مدونة مميزة روح عتيقة || Vintage Soul ~ (1 زائر)

[Meoω❀]

كيفكم أحلى أعضاء ..

أنا صفحتي الوحيدة على الانستقرام public وبنزل فيها رسماتي ولوحاتي..
طبعاً صفحتي كبرت الى حد ما خلال السنتين الأخيرين وبلشت تصير توصلني مسجات كتيرة..
من جديد بلش يجيني بعض المتابعين بيبعتولي مواضيعي بقسم الرسم بانمي تون وبيقولولي في وحدة سارقة لوحاتك ..
وخصوصاً انه ما في شي مباشر وواضح بيثبت أنه مياو هي أنا بالحقيقة
ما بعرف كيف بيكونو "مبعكشين" وكيف لاقوا مواضيعي بالمنتدى !
طبعاً أنا بصير بوضح أنه شكراً على اهتمامكم بس هاي العضوة هي أنا، مياو هو النك نيم تاعي بهالموقع وأنا مشاركة فيه من سنوات ..

طبعاً لهلأ ما نزلت أي ستوري توضيحي أو أي شي على صفحاتي..
هو هيك هيك بكل الأحوال أنا متوقعة أنه حسابي على انمي تون رح يُكتشف .. لأنه الظاهر بعض الناس بلشت تصير تدوّر ..
وأنا شخص متصالح مع نفسه ومع ماضيه بس بنفس الوقت ما بنكر أنه في كتير من هبل المراهقة بعده موجود بمواضيعي القديمة ..
لهيك مش حابة أعطيهم اياه ع طبق من ذهب بس بنفس الوقت مش ضد أنهم يلاقوني هنا ..

لأنه الموضوع تكرر أكثر من مرة ما بعرف ليش صرت بفكر أغير اسمي بانمي تون لاسمي الحقيقي (روعة)
يعني عشان أبعد الشبهات شوي وخصوصاً انه بالمنتدى كتير نزلت شغلات حصرية ما نزلتها على مواقع التواصل من قبل..
بس بجد حاسة بشعور حزين لأنه لقب مياو لي ذكريات كتيرة معه .. ولاطالما ولازلت بحبه وبحب كل ذكرياتي معه..

أرجوكم أي نصائح .. ويسعد أوقاتكم جميعاً ​

 

[Meoω❀]

كأي اوتاكو اجتني فجأة بشكل جداً غريب قرار تعلم اللغة اليابانية ..
وقررت أتعلمه كلغة بشكل جدي يعني كتابة وقراءة وكلام .. مش انه اكرر جمل واهجأها بالانجلش..

للي ما بيعرفو اللغة اليابانية فيها 3 أنظمة كتابة الهيراجانا والكاتاكانا والكانجي..
تعلمت الهيراجانا والكاتاكانا كاملين قبل شهرين والحمدلله صرت أعرف أقرأهم واكتبهم .. الكانجي طبعًا رحلة كاملة بحد ذاتها ولسة لهلأ ما بدأت فيها
بحاول أني أتآلف مع اللغة بالأول قبل ما أبدأ بالكانجي لأني بحب طريقة الProgressive type of learning وقت تعلم اللغات الجديدة بمعنى أنا لست من معجبين كتابة قائمة بالمصطلحات والرموز وأقعد أحفظ فيها.. بحب أتطور بهدوء وفي نفس الوقت الي أتعلم فيه المصطلحات أتعلم القواعد واستخدام الضمائر وما شابه..

المهم لا داعي من الفلسفة ....



هي صورة لما كنت أدرس وبعدني بهجأ بالحروف وبكتب طريقة قراءتهم بالانجلش والمعنى لانه جد
واجهت صعوبة اني اقرأ بسرعة بالبدايات .. د

المهم اليوم وصلت لمرحلة باللغة أني صرت بعرف شوي الجرامر بطريقة مبسطة أني أعرّف عن نفسي بشكل بسيط وهيك كأني ولد عمره سنتين او تلاتة ماكسيمام..
ومع ذلك عشان بس صرت احكي كم جملة تعلمتهم خلاص اعلنتها بشكل رسمي اني يابانية .. الله يشفيني بس




~~

وهي آخر صورة لجمل تعلمتهم من دولينغو وسلسلة الكتب الي بدرس منها ..



~

المهم .. هي اخر ابديت لي ..
شكراً لكم على حسن الاستماع والى اللقاء.خو​

 

[Meoω❀]

أوكي I'm speechless ...!

بقسم الاستفسارات لقيت موضوع عن منتديات انمي تون تبع فال الامارات القديم..
ولأول مرة أشوف الأرشيف تبعه بعد كللل هالسنين ...

كمية الذكريااااات والنوستالجيا الي اجتني بعد ما شفت مواضيعي وردودي !
كنت لسة مراهقة عمري 13 تقريباً يعني تقريباً أكثر من عقد مر على هاي الأيام ..

بهداك الوقت كان اسمي روريتا و كنت مشرفة على القسم العام ..
بطريقة ما قدرت أقنع الادارة اني شاطرة بالأدب والخواطر
مع انه بالحقيقة ما كان الي اي علاقة بهالمجال .. وخلوني أصير مشرفة عليه..

كان اسم القسم: القسم العام بأقلامكم ويمنع النقل ..
وكنت آل يعني كتير معصبة من الاعضاء الي بينقلو ورحت عملت موضوع وثبتته بالقسم ..




شفتو كيف الهيبة .....

اذا حابين تشوفو الموضوع هي الرابط ..:

ابتدآء من الآن أي موضوع منقول هنآ سيحصل لـ صآحبه مخآلفة - منتديات انمي تون - منتدى انمي تون - أنمي-انمى -فال الامارات

السلآم عليكم ورحمة الله..~ كيفكم ..؟! شو أخبآركم ..؟! أولاً اوجه تحيةة الى جميع الاعضاء خآصةً ذو النشآط الملحوظ. فهم يقدمون مواضيع جميله ومميزةة لكن أود أن أطرح طلبي واتمن

web.archive.org

طبعاً ياخي وباللغة العربية الفصحى لزوم الهيبة وهيك ..
فرطت ضحك ع هالموضوع لما قلت بس وفرجيته لصاحباتي
الاسلوب مش طبيعي قدي بمثل الهيبة بالغصب
​

لأن بعض الأعضآء يستغلون قدرآتهم العقلية بطريقة صحيحة
وبعض الأعضآء " بيكسلو " استغلآل قدرآتهم العقلية
والبعض الآخر لآ يستغلونهآ أبداً..!​

أكيد كنت سامعة جملة "القدرات العقلية" من مسلسل وعجبتني ..
بس أأكتر شي ضحكني هي كيف وانا بحاول اتكلم باللغة العربية الفصحى
وكيف أنه بهدد وهيك بعطيكم مخالفة اذا نزلتو مواضيع منقولة.. عايشة الدور ع الاخر..



وغيرها الكثير من الفضايح والذكريات اذا حابين احطلكم بحط
بس خلص يكفينا لهذا اليوم..

​

 

[Meoω❀]

الورقة التي لم تسقط في فصل الخريف خائنة في عيون أخواتها،
وفية في عين الشجرة، ومتمردة في عيون الفصول فالكل يرى الموقف من زاويته.




~.~​

 

[Meoω❀]

طبعاً كالعادة المنتدى مكان الفضفضة والتعبير عن المشاعر
الي بنستحي نعبر عنها بالسوشيال ميديا ..



من يومين كان يوم الانميشن العالمي،،

بهذه المناسبة رجعت ذاكرتي لعشر سنوات ورا..
لما كنت أخاف أحكي لزميلاتي بالمدرسة الاعدادية أني بحب الانمي
ويقعدو يقولولي: ييي نحنا كبرنا ع هالسوالف.. وانتي يا روعة بعدك طفولية
وهالخوف ما اجا الا من بعد تجربة تنمر شفتها بالكم سنة الي قبلها لما كلهم كانو
ينادوني "سبيستون" من باب السخرية ..

طبعاً هالكلام كان قبل ما الانمي يصير موضة ومحبة سبيستون كمان صارت تريند ..
حتى البنات الي كانو ينادوني سبيستون ويتمسخرو علي صارو هلأ يعملو شير
لبوستات سبيستون انه نحنا كبرنا وصرنا شباب المستقبل ومدري شو..

هلأ كلهم سبحان الله صارو اوتاكو
​

 

[Meoω❀]

ذكريات الماضي الدافئة تخفف من برد الشتاء على القلوب ..
~~



IG: rawaa_artist​

 

[Meoω❀]

إن راحة الحياة تكمن من انشغالك الدائم

~

وأنا 17 سنة حطيت قائمة من الأمور والانجازات الي كنت أطمح في عملها
قبل وصولي لسن الخامسة والعشرين ..
لطالما كانت هالقائمة ببالي طول السنين الي مضت والآن أنا عمري 24 سنة ونص
رجعت أشوف القائمة ولقيت حالي حققت معظم الأشياء الحمدلله من بينها
أخذي رخصة القيادة وشرائي أول سيارة العام الماضي ..
و عمل ليزك لعيوني وتقويم لأسناني والكثير من الأمور الشخصية/الجمالية الأخرى ..
والتخرج بدرجة بكالوريوس والعمل كمهندسة والتطور بفني ورسماتي..

الأشياء الي ما حققتها من هالقائمة أشياء بصراحة لم تعد من اهتماماتي مثل تعلم الكرافت والخياطة.. والعزف على الجيتار..
فبالنهاية نحن نكبر واهتمامتنا تتغير طبعاً.. المهم حققت الأمور المهمة والمفيدة منها والي كانت بتمثل 98% من القائمة

اليوم رح أسمح لنفسي اني اعيش شعور الامتنان قليلاً لأني قدرت أعمل الأمور الي وضعتها وأنا مراهقة ..
وان شاء الله من بكرا رح أبداً بوضع قائمة جديدة ولكن هذه المرة طموحات طويلة المدى تطلّب خطوات مسبقة..
​

 

[Meoω❀]

بالنسبة للفعالية على الرغم من انه ما عندي وقت بس حبيت اني اشارك فيها من
بعد ما الجميلة سلوى بعتتلي بالخاص ..

بما انه نسبة مش قليلة منكم مراهقين .. بتمنى كلامي يلهمكم
"مع اني بعرف انه Gen Z هالايام ماشاءالله اوعى منا وافهم منا بهالمواضيع "
الخوف من آراء الناس كان هو المتحكم الأساسي لكل قراراتي ولشخصيتي.. ضيّعت وقت كتير طويل من مراهقتي والجامعة؛ وأنا أتظاهر ..
دايماً كنت بمثل وبتظاهر قصص ما بتشبهني وباخد آراء مش آرائي.. مش غريبة لأنه بهالمرحلة الشخص لسة بعده بيبني شخصيته
انا كنت بعرف انه الي بعمله ما بيشبهني بس كنت مضطرة أتظاهر لأنه كنت بحس هاي الطريقة الوحيدة اني أحظى بالقبول من الناس
.. كنت بقول بيني وبين نفسي يمكن انا الآن مش فاهمة بس لما أكبر رح أفهم ..
بس أنا كبرت .. وفهمت كل شي .. وكل ما فهمت أكتر زادت الأسئلة الي ما لها اجابة.. وكل مالها الامور بتصير غير منطقية اكتر واكتر..

لهالسبب من البداية ما تتظاهروا شي ما بيشبهكم .. ما تخافوا من طرح الأسئلة..
ما تمشوا مع القطيع اذا مش مقتنعين بمسارهم.. كل شيء قابل للشك .. ما في طريق صحيح واحد ..
اذا تظاهرتوا شي ما بيشبهكم رح ييجي يوم رح تتعبوا.. ورح تبينوا للناس حقيقتكم الأصلية ..
وتقبّل الناس لحقيقتكم بعد التظاهر أصععببب بكتير من تقبلهم لحقيقتكم من البداية..
رح تلاقوا أنفسكم خسرتوا احترام ناس .. صرتوا محاطين بنسبة أقل من الناس .. ولكن هدول الناس الأقلة تحديداً
الي حبوهم من كل قلبكم لأنهم "سواء كانوا فاهمين أو لا" تقبلوكم واحترموا حدودكم الشخصية وقادرين يضلهم يحبوكم ..

لما تحررت أخيراً من مشاعر الخوف.. وصرت على طبيعتي وما عاد يهمني كلام الناس،
لقيت نفسي بدون ارادتي بجذب الناس الي بتشبهني .. صرت محاطة بدائرة من الناس المقرّبين الي
بيتشاركوا معي نفس الفلسفة والرؤية .. بيقولوا الاختلاف بين الناس شيء جميل ولكن برأيي ضروري
تحيط نفسك بالناس الي بتشبهك من ناحية المبدأ والرؤية ..
وهالشي ما رح يتحقق الا اذا كنت على طبيعتك أكتر ​

 

[Meoω❀]

تعقيباً على كلام تدوينة هدى عن الذكاء الاصطناعي حابة أعطي تعليقي عنه لأني بحب أتفلسف

يمكن بعض الناس ما تتفق معي بس أنا عن نفسي -كرسامة- مش شايفاه تهديد أبداً
صحيح الـ AI بيقدر حرفياً ينسخ اسلوب اي حدا ويعمل أي شي بدكم اياه..
ولكن لازال هناك شريحة كبيرة من الناس وخصوصاً الي عندهم هواة جمع القطع الفنية والكرافت من الفنانين
لازالوا بيعتمدو على التعامل مع الفنانين والرسامين ..
هواة الجمع عادةً يهمهم مش بس الجودة، بل الـ Texture والملمس والمظهر الخارجي بشكل عام للقطعة الفنية
يعني مثلاً اذا شخص طلب لوحة زيتية يقدر يشوف الخامة نفسها للالوان الزيتية بارزة على السطح ،
أو يقدر يشوف لمعة الرصاص بالورقة لما يشوفها من الجنب.. هاي من أهم الامور الي بتعطي قيمة للمنتج..

في مرة قصة شخصية صارت معي، عملت طلبية لبنت ورسمتها وعملت اسلوبي المعتاد،
قالت لي جملة ما بنساها: "حاسة وأنا مركزة بشكلي بالرسمة؛ كأني بتطلع على عيوني !"
انك تشوف نفسك بالمراية غيير تماماً عن انك تشوف نفسك ولكن بعيون شخص تاني ( رسام مثلاً )..
فعلياً هادا هو الهدف من الفن، انه نعطي مشاعر غريبة ومحببة للاشخاص، وما اتوقع الـ AI بيقدر ينجز هالأمر مهما بلغ ذكاءه


بصراحة الشريحة الوحيدة من الفنانين اللي ممكن أتفهم انهم يغضبوا ويحسوا بتهديد من الAI؛
هما فنانين الديجيتال، لأنه حرفياً الـ AI اخد شغلهم، لذلك نصيحتي لفنانين الديجيتال انهم يحاولوا يتميزوا بأسلوب معين..
ما بقول انه الـ AI ما رح يتمكّن من تقليد هالأسلوب ولكن على الأقل يكون لهم أسلوب يتميزوا به قدام كل اقرانهم من
فنانين الديجتال، ويحترفوا هالاسلوب ويصير عندهم شريحة معينة من جمهور يثقوا فيهم ويحبوا أسلوبهم ويشتريوا منهم..

غير هيك الفنانين التقليدين مش المفروض ابدااً انهم يحسوا بأي تهديد.. لأنه أؤكد لكم هواة الجمع مدركين تماماً الأمر الي ذكرته
وعندهم اهتمامات كثيرة غير النتيجة النهائية والجودة .. ​

 

[Meoω❀]

أتوقع اني متأخرة عن فعالية المدونات ولكن حابة أشارك معكم تجربتي بعالم الدراسة بكل الاحوال..
أنا من الناس الذين نجوا من عالم الدراسة والامتحانات والى الآن مش قادرة اصدق هالشي.
هل أشعر بالحنين لتلك الأيام؟ بصراحة تعتمد على المرحلة الدراسية.

ربما كلامي ما رح يكون عن الامتحانات قد ما رح اتكلم عن الزملاء، لانه بجد اشعر انه في علاقة عكسية انه كل ما زاد شعورك بالوحدة كل ما كان علاماتك اقل

مرحلة الجامعة على الرغم من انها كانت اكثر مرحلة بكيت فيها و حسيت فيها بضغط نفسي من المشاريع والامتحانات الا انها كانت أجمل مرحلة دراسية بالنسبة لي، ربما لانها كانت اكثر مرحلة قدرت أكوّن فيها صداقات وما حسيت فيها بالوحدة أبدًا.. كانت أول مرحلة أحس فيها اني قادرة على الانسجام مع الجميع ..وعلى اني أتعرف على صبايا بيتشاركوا معي نفس اهتماماتي وما نبخل ع بعض بالمعلومات والدراسة ونتفق على طلعات خارج نطاق الجامعة، وحتى قوة علاقتي مع صحباتي زادت اكتر واكتر بعد التخرج والخوض في مجالات العمل

مرحلة الثانوية كانت أسوأ مرحلة ( على عكس الجامعة تمامًا ) كنت أشعر فيها بالوحدة وكنت أستكفي بصديقة في السنة او صديقتين ماكسيمام.. واحيانا ما بكون عندي صحبات. البنات الي كانوا متنمرات وقليلات أدب كانوا ايضا اكثر الفتيات شعبية في المدرسة والكل نفسه يتصاحب معهم. وانا شخصيتي كنت انطوائية وبسبب تجارب سابقة كنت أخاف من الرفض وبالتالي ما كنت احاول حتى اني اتصاحب مع اي حد بسبب مخاوفي الشخصية وايضا بسبب اختلاف الاهتمامات، على الرغم من انه من جوا كنت نفسي اتصاحب معهم. بسبب الاحساس المستمر بالوحدة كنت جدًا مكتئبة، واكتئابي كان أيضا يأثر على ادائي الدراسي وبحكم اننا بهداك الوقت -نتكلم عن ايام 2015 و 2014 وهالايام- ارقام علاماتك كانت تمثل قيمتك وتمثلك انت كشخص؛ فكانت تصيبني حالات رعب وارتجف لما تتوزع اوراق الامتحانات. الحمدلله كنت شاطرة بس بجد أتمنى اني ارجع للماضي وأذكّر نفسي انه علامات امتحاناتي
( ما بقول انه العلامات مش مهمة ) ولكن عمرها ما رح تمثل قيمتي وعمرها ما كانت مقياس للذكاء او النجاح.
بالنهاية انا كـ روعة اليوم ما استفدت ابدا من الفيزياء والكيمياء والاحياء والرياضيات.. مجال عملي الي انا نجحت فيه ما احتاج لهاي الأمور ابدا.

نرجع لموضوع الوحدة، بشكل عام، حسب تجربتي أنا كتيير ضد تلك الشعارات والاقتباسات في السوشيال ميديا
الي بتقول انه الوحدة شيء جميل، هناك فرق بين الوحدة والرغبة في الانعزال.. كنت أحاول احياناً اضحك ع نفسي
وأقول انه الوحدة شي حلو وأحلى من أني أكون مع ناس .. ولكن كنت بكذب مع نفسي
الوحدة شيء موحش، انه ما يكون عندك اصحاب شي كتير بشع .. لازم الواحد يكون محاط بـ Community بيشبهه

الحمدلله انه الله عوضني بمرحلة الجامعة بذكريات اجمل ومواقف وصداقات

جد انا لليوم بحلم بكوابيس للمرحلة الثانوية ولا اشتاق لها ربما فعلا قوتني وصقلت شخصيتي ولكن ليس بالنحو الذي أريده.​