبة لجو الفيلم حتى ما اضريط اني أسحب عليها
لأنه بالعادة أسحب على الأغاني وأكتفي بمتابعة الاحداث لان الاغاني ما تروق لي وأحسها تضييع للوق
من وصلت للنهاية خفت تكون النهاية حزينة وتخليني أعصب واندم اني تابعته لكن الحمد لله
طلعت النهاية معقولة ومقبولة بنفس الوقت مع انه تأثرت صراحة ببعض المواقف
تقييمي العام للفيلم : 9/10
القصة شايف لها أنميات مشابهة تقريبا سواء عن تبادل الاجسام أو الشخصيات
فما قدرت أعطيه 10 وأصلا كنت بعطيه 8 لكن لأني حبيت الاحداث والرسم والأغاني وكل شيء ثاني
فقلت 9 تكفي وتوفي حق الفيلم وأنصح اللي ما شافه انه يشوفه

​

 

[The Darkness]

"اخسر ما شئت ولكن إياك أن تخسر قلبًا حاول أن يفعل الكثير ليسعدك فهناك قلوبًا لا تتعوض أبدًا"
قريت هالعبارة وحبيتها لأنا معناها عميق وعميق جدا بعد
في ناس بحياتنا قيمتها كقيمة الأخ والقريب رغم بعد المسافات اللي بينا
لكن أخلاقهم وحبهم لنا تجاوز هالمسافات لدرجة لو تكلمنا معهم نحس انهم يالسين حذالنا [ جنبنا ]
وفي قلوب حبيناها من كل قلبنا وترا للحب أنواع وأشكال مو شكل واحد بس
فلازم نحاول ما نخسر هالناس المقربة منا لو شو ما صار ففي كلام ثاني قريته ويقولكم :
"أجمل ما في الورد الرحيق وأجمل ما في الدنيا الصديق وفراق الأحباب أشد من الموت"
مهما غلط عليكم أحد أو أساء إليكم وكان قريب منكم وتحبونه وتعزونه فالتمسوا له العذر
يمكن كانت لحظة غضب أو مر بشيء يضايقة فمو معناته انه متعمد يقول ويجرح
الحياة فانية فسامحوا واعفوا فمنو نحن عشان ما نسامح ورب العباد يتوب عن المذنبين التائبين
لا تخسروا الناس القريبة منكم بسبب أخطاء أو سهوات فعادي ما تلقونهم مرة ثانية
وياما افترقنا عن ناس وما نعرف وين ساروا وشو أخبارهم وأحوالهم وللحين ذكراهم في قلوبنا
وكل شخص فقد شخص غالي عليه [ مو شرط يكون فرقهم الموت ] أقوله كان الله في عونك

​

 

[The Darkness]

العمر مجرد رقم أصلا > حبيت أبدي بهاي العبارة كيفي
صج الوقت يطير بدون ما نحس لأنه للحين مو مستوعب اني صرت 27
والمشكلة للحين بعدني بطالي وكله بسبب كورونا الخايس
بس زين قاعد أربي عيال اخوي واختي من الملل > مجبور لا يغركم التعبير
بس عادي أصلا الحياة حلوة
جدولي هالفترة مرة مو ثابت لدرجة ان اللاب صاير ما افتحه الا مرة كل اسبوعين او ثلاث
وقبل كنت ضد اني اتابع انمي على الفون وبسبب اني ماقدر افتح اللاب وايد
بديت اتابع على الفون بس المشكلة لو اتابع انمي حلقات 24 فلازم أقل شيء 3 أيام عشان اخلصه
وبالعادة اخلصه بيوم لكن الله كريم وصح نسيت أقول I'm back

 

[The Darkness]

من رجعت للتون هالاسبوع بدأت معاناتي مع التهاب الاسنان .. اعترفوا منو داعي علي ؟
تخيلوا بالبداية كان عادي وفي دوا دوم اخذخ بس صار لي يومين وما أثر فيني وقام يزيد
وصارت الاذن والبلاعيم مشمولين بالالتهاب لردجة من اجمط او افتح فمي احس خلاص انتهيت
اليوم طلبت من صيدلانية محترفة تنصحني بأدوية مناسبة لالتي وعطتني اثنين
لحظة خل اعطيها منشن عشان اللي يحتاج دواء مناسب يروح يخبل فيها [ @Rainbow Rose ]
احس مفعوله يبدأ بالخفيف بس أحس بيكون طبيعي يبدأ بالخفيف لاني من أكثر من 3 ايام اتعالج غلط
لين ما زاد الالتهاب عندي ووصل للاذن والبلاعيم ولدرجة صرت ابرد والغرفة حارة وطول اليوم تحت اللحاف
وحسيت بسخونة ويوم سألت قالوا لي طبيعي هاي أعراض الالتهاب والحمد لله على كل حال
قلت @SKY NET الخايس يبالي أخلي @RO-CHAN تعالجني فتقعي يا رو شو كان الرد
قال البنات علاجهم مو تمام وقلت لهم متأكد من كلامك ترا بتنجلد من رو .. قال هيه قاعدي قول لها
اسمح لج تجلدينه ولو تبين مساعدة فأنا جاهز
بس عالجيني أول وبرسل لج تذكرة وبحجز لج فندق 5 نجوم لين تنتهين من فترة العلاج
ما أثق بالاطباء اللي عندنا صراحة لان كانت لي تجربة مع واحد وللحين أسبه صراحة
يلا ان شاء الله يخف عني هالالتهاب وأقدر أكل الاكل اللي اباه وانا مرتاح وبعدين اتفاعل بالتون براحتي
^ أهم شيء الاكل ترا