مدونة متألقة Philosophy of Mind (1 زائر)

[The Darkness]

16/01/2020
@SKY NET
في خايس اسمه أحمد بيصير عمره 31 مستوعبين هالشيء ؟
طبعا ولأني ما أضمن وقت بفترة دوامي فقلت أنزل تهنئتي للخايس بمدونتي مع اني فكرت اسويله موضوع
بس يلا المهم اني باركت لك وأقولك كل عام وانت بخير خيسون
وعقبال العمر الطويل يا رب ونترا نسمع خبر زواجك عاد > طير
أحمد تقدرون تقولون أقرب شخص لي تعرفت له بأنمي تون مقارنة بالبقية
صح من رجعت وللحين ما كلمته بس لأني خفت يزل لساني وألمح له عن يوم ميلاده
لدرجة اني كنت أبي أتأكد من يوم ميلاده بدون ما أدخل ملفه وسألت الخايسة مانكا
عشان تأكد لي التاريخ لأني متذكر انه بشهر 1 بس ما أتذكر بأي يوم بالضبط
ونسيت أدخل أشوف ملفه كزائر وما تذكرت إلا بعد ما سالت مانكا
المهم آسف خيسون على التقصير واني ما كلمتك من رجعت بس والله كنت خايف أخرب المفاجأة
أدري انك ما توقعت اني أسويلك شيء لكن بالعكس تفضل تدوينة كلها عنك
أحمد جاد بأمور التون [ أقصد الامور الإدارية ] ومرح مرات بالامور الخارجية
وأكيد ملاحظين هالشيء وخاصة اللي يسولفون بملفه
لو أنا بطيركم كلكم بسبب التنبيهات اللي بتجيبوها لي وقتها
ما شاء الله عليه متحمل الكم الهائل من التنبيهات > عطني قدرة تحملك ياخي
وأحلى شيء انه غيمرز لدرجة كل ما بغيت نوع معين من الألعاب ألقاه عنده
حتى لو كان ما لعب اللعبة بس يقدر يحكم عليها من الفيديوهات والناس اللي جربتها
روحك حلوة خيسون فحافظ عليها وخلك دوم متفائل مهما صارت لك من ظروف
فانت من مفاتيح التفاؤل عندي فيا ويلك تضعف ومن الحين أقول يا ويييلك
وهذي هديتي لك واللي هي التدوينة وهذا الفيديو الجميل اللطيف

وأعيد وأقول كل عام وانت بخير خيسون وعساها سنة خير وسعاد لك

​

 

[The Darkness]

دوامي ما يخلون الواحد يرتاح أبدا
الثلاثاء قالوا لي داوم بالويكند وبنعطيك إجازة 10 أيام
الأربعاء اتصلوا مرة ثانية قالوا خلاص لا تداوم بالويكند لأننا نباك تطلع معنا بحر يوم الخميس
واليوم الجمعة اتصلوا فيني وقالوا نباك تداوم من الأحد للخميس وبعدها تنزل إجازة
وما راح تطلع بحر معنا .. انزين ممكن تثبتون على شيء واحد يعني
شكلي بعطيهم كلهم بلوك وبقول لهم جوالي اخترب
هاي مو حالة ياخي .. الواحد ما يقدر يرتب جدوله اليوم بسببهم

 

[The Darkness]

يوم الجمعة اللي طاف عيال خالي تعرضوا لحادث
طبعا مو القصد منه انه ابيكم تتحمدوا لهم بالسلامة أو شيء بل ابي اوجه كلام للكل
تخيلوا معي ان اللي تسبب في الحادث ولد عمره 15 سنة !!!!!
يعني حتى انه ما دخل الثانوية بعد وأصلا هو تحت السن القانوني باللي مسموح لهم بالقيادة
الرخصة تسلم من عمر الـ 18 فما فوق وأكيد في أسباب لتحديد هالعمر
والمصيبة الثانية بعد ان هالولد من بعد ما تسبب بالحادث هرب من المكان
ولا حتى اتصل بالاسعاف أو المرور عشان يلحقوا ع الوضع بل هرب من المكان وها غلط كبير
وفوق ما انك تسوق بدون رخص تهرب من مكان الحادث ؟ ها عليها محاسبة قانونية
بس صراحة ما ألومه هو بل ألوم أولياء أمره سواء أمه وأبوه أو اخوانه أو أي أحد قريب له
فكيف تعطي ولد بعمر الـ 15 سيارة وهو مو قد المسؤولية وعمره صغير
وفوق هذا كله كيف تخليه يروح للمدينة واللي معروف عنها بالزحمة وخاصة بإجازة نهاية الأسبوع
الحين شو غلط الناس اللي تعرضوا للحادث بسبب إهمالهم لأولادهم
ترا هذيلا محاسبين عليهم نحن وإهمالنا لهم بنتحاسب عليه سواء بالدنيا أو بالآخرة
فما ننسى قول النبي عليه الصلاة والسلام :
عن عبد الله بن عمر رضي الله عنهما عن النبي صلى الله عليه وسلم قال: {أَلَا كُلُّكُمْ رَاعٍ، وَكُلُّكُمْ مَسْئُولٌ عَنْ رَعِيَّتِهِ،
فَالْأَمِيرُ الَّذِي عَلَى النَّاسِ رَاعٍ، وَهُوَ مَسْئُولٌ عَنْ رَعِيَّتِهِ، وَالرَّجُلُ رَاعٍ عَلَى أَهْلِ بَيْتِهِ، وَهُوَ مَسْئُولٌ عَنْهُمْ، وَالْمَرْأَةُ رَاعِيَةٌ
عَلَى بَيْتِ بَعْلِهَا وَوَلَدِهِ، وَهِيَ مَسْئُولَةٌ عَنْهُمْ، وَالْعَبْدُ رَاعٍ عَلَى مَالِ سَيِّدِهِ وَهُوَ مَسْئُولٌ عَنْهُ، أَلَا فَكُلُّكُمْ رَاعٍ، وَكُلُّكُمْ
مَسْئُولٌ عَنْ رَعِيَّتِهِ} (متفق عليه).
وبالنهاية حاب أقول ان الحادث عدى على خير ولله الحمد وكانت دقات خفيفة بأماكن متفرقة
ومو بليغة ولله الحمد والكل يهتم بأهله ومو غلط تحاسب أهلك أو اللي أصغر منكم إن سووا شيء غلط
بل واجهوهم وانصحوهم قبل لا تصير أشياء فوقتها ما راح يفيد الندم

 

[The Darkness]

عاد حظي من زمان وأنا أعرفه كيف وتأكدت منه أمس بعد
تخيلوا مراحل الخدمة الوطنية عطوهم إجازة شهر إلا المرحلة اللي أنا فيها
قالوا اللي بالمرحلة الثالثة والاخيرة يكملون دوامهم حالهم حال بقية الدوامات
أصلا عادي ما باجي شيء على النهاية .. حظي حلو أصلا

 

[The Darkness]

اللي بيتبرع يشوف التنبيهات عني له مني جائزة وشكرا
مع العلم اني شايل التنبيهات من الاعجبات
راجع لكم مع تدوينات بس اخلص كم شغلة اول

​

 

[The Darkness]

أخيرا استغليت فترة الدوام والملل بشيء حلو وهو متابعة الانميات المتراكمة فوق راسي
^ أعتبره انجاز صراحة
يعني في مرة خلصت 4 أنميات بأسبوع الدوام واللي كنت فيه طالع البحر
مجهز كذا انمي ومنزلنة على الجوال وكل ما حسيت بالملل وما ألقى ارسال بالجوال قلت اتابع شيء
لين انتهى اسبوع البحر وأنا مخلص 4 انميات وقتها
عاد ومن رجعنا الميناء قلت بصلي بالطريق للبيت لأن الطريق بروحه ساعتين
وكل ما رحت لمسجد لقيته مغلق وما لقيت أي مسجد مفتوح
من فقدت الأمل نزلت علبتين ماي وتوضيت فيهم وقلت بصلي على الفرش الخارجي اللي قبل باب المسجد
وقبل لا اصلي اتصلت الوالدة تسأل أنا وين وقلت لها عن السالفة وقالت لي ان المساجد كلها أغلقوها
قلت لها وأنا كيف بعرف عن هالشيء وأنا أسبوع كامل بالبحر ونادر ما ألقى إرسال هناك
لكن الحمد لله قضيت فروضي ورجعت البيت بسلام ولله الحمد
ومن اليوم اللي بعده بدأ شغلي عند الأهل .. خذنا السوق وخذنا المستشفة و و و
يعني أخلص من شغلي بالدوام وأجي لشغلي بالبيت
أصلا عادي الحياة حلوة

​

 

[The Darkness]

Akame ga Kill!

قبل لا أبدأ ترا في حرق بالكلام فاللي حابين يشوفون الانمي أنصحكم ما تقرون
هالانمي كان لي خاطر اشوفه من زمان بس كل مرة انساه ومن اسبوعين قال لي مهدي أتابعه
فقلت يلا دام انه ذكرني فيه فخل اتابعه وخاصة انه بلستتة الانتظار فهاي فرصة اني أقلل اللستة بعد
المهم مستوعبين اني بادي فيه من اسبوع ونص أو يمكن اسبوعين بعد واليوم خلصته ؟
من بعد ما حللت فترة طلعة البحر وخلصة 4 انميات بعدها صارت تغيرات بدوامي
وكله بسبب كورونا الله يكفينا شره .. وما صرت ألقى وقت حتى عشان أفتح اللاب ><
فصرت أنقل كذا انمي من اللاب للجوال وأشوفه من أحصل وقت والحمد لله اليوم قدرت أخلصه
الانمي عجيب عجيب عجيب مثل ما قال مهدي بتعليقه عن الانمي [ هــنــا ]
فكمية العنف اللي بالانمي عجيبة وأجواءه عجيبة بحيث يعكس طمع السلطة والخبث واستغلال الضعفاء
وطبعا صارت أشياء ما كنت متوقعها والنهاية كانت مقبولة بس عنصر الدراما بالأنمي أثر فيني
لدرجة اني مناوب بالويكند [ يعني ما رجعت من الدوام ] ومن كثر ما تأثرت حتى ببعض الحلقات
وخاصة آخر الحلقات حسيت ان الدمعة شوية وبتطلع من مكانها وأنا مو لحالي هنا
الحمد لله قدرت أمسك نفسي وما أطلعها جدام الكل ولا وقتها منو بيسكتهم الشباب
بس صراحة الدراما وفقدان الأصدقاء والعائلة شيء محزن فمو ذنبي يعني اني تأثرت
والأحداث غير متوقعة صراحة يعني ما توقعت كمية الأبطال اللي بيموتون بالانمي
وكمية الحزن والمشاعر مع موت كل شخصية وكيف كل واحد يلوم نفسه على اللي صار
وخاصة النهاية يوم مات البطل تاتسومي والعدوة اللي كانت تحاربهم ووقعت في حبه إيسديث
واللي قتلتها هي صديقة ناتسومي وبطلة الانمي ومن الشخصيات اللي حبيتهم [ أكامي ]
كان في بالي ان ايسديث بتوقف بصفه بالنهاية وبتنضم لهم بس ما صار للأسف ولقطة موت إيسديث
وكيف انها قررت تكوت مع تاتسومي عجيبة ويدل على كيف انها كانت تحبه
وهو الوحيد اللي حرك قلبها البارد وخلاها تجرب شعور الوقوع بالحب
وبالنهاية قيمت الانمي 9/10 لأني أشوفه يستاهل صراحة وخاصة اني ما شفت انمي الخطايا السبع
بس شفت الجزء الأول فما بقدر أقارن بينهم فعطيته التقييم اللي أشوفه يستاهله بالنسبة لي

​

 

[The Darkness]

#فعالية الأسبوع

جذبني موضوع الفعالية فقلت أشارك فيه دام عندي رغبة بالكتابة هالمرة
بالنسبة للعطلة الأسبوعية فقبل ما كنت أتهنى فيها وايد لأنه مرات أكون بالدوام فتتراكم علي الأشغال
والحين دوامي نقدر نقول شبه متعدل فمرات يكون عندي عطلة نهاية أسبوع ومرات لا
بالنسبة لعطلة نهاية الأسبوع قبل أزمة الكورونا فكان لازم أطلع من البيت عشان تغيير جو وجيه
فعادة أطلع قبل المغرب بساعة أو نصف ساعة لأن العصر تكون الشمس بوجهي وأنا أسوق
فعشان جيه أتجنب الطلعة بهذا الوقت إلا لو في احد بيوق السيارة نيابة عني
عاد أنا مستحيل أطلع من البيت إلا وأختي معي .. لاصقة فيني مثل ظلي إلا إذا بنت خالتي سحبتها معها
عاد روتين الطلعة مالي نفسه كل ويكند تقريبا مع تغييرات بسيطة جدا لدرجة يمكن ما تلاحظ حتى
ماحب أنزل مكان إلا للضرورة فعشان جيه تكون أغلب الطلعة عبارة عن حواطة بالسيارة
وبدايتها لازم أسير لمحل الكرك اللي دوم آخذ منه واسمه [ مندرين ] وهذي صورة الكرك للي ما يعرفه
[ هــنــا ]
وبعدها نتريا كم من دقيقة ونسير ناخذ لنا شيء بارد وعادة ما يكون مشروب ميلك شيك أو قهوة سبانيش
ولأنه ما عندي صور غير لقهوة سبانيش فهذي هي للي يبا يشوفها
[ هــنــا ]
ونكمل الجولة بالسيارة من مكان لمكان ومرات نروح صوب البحر وإذا كان الجو مناسب نصور البحر
وإذا ما كان مناسب نكتفي بس بلفة بالسيارة جنب البحر ونرجع نكمل المشوار
وبعدها يحين وقت العشاء وهنا عاد تبدأ الحرب كل واحد يسأل الثاني وين بناكل
عاد أنا أعصب من هالشيء .. قولوا لي المكان وخلاص مو كل واحد يسأل الثاني
المشكلة مرات أقترح مكان وهم ما يبونه فعشان جيه أعصب عليهم وأقولهم اختاروا ولا تعورون راسي
ومن ننتهي من فقرة العشاء نصور الشارع مع عمل تمويه لإضاءة الشارع مع تشغيل أغنية
عاد الأغاني مو محددة فمرات الأغنية اللي تكون شغالة نصور عليها
وبعدها نقول درب البيت ونرجع تقريبا ما بين 9:30 إلى 10:30 ما نطول وايد برا البيت
أما بالنسبة لعطلة الأسبوع بفترة الكورونا فأغلبها تكون جلسة بالحوش مع الأهل
ومرات نلعب أونو أو ورقة لعب عادية ومرات نطالع أفلام أو شيء على التلفزيون
مسوين جلسة بالحوش لأنه ما صرنا نطلع مثل قبل هالفترة وإن شاء الله تعدي هالفترة على خير

 

[The Darkness]

بدأت بمتابعة أنميام موسم الربيع هالأسبوع وللحين تابعت 5 أنميات وسجلتها بحساب الـ MAL مالي
طبعا سجلتها عشان ما أسحب عليها مثل أغلب الانميات لانه مشكلة يوم تتابع أكثر من أنمي بنفس الوقت
من بين اللي بدأت أتابعهم وحمسني هو هالانمي : Kakushigoto (TV)

هالأنمي جذبني وقصة تتكلم عن أب يخفي حقيقة وظيفته عن بنته الصغيرة وهي انه مانغاكا
والبنت تعرف حقيقة وظيفته بالمستقبل يعني في تنقل بين الماضي والمستقبل بالأحداث
والحلو ان التنقل بينهم مو كثير يعني ببداية الانمي ونهايته تقريبا ويثير فضول المتابع من ناحية
وين الأب اختفى لان بالمستقبل البنت بتروح لبيتها القديم ووين تعيش البنت الحين
وبالماضي أم البنت محد فشو اللي صاير هل الأم ميتة والأب مات بالمستقبل ؟
ولا الام انفصلت عن الاب يوم عرفت حقيقة عمله .. وايد تساؤلات تجي في البال بخصوص هالانمي
أحداث أول حلقتين حلوين صراحة وخاصة بحلقة المهرجان ويوم قالت له عن الكيمونو
هو بروحه ما كان يدري عنه والظاهر انه من امها وطلع في صناديق للبنت بحيث بكل عيد ميلاد لها تفتح واحد
والصناديق كانت لعمر الـ 16 وبعدها طلعت صناديق جديدة من عمر الـ 17 ولغاية عمر الـ 20
طبعا الصناديق الأربع الأخيرة طلعت يوم راحت البنت لبيتها القديم بعد ما عرفت وظيفة الأب
من البداية وأنا متحمس الحين للأنمي وأبي أعرف النهاية من الحين
بس الظاهر انه يحوي الكثير من المشاعر والأحاسيس يعني الظاهر بنشوف مواقف حزينة فيه ><
ورسم الانمي حلو وخاصة ان البنت كيوت وبراءة الطفولة واضحة فيها > خف علينا
ماقدر أقيم الأنمي من بدايته فعشان جيه بتريا نهايته ووقتها بعطيه التقييم اللي أشوفه بوجهة نظري يناسبه
وإن شاء الله ما يخيب توقعاتي وفي أنميات ثانية بعد من هالموسم بس بالبداية قلت أتكلم عن ها

​

 

[The Darkness]

بما ان هاي بتكون آخر تدوينة بهذي الصفحة فقلت أسيولكم نحدي خفيف ولطيف
وطبعا كل اللي يدخلون المدونة ميشوفون التحدي مسموح لهم يشاركون فيه
التحدي هالمرة لطيف وخفيف وما يباله بذل أي جهد بس اللي عليكم هو انكم تصورون أشياء
وتوثقونها باسمكم وترسلونها لي على الخاص وقبل ما أقول لكم الجوائز للي راح يشاركون
خل أقولكم فكرة التحدي وشروط المشاركة فيه عشان ما تتلخبطون

[ فكرة التحدي ]
راح أطلب منكم 5 أشياء واللي عليكم هو انكم تصورون لي 5 أشياء لها علاقة بالشيء اللي بطلبه
مثلا لو طلبت منكم لون أزرق فتقدروا تصورين السماء - البحر - ملابس لونها أزرق
المهم أي شيء يرمز للشيء المطلوب وممنوع تكررون الصورة لأكثر من طلب
يعني مثلا لو طلبت لون أزرق + طلب تصوير السماء
ممنوع تحطون صورة السماء بالطلب الخاص باللون الأزرق
بل عليكم تصوير شيء ثاني لونه أزرق وجيه
ومسموح بالصور القديمة .. يعني مو لازم تكون صور حصرية
والحين بخليكم مع الأشياء الخمس اللي أبيكم تصورونها لي
وحاولت أخليها أشياء بسيطة وسهلة لكم عشان ما أتعبكم

[ المتطلبات ]
- صورة للغيوم
- صورة لشيء لونه أحمر
- صورة لمشروب تحبون تشربونه [ بارد أو حار ]
- صورة لشيء يحتوي على شكل دائري أو هو بنفسه شكله دائري
- صورة صورتها وعجبتك > أسهل من هالطلب ماشي

[ الجوائز ]
الحين وصلنا لفقرة الجوائز واللي الكل أكيد ينتظرها
أول 3 رسائل توصلني وفيه المتطلبات الخمس راح أنزل كل رسالة برد بمدونتي
وراح أعلق على الصور من وجهة نظري الشخصية
+ لهم مني 20 تونة وطبعا لكل اللي شاركوا نفس كمية التونات
الفرق بس اني راح أنزل أول 3 مشاركات وبكتب رايي فيهم

يلا أبي أشوف تفاعل حلو منكم عشان أفكر لكم بتحديات ثانية بعدين

​