مدونة متألقة Philosophy of Mind (2 زائر)

[The Darkness]

أحس زمان عن مدونتي الجميلة
أهم شيء ان آخر تدوينة عن Kimetsu no Yaiba وكنت ناوي أكمله بعد ما خلص عرضه
بس من شفت ان له فيلم بينزل وبيكون تكملة للأحداث قلت لا عيل خلني أتريا شوية لين ينزل
عاد ان شاء الله بس من أنساه مثل ما نسيت وايد انميات كانت في بالي ><
المهم خلونا من ها الحين لأنه أصلا مو موضوعي اللي ياي أتكلم عنه بس من شفت آخر تدوينة
قلت خل أعلق عليها عشان أطلع اللي في قلبي بس

~

من فترة شفت ناس تستصغر ناس ثانية سواء بأفعالها ولا أقوالها
وأنا من النوع اللي يكره هالأشكال مع اني ما احب أكره أحد لكن هالنوعية من الناس تجبرك على كرهها
ترا الشخص مو برغبته مثلا يشتغل بالوظيفة الفلانية او انه يعاني من عيب خلقي
هذي كلها أقدار وربك اللي كاتبنه لعباده فانت بأي أساس تيي وتكبر راسك وتشوف نفسك عليهم ؟
في مرة قريت عن أحد يقول لأحد انت سواق أو أحد يقول لأحد انت شغلتك تصب قهوة للناس
تراها هاي بالنهاية أعمال والناس تاخذ رزقها من وراها وما ننسى أن الأنبياء عليهم السلام
كانوا يشتغلون برعي الغنم في زمنهم ومنهم من عمل بالتجارة فهل هالشيء عيب ؟
صح الزمن تغير والوقت تغير لكن الوظايف نفسها ومو حرام ولا شيء ففي النهاية الواحد ياخذ عليها أجر
والأجر ها مصدر دخل للشخص فليش تستصغر هالأعمال بحكم انك تشتغل بوظيفة راقية
وراتبها عالي وتنسى ان ها من فضل ربك عليك ؟ لين متى هالنوعية بتظل موجودة ؟
لا ومرات بعد تشوف ناس ما تقبل توظف ناس حتى لو كانوا دارسين ومثقفين
وسبب الرفض يكون فيه اعاقة .. سواء ما يقدر يتكلم أو ما يقدر يمشي أو أو أو
ترا المعاق مو هالنوعية من الناس بل المعاق اللي فكره معاق يوم يعتبر هالناس معاقين
نحن عندنا هالنوعية من الناس نسميهم " أصحاب الهمم " وناس تستاهل كل تقدير
ناس بذلت جهدها وسعت رغم الظروف اللي يمرون فيها وحققوا انجازات
فبأي أساس تحكم عليهم بالإعاقة ؟ .. هاي الناس سعت وبذلت وأنجزت رغم اللي يمرون فيه
المفروض نتخذهم قدوة لنا بالحياة فنحن اللي ربنا معافينا بأجسادنا وصحتنا ما قدرنا ننجز اللي هم أنجزوه
طبعا مو الكل أقصد فالواحد ما يهدم مستقبل شخص بسبب هاي الأعذار الغبية
كل شخص له مجال يقدر يبدع فيه لكن الله يسامح الناس توقف بوجه أصحاب الهمم
تكلمت عن هالشيء لأني قريت مواقف عن هالحالات مرت علي بتويتر فحبيت أفرغ اللي بداخلي بمدونتي
لأني هالفترة صاير ما أتفاعل بالنقاشات والكلام وغيره بمواقع التواصل

​

 

[The Darkness]

قاعد أشتغل على كذا موضوع بس في واحد بطرحه خلال هالأسبوع إن شاء الله
شو تتوقعون القسم اللي بينطرح فيه الموضوع ؟
اللي راح يخمن القسم الصح بخليه يختار قسم يباني أطرح فيه موضوع
كنت بعطيكم هدية بس أنا فقير ما عندي تونات عشان أعطيكم

​

 

[The Darkness]

في أحد مجرب شعور انه ما ينتمي للمكان الفلاني ؟
أنا الفترة اللي طافت مرت علي مثل هذي الأفكار وتخلي يومك كله تفكير وتدور لك ستين ألف شغلة
بس عشان تشغل نفسك من التفكير بهاي الأشياء لدرجة حتى اني رجعت اشوف انميات شايفنها قبل
في وحدة خايسة أحس انها حست بهذا الشيء لدرجة انها كلمتني عنه
بس ما عرفت كيف أشرح لها أو كيف أوصل لها الكلام اللي في بالي وأحس انها من تشوف هالتدوينة
عادي تعصب علي وأدري انها بتعصب لمصلحتي بس شسوي .. أنا انسان مسكين
بس إن شاء الله ما تجيني هالأفكار مرة ثانية .. إن شاء الله يعني

​

 

[The Darkness]

الماضي
أيا ليت الزمان يعود يوما .. عبارة الأغلبية العظمى تعرفها أكيد
في أنشودة سمعتها قبل شوية وأعرفها وكلماتها دوم تأثر فيني بشكل مو طبيعي
وحتى لو كنت مستانس من الآخر من أسمعها على طول أتذكر أشياء من الماضي وأتضايق وأزعل
وخاصة لو كانت الأشياء هاي هي عبارة عن جرحي لناس عزيزة علي لأني باكا
وفي ناس عارفة اني حمار بالتعبير عن اللي في قلبي ومرات أجرح من غير قصد
بس مثل ما يقولون .. الكلمة من تطلع صعب ترجع وتأثيرها يكون كبير
نادر ما تلقى ناس تتفهمك وتتفهم حالتك وقتها وتعرف معزتها في قلبك خاصة لو انت تبا تصلح الامور
بس ما تعرف شو تسوي أو كيف تصلحها وبالنهاية كل همك تشوفهم مستانسين من بعيد لبعيد
وتعتبر نفسك غريب وما تتدخل بحياتهم ولو ان الشيء صعب بس اللي سويته بحقهم
تحس صعب يسامحونك وكل ما تبا تجرب تصلحه تخاف وترد وتقول خيرها بغيرها
يعني بكلمهم بوقت ثاني وكل يوم تأجل لين الله يعلم متى تحس ان الوقت مناسب
طبعا ها انا بالمختصر وهاي الشغلة والخوف والتردد اللي فيني صعب أعالجه
وفي شخص مقرب مني عارف هالشيء فيني من سنين طويلة وما يمر يوم ما يعاتبني عليه
لكن مثل ما قلت فوق تحس ان اللي سويته شيء مو بسيط ولو مو قصدك فتخاف تكلمهم
وخاصة لو كلمتهم وانسحب علي أو ردوا علي برد بارد وقتها بحس ان اللي بينا انتهى صج بسبب غلطتي
وخاي هي الانشودة اللي قلت لكم عنها واسمعوها واحكموا عليها وعلى كلماتها
وشوفوا كيف انها تأثر بالواحد وكيف ان الكلمات معبرة مرررررررة

​

 

[The Darkness]

اليوم شفت صورة بتويتر ورجعتني لأيام الطفولة الجميلة ياخي ج
صورة ما بيعرفها إلا جيل الطيبين أو اللي تابعوا هالانميات بعد ما تم اعادة بثها مرة ثانية

تقريبا أعرفهم كلهم إلا يمكن اثنين او ثلاث بس ما عرفتهم
كل واحد لحق عليهم يقول كم شخصية يعرف ولو أحد حدد الشخصيات ووضع لهم دوائر
يرسل لي الصورة بعد التحديد وبنزلها وله مني 20 تون ع تعبه

​

 

[The Darkness]

ومعنا أول مشاركة بفعاليتي الجميلة > من متى وهي فعالية أصلا

طبعا عشان أوضح لكم الفرق بين الدوائر اللي بالصورة فاللون الأحمر للشخصيات اللي تعرفها
واللون الأزرق لشخصيات شايفتنها بس ناسيتنها
ولج أكيد 20 تونة على المشاركة وجاري طلب التحويل
وللعلم فالمشاركة كانت من @Sairyū

​

 

[The Darkness]

الصداع يلعب بنفسية الواحد حتى لو كان رايق طول اليوم ><
فجأة ياني صداع من ساعتين ويا انه عكر المزاج وخفت يخرب علي يومي
مع ان اليوم قرب يخلص اصلا بس ماحب انام وانا مصدع فتذكرت انه عندي بندول
وعلى طول خذيت حبة .. أهم شيء ما يعكر مزاجي وانا حاط في بالي اني بشوف انمي
بس للحين قاعد افكر شو اشوف وخوفي بالنهاية اسحب على اللاب بكبره واسير العب بالفون
سواء ببجي أو كول اوف ديوتي > طبعا ما العبهم الا من اوصل اقصى درجات الملل

​

 

[The Darkness]

اليوم من الملل بديت أنزل ردود لدرجة لوقت هاي التدوينة نزلت 6 ردود ولعبت بالاستراحة
اوه صح صح قصدي من النشاط يعني وجيه مو من الملل > خلاص راحت عليك
اليوم الكل تقريبا مأجز من اللي وياي بالدوام إلا أنا وكم من واحد ودوامي يشمل الويكند بعد
أصلا عادي أنا أحب الدوام والدوام يحبني ونحن عايشين حالة حب مع بعض > باين الكذب
صح وما أنسى ان نشاطي خلاني أنزل موضوع بعد وأشتغل على الثاني الحين
يلا الكل يرد على موضوعي أشوف وها الرابط ماله
مشاهدة وتحميل جميع أجزاء الأنميشن Avatar: The Last Airbender Blu-Ray مترجم

​

 

[The Darkness]

اليوم تهورت وفتحت ستوريات لناس أدري انهم يطلعون كل جمعة ويصورون أكل وغيره بسناب
أصلا عادي مافي أحد مقهور انه بالدوام وهم طالعين .. أصلا عااااااااااااااااادي
ومن الملل والفقر اللي عندي بالأنميات رحت أكمل كونان وطبعا بفضل الأخ الفاضل @Mahdicchi
^ ياخي من طلع لي لونك أحمر وأنا أسوي المنشن خفت عبالي غلطت بالاسم
صرت قادر أميز الحلقات الفلر بالحلقات اللي لها علاقة بالقصة فما يحتاج أشوف كل حلقة الحين
وكالعادة من اقول ولين انام وانا على اللاب أو أقوم اسويلي نيسكافي وأتشمس شوية وأرجع اكمل
أو ألعب كول اوف ديوتي من الملل اللي ما تتصورونه بس يلا إن شاء الله الأحد برجع البيت وأفل أمها

​

 

[The Darkness]

ورجعنا مع مشارك ثاني هالمرة للتحدي اللي فوق وأهنيك على صراحتك وصدقك
واللي هي الخايسة اللطيفة @S T E L L A > أنفع مذيع صح
بس يا باكا ليش تحرقين الأحداث للناس خاصة مال بائع الحليب
صح اني أتذكر في شيء حزين بالانمي بس ناسي شو هو وانتي حضرتج ا قصرتي
كنت مفكر اتابعه بس شكلي بهون الحين بسبب حضرة جنابج
بس يمكن أنسى تدوينتج وأرجع أفكر أتابعه > إن شاء الله يعني أنسى
وهذي هي مشاركة ستيلا في التحدي الخفيف

وتم طلب تحويل 20 تونة لج بسبب قبولج للتحدي
يلا نتريا متحدين جدد ولا تصيرون كسولين ياخي

​