مدونة مميزة أيام ملؤها اليقين ~ (4 زائر)

[M O O N]

-









"ولها طبع شديد الطرب للحياة،
مسترسل في مرحه، خفيف طَيَّاش،
لو أثقلتَه بجبل.. لخف بالجبل"
( )
​

 

[M O O N]

-

وحششششششني التدوين بِشدة شديدة!
ليّا فترة أبا أفتتح المدونة بس توّ تيسر الأمر الحمدلله . .
والسبب الأول اللي حمسني وعجّل بهالخطوة:
إني أبا أشارك بفعالية الأسبوع .
< الفعالية اللي تخلص بكرا وأنا توّي جيت
الحمدلله على سلامة الوصول يا عسل

بس جد من أول يوم أبا أجي أكتب هالتدوينة
بس أحس الموضوع كبييييير وأنا عجزانة أعطيه حقه
فمو قادرة أحس إني كتبت كفاية أو شيء كويس !

المهم الفعالية كانت تتكلم عن "خير أيام الدُنيا"
كيف إستعدادنا لها ؟ وشوقنا لعرفة. . يوم جبر القلوب يا رب ~


بالنسبة للإستعداد لهالأيام -اللي أصلًا بدأت . .
بس لساتنا بأولها، وتذكروا إن دائمًاااا فيه فرصة للتحسين!
لحد يحس إنه تأخر في إستغلالها فيوقف! إذا كان لو قامت القيامة
وبيدك فسيلة.. المطلوب منك تحااول تغرسها بسررررررعة!
فكيف بأيام عظيمة تتراخى فيها لأنك تحس نفسك متأخر وفاتك تستعد من البداية،
أيعقل؟ -
يعني لو ما تدرك فضل هالأيام إلا بآخر يوم أو حتى بآخر ساعة منها
فحااااااااول تستغلها قد ما تقدر . قطططع نفسك بإستغلالها
ولا تحقررن من المعروف شيئًا ولا من الخيرات عمومًا . .
وتذكروا أن لنا رب رحيييم لطيف كريم! يخبي لنا عظيم الجزاء أكييييد
وما يضيع عنده أي عمل، ولا حتى النوايا! كلها محفوظة عنده


بالنسبة لعن الإستعداد لهالأيام. .
فبشارككم تغريديتين تختصر كلام كثير،
التغريدة الأولى #هنا ، التغريدة الثانية #هنا
وركزوا عالتغريدة الأولى ، خير أيام الدُنيا هذه!!
شيء عظيييييييم! وفوق كذا "أيام يحبها الله!"
هل تستوي أيام يحبها الله بسائر الأيام ؟ لا والله ):
++ أيام نصل فيها لمنزلة "المجاهد في سبيل الله"
مستوعبين العظمة؟ المجاهد خرج من بيته وترك أهله وماله
وكُل ما يحب، وأعطى عمره لله، والعمر هذا أغلى ما يملك الإنسان
وبالمقابل انتَ يا مسلم قاعد في بيتك، تقرأ قرآن وتصلي وتتصدق تحت سقفك الآمن
وسط أهلك وأحبابك حولك وعمرك باقي لك . . تتساوى بهذا المجاهد!
عظمة ما نقدر نتخيلها ويحزززززززن مرة إنو نفوتها ):

حاولوا تعملوا أعمال صالحة بدوووون توقف ،
طوال الوقت فكروا "ايش ممكن اعمل الآن شيء يحبني الله لأجله أو يزيد ميزان حسناتي؟"
صلوا السنن الرواتب، تصدقوا يوميًا لو بمبلغ يسير أو بإطعام الحيوان أو بابتسامة،
اقرأوا القرآن وتذكروا أنه يأتي شفيعًا لصاحبه ، اذكروا الله طوال الوقت
وهذا أييييسر وأسهل عمل، لا تعدي ساعة بدون ذكر، اذكروا الله بكل أحوالكم ~
اتركوا متابعة المسلسلات أو أي فعل غير جيد من باب "تعظيم شعائر الله" واحتسبوا النية

أيام عظيمة، الأجور فيها مضاعفة،
فرصة ثمييييينة . . لا تفوتوها ):
خل نستغل كُل ثااااااانية فيها لله ولدار البقاء ~

أما عن دعواتي بيوم عرفة وشوقي العظييييم له
فمن جد هنا حأسكت لأني ما حقدر أكتب، هاليوم وهالمشاعر أكبر وأثقل
من إنو الكيبورد المسكين يشيلها ، بسس جهزوا دعواتكممم
حيجينا عرفة ومعاه كُل اللي بخواطرنا !
الله يبلغنا

*شعوري بهالأيام. .
تعرفوا شعور فرحة العيد؟ وحنية لمة العائلة ومكالمة أحباب القلب؟
لما تحسوا إن الفرحة فااااائضة منكم وزايدة عليكم حتى من كبرها!
ويبدو كأن الفرح منتشر بالجو، نتنفسه ويتكاااااااثر بشكل غريب
بأول يوم بالعشر، كان هكذا شعوري! وأكثثثر كمان! بشكل كنت مستغربة منه
لأن بصراحة هذي أول سنة بحياتي أحس بعظمة هالأيام وفضلها ):
++ كمان لأن آخر 3 أسابيع من حياتي كانت شيء مُتتتتعب جدًا
وضيقة غير طبيعية مسيطرة طوال الوقت، ودائمًا أحاول أعدي الوقت وأنا أقاوم
أقاوم مشاعر، رغبات، كلمات، وحاجات كثييييييير ! تعب تعب تعب
وفجأة بدون سبب تطيح الدموع، يعني جد كان حال خانق !
وبس دخلت العشر ارتاح قلبي وهدأ وسكن . .
الحمدلله اللي يبدل تعبنا براحة وقلقلنا بسكينة وحزننا برضا،
الحمدلله الحمدلله الحمدلله
و والله متأمللللة فهالأيام الخير الكثيييييير
وأدري إنه سبحانه حاشاه يخيب هالآمال والظنون

الله يوفقنا وإياكم لما يُحب ويرضا ويرفعنا بهالأيام منازل في الجنة
ويخرجنا منها بحالٍ أفضل من الحال اللي دخلناه بها . .
ويبلغنا تحقيق دعوات عرفة يا رب يا رب يا رب ~

- لا تنسون يارا من دعواتكم ،
وموتى المسلمين ومرضاهم والمستضعفين في الأرض

 

[M O O N]

-

صباح الخير





فجأة جاء عبالي لو أصمم رمزيات فيها التكبير . .
نذكر بعض ونكسب أجر بعض بهالأيام الفضيلة ~
صح مب أحلى شيء بس تؤدي الغرض لأن الحياة تجري وما فيه وقت xD

طيب ليش نكبر بهالأيام أصلًا ؟
لأن النبي صلى الله عليه وسلم وصانا به لما قال :

(ما مِن أيَّامٍ أعظَمُ عِندَ اللهِ ولا أحَبُّ إليه مِن العَمَلِ فيهنَّ مِن هذه الأيَّامِ العَشرِ،​

فأكثِروا فيهنَّ مِن التَّهليلِ والتَّكبيرِ والتَّحميدِ.)​

ونقدر نهلل ونكبر ونحمد بأي صيغة تجي على لساننا
ما فيه صيغة مقيدة ، ولكنّ الأفضل الصيغة المذكورة بالرمزيات . .
" الله أكبر ، الله أكبر ، الله أكبر ، لا إله إلا الله . .
الله أكبر، الله أكبر، ولله الحمد "

طيب تدرون إنه فيه ثواب آخر غير إنها عمل يحبه الله؟
وهو حديثه صلى الله عليه وسلم:

(ما أَهَلَّ مُهِلٌّ قطُّ إلَّا بُشِّرَ ، ​

ولا كَبَّرَ مُكَبِّرٌ قطُّ إلَّا بُشِّرَ ، ​

قيل : بالجنةِ ؟ قال : نَعَمْ )​

تخيييلوا الفضل العظيم! الجنة!
فقط من ترديدنا لكلمات قليلة يسيرة . .
يبشرنا الله بالجنة ! وأي بشارة هذه ؟

وبالحديث عن الجنة نستذكر قوله صلى الله عليه وسلم:

(ويؤتَى بأشدِّ المؤمنينَ ضرًّا ، وبلاءً ، ​

فيقالُ: اغمِسوهُ غمسةً في الجنَّةِ ، فيُغمَسُ فيها غمسةً ، ​

فيقالُ لَهُ: أي فلانُ هل أصابَكَ ضرٌّ قطُّ ، أو بلاءٌ ، ​

فيقولُ: ما أصابَني قطُّ ضرٌّ ، ولا بلاءٌ)​

متخيلييين ؟؟؟؟؟
أكثرررر أهل الدنيا بلاء. . اكثر ناس تعبوا وتعذبوا وفقدوا وتوجعوا وبكوا
لما يغمسون بالجنة غمسة واحدة فققققط ، غمسة سريعة ويطلعونه
يعني لسا ما لحق يتنعم أو يستمتع بالجنة وما فيها . .
لكنّ ايش؟ بعد هالغمسة. . ينسى كُل البلاء والضر !
بمعنى إن الحلاوة واللذة والمتعة اللي حسها بهالغمسة. . هوّنت عليه كل ما فات
باقي شرح الحديث موجود #هنا ~

اللهم إنّا نسألك الجنة وما قرب إليها من قولٍ أو عمل
ونعوذ بك من النار وما قرب إليها من قولٍ أو عمل . .
ووالدينا ومن نُحب يااااا رب ~

-

"‏الأماكن التي ترفع فيها صوتك بالذّكر والتكبير والتسبيح
ستَشهد لك في يومٍ تحتاج فيه إلى شهادة (يومئذٍ تُحدّث أخبارها) ..
‏فازرع شهودَك في كلّ مكان.
‏
الله أكبر، الله أكبر، الله أكبر، لا إله إلا الله، الله أكبر الله أكبر ولله الحمد."

 

[M O O N]

-

قبل أيام كان حفل خِتام إحدى الصديقات -الحبيبات والعزيزات جدًا جدًا- للقرآن
كان يوم مليء بمشاعر مختلفة بس حُلوة مررة!
وتقريبًا كان من أكثر الأيام اللي بكيت فيها -بس بكاء لذييذ الحمدلله-
وصدق يعني صدق ايش فيه أحلى من إمتلاءك بمشاعر حلوة
. . . لدرجة إن عيونك تفيض بالدمع ؟؟ ~
اهٍ كم كان شيء حلللللللو ، الحمد لله .

+ كانت لأول مرة بحياتي أحضر مثل هاللحظات . .
البنوتة سمّعت آخر نصاب لمعلمتها قدامنا بالحفل
-كان حفل إفتراضي عالـZOOM-
النصاب= النصف الأخير من جزء عم ، الشعور مهييييب جدًا . .
البنوتة تقرأ وصوتها يرتجف وشويات توقف وتبكي وبعدين تكمل

الله يتمم لها ويقبل منها ويثبتها على ما هي عليه ويزيدها من كُل خير ~
ويبلغني هذا اليوم وهذا الشعور ياااااا رب
والآيات ثابتة في صدري أسردها دون تردد ولا خطأ يا رب يا رب ): . .

__________ أيضًا يومها صار شيء رائع جدًا جدًا !
كتبت بتويتر تغريدة عن مشاعري بهالحفل وهكذا
ومين شافها ؟ وحدة تتابعني -معلمة قرآن بأحد الحلقات-
ما أعرفها أبدًا ، بس جات تعلق على تغريدتي بالخاص . .
وقالت إنها أيضًا حاضرة حفل الختم هذا ، وإنها مسرورة من حماسي
مع البنوتة ، وجلست تحكيني عن لذة مجالسة القرآن والسعي له
وأفضاله وخيراته و و و و .. كلام حلو مرة
وبعدين قالت لي إن عندها حلقة حفظ عن بعد لو حابة أسجل معاها
وعزمتني عليها بإصرار كبييييييير !

< وأنا بالأصل عندي حلقة يعني xD بس يبدو إنها توقعت عكس ذلك ~
<< بس الصدق يعني. . حلقتي إجازاتها كثييييييرة ! لأنها موسمية
ونظامها شوية دلوع ، وبكل إجازة أقول لنفسي خلاص بدور حلقة ثانية!
يعني تكون مستمرة بدون إجازات ما لها داعي . . عشان أقدر أستمر وأنجز كويس
بس كل مرة مدري ايش يصير وما ألاقي ! أو ما يعجبني نظام الحلقات المتاحة
أو يصير فيا تخوف صغيييير من بعض الأمور . . وليا سنتين يعني على هذا الحال

فجلست أفكر هنا إنو هالأستاذة جات بنفسها تدعوني لحلقتها
وحلقتها دائمة ، و نظامها حلو مرة ، و وقتها مناسب جدًااا . .
ليش ما أسجل ؟
فـ توكلت على الله وسجلت وكلمت صحباتي وتحمسوا معايا
وسجلنا كلنااااا وأنا الآن متحمممممسة ليوم الأحد بشكل لا يوصف !

ومن الصباح مشغولة بتأمل هالأمر . . سبحان الله العظيم ، سبحانه
يعني مين يجي عباله إني بكون داخلة حفل وفجأة تجيني معلمة تعزمني على حلقتها
فجأة كذا ؟ ومب أي معلمة . . لا، معلمة متمكنة ورائعة
ومب أي حلقة. . لا، حلقة بنفسسس النظام اللي أحبه وبتوقيت يناسبني تمامًا !
فجأة يا ناس فجأة عطاني شيء مرة أباه وأحتاجه . . بدون سعي مني ولا حولٍ ولا قوة!

من حيث لا أحتسب فعلًا . . سخر لي هالمعلمة وخلاها تكلمني بنفسهاا !
من بين الناس كُلها ، خلاها تنتبه لتغريدتي بهالوقت تحديدًا وتسعى لإنها تكلمني ):
ومع اني تأخرت بالرد عليها إلا إنها رحبت بي جدًا . . وتحملت تأخيري وأسئلتي وترددي

ياااااه على ألطافه العظييييمة التي لا تعد ولا تحصى ولا توصف ):
مثل هالأمور تزيد يقيني بأن رعاية الله كبيرة و واااسعة
{ إِنَّهُ كَانَ بِي حَفِيًّا } - طمأنينة كبيرة كبيرة كبيرة، الحمد لله . .

دائمًا متأكدة إن الله يختار لي الخير ويجيب ليا الخير
دائمًا عينه تراني ، ويده تلمس قلبي ، ورعايته تنقذني ، وألطافه تجبرني وتسعدني
دائمًااااااااا - "عرفنا الله رحمانًا رحيمًا" وهذه أهم معرفة لازم يغرسها الإنسان في قلبه
ويسقيها دااائمًا بالتأمل والشكر وحسن الظن به عز وجل ~

ونرجع ونقول: الحمد لله اللي خلقنا مسلمين ~

 

[M O O N]

-

أنا متأكدة إن "حياتي" هي أحد مرادفات كلمة: زحمة .
مو طبيعية درجة الإزدحام اللي أعيشها . .
وصخب عااااااالي مستمر على مدار اليوم،
لحتى أحط راسي عالوسادة والصخب لساتو ما هدأ ): ~

بصراحة تعب تعب تعب تعب شديد !
عارفين اللي ببالي 70 شغلة أبا اسويها . .
سواءً ضرورية أو مجرد شغلة أنا بخاطري أسويها، أتمناها يا جماعة !
بس يومي ما يكفي أبدًا ، وحقيقةً أحيان أحس مو عارفة وين يروح وقتي أصلًا ؟

وللأمانة والعدل يعني. . ما يُهدر وقتي أبدًا الحمدلله
يكون اليوم مليء إنجازات، بس عند الإنجازات.. ما فيه شيء يملأ عيني
أبا يكون الإنجاز 100% حتى لو اليوم ما يستوعب كُل هالـ 100 ~

ياه تقريبًا هذي معضلتي بهالأيام ومشكلتي الوحيدة ><
فـ كُل ما جيت عبالكم.. ادعوا لي بالبركة في الوقت والجهد .

____________ من جهة ثانية :
بغض النظر عن التقصير الدائم اللي أحس به. .
إلا إني سعييييدة لأني مشغولة لهالدرجة، الإنشغال نِعمة !
كُل ساعة من يومي فيها عمل رائع ، يستحق الإحتفاء. . عالأقل مني أنا ~
أحس إني مترفعة عن السفاسف والتوافه بهالحال ، فالحمد لله .




لا إله إلا الله، وحده لا شريك له . .
له الملك وله الحمد وهوَ على كل شيء قدير ~

 

[M O O N]

-

صبااح النوووووووووور

مدري ايش جابني هنا الآن ؟
بس فجأة حسيت اني مشتهية أدوّن ، وبشكل عام هالأيام
صايرة أشتهي أشياء غريبة بدون أي مبررات . .

قبل شوية كنت في نقاش ( ولعلي لسا مليانة وجاية أفرّغ هنا )
عن العطاء باسم المحبة أو اللي تتوجبه المحبة ،
وكيف انو فيه ناس بخيلين فيه ! رغم إني أشوف البخيل غير مُحب أصلًا. .
هذا كذاب بإختصار ، كذاب يموّت من الضحك برضو .

وهنا نقصد العطاء بكل أشكاله .. كلمة جامعة،
للفعل، الكلمة، النبرة، النظرة، كُل الجوانب المادية والمعنوية . .

وبالطاري هنا.. أسمى شيء يكون بيد المحب -الحقيقي-
هو إنه يعطي الوضوح، الطمأنينة، وطبعًا الصدق . .

برضو هنا أحس إني مبسوووووطة بوجود أشياء تسهل علينا الحياة
يعني يكفي الإنسان إنه يشوف كم تصرف صادق، ويحس بالطمأنينة
عشان يتأكد إنه مع الشخص الصح وفي المكان الصح .


ومن هالناحية أنا بحياتي: ما أنتظر الكرم بالعطاء ،
لا ، أنا أستحق السخاااء ، أن تنهمر العطايا دون حد
وبزيااادة ، تفيض عليا وترسم حواليا قلوب .

وأخيرًا أختم التدوينة بشعور اللحظة :
"عندي شعور وردة ترقص بالأغصان"
وايش يرّقص الورداية غير قلب المُحب؟

*حفوني بدعواتكم الطيبة للتيسر والتمام
في كُل أمري وبرضو إدعوا لحلقي..
الله يزيده صبر عشان المسكين تعبان وأنا اكل ايسكريم الآن xD

لا إله إلا الله.. وحده لا شريك له،
له الملك وله الحمد وهو على كل شيء قدير ~

 

[M O O N]

-

التدوين بنهاية اليوم متعة لذيذة ~
كان هاليوم حافل بأحداث تحمل مشاعر مختلفة . .
مرة مفجوعة من الحاجات اللي جالسة أكتشفها بالحياة !
ومرة مبسووووووطة من الرقة اللي أنا فيها
ومرة غضبانة - ما حقول ليش -
وكثير . . حاجات مصيرها تجي تنكب هنا ح

أهم شيء عشته اليوم -بالنسبة لقلبي- :
إنو جاء مطر ، مطر شديييييييييد قوي
< تو تذكرت إني ما دعيت فيه كثير ! اهخ الله يرحمني من القهر
بس قلت "يا رب" ومتأكدة إنها كافية وإنه سبحانه مطلّع على قلبي الغلبان
وحينوله مراده عاجلًا < خلاص واسيت نفسي يعني ~
* بس مواساة حقيقية * 1

المهم . . المطر بدأ شديد وصار يخف ويوقف شوي
وبعدين يرجع خفيف ويشد نقطة وبعدين يرجع خفيف
وهكذا ، يعني ما ثبت على حال غير أول نص ساعة لما كان شديد ~

فجأة ايش اكتشفنا ؟ الموية خلصت ><
ولازم نشبك سلك موجود برا لحتى نلاقي موية . .
ومرة كنت خايفة، كيف نقرب للكهرباء والدُنيا مطر ؟؟؟؟
وبنفس الوقت نحتاج الموية مرة
وماما وبابا مو موجودين بالبيت فلازم الأخت الكبرى تتصرف
بس الأخت الكبرى كانت حتموت خوف

كنت مستعدة نكمل اليوم بدون موية .. بس اخواني قالوا عادي نشبكها !
وكانوا حيطلعوا يشبكون السلك همّا !!!!!!!!!!!!!!
وهنا الأخت الكبرى رجع صار لها ON وبطلت تخاف

قمت بسرعة خرجت عشان أسبق أخواني واشبك السلك أنا
لأن مرة خفت عليهم ، مدري الموضوع خطير فعلًا ولا أنا اوفر ؟؟
بس الصدق إني كنت مرعوبة جدًا جدًا . . وما كنت مستعدة أشوف أحد يتأذى من هالأمر

طبعًا كيف الخطوات ؟ نحتاج نشبك سلك وبعدين نطق زر جنبه تمامًا
وبعدين نروح نطق زر ثاني بعيييد عنه مرة . .
فأنا قفلت كُل الأزرار أول ، من باب أضمن شوي إن الكهرباء بعيد عني
وبعدها مسكت السلك وجيت بشبكه . .

باللحظات هذي اللي السلك كان بيدي ، كنت جالسة أفكر
وش أسوأ شيء ممكن يصير بعد شوية ؟
امم ممكن أتكهرب ؟ ممكن أموت مصعوقة ؟
دقيقة ؟ أموت !! حتوصل للموت مرة وحدة ؟
وليش ما أموت يعني ؟ وش الغريب بالأمر ؟
بس كذا أموت الآن يعني ؟ بهالوقت ؟ بهاليوم ؟
طيب من قال إن الموت له مقدمات ؟ ممكن هذا يحصل الآن
وممكن السلك يكون السبب ( : !
< حوارات داخلية جواتي
بعدين جلست أفكر طالما أنا -بإعتقادي- إني على حافة الموت بهالأمر
ليش ما تركت اخواني يشبكونه ؟ ايش هالتضحية ؟

انبسطت من نفسي جدًا ، بصراحة ما توقعت إني إنسانة كذا . .
مو عارفة أشرح الشعور بس جد سعييييييييييييييييييييييييييدة به
الحمد لله ، وإن لم تكن حقيقة الأمر كذلك - مش خطير - .. يكفي إني أنا حسيت كذا .

المهم خلاص قفلت الحوارات الداخلية الزفتة هذي
ومسكت السلك وقلت بسم الله، اللهم اني استودعك نفسي فافحفظها
وشبكت السلك وأنا مغمضة عيوني
بعدين فتحت ؟ أطالع حواليا ؟ أنا لسا حية !!!
اهههخ الحمد لله ، ما تتخيلون حجم الرعب اللي راح وقتها
وصرت شجاعة ومرتاحة جدًا . . وقررت أطق أول زر بكل ثقة و قوة 1
ثم ماذا ؟؟ تكهربت من طقة الزر
مدري ايش صار بس شكله كان مبلل ويدي مبللة أو مدري ايش
بس عورني مرة وصحت بقوووووة xD
تجمعوا أهلي عليّ وقلت لهم يطقون الزر الثاني عشان خلاص
أنا تضحياتي خلصت !

والحمد لله الذي أنجانا منها فعلًا . .
موقف صغير وقصير جدًا جدًا ، بس تأثيره عجيب
للآن جالسة أفكر ماذا لو كانت فعلًا هذيك آخر لحظة بحياتي ؟
طيب ماذا لو كانت هاللحظة فعلًا آخر لحظة بحياتي ؟
ليش نمشي بالحياة وإحنا نحسب أعمارنا ما لها نهاية ؟
ليش ما نحسب حساب إن بهاللحظة حننتهي ؟

المضحك المحزن إن أكثر شيء جاء عبالي :
ما أبا تجي النهاية وفيه حقائق غائبة عني بهالحياة ،
طاردت أشياء كثيرة وما حصلتها . .
بقت آخر مطالبي : الوضوح/الصدق ، يا رب .

 

[M O O N]

-

أنا متعبة ،
أحس بتعب شديييييييد جدًا
هذاك التعب اللي تحسون منه إنكم مب قادرين ترفعون راسكم ولا تتحركون شبر من ثقله
أتخفى قد ما أقدر ، بس الأمر صعب . أحتاج أصير مو متعبة الآن .
العجيب أو السعيد -ما أدري- إن هذا الشعور من زماااااااان ما جاني
يمكن شهرين أو 3 أو 4 كمان ، وهذي نعمة ، فالحمد لك ربي . .
ياه الإنسان كمان مو معقول ينتظر تبقى حياته وردية طول الأيام !
بس اللي حاز بالقلب إن السبب الأكبر في هالتعب : حدث بسبب إنسان آخر !!
وأنا الي عاهدت نفسي بأن ما أسمح لأحد يأثر عليا أبدًا . . لأن محد يستحق .
غضبانة على نفسي ، بس أرجع أقول معليش يارا .. بني آدم ضعيف
والله يتولى من يتفنن في أذية أرواحنا ، يجازيه رب العرش ذو القوة المتين .

ومن ضمن الأسباب تندرج الأعمال الكثيرة الملقاة علي أو اللي أنا رامية نفسي وسطها
أعمال شخصية ولاهلي ، للجامعة ، للنادي ، للمبادرات ، للحلقات . .
أحتاج إجازة بششششششدة ! بس هالفكرة تبدو شوي مستحيلة وسط هذه الذروة
أحتاج أتخفف ): أحتاج أحس روحي طايرة كما أعرفها يعني . .

جوالي ملياااان بمحادثات مدري كيف وصلت لهذا العدد
ومدري كيف أنا أعرف كل هالناس ؟ وليش أعرفهم أصلًا ؟
وآخرين يُلِحون كل شوي بتكرار الرسالة " وينك؟ ردي!" و و و و حاجات فوضى، تعوّر راس البني آدم .

أتمنى الآن أختفي ، لعلها تكون هذي إجازتي ؟
يا رب . .

 

[M O O N]

بعد كتابتي للتدوينك السابقة بدقائق معدودة!
وصلتني هالرسالة :


انبسطت ذكّرت قلبي بأن أقدار الله حانية
وألطافه لا تنتهي، يرعانا ويرانا .. وطالما إنه معانا فهذا يكفي .
الحمد لله

سؤالها شيء كبير ويعني لي جدًا
وجد جالسة أفكر كيف خطر لها تسألني هكذا الآن ؟
بالرغم من إن شكلي من برا طبيعي جدًا! أو هذا ما أحاول فعله يعني
وتوّي مغردة بتويتر بكل رواقة ومنزلة سنابة سعيدة وكل شيء من برا اوكيه
بس نرجع ونقول.. قلوب الأحباب .

 

[M O O N]

-

صحيت اليوم رايقة الحمد لله . .
< زمن السرعة فعلًا ~

أحب روحي وأحب كيف أعرف أخليها أفضل دائمًا
ومن أبسط شيء ممكن تطيب وتسعد ~

رشة مطر ، كوب حليب شوكلا ، ترويشة سريعة ، غفوة صغيرة ،
كلمة حلوة ، خيال سعيد . . والكثير من الأشياء البسييييييييطة اللذيذة .

ومما يساعدني كثير على أني أصير أحسن. . أن:
المؤمن القوي خيرٌ وأحب إلى الله من المؤمن الضعيف !
ولو أن في كلٍ خير صحيح، لكن يبقى "القوي" أعلى مكانة ومنزلة
وأفضل أجرًا .
وإحنا مع الله نبا الأحسن والأفضل والأكمل والأعلى، ما نرضى بالقليييل أبدًا !
وكُل ما شديت على نفسي وقويتها واستشعرت إني هكذا صرت عند الله أفضل.. أفرررررح
وإن كنت أشد على نفسي بالآي والأحاديث.. فهذا يبكي من الفرح مو بس يفرح
الحمد لله، الحمد لله، الحمد لله !!

وبعد فترة إنشغالات وأعمال جادة . . قررت أخذ بريك ليلة كاملة
كنت بس قاعدة ألهو وأمرح فيها بدون سبب وبدون فائدة مرجوة
وأحس الإنسان في أحيان كثيرة يحتاج يعيش حالة "اكل ومرعى وقلة صنعى!"

++والله لاحظت شيء .. ما يضيق خلقي هالفترة إلا بالويكند!
وبس نبدأ بالأسبوع الجديد.. يطيب قلبي
وبعد تفكير وتحليل وحسابات و و و .. اكتشفت السبب !
وهو أن : بالويكند إجازة من الحلقة ، فما أفتح المصحف
ولا أحفظ ولا أكرر ، غير يوم الجمعة لما أقرأ الكهف ~

وللأبد لا شفاء ولا أُنس زي القرآن
فالحمد لله اللي أنزله علينا وجعلنا من أهله ~

طبتم وطاب المساء على قلوبنا وقلوبكم . .

لا إله إلا أنت سبحانك إني كنت من الظالمين .