مدونة مميزة روح عتيقة || Vintage Soul ~ (3 زائر)

[Meoω❀]

ما في أسوأ من انه بلدك بتمر بأسوأ الظروف وانت بالغربة وحاسس بالعجز في هيك ظروف بعيد
عن الأحبة والعائلة والأصدقاء،
جد مش قادرين ننام من الخوف واذا بالغلط نمنا هزة الموبايل لوحدها بتصحينا زي الملمسين لنتابع اخر الأخبار..

كل شوي حد جديد من قرايبي او اصدقائي بيخلو البيت بعد ما اخلوا اكتر من مرة خلال هاليومين

والميديا مش مساعدة المؤثرين العرب ساكتين والاجانب جاهلين واغبياء زي الببغاء بيكرروا الي بيسمعوه حواليهم..

كل ما اشوف صورة خبر او صورة مكان بسترجع اجمل ذكريات مع اجمل والطف ناس، اصدقاء الطفولة الي عرفتهم من غزة اكتر اصدقاء اوفياء ولطفاء شفتهم بحياتي..
وبتذكر شمس غزة وبتذكر اماكنها..وبتذكر ناسها الطيبين

هلأ غزة منعو عنهم الكهربا والمية والأكل،
يعني معظم الناس فقدنا التواصل معهم ..
بمعنى اخر غزة انعزلت عن العالم وبتوصل للمجاعة عل بطيء..

يعني الواحد مش عارف شو يحكي..
كل شي فاقدين السيطرة عليه.. ومش عارفين شو نعمل
ولما ننزل ستوريات وبوستات سواء بالعربي او الانجليزي
السوشيال ميديا كمان بتحجب هالبوستات من الانتشار
يعني حتى السوشيال ميديا عل فاضي..


حسبي الله بس​

 

[Meoω❀]

فقدت التواصل مع 95% من صحباتي ومعارفي من كذا يوم،
وكل الي لازلت ع تواصل معهم هلأ بلا استثناء تركوا بيوتهم من بعد بيان اسرائيل انهم يتوجهوا للجنوب،


وغير هيك ما في نت ولا كهربا ولا اي شي

لقد تعبنا ​

 

[Meoω❀]

أخيراً بعد قرابة السنتين ونص من التخرج استجمعت قواي وقررت أني أخد هواية الرسم بجدية أكبر..

بعد التخرج من الجامعة سنة 2021 صحتلي وظيفة على طول بعد التخرج..
خلال هالسنتين ونص تقريباً تنقلت بين ثلاث وظائف، بتعرفوا لما تلاقوا راتب أحسن وتحولو وهالسوالف هاي كلها..
لدرجة انه في فترة من الفترات خطر ع بالي انه يمكن فعلاً لازم استكفي بالرسم كمجرد هواية مش اكتر

كل مشاريعي الي كنت ناوية اعملها بالرسم مش بس مجرد أجلتها كمان لقيت حالي مع الوقت فقدت الحماسة لها..

ولكن مع بداية هالسنة كانت البداية لالي لكل شي..
أول شي اشتركت اخيرا بالجيم بعد سنين من الانقطاع، وقصيت شعري الطويل كله وصار قصير لعند الاكتاف..
وتركت الشغل ... والآن رجعت اشتغل بالرسم ورجعت الحماسة ورجع شغف الانستقرام
يعني New beginning, new era, new me
حاسة حالي أخيراً رجعت "روعة" وما عاد لازم أمثل شي ما بيشبهني وأعمل شي ما بحبو..


وما بتصدقوا مين أكبر ملهم لي الي خلاني عنجد أتخذ هالخطوة الجدية..
أكبر ملهم لي هي حالي الأصغر سناً My younger self ..
لما أشوف حماستي الكبيرة أيام كنت مراهقة وفترة الجامعة وكمية الأحلام والطموحات الي كانت عندي..
قبل ما أتبع سستم الوظائف والقصص هاي الي كانت على وشك انها تقتل أحلامي..

ما بقول الوظائف مش مهمة بالعكس كل وظيفة لها قيمتها وكل شخص اله أهميته..
ولكن بالنسبة لي كروعة انا لا أنتمي لهذا النوع من السستم والرسم هو الشغف الاول والوحيد لدي ..
واذا بقدر اعمل التنين مع بعض بكون جد wonder woman وأنا أعترف اني مش هيك ..

حبيت اشارككم هاي التجربة وأشجعكم انكم تتبعوا قلبكم بالأمور الي بتتعلق بمستقبلكم
وأتطلع لهالمرحلة الجديدة من حياتي ..​

 

[Meoω❀]

رمضان مبارك اعزائي ينعاد عليكم بالصحة والسعادة ..

بصراحة مع بداية شهر رمضان دائماً بسترجع ذكريات المنتدى لما كنا نقضي اجمل اوقات هنا..
واحد من أكتر الأمور الي بشتاقلها بجد هي صناعة المواضيع وخصوصاً مواضيع الرسم ..

وحاسة انه عندي الحماسة اني أرجع لهالشي وأعمل مواضيع بس ما بعرف ليه حاسة انه راحت هالموضة ..
بس بعدين برجع اذكر نفسي انه صناعة المواضيع شي انا المفروض انه بحبه وبستمتع فيه بغض النظر الناس بعدها بتعمل او بطلت

‎Rawa'a Tartour روعة | Vintage Artist 🎨‎ on Instagram‎: "رمضان كريم وكل عام وأنتم بخير 🤎 Better late than never :) I guess it’s a tradition to do a Ramadan drawing every year .. 🌙 Materials: Pan pastel & polychromes 🎨 #ramadankareem #ramadanaesthet

rawaa_artist on March 13, 2024‎: "رمضان كريم وكل عام وأنتم بخير 🤎 Better late than never :) I guess it’s a tradition to do a Ramadan drawing every year .. 🌙 Materials: Pan pastel & polychromes 🎨 #ramadankareem #ramadanaesthetics #polychromospencils #portraitdrawing #art #drawing #artist...

www.instagram.com

^ هاي آخر رسمة رمضانية عملتها، حابة اعمل موضوع كوليكشن للرسمات الرمضانية الي عملتها على مدار السنين ..
بتشجعوني اعمل هيك ؟ ولا It's not worth it ؟ ​

 

[Meoω❀]

كيف عبرت من السنة الفائتة إلى هنا؟ بماذا خرجت منها؟ وماذا حملت معك؟
اعتبرها كلمة لكل مما مضى في 2023، توديعك وتخطيك.. ثم اظهر لنا استعدادك لسنتنا الحالية​

السنة الماضية لم تكن سنة مميزة بالنسبة لي .. كنت أشعر فيها بالضياع،
على عكس السنة الي قبلها "2022" كانت من أجمل سنين حياتي
ومع ذلك خرجت من عام 2023 بدروس مميزة ..

فيما بعد اكتشفت السبب لذلك الضياع.. و الفرق بين السنتين،
سنة 2022 كانت سنة الانجازات وتحقيق الأحلام بالنسبة لي..
سنة 2023 كانت أهدى نوعاً ما .. وكان هذا سبب كفيل يخلّيني أكتئب..

بشكل آخر للأسف كنت أربط قيمتي الذاتية بالانجاز.. ولكن لحسن الحظ تداركت ذلك قبل نهاية السنة

الانتاجية أمر جداً جيد .. ولكن لا بأس ولا تقسي على نفسك اذا مرّت عليكي أيام كنتِ قاعدة وما بتعملي شي ..
لازلت الى الآن أتعلّم أنه أحس بقيمتي حتى بالأوقات الي برتاح فيها وما بنجز شي
وبنفس الوقت أشتغل ع نفسي بما يتناسب مع طاقتي بعيداً عن معايير المجتمع فيما يتعلّق بالنجاح..

أنا جداً متأثرة بالـ Movement الي يمكن موجودة من قبل ولكن هلأ صار في تركيز عليها بشكل أكبر؛
الا وهي انه نعمل بما يتناسب مع طاقتنا الأنثوية عن طريق أنه نكون نحنا النساء على طبيعتنا أكثر
ونعبّر بما يتناغم مع حقيقتنا الأصلية ..بعيداً عن الأقنعة وبعيداً عن المعايير الي وضعوها الي حوالينا ..
وبدون أنه نحس حالنا محتاجين "نقلّد الرجال" لنثبت أننا أقوياء..

لما تتربّي ببيئة المرأة ما بيكون لها صوت، والرجل بيضل دايماً له الأهمية وبيعطي الأوامر..
واحدة من أكثر الاختيارات شعبية أنه رح تكبري تتطور عندك نوع من الحقد على الأنوثة وتربطيها بالضعف..
وتصيري تشمأزّي من أي شي له علاقة بالأنوثة "الأمومة مثلاً" وفيما بعد تصيري بتقلّدي الرجال بصفاتهم وخشونتهم ..
وحتى العمل بوظائف ربما ترفع من مستوى الطاقة الذكورية .. ربما لأنه ما بدك تكوني "متل امّك" أو النساء
الي شفتيهم حواليكي.. طبعاً هذا سبب واحد من أسباب كثيرة ترفع الطاقة الذكورية عندك..

ولكن واحدة من أكبر الـ Resolutions الي طلعت منها ع السنة الجديدة هي أنه اذا انتي شخص بيطمح للنجاح،
انتِ مش بحاجة للعمل 6 أيام بالأسبوع 9 ساعات للنجاح .. أنتِ بتقدري في هذه اللحظة
في أكثر لحظات انعدام استقرارك النفسي أنك تتخذي خطوة أنك تخلقي نظام عمل مستدام
بيوفر لك مساحة حرّة متناغمة مع ايقاعك .. وأنا متأكدة كل بنت بس تسمع الصوت الي جواتها
رح تعرف شو هو العمل أو المشروع الي هي بجد حابة تعمله ..

الوظيفة من الممكن تكون وسيلة لنجاحك ... ولكن اوعي تخليها "غاية" بالنسبة لك ..

​

 

[Meoω❀]

الختم الماسي - تصميم داخلي - رحلة إلى الأربعينيات - Journey To The Good Old Days

16 / مايو نورت القسم ق1 في لحظة من الهدوء، تنساب أفكاري بعيدًا، أبحر بخيالي عبر الزمن، حيث الأربعينيات تستقبلني الذكريات ! أتخيل نفسي متنقلةً بين شوارع تلك الحقبة، حيث تنعم الحياة بجمالها وروعتها ! ق1 وبينما أجول في ذاك الزمن، أجد نفسي وسط حركة ثقافتهم الجمالية ! أتأمل النساء...

anime-tooon.com

يا جماعة اكتشفت انه كتابة المواضيع وتنسيقها طلع شي ممتع ..

اشتقت لنفسي القديمة وكل ما يربطها وكل الطقوس التي كانت تفعلها .. اشتقت أن أكون نفسي مجدداً ..
أشعر أني أخيراً استعدت شغف المنتدى وسأكون حاضرة دوماً ان شاء الله ..

لا أعلم بهالمنتدى في سحر أم لا .. ولكن أشعر كل ما اختفيت في شي بيجذبني له مرة تانية..
من 2010 وأنا على هذا المنوال ما بقدر أتخلّى عن هالمكان الجميل لو شو ما مرت السنين ..


المهم نزلت هذا الموضوع ..^ أتمنى أن يعجبكم وأراكم بمواضيع أخرى قريباً ​

 

[Meoω❀]

كُنت بالعمل وفتحت مديرتي أغنية كنت آخر مرة سمعتها قبل حوالي 12 سنة..
كنتُ بالمرحلة الاعدادية .. أعاني من صدمة المراهقة وكلّ ما الى ذلك ..
كنت أسمع هذه الأغاني مع أختي قبل أن تتزوج بسنوات..

مع مشاعر النوستالجيا والحنين الى الماضي خطر على بالي سؤال ~ وأعترف ليس أول مرة يخطر ببالي

أين يذهب الماضي؟
أعني أعلم أن الماضي انتهى ..

ولكن كل شيء ينتهي أعلم مصيره .. أو يتواجد ولكن بحلة مختلفة ..
فعلى سبيل المثال عندما ينتهي حبر القلم .. نقول خلّص الحبر،
ولكن بالواقع الحبر موجود على الأوراق، فهو موجود ولكن بشكل آخر ..

أو عندما نقطع الأشجار، الأشجار لا تعد موجودة،
ولكن نستطيع أن نرى الأشجار بشكل مختلف عندما نعيد تصنيع أخشابها في مواد المفروشات وغيرها..

ولكن عندما ينتهي الماضي، فأين يذهب ؟ حتى ساعات الصباح أين ذهبت ؟
كنتُ أقول ربما تتواجد بالفيديوهات والصور .. ولكن الفيديوهات والصور مجرّد "تمثيل" أو Representation للماضي..
ولكن ليس الماضي بنفسه .. فأين يذهب الماضي؟
هل حقاً تلك الأيام بمواقفها وحلوها ومرها وناسها لم تعد موجودة ؟ أم تتواجد وتتكرر ولكن ببُعد مختلف عنا ؟



~ فضفضة ما بعد الظهيرة ~​

 

[Meoω❀]

كيف حالكم.. من يومين وجدت اقتباس مميز على تطبيق ثريدز؛
وحبيت اشارككم اياه:
​

"قبل أربع سنوات، استنكرت على أحدهم فعلا، وذممته بيني وبين نفسي، عبت طريقه ونظرت في بلائه.
الآن، أنا في نفس بلاء الشخص، أتصرف كما تصرف، وأسلك الطريق التي سلكها بحذافيرها،
بل وأسمع من غيري نفس الكلمات التي أسمعتها له من قبل،
ومن وقتها تعلمت ألا أنطق حكمًا إلا وقد خضت التجربة، ألا أذم غريقًا وأنا على اليابسة،
وألا أنظر ويدي في الماء، وآمنت بمقولة : الكل حكيم ما دامت القصة ليست قصته."​

بعد قرائتكم لهذا الاقتباس، ربما تخطر ببالكم أمثلة معينة حدثت معكم مثل الأمومة ..
عندما نظل نعلّق على الأمهات ونتفلسف ع تربايتهم ولكن لما نصير أمهات نكتشف الواقع ..
أو مثلاً شخص رسب بامتحان ونحكم عليه انه ما درس منيح وفيما بعد نلاقي أسباب كثيرة لنا أنه ما ندرس ونرسب متله ..

الحقيقة خطر عبالي مثال آخر ..
ولكن أعترف يحتاج نوع من الجرأة للحديث عنه .. وبنفس الوقت أشعر بضرورة طرحه..
المثال الحقيقة يتعلّق بالدين، والايمان - وهو أمر لا أعبّر عنه كثيرًا لأن الدين بشكل عام موضوع حسّاس ..

كلّ ما أريد قوله هو الآتي: اذا أنتَ شخص مؤمن.... فعليك أن تكون ممتن لذلك ،
لأن الايمان نعمة غير موجودة عند الجميع ..
نعم، الايمان نعمة.. يحصل عليها بعض من الناس، قد يرثها من مجتمعه وقد يكتسبها مع الوقت..
ولكن البعض الآخر من الناس لا يملك هذه النعمة، وهؤلاء الفئة بالذات جديرون بالتعاطف أكثر فئة..
فبدلًا من أن تطلق الأحكام عليهم وقبل أن تدعي لهم بالهداية ادعي لنفسك بالثبات !
لأن الايمان نعمة من الممكن أن تزول ..
هلأ بعض الناس ممكن يقولو لي: مستحيييل ! مستحيل أخسر ديني وايماني ..
أو مستحيل أكون متل هدول الملحدين "الأغبياء" .. وما الى ذلك..

ردّي باختصار: لا مش مستحيل .. وكلامك فيه نوع من التكبّر وشوفة الحال وأنا أحذرك من التباهي بايمانك !
لأن أنت بتقول هلأ مستحيل ولكن لا تدري بأي لحظة سهوة تتسائل سؤال يتبعه أسئلة أخرى
تليها دوامة من التفكير الزائد وتجد نفسك خسرت ايمانك.. لأن الايمان وأكرر نعمة
عليك بالامتنان لها والحمد أنه عندك هالنعمة وتعاطف مع الناس المش مؤمنة وبيّن لهم الجانب الجميل من دينك ..

اياك ثم اياك التباهي بايمانك ودينك لأنها نعمة قابلة للزوال وادعي ربّك بالثبات دومًا ..​

 

[Meoω❀]

لا أذكر اذا ذكرت ذلك من قبل ..
ولكن عندما كنت بالثانوية العامة ~ في السابعة عشر من عمري
وضعت قائمة بأمور أود انجازها وتحقيقها قبل أن أُكمل الخامسة والعشرين ..

الآن انا سأكمل ال 26 خلال شهرين ..وأستطيع القولُ بثقة أني أنجزتهم كلّهم حتى ما كنتُ أتوقع أنه حلمٌ صعب المنال..
أو حلم عصيّ استطعت تحقيقه بشكل ملموس الحمدلله

ولكن .. لا أعلم لمَ ولكن فجأة أدركت أن الأحلام التي وضعتها وحققتها لم تحقق لي "السعادة" ..
ربما لأني حققتهم بوقت أصبحت هذه الأمور مستهلكة وموجودة لدى الجميع ~على الأقل ممن حولي~ ؟ أو ربما لأنها كانت مجرّد أحلام ماديّة ؟
أو ربما وصلت لها متأخرة ومنهكة بالقدر الذي لا يجعلني أشعر بسعادة كاملة ؟ وخصوصاً أني شخص لاطالما كنتُ أؤجل السعادة ..
أو ربما كنتُ قد وضعتها بمراهقتي لنيل اعجاب الآخرين والتأثير على نظرتهم بي ؟


لذلك أحاول أن أتدرّب دومًا على ممارسة الامتنان ..
الامتنان على كل الأمور التي حولي .. البحث عن الجمال في أبسط الأشياء وأن أكون ممتنة لها ..
الاحساس باللحظة الحالية والعيش ببطئ والبعد عن المسابقة الوهمية الي لقينا نفسنا فيه في ظل وسائل السوشيال ميديا و عصرالسرعة ..
التدرّب على العودة لطاقتي وأفكاري الأصلية والأشياء التي حقاً أحبها قبل كل هذا التأثير القادم من هذه الوسائل والمجتمع
الذي شكّل وسيلة ضغط ومنافسة وهو ما يتغّذى عليه "الايغو".
الافتخار بانجازاتي ولكن بدون أن أربط قيمتي بها ..

هدفي الحالي هو أن أحقق السلام الداخلي .. وهو لن يتحقق الّا باعادة اكتشاف حقيقتي أو طاقتي الحيوية الأصلية
والعيش بوعي محب للذات كما كنا أطفالاً .. عدم الاحساس بالذنب عند السعادة والحصول على الحرية بدون أي قيود ..

​

 

[Meoω❀]

آخر كم سنة كنت أخاف لما أكبر سنة ..
ولكن هاي السنة بالذات كنت متفائلة مش بس لأني رجعت أتبنى عقلية انه العمر أرقام وما الى ذلك ..
بس كمان كنت حاسة انه منعطف جديد وفي شي حلو رح يصيرلي

تفاؤلي فعلاً كان بمحله ..شي كنت دايماً أحلم فيه وأتصوّره وأتخيل انه يصير .. صار بيوم ميلادي..
وخلّاني أدمع من الفرحة ....
بيوم ميلادي مبارح، أول صديقة مقرّبة لي بحيااتي (صف أول ابتدائي) رجعت تواصلت معي عل انستا ..
الي ما بيعرف أنا من مواليد ابوظبي ودرست صف أول بأبوظبي .. بعدها سافرنا على غزة اربع سنوات ورجعنا تاني على الامارات
بعد ما رجعنا الامارات ضليتني حافظة رقم تلفونها على أمل اني أرجع احاول اتصل عليها بس للأسف ما زبط..

دايماً بضل أفكر فيها .. كانت صديقتي الوحيدة بصف أول وكنا نحب نسولف ونلعب مع بعض لدرجة امهاتنا تعرّفوا على بعض..
وكتير بكيت لما عرفت اني رح اسافر وما عنا فكرة اذا رح نرجع أو لا
أنا بنت كتير وفية بعلاقاتي ~ الحمدلله ~ ومعظم علاقات الصداقة المميزة عندي اياهم من الطفولة والمراهقة والجامعة ..
ولكن لاطالما كنت حاسة انه في شي ناقص عندي .. ولسة من فترة تذكرتها وقلت ياااه مر عشرين سنة على أيامها ..
الي خلّاني أدمع انه لما تواصلت معي كلامها معي بيّن لي أنها كانت تبادلني نفسسس مشاعر الاشتياق وضلتها تفكر فيني
بنفس الطريقة الي كنت أفكر فيها .. وكانت تحط اسمي بس تنسى الباسسوورد ..
وأنا لم أكن مجرد بنت عابرة بالنسبة لها بصف أول ونفس الشي هي بالنسبة لي ..


كيف ممكن صداقة طفولة لم تستمر الا سنة واحدة .. ومر عليها عشرين سنة أن تكون صادقة هلقد ؟
عشرين سنة مر .. وكنا أطفال عمرنا 6 سنوات واليوم صرنا 26 ولازلنا محافظين على مشاعرنا النقية والخالصة اتجاه بعضنا ..


​